1. Siruwo musinke ngava za meguru vagwavekwa navenye?

 NOMVHURA danare dina ka pita, vakareli vaJehova kwa lipulire asi ‘Siruwo musinke Vakriste wovagwavekwa ava vana hupu po ngesi pevhu ngava za meguru?’ Pwanare ose kwa gazarere asi vagwavekwa vamwe nampo ngava kara pevhu nokukaparuka moparadisa siruwo songandi konyima zoyita yaHarumagedoni. Nye moRuhungu romo-15 Pembankuru 2013, ose kwa lirongere asi vagwavekwa navenye ava simpe vana kara ngesi pevhu, ngava za meguru komeho yita yaHarumagedoni yi tameke.—Mat. 24:31.

2. Epuro musinke natu vhura kulipura ntani yisinke natu ka zogera mosirongwa esi?

² Nye nampili ngoso, kuvhura tu lipure asi: Yisinke ngayi horokera “nonzwi dapeke” daKristusa ava ngava karera Jehova noulimburukwi posiruwo ‘soudigu wounene’? (Joh. 10:16; Mat. 24:21) Vamwe kuvhura va lizuvhe asi kapi ngava diva eyi ngava rugana apa vagwavekwa wovagara nava wovakadi ngava va twara meguru. Tu zeni tu ka zogere yihorokwa yivali yomoBibeli eyi ayi va ninkisa nampo va gazare ngoso. Ntani natu ka zogera nokonda deyi natu dilira kukara nosinka.

YISINKE NGAYI DIRA KUHOROKERA NONZWI DAPEKE?

3-4. Sinka musinke nampo nava kara naso vamwe ntani morwasinke?

³ Vamwe kuvhura va kare nosinka asi nonzwi dapeke kuvhura nga di hageke kukarera Jehova, apa ngapa dira kukara vanavazinyetu wovagwavekwa womoMbungagendesi. Nampo yihonena yimwe yomoBibeli kuvhura kuvaninkisa va lizuvhe ngoso. Tu zogereni ko yihonena yivali. Sokuhova kuna kara somupristeli gomunene Jehoyada. Age kwa kere mugara ogu ga limburukwire Karunga. Nage namukadendi Jehoseba, kwa poperere  mumati Jowasi ntani kwa mu vaterere a kare hompa gomuwa ntani gokulimburukwa. Posiruwo esi Jehoyada ga kere muzuni, Jowasi kwa karerere Jehova nokurugana yininke yoyiwa. Nye konyima zapa Jehoyada ga fire, Jowasi kwa tamekere kurugana yininke yoyidona. Age kwa purakenene kovagendesi woVajuda ntani kwa hagekere kukarera Jehova.—2 Hist. 24:​2, 15-19.

⁴ Sihonena sauvali kuna kara soVakriste ava va parukire konyima zosiruwo sovapositoli. Mupositoli gokuhulilira ogu ga parukire kuna kara Johanesa. Age kwa tulilire po Vakriste wovanzi sihonena sosiwa. Ntani age kwava vaterere va twikire kukarera Jehova noulimburukwi. (3 Joh. 4) Ngwendi moomu tupu vapositoli vamwe vaJesus va yi rugene, Johanesa kwa rugene unene yipo a popere nombungakriste kovarwanesi usili. (1 Joh. 2:18) Konyima zapa Johanesa ga fire, varwanesi usili kwa ligwederere. Monomvhura edi da ya kweme ko, varwanesi owo, ngava rongo magano gomanzi goyipempa ntani kwa pulisilire yirugana yoyidona monombungakriste.

