1. Ino ndilili bananikitwe boonse ndyeshi bakabe kwiculu?

 KWAMYAAKA iinji, bantu bakwe Yehova bakalinga kuliipusha ayi, ‘Ino ndilili Beneklistu bananikitwe bacaliteewo ndyeshi bakaye kwiculu?’ Twakalinga kuyeeya ayi mpashi Beneklistu bamwi bananikitwe balaakukalako mu Paladaiso kwakaciindi kaniini pesule lya nkoondo ya Amagedoni. Sombi mu Njashi Yamulindilishi ya July 15, 2013, twakeeya ayi bananikitwe boonse bacili pacishi balaakutolwa kwiculu inkondo ya Amagedoni kaitana kutalika.—Mate. 24:31.

2. Ino ngumwiipusho nshi mpashi ngweenga twaliipusha, alimwi ino tutokwiiya nshi mumutwi uyu?

² Nacibi boobo, mpashi inga twaliipusha ayi: Ino nshiinshi sheshi shikacitike kuba ‘mbelele shimwi’ abo beshi bakanosebensela Yehova cakushoameka paciindi ca ‘mapensho anene’? (Joni 10:16; Mate. 24:21) Mpashi bamwi ba ‘mbelele shimwi’ inga balisukama ayi teshi bakabe abakubacafwa akubapa butanjilishi pesule lyakwaamba ayi bamakwesu abenankashi bananikitwe abo mbobasuni baya kwiculu. Amuleke tubandike pashakubonenaako shobilo shaambwa mu Baibo sheenga shapa kwaamba ayi banoyeeya boobo. Lyalo tutobandika pasheebo sheelete kutupa kutalisukama.

SHESHI SHIKABULE KUCITIKA

3-4. Ino nciinshi mpashi bamwi nceenga balisukama alimwi ino nceebonshi?

³ Bamwi mpashi inga balisukama ayi ba mbelele shimwi balaakucileka kusebensela Yehova na bamakwesu bananikitwe abo bali mu Likoto Litanjilila bakaye kwiculu. Inga balinyumfwa boobo ceebo cakuyeeya pamakani amwi amu Baibo. Amuleke tubandike pashakubonenaako shobilo. Cakutaanguna cakacitika pesule lyakwaamba ayi Jeoiyada Mupailishi Munene wafwa. Musankwa uyu wakalinga musebenshi wakwe Lesa ushomeka. Lakwe a Jeosheba mukaakwe, bakashitilisha Joashi ndyaakalinga kateta akumucafwa kuba mwaami uli kabotu alimwi ushomeka. Paciindi Jeoiyada ndyaakalinga muumi, Joashi wakalinga kulambila Yehova akucita  shintu shibotu. Sombi pesule lyakwaamba ayi Jeoiyada wafwa, Joashi wakatalika kucita shintu shibiibi. Wakatalika kukutika ku bamatanjilili bene Juda abo bakalinga kucita shibiibi alimwi wakacileka kusebensela Yehova.—2 Maka. 24:​2, 15-19.

⁴ Cakubonenaako cabili nceeco cakacitikila Beneklistu bakutaanguna pesule lyakwaamba ayi batumwi bafwa. Mutumwi Joni uyo wakalinga wakweelaako kufwa pa batumwi, wakacafwa Beneklistu baanji kutolelela kusebensela Yehova cakushomeka. (3 Joni 4) Bweenka mbuli batumwi bamwi bakwe Yesu, Joni wakasebensa cankusu kushitilisha mabungano kubaabo bakalinga kwiisha njiisho shakubeca akucita shintu shibiibi. (1 Joni 2:18; 2 Tesa. 2:7) Nacibi boobo, pesule lyakwaamba ayi Joni wafwa, baanji bakapondoka kuswa mucancine. Mumyaaka iniini yakakonkelaawo, abo bakapondoka bakalinga kwiisha njiisho shakubeca shiinji akusuminisha bantu kunoocita shintu shibiibi mumabungano oonse.

5. Kweelana ashakubonenaako shobilo shamu Baibo nshotwabandikaawo, ino nshiinshi nsheenga tatwaambi ayi shilaakucitika na bananikitwe bakaye kwiculu?

