၁. ပှၤဘၣ်တၢ်ဒိးဖှူအီၤခဲလၢာ် လၢအအိၣ်တ့ၢ်ဒံးလၢ ဟီၣ်ခိၣ်ချၢန့ၣ် ကဘၣ်တၢ်ဟံးထီၣ်အီၤ ဆူမူခိၣ် လၢအခါဖဲလဲၣ်.

 ပူၤကွံာ်တဘျုးနံၣ်န့ၣ် ယဟိဝၤယွၤ အပှၤဂီၢ်မုၢ်တဖၣ် အဲၣ်ဒိးသ့ၣ်ညါဝဲလၢ ‘ခရံာ်ဖိလၢ အဘၣ်တၢ်ဒိးဖှူအီၤ လၢအအိၣ်တ့ၢ်ဒံးလၢ ဟီၣ်ခိၣ်ချၢန့ၣ် ကဘၣ်တၢ်ဟံးထီၣ်အီၤ ဆူမူခိၣ် လၢအခါဖဲလဲၣ်.’ လၢညါ ပဆိကမိၣ်လၢ ဖဲအၢ်မက့းဒိၣ်တၢ်ဒုး ဝံၤအလီၢ်ခံ ပှၤဘၣ်တၢ်ဒိးဖှူအီၤတနီၤ ကအိၣ်ဒံး လၢဟီၣ်ခိၣ်ချၢ ဒီးကအိၣ်လၢ ဟီၣ်ခိၣ်ပၤရဒံစူးအပူၤ တတီၤဖိ. သနာ်က့ဖဲ တၢးထီခိးတၢ် လါယူၤလံ ၁၅, ၂၀၁၃ န့ၣ်ပသ့ၣ်ညါဘၣ်လၢ တချုးလၢ အၢ်မက့းဒိၣ်တၢ်ဒုး စးထီၣ်ဒံးဘၣ်န့ၣ် ပှၤဘၣ်တၢ်ဒိးဖှူအီၤခဲလၢာ် လၢအအိၣ်တ့ၢ်ဒံးလၢ ဟီၣ်ခိၣ်ချၢန့ၣ် ကဘၣ်တၢ်ဟံးထီၣ်အီၤ ဆူမူခိၣ်.—မး ၂၄:၃၁.

၂. ပဝဲတနီၤန့ၣ် ပကဆိကမိၣ်ဘၣ် တၢ်သံကွၢ်မနုၤလဲၣ် ဒီးလၢတၢ်မၤလိတခါအံၤ ပကတဲသကိး တၢ်ဂ့ၢ်မနုၤလဲၣ်.

^၂ သနာ်က့ ပဝဲတနီၤန့ၣ် ပကဆိကမိၣ်ဘၣ်လၢ ခရံာ်အ “သိလၢအဂၤတဖၣ်” လၢအတီဒီး ယဟိဝၤယွၤ ဒီးဘူၣ်ထီၣ်ဘါထီၣ်အီၤ လၢဟီၣ်ခိၣ်ချၢန့ၣ် ဖဲ “တၢ်နးတၢ်ဖှီၣ်ဖးဒိၣ်” အဆၢကတီၢ် တၢ်ကကဲထီၣ်သးဒီး အဝဲသ့ၣ်ဒ်လဲၣ်. (ယိၤ ၁၀:၁၆; မး ၂၄:၂၁) ဖဲဒီပုၢ်ဝဲၢ်မုၣ်ခွါလၢ အဘၣ်တၢ်ဒိးဖှူအီၤတဖၣ် ဘၣ်တၢ်ဟံးထီၣ်အီၤ ဆူမူခိၣ်အခါ ကစၢ်ယွၤ အပှၤဂီၢ်မုၢ်တနီၤန့ၣ် ကဘၣ်ယိၣ်ဝဲလၢ ပှၤဟံးစုနဲၣ်ကျဲအီၤ တအိၣ်လၢၤဘၣ် ဒီးအဝဲသ့ၣ် ကဘၣ်မၤမနုၤလဲၣ်န့ၣ် တသ့ၣ်ညါဝဲဘၣ်. ဘၣ်မနုၤအဃိ အဝဲသ့ၣ် ဘၣ်ယိၣ်ဝဲဒ်အံၤလဲၣ်န့ၣ် ဒ်သိးပကသ့ၣ်ညါအဂီၢ် ပကတဲသကိး တၢ်အဒိခံခါလၢ လံာ်စီဆှံအပူၤ. ဝံၤဒီး ပကတဲသကိး တၢ်ဂ့ၢ်တနီၤလၢ ဘၣ်မနုၤအဃိ ပတလိၣ်ဘၣ်ယိၣ်တၢ်ဘၣ်လဲၣ်.

တၢ်မနုၤ တကဲထီၣ်သးဘၣ်လဲၣ်

၃-၄. ပှၤတနီၤ ဘၣ်ယိၣ်တၢ်ဒ်လဲၣ် ဒီးဘၣ်မနုၤအဃိလဲၣ်.

^၃ ပှၤပၢဆှၢတၢ်ကမံးတံာ် လၢအဘၣ်တၢ်ဒိးဖှူအီၤတဖၣ် မ့ၢ်တအိၣ်လၢ ဟီၣ်ခိၣ်ချၢ ဒီးတဟံးစုနဲၣ်ကျဲတၢ်လၢၤဘၣ်န့ၣ် ပှၤတနီၤ ဘၣ်ယိၣ်ဝဲလၢ သိလၢအဂၤတဖၣ် တဘူၣ်ထီၣ်ဘါထီၣ် ကစၢ်ယွၤလၢၤဘၣ်. အဝဲသ့ၣ်ဘၣ်ယိၣ်တၢ် ခီဖျိအသ့ၣ်ညါဘၣ်ဝဲ တၢ်ကဲထီၣ်သး လၢအပူၤကွံာ် လၢ လံာ်စီဆှံ ပာ်ဖျါထီၣ်ဝဲအဃိ. ပကကွၢ်သကိး တၢ်အဒိခံခါ. အဆိကတၢၢ်တခါန့ၣ် ဘၣ်ဃးဒီး ပှၤလုၢ်တၢ်ဒိၣ် စီၤယဟိၤယဒါ. စီၤယဟိၤယဒါန့ၣ် အအဲၣ်ယဟိဝၤယွၤ ဒီးအတီဒီးအီၤ. အဝဲ ဒီးအမါ နီၢ်ယဟိၤၡ့ဘၤ ဒီသဒၢဝဲ ပိာ်ခွါဖိတဂၤ လၢအမ့ၢ် စီၤယိၤအၣ် ဒီးမၤစၢၤအီၤဒ်သိး အကကဲထီၣ် စီၤပၤလၢအဂ့ၤတဂၤ ဒီးကတီဒီးယဟိဝၤယွၤ. ဖဲစီၤယဟိၤယဒါ အိၣ်မူဒံးအခါန့ၣ် စီၤယိၤအၣ် ဘူၣ်ထီၣ်ဘါထီၣ် ယဟိဝၤယွၤ ဒီးမၤတၢ်ဂ့ၤ. ဘၣ်ဆၣ် ဖဲစီၤယဟိၤယဒါ သံဝံၤအလီၢ်ခံ စီၤယိၤအၣ် စးထီၣ်မၤတၢ်အၢ. စီၤယိၤအၣ် ဒိကနၣ်ဝဲ ပဒိၣ်ဖးဒိၣ် လၢအတဂ့ၤဘၣ်တဖၣ် အတၢ်ဟ့ၣ်ကူၣ် ဒီးအပာ်တ့ၢ်ကွံာ် ယဟိဝၤယွၤ.—၂ ကွဲး ၂၄:၂, ၁၅-၁၉.