5. Sinka musinke natu dira kukara naso kuhamena yihorokwa oyo yivali?

⁵ Ngoso yihorokwa oyo yivali yomoBibeli kulikida asi yininke yokulifana ngayi horokera nonzwi dapeke daKristusa apa vagwavekwa ngava za meguru ndi? Ngoso Vakriste wovalimburukwi ngava divara edeuro eli va gwana kwaJehova ngwendi moomu ga yi rugene Jowasi ndi ngava kara varwanesi ngwendi moomu va yi rugene Vakriste wovanzi ava va parukire konyima zapa va fire vapositoli ndi? Elimbururo kuna kara asi hawe. Kuvhura tu kare nehuguvaro asi, apa vagwavekwa ngava za meguru, nonzwi dapeke ngadi twikira kukarera Jehova ntani Jehova nga va pakera mbili. Morwasinke natu karera nehuguvaro lyangoso?

UKARELI WOUSILI KAPI NGAVA U PUKISA

6. Yiruwo musinke yitatu natu ka konakona?

⁶ Morwasinke natu karera nehuguvaro asi ukareli wousili kapi ngava u pukisa nampili moyiruwo yoyidigu eyi yina kara komeho? Morwa Bibeli kwa faturura asi siruwo esi tuna kuparuka, sa lisiga nosiruwo soVaisraeli ntani nosiruwo soVakriste ava va parukire konyima zapa va fire vapositoli. Tu zeni tu ka konakone nawa yiruwo eyi yitatu: (1) Siruwo soVaisraeli, (2) siruwo soVakriste ava va parukire konyima zapa va fire vapositoli ntani (3) siruwo ‘sokuwapukurura yininke nayinye.’—Yirug. 3:21.

7. Morwasinke vantu wovalimburukwi womosiruwo soVaisraeli va dilire kudompa mutjima apa vahompa novantu wovanzi va tamekere kurugana yininke yoyidona?

⁷ Siruwo soVaisraeli. Komeho tupu Mosesa a fe, age kwa tanterere Vaisraeli asi: “Na yi diva asi, apa ngani fa, mbunga ove ngo kara mudinikarunga, to zumbu eyi na ku ronga.” (Deut. 31:29) Mosesa kwa rondwere hena Vaisraeli asi nsene ngava kara varwanesi, ngava va tuma kosirongo sononkwate. (Deut. 28:​35, 36) Nonkango odo da sikire mo ndi? Yimo. Mwaza nomvhura, sinzi sovahompa kwa rugene yininke yoyidona kosipara saJehova ntani awo kwa pukisire vantu pokukwama ukareli woyipempa. Eyi kwa ninkisire Jehova a tengeke vantu wovadona ntani kapi ga pulisilire hena vahompa woVaisraeli va pangere vantu. (Hes. 21:​25-27) Apa Vaisraeli wovalimburukwi va mwene asi Nonkango daKarunga dina siki mo, ayo kwa va pere uradi yipo va twikire kumukarera.—Jes. 55:​10, 11.

8. Kuvhura yi tu tetukise kweyi varwanesi usili va ya ligwederere monombungakriste posiruwo sina ndi? Faturura.

⁸ Siruwo soVakriste ava va parukire konyima zapa va fire vapositoli. Kuvhura yi tu tetukise kweyi varwanesi usili va ya ligwederere monombungakriste posiruwo sina ndi?  Hawe. Jesus kwa pumbire asi varwanesi usili ngava ligwederera. (Mat. 7:​21-23; 13:​24-30, 36-43) Mupositoli Paurusa naPeturusa ntani naJohanesa, navenye kwa tjenge asi uporofete waJesus kwa tamekere kusikilira mo mosiruwo sawo. (2 Tes. 2:​3, 7; 2 Pet. 2:1; 1 Joh. 2:18) Konyima tupu zapa mupositoli gokuhulilira ga fire, Vakriste wovarwanesi kwa ya hamenene koBabironi zonene ezi za tamba komaukarelikarunga nagenye goyipempa. Uporofete ou ga pumbire Jesus nawo wa ya sikilire mo.

9. Ngapi omu siruwo setu sa lisiga nosiruwo soVaisraeli ntani nosiruwo apa varwanesi usili va ligwederere konyima zonomfa dovapositoli?