⁵ Sa shakubonenaako ishi shobilo shamu Baibo shilatondesha ayi na bananikitwe bakaye kwiculu ba mbelele shimwi mpashi balaakutalika kucita shintu shibiibi bweenka mbuli Joashi, na kupondoka kuswa mucancine bweenka mbuli baanji mbobakacita pesule lyakwaamba ayi batumwi bafwa? Sobwe napaceyi! Inga twashoma ayi na bananikitwe bakaye kwiculu, ba mbelele shimwi balaakutolelela kulambila Yehova kweelana ambwaasuni alimwi alaakunobalama. Ino nceebonshi?

BANTU BAKWE YEHOVA BALAAKUTOLELELA KUMULAMBILA KWEELANA AMBWAASUNI

6. Ino nshiindi shili shotatwe nsheshi tubandikeewo paniini?

⁶ Ino nceebonshi inga twashoma ayi tulaakutolelela kulambila Yehova kweelana ambwaasuni nabi paciindi ndyeshi tukanokwiinda mumapensho anene ngotutolangila? Nceebo ca makani ngotwakeeya mu Baibo aamba pa nshiku nshetutokalaamo. Ciindi ncetubeteemo cilipusene abuumbi aciindi ca bene Isilaeli aca Beneklistu bakutaanguna. Aboobo amuleke twiiye cakubikila maano pashiindi ishi shotatwe shitokonkelaawo: (1) Ciindi ca bene Isilaeli, (2) ciindi ca Beneklistu bakutaanguna pesule lyakwaamba ayi batumwi bafwa, alimwi (3) ciindi ncetubeteemo, “ciindi cakuboosha shintu shoonse.”—Milimo 3:​21, NWT.

7. Ino nceebonshi bene Isilaeli bashomeka tabakwe kucileka kusebensela Yehova nabi kwaamba ayi bamaami abantu bamwi baanji bakatalika kucita shintu shibiibi?

⁷ Ciindi ca bene Isilaeli. Ndyekwakacaalabo paniini ayi Mose afwe, wakalwiita bene Isilaeli ayi: ‘Ndishi ayi ndaakufwa, mulaakutalika kubisha akukaka nshendamulwiita.’ (Duto. 31:29) Alimwi Mose wakacenjesha bene Isilaeli ayi na bakapondoke, balaakutolwa mubusha. (Duto. 28:​35, 36) Sa nshaakaamba shakacitika? Ee. Kwamyaaka iinji, bamaami bakalinga kucita shintu shibiibi akupa kwaamba ayi bantu bakwe Lesa batalike kulambila shibumbwabumbwa. Ceebo cakucita boobo, Yehova wakaanisha bene Isilaeli abo bakalinga kucita shintu shibiibi alimwi taakwe kusuminisha bamaami bene Isilaeli kutolelela kweendelesha. (Esek. 21:​25-27) Sombi shintu Lesa nshaakaamba ndyeshakacitika, shakacafwa bene Isilaeli bashomeka kutolelela kusebensela Yehova cakushomeka.—Isa. 55:​10, 11.

8. Sa tulyeelete kukankamana kwaamba ayi Beneklistu bamwi bakapondoka kuswa mucancine pesule lyakwaamba ayi mutumwi wakweelaako wafwa? Amusansulule.

⁸ Ciindi ca Beneklistu bakutaanguna pesule lyakwaamba ayi batumwi bafwa. Sa tulyeelete kukankamana kwaamba ayi Beneklistu bamwi muciindi ca batumwi bakapondoka kuswa mucancine? Sobwe napaceyi. Yesu wakaambila limwi ayi baanji balaakupondoka kuswa mucancine. (Mate. 7:​21-23; 13:​24-30, 36-43) Mutumwi  Paulo, Pita, amutumwi Joni boonse bakaamba ayi bushinshimi Yesu mbwakaamba bwakatalika kukumanishikwa muciindi ca Beneklistu bakutaanguna. (2 Tesa. 2:​3, 7; 2 Pit. 2:1; 1 Joni 2:18) Ndyepakeendabo ciindi ciniini kuswa ciindi mutumwi wakweelaako ndyaakafwa, Beneklistu bakapondoka kuswa mucancine bakaba lubasu lwa Babiloni munene, nkokwaamba ayi bupailishi boonse bwakubeca. Bushinshimi Yesu mbwakaamba bwakalinga kukumanishikwa.

9. Ino “ciindi cakuboosha shintu shoonse” cilipusene buyani aciindi ca bene Isilaeli aciindi ca Beneklistu bakutaanguna pesule lyakwaamba ayi mutumwi wakweelaako wafwa?

