1. Yinki ntangu Baklisto nionso yina metulua mafuta na kimpeve kevuanda na dizulu?

 YAMELUTA bamvula mingi, bisadi ya Yehova vuandaka kukiyuvusa, ‘Yinki ntangu Muklisto ya nsuka yina metulua mafuta na kimpeve kekuenda na dizulu?’ Beto vuandaka kanisaka ti ndambu ya Baklisto yina metulua mafuta na kimpeve lendaka bikana na Paradiso awa na ntoto samu na mua ntangu na manima ya mvita ya Armagedoni. Kasi na Linɔ́ngi ya Mosɛnzɛli ya 15 juillet 2013 beto longukaka ti tekila mvita ya Armagedoni banda, Baklisto nionso yina metulua mafuta na kimpeve kevuanda deja na dizulu.​—Mat. 24:31.

2. Yinki kiuvu yalenda bimisa, mpe yinki beto ketadila na disolo yayi?

² Kasi beto lenda kukiyuvusa: Yinki kekumina ‘mameme yankaka’ ya Klisto yina kesadila Yehova na kukuikama nionso na ntoto na ntangu ya “mpasi ya nene”? (Yoa. 10:16; Mat. 24:21) Ndambu ya ‘mameme yankaka’ lenda kukitungisa ti bakezaba ve diambu ya kusala ntangu bampangi na bau ya babakala mpe ya banketo yina metulua mafuta na kimpeve kekuenda na dizulu. Beto tadila masolo zole ya Biblia yina lenda sala ti bakanisa mutindu yina. Na manima beto ketubila bamfunu yina kesala ti babika kukitungisa.

YINKI MAMBU KEKUMINA VE MAMEME YANKAKA?

3-4. Yinki kiuvu bantu yankaka lenda kukiyuvusa, mpe samu na yinki?

³ Bantu yankaka lenda kukiyuvusa kana mameme yankaka kebika kusadila Yehova ntangu bampangi ya Kimvuka ya Ntuadisi yina metulua mafuta na kimpeve kevuanda diaka ve samu na kutuadisa bau. Mbala yankaka masolo yankaka ya Biblia lenda sala ti bavuanda na kubanga ya mutindu yina. Beto tadila bifuani zole. Ya ntete metadila Nganga-nzambi ya nene Yehoyada. Yandi vuandaka  kisadi ya kukuikama ya Nzambi. Yandi mpe nketo na yandi, Yehoshabeati, taninaka ntuenia mosi ya bakala Yehoashe mpe basadisaka yandi samu yandi kuma ntinu mosi ya mbote mpe ya kukuikama. Ntangu nionso yina Yehoyada, yina vuandaka mbuta vuandaka na luzingu, Yehoashe vuandaka sala mambu ya mbote. Kasi na manima ya lufua ya Yehoyada, Yehoashe bandaka kusala mambu ya yimbi. Yandi kuwaka bamfumu ya yimbi mpe yandi bikaka Yehova.​—2 Bs. 24:2, 15-19.

⁴ Kifuani ya zole kele ya Baklisto yina vuandaka zinga na manima ya ntangu ya bantumua. Ntumua Yoane, ntumua ya nsuka yina bikanaka na luzingu, vuandaka na bupusi ya mbote na Baklisto mingi, yandi vuandaka sadisa bau samu babikana ya kukuikama na Yehova. (3 Yn. 4) Mutindu mosi kaka na bantumua yankaka ya Yesu, Yoane salaka ngolo samu na kutanina kimvuka samu na konso muntu yina vuandaka longa makanisi mpe mambu ya luvunu. (1 Yn. 2:18; tala banoti ya ndongokolo ya 2 Te. 2:7.) Kasi na manima ya lufua ya Yoane, Baklisto mingi ya bimvuka landaka malongi ya bapengui. Na bamvula yina landaka, bapengui yango vuandaka longa malongi mingi ya luvunu, mpe yau salaka ti bikadulu ya yimbi kota na bimvuka nionso.

