1. Mu ntia ntangu Bakristo babansoni ba tumbu bakwenda ku mazulu?

 TÛKA mivu, kanda dia Yehova diatiyula: ‘Mu ntia ntangu Bakristo ba tumbu basâla bakwenda ku mazulu?’ mbo tweri banzaka ti Bakristo ba tumbu bakaka basâla mbo baketi tatamana mu bâ ha mutoto ku Paradi tûka mwa ntangu, ha manima ma muzingu wa Armagedo. Kâ, mu Nzo ya Zangama ya Munkengi ya 15 juillet 2013 (Français), tayizi longoka ti Bakristo babansoni ba tumbu batiri ha mutoto mbo bakwenda ku mazulu, ntete muzingu wa Armagedo wabatika.—Mat. 24:31.

2. Ntia tiyuvu tulendi tiyula, mpe nti tutaluzula mu timoko ti?

² Kâ tiyuvu ni eti: Nti biturila bimeme biakaka bia Kristo bisarilaka Yehova na kwikama kwakwansoni ha mutoto mu ntangu ya “mpasi ziyôkele”? (Za 10:16; Mat. 24:21) Bakaka lumbu ti mbo babâka na bunkuta mu bungu ti ka bazebi’â ko ka bwe basa peleko mbo babanzaka ti mbo babayambirika bu kwenda mpangi za tumbu ku mazulu. Tataluzuleno binsamu biole bia Bibila bilendi tu nata mu bâ na mbanzulu zo. Ha manima mbo tuzonzela binsamu bisaka ti ka tubândi na lwaka.

NTI BILEMBO TURILA BIMEME BIAKAKA?

3-4. Nti bakaka balendi tiyula, mpe mu bungu dia nti?

³ Bakaka balendi tiyula tala ti bimeme biakaka mbo bikatuka mu matieleka mu ntangu yilembo vutu sâla mpangi za tumbu ze mu Timvuka titwarisaka mu tu twarisa. Balendi banzila bo mu bungu dia binsamu biakaka bie mu Bibila. Tazonzeleno bifwani biole. Tia ntete ni tia Mfumu-Nganga-Nzambi Yehoyada.  Tisari tia kwikama tieri tia Nzambi. Yandi na mukento’andi Yehosabete, bakengerela mwana wa bakala weri na nkumbu Yehoase, mpe bamubakisa mu kwizi bâ mutinu wa mbote mpe wa kwikama. Mu ntangu Yehoyada yi keri moyo, Yehoase Yehova keri sarilaka, mpe misamu mia mbote keri yirikaka. Kâ, ha manima ma lufwa lwa Yehoyada, Yehoase wabatika mu sarila mbi. Wayizi wirikila mfumu za mbi, mpe wabika mu sarila Yehova.—2 Nta. 24:​2, 15-19.

⁴ Tifwani tiakaka ni tia Bakristo ba mu mbandu ya nzole. Ntumwa Za yeri ntumwa ya mansukina yeri moyo, wanata nsobolo za mbote kwe Bakristo babîngi bu kababakisa mu tatamana mu sala tisalu tia Yehova. (3 Za 4) Ntiana kwa bwa sa ntumwa zakaka za Yezu, Za wasala tisalu tia ngolo mu kengerela bimvuka mu ndongosolo na mu nsalulu za bungungu. (1 Za 2:18) Kâ, ha manima ma lufwa lwa Za, babingi mu bimvuka bayizi landa ndongosolo za ba-aposta. Mu mivu mialanda, ba-aposta balongesa misamu miamingi mia bungungu, mieri hanaka nzila mu ndiatulu ya mbi mu bimvuka biabiansoni.

