ບົດຄວາມສຶກສາທີ 5
ເພງທີ 27 ລູກຂອງພະເຈົ້າໄດ້ຮັບກຽດ
“ເຮົາຈະບໍ່ປະບໍ່ຖິ້ມເຈົ້າ”
“ພະເຈົ້າບອກໄວ້ວ່າ: ‘ເຮົາຈະບໍ່ປະບໍ່ຖິ້ມເຈົ້າ.’”—ຮຣ. 13:5ຂ
ຈຸດສຳຄັນ
ເພື່ອຊ່ວຍຜູ້ຮັບໃຊ້ຂອງພະເຢໂຫວາທີ່ຢູ່ໃນໂລກນີ້ໝັ້ນໃຈວ່າພະເຢໂຫວາຈະບໍ່ປະບໍ່ຖິ້ມເຂົາເຈົ້າເຖິງວ່າຜູ້ຖືກເລືອກທີ່ຍັງເຫຼືອຢູ່ຈະຂຶ້ນໄປສະຫວັນໝົດແລ້ວ.
1. ຜູ້ຖືກເລືອກທັງໝົດຈະຂຶ້ນໄປສະຫວັນຕອນໃດ?
ໃນຫຼາຍປີຜ່ານມາ ພະຍານພະເຢໂຫວາສົງໄສວ່າ ‘ຜູ້ຖືກເລືອກທັງໝົດຈະຂຶ້ນໄປສະຫວັນຕອນໃດ?’ ເຮົາເຄີຍເຊື່ອວ່າຫຼັງຈາກສົງຄາມອາມາເຄໂດນຈະຍັງມີຜູ້ຖືກເລືອກບາງຄົນເຫຼືອຢູ່ໃນໂລກ ແລະເຂົາເຈົ້າຈະຢູ່ໃນໂລກໃໝ່ໄລຍະໜຶ່ງ. ແຕ່ຫໍສັງເກດການ 15 ກໍລະກົດ 2013 ອະທິບາຍວ່າຜູ້ຖືກເລືອກທັງໝົດຈະຂຶ້ນໄປສະຫວັນກ່ອນສົງຄາມອາມາເຄໂດນເລີ່ມຕົ້ນ.—ມທ. 24:31
2. ບາງຄົນອາດສົງໄສຫຍັງ? ແລະເຮົາຈະຮຽນຫຍັງໃນບົດຄວາມນີ້?
2 ແຕ່ບາງຄົນອາດສົງໄສວ່າ ຖ້າເປັນແບບນັ້ນ “ແກະອື່ນ” ທີ່ຮັບໃຊ້ພະເຢໂຫວາຢ່າງສັດຊື່ໃນໄລຍະ “ຄວາມທຸກລຳບາກຄັ້ງໃຫຍ່” ຈະເປັນແນວໃດ? (ຢຮ. 10:16; ມທ. 24:21) ບາງຄົນອາດກັງວົນວ່າເຂົາເຈົ້າບໍ່ຮູ້ວ່າຈະເຮັດແນວໃດຕໍ່ໄປແລະໃຜຈະຊີ້ນຳເຂົາເຈົ້າຫຼັງຈາກຜູ້ຖືກເລືອກຂຶ້ນໄປສະຫວັນໝົດແລ້ວ. ໃຫ້ເຮົາເບິ່ງ 2 ຕົວຢ່າງໃນຄຳພີໄບເບິນທີ່ອາດເຮັດໃຫ້ເຂົາເຈົ້າຄິດແບບນັ້ນ. ຈາກນັ້ນ ເຮົາຈະເບິ່ງບາງເຫດຜົນວ່າເປັນຫຍັງເຮົາບໍ່ຕ້ອງຢ້ານ.
ອັນໃດຈະບໍ່ເກີດຂຶ້ນ?
3-4. ບາງຄົນອາດຢ້ານຫຍັງ? ແລະເປັນຫຍັງເຂົາເຈົ້າຈຶ່ງຄິດແບບນັ້ນ?
