1. Nkimba abapakaziwa bosi bakwiza pakubuka lighi kumwanya?

 IMYAKA iya kwisinda ababombi aba Yehova bakilalusyanga ukuti, ‘Ka Abakilisitu bosi abapakaziwa bakwiza pakubuka lighi kumwanya?’ Kwisinda uku tukinong’onagha ukuti bakwiza ukubukilila ukwikala mu Paladayiso pisinda pa nkondo iya Alamagedoni. Loli Ichitembe cha Mulindili icha Julayi 15, 2013, tukamanyila ukuti abapakaziwa bosi bo bakwiza ukuba ukuti bachili pachisu ichapasi, bakwiza pakubuka kumwanya bo inkondo iya Alamagedoni yichili yitandite.—Mata. 24.31.

2. Nkimba tungilalusya ichoni sona inti tunenezannye ichoni?

² Loli tungilalusya ukuti: Choni cho chikwiza ukubombiwa ku “bang’ozi izinji” bo bakwiza ukuba ukuti bakumubombela u Yehova umwabusubaliwa pachisu ichapasi mu kabalilo aka ‘ntamyo inkulu’? (Yoha. 10.16; Mata. 24.21) Abang’ozi izinji bamo banganda ukupasya ukuti wenu yo akwiza pakubapa ubutuli nu bulongozi nanti abapakaziwa bosi babuka kumwanya. Za tunenezannye inkani zibili izya mu Bayibolo zyo zingabapangisya ukuti binong’one bunubu. Ukufuma apo inti tunenezannye ivifukwa vyo vingatwavwa ukuti tutakapasyange.

CHONI CHO TE CHIZE CHIBOMBIWE KU BANG’OZI IZINJI?

3-4. Choni cho bamo banganda pakupasya sona chifukwa buli?

³ Bamo banganda ukupasya ukuti abang’ozi izinji bamo bangize baleke ubwanaloli nanti bennya ukuti abakamu bosi abapakaziwa aba mu Kagulu Akakwenelezya babuka kumwanya. Bangiyivwa bunubu ichifukwa cha nkani zimo izya mu Bayibolo. Za twennye ivifwanikizyo vibili. Ichabwandilo chikunena ivya Wasembe Usongo Nkani u Yehoyada. Akaba mubombi umusubaliwa uwa Chala. U Yehoyada nu muchi wache u Yehoshabeti, bakamufighilila u Yehowashi po akaba mwana munandi nu kumwavwa ukuti ize abe we mwene umwiza sona umusubaliwa. Pa kabalilo ko u Yehoyada akaba nu bumi, u Yehowashi akabombagha akiza  ivintu. Loli u Yehoyada akati afwa, u Yehowashi akanda ukubomba ivintu ivibibi. Akanda ukwivwila inyinong’ono izibibi izya bantu abakuchindikiwa nu kumuleka u Yehova.—2 Syambu. 24.2, 15-19.

⁴ Ichifwanikizyo ichamwabo cha Bakilisitu bo bakabako pisinda pakuti abatumiwa bosi bafwa. U Yohani akaba mutumiwa uwabumalilo pakufwa. Pa kabalilo ko akaba wabumi, akabavwa Abakilisitu abinji ukuti babukilile ukuba basubaliwa kwa Yehova. (3 Yoha. 4) Ngati mo akabombelagha u Yesu na batumiwa abanji abasubaliwa, u Yohani wepe akalimbana na bakususya kwa kabalilo akatali. (1 Yoha. 2.18; 2 Tesa. 2.7.) U Yohani akati afwa, abakususya bakabala ngati lupya. Imyaka yikati yendapo, abakususya bakanda ukumanyisya ivyabumyasi muchipanga ichachikilisitu.

5. Choni cho tutabaghiye ukusubila ukuti ivintu vingize vibe ngati mo vikabela ku bantu aba munkani zibili izi?

⁵ Ka ivifwanikizyo vibili ivi, vikulangizya ukuti nanti abapakaziwa bosi babuka kumwanya, Abakilisitu abang’ozi izinji bakwiza ukwanda pakubomba ivintu ivibibi ngati mo akabombela u Yehowashi pamo bangize babe bakususya ngati mo bakabombela bamo kwisinda bo abatumiwa bosi bafwa? Uansala wakuti awe te momo vikwiza ukubela! Nanti abapakaziwa bosi babuka kumwanya tutakukayikila ukuti abang’ozi izinji bakwiza ukubukila ukupweleliwa akiza mwabuzimu. Choni cho tukusubila ukuti vikwiza ukuba bunubu?