⁹ Siruwo ‘sokuwapukurura yininke nayinye.’ Siruwo setu sa lisiga nosiruwo soVaisraeli ntani nosiruwo apa varwanesi usili va ligwederere konyima zonomfa dovapositoli. Ngapi ava si tumbura siruwo esi tuna kuparuka? Rorunzi ose kusitumbura asi ‘mazuva gopouhura’ gouzuni ou woudona. (2 Tim. 3:1) Nye Bibeli kwa likida hena siruwo somulyo ntani sosire esi sa vareka apa ga tamekere mazuva gopouhura. Siruwo esi ngasi twikira dogoro apa Uhompa waKarunga ngau ka ninka vantu va ka sikilire mo noku ka ninka evhu li ka kare Paradisa. Siruwo esi kusitumbura asi siruwo ‘sokuwapukurura yininke nayinye.’ (Yirug. 3:21) Siruwo oso kwa tamekere mo-1914. Yisinke va wapukurura kutunda momvhura ozo? Jesus kwa mu tulire a kare Hompa meguru. Yipo nye, Jehova ga ya kere hena nomupangeli ogu ga mu karerere po, ogu ga tundilire moruvharo rwahompa Ndafita. Nye nampili ngoso, uhompa owo kapisi yiwo welike ga wapukwilire Jehova. Konyima tupu zosiruwo sosisupi, ukareli wousili kwa u tengwidilire po. (Jes. 2:​2-4; Hes. 11:​17-20) Ukareli wousili ngava u pukisa hena ndi?

10. (a) Yisinke za pumbire Bibeli kuhamena ukareli wousili womosiruwo setu? (Jesaya 54:17) (b) Morwasinke mauporofete ogo aga tu pere ehuguvaro?

¹⁰ Resa Jesaya 54:17. Gazadara ko kouporofete ou: “Nosirwiso si simwe esi ngasi ku rwadeka.” Nonkango edi kuna kusika mo neina. Nonkango edi dehengagwido dina kukwama ko kwa tamba nado kosiruwo setu. Ado kutanta asi: “Vantu woge nyamwange ngani va ronga, tani va ragopeke ni va pe mbili. Uhungami nouwa yiwo ngau ku nkondopeka. Ove ngo yoworoka komahepeko nokoyihuna.” (Jes. 54:​13, 14) Nampili “karunga gouzuni ou” Satana, kapi nga hagekesa po sirugana esi vana kurugana vantu vaJehova. (2 Kol. 4:4) Ukareli wousili va u wapukurura ntani kapi ngava u pukisa hena, awo ngau karerera narunye. Nosirwiso si simwe ngasi tu rwadeka.

 YISINKE NGAYI HOROKA?

11. Yisinke yina kutulikida asi emukurumbunga kapi ngava lisigilira apa vagwavekwa ngava za meguru?

¹¹ Yisinke ngayi horoka apa vagwavekwa ngava va twara meguru? Diworoka asi Jesus kuna kara Musita gwetu. Age kuna kara mutwe gombungakriste. Age kwa yi zeresere pokuuyunga asi: “Mupitisili gweni gumwe tupu, Kristusa.” (Mat. 23:10) Hompa gwetu Jesus ogu ana kupangera ngesi meguru, age nga twikira kupakera mbili varongwa vendi wousili. Mokumona asi Kristusa yige ana ku va pitisira, varongwa vendi vepevhu kapisi hepero ngava kare noutjirwe. Nye nampili ngoso, kapi tuna diva mauzera nagenye omu Kristusa nga pitisira vantu vendi posiruwo oso. Tu zeni tu ka tare yihonena yimwe yomoBibeli eyi nayi tu pa ehuguvaro.

12. Monkedi musinke omu Jehova ga pakerere mbili vantu vendi (a) apa Mosesa ga fire? (b) konyima zapa Eliya ga gwene situmbukira sapeke? (Tara hena efano.)