⁹ “Ciindi cakuboosha shintu shoonse.” Ciindi ncetubeteemo cilipusene aciindi ca bene Isilaeli aciindi Beneklistu baanji ndyebakapondoka kuswa mucancine pesule lyakwaamba ayi mutumwi wakweelaako wafwa. Liinji tuleeta ciindi ncetubeteemo ayi “inshiku shakweelaako” sha cishi cino cibiibi. (2 Timo. 3:1) Sombi Baibo ilaamba apaciindi ciinditeewo alimwi cilaamfu ico cakatalikila pomwi aciindi ca nshiku shakweelaako. Ciindi ico cilaakutolelela kushikila ciindi Bwaami bwabu Mesiya bukape kwaamba ayi bantu bakabe bamaninite akwaalula cishi kuba paladaiso. Ciindi ico cileetwa ayi “ciindi cakuboosha shintu shoonse.” (Milimo 3:​21, NWT) Ciindi ici cakatalika mu 1914. Ino nshiinshi shakabooshekwa? Yesu wakatalika kweendelesha kwiculu mbuli Mwaami. Aboobo paciindi ici Yehova alimwi wakaba a mweendeleshi wakumwiimikaninaako alimwi weelela kukala pacuuna cakwe Defedi mwaami wakalinga kushomeka. Nacibi boobo, bwaami ubu teshi ncecintu ceenkabo Yehova ncaakaboosha. Ndyepakeendabo ciindi ciniini, Yehova wakacafwa basebenshi bakwe kutalika alimwi kumulambila kweelana ambwaasuni! (Isa. 2:​2-4; Esek. 11:​17-20) Sa alimwi basebenshi bakwe balaakucileka kumulambila kweelana ambwaasuni?

10. (a) Ino Baibo ilaamba nshi pakulambila kusalalite kwa munshiku shino? (Isaya 54:17) (b) Ino nceebonshi bushinshimi ubu bulayuminisha?

¹⁰ Amubelenge Isaya 54:​17, NWT. Amuyeeye pa bushinshimi ubu bwaamba ayi: “Taakuwo cilwanisho cakapangilwa kulwana ndiwe ceshi cikaswitilile”! Bushinshimi ubu butokumanishikwa munshiku shino. Maswi aya ayuminisha atokonkelaawo aalo atokumanishikwa munshiku shino: ‘Nebo nemwiine ndaakwiisha bantu bako, kubalengesha kuswitilila alimwi akubapa luumuno. Koombolosha kwakutanyengelela abululami bulaakukushimpya. . . . Shakuloonda shilaakumaninabo limwi, cakutashinyumfwaawo tubili pafwiifwi awebo.’ (Isa. 54:​13, 14) Nabibo Satana ‘lesa wacishi cino,’ taaciteewo nkusu shakwiimika ncito yakwiisha bantu pali Yehova bantu bakwe Lesa njobatoosebensa. (2 Koli. 4:4) Basebenshi  bakwe Lesa bakatalika alimwi kumulambila munshila isalalite, alimwi balaakutolelela kucita boobo kwamuyayaya. Taakuwo cilwanisho cakapangilwa kulwana ndiswe ceshi cikaswitilile!

SHESHI SHIKACITIKE

11. Ino nciinshi citupa kushoma ayi Yehova teshi akabalekelesheewo bamu likoto linene na bananikitwe bacaliteewo bakaye kwiculu?

¹¹ Ino nshiinshi sheshi shikacitike na bananikitwe bacaliteewo bakaye kwiculu? Munokwiibaluka ayi Yesu ngo Mweembeshi wesu. Ngo mutwi walibungano lya Bwineklistu. Yesu wakaamba cakuteenda mweela ayi: ‘Mutanjilili wanu ngomwi, Klistu.’ (Mate. 23:10) Yesu uyo utokweendelesha kwiculu, alaakutolelela kulama bashikwiiya bakwe bancine. Mukwiinga Klistu ngwaatoobatanjilila, bashikwiiya bakwe bali pacishi tabeelete kuloonda cili coonse. Kwalo, tatucishi makani oonse Klistu mbweshi akanootanjilila bantu bakwe na bananikitwe boonse bakaye kwiculu. Aboobo amuleke tubandike pa shakubonenaako shimwi shamu Baibo sheenga shatuyuminisha.