^၄ တၢ်အဒိ ခံခါတခါန့ၣ် အဘၣ်ဃးဒီး ခရံာ်ဖိလၢ အအိၣ်မူဖဲ တၢ်မၢဖိအစိၤ ဝံၤအလီၢ်ခံ. တၢ်မၢဖိယိၤဟၣ်န့ၣ် အကဲဝဲ တၢ်မၢဖိလၢ အအိၣ်တ့ၢ် အလီၢ်ခံကတၢၢ်တဂၤ. ဒီးဖဲအအိၣ်မူဒံးအခါန့ၣ် အမၤစၢၤဝဲ ခရံာ်ဖိအါဂၤဒ်သိး အဝဲသ့ၣ် ကဆဲးတီဒီး ယဟိဝၤယွၤ. (၃ ယိၤ ၄) ဒ်ယ့ၣ်ၡူး အတၢ်မၢဖိအဂၤတဖၣ် မၤတ့ၢ်ဝဲအသိး စီၤယိၤဟၣ်စ့ၢ်ကီး ဂုာ်ကျဲးစၢးဒီသဒၢဝဲ တၢ်အိၣ်ဖှိၣ်ဖိလၢ တၢ်သိၣ်လိ ဒီးလုၢ်လၢ်လၢ အကမၣ်တဖၣ်. (၁ ယိၤ ၂:၁၈; ၂ သ့း ၂:၇) သနာ်က့ ဖဲစီၤယိၤဟၣ် သံဝံၤအလီၢ်ခံ ပှၤလၢအထီဒါက့ၤ တၢ်မ့ၢ်တၢ်တီတဖၣ် အတၢ်သိၣ်လိန့ၣ် ရၤလီၤအသး လီၤဂာ်ဒ်သိးဒီး မ့ၣ်အူအီၣ်တၢ်. ဒီးလၢခံတဘျုးနံၣ်န့ၣ် ပှၤလၢအထီဒါက့ၤ တၢ်မ့ၢ်တၢ်တီတဖၣ် သိၣ်လိဝဲ တၢ်သိၣ်လိလၢ အကမၣ်အါမး ဒီးလၢတၢ်အိၣ်ဖှိၣ်ကိးဖျၢၣ်ဒဲးန့ၣ် ပှၤမ့ၢ်မၤတၢ်ကမၣ်သနာ်က့ အဝဲသ့ၣ်တတြီဝဲဘၣ်.

၅. တၢ်ကကဲထီၣ်သးဒီး သိလၢအဂၤတဖၣ် ဒ်စီၤယိၤအၣ် ဒီးခရံာ်ဖိလၢညါတဖၣ် အသိးဧါ.

^၅ ဖဲပှၤဘၣ်တၢ်ဒိးဖှူအီၤတဖၣ် ဘၣ်တၢ်ဟံးထီၣ်အီၤ ဆူမူခိၣ်အခါ တၢ်ကကဲထီၣ်သးဒီး ခရံာ်အသိလၢအဂၤတဖၣ် ဒ်စီၤယိၤအၣ် ဒီးခရံာ်ဖိလၢညါတဖၣ် အသိးဧါ. ဖဲန့ၣ်အခါ ခရံာ်ဖိလၢအသးတီ လၢဟီၣ်ခိၣ်ချၢန့ၣ် မ့ၢ်အဝဲသ့ၣ် ကပာ်တ့ၢ်ကွံာ် တၢ်သိၣ်လိလၢ အဝဲသ့ၣ်န့ၢ်ဘၣ်ဝဲ ဒ်စီၤယိၤအၣ် မၤဝဲအသိးဧါ. ဒီးမ့ၢ်အဝဲသ့ၣ် ကကဲထီၣ် ပှၤလၢအထီဒါက့ၤ တၢ်မ့ၢ်တၢ်တီ ဒ်ခရံာ်ဖိလၢညါတဖၣ်အသိးဧါ. အဝဲသ့ၣ် တကဲထီၣ်ဒ်န့ၣ် နီတစဲးဘၣ်. ဖဲပှၤဘၣ်တၢ်ဒိးဖှူအီၤတဖၣ် ဘၣ်တၢ်ဟံးထီၣ်အီၤ ဆူမူခိၣ်အခါ ပနာ်သပှၢ်တၢၢ်လၢ သိလၢအဂၤတဖၣ် ကဆဲးဘူၣ်ထီၣ်ဘါထီၣ် ယဟိဝၤယွၤ ဒ်အတၢ်ဘၣ်သး အိၣ်ဝဲအသိး ဒီးယဟိဝၤယွၤ ကဆဲးကွၢ်ထွဲအဝဲသ့ၣ်. ဘၣ်မနုၤအဃိ ပနာ်ဒ်န့ၣ် သပှၢ်တၢၢ်လဲၣ်.

တၢ်ဘူၣ်ထီၣ်ဘါထီၣ်စီဆှံ ကဆဲးအိၣ်ဒံး

၆. တၢ်ဆၢကတီၢ် သၢခါလၢ ပကဃုသ့ၣ်ညါအါထီၣ်အဂ့ၢ်န့ၣ် မ့ၢ်မနုၤလဲၣ်.

^၆ တၢ်ကမၤအသးလၢ ဆၢကတီၢ် လၢပအိၣ်မူဘၣ်ခဲအံၤ ဒ်လဲၣ်န့ၣ် လံာ်စီဆှံပာ်ဖျါထီၣ်န့ၢ်ပှၤ. အဃိ ပနာ်သပှၢ်တၢၢ်လၢ ခါဆူညါ ပမ့ၢ်ထံၣ်ဘၣ် တၢ်ကီတၢ်ခဲ သနာ်က့ တၢ်ဘူၣ်ထီၣ်ဘါထီၣ်စီဆှံ ကဆဲးအိၣ်ဒံး. ပှၤအံၣ်စရ့လးဖိအစိၤ ဒီးတၢ်ဆၢကတီၢ်ဖဲ တၢ်မၢဖိတဖၣ်သံဝံၤအလီၢ်ခံန့ၣ် အလီၤဆီလိာ်သးဒီး ပစိၤခဲအံၤဒိၣ်မး. အဃိ ပကဃုသ့ၣ်ညါအါထီၣ်သကိး တၢ်ဆၢကတီၢ် သၢခါအံၤအဂ့ၢ်. (၁) ပှၤအံၣ်စရ့လးဖိအစိၤ, (၂) တၢ်မၢဖိတဖၣ်သံဝံၤအလီၢ်ခံ, (၃) ပစိၤခဲအံၤ လၢအမ့ၢ် “တၢ်မၤဂ့ၤထီၣ်က့ၤ တၢ်ခဲလၢာ် အဆၢကတီၢ်.”—မၤတၢ် ၃:၂၁.