3 ບາງຄົນອາດຢ້ານວ່າແກະອື່ນຈະເຊົາຮັບໃຊ້ພະເຢໂຫວາຖ້າຜູ້ຖືກເລືອກທີ່ເປັນຄະນະກຳມະການປົກຄອງບໍ່ໄດ້ຊີ້ນຳເຂົາເຈົ້າແລ້ວ. ເຂົາເຈົ້າຮູ້ສຶກແບບນີ້ອາດເປັນຍ້ອນເຂົາເຈົ້າຄິດເຖິງບາງເລື່ອງທີ່ຢູ່ໃນຄຳພີໄບເບິນ. ໃຫ້ເຮົາເບິ່ງ 2 ຕົວຢ່າງໃນຄຳພີໄບເບິນນຳກັນ. ຕົວຢ່າງທຳອິດແມ່ນກ່ຽວກັບປະໂລຫິດໃຫຍ່ເຢໂຮຢາດາທີ່ເປັນຜູ້ຮັບໃຊ້ທີ່ສັດຊື່ຂອງພະເຢໂຫວາ. ເຢໂຮຢາດາກັບເຢໂຮຊາເບອາເມຍຂອງລາວໄດ້ປົກປ້ອງເຢໂຮອາດຕອນຍັງນ້ອຍແລະຊ່ວຍລາວໃຫ້ເປັນກະສັດທີ່ດີແລະສັດຊື່. ຕອນທີ່ເຢໂຮຢາດາຍັງມີຊີວິດຢູ່ ເຢໂຮອາດນະມັດສະການພະເຢໂຫວາແລະເຮັດສິ່ງທີ່ດີ. ແຕ່ຫຼັງຈາກເຢໂຮຢາດາຕາຍ ເຢໂຮອາດກໍເລີ່ມເຮັດສິ່ງທີ່ຊົ່ວ. ລາວຟັງພວກເຈົ້ານາຍຂອງຢູດາທີ່ຊົ່ວແລະລາວເຊົາຮັບໃຊ້ພະເຢໂຫວາ.—2ຂຄ. 24:2, 15-19
4 ຕົວຢ່າງທີ 2 ແມ່ນກ່ຽວກັບຄລິດສະຕຽນທີ່ມີຊີວິດຢູ່ຫຼັງຈາກພວກອັກຄະສາວົກຂອງພະເຢຊູຕາຍໝົດແລ້ວ. ໂຢຮັນເປັນອັກຄະສາວົກຄົນສຸດທ້າຍທີ່ຕາຍ. ຕອນທີ່ລາວຍັງມີຊີວິດຢູ່ ລາວໄດ້ຊ່ວຍຄລິດສະຕຽນໃຫ້ສັດຊື່ຕໍ່ພະເຢໂຫວາ. (3ຢຮ. 4) ໃນໄລຍະໜຶ່ງ ໂຢຮັນກັບອັກຄະສາວົກຄົນອື່ນໆຕ້ອງພະຍາຍາມເອົາແທ້ເອົາວ່າເພື່ອບໍ່ໃຫ້ຄຳສອນຂອງພວກທີ່ທໍລະຍົດພະເຈົ້າແພ່ອອກໄປໃນພວກຄລິດສະຕຽນ. (1ຢຮ. 2:18; 2ທຊ. 2:7) ຫຼັງຈາກທີ່ໂຢຮັນຕາຍ ການທໍລະຍົດພະເຈົ້າກໍແພ່ລາມໄປທົ່ວປະຊາຄົມຕ່າງໆຄືກັບໄຟໄໝ້ປ່າ. ຫຼາຍປີຕໍ່ມາ ຄລິດສະຕຽນໝົດທຸກຄົນກໍພາກັນເຊື່ອຄຳສອນຂອງພວກທີ່ທໍລະຍົດພະເຈົ້າ.