5. Yinki mambu beto lenda tuba ve samu na masolo yango zole?

⁵ Masolo yango zole ya Biblia memonisa ti na manima ya kukuenda na dizulu ya Baklisto yina metulua mafuta na kimpeve, mameme yankaka ya Klisto kebanda kusala mambu ya yimbi mutindu mosi na Yehoashe? To bakekuma bapengui mutindu Baklisto mingi kumaka na manima ya lufua ya bantumua? Mvutu kele ti yakesalama mutindu yina ve! Beto lenda kukindimisa ti ntangu Baklisto yina metulua mafuta na kimpeve kekuenda na dizulu, mameme yankaka ketatamana kusambila Yehova na mutindu ya mbote mpe Yehova ketatamana kukokisa bansatu na bau ya kimpeve. Samu na yinki beto lenda kukindimisa mutindu yina?

BISADI YA YEHOVA KETATAMANA KUSAMBILA YANDI NA MUTINDU YINA YANDI KEZOLAKA

6. Yinki kele bilokola ya bantangu tatu beto ketubila na nkufi?

⁶ Samu na yinki beto lenda kukindimisa ti bisadi ya Yehova ketatamana kusambila yandi na mutindu yina yandi kezolaka ata na bantangu ya mpasi yina kena kuiza? Yakele samu na mambu yina beto longukaka na Biblia samu na kilokola ya ntangu yayi beto kena kuzinga. Samu Biblia metuba ti ntangu yayi beto kena kuzinga kele mpenza ya kusuasana na ntangu ya Bayisaele, mpe ntangu ya manima ya lufua ya bantumua. Na yau bika beto tadila mbotembote bilokola ya bantangu yango tatu: (1) Ntangu ya Yisaele ya ntama, (2) ntangu ya manima ya lufua ya bantumua, mpe (3) ntangu na beto, ‘bantangu yina bakevutula mambu nionso.’​—Bis. 3:21.

7. Samu na yinki yalombaka na Bayisaele ya kukuikama bazimbisa ve kivuvu na bau ntangu bantinu mpe bantu mingi yankaka ponaka kusala mambu ya yimbi?

⁷ Ntangu ya Yisaele ya ntama. Ntangu fioti tekila lufua na yandi, Mose tubilaka Bayisaele: ‘Munu mezaba mbote ti na manima ya lufua na munu, beno kesala mpenza mambu ya yimbi mpe beno kebika nzila yina munu memonisa beno.’ (Kul. 31:29) Mose luengisaka diaka ti kana Bayisaele metomboka, bakekuenda na kinanga. (Kul. 28:35, 36) Bampova yango kokisamaka? Ee. Basiekle mingi na manima, bantinu mingi salaka mambu yina vuandaka yimbi na meso ya Yehova mpe bantu landaka bau na nsambudulu ya luvunu. Yasalaka ti Yehova pesa bantu ya yimbi ya Yisaele kitumbu mpe yandi pesaka nzila ve ti bantinu ya Yisaele tatamana kuyadila bau. (Eze. 21:25-27) Kasi Bayisaele ya kukuikama bakaka kibakala ntangu bamonaka ti Mpova ya Nzambi mekokisama.​—Yez. 55:10, 11.

8. Beto fueti kamua mutindu malongi ya luvunu kotaka na kimvuka ya Buklisto ya siekle ya zole? Sasila.

⁸ Ntangu ya manima ya lufua ya bantumua. Beto fueti kamua na kuzaba ti malongi ya luvunu kotaka na kimvuka ya Buklisto ya siekle ya zole?  Ve. Yesu samunaka ti malongi mingi ya bapengui kebaka kisika. (Mat. 7:21-23; 13:24-30, 36-43) Ntumua Paulo, ntumua Petelo, mpe ntumua Yoane, bau nionso tubaka ti bambikudulu ya Yesu bandaka deja kukokisama na siekle ya ntete N.B. (2 Te. 2:3, 7; 2 Pi. 2:1; 1 Yn. 2:18) Ntangu fioti na manima ya lufua ya bantumua, Baklisto yina kumaka bapengui kumaka na kati ya Babiloni ya nene, kimvuka ya mabundu ya luvunu ya yinza ya mvimba. Mbala yayi diaka mambu yina Yesu tubaka vuandaka kokisama.

9. Na yinki mutindu kilokola ya ntangu yayi beto kena kuzinga na yau mesuasana na ntangu ya Yisaele ya ntama mpe ntangu ya kimvuka ya Buklisto ya siekle ya zole?