၇. လၢညါ ဖဲစီၤပၤ ဒီးပှၤအံၣ်စရ့လးဖိအဂၤတဖၣ် မၤတၢ်အၢတၢ်သီအခါ ဘၣ်မနုၤအဃိ ပှၤအံၣ်စရ့လးဖိ လၢအသးတီတဖၣ် သးတဟးဂီၤဘၣ်လဲၣ်.

^၇ ပှၤအံၣ်စရ့လးဖိအစိၤ. တချုးလၢ စီၤမိၤၡ့ ဘူးထီၣ်ကသံဒံးဘၣ်န့ၣ် အတဲဘၣ် ပှၤအံၣ်စရ့လးဖိလၢ “ဖဲယသံဝံၤအလီၢ်ခံ သုကမၤတၢ် အၢအၢသီသီ ဒီးဃၣ်ကွံာ်သုသးလၢ ကျဲလၢ ယမၤလိာ်သုန့ၣ် ယသ့ၣ်ညါ ဂ့ၤဂ့ၤလီၤ.” (၅ မိၤ ၃၁:၂၉) စီၤမိၤၡ့ ဟ့ၣ်ပလီၢ်အဝဲသ့ၣ်လၢ အဝဲသ့ၣ် မ့ၢ်ထီဒါက့ၤတၢ်န့ၣ် ပှၤကလုာ်ဂၤ ကက့ၤဖီၣ်အဝဲသ့ၣ်. (၅ မိၤ ၂၈:၃၅, ၃၆) တၢ်ကတိၤတဖၣ်အံၤ အဟဲလၢပှဲၤထီၣ် နီၢ်ကီၢ်. လၢအနံၣ် လၢအကယၤတဖၣ်အတီၢ်ပူၤ စီၤပၤအါဂၤန့ၣ် မၤဝဲတၢ်အၢတၢ်သီ လၢယဟိဝၤယွၤအမဲာ်ညါ ဒီးကစၢ်ယွၤ အပှၤဂီၢ်မုၢ်တဖၣ် မၤပိာ်အဝဲသ့ၣ်အခံ ဒီးဘူၣ်ထီၣ်ဘါထီၣ်ဝဲ ယွၤလၢအကမၣ်တဖၣ်. အဃိ ယဟိဝၤယွၤ စံၣ်ညီၣ်ပှၤအံၣ်စရ့လးဖိလၢ အအၢအသီတဖၣ် ဒီးတပျဲဝဲလၢ အံၣ်စရ့လးအစီၤပၤတဖၣ် ကပၢတၢ်လၢၤဘၣ်. (ဃ့း ၂၁:၂၅-၂၇) သနာ်က့ ဖဲပှၤအံၣ်စရ့လးဖိလၢ အသးတီတဖၣ် ထံၣ်ဘၣ်ဝဲ ကစၢ်ယွၤ အတၢ်ကတိၤ ဟဲလၢပှဲၤထီၣ်အခါ အဝဲသ့ၣ် အတၢ်သးဒူ ဟဲအါထီၣ် ဒီးအဝဲသ့ၣ် ဆဲးဘူၣ်ထီၣ်ဘါထီၣ် ယဟိဝၤယွၤ.—ၡါ ၅၅:၁၀, ၁၁.

၈. ဖဲတၢ်မၢဖိတဖၣ်သံဝံၤအလီၢ်ခံ ခရံာ်ဖိတဖၣ် တဆဲးဘူၣ်ထီၣ်ဘါထီၣ် ယဟိဝၤယွၤ ဒ်အတၢ်ဘၣ်သး အိၣ်ဝဲအသိးဘၣ်န့ၣ် ဘၣ်မနုၤအဃိ အတလီၤကမၢကမၣ်ဘၣ်လဲၣ်.

^၈ တၢ်မၢဖိတဖၣ်သံဝံၤအလီၢ်ခံ. ဖဲတၢ်မၢဖိတဖၣ်သံဝံၤအလီၢ်ခံ ခရံာ်ဖိတဖၣ် တဆဲးဘူၣ်ထီၣ်ဘါထီၣ် ယဟိဝၤယွၤ ဒ်အတၢ်ဘၣ်သး အိၣ်ဝဲအသိးဘၣ်န့ၣ် အတလီၤကမၢကမၣ်ဘၣ်. ယ့ၣ်ၡူး တဲဆိပာ်စၢၤဝဲ လၢ ပှၤထီဒါက့ၤတၢ်မ့ၢ်တၢ်တီ ကအိၣ်ထီၣ်ဝဲအါမး. (မး ၇:၂၁-၂၃; ၁၃:၂၄-၃၀, ၃၆-၄၃) ဒီးတၢ်မၢဖိပီလူး, စီၤပ့းတရူး ဒီးစီၤယိၤဟၣ်န့ၣ် ပာ်ဖျါထီၣ်ဝဲလၢ တၢ်လၢယ့ၣ်ၡူး တဲဆိပာ်စၢၤဝဲအံၤ စးထီၣ်ဟဲလၢပှဲၤထီၣ် လၢအဝဲသ့ၣ်အစိၤလံ. (၂ သ့း ၂:၃, ၇; ၂ ပ့း ၂:၁; ၁ ယိၤ ၂:၁၈) ဒီးဖဲတၢ်မၢဖိအစိၤ ဝံၤအလီၢ်ခံ ခရံာ်ဖိတၢ်အိၣ်ဖှိၣ် တဆဲးဘူၣ်ထီၣ်ဘါထီၣ် ယဟိဝၤယွၤ ဒ်အတၢ်ဘၣ်သး အိၣ်ဝဲအသိးလၢၤဘၣ်. ခရံာ်ဖိလၢ အထီဒါက့ၤ တၢ်မ့ၢ်တၢ်တီတဖၣ် ဟဲအိၣ်ထီၣ် ဒီးအဝဲသ့ၣ် ကဲထီၣ်ပှၤလၢအပၣ်ဃုာ်လၢ ဘၤဘူၤလိၣ်ဖးဒိၣ် လၢအမ့ၢ် တၢ်ဘူၣ်တၢ်ဘါကမၣ်အကျါ. အဃိ ပထံၣ်ဘၣ်လၢ တၢ်လၢယ့ၣ်ၡူး တဲဆိပာ်စၢၤဝဲန့ၣ် ဟဲလၢပှဲၤထီၣ်ဝဲ သပှၢ်တၢၢ်.