¹² Mosesa kwa fire komeho Vaisraeli va hwilire moSirongo sEtumbwidiro. Yisinke ya horokerere vantu vaKarunga? Jehova ga hagekere kuvatera vantu vendi konyima zapa mugara ogo gomulimburukwi ga fire ndi? Hawe! Nsene tupu ngano va twikilire kukara valimburukwi, Jehova ngano ga va pakerere mbili. Komeho Mosesa a fe, Jehova kwa mu tanterere a horowore Josuwa a pitisire mbunga. Mosesa kwa dewire Josuwa nomvhura dononzi. (Ex. 33:11; Deut. 34:9) Mokugwederera ko, pwa kere hena vagara wovanzi ava ngava pitisire. Vamwe ngava pangere vantu eyovi, ano vamwe efere, vamwe nomurongo ntano, ano vamwe nomurongo. (Deut. 1:15) Vantu vaKarunga kwa va pakerere mbili. Sihonena simwe kusigwana mosihorokwa saEliya. Age kwa pitisilire ukareli wousili moVaisraeli nomvhura dononzi. Nye konyima, Jehova kwa mu pere ko sirugana sapeke kevango lyapeke, koyiha yourundu waJuda. (2 Vah. 2:1; 2 Hist. 21:12) Ngoso Jehova ga sigilire vantu vendi wovalimburukwi womomazimo murongo gaIsraeli ndi? Hawe. Eliya kwa dewire Elisa nomvhura dononzi. Pwa kere hena “varongwa wovaporofete,” ava va gwene edeuro. (2 Vah. 2:7) Yipo nye, apo pwa kere vagara wovanzi wovalimburukwi ava va vhulire kupitisira vantu vaKarunga. Jehova kwa twikilire kusikisa mo sitambo sendi nokupakera mbili vakareli vendi wovalimburukwi.

13. Yisinke ga tu tumbwidira Jehova moVahebeli 13:5b? (Tara hena efano.)

¹³ Kuliza noyihonena oyo, yisinke ono kugazara eyi ngayi horoka apa vagwavekwa navenye ngava za meguru? Kapisi hepero tu lipure  yininke yoyinzi. Bibeli za tu huguvaresa asi: Jehova kapi nga zumba vantu vendi pevhu. (Resa Vahebeli 13:5b.) Ngwendi Mosesa naEliya, kambungagona kovagwavekwa ava ava pitisire neina, va diva mulyo gokudeura wopeke. Nomvhura dononzi, vanavazinyetu womoMbungagendesi kwa deura vagara womononzwi dapeke yipo va pitisire. Pasihonena, awo kwa tulisa po nosure dononzi yipo va deure vakuronambunga, vatareli wonombunga, womoKomitiye zoBeteli, vapitisili wokoBeteli ntani navamwe. Mbungagendesi kwa deura vavateli womonoKomitiye dokulisiga-siga domoMbungagendesi. Vavateli ava, kuna kurugana paapa va hulira va sikise mo yitumbukira yoyinzi mombunga zaJehova. Awo va liwapaikira nawa kutwikira kupakera mbili nonzwi daJesus.

14. Sitwa musinke somulyo tuna lirongere ko konzogera zetu?

¹⁴ Sitwa somulyo esi tuna lirongere ko konzogera zetu sesi asi: Apa vagwavekwa navenye ngava za meguru pepi nehagero lyoudigu wounene, ukareli wousili ngau twikira ngorooro apa pevhu. Ose kupandura koumpitisili waJesus Kristusa, morwa vantu vaJehova kapi ngava hageka kumukarera. Yimo, posiruwo oso, Gogo zaMagogo nga tu homokera. (Hes. 38:​18-20) Nye ehomokero olyo lyopokaruwogona kapi ngali tompoka ntani kapi ngali ninkisa vantu vaKarunga va hageke kumukarera. Yosili age nga va popera. Mupositoli Johanesa kwa mwene memoneko “emukurumbunga” lyomononzwi dapeke daKristusa. Johanesa kwa mu tanterere asi “emukurumbunga” eli kwa “pita moudigu wounene.” (Ehor. 7:​9, 14) Yipo nye, ose twa yi diva nawa-nawa asi Jehova nga ka va popera.