UKWIPUTA UKWABWANALOLI KUKWIZA PAKUBUKILILA

6. Nkimba inti tunenezannye tubalilo buli tutatu?

⁶ Choni cho tuli nu lusubilo ukuti ukwiputa ukwabwanaloli kukwiza pakubukilila na pa kabalilo aka ntamyo inkulu? Tukunena bunubu ichifukwa chakuti Ibayibolo likuti tukwikala mu kabalilo akakupambana sana na ka Baizilayeli sona akabalilo akapisinda pakuti abatumiwa bosi bafwa. Za twennye ivyinji ivyakukwafannya nu tubalilo utu: (1) Akabalilo aka Baizilayeli, (2) akabalilo aka pisinda pakuti abatumiwa bosi bafwa, na (3) kabalilo kitu kano “akakuti ivintu vyosi viyaniziwe pakuba vipya.”—Imbo. 3.21.

7. Choni cho Abaizilayeli abasubaliwa batakalondiwanga ukutagha ulusubilo nanti abamwene na banji basala ukubomba ivintu ivibibi?

⁷ Akabalilo aka Baizilayeli. Bo ali papipi pakufwa, u Mozesi akababuzya Abaizilayeli ukuti: ‘Nkumanya akiza ukuti nanti nafwa inti mwande pakubomba ivintu ivibibi nu kuleka izila yo nkati mwendaghemo.’ (Kumbu. 31.29) U Mozesi akabachevya sona ukuti nanti bamusambukila u Yehova bakwiza ukubuka ku buzya. (Kumbu. 28.35, 36) Nkimba amazyu agha ghakakwanilisiwa naloli? Inga. Ukwa myaka iyinji abamwene abinji bakanda ukubomba ivintu ivibibi pamaso pa Yehova. Ivi vikapangisya ukuti abantu ba Chala bope babombaghe ivintu ivibibi. (Eze. 21.25-27) Loli Abaizilayeli abasubaliwa bakati bennya ukuti amazyu gha Chala ghakukwanilisiwa, vikaghomya ulusubilo lwabo ukuti babukilile ukumubombela umwabusubaliwa.—Yesa. 55.10, 11.

8. Ka tungaswigha ukuti muchipanga ichachikilisitu icha kale mukingila abakususya? Longosola.

⁸ Akabalilo aka pisinda pakuti abatumiwa bosi bafwa. Nkimba tungaswigha na vyo vikabombiwa muchipanga ichachikilisitu pisinda pakuti abatumiwa bosi bafwa? Awe tutangaswigha. U Yesu akanenela zila ukuti abakususya bakwiza pakwingila pakasi pa bantu ba Chala. (Mata. 7.21-23; 13.24-30, 36-43) Umutumiwa u Pabuli, u Pitala nu Yohani bakasimikizya ukuti ubulaghuzi bo u Yesu akanena bukanda pakukwanilisiwa mu kabalilo kabo. (2 Tesa. 2.3, 7; 2 Pita. 2.1; 1 Yoha. 2.18) Umutumiwa uwabumalilo akati afwa, abakususya bakaba ku chigaba icha Babeloni Umukulu yo akwimila ivipanga vyosi ivyabumyasi. Apa ubulaghuzi bwa Yesu bukakwanilisiwa sona.

9. Nkimba akabalilo ko tulimo kapambanite buli-buli na kabalilo aka Baizilayeli na ka Bakilisitu bo bakabako pisinda pakuti abatumiwa bosi bafwa?