၉. ပစိၤခဲအံၤန့ၣ် အလီၤဆီလိာ်သးဒီး ပှၤအံၣ်စရ့လးဖိအစိၤ ဒီးတၢ်ဆၢကတီၢ်ဖဲ တၢ်မၢဖိတဖၣ်သံဝံၤအလီၢ်ခံ ဒ်လဲၣ်.

^၉ “တၢ်မၤဂ့ၤထီၣ်က့ၤ တၢ်ခဲလၢာ် အဆၢကတီၢ်.” ပစိၤခဲအံၤန့ၣ် အလီၤဆီလိာ်သးဒီး ပှၤအံၣ်စရ့လးဖိအစိၤ ဒီးတၢ်ဆၢကတီၢ်ဖဲ တၢ်မၢဖိတဖၣ်သံဝံၤအလီၢ်ခံ. ပစိၤခဲအံၤန့ၣ် ပကိးအီၤဒ်လဲၣ်. ပစိၤခဲအံၤန့ၣ် ညီနုၢ် ပကိးအီၤလၢ “မုၢ်နံၤခံကတၢၢ်တဖၣ်” လၢအအိၣ်ထဲ တၢ်ကီတၢ်ခဲ. (၂ တံၤ ၃:၁) ဘၣ်ဆၣ် လံာ်စီဆှံ ပာ်ဖျါထီၣ်ဝဲလၢ တၢ်ဆၢကတီၢ် လၢအဂ့ၤ ဒီးအကအိၣ်ယံာ်န့ၢ်ဒံး မုၢ်နံၤခံကတၢၢ်တဖၣ်န့ၣ် စးထီၣ်ဝဲ တကတီၢ်ဃီစ့ၢ်ကီး. တၢ်ဆၢကတီၢ်အံၤ ကဆဲးလဲၤအသးတုၤလၢ မ့းၡံအၤအဘီအမုၢ် မၤစၢၤဝဲ ပှၤဟီၣ်ခိၣ်ဖိ ဒ်သိးအဝဲသ့ၣ်ကကဲထီၣ် ပှၤလၢပှၤပှဲၤ ဒီးကဒုးကဲထီၣ် ဟီၣ်ခိၣ်အံၤလၢ ပၤရဒံစူး. ဒီးတၢ်ဆၢကတီၢ်အံၤ လံာ်စီဆှံကိးဝဲလၢ “တၢ်မၤဂ့ၤထီၣ်က့ၤ တၢ်ခဲလၢာ် အဆၢကတီၢ်.” (မၤတၢ် ၃:၂၁) တၢ်ဆၢကတီၢ်အံၤ အစးထီၣ်သးဖဲ ၁၉၁၄. ဖဲန့ၣ်အခါ တၢ်မနုၤကဲထီၣ်သးလဲၣ်. ပထံၣ်ဘၣ်လၢ ယ့ၣ်ၡူး ကဲထီၣ်စီၤပၤ ဒီးပၢတၢ်လၢမူခိၣ်. အဃိ ယဟိဝၤယွၤ အိၣ်ဒီးစီၤပၤလၢ အပၢတၢ်လၢအဘီအမုၢ် လၢအသီတဘျီ ဒီးစီၤပၤအံၤ အဟဲလီၤစၢၤလၢ စီၤပၤဒၤဝံး အစၢၤအသွဲၣ်. ဘၣ်ဆၣ် တၢ်ကဲထီၣ်အသး လၢအဂၤအိၣ်ဒံး. ကစၢ်ယွၤ အဘီအမုၢ် အိၣ်ထီၣ်လၢမူခိၣ် ဝံၤအလီၢ်ခံ ယဟိဝၤယွၤ မၤစၢၤအခ့အပှၤ လၢဟီၣ်ခိၣ်ချၢ ဒ်သိးအဝဲသ့ၣ် ကဘူၣ်ထီၣ်ဘါထီၣ်အီၤ ဒ်အတၢ်ဘၣ်သး အိၣ်ဝဲအသိး. (ၡါ ၂:၂-၄; ဃ့း ၁၁:၁၇-၂၀) တၢ်ဘူၣ်ထီၣ်ဘါထီၣ်စီဆှံအံၤ ကဟးဂီၤကဒီးဒံးဧါ.

၁၀. (က) ဘၣ်ဃးဒီး တၢ်ဘူၣ်ထီၣ်ဘါထီၣ်စီဆှံ လၢပစိၤခဲအံၤန့ၣ် လံာ်စီဆှံ တဲဆိပာ်စၢၤဝဲဒ်လဲၣ်. (ယၡါယၤ ၅၄:၁၇) (ခ) ဘၣ်မနုၤအဃိ ဝံအတၢ်စံးပာ်တဖၣ်အံၤ အမၤမုာ်ထီၣ်ပသးလဲၣ်.

^၁၀ ဖး ယၡါယၤ ၅၄:၁၇. ဆိကမိၣ်ကွၢ် ဝံအတၢ်စံးပာ်တခါအံၤ. “တၢ်စုကဝဲၤလၢ ပှၤတ့ထီၣ်အီၤ ဒ်သိးကထီဒါနၤအဂီၢ်န့ၣ် ကကဲထီၣ် တၢ်ကလီကလီခဲလၢာ်.” ဝံအတၢ်စံးပာ်အံၤ ဟဲလၢထီၣ်ပှဲၤထီၣ်လၢ ပစိၤခဲအံၤလံ. တကးဒံးဘၣ် ဝံအတၢ်စံးပာ် လၢအလီၤသူၣ်မံသးမုာ်ဖဲ ယၡါယၤ ၅၄:၁၃, ၁၄ န့ၣ်အဘၣ်ထွဲဒီးပှၤလၢ ပစိၤခဲအံၤစ့ၢ်ကီး. ဖဲန့ၣ်တဲဝဲလၢ “နဖိခွါ ခဲလၢာ် ကမ့ၢ်ပှၤလၢ ယဟိဝၤယွၤ သိၣ်လိအီၤ ဒီးနဖိခွါတဖၣ် ကအိၣ်ဒီး တၢ်ဃူတၢ်ဖိး အါအါဂီၢ်ဂီၢ်လီၤ. တၢ်ကသူၣ်ထီၣ်နၤလၢ တၢ်တီတၢ်လိၤအပူၤ ကျၢၤကျၢၤလီၤ. . . . တၢ်မၤပျံၤမၤဖုး တအိၣ်ဘူးဒီးနၤဘၣ်အဃိ တၢ်လၢကမၤပျံၤမၤဖုးနၤ တအိၣ်နီတမံၤဘၣ် ဒီးနတပျံၤ တၢ်နီတမံၤဘၣ်.” ပထံၣ်ဘၣ်လၢ မုၣ်ကီၤလံၢ် လၢအမ့ၢ် “ဟီၣ်ခိၣ်အကစၢ်” စ့ၢ်ကီး မၤပတုာ်ဝဲ ယဟိဝၤယွၤ အပှၤဂီၢ်မုၢ်တဖၣ် အတၢ်မၤ လၢအသိၣ်လိပှၤဂၤ ဘၣ်ဃးဒီး ယဟိဝၤယွၤအဂ့ၢ် တန့ၢ်ဘၣ်. (၂ ကရံၣ် ၄:၄) တၢ်ဘူၣ်ထီၣ်ဘါထီၣ်စီဆှံ အိၣ်ထီၣ်က့ၤလၢ အသီတဘျီလံ ဒီးပှၤမၤဟးဂီၤဝဲ တန့ၢ်နီတဂၤလၢၤဘၣ်. တၢ်ဘူၣ်ထီၣ်ဘါထီၣ် စီဆှံအံၤ ကဆဲးအိၣ်ဝဲ လီၤထူလီၤယိာ်. ဒီးတၢ်စုကဝဲၤလၢ ပှၤတ့ထီၣ်အီၤ ဒ်သိးကထီဒါပှၤအဂီၢ်န့ၣ် ကကဲထီၣ် တၢ်ကလီကလီခဲလၢာ်.