5. Mu bungu dia binsamu bio bia biole, ntia mabanza mafweti lembo bâka neto?

⁵ Ngano bifwani bio bia Bibila mbo bisongelaka ti Bakristo ba tumbu bu bamana kwenda ku mazulu, bimeme biakaka bia Kristo bilendi kwizi batika mu yirika misamu mia mbi ntiana Yehoase, peleko bilendi kwizi bâ ba-aposta ntiana bwa sa Bakristo babîngi ha manima ma lufwa lwa bantumwa? Mbo tutâ ti kâni! Tulendi bâ na lukwikulu ti Bakristo ba tumbu bu bakwenda ku mazulu, bimeme biakaka mbo bitatamana mu sarila Yehova mu mpila ya mbote, mpe Yehova mbo katatamana mu ba kipa. Mu bungu dia nti tulendi bêla na lukwikulu lo?

NSAMBULULU YA VERELA KA YIBEBA KO

6. Ntangu za zitatu zi tuzonzela ni ze?

⁶ Mu bungu dia nti tulendi bêla na lukwikulu ti nsambululu ya verela ka yibeba ko, ni bu sa ti mu ntangu za mpasi zita tu kêla? Ni mu bungu dia misamu mi talongoka mu Bibila mitariri ntangu yi tuta zinga. Ntangu yi ya nkatika ya swaswana yena na ya Israele ya ntama, mpe na Bakristo ba mu mbandu ya nzole. Buna, tatomoeno taluzula ntangu zo za zitatu: 1) Ntangu ya Israele ya ntama, 2) ntangu ya ha manima ma lufwa lwa bantumwa, mpe 3) mu ntangu ya beto, ntangu yi bakarisa bima biabiansoni. —Bis. 3:21.

7. Ku Israele ya ntama mu bungu dia nti bantu ba kwikama balembo kotela mu bunôkena mu ntangu kanda na mitinu yi basola nzila ya mbi?

⁷ Ntangu ya Israele ya ntama. Ntangu fioti ntete lufwa lwandi, Mose watâ kwe bala ba Israele ti: ‘Mu bungu ti nzebi ti ha manima ma lufwa lwani, mbo lusa nguria busafu, mbo lutengama mpe na nzila yi nalutumini.’ (Lub. 31:29) Mose walwengesa mpe bala ba Israele ti bu baketi kolama, mbo baketi kwenda ku bungamba ku nsi yakaka. (Lub. 28:​35, 36) Ngano misamu mio mialungana? Yee. Tûka mivu, mitinu miamingi miasola nzila ya mbi, mpe miawubakasa kanda dia Nzambi. Musamu wo wasa ti Yehova kasemba kanda dia Israele dia mbi, mpe kalembo vutu hana nzila kwe mitinu miabayâla. (Ezk. 21:​25-27) Kâ, bala ba Israele ba kwikama babaka butindi bu bamona Zu dia Nzambi dialungana.—Iza. 55:​10, 11.

8. Ngano tufweti yituku ti timvuka tia Bakristo tia mu mbandu ya ntete tiabeba? Bangula.

⁸ Ntangu ya ha manima ma lufwa lwa bantumwa. Ngano tufweti yituku ti timvuka tia Bakristo tia mu mbandu ya nzole tiabeba? Kâni. Yezu wabikula ti mbo kwa keti bâ  ba-aposta babingi. (Mat. 7:​21-23; 13:​24-30, 36-43) Ntumwa Paulo, Piere na Za basingasa ti mbikululu yo ya Yezu yabatika mu lungana mu mbandu ya ntete M.B. (2 Tes. 2:​3, 7; 2 Pi. 2:1; 1 Za 2:18) Mu mbandu ya nzole M.B., timvuka tia Bakristo tiayizi beba. Ntangu fioti ha manima ma lufwa lwa ntumwa ya mansukina, Bakristo ba aposta bayizi bâ lweka lwa Babilone ya Yinene, mabundu mamansoni ma bungungu. Musamu wa tâ Yezu walungana.

9. Mu bwe ntangu yi twena ye ya swaswana na ntangu ya Israele ya ntama, mpe na ntangu ya timvuka tia Bakristo tia mbandu ya nzole?

