1. Teleŋ kuɛɛ Kilisiɔŋaa pɔyaŋnda kpou cho yɛ lakɔ choo choo?

 O PAANDOO niŋ, mi wanaa Chɛhowaa ndaa nyunaŋ aa, ‘Teleŋ kuɛɛ wana mɛɛlaa o Kilisiɔŋaa pɔyaŋnda choo, cho yɛ lakɔ choo choo?’ Miŋ yiyaŋ maa Kilisiɔŋaa pɔyaŋnda a tiŋ wa niŋ o lɛŋndeŋ choo o Kpele Hɛnɛkiɔɔ niŋ le teleŋ tiŋ, te chɔu Amakɛdɔŋndo hiou pɛ. Kɛ miŋ pɛɛku o Bandu Mɛŋgɛlaa hoo, Suɛɛsɔɔ 15, 2013 niŋ maa, Kilisiɔŋaa pɔyaŋaa cho wɔ o lɛŋndeŋ choo wa, cho lakɔ fɛŋ choo choo tuupa mi chɔu Amakɛdɔŋndo kanduŋ.—Maa. 24:31.

2. Vɛɛ naŋ nyunaŋ yɛ lepum, nduyɛ yɛɛ naŋ cho yɛ pɛɛku o buŋgɛi hei niŋ?

² Kɛ, miŋ nyunaŋ dɔɔ aa: Yɛɛ cho yɛ yɔŋnɔŋ a ‘saa cheleŋaa’ cho wa Chɛhowa piɛiyo o laalaŋndo choo o lɛŋndeŋ choo wa, a teleŋ “nyɛpalaa bɛndoo”? (Chɔŋ 10:16; Maa. 24:21) Mi apum buulaŋ maa, te puaapiliaa a ndepiliaa ndaa pɔyaŋnda kuɛŋnuŋ pɛ choo choo, a cho wa kpeele nduyɛ a sina niŋ nyɛ nda nɔ ma tosa wo le. Ŋ yaasiaŋndɔ konalaŋ latiɔɔŋ o Baabuiyo niŋ, la huŋ nda o kɔl le yiyaŋnda waa lende nɔɔ laŋ. Okoŋ miŋ pɛɛku sabula naŋ nɔ miŋ buulaŋ te laŋ.

YƐƐ CHO YƐ YƆŊNƆŊ TE?

3-4. Vɛɛ apum yiyaŋ yɛ, nduyɛ le yɛɛ?

³ Mi apum yiyaŋ maa, saa cheleŋnda cho tonyaa malɔɔ, te Dialii Kuumbaŋ Choo Ve ve lɛ le nda nɛila chɔmaalaŋ kioo le. Naapum yiyaŋndo o bundɔŋ Baabuiyo ŋpum choo tosa ni ma nɔ siooŋii waa lende. Ŋ yaasiaŋndɔ tamaseliilaŋ latiɔɔŋ. O tasoo cho a Chɛhowada, Masa Wanaa Soliaa Lasalaa ni. Wana ndoo piɛi Mɛlɛka o laalaŋndo choo wo o wa ni. Mi ndu nda Chɛhosiɛba laa ndɔ, manda Chowaasi teleŋ o wa o pɔmbɔ wo. Nduyɛ ma mala ndu mbo simnuŋ masa kɛndɛ. Teleŋ Chɛhowada  wa yoomu wo, Chowaasi wa tosaa nyɛkɛndɛi. Kɛ mɛɛ Chɛhowada vi, mi Chowaasi kandu sɔɔŋ wɔɔŋndoŋ tosaa. Mbo yaŋ sila waŋ bɛnduaa dɛnɛ wɔɔŋnda nilaŋ, nduyɛ mbo mal Chɛhowa piɛiyo.—2 Kolo. 24:​2, 15-19.