15-16. Kuliza nEhororo 17:​14, yisinke ngava ka rugana vagwavekwa poyita yaHarumagedoni ntani morwasinke ayi tu korangedere?

¹⁵ Vamwe kuvhura va lipure asi ngapi kuhamena vagwavekwa? Yisinke ngava ka rugana apa ngava za meguru? Bibeli za gava elimbururo lyokuvyukilira. Azo kwa likida asi mapangero gouzuni ou ngaga rwisa “Nzwigona.” Ngwendi moomu twa yi diva, ago kapi ngaga funda. Bibeli kutanta asi: “Nzwigona ngazi va funda.” Yilye nga vatera Nzwigona? Bibeli za limburura epuro olyo. Awo kuna kara “vantu  wovalimburukwi ava ga horowora nokuvazigida.” (Resa Ehororo 17:14.) Vantu musinke owo? Awo kuna kara vagwavekwa. Apa vagwavekwa wokuhulilira ngava va twara meguru pepi nehagero lyoudigu wounene, sirugana sawo sokuhova ngasi kara sokukarwa yita. Aso kuna kara sirugana sokutetukisa. Vakriste vamwe wovagwavekwa, ngava lihameke moyirwanangana, komeho va ya kare Nombangi daJehova. Vamwe kwa kere vakwayita, nye konyima awo kwa ya kere Vakriste wousili ntani nokulironga kukara nombili kumwe novakwawo. (Gar. 5:22; 2 Tes. 3:16) Awo kwa hagekere kulihameka moyita. Nye nampili ngoso, apa ngava va twara meguru, ngava ka lipakerera kumwe naKristusa novaengeli vendi yipo va ka rwise nonkore daKarunga moyita yokuhulilira.

¹⁶ Gazadara ko tupu. Vagwavekwa vamwe ava vana kara ngesi pevhu vana kurupa ntani kapi vana kara nononkondo. Nye apa ngava va vhumbwira meguru, awo ngava ka kara yisitwa yopampepo yononkondo yokudira ku ka fa ntani ngava ka lipakerera kumwe naJesus mokukarwa yita. Konyima zoyita yaHarumagedoni, nawo ngava ka vatera mokukaninka vantu va ka sikilire mo. Pwa hana masinganyeko, awo ngava ka vatera vanavazinyetu vepevhu momunene kupitakana omu vana kuvavatera ngesi ngovantu wokudira kusikilira mo!

17. Ngapi omu twa yi diva asi vakareli vaJehova navenye ngava kara mepopero posiruwo soyita yaHarumagedoni?

¹⁷ Ove kwa hamena kononzwi dapeke ndi? Nsene yimo, yisinke ngo vhura kurugana posiruwo soyita yaHarumagedoni? Eyi yiyo ngo rugana: Ngo huguvare mwaJehova ntani nokukwama mavyukiso gendi. Yisinke nampo ngayi hamena mo? Bibeli kwa uyunga nonkango dehengagwido asi: “Hwilireni mononzugo deni, vantu vange, zedireni ko mavero geni. Vandeni tanko noku nali pwa ehandu lyaKarunga.” (Jes. 26:20) Vakareli vaKarunga navenye vemeguru nava vepevhu, ngava kara mepopero posiruwo oso. Ngwendi mupositoli Paurusa, ose twa yi pura nawa-nawa asi yikare asi “mapangero ndi yininke yantaantani ndi yokomeho . . . kwato yokutugusa mo meharo lyaKarunga.” (Rom. 8:​38, 39) Diworoka nkenye apa asi Jehova ga ku hara ntani kapi nga ku zumba.