12. Ino Yehova wakabalama buyani bantu bakwe (a) Mose ndyaakafwa? (b) Elija ndyaakapekwa ncito imwi? (Amubone acikope.)

¹² Mose wakafwa, bene Isilaeli kabatana kunjila mu Cishi Cakashomeshekwa. Ino nshiinshi shakacitika ku bantu bakwe Lesa? Sa Yehova wakacileka kucafwa bantu bakwe pesule lyakwaamba ayi musankwa uyu ushomeka wafwa? Sobwe. Yehova wakalinga kubapa nshebakalinga kuyandika, ndyebakalinga kushomeka kuli nguwe. Mose kaatana kufwa, Yehova wakamulwiita ayi ape Joshuwa mukuli wakutanjilila bantu Bakwe. Kwamyaaka iinji, Mose wakalinga kwiisha Joshuwa bwakusebensa ncito iyi. (Kulo. 33:11; Duto. 34:9) Kwiilikaawo, kwakalinga basankwa bamwi baanji beelela bakalinga kutanjilila. Bamwi bakalinga kutanjilila bantu bali 1000, bamwi 100, bamwi 50 lyalo bamwi 10. (Duto. 1:15) Bantu bakwe Lesa bakalinga kulamwa kabotu. Ubu mbocakalinga akuli Elija. Wakasebensa cankusu kwamyaaka iinji kucafwa bene Isilaeli kunolambila Yehova. Sombi mukuya kwaciindi Yehova wakamupa ncito yakuya mukusebensela mucishi ca Juda. (2 Baam. 2:1; 2 Maka. 21:12) Sa bantu bashomeka bakalinga mu bwaami bwa mikowa 10 ya bene Isilaeli bakabula wakubatanjilila? Sobwe. Kwamyaaka iinji, Elija wakalinga kwiisha Elisha. Alimwi kwakalinga “baana ba bashinshimi,” abo mpashi bakeeishikwa. (2 Baam. 2:​7, NWT) Aboobo kwakalinga basankwa baanji bashomeka bakucafwilisha kutanjilila bantu bakwe Lesa. Yehova wakatolelela kukumanisha kuyanda kwakwe alimwi wakalama basebenshi bakwe bashomeka.

13. Kweelana a Bene Ebulu 13:5b, ino Yehova wakatushomesha nshi? (Amubone acikope.)

 ¹³ Kweelana ashakubonenaako ishi shobilo, ino mutoyeeya ayi nshiinshi sheshi shikacitike na bananikitwe bacaliteewo bakaye kwiculu? Tatweelete kulisukama. Baibo ilaamba cancine cuubu kunyumfwisha alimwi ciyuminisha: Yehova teshi akabalekelesheewo bantu bakwe pacishi. (Amubelenge Bene Ebulu 13:5b.) Bweenka mbuli Mose a Elija, likoto liniini lya Beneklistu bananikitwe abo batotanjilila, lilanyumfwishisha kuyandika kwa kwiishako bamwi. Kwamyaaka iinji, bamakwesu bamu Likoto Litanjilila baleeisha bamakwesu bali mulikoto lya mbelele shimwi bwakutanjilila. Kucakubonenaako, bakabamba shikolo shakwiisha bamanene, bamatanjilili balubasu, bamu Komiti Yamusampi, bamakwesu batanjilila pa Bethel, bamishonali alimwi abamwi. Bamakwesu bali mu Likoto Litanjilila baleeisha beshikubacafwilisha bali mu makomiti a Likoto Litanjilila. Beshikubacafwilisha aba batosebensa mikuli iinji mulibunga pacecino ciindi. Balilibambite kusebensa ncito yakulama kabotu mbelele shakwe Klistu na bananikitwe bakaye kwiculu.

14. Ino nciteente nshi cinene ncotutobandikaawo?

¹⁴ Citeente cinene ncotutobandikaawo nceeci: Na bananikitwe bacaliteewo bakaye kwiculu kumamanino amapensho anene, kulambila kusalalite kulaakutolelela pacishi. Kwiinda mubutanjilishi bwakwe Yesu Klistu, bantu bakwe Lesa balaakutolelela kumulambila cakushomeka. Tulicishi kwaamba ayi paciindi ici, bantu bakwe Lesa balaakulwanwa kuli Gogi waku Magogi, nkokwaamba ayi kucatana pomwi kwashishi. (Esek. 38:​18-20) Sombi kulwanwa uku kwakaciindi kaniini, teshi kukape kwaamba ayi bantu bakwe Lesa bacileeke kulambila Yehova. Alaakubafuna! Mucili anga nciloto mutumwi Joni ncaakabona, wakabona bamu “likoto linene” lya mbelele shimwi. Joni wakalwiitikwa ayi “likoto linene” ili lilaakupula “mumapensho anene.” (Ciyu. 7:​9, 14) Aboobo tulishomete ayi Yehova alaakubapulusha!

