1. Nkia ntangwa akuswa awonso benatwa kuna zulu?

 MUNA mvu miavioka, nkangu a Yave bakiyuvulanga vo: ‘Nkia ntangwa Nkristu wakuswa wansuka kenatwa kuna zulu?’ Twayindulanga vo nanga akaka muna nsadiswa za akuswa bekala mu fikolo muna Paradiso ova ntoto kuna nim’a vita ya Armangedo. Kansi, muna Eyingidilu dia 15 kia Yuli, 2013 twalongoka vo akuswa awonso ana bekala ova ntoto benatwa kuna zulu vitila vita ya Armangedo yayantika.—Mat. 24:31.

2. Akaka omu yeto nkia kiuvu balenda kukiyuvula? Nkia mambu tulongoka mu longi diadi?

² Kansi, akaka omu yeto balenda yuvula vo: Adieyi dibwila Akristu, i sia vo, “mameme mankaka” ana besadila Yave ye kwikizi muna kolo kia “mpasi zayingi”? (Yoa. 10:16; Mat. 24:21) Akaka o unu balenda tokana yo yindula vo nanga bekuyimwena vo babembwelo vava mpangi zau za akuswa benatwa kuna zulu. Yambula twabadika tusansu tole twa Nkand’a Nzambi tulenda kubafila mu yindula mpila yayi. I bosi, tulongoka e kuma ke dinina mfunu ko mu tokana.

NKIA DIAMBU KE DIVANGAMA KO?

3-4. Nkia mambu akaka balenda yindula? Ekuma?

³ Akaka beyindulanga vo mameme mankaka nanga bebembola e ludi vava ke vekala diaka ko Akristu akuswa a Selo Yambuta muna kubafila. Nanga beyindulanga diambu diadi mu kuma kia tusansu twankaka tuna muna Bibila. Yambula twafimpa tusansu tole. O lusansu lwantete i lusansu lwa Yoyada wa ngang’ambuta. Yoyada wasadilanga Nzambi ye kwikizi. Oyandi yo Yosabate wa nkaz’andi, batanina mwan’a yakala  wakala ye nkumbu a Yoase. Bansadisa kimana kakala ntinu ambote ye nkwa kwikizi. Ekolo Yoyada wa nunu kakala moyo, Yoase wavanganga mambu mambote. Kansi, vava Yoyada kafwa, Yoase wakituka se muntu ambi. Wawila nganga zambi yo bembola Yave.—2 Tus. 24:2, 15-19.

⁴ O lusansu lwazole i lusansu lwa Akristu muna tandu kiazole. Yoane wa ntumwa una vo i ntumwa wansuka wakala moyo, mbandu ambote kikilu kakala kwa Akristu ayingi. Wabasadisanga mu kwamanana sadila Yave ye kwikizi. (3 Yoa. 4) Kumosi ye ntumwa zankaka za Yesu basikila ye kwikizi, Yoane mu kolo kiayingi wanuananga ye umpengomoki wasayananga. (1 Yoa. 2:18; 2 Tes. 2:7) Kansi, vava Yoane kafwa, umpengomoki wasayana nze tiya. Ke vavioka mvu miayingi ko, abendomoki bayantika longa malongi mayingi ma luvunu yo yambulwila mavangu mambi muna dibundu dia Kikristu.

5. Nkia diambu ke tulendi vova ko mu kuma kia tusansu twatu twa Bibila?

⁵ Nga tusansu twatu twa Bibila tusonganga vo diau dimosi mpe dibwila mameme mankaka vava akuswa benatwa kuna zulu? Muna kolo kiakina, nga Akristu akwa kwikizi ova ntoto bebembola mana belongokanga nze una wavanga Yoase? Nga bekituka se abendomoki nze Akristu ayingi muna tandu kiazole? Ve kikilu! Tulenda kala ye ziku vo vava akuswa bekwenda kuna zulu, mameme mankaka betoma taninua ye besikila ye kwikizi. Ekuma tulenda kadila ye vuvu kiaki?

NSAMBIL’AVELELA KE ISAFULWA KO

6. Nkia kolo tatu tufimpa muna lukufi?

⁶ Ekuma tulenda kadila ye vuvu vo nsambil’avelela ke isafulwa ko, kana nkutu muna kolo kia mpasi zayingi zibwa ke kolo ko? Mu kuma kia mana tulongokele muna Bibila mu diambu ditadidi e lumbu tuzingilanga. E lumbu yayi tuzingilanga yaswaswana kikilu ye lumbu ina Aneyisaele bazingila kuna nz’ankulu. Yaswaswana mpe ye lumbu ina Akristu bazingila muna tandu kiazole. Yambula twatoma fimpa e kolo yayi yau tatu: (1) Kolo kina bazingilanga Aneyisaele kuna nz’ankulu, (2) kolo kina kialanda vava ntumwa zawonso bafwa, ye (3) kolo kieto kina vo, i “ntangwa yavutulwisa e lekwa yawonso una yakala.”—Mav. 3:21.