⁴ Tamaselii diiŋ ndɔɔ cho a Kilisiɔŋaa wa o wɔsiŋ kɛmɛ lediiŋ ndoŋ niŋnda okɔɔ ni. Kiilanɔ mɛɛlu wu wo wa Chɔŋ ni. Teleŋ o wa yoomu wo, mbo mala Kilisiɔŋaa bɔɔbɔɔ le loo o laalaŋ ndaa choo. (3 Chɔŋ 4) Maa kiilaa Chiisuaa apiliaa, mi Chɔŋ bɛɛ tosa wallo kalaŋ, yɔŋii waŋndo ndoo huŋ a pɛɛkula lachoowalaŋ vɛlɛ a naamula wɔɔŋndaŋ o kundaa niŋ. (1 Chɔŋ 2:18; tofa bolii Baabui nda tɛɛsiaa le pɛɛkoo ve, le 2 Tɛsa. 2:7.) O piɔm Chɔŋ ndo kɔɔli, mi Kilisiɔŋaa bɔɔbɔɔ o kundaa niŋ tual pɛɛkula lachoowalaŋ kɔɔli. Mɛɛ wɔsilaŋ latiŋ la hiou okoŋ kɔɔli, mi kunda leKilisiɔŋndo kpou laasiaŋ.

5. A mɛɛ naŋ pɛɛku o konala tiɔɔŋndaŋ o Baabuiyo niŋ yɛ, yamɛi kuɛɛ naŋ nɔ yɛ miŋ kelu le?

⁵ Baa konala tiɔɔŋndaŋ ndaŋ la chɔm pa maa, nyɛ pilɛ koŋ kpe cho yɔŋnɔŋ a saa cheleŋnda ni te Kilisiɔŋaa pɔyaŋnda kuɛŋnuŋ pɛ choo choo? A teleŋ koŋ, baa Kilisiɔŋaa laalaŋaa cho wa o lɛŋndeŋ choo wa mal niŋ pa pɛɛkula ndalaŋ mɛɛ Chowaasi tosa yɛ? Baa a tual niŋ pa pɛɛkula lachoowalaŋ kɔɔli mɛɛ Kilisiɔŋaa bɔɔbɔɔ wa o wɔsiŋ kɛmɛ lediiŋ ndoŋ niŋnda tosa yɛ? Sako! Ŋ nɔ tiindaŋndo maa, te Kilisiɔŋaa pɔyaŋnda huŋ kɔŋnuŋ pɛ choo choo, saa cheleŋnda cho hiouwɔɔ lachi a Chɛhowa piɛiyo. Nduyɛ o cho nda manda. Le yɛɛ naŋ nɔ yɛ tiindaŋ waa lende?

PIƐILE TONYALEŊ LE LAASIAŊ NIŊ TE

6. Teleŋnda yaala kuɛɛ naŋ cho yɛ yaasiaa?

⁶ Le yɛɛ naŋ nɔ yɛ tiindaŋndo maa piɛile tonyaleŋ le laasiaŋ niŋ te, mi che bɛɛ teleŋnda kala kalalaŋ la cho naa lachi? Kanifuule, Baabuiyo tɛɛsiaa maa teleŋ Isɔluɛiya, a teleŋ Kilisiɔŋnda o wɔsiŋ kɛmɛ lediiŋ ndoŋ niŋ cho teŋgeŋ a teleŋ naa hoo. Lelaŋ, ŋ yaasiaŋndɔ teleŋnda yaalaŋ ndaŋ nyɛkɛndɛi: (1) Teleŋ Isɔluɛiya o sindɔɔ niŋ, (2) teleŋ kiilaa sɔla piɔmndo wo, nduyɛ (3) teleŋ naa, “teleŋ Mɛlɛka cho nyɛ o nyɛ fee miŋgi toosiaa wo.”—Walta. 3:21.

7. Masaa a waŋnda o Isɔluɛi niŋ sindɛ wa sɔɔŋ wɔɔŋndoŋ tosaa. Kɛ le yɛɛ wanaa wa Chɛhowa piɛiyo o laalaŋndo choo wa tembu kɔl te?