15-16. Kweelana a Ciyubululo 17:​14, ino Beneklistu bananikitwe balaakunoocita nshi paciindi ca nkondo ya Amagedoni, alimwi ino nceebonshi ici cilayuminisha?

¹⁵ Sombi bamwi inga baliipusha ayi: ‘Ano ino bananikitwe balaakucita nshi na bakaye kwiculu?’ Baibo ilakumbula mwiipusho uyu cakuteenda  mweela. Ilatondesha ayi mfulumeende shamucishi cino ‘shilaakulwana a Mwanaambelele.’ Nacibi boobo, shilaakukomwa. Baibo ilaamba ayi: ‘Mwanaambelele ulaakubakoma.’ Alimwi ino mbaani beshi bakamucaafwe? Abo “mbwakeeta akusala alimwi bashomeka.” (Amubelenge Ciyubululo 17:14.) Ino mbaani? Mbeneklistu bananikitwe abo beshi bakabushikwe! Aboobo na bananikitwe bacaliteewo bakaye kwiculu kumamanino amapensho anene, incito imwi yakutaanguna njeshi bakapekwe nkulwana. Iyi ilaakuba ncito ilibetele abuumbi! Beneklistu bamwi bananikitwe bakalinga beshinkondo kabatana kuba Bakamboni Bakwe Yehova. Bamwi bakalinga basoja. Sombi mukuya kwaciindi bakaba Beneklistu bancine alimwi bakeeya bwakukala muluumuno abamwi. (Gala. 5:22; 2 Tesa. 3:16) Bakacileka kuba beshinkondo. Nacibi boobo, pesule lyakubushikwa akuya kwiculu, balaakusebensela pomwi a Klistu abaanjelo bakwe basalalite, kulwana balwani bakwe Lesa munkondo yakweelaako.

¹⁶ Amuyeeyebo mbweshi cikabe! Bananikitwe bamwi bacili pacishi mbacinene, alimwi bamwi nkusu shitooya buceya. Sombi na bakabushikwe akuya kwiculu, balaakuba ankusu amibili itafwi mbuli shilengwa shamushimu, abo beshi bakasebensele pomwi a Mwaami Yesu Klistu, kulwana nkondo yakweelaako. Pesule lyakulwana nkondo ya Amagedoni, balaakusebensela pomwi a Yesu kucafwa bantu kwaamba ayi babe bamaninite. Ncakutatoonsha kwaamba ayi balaakubacafwa abuumbi bamakwesu abenankashi abo mbobasuni, kwiinda ambobabacafwa pacecino ciindi ndyebacili pacishi mbuli bantu batamaninite!

17. Ino tulishi buyani ayi basebenshi bakwe Lesa boonse balaakushitilishikwa paciindi ca nkondo ya Amagedoni?

¹⁷ Sa muli wamu likoto lya mbelele shimwi? Na ubo mbocibete, ino nshiinshi nsheshi mukayandike kucita na inkondo yakweelaako ya Amagedoni ikatalike? Amukacinke manungo muli Yehova alimwi akukonkela butanjilishi bwakwe. Ino mbutanjilishi nshi bumwi mpashi mbweshi tukapekwe? Baibo ilaamba maswi ayuminisha ayi: ‘Kamuya nobene misheesu, amunjile mumaanda anu, amulicalile mushipinda shanu shamukati, kushikila bukali bwakwe Lesa bwiinde.’ (Isa. 26:20) Paciindi ici, basebenshi bakwe Lesa bashomeka boonse beshi bakanooli kwiculu apacishi, balaakushitilishikwa. Bweenka mbuli mutumwi Paulo, tulishomete cakutatoonsha ayi ‘taaku ceenga catupansaanya alusuno lwakwe Lesa pali ndiswe . . . beendeleshi ba kwiculu, shintu sha pacecino ciindi nabi shintu sheshi shikaboneke.’ (Loma. 8:​38, 39) Lyoonse munokwiibaluka ayi Yehova alimusuni alimwi teshi akamulekelesheewo!