7. Ekuma Aneyisaele ana bakala ye lukwikilu ke bavidisila vuvu kiau ko vava atinu ye akaka muna nkangu bavanga mambu mambi?

⁷ Kolo kina bazingilanga Aneyisaele kuna nz’ankulu. Vava lufwa lwandi lwafinama, Mose wavovesa Aneyisaele vo: “Ntomene wo zaya vo kuna nima lufwa lwame, oyeno nuvanga mambu mambi yo vengomoka muna nzila ina inukanikini.” (Nsi. 31:29) Mose wavova mpe vo avo Isaele okolamene, e zula kinatwa muna kinkole. (Nsi. 28:35, 36) Nga mvovo miami mialungana? Elo. Muna tandu yayingi, atinu ayingi bavanga mambu mambi vana meso ma Yave ye bafila nkangu mu landa mavangu mambi ye kuyisia muna nsambila za luvunu. Muna kuma kia ukolami wau, Yave watumba e zula kia Isaele yo sukisa luvila lwa kintinu kia Isaele ova nza. (Yez. 21:25-27) Kansi, Aneyisaele ana bakala ye lukwikilu bavua unkabu vava bamona vo e mvovo mia Yave mialungana.—Yes. 55:10, 11.

8. Nga tufwete sivika mu zaya vo usafu wakota muna nkutakani ya Kikristu muna tandu kiazole? Sasila.

⁸ Kolo kina kialanda vava ntumwa zawonso bafwa. Nga tufwete sivika mu zaya vo usafu wakota muna nkutakani ya Kikristu muna tandu kiazole? Ve kikilu. Yesu wasakula vo  ayingi bekituka se avengomoki. (Mat. 7:21-23; 13:24-30, 36-43) Ntumwa Paulu, Petelo yo Yoane bata kimbangi vo ungunza wa Yesu wayantika lungana muna tandu kiantete. (2 Tes. 2:3, 7; 2 Pet. 2:1; 1 Yoa. 2:18) Muna tandu kiazole, usafu wakota muna nkutakani ya Kikristu. Kuna nim’a lufwa lwa ntumwa wansuka, umpengomoki wa Kikristu wabundumuka yo kituka se Babele Anene, i sia vo, kintwadi kia nz’amvimba kia nsambil’a luvunu. O ungunza wavumuninua walungana diaka.

9. Mu nkia kolo tuzingilanga o unu ye nkia diambu divangamanga?

⁹ “Ntangwa yavutulwisa e lekwa yawonso una yakala.” E lumbu yeto yaswaswana ye kolo kina bazingilanga Aneyisaele kuna nz’ankulu ye kolo kiabundumuka umpengomoki muna tandu kiazole. Ekuma e lumbu yeto yaswaswanena? E lumbu yeto yiyikilwanga vo “lumbu yambaninu” a nza yayi yambi. (2 Tim. 3:1) Kansi, Bibila kisonganga vo i kolo kiaki kiayantika e kolo kisundidi o mfunu ye kikwamanana yamuna Kintinu kia Masia eki kivutulwisa e zingu kia wantu kialunga yo kitula ntoto se paradiso. E kolo kiaki kiyikilwanga vo “ntangwa yavutulwisa e lekwa yawonso una yakala.” (Mav. 3:21) E kolo kiaki kiayantika muna mvu wa 1914. Nki kiavutulwiswa? Yesu wayadikwa se Ntinu kuna zulu. Muna diadi, o Yave wavutuka kala diaka yo ntinu ona okunsunzulanga, ona wavinga vana kunda kia Davidi wa nkwa kwikizi. Kansi, Yave ke kintinu kaka ko kavutulwisa. Ke vavioka kolo ko, wasadisa selo yandi mu yantika kunsambila mu mpila ina keyangalelanga. (Yes. 2:2-4; Yez. 11:17-20) Nga e nsambila yayi safulwa isafulwa diaka?

10. (a) Adieyi Bibila kiasakula mu kuma kia nsambil’avelela mu lumbu yeto? (Yesaya 54:17) (b) O ungunza wau, ekuma winina se lufiaulwisu?