တၢ်ကကဲထီၣ်သးဒ်လဲၣ်

၁၁. ဖဲပှၤဘၣ်တၢ်ဒိးဖှူအီၤတဖၣ် ဘၣ်တၢ်ဟံးထီၣ်အီၤ ဆူမူခိၣ်အခါ ဘၣ်မနုၤအဃိ ပနာ်သပှၢ်တၢၢ်လၢ ကစၢ်ယွၤတပာ်တ့ၢ် ပှၤဂီၢ်မုၢ်ဖးဒိၣ်ဘၣ်လဲၣ်.

^၁၁ ဖဲပှၤဘၣ်တၢ်ဒိးဖှူအီၤတဖၣ် ဘၣ်တၢ်ဟံးထီၣ်အီၤ ဆူမူခိၣ်အခါ တၢ်ကကဲထီၣ်သးဒ်လဲၣ်. ပကဘၣ်သ့ၣ်နီၣ်ထီၣ်လၢ ယ့ၣ်ၡူးကဲဝဲ ပပှၤကွၢ်သိ ဒီးအကဲစ့ၢ်ကီး ခရံာ်ဖိ တၢ်အိၣ်ဖှိၣ်အခိၣ်. ယ့ၣ်ၡူး တဲဘၣ်ပှၤလၢ “သုခိၣ်အိၣ်ထဲတဂၤ လၢအမ့ၢ် ခရံာ်လီၤ.” (မး ၂၃:၁၀) အဃိ ပစီၤပၤယ့ၣ်ၡူးန့ၣ် အကအံးထွဲကွၢ်ထွဲ အပျဲၢ်အဘီၣ် လၢအသးတီဒီးအီၤထီဘိ. ဒီးခီဖျိလၢ ယ့ၣ်ၡူးခရံာ် ကဟံးစုနဲၣ်ကျဲပှၤအဃိ ပဝဲလၢအကဲ အပျဲၢ်အဘီၣ် လၢအအိၣ်လၢ ဟီၣ်ခိၣ်ချၢန့ၣ် ပတလိၣ်ပျံၤတၢ် နီတမံၤဘၣ်. သနာ်က့ ဖဲပှၤဘၣ်တၢ်ဒိးဖှူအီၤတဖၣ် ဘၣ်တၢ်ဟံးထီၣ်အီၤ ဆူမူခိၣ် ဝံၤအလီၢ်ခံ ယ့ၣ်ၡူးခရံာ် ကဟံးစုနဲၣ်ကျဲပှၤ ဒ်လဲၣ်န့ၣ် ပတသ့ၣ်ညါတၢ်ဂ့ၢ် လီၤတံၢ်လီၤဆဲးဘၣ်. အဃိ ပကကွၢ်သကိး တၢ်အဒိတနီၤ လၢလံာ်စီဆှံအပူၤ လၢအမၤမုာ်ထီၣ်ပသး.