⁹ ‘Bantangu yina bakevutula mambu nionso.’ Ntangu na beto mesuasana na ntangu ya Yisaele ya ntama mpe na ntangu yina malongi mingi ya bapengui kotaka na siekle ya zole N.B. Yinki mutindu bakebokidilaka kilokola ya ntangu na beto? Mbala mingi beto kebokidilaka ntangu yayi beto kena kuzinga na yau “bilumbu ya nsuka” ya mambu ya yimbi ya ntangu yayi. (2 Tm. 3:1) Kasi Biblia kena kumonisa ti kilokola ya ntangu yina meluta nene mpe yinda bandaka kaka na ntangu yango. Yaketatamana tii ntangu Kimfumu ya Masiya kevutula bantu samu bakuma bantu ya kukoka mpe yakekumisa ntoto Paradiso. Bakebokidilaka kilokola ya ntangu yango ‘bantangu yina bakevutula mambu nionso.’ (Bis. 3:21) Kilokola ya ntangu yango bandaka na mvula 1914. Yinki mambu bavutulaka? Batulaka Yesu Ntinu na dizulu. Na yau Yehova bakaka diaka n’yadi yina vuandaka monikisa Yandi, muntu yina mebonga kubaka dikabu ya Ntinu Davidi muntu ya kukuikama. Kasi, kaka kimfumu yango ve Yehova vutulaka. Ntangu fioti na manima, nsambudulu ya kuvedila bandaka kuvutuka! (Yez. 2:2-4; Eze. 11:17-20) Malongi ya luvunu kekota diaka na nsambudulu yango?

10. (a) Yinki Biblia samunaka samu na nsambudulu ya kuvedila na bilumbu na beto? (Yezaya 54:17) (b) Samu na yinki bambikudulu yankaka kena kukindisa?

¹⁰ Tanga Yezaya 54:17. Kanisa ntete na mbikudulu yayi: ‘Kinuanunu mosi ve yina bakesadila samu na kunuanisa nge kenunga’! Bampova yango yina mepemama kena kukokisama bubu yayi. Bampova yayi melanda diaka ya kubomba kena kusalama na ntangu na beto: ‘Yehova kelonga bana na nge nionso, mpe kiyenge ya bana na nge kevuanda mingi. Nge kepikama ngolo na lunungu. . . . Nge kebanga ata kima mosi ve mpe nge kevuanda na mfunu ve ya kuzakama, samu yakekuiza ve penepene na nge.’ (Yez. 54:13, 14) Ata yandi mosi Satana ‘nzambi ya mambu ya ntangu yayi,’ lenda pekisa ve kisalu yina bisadi ya Nzambi kena kusala ya kulonga bantu yankaka mambu ya Yehova. (2 Bk. 4:4) Nsambudulu ya kuvedila vutukaka, mpe malongi ya luvunu kesala kota diaka ve na kati. Yakebikana samu na mvimbamvimba. Kinuanunu  mosi ve yina bakesadila samu na kunuanisa beto kenunga!

YINKI MAMBU KEKUMINA MAMEME YANKAKA?

11. Yinki mendimisa beto ti kimvuka ya nene ya bantu kesundolama ve ntangu Baklisto yina metulua mafuta na kimpeve kekuenda na dizulu?

¹¹ Yinki kesalama ntangu Baklisto yina metulua mafuta na kimpeve kekuenda na dizulu? Kuzimbakana ve ti Yesu kele Mvungi na beto. Yandi kele mfumu ya kimvuka ya Buklisto. Yesu tubaka puelele ti: ‘Beno kele kaka na Ntuadisi mosi, Klisto.’ (Mat. 23:10) Yesu yina kena kuyala na dizulu ketanina ntangu nionso banlonguki na yandi ya kedika. Lokola Klisto kena kutuadisa bau, banlonguki na yandi awa na ntoto kele na mfunu ya kubanga ata kima mosi ve. Ya kedika beto zaba ve mambu nionso yina metadila mutindu Klisto ketuadisa bisadi na yandi na ntangu yango. Na yau beto tadila ndambu ya bifuani ya Biblia yina lenda kindisa beto.

12. Yinki mutindu Yehova taninaka bisadi na yandi (a) na manima ya lufua ya Mose? (b) ntangu Eliya bakaka kiyekua yankaka? (Tala diaka foto.)