⁷ Teleŋ Isɔluɛiya o sindɔɔ niŋ. Tuupa mi Muuse sɔla piɔmndo, mbo dimul Isɔluɛiya aa: “I sina kɛsɛ maa te I vi pɛ, la cho wa sɔɔŋ wɔɔŋndoŋ tosaa, mi la faŋaŋ o nɛi ya dimul nya le kɔlaŋ ndo choo.” (Ditɔnɔ. 31:29) Mi Muuse sila vɛlɛ Isɔluɛiya maa, te a tosa nilakalulaŋ pɛ, a cho lakɔ a nda o chɛleŋ niŋ. (Ditɔnɔ. 28:​35, 36) Baa mi diomndaŋ ndaŋ la peeluŋ pa? Ei. O wɔsila hiou laŋ niŋ, mi masaa bɔɔbɔɔ tosa sɔɔŋ wɔɔŋndoŋ nduyɛ ma tosa mi wanaa Chɛhowaa mal ndu piɛiyo. Le hei, mi Chɛhowa tusi wanaa dɛnɛ wɔɔŋnda nyɛpalaa choo, nduyɛ o chɛllɛ mi wana o wana wa masaa wanaa nduaa choo o Isɔluɛi niŋ te. (Isi. 21:​25-27) Kɛ, mi Isɔluɛiyaa wa Chɛhowa piɛiyo o laalaŋndo choo wa sɔla kɔl dɛɛniaa mɛɛ nda che diomnda Mɛlɛkalaŋ o peelɔŋndo.—Aisaya 55:​10, 11.

8. Baa kɔndɔfillo nɔ pa mbo bii naa mɛɛ kunda leKilisiɔŋndo o wɔsiŋ kɛmɛ lediiŋ ndoŋ niŋ laasiaŋ? Tɛɛsiaawɔ.

⁸ Teleŋ kiilaa sɔla piɔmndo wo. Baa kɔndɔfillo nɔ pa mbo bii naa mɛɛ kundaa o wɔsiŋ kɛmɛ lediiŋ ndoŋ niŋ laasiaŋ? Sako. Mi Chiisu dimi maa pɛɛkula lachoowalaŋ la cho luɛiyɔɔ o kundaa niŋ. (Maa. 7:​21-23; 13:​24-30, 36-43) O wɔsiŋ kɛmɛ tasoŋ niŋ, mɛɛ Chiisu faŋaŋ, mi kiilanɔɔ Pɔɔl, Pitɛ, a Chɔŋ cha huului Chiisu dimi ve o peelɔŋndo kpendekele. (2 Tɛsa.  2:​3, 7; 2 Pitɛ 2:1; 1 Chɔŋ 2:18) Mɛɛ kiilanɔ mɛɛlaa sɔla piɔmndo, mi Kilisiɔŋaa simul piɛile tonyaleŋ nda simnuŋ Babilɔŋ Bɛndoo. Ndu cho yɛ piɛiyii lachoowɛi kpou ni. Mi nyɛ Baabuiyo dimi wo peeluŋ vɛlɛ.

9. Vɛɛ teleŋ naa hoo cho yɛ teŋgeŋ a teleŋ Isɔluɛiya o sindɔɔ niŋ, vɛlɛ a teleŋ kunda leKilisiɔŋndo o wɔsiŋ kɛmɛ lediiŋ ndoŋ niŋ?

⁹ “Teleŋ Mɛlɛka cho nyɛ o nyɛ fee miŋgi toosiaa wo.” Teleŋ naa cho teŋgeŋ a teleŋ Isɔluɛiya o sindɔɔ niŋ. O cho vɛlɛ teŋgeŋ a teleŋ pɛɛku lachoowaa luɛi o kunda leKilisiɔŋndo niŋ o wɔsiŋ kɛmɛ lediiŋ ndoŋ niŋndo. Vɛɛ naŋ veelu yɛ teleŋ naa hoo? Ŋ veelu ndu aa, “palɛi mɛɛlɛi” le chieeŋ dɛnɛ wɔɔŋndo hoo. (2 Timo. 3:1) Kɛ Baabuiyo dimi maa, teleŋ kala kalaa a teleŋ vilɛiyo kanduŋ a teleŋ pilɔɔ hoo kpe. O cho hiouwɔɔ lachi haaa a teleŋ Mɛlɛka cho hunɔɔ hakioo faŋa, okoŋ mbo siiŋguu lɛŋndeŋ kpele hɛnɛkiɔɔ wo. Teleŋ koŋ Baabuiyo veelu ni aa: “teleŋ Mɛlɛka cho nyɛ o nyɛ fee miŋgi toosiaa wo.” (Walta. 3:21) Boondei hei kanduŋ o wɔsi 1914 niŋ. Yɛɛ ndoo miiŋgu yɛ toosiaŋ? Mi Chiisu simnuŋ Masaa choo choo. Okoŋ, mi Chɛhowa sɔla vɛlɛ masaa le waa hɔlte ndɔ. Chiisu yɛ, o pulale Masaa Deeve leŋ choo o fula ni. Kɛ, o cho Masale leŋ kinɛi le Chɛhowa miŋgi toosiaa le. Mɛɛ teleŋ tiŋ hiou okoŋ kɔɔli, mi piɛile tonyaleŋ le miiŋgu vɛlɛ pila. (Aisaya 2:​2-4; Isi. 11:​17-20) Baa le laasiaŋ lɛ niŋ vɛlɛ pa?