၁၂. (က) စီၤမိၤၡ့ သံဝံၤအလီၢ်ခံ ယဟိဝၤယွၤ ကွၢ်ထွဲအပှၤဂီၢ်မုၢ်ဒ်လဲၣ်. (ခ) စီၤအ့ၤလံယၤ န့ၢ်ဘၣ်မူဒါအသီဝံၤအလီၢ်ခံ ယဟိဝၤယွၤကွၢ်ထွဲ အပှၤဂီၢ်မုၢ်ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၂ တချုးလၢ ပှၤအံၣ်စရ့လးဖိ နုာ်လီၤလၢ ကီၢ်တၢ်စံးပာ်ဒံးဘၣ်န့ၣ် စီၤမိၤၡ့ သံဝဲလံ. အဃိ တၢ်ကဲထီၣ်သးဒီး ယဟိဝၤယွၤ အပှၤဂီၢ်မုၢ်ဒ်လဲၣ်. စီၤမိၤၡ့ သံဝံၤအလီၢ်ခံ ယဟိဝၤယွၤ တမၤစၢၤ အပှၤဂီၢ်မုၢ်လၢၤဘၣ်ဧါ. တမ့ၢ်ဒ်န့ၣ်ဘၣ်. ပှၤအံၣ်စရ့လးဖိတဖၣ်အံၤ မ့ၢ်ဆဲးတီဒီး ယဟိဝၤယွၤထီဘိန့ၣ် ယဟိဝၤယွၤ ကဆဲးမၤစၢၤအဝဲသ့ၣ်. ပထံၣ်ဘၣ်စ့ၢ်ကီးလၢ တချုးဖဲ စီၤမိၤၡ့ သံဒံးဘၣ်န့ၣ် ယဟိဝၤယွၤ မၢအဟ့ၣ်လီၤ စီၤယိၤၡူမူဒါလၢ အကတီခိၣ်ရိၤမဲ ပှၤအံၣ်စရ့လးဖိ. ဒီးစီၤမိၤၡ့ သိၣ်လိပာ်စၢၤ စီၤယိၤၡူ တဘျုးနံၣ်ညါ. (၂ မိၤ ၃၃:၁၁; ၅ မိၤ ၃၄:၉) ထဲန့ၣ်တကးဒံးဘၣ် ပှၤပိာ်ခွါလၢ အတီခိၣ်ရိၤမဲတၢ်သ့ လၢအမ့ၢ် ပှၤတကထိအခိၣ်, ပှၤတကယၤအခိၣ်, ပှၤယဲၢ်ဆံအခိၣ် ဒီးပှၤအဂၤတဆံအခိၣ် အိၣ်စ့ၢ်ကီး. (၅ မိၤ ၁:၁၅) အဃိ ပထံၣ်ဘၣ်လၢ ကစၢ်ယွၤ ကွၢ်ထွဲအပှၤဂီၢ်မုၢ်ဂ့ၤဂ့ၤ. ပထံၣ်ဘၣ် တၢ်အဒိအဂၤတခါလၢ စီၤအ့ၤလံယၤအစိၤ. ဒ်သိး ပှၤဂီၢ်မုၢ်တဖၣ် ကဘူၣ်ထီၣ်ဘါထီၣ် ယဟိဝၤယွၤအဂီၢ် စီၤအ့ၤလံယၤ မၤစၢၤအဝဲသ့ၣ် တဘျုးနံၣ်ညါ. ဘၣ်ဆၣ် လၢခံန့ၣ် ယဟိဝၤယွၤ ဟ့ၣ်လီၤအီၤမူဒါလၢ အကလဲၤလၢယူဒၤ လၢကလံၤထံးတခီ. (၂ စီၤပၤ ၂:၁; ၂ ကွဲး ၂၁:၁၂) မ့ၢ်ကစၢ်ယွၤ ပာ်တ့ၢ်ကွံာ် အပှၤဂီၢ်မုၢ်လၢ အအိၣ်လၢ အံၣ်စရ့လး အဒူၣ်တဆံ အဘီမုၢ်လံဧါ. တပာ်တ့ၢ်ဝဲဘၣ်. စီၤအ့ၤလံယၤ သိၣ်လိပာ်စၢၤ စီၤအလံၤၡါ တဘျုးနံၣ်ညါ. တကးဒံးဘၣ် “ဝံအဖိခွါ” လၢအဒိးန့ၢ်ဘၣ်တၢ်သိၣ်လိန့ၣ် အိၣ်စ့ၢ်ကီး. (၂ စီၤပၤ ၂:၇) အဃိ ပှၤပိာ်ခွါလၢ အတီဒီးယဟိဝၤယွၤ လၢအကဟံးစုနဲၣ်ကျဲ ကစၢ်ယွၤ အပှၤဂီၢ်မုၢ်န့ၣ် အိၣ်ဝဲဒီဒူၣ်ညါ. ပထံၣ်ဘၣ်လၢ ယဟိဝၤယွၤ ဆဲးမၤလၢပှဲၤထီၣ် အတၢ်တိာ်ပာ် ဒီးအဆဲးကွၢ်ထွဲအပှၤဂီၢ်မုၢ်လၢ အသးတီတဖၣ်ထီဘိ.

၁၃. ဖဲ ဧ့ၤဘြံၤ ၁၃:၅ န့ၣ်ယဟိဝၤယွၤ အၢၣ်လီၤပှၤဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၃ ဒ်တၢ်အဒိခံခါအံၤ ပာ်ဖျါထီၣ်ဝဲအသိး ဖဲပှၤဘၣ်တၢ်ဒိးဖှူအီၤတဖၣ် ဘၣ်တၢ်ဟံးထီၣ်အီၤ ဆူမူခိၣ်အခါ နဆိကမိၣ် တၢ်ကကဲထီၣ်သး ဒ်လဲၣ်. တၢ်ကကဲထီၣ်သးဒ်လဲၣ်န့ၣ် ပတလိၣ် ဘၣ်ယိၣ်ဘၣ်. လံာ်စီဆှံ ပာ်ဖျါထီၣ်န့ၢ်ပှၤ တၢ်မ့ၢ်တၢ်တီ ယိယိဖိတခါလၢ အမၤမုာ်ထီၣ်ပသး. တၢ်မ့ၢ်တၢ်တီတခါန့ၣ် မ့ၢ်ဝဲ ယဟိဝၤယွၤ တပာ်တ့ၢ် အပှၤဂီၢ်မုၢ်လၢအအိၣ်လၢ ဟီၣ်ခိၣ်ချၢ နီတဘျီဘၣ်. (ဖး ဧ့ၤဘြံၤ ၁၃:၅.) ဒ်စီၤမိၤၡ့ ဒီးစီၤအ့ၤလံယၤအသိး ခရံာ်ဖိလၢ အဘၣ်တၢ်ဒိးဖှူအီၤစှၤဂၤ လၢအတီခိၣ်ရိၤမဲတၢ် လၢဆၢကတီၢ်ခဲအံၤန့ၣ် အဝဲသ့ၣ် သ့ၣ်ညါဝဲလၢ အရ့ဒိၣ်ဒိၣ်မးလၢ အကဘၣ် သိၣ်လိပာ်စၢၤပှၤဂၤ. ဒီးပထံၣ်ဘၣ်လၢ ပှၤပၢဆှၢတၢ်ကမံးတံာ် သိၣ်လိပာ်စၢၤ ဒီပုၢ်ဝဲၢ်ခွါလၢ အပၣ်ဃုာ်လၢ သိလၢအဂၤတဖၣ်အကျါ ဒ်သိးအဝဲသ့ၣ် တီခိၣ်ရိၤမဲတၢ် ကသ့အဂီၢ်န့ၣ် တဘျုးနံၣ်လံ. အဒိ အဝဲသ့ၣ် ရဲၣ်ကျဲၤ ကၠိတဖၣ်လၢ ကသိၣ်လိ တၢ်အိၣ်ဖှိၣ်သးပှၢ်, ပှၤလဲၤတရံးအံးက့ၤကွၢ်က့ၤတၢ်, ဝဲၤတြၢ် ကမံးတံာ်, ပှၤကွၢ်ထွဲတၢ်လၢ ဘ့ၤသ့လး ဒီးရဲၣ်ကျဲၤဝဲ ကၠိလၢအဂၤတဖၣ်. ဒီးပှၤပၢဆှၢတၢ်ကမံးတံာ် အနီၢ်ကစၢ်ဒၣ်ဝဲ သိၣ်လိပာ်စၢၤ ကမံးတံာ် အပှၤမၤစၢၤတၢ်တဖၣ် လၢအမၤတၢ်လၢ ကမံးတံာ်အကလုာ်ကလုာ်. ခဲအံၤန့ၣ် ကမံးတံာ် အပှၤမၤစၢၤတၢ်တဖၣ်အံၤ အိၣ်ဒီးမူဒါအါမး. ဒီးခါဆူညါ ဖဲပှၤဘၣ်တၢ်ဒိးဖှူအီၤတဖၣ် ဘၣ်တၢ်ဟံးထီၣ်အီၤ ဆူမူခိၣ် ဝံၤအလီၢ်ခံ ကမံးတံာ် အပှၤမၤစၢၤတၢ်တဖၣ်အံၤ ကဆဲးကွၢ်ထွဲ ယ့ၣ်ၡူးခရံာ် အသိဖိတဖၣ်ဒံး.