¹⁰ Tanga Yesaya 54:17. Yindula ungunza owu: “Ke vena nuaninua ko kiavangwa mu kuma kiaku kisikila.” E mvovo miami miavumunuinua, mu lungana mina o unu. E mvovo mialukasakeso milende miasakulwa mpe mu kuma kia lumbu yeto: “O wan’aku awonso belongwa kwa Yave, o luvuvamu lwa wan’aku lwayingi kikilu lukala. Ongeye otoma sikidiswa muna unsongi. . . . Kumona wonga wa konso lekwa ko, kukala ye kuma kia zakamena ko, kadi e zakamu ke dikufinama ko.” (Yes. 54:13, 14) Kana nkutu yandi kibeni Satana wa “nzambi a tandu kiaki,” kena yo nkuma ko mu vunzanesa e salu kia longa wantu kisalwanga  kwa nkangu a Yave. (2 Kor. 4:4) E nsambil’avelela yavutulwiswa, ke isinga safulwa diaka ko. Ikala kaka yakwele mvu. Ke vena nuaninua ko kiavangwa mu kuma kieto kisikila.

ADIEYI DIVANGAMA?

11. Nki kikutukwikidisanga vo ndong’ayingi ke ibembolwa ko vava akuswa benatwa kuna zulu?

¹¹ Adieyi divangama vava akuswa benatwa kuna zulu? Sungamena wo vo Yesu i Mvungudi eto. Yandi i ntu a nkutakani ya Kikristu. Yesu watoma dio kiesesa vo: “Mosi kaka i Mfumu eno, Kristu.” (Mat. 23:10) Yesu wa Ntinu eto ona oyalanga kuna zulu, ke funga ko, okwamanana lunga-lunga alandi andi. Wau vo yandi kibeni Kristu okubafilanga, alandi andi ova ntoto ke bekala ye kuma ko kia mona wonga. Dialudi vo, ke tuzeye mawonso ko mu mpila ina Kristu kefidila nkangu andi muna kolo kiakina. Muna kuma kiaki, yambula twafimpa yaka nona ya Bibila ilenda kutufiaulwisa.

12. Aweyi Yave kasadisila nkangu andi (a) vava Mose kafwa? (b) vava Eliya katambula kiyekwa kiankaka? (Tala mpe e fwaniswa.)

¹² Vitila Aneyisaele bakota muna Nsi ya Nsilu, Mose wafwa. Adieyi diabwila nkangu a Nzambi? Nga Yave wayambula sadisa nkangu andi mu kuma kia lufwa lwa selo kiandi kia kwikizi? Ve. Ekolo basonganga e kwikizi, Yave wabalunga-lunganga. Una Mose kafwidi ko, Yave wamvovesa katumbika Yosua se mfidi a nkangu. Mose walonga Yosua mu mvu miayingi. (Luv. 33:11; Nsi. 34:9) Vana ntandu, vakala mpe ye akala akaka akwa ngangu ana bavitanga o ntu, nze mfumu za mafunda, mfumu za nkama, mfumu za makumatanu ye mfumu za kumi. (Nsi. 1:15) Nkangu a Nzambi watoma lungwa-lungwanga. E nona kiankaka i Eliya. Muna mvu miayingi, yandi wavitanga o ntu muna nsambil’avelela vana kati kwa Aneyisaele. Kansi, vakala ye ntangwa, o Yave wamfila kuna sude ya Yuda mpasi vo katambula kiyekwa kiankaka. (2 Nti. 2:1; 2 Tus. 21:12) Nga nkangu a Nzambi wakala ye kwikizi muna kintinu kia Isaele kia makanda kumi babembolwa? Ve. Eliya muna mvu miayingi walonga Elesa. Vakala mpe yo “wan’a ngunza” ana batoma kubikwa yo longwa. (2 Nti. 2:7) Muna kuma kiaki, vakala ye wantu ayingi akwa kwikizi muna sadisa nkangu a Nzambi. Yave wakwamanana lungisa e kani diandi yo lunga-lunga asambidi andi akwa kwikizi.

13. Nkia lufiaulwisu tulenda solola muna Ayibere 13:5b? (Tala mpe mafoto.)

 ¹³ Landila nona yayi, adieyi obenze dibwa vava Nkristu wakuswa wansuka kenatwa kuna zulu? Ke dina mfunu ko mu kala ye wonga. E Bibila kisengomonanga e ludi eki kiatoma kia: Yave ke singa bembola ko o nkangu andi ova ntoto. (Tanga Ayibere 13:5b.) Nze una bavanga Mose yo Eliya, e buka kiandwelo kia Akristu akuswa ana bevitanga o ntu o unu, bazeye o mfunu wa longa akaka. Tuka mvu miayingi, e mpangi za Selo Yambuta belonganga mpangi zamakala muna mameme mankaka kimana bavitanga o ntu. Kasikil’owu, bakubika sikola zayingi mu longa akuluntu, akengi a zunga, Afidi a Mavula, akengi a buka ya salu ya Betele ye zimisionario. Yau kibeni selo Yambuta belonganga asadisi au kimana basadilanga muna Buka yayingi ya salu ya Selo Yambuta. Asadisi awaya yiyekwa yayingi yampwena belunga-lunganga. Betoma longwanga kimana bakwamanana sala e salu kia lunga-lunga mameme ma Kristu vava akuswa awonso bekwenda kuna zulu.