10. (a) Yɛɛ Baabuiyo dimi yɛ a piɛile tonyaleŋ okɔɔ o teleŋ naa hoo niŋ? (Aisaya 54:17) (b) Vɛɛ huuluŋ waa nuaa ke yɛ naa tiindaŋndo?

¹⁰ Nuawɔ Aisaya 54:17. Yiyaŋndɔ a huuluei hei okɔɔ: “Wolɔɔ o wolɔɔ chɔu cho mi waŋndo chiŋalaŋ num a ndu, mbo nɔla num yomɔɔ le.” Diomndaŋ ndaŋ la peeluŋ niŋ hau. Diomnda kɔl dɛɛniaala dimiŋ o Aisaya 54:​13, 14 niŋndaŋ la cho vɛlɛ le teleŋ naa hoo. La dimi aa: “Nduyɛ chuauwaa numnda kpou, ya Mɛlɛka Yaawɛɛ pila pɛɛku niŋ nda ni, nduyɛ dɛnɛ kɛndɛ wa niŋ le nda wo, o wa niŋ o bɔɔ. Sakpoyɛi numnde tosa niŋ ma wa wana dialuŋ kala. . . . Sɔɔŋ tosa mi siooŋii bɛnduei i bii waŋnda woŋ, ŋ komal num niŋ te.” O yɔŋ bɛɛ aa Setana, “mɛlɛka chieeŋndo hoo,” o tiuba mbo kuuna wali wanaa Chɛhowaa cho tosaa le waŋnda pɛɛkoo a Chɛhowa okɔɔ wo le. (2 Kɔliŋ. 4:4) Piɛile tonyaleŋ le miiŋgu vɛlɛ. Nduyɛ fɛɛŋ bɛɛ le laasiaŋ niŋ te. Le cho wa naŋ lefafɛɛŋ. Wolɔɔ o wolɔɔ chɔu cho mi waŋndo chiŋalaŋ naa a ndu mbo nɔla naa yomɔɔ le.

YƐƐ CHO YƐ YƆŊNƆŊ?

11. Yɛɛ ke yɛ naa tiindaŋndo maa faŋga bɛndoo cho wa kpeele le, o yɔŋ bɛɛ mi Kilisiɔŋaa pɔyaŋnda kuɛ choo choo?

¹¹ Yɛɛ cho yɛ yɔŋnɔŋ te Kilisiɔŋaa pɔyaŋnda  kuɛ pɛ choo choo? Loonuŋ maa, Chiisu cho Wana Naa Mandaa Lasaa ni. Ndu cho kunda leKilisiɔŋndo bolleŋ ni. Mi Chiisu dimi kpendekele aa: “Wana Bɛndoo opilɛ nya nɔ ni, Kiliti.” (Maa. 23:10) Masa naa o choo choo niŋ Chiisu, cho hiouwɔɔ lachi a wana nduaa mandaa. Le mɛɛ o cho nda mandaa yɛ, buɛiyaa nduaa o lɛŋndeŋ choo naŋ nɔ ma yɔŋ isiooŋ le nyɛ o nyɛ le. I cho tonya maa, o cho sɔɔŋ kpou le naŋ sina a mɛɛ Chiisu manda niŋ wanaa nduaa a boondii keŋ yɛ le. Lelaŋ, ŋ yaasiaŋndɔ tamaseliilaŋ o Baabuiyo niŋ, la ke naa tiindaŋndo laŋ.