၁၄. တၢ်မၤလိတခါအံၤ အတၢ်ဂ့ၢ်ခိၣ်သ့ၣ် မ့ၢ်မနုၤလဲၣ်.

^၁၄ ပကတဲသကိး တၢ်မၤလိတခါအံၤ အတၢ်ဂ့ၢ်ခိၣ်သ့ၣ်. ဖဲတၢ်နးတၢ်ဖှီၣ်ဖးဒိၣ် ဘူးကဝံၤ ဒီးဖဲပှၤဘၣ်တၢ်ဒိးဖှူအီၤ လၢအအိၣ်တ့ၢ်ဒံးလၢ ဟီၣ်ခိၣ်ချၢတဖၣ် ဘၣ်တၢ်ဟံးထီၣ်အီၤ ဆူမူခိၣ်အခါ ယ့ၣ်ၡူးခရံာ် ကဆဲးတီခိၣ်ရိၤမဲဝဲ ယဟိဝၤယွၤ အပှၤဂီၢ်မုၢ်အဃိ တၢ်ဘူၣ်ထီၣ်ဘါထီၣ်စီဆှံ ကဆဲးအိၣ် လၢဟီၣ်ခိၣ်ချၢဒံး. ဖဲန့ၣ်အဆၢကတီၢ် စီၤကိးလၢကီၢ်မါကူး လၢအမ့ၢ် ကလုာ်ဒူၣ်လၢ အဖီၣ်လိာ်စုန့ၣ် ကဟဲထီဒါ ကစၢ်ယွၤ အပှၤဂီၢ်မုၢ်. (ဃ့း ၃၈:၁၈-၂၀) သနာ်က့ ဒ်သိး ယဟိဝၤယွၤ အပှၤဂီၢ်မုၢ် တဆဲးဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤအဂီၢ်န့ၣ် အဝဲသ့ၣ် မၤဝဲတန့ၢ်ဘၣ်. ယဟိဝၤယွၤ ကမၤပူၤဖျဲး အပှၤဂီၢ်မုၢ် သပှၢ်တၢၢ်. ဘၣ်တဘျီ တၢ်မၢဖိယိၤဟၣ် ထံၣ်ဝဲတၢ်ထံၣ်လၢညါခီ ဘၣ်ဃးဒီး ခရံာ်အသိလၢအဂၤ လၢအမ့ၢ် “ပှၤဂီၢ်မုၢ်ဖးဒိၣ်.” ဒီးအသ့ၣ်ညါဘၣ်ဝဲလၢ “ပှၤဂီၢ်မုၢ်ဖးဒိၣ်” အံၤအမ့ၢ်ပှၤလၢ အလဲၤခီဖျိ “တၢ်နးတၢ်ဖှီၣ်ဖးဒိၣ်.” (လီၣ် ၇:၉, ၁၄) အဃိ ပသ့ၣ်ညါဘၣ်လၢ ယဟိဝၤယွၤ ကမၤပူၤဖျဲး အပှၤဂီၢ်မုၢ် သပှၢ်တၢၢ်.

၁၅-၁၆. ဒ် လီၣ်ဖျါ ၁၇:၁၄ ပာ်ဖျါထီၣ်ဝဲအသိး ဖဲအၢ်မက့းဒိၣ်တၢ်ဒုး အဆၢကတီၢ်န့ၣ် ခရံာ်ဖိလၢ အဘၣ်တၢ်ဒိးဖှူအီၤတဖၣ် ကမၤမနုၤလဲၣ် ဒီးဘၣ်မနုၤအဃိ အကဲထီၣ် တၢ်ဟ့ၣ်ဂံၢ်ဟ့ၣ်ဘါ လၢပဂီၢ်လဲၣ်.

^၁၅ ဘၣ်ဆၣ် ပှၤတနီၤ ကဆိကမိၣ်ဒံးဝဲလၢ ‘ဖဲပှၤဘၣ်တၢ်ဒိးဖှူအီၤတဖၣ် ဘၣ်တၢ်ဟံးထီၣ်အီၤ ဆူမူခိၣ် ဝံၤအလီၢ်ခံ အဝဲသ့ၣ် ကမၤမနုၤလဲၣ်.’ လံာ်စီဆှံ ပာ်ဖျါထီၣ်န့ၢ်ပှၤ တၢ်စံးဆၢ လီၤတံၢ်လီၤဆဲး. လံာ်စီဆှံ ပာ်ဖျါထီၣ်ဝဲလၢ ပှၤပၢတၢ်လၢ ဟီၣ်ခိၣ်ချၢန့ၣ် အဝဲသ့ၣ်က “ဒုးတၢ်ဒီးသိဖိ”  ဒီး “သိဖိကမၤနၢၤ အဝဲသ့ၣ်” အဃိ အဝဲသ့ၣ် ဒုးတၢ်တနၢၤဘၣ်. ဒီးမတဂၤ ကမၤစၢၤသိဖိလဲၣ်. လံာ်စီဆှံ တဲဝဲလၢ ပှၤလၢ “ဘၣ်တၢ်ကိးန့ၢ်အီၤ,” ပှၤလၢ “ဘၣ်တၢ်ဃုထၢထီၣ်အီၤ” ဒီးပှၤလၢ “အသးတီ” တဖၣ်ကမၤစၢၤဝဲသိဖိ. (ဖး လီၣ်ဖျါ ၁၇:၁၄.) ပှၤတဖၣ်အံၤ အဝဲသ့ၣ်ကဲ မတဂၤလဲၣ်. အဝဲသ့ၣ်ကဲဝဲ ပှၤဘၣ်တၢ်ဒိးဖှူအီၤ လၢအဂဲၤဆၢထၢၣ်သမူထီၣ်က့ၤ. အဃိ ဖဲတၢ်နးတၢ်ဖှီၣ်ဖးဒိၣ် ဘူးကဝံၤ ဒီးဖဲပှၤဘၣ်တၢ်ဒိးဖှူအီၤ လၢအအိၣ်တ့ၢ်ဒံးလၢ ဟီၣ်ခိၣ်ချၢတဖၣ် ဘၣ်တၢ်ဟံးထီၣ်အီၤ ဆူမူခိၣ်အခါ အဝဲသ့ၣ် အမူဒါအဆိကတၢၢ်န့ၣ်မ့ၢ်ဝဲ အကဘၣ်ဒုးတၢ်. မူဒါတခါအံၤ အလီၤဆီဒိၣ်မး. ပမ့ၢ်ဘၣ်ကွၢ်န့ၣ် တချုးလၢ ခရံာ်ဖိလၢ အဘၣ်တၢ်ဒိးဖှူအီၤတဖၣ်အံၤ ကဲထီၣ် ယဟိဝၤပှၤအုၣ်အသးဒံးဘၣ်န့ၣ် အဝဲသ့ၣ်တနီၤ ကဲဝဲပှၤလၢ အအ့ၣ်လိာ်သးဒီးပှၤဂၤ. ဒီးလၢညါ အဝဲသ့ၣ်တနီၤန့ၣ် ကဲတ့ၢ်ပှၤသုးဖိ. ဘၣ်ဆၣ် လၢခံန့ၣ် အဝဲသ့ၣ် ကဲထီၣ်ခရံာ်ဖိအမ့ၢ်အတီ ဒီးအဝဲသ့ၣ် ဆဲးအိၣ်ဃူအိၣ်ဖိးဒီးပှၤဂၤ. (ကလၤ ၅:၂၂; ၂ သ့း ၃:၁၆) အဝဲသ့ၣ် တမၤဘၣ်ဃးအသးဒီး တၢ်ဒုးတၢ်ယၤ လၢဟီၣ်ခိၣ်အံၤလၢၤဘၣ်. ဘၣ်ဆၣ် ဖဲအဝဲသ့ၣ် ဂဲၤဆၢထၢၣ်သမူထီၣ်က့ၤလၢ မူခိၣ်ဝံၤအလီၢ်ခံ အဝဲသ့ၣ် ကမၤသကိးတၢ်ဒီး ယ့ၣ်ၡူးခရံာ် ဒီးအမူခိၣ်ကလူးတဖၣ် ဒီးအဝဲသ့ၣ် ကဒုးဝဲ ကစၢ်ယွၤအဒုၣ်အဒါ ဖဲတၢ်ဒုးအလီၢ်ခံကတၢၢ်တခါ.