14. Adieyi i mbuta diambu tuvovèle mu longi diadi?

¹⁴ E mbuta diambu tuvovele mu longi dieto i diadi: Vava Nkristu wakuswa wansuka kenatwa kuna zulu vava e mfoko a kolo kia mpasi zayingi ifinama, muna lutumu lwa Yesu Kristu o nkangu a Yave ova ntoto bekwamanana kunsambila ye kwikizi kiawonso. Dialudi vo muna kolo kiakina, tunuaniswa kwa Ngonge wa Mangonge, i sia vo, kwa kintwadi kia zula ina ikutusianga kimbeni. (Yez. 38:18-20) Kansi, e vita yayina funga ifunga, ke izingila kolo kiayingi ko; ke ifila nkangu a Nzambi ko bayambula sambila Yave. O Yave okubavuluza. Muna mona-meso, Yoane wa ntumwa wamona “ndong’ayingi” ya mameme mankaka ma Kristu. Yoane wavoveswa vo e “ndong’ayingi” yayi ituka “muna mpasi zayingi.” (Lus. 7:9, 14) Kieleka, taninua betaninua!

15-16. Landila e sono kia Lusengomono 17:14, adieyi akuswa bevanga muna kolo kia vita ya Armangedo? Ekuma ediadi dinina dia lukasakeso?

¹⁵ Kana una vo i wau, nanga olenda yuvula: ‘Adieyi tuvova mu kuma kia akuswa? Nkia salu besala vava bemana kwenda kuna zulu?’  E Bibila kivananga e mvutu zakiá muna yuvu yayi. Kisonganga vo ayadi a nza yayi “benuana yo Mwan’a meme.” Kansi, ke besunda ko. Tutanganga vo: “O Mwan’a meme okubasunda.” Aki nani besadisa Mwan’a meme? E tini kivutulanga vo: “Ana babokelwa yo solwa, akwa kwikizi.” (Tanga Lusengomono 17:14.) Aki nani awaya? I akuswa ana bafulwa. Muna kuma kiaki, o Nkristu wakuswa wansuka ova ntoto vava kenatwa kuna zulu kuna mfoko a kolo kiampasi zayingi, e salu kiantete besala i nuana e vita. Ekwe salu kiamfunu besala! Akaka muna Akristu akuswa anuani a nkindu bakala vitila bakituka Mbangi za Yave. Akaka nkutu makesa bakala muna vu ya makesa ma nza yayi. Kansi, bakituka se Akristu aludi yo longoka nzil’a luvuvamu. (Ngal. 5:22; 2 Tes. 3:16) Bayambula e vita za kinitu. Kansi, vava befulwa yo kwenda kuna zulu, besala kumosi yo Kristu ye mbasi zandi zavelela muna nuana e vita ya nsuka ye mbeni za Nzambi.

¹⁶ Yindula e diambu diadi: Akaka muna Akristu akuswa bena ova ntoto, se anunu ye bayoya kibeni. Kansi, befuluka yo vuila moyo kuna zulu, bekumama yo kituka se vangwa ya mwanda balembi fwanga. Bevewa kiyekwa kia nuana kumosi yo Yesu Kristu wa Kesa dia Vita. Kuna mfoko a vita ya Armangedo, besala kumosi yo Yesu muna sadisa wantu bakituka alunga. Ka lukatikisu ko vo e mambu mambote bevanga kuna zulu muna wete dia mpangi zau zanzolwa, meluta oma bevanganga e kolo bena se wantu alembi lunga.

17. Aweyi tuzayidi wo vo e selo yawonso ya Nzambi ivuluzwa muna vita ya Armangedo?

¹⁷ Nga ongeye mu buka kia mameme mankaka wina? Avo i wau, adieyi ovanga vava e vita ya Armangedo iyantika? E diambu kaka ovanga, i bunda e vuvu muna Yave yo landa tuludiku twandi. Ediadi aweyi disongele? E Bibila kivovanga vo: “Nukota muna masuku meno ma kati, yo kanga yelo yeno. Nuyisweka mu fikolo yavana makasi mevioka.” (Yes. 26:20) E selo yawonso ya Nzambi yakwikizi kuna zulu ye ova ntoto, ivuluzwa muna vita ya Armangedo. Nze Paulu wa ntumwa tuna ye ziku vo, ke vena ye ‘ayadi ko yovo lekwa ina owau, yovo ina ikwiza, . . . ilenda kutuvambula muna zola kwa Nzambi.’ (Roma 8:38, 39) Ntangwa zawonso sungamenanga e diambu edi: Yave okuzolanga ye ke singa kubembola nkutu ko!