12. Vɛɛ Chɛhowa ndoo manda yɛ wanaa nduaa (a) mɛɛ Muuse vi? (b) mɛɛ Ilaacha sɔla wali cheleŋ le tosaa? (Tofa vɛlɛ fotueiyo.)

¹² Tuupa mi Isɔluɛiya luɛi o Lɛŋnde Mɛyaaleŋ niŋ, mi Muuse sɔla piɔmndo. Yɛɛ yɔŋnuŋ yɛ a wanaa Mɛlɛkaa? Baa mi Chɛhowa ndoo pɛŋgi pa wanaa nduaa malaa mɛɛ Muuse sɔla piɔmndo? Sako. O wa hiouwɔɔ lachi a nda mandaa, te ndaa lo pɛ o laalaŋndo choo. Tuupa mi Muuse wu, mi Chɛhowa dimul ndu le mbo yulu Chɔɔsuaa isu, le wanaa nduaa simndaŋ lachi. Mi Muuse pɛɛku Chɔɔsuaa le wɔsiŋ bɔɔbɔɔ. (Ɛsɔ. 33:11; Ditɔnɔ. 34:9) Le handɔɔ lechoo, puaa cheleŋ wa vɛlɛ, a ndaa nɔ taasioo le wanaa Mɛlɛkaa nɛiyo chɔmndo wa. Apum wa masaa le waŋnda waapilɛ, apum waŋnda kɛmɛ, apum waŋnda beleŋuɛɛnu, apum ŋwaŋ tɔ. (Ditɔnɔ. 1:15) Mi wanaa Mɛlɛkaa sɔla manda ndaa yeema wo. Ilaacha cho tamaseliiyo opilɛ le suɛi waa nuaa. Mbo tosa wallo kalaŋ le wɔsiŋ bɔɔbɔɔ, le Isɔluɛiya malaa ma piɛi Chɛhowa. Mɛɛ teleŋ tiŋ hiou, mi Chɛhowa yɔŋ ndu Chuda batouwo, le wali cheleŋ tosaa. (2 Masaa. 2:1; 2 Kolo. 21:12) Baa mi wanaa laalaŋnda o kayii tɔ ve niŋ Isɔluɛi lo pa kpeele? Sako. Le wɔsiŋ bɔɔbɔɔ Ilaacha wa Ilaasia pɛɛkoo. ‘Wanaa ndaa suaa le Mɛlɛka’ ma sɔla pɛɛkoo le wanaa Mɛlɛkaa mandaa wa, wa vɛlɛ. (2 Masaa. 2:7) Nduyɛ, puaa ndaa nɔ laalaŋndo wa, wa vɛlɛ tau le wanaa Mɛlɛkaa mandaa. Mi tuu Chɛhowaa hiau lachi a peelɔŋndo, nduyɛ mbo hiau lachi a wanaa wa ndu piɛiyo o laalaŋndo choo wa mandaa.

13. Tiindaŋ kuɛɛ Hibuluiya 13:5b ke yɛ naa? (Tofa vɛlɛ fotueiyo.)

¹³ A tamaseliilaŋ ndaŋ o kɔl, yɛɛ ŋ yiyaŋ yɛ maa o cho yɔŋnɔŋ te wana mɛɛlaa o Kilisiɔŋaa pɔyaŋnda choo kuɛŋ pɛ choo choo? Kɔndɔfili nɔ mbo bii naa a hei le. Baabuiyo chɔm naa tonya ke naa tiindaŋndo wo. O dimi maa, fɛɛŋ bɛɛ Chɛhowa mel wanaa nduaa o lɛŋndeŋ choo le. (Nuawɔ Hibuluiya 13:5b.) Maa Muuse a Ilaacha, kunda pɔmbɔɔ o Kilisiɔŋaa pɔyaŋnda tɛɛŋ hau, che bɔɔ mɛɛ  acheleŋnda pɛɛkoo cho nyɛ sɔvɛ bɛndu yɛ. Le wɔsiŋ bɔɔbɔɔ niŋ, puaapiliaa cho o Dialii Kuumbaŋ Choo Ve choo wa, pɛɛku niŋ wanaa bɔɔbɔɔ o saa cheleŋnda tɛɛŋ le chilaŋ chuaa. Le tamaseliiyo, a kila niŋ sukuula bɔɔbɔɔ, le bɛnduaa kundaa, buɛiyaa ibuŋgaa, Wanaa Chua Chilaŋ o Lɛuve Wa, wanaa chua chilaŋ o Bɛtɛɛlla, misiɔnalueiya a wanaa cheleŋ pɛɛkoo. Dialii Kuumbaŋ Choo Ve bii niŋ wanaa ndaa malaa cho wallo o kundala yɛ yɛlaŋ niŋnda pɛɛkoo. Wanaa malaa haa cho suŋ suŋ walta bɔɔbɔɔ tosaa o kɔɔna Chɛhowaa niŋ. A cho a bɛɛndiaŋ le hiouwɔɔ lachi a wallo tosaa le saa Chiisu wa mandaa, te Kilisiɔŋaa pɔyaŋnda kuɛŋnuŋ pɛ choo choo.