 ⁹ “Akabalilo akakuti ivintu vyosi viyaniziwe pakuba vipya.” Akabalilo ko tulimo kapambanite na ka Baizilayeli sona na kabalilo ko abakususya bakingila muchipanga ichachikilisitu pisinda pakuti abatumiwa bosi bafwa. Nkimba tuli mu kabalilo buli? Akabalilo aka kakwitiziwa ukuti amasiku “agha bumalilo” agha chisu ichibibi ichi. (2 Timo. 3.1) Loli Ibayibolo likulangizya ukuti pali sona akabalilo akanji akatali ko kakandila poka na masiku aghabumalilo. Akabalilo akatali aka inti kabukilile mupaka po Ubumwene ubwa Mesiya bukwiza pakwavwa abantu ukuti babe bakufikapo nu kusinta ichisu ukuba Paladayiso. Akabalilo aka kakwitiziwa ukuti “akabalilo akakuti ivintu vyosi viyaniziwe pakuba vipya.” (Imbo. 3.21) Akabalilo aka kakanda mu 1914. Choni cho chikanyokelapo? U Yesu akimikiwa ukuba we Mwene kumwanya. Apa u Yehova akaba sona nu mulaghili uwakumwimila yo akapyana pa Mwene umusubaliwa u Devedi. Loli te bumwene bwene bo u Yehova akanyosezyapo. Ukufuma pa kabalilo kala ukwiputa ukwa bwanaloli kope kukanyokelapo! (Yesa. 2.2-4; Eze. 11.17-20) Ka ukwiputa ukwabwanaloli inti kwize kumale sona?

10. (a) Nkimba Ibayibolo likanenela zila ichoni ivyakukwafannya nu kwiputa ukuzelu ukwa mu kabalilo kitu? (Yesaya 54.17) (b) Choni cho amabulaghuzi agha ghakughomya?

¹⁰ Belenga Yesaya 54.17. Inong’onela ubulaghuzi ubu: ‘Patalipo ichilwilo chilichosi cho chapangiliwa uwe cho chikwiza pakupota.’ Amazyu agha ghakukwanilisiwa amasiku ghano. Amazyu aghakughomya aghakukonkapo agha, ghakubomba sona imbombo mu kabalilo kitu kano, gho ghakuti: ‘Abana bako bosi bakwiza pakumanyisiwa nu Yehova sona umutende uwa bana bako bosi ghukwiza pakukula. Inti wize wikalane sana mubugholosu. . . . Utakwiza pakoghopa nachimo-chimo pamo ichintu chimo ukukoghofya, pakuti chitakwiza ukupalamila papipi nuwe.’ (Yesa. 54.13, 14) “U chala uwa muchisu ichapasi ichi” u Satana, atangakanizya imbombo yo abantu ba Yehova bakubomba iya kumanyisya abanji ivya Yehova. (2 Koli. 4.4) Ukwiputa ukuzelu kwanyokelapo sona te kwize kumalepo nalumo. Inti kubukilile ukubako kwa bwila na bwila. Patalipo ichilwilo cho chapangiliwa uswe chikwiza ukupota!

CHONI CHO CHIKWIZA PAKUBOMBIWA?

11. Choni cho tukusimikizya ukuti abachilundilo ichikulu te bakasyale beka nanti abapakaziwa bosi babuka kumwanya?

¹¹ Choni cho chikwiza pakubombiwa nanti  abapakaziwa bosi babuka kumwanya? Mukumbukilaghe ukuti u Yesu we yo Mudimi witu sona mutu wa chipanga ichachikilisitu. U Yesu akanena ukuti: “Muli nu mulongozi weka yuyo we Kilisitu.” (Mata. 23.10) U Yesu yo akulaghila kumwanya, akwiza pakubukilila ukubapwelelela Abakilisitu ababwanaloli. Abakilisitu bo bakwiza ukuba pachisu ichapasi batakwiza ukulondiwa ukughopa chilichosi, ichifukwa chakuti u Kilisitu weyo akwiza pakuba mulongozi wabo. Napo vili bunubu loli tutakumanya vyosi ivya mo u Kilisitu akwiza pakulongozezya abantu bache pa kabalilo kala. Po za twennye ivifwanikizyo vimo ivya mu Bayibolo vyo vingatughomya.

12. Ka u Yehova akabapwelelelagha buli-buli abantu bache (a) bo u Mozesi afwa? (b) bo u Eliya amupa imbombo iya mwabo? (Ennya sona ichituzi.)