⁹ Ntangu zi bakarisa bima biabiansoni. Ntangu ya beto yiswaswane na ntangu ya Israele ya ntama, mpe na ntangu yeri na ba-aposta babingi mu mbandu ya nzole M.B. Ngano ntangu ya beto ntia nkumbu batâka yo? Ntangu yi tuta zinga mbo tuvulu ya tâka ntangu za mansukina za nza yi ya mbi. (2 Tim. 3:1) Kâ mu ntangu yo kwa, ntangu ye kô ya yila yayizi batika. Mbo yitatamana tii ntangu Timfumu tia Nzambi tikarisa bantu ba lunga, mpe yi tisobesa mutoto mu Paradi. Ntangu yo mbo batâka yo, ‘ntangu yi bakarisa bima biabiansoni.’ (Bis. 3:21) Ntangu yo yabatika mu 1914. Ngano ha manima nti bakarisa? Diangana, Yezu bamutûla Mutinu ku mazulu. Buna Yehova wayizi vutu bâ na mfumu yimumonekesaka, mwana wa kwikama wa mutinu Davide. Kâ, Timfumu tio ka tiena bima biabiansoni ko Yehova bi kakarisa. Ntangu fioti ha manima, nsambululu ya verela babatika mu karisa yo! (Iza. 2:​2-4; Ezk. 11:​17-20) Ngano mbo yivutu beba?

10. a) Bibila bwe ditâka mu bungu dia nsambululu ya verela mu ntangu ya beto? (Izaya 54:17) b) Mu bungu dia nti mbikululu za mpila yo zituhaninaka lukwikulu?

¹⁰ Tanga Izaya 54:17. Banza’eti mu mbikululu eyi: ‘Tinwanunu ni tinwanunu ti bakuyirikila ka tikusa tima ko’! Misamu mio miatûka kwe Nzambi mia mita yilama lumbu ti. Misamu mitindisaka mita landa, mia mita lungana mpe mu ntangu yi ya beto: ‘Bala baku babansoni mbo babalongesa kwe Yehova, mpe tidzunu tia bala baku mbo tibâ tia tinene. Buderede mbo bukusikamasa. [. . .] Kuvutu’â bâ na bunkuta ko, mbo bâ mala na tintekoto mu bungu ti ka tivutu’â finka ha we nge ko.’ (Iza. 54:​13, 14) Satana, nzambi ya nza yi, kena na nswa ko mu tûla nsuka mu tisalu tia ndongosolo ti salaka kanda dia Yehova. (2 Kor. 4:4) Nsambululu ya verela bakarisa yo, mpe kani kabwe ka yibeba ko. Mbo yibâ ho ntangu zazansoni. Ka kwena tinwanunu ko ti bayirika titununga!

 NGANO NTI BIYÔKA?

11. Nti bita tu hana lukwikulu ti yungi dia bantu ka bayambirika dio ko bu mana kwenda Bakristo ba tumbu ku mazulu?

¹¹ Ngano nti biyôka mu ntangu Bakristo ba tumbu yi bakwenda ku mazulu? Bambukaka ti, Yezu ni Muvungi’eto. Ni yandi we mfumu ya timvuka tia Bakristo. Yezu watomo tâ ti: “Mfumu mosi kwa ye neno, ni Kristo.” (Mat. 23:​10, NWT) Mutinu’eto wuta yâla kani kabwe ka lembana ko mu sala tisalu tiandi. Mu bungu ti Kristo ba twarisa, milongoki miandi mie ha mutoto ka mitîna na kani tima ko. Wa matieleka, ka tuzebi’â misamu miamiansoni ko mu mpila Kristo yi katwarisila kanda diandi mu ntangu yo. Buna, tataluzuleno bala ba bifwani bie mu Bibila bilendi tu hana lukwikulu.

12. Bwe Yehova kakipila kanda diandi a) ha manima ma lufwa lwa Mose? b) mu ntangu Eliya yi kabaka dema diakaka? (Tala mpe tifwani.)