14. Ɔɔ suɛi kulle o buŋgɛi hei niŋ?

¹⁴ Tofawɔ suɛi kulle o buŋgɛi hei niŋ. Te wana mɛɛlaa le Kilisiɔŋaa pɔyaŋnda kuɛ pɛ choo choo a teleŋ nyɛpalaa bɛndoo sɔɔŋguu niŋ kpɛɛluŋndo, piɛile tonyaleŋ le cho hiouwɔɔ lachi a waa o lɛŋndeŋ ndeŋ choo. Nduyɛ wanaa Chɛhowaa cho hiouwɔɔ lachi a ndu piɛiyo o laalaŋndo choo. I cho tonya maa a teleŋ koŋ, Kɔɔki o Lɛŋnde Makɔɔkileŋ niŋ cho wanaa Mɛlɛkaa chiŋalaŋ. Ndu cho yɛ lɛŋii chuuŋgiaŋ niŋ diompilɛ ve ni. (Isi. 38:​18-20) Kɛ a cho batiuwaa sɔla le, nduyɛ a kuuna niŋ wanaa Mɛlɛkaa Chɛhowa piɛiyo le. O cho wanaa nduaa manda. Mi kiilanɔɔ Chɔŋ cha o yilaŋnde niŋ, “waŋnda faŋga bɛndu bɛndoo,” nda cho yɛ saa cheleŋaa Chiisuaa ni. Ma dimul Chɔŋ maa, “faŋga bɛndu bɛndoo” hoo, “fula o nyɛpalaa bɛndoo niŋ ni.” (Sɔɔŋ. 7:​9, 14) A tonya, Chɛhowa cho nda manda.

15-16. A mɛɛ Sɔɔŋ Chɔɔmaŋndoŋ 17:14 dimi yɛ, yɛɛ Kilisiɔŋaa pɔyaŋnda cho yɛ mala Chiisu tosa a teleŋ chɔu Amakɛdɔŋndo, nduyɛ vɛɛ hei cho yɛ suɛi kɔl dɛɛniaa le naa?