¹² Tekila Bayisaele kota na ntoto ya Nsilulu, Mose kufuaka. Yinki kuminaka bisadi ya Nzambi? Yehova lembaka kusadisa bisadi na yandi na manima ya lufua ya bakala yango ya kukuikama? Ve. Ntangu nionso yina babikanaka ya kukuikama, Yehova vuandaka kokisa bansatu na bau. Tekila Mose kufua, Yehova tubilaka yandi yandi pesa Yosua kiyekua ya kutuadisa bisadi na yandi. Mose pesaka Yosua formasion samu na bamvula mingi. (Kub. 33:11; Kul. 34:9) Katula yau, yavuandaka na babakala mingi yankaka ya makoki yina vuandaka tuadisa​—bamfumu ya mafunda, bamfumu ya bankama, bamfumu ya makumi tanu, ata mpe bamfumu ya makumi. (Kul. 1:15) Bisadi ya Nzambi vuandaka mpenza na lutanunu. Beto kemona kifuani ya mutindu yina na Eliya. Yandi salaka bamvula mingi samu na kutuadisa nsambudulu ya kuvedila na kati ya Bayisaele. Kasi na manima Yehova pesaka yandi kiyekua yankaka ya kusala na Yudea. (2 Bn. 2:1; 2 Bs. 21:12) Bantu ya kukuikama ya kimfumu ya mabuta 10 ya Yisaele sundolamaka? Ve. Eliya pesaka Elisha formasion bamvula mingi. Yavuandaka diaka na ‘bana ya bambikudi,’ yina bongisamaka samu na kubaka formasion. (2 Bn. 2:7) Na yau, babakala mingi ya kukuikama bongisamaka samu na kupesa maboko, samu na kutuadisa bisadi ya Nzambi. Yehova tatamanaka kukokisa lukanu na yandi mpe kutanina bisadi na yandi ya kukuikama.

13. Yinki lukindusu beto kekuta na Baebreo 13:5b?

¹³ Na kuvuandaka na bifuani yayi na makanisi, yinki nge mekanisa kesalama ntangu Muklisto ya nsuka yina metulua mafuta na kimpeve kekuenda na dizulu? Beto fueti kukitungisa ve. Biblia  mepesa kedika mosi ya pete, kasi ya kundimisa: Yehova kesundola ata fioti ve bisadi na yandi na ntoto. (Tanga Baebreo 13:5b.) Mutindu mosi kaka na Mose mpe Eliya, mua grupe ya fioti ya Baklisto yina metulua mafuta na kimpeve yina kena kutuadisa beto bubu yayi, kena kubakusa mfunu ya kupesa bantu yankaka formasion. Banda bamvula mingi, bampangi ya Kimvuka ya Ntuadisi kepesaka babakala yina kele na kati ya mameme yankaka formasion samu na kutuadisa. Na kifuani, babongisaka bakalasi samu na kupesa formasion na bankulutu, na bankengi ya kizungidila, na bampangi ya Komite ya filiale, na bankengi na Betele, mpe bantu yankaka. Bampangi ya Kimvuka ya Ntuadisi kepesaka bau mosi formasion na bansadisi ya bakomite mutindu na mutindu ya Kimvuka ya Ntuadisi. Bubu yayi bansadisi yango kena kukokisa kiyekua mosi ya nene na kukuikama nionso. Bakena kubongisama mbote samu na kutatamana kisalu ya kutanina mameme ya Klisto.

14. Yinki diambu ya ngudi beto metubila na disolo yayi?

¹⁴ Tala diambu ya ngudi beto metubila na disolo na beto: Ntangu Muklisto ya nsuka yina metulua mafuta na kimpeve kekuenda na dizulu pene na nsuka ya mpasi ya nene, bisadi ya Yehova awa na ntoto ketatamana kusadila yandi na kukuikama nionso. Na nzila ya lutuadusu ya Yesu Klisto, bisadi ya Yehova kelemba ve kusadila yandi na kukuikama nionso. Beto mezaba ti na ntangu yango, kimvuka ya makanda yina Biblia mebokidila Gogi ya Magogi kenuanisa bisadi ya Nzambi. (Eze. 38:18-20) Kasi Gogi ya Magogi kenuanisa beto samu na ntangu ya nkufi mpe yakenunga ve; yakepekisa ve bisadi ya Nzambi basambila Yehova. Kondua ntembe Yehova kevukisa bau! Na vizion mosi, ntumua Yoane monaka “kimvuka mosi ya nene” ya mameme yankaka ya Klisto. Yoane tubaka ti “kimvuka [yayi] ya nene” mekatuka na “mpasi ya nene.” (Kus. 7:9, 14) Kondua ntembe, beto mezaba na kedika nionso ti Yehova ketanina bau!