¹² Ntete Israele ya kota ku Mutoto wa kani, Mose wayizi fwa. Ngano nti biaturila kanda dia Nzambi? Ngano Yehova wabika mu bakisa kanda diandi ha manima ma lufwa lwa bakala dio dia kwikama? Kâni. Mu bungu ti bu beri bâka ba kwikama, Yehova nsatu zawu za keri lungisaka. Ntete Mose kafwa, Yehova wamulomba kakubika Yoswa ngatu katwarisa kanda diandi, Mose mbo keri kwe kubiki Yoswa tûka mivu miamingi. (Ndu. 33:11; Lub. 34:9) Kâ babakala babingi bakaka beri na lenda dia twarisa: mfumu za funda-funda, mfumu za nkama-nkama, mfumu za makumatanu-makumatanu, mpe na mfumu za kumi-kumi. (Lub. 1:15) Kanda dia Nzambi bubote beri dia kipaka. Tifwani tia mpila yo ni tia Eliya. Wayizi sala bwabwingi, tûka mvula zazingi mu bakisa bala ba Israele mu sarila Yehova. Kâ, Yehova wamuhana tisalu tiakaka ku side ya Yuda. (2 Mit. 2:1; 2 Nta. 21:12) Ngano, bô beri ba kwikama mu timfumu tia makanda kumi tia ku Israele babayambirika? Kâni. Eliya mbo keri kwe kubiki Elize tûka mvula zazingi. Bala ba bambikuri mpe beri kubikaka. (2 Mit. 2:7) Buna, babakala babingi beri kô ba kwikama beri na ntangu mu hana lubakusu na mu twarisa kanda dia Nzambi. Yehova watatamana mu lungisa kani diandi, mpe mbo keri kipaka bisari biandi bia kwikama.

13. Ntia lukwikulu tulendi baka mu Bahebre 13:5b? (Tala mpe tifwani.)

¹³ Na bifwani bio mu mabanza, ngano bwe ta banza, nti biyôka mu ntangu Bakristo ba tumbu ba mansukina yi bakwenda ku mazulu? Ka twena na nsatu ko ya tiyula biyuvu. Bibila mbo ditutêlaka matieleka matuhanaka lukwikulu ti: Kani kabwe Yehova ka yambirika  kanda diandi ko die ha mutoto. (Tanga Bahebre 13:5b.) Ntiana Mose na Eliya, tikunku tia fioti tia Bakristo ba tumbu titwarisaka lumbu ti, mbo tibakulaka mfunu ya kubika bantu bakaka. Tûka mivu miamingi, Timvuka titwarisaka mbo tikubikaka babakala ha kati dia bimeme biakaka mu twarisa. Mu tifwani, bayizi kubika tukolo twatwingi mu kubika bakuluntu, minkengi mia bizunga, mpangi za komite za filiale, minkengi mia ku Betele, na bantu bakaka. Timvuka titwarisaka tiayizi kubika bibakisi mu bungu dia komite za swaswana za Timvuka titwarisaka. Bibakisi bio, lumbu ti na kwikama kwakwansoni mbo banataka madema mamingi mu organizasio. Bawu ba tomo kubika mu tatamana mu kipa bimeme bia Kristo.

14. Musamu wa mfunu wa timoko tieto ni we?

¹⁴ Musamu wa mfunu mu timoko tieto ni ewu: Bantu ba tumbu ba mansukina bu bakwenda ku mazulu ku nsuka ya mpasi ziyôkele, nsambululu ya verela mbo yitatamana ha mutoto. Mu bungu ti Yezu Kristo ba twarisa, bisari bia Nzambi ka bikondo’â tima ko. Wa matieleka, mu ntangu yîna, timvuka tia makanda, Goge ya ku nsi ya Magoge, mbo titunwanisa. (Ezk. 38:​18-20) Kâ mu nwanisa kô kwa ntangu fioti, ka batununga ko; ka balenda ko mu kabakasa kanda dia Nzambi mu sarila Yehova. Diangana ntembe kâni Yehova mbo kabavûkisa! Mu timona-meso timosi, ntumwa Za wamona “yungi dia bantu” dia bimeme biakaka bia Kristo. Batêla Za ti “yungi dia bantu” ku “mpasi ziyôkele” diatûka. (Nza. 7:​9, 14) Buna, lukwikulu lwe neto ti Yehova mbo kabakengerela!