¹⁵ Kɛ, mi apum nyuna aa: ‘Ɔɔ niŋ Kilisiɔŋaa pɔyaŋnda? Yɛɛ nda cho yɛ tosa te a faŋaŋ pɛ o lɛŋndeŋ choo ma kuɛ choo choo?’ Baabuiyo muli nyunaa hoo. O dimi maa, masaa chieeŋnda “cho chɔulaba a saa fɔŋndɔɔ.” Kɛ a sɔla niŋ batiuwaa kposoŋ te. Baabuiyo dimi aa: “Saa fɔŋndɔɔ cho nda yomɔɔ.” Nɛɛ yaa cho yɛ saa fɔŋndɔɔ mala? Mi Baabuiyo hiau lachi a dimioo aa: Wanaa sɔla “veeloo,” nduyɛ  “ma sɔla hɛlioo” wa. (Nuawɔ Sɔɔŋ Chɔɔmaŋndoŋ 17:14.) Nɛɛ yaa cho yɛ waŋnda haa? Nda cho Kilisiɔŋaa pɔyaŋaa miiŋgu yoomu wa ni. Lelaŋ, te wana mɛɛlaa le Kilisiɔŋaa pɔyaŋnda kuɛ pɛ choo choo a teleŋ nyɛpalaa bɛndoo sɔɔŋguu niŋ kpɛɛluŋndo, wali nda tasoo cho wa le chɔulabaa ni. Nuawɔ se wali sɔvɛ bɛndu! Kilisiɔŋaa pɔyaŋnda apum, wanaa chɔulabaa nda wa paandu ni tuupa ma simnuŋ Seiyaa Chɛhowaa. Apum wa pɛŋ wali lesovɛiyo tosaa o chieeŋndo hoo niŋ. Kɛ mɛɛ teleŋ tiŋ hiou, ma pɛɛku tonyaa, okoŋ ma simnuŋ wanaa kɔl nyulu. (Kalee. 5:22; 2 Tɛsa. 3:16) Ma soli balaŋ o chɔulaŋ niŋ. A koŋ kpou, te a huŋ hel pɛ choo choo, a cho wallo tosa a Kiliti vɛlɛ a maalikɛiya latulu, le yaamɔɔwaa Mɛlɛkaa chɔulaba mɛɛlaa.

¹⁶ Yiyaŋndɔ a hei okɔɔ. Hau, Kilisiɔŋaa pɔyaŋaa cho wɔ o lɛŋndeŋ choo wa, apum cho niŋ a yuwɛiya, nduyɛ a nɔ lɛ mayoomu tau le. Kɛ te a sɔla pɛ yoomoo ma hel choo choo, a cho wa nyaa yoomaa kpaayaa bɛnduaa, nduyɛ a vi lɛ niŋ te. A cho sɔla dikeŋnaŋndo le ma chɔulaba latulu a Masaa Chiisu Kiliti, Kuubanɔ Kpaaya Bɛndoo. Te chɔu Amakɛdɔŋndo chuu pɛ, a cho wallo tosa a Chiisu latulu le waŋnda chieeya malaa ma simnuŋ walaŋ. A tonya, te a wa pɛ choo choo, a cho wallo tosa tau le puaapiliaa a ndepiliaa ndaa kaalaa, mbo hiou bɛɛ mɛɛ ndaa tosa niŋ yɛ, te ndaa wa pɛ wanaa walaŋnda o lɛŋndeŋ choo.

17. Vɛɛ naŋ looku yɛ sina maa buɛiyaa Mɛlɛkaa kpou cho chindaa sɔla a teleŋ chɔu Amakɛdɔŋndo?

¹⁷ A cho pa o kunda saa cheleŋnda choo? Mɛɛ yɛɛ ŋ cho yɛ tosa te chɔu Amakɛdɔŋndo kanduŋ pɛ? Dɔu tiindaŋndo o Chɛhowa niŋ, nduyɛ ma tol nɛi ndɔ chɔmaa kɔɔli. Ndi kinɛi ŋ nɔ ni ma tosa. Yɛɛ hei sim yɛ? Baabuiyo dɛɛniaa naa aa: “La luɛi chiɛilaŋ niŋ wanaa niaa, mi la kiindiaŋ diolaŋ kɔɔli. La vioŋnuŋ chiɛilaŋ niŋ, mi la wa loŋ le teleŋ biŋgi, haaa mbo lo okoŋ mi tumbe Mɛlɛka dɔɔnuŋndo o pɔlul.” (Aisaya 26:20) Buɛiyaa laalaŋaa Mɛlɛkaa choo choo a o lɛŋndeŋ choo kpou, cho chindaa sɔla a teleŋ koŋ. Maa kiilanɔɔ Pɔɔl, ŋ nɔ tiindaŋndo maa, ‘o wa masɛi, o wa sɔɔŋ cho suŋ suŋndoŋ, o wa sɔɔŋ cho hunɔɔ woŋ . . . ŋ nɔla naa faŋa o kaala Mɛlɛka nɔ le naa’ wo bɛŋgu le. (Luomaŋ. 8:​38, 39) Lɔɔlɔɔ kɛsiŋ hei o kɔl: Chɛhowa kaala num, nduyɛ fɛɛŋ bɛɛ o mel num te!