15-16. Na kutadila Kusonga 17:14, yinki bampangi ya Klisto yina metulua mafuta na kimpeve kesala na ntangu ya mvita ya Armagedoni, mpe samu na yinki yakele diambu ya kukindisa?

¹⁵ Kasi bantu yankaka lenda kukiyuvusa: ‘Yinki beto ketuba samu na Baklisto yina metulua mafuta na kimpeve? Yinki bakesala na manima ya kukuenda na dizulu?’ Biblia mepesa mvutu ya puelele samu na kiuvu yango. Yamemonisa ti  baguvernema ya yinza yayi ‘kenuana na Muana dimeme.’ Kasi bakenunga ve. Beto ketangaka: ‘Muana dimeme kenunga bau.’ Mpe banani kesadisa yandi? Verse yango mepesa mvutu. Bantu yina ‘bamebokilaka,’ yina ‘bameponaka,’ mpe yina kele ya ‘kukuikama.’ (Tanga Kusonga 17:14.) Bakele banani? Baklisto yina metulua mafuta na kimpeve yina kefutumuka! Na yau, ntangu Muklisto ya nsuka yina metulua mafuta na kimpeve awa na ntoto kekuenda na dizulu pene na nsuka ya mpasi ya nene, mosi na kati ya biyekua na bau ya ntete kevuanda kunuana. Kiyekua mosi ya nene mpenza! Ndambu kati na Baklisto yina metulua mafuta na kimpeve vuandaka nuanisa deja bantu yankaka tekila bakuma Bambangi ya Yehova. Bayankaka salaka ata mpe kisalu ya soda na yinza yayi. Kasi na manima bakumaka Baklisto ya kedika mpe balongukaka kuvuanda na kiyenge na bantu yankaka. (Bag. 5:22; 2 Te. 3:16) Balembaka kupesa maboko na bamvita. Kasi, na manima ya kukuenda na dizulu bakesala kintuadi na Klisto mpe bambasi na yandi ya nlongo, na mvita ya nsuka yina bakenuana na bambeni ya Nzambi.

¹⁶ Kanisa ntete! Awa na ntoto, Baklisto yankaka yina metulua mafuta na kimpeve mepusana na bamvula, mpe bakele diaka na ngolo ve. Kasi ntangu kaka bakefutumuka samu na kukuenda zinga na dizulu, bakevuanda bisemua ya kimpeve ya kilendo, mpe yina lenda kufua diaka ve, bamebaka kiyekua ya kunuana kintuadi na Ntinu na bau ya Mvita, Yesu Klisto. Na manima ya kunuana mvita ya Armagedoni, bakesala kintuadi na Yesu samu na kusadisa bantu bakuma bantu ya kukoka. Kondua ntembe bakesadila bampangi na bau ya nzola awa na ntoto mambu mingi ya mbote kukatuka kuna na dizulu, kuluta mutindu balendaka sala yau ntangu bavuandaka bantu ya kuzanga kukoka awa na ntoto!

17. Yinki mutindu beto mezaba ti bisadi nionso ya Nzambi kevuanda na lutanunu na ntangu ya mvita ya Armagedoni?

¹⁷ Nge kele na kati ya mameme yankaka? Kana yakele plina, yinki nge fueti sala ntangu mvita ya mfunu ya Armagedoni kebanda? Diambu ya kusala kele kaka: Kutudila Yehova ntima, mpe kulanda lutuadusu na yandi. Yakena kulomba yinki mambu? Biblia metuba na mutindu mosi ya kubomba ti: ‘Beno kota na bashambre na beno ya kati, mpe beno kanga baporte na beno. Beno suama samu na ntangu fioti tii nganzi keluta.’ (Yez. 26:20) Bisadi nionso ya kukuikama ya Nzambi, na dizulu mpe na ntoto, kevuanda na lutanunu na ntangu yango. Mutindu mosi na ntumua Paulo, beto mendimisama ti yavuanda ‘baguvernema to bima ya ntangu yayi to bima yina kekuiza . . . ata kima mosi ve kekoka kukabula beto na nzola ya Nzambi.’ (Bar. 8:38, 39) Zabaka ntangu nionso ti: Yehova kezolaka nge, mpe yandi kesala sundola nge ata fioti ve!