15-16. Tintwari na Nzabukusu 17:​14, milongoki mia tumbu mia Kristo nti misa mu ntangu ya muzingu wa Armagedo, mpe mu bungu dia nti we musamu wa lutindusu?

¹⁵ Kâ, bantu bakaka balendi tiyula: ‘Bwe tutâ mu bantu ba tumbu? Ngano nti basa bu bakatuka ha mutoto?’ Bibila mvutu dihanaka mu tiyuvu tio. Mbo disongelaka ti guvernema za nza yi mbo ‘zinwananisa Mwana Timeme.’ Diangana, ka zinunga ko. Mbo tutangaka: ‘Mwana Timeme mbo kabaka muzingu.’ Mpe banani bamubakisa? Verse yitêle, bô ba batâ ‘mbila,’ ‘ba solo,’ mpe ‘ba kwikama.’ (Tanga  Nzabukusu 17:14.) Ngano ni banani? Bantu ba tumbu bavumbuka kwe ba fwa! Buna, mu ntangu bantu ba tumbu yi babanata ku mazulu ku nsuka ya mpasi ziyôkele, tisalu tiawu tia ntete ni mu nwana. Diangana tisalu tia nzitukulu tibâ! Bakristo bakaka ba tumbu ntete babâ Mbangi za Yehova binwani bieri. Bakaka basarila mikangu mia binwani mia nza yi. Kâ ha manima bayizi bâ Bakristo ba matieleka, mpe bayizi longoka mu bâ mu tidzunu na bantu bakaka. (Nga. 5:22; 2 Tes. 3:16) Bayizi bika mu yika moko mu mizingu. Kâ, bu bamana kwenda ku mazulu, mbo basala na Kristo na bambazi ba santu mu nwana muzingu wa mansukina na mbeni za Nzambi.

¹⁶ Banza’eti! Ha mutoto, Bakristo ba tumbu bakaka ba nuna bena, kampe ka basâla na ngolo ko. Kâ bu bamana vumbuka mu kwe bâ ku mazulu, mbo babâ bivangu bia timpeve bilembo fwaka, mbo babahana dema dia nwana ha lweka lwa mutinu’awu wa ngolo, Yezu Kristo. Ha manima ma muzingu wa Armagedo, Bakristo ba tumbu mbo basala tintwari na Yezu mu bakisa bantu mu kwizi bâ ba lunga. Ntembe kâni, mbo babâ na lenda dia bakisa mpangi zawu za luzolo zibâ ha mutoto yôka mu ntangu bawu beni yi beri bantu ba masumu!

17. Bwe tuzabiri ti bisari biabiansoni bia Yehova ka bibâ mu bunkuta ko mu ntangu ya muzingu wa Armagedo?

¹⁷ Ngano mu kati dia bimeme biakaka wena? Tala ti ni bo, ngano nti fweti sa mu ntangu yi batika muzingu wa Armagedo? Musamu ewu kwa: Bâ na lukwikulu mu Yehova, mpe landa lutwalusu lwandi. Ngano musamu wo nti wulendi tu tuma mu sa? Mu tu tindisa, Bibila mbo ditâka: ‘Kota mu chambre zaku za ku kati, mpe kanga mielo miaku ku manima maku. Swama kwaku mwa ntangu na tii bu mana yôka mfukulu.’ (Iza. 26:20) Bisari biabiansoni bia kwikama bia Nzambi, ku mazulu na ha mutoto, ka babâ mu bunkuta ko mu ntangu yîna. Ntiana Paulo, lukwikulu lwe neto ti ‘bimfumu, misamu mia bwawu bu, misamu milanda [. . .] ka milendi’â miatuhambasa ko na luzolo lwa Nzambi.’ (Rom. 8:​38, 39) Kani kabwe kuzimbakanakandi ti: Yehova nge kazololo, mpe kani kabwe ka ku yambirika ko!