¹² U Mozesi akafwa bo Abaizilayeli bachili pakwingila mu Chisu icha Layizyo. Choni cho chikabombiwa ku bantu ba Chala? Ka u Yehova akaleka ukubavwa abantu bache bo umuntu umusubaliwa uyu afwa? Awe. Nanti babukilila ukuba basubaliwa, u Yehova akabukililagha ukubavwa. Bo u Mozesi achili atafuye, u Yehova akamubuzya ukuti amusale u Yoshwa ukuti alongozyanje abantu. U Mozesi akamumanyisya u Yoshwa ukwa myaka iyinji. (Kuso. 33.11; Kumbu. 34.9) Umwakongelezyapo, pakaba abanavuli abamahala bo bakalongozyanga abantu amasawuzandi, amahandiledi, amafifite na mateni. (Kumbu. 1.15) Abantu ba Chala bakapweleleliwanga akiza naloli. Tukwagha ichifwanikizyo ichakuyana bulo kwa Eliya. U Eliya akatangililagha ukwiputa ukwabwanaloli mu Izilayeli ukwa myaka iyinji. Akabalilo kakati kendapo, u Yehova akamusamya nu kumupa imbombo iyamwabo ku Yuda. (2 Nyafya. 2.1; 2 Syambu. 21.12) Ka u Yehova akabatagha abantu abasubaliwa? Awe. U Eliya akamumanyisya u Elisha ukwa myaka iyinji. Pakaba sona abana ‘ba balaghuzi bamo’ bo bakamanyisiwanga isukulu iya kuyana bulo. (2 Nyafya. 2.7) Cho chifukwa tunganena ukuti pakaba abanavuli abasubaliwa bo bakatangililagha abantu ba Chala. U Yehova akabukilila ukukwanilisya ubwighane bwache sona akabukilila ukubapwelelela ababombi bache abasubaliwa.

13. Nkimba u Yehova atulayizizye ichoni pa Aba Hebeli 13.5b? (Ennya sona ichituzi.)

¹³ Po muli ni vifwanikizyo ivi munyinong’ono zyinyu, nkimba mukwinong’ona ukuti choni cho chikwiza pakubombiwa nanti abapakaziwa bosi babuka kumwanya? Tutakulondiwa ukupasya. Ibayibolo likutusimikizya ukuti: U Yehova atakwiza pakubataghapo nalumo ababombi bache pachisu. (Belenga Aba Hebeli 13.5b.) Ngati we Mozesi nu Eliya, akagulu akanandi aka Bakilisitu abapakaziwa, bo bakulongozya amasiku  ghano kakwivwisya ukulondiwa ukwa kubamanyisyako abanji. Ukwa myaka iyinji abakamu aba mu Kagulu Akakwenelezya bakubamanyisya abanavuli abang’ozi izinji ukuti balongozyanje. Umwakufwanikizya, bapangite amasukulu aghakumanyisya abasongo abachipanga, abakwendela idela, aba Mukomiti ya Nthambi, abakwenelezya pa Beteli na banji. Akagulu Akakwenelezya kamanyisizye abavwilizi abakuti bavwange mumakomiti aghakupambana-pambana agha Kagulu Akakwenelezya. Pa kabalilo aka abavwilizi abasubaliwa aba bali ni vyakubomba ivyinji mu gulu lya Yehova. Bakwisengannya akiza ukubukilila ukupwelelela ing’ozi izya Kilisitu.

14. Nkimba ifundo inkulu yo twanenezannya yakuti choni?

¹⁴ Ifundo inkulu yo twanenezannya yakuti: Nanti abapakaziwa bosi biza babuka kumwanya kupipi ku bumalilo ubwa ntamyo inkulu, ukwiputa ukwa bwanaloli kukwiza pakubukilila pachisu ichapasi. Tukumupalizya sana umulongozi witu u Yesu Kilisitu ichifukwa chakuti abantu ba Yehova bakwiza pakubukilila ukumwiputa u Yehova umwabusubaliwa. Tukumanya ukuti pa kabalilo kala igulu ilya bantu aba mitundu yosi lyo likwitiziwa ukuti Gogi wa Magogi likwiza pakubanyamukila abantu ba Chala. (Eze. 38.18-20) Loli ukunyamukila kwabo kukwiza ukupotwa umwakuti kutakwiza pakulesya Abakilisitu ukumwiputa u Yehova. Tukusimikizya ukuti u Yehova akwiza pakubapoka. Muchisetuka, u Yohani akennya “ichilundilo ichikulu” icha ng’ozi izinji izya Kilisitu. Uwantumi akamubuzya u Yohani ukuti “ichilundilo ichikulu” ichi, “bo bantu babo bapona pakuvwimiwa ukukulu nkani.” (Ubuvu. 7.9, 14) Naloli tukumanya ukuti bakwiza ukuba bakufighililiwa!