^၁၆ ဆိကမိၣ်ကွၢ် တၢ်ဂ့ၢ်တထံၣ်အံၤ. ဖဲခရံာ်ဖိလၢ အဘၣ်တၢ်ဒိးဖှူအီၤတဖၣ် အိၣ်ဒံးလၢ ဟီၣ်ခိၣ်ချၢအခါ အဝဲသ့ၣ်တနီၤန့ၣ် အသးပှၢ် ဒီးအဂံၢ်အဘါတအိၣ်ဘၣ်. ဘၣ်ဆၣ် ဖဲအဝဲသ့ၣ် ဂဲၤဆၢထၢၣ်သမူထီၣ်က့ၤ လၢမူခိၣ်အခါ အဝဲသ့ၣ် ကကဲထီၣ် ပှၤနီၢ်သးဖိလၢ အဂံၢ်အဘါဆူၣ် လၢအသံတသ့ဘၣ် ဒီးအဝဲသ့ၣ် ကန့ၢ်ဘၣ်မူဒါလၢ ကဒုးသကိးတၢ်ဒီး ယ့ၣ်ၡူးခရံာ် လၢအမ့ၢ်စီၤပၤ. ဒီးဖဲအၢ်မက့းဒိၣ်တၢ်ဒုး ဝံၤအလီၢ်ခံ အဝဲသ့ၣ် ကမၤသကိးတၢ်ဒီးယ့ၣ်ၡူး ဒီးမၤစၢၤပှၤဟီၣ်ခိၣ် ဒ်သိး ပှၤဟီၣ်ခိၣ်ဖိ ကကဲထီၣ် ပှၤလၢပှၤပှဲၤအဂီၢ်. ပသ့ၣ်ညါဘၣ်လၢ ဖဲအဝဲသ့ၣ်အိၣ်လၢ ဟီၣ်ခိၣ်ချၢအခါ အဝဲသ့ၣ် တကဲပှၤလၢပှၤပှဲၤဘၣ် သနာ်က့ အဝဲသ့ၣ် မၤစၢၤဘၣ် ဒီပုၢ်ဝဲၢ်မုၣ်ခွါအါမး. အဃိ ဖဲအဝဲသ့ၣ် အိၣ်လၢမူခိၣ်အခါ အဝဲသ့ၣ် မၤစၢၤ ဒီပုၢ်ဝဲၢ်မုၣ်ခွါ လၢဟီၣ်ခိၣ်ချၢ ကသ့အါန့ၢ်အန့ၣ် စၢၢ်တလၢၢ်ဒံး.

၁၇. ဖဲအၢ်မက့းဒိၣ်တၢ်ဒုး အဆၢကတီၢ် ကစၢ်ယွၤ အခ့အပှၤ ကပူၤဖျဲးဝဲခဲလၢာ်န့ၣ် ပသ့ၣ်ညါဘၣ်ဒ်လဲၣ်.

^၁၇ နကဲပှၤလၢ အပၣ်ဃုာ်လၢ သိလၢအဂၤတဖၣ် အကျါဧါ. နမ့ၢ်ပၣ်ဃုာ်န့ၣ် ဖဲအၢ်မက့းဒိၣ်တၢ်ဒုး စးထီၣ်အခါ နကဘၣ်မၤမနုၤလဲၣ်. နကဘၣ် နာ်န့ၢ် ယဟိဝၤယွၤ ဒီးမၤထွဲ အတၢ်ဟံးစုနဲၣ်ကျဲ. အတၢ်ဟံးစုနဲၣ်ကျဲန့ၣ် ကမ့ၢ်မနုၤလဲၣ်. လံာ်စီဆှံ တဲဘၣ်ပှၤလၢ “လဲၤနုာ်လီၤလၢ သုဒၢးဖိတဖၣ်အပူၤ ဒီးကးပံးသုတြဲၤတက့ၢ်. အိၣ်ခူသူၣ် တစိၢ်ဖိ တုၤလၢ တၢ်သးဒိၣ်ထီၣ် လဲၤတလၢကွံာ်တက့ၢ်.” (ၡါ ၂၆:၂၀) ဖဲအၢ်မက့းဒိၣ်တၢ်ဒုး အဆၢကတီၢ်န့ၣ် ကစၢ်ယွၤ အခ့အပှၤ လၢအတီဒီးအီၤ လၢမူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤ ကပူၤဖျဲးဝဲခဲလၢာ်. ဒ်တၢ်မၢဖိပီလူးအသိး ပနာ်သပှၢ်တၢၢ်လၢ “ပဒိၣ်တဖၣ်မ့ၢ်ဂ့ၤ, တၢ်လၢ အအိၣ်ခဲအံၤတဖၣ်မ့ၢ်ဂ့ၤ, တၢ်လၢအကဟဲခါဆူညါတဖၣ်မ့ၢ်ဂ့ၤ . . . မၤလီၤဖးပှၤဒီး ကစၢ်ယွၤအတၢ်အဲၣ် . . . တသ့နီတမံၤဘၣ်.” (ရိ ၈:၃၈, ၃၉) ဒီးထီဘိန့ၣ် ပကဘၣ်သ့ၣ်နီၣ်ထီၣ်လၢ ယဟိဝၤယွၤအဲၣ်ပှၤ ဒီးအတပာ်တ့ၢ်ပှၤ နီတဘျီဘၣ်.