15-16. Ukuyana nu Ubuvumbuli 17.14, nkimba Abakilisitu abapakaziwa bakwiza pakubomba ichoni pa Alamagedoni sona choni cho ichi chakulimbikisya?

¹⁵ Loli bamo bangaswigha ukuti: ‘Ka abapakaziwa bakuya pakubomba ichoni nanti babuka kumwanya?’ Ibayibolo likwamula ilalusyo ili umwambula ukufisa. Likuvumbula ukuti amaboma agha muchisu ichi ghakwiza “pakulwa nu mwana uwa Ng’ozi.” Loli ghatakwiza pakupota. Tukubelenga ukuti: “Bakwiza pakubapota.” Sona ka bo bawenu bo bakwiza pakumwavwa? Ivesi ili likwamula ukuti, ‘abakwitiziwa,’ ‘abasaliwa’  sona ‘abasubaliwa.’ (Belenga Ubuvumbuli 17.14.) Ka bo bawenu? Abapakaziwa bo bakwiza ukuba ukuti bazyuka! Nanti abapakaziwa bo bakwiza ukuba ukuti bachili bali pachisu ichapasi biza babuka kumwanya ku bumalilo ubwa ntamyo inkulu, imbombo yabo iyabwandilo yikwiza pakuba yakulwa inkondo. Iyi mbombo yapalubazu sana! Abakilisitu bamo abapakaziwa bakaba balombwa po bakaba bachili ukuba Bakaboni ba Yehova. Bamo bakabombagha imbombo iya busilikali. Loli pisinda pache bakasinta nu kuba Bakilisitu babwanaloli, bakamanyila ukuba pamutende na banji. (Gala. 5.22; 2 Tesa. 3.16) Bakaleka ukwavwilizyapo pa nkondo. Mumalo mwache nanti babuka kumwanya, bakwiza pakulwa poka na bantumi abazelu aba Kilisitu pa nkondo iya bumalilo na balwani ba Chala.

¹⁶ Inong’onelapo pa fundo iyi! Abapakaziwa bamo bo bachili bali pachisu ichapasi bagosi sona bate na maka. Loli nanti bazyuka nu kuba nu bumi kumwanya, bakwiza pakuba na maka sona umubili uwa buzimu umwakuti bakwiza pakubapa imbombo iyakulwa poka nu Mwene wabo u Yesu Kilisitu. Nanti inkondo iya Alamagedoni yiza yamala bakwiza pakubomba poka nu Yesu pakubavwa abantu ukuti babe bakufikapo. Tutakukayila ukuti pa kabalilo aka bakwiza pakubabombela ivintu ivyiza ivyinji abakamu na bayemba babo abaghaniwa aba pachisu ichapasi ukuchila vyo bakababombela po bakawa bantu bambula ukufikapo!

17. Ka tukumanya buli-buli ukuti ababombi bosi aba Chala bakwiza pakufighililiwa pa Alamagedoni?

¹⁷ Nkimba mwe ba ng’ozi izinji? Ka mukulondiwa ukuti mwize mubombe ichoni nanti Alamagedoni yanda? Umwabupepe mwize mubombe ivi: Mwize mumusubile u Yehova nu kukonka ubulongozi bwache. Nkimba ivi vikongelezyapo ichoni? Umwakulimbikisya Ibayibolo likunena ukuti: ‘Mwingile muvipinda vyinyu ivyamukasi nu kwighalila ivyighi. Muvwame ukwakabalilo akanandi bulo mupaka ubukali bupululile.’ (Yesa. 26.20) Ababombi aba Chala abasubaliwa abakumwanya na pachisu ichapasi bakwiza pakuba bakufighililiwa. Ngati we mutumiwa u Pabuli nuswe bulo tungasimikizya ukuti ‘abalaghili, ivintu vivyo vilipo ilelo pamo vivyo vikwiza muntazi vitangatusabulannya uswe ku lughano ulwa Chala.’ (Loma 8.38, 39) Akabalilo kosi mukumbukilaghe ukuti u Yehova abaghanite sana, sona atakwiza pakubataghapo nalumo!