5. ຈາກຕົວຢ່າງ 2 ເລື່ອງໃນຄຳພີໄບເບິນ ເຮົາບໍ່ຄວນສະຫຼຸບແນວໃດ?
5 ສອງຕົວຢ່າງນີ້ສະແດງໃຫ້ເຫັນບໍວ່າຫຼັງຈາກຜູ້ຖືກເລືອກຂຶ້ນໄປສະຫວັນໝົດແລ້ວ ແກະອື່ນກໍຈະເຮັດຊົ່ວຄືກັບເຢໂຮອາດເຮັດແລະທໍລະຍົດພະເຈົ້າຄືກັບຄລິດສະຕຽນຫຼາຍຄົນໃນສະຕະວັດທີ 2 ເຮັດ? ຄຳຕອບກໍຄື ຈະບໍ່ເປັນແບບນັ້ນແນ່ນອນ! ເຮົາໝັ້ນໃຈໄດ້ວ່າເມື່ອຜູ້ຖືກເລືອກຂຶ້ນໄປສະຫວັນໝົດແລ້ວ ແກະອື່ນຈະຍັງນະມັດສະການພະເຢໂຫວາຕໍ່ໄປຢ່າງສັດຊື່ ແລະເພິ່ນຈະເບິ່ງແຍງເຂົາເຈົ້າຢ່າງດີຕໍ່ໆໄປ. ເປັນຫຍັງເຮົາຈຶ່ງໝັ້ນໃຈແບບນັ້ນ?
ການນະມັດສະການແທ້ຈະຍັງມີຢູ່ຕໍ່ໄປ
6. ເຮົາຈະຮຽນກ່ຽວກັບ 3 ໄລຍະເວລາຫຍັງແດ່?
6 ເປັນຫຍັງເຮົາຈຶ່ງໝັ້ນໃຈໄດ້ວ່າການນະມັດສະການແທ້ຈະຍັງມີຢູ່ຕໍ່ໄປເຖິງວ່າໃນອະນາຄົດເຮົາຈະຕ້ອງເຈິຄວາມຍາກລຳບາກ? ຍ້ອນຄຳພີໄບເບິນບອກວ່າສະໄໝທີ່ເຮົາມີຊີວິດຢູ່ຕ່າງກັນຫຼາຍກັບສະໄໝຂອງຊາດອິດສະຣາເອນບູຮານແລະສະໄໝຂອງຄລິດສະຕຽນໃນສະຕະວັດທີ 2. ໃຫ້ເຮົາມາເບິ່ງກ່ຽວກັບ 3 ໄລຍະເວລານຳກັນ ນັ້ນຄື: (1) ສະໄໝຂອງຊາດອິດສະຣາເອນບູຮານ (2) ສະໄໝຫຼັງຈາກທີ່ອັກຄະສາວົກຕາຍໝົດແລ້ວ ແລະ (3) ສະໄໝຂອງເຮົາ “ຕອນທີ່ທຸກສິ່ງຈະໄດ້ຮັບການຟື້ນຟູ.”—ກຈກ. 3:21
7. ເປັນຫຍັງຄົນອິດສະຣາເອນທີ່ສັດຊື່ຈຶ່ງບໍ່ໝົດຫວັງເມື່ອກະສັດແລະຄົນສ່ວນຫຼາຍເລືອກເຮັດຊົ່ວ?
7 ສະໄໝຊາດອິດສະຣາເອນບູຮານ. ບໍ່ດົນກ່ອນໂມເຊຕາຍ ລາວບອກພວກອິດສະຣາເອນວ່າ: “ຂ້ອຍຮູ້ດີວ່າຫຼັງຈາກທີ່ຂ້ອຍຕາຍໄປແລ້ວ ພວກເຈົ້າຈະເຮັດສິ່ງທີ່ຊົ່ວແທ້ໆແລະພວກເຈົ້າຈະບໍ່ເຮັດຕາມທີ່ຂ້ອຍສັ່ງໄວ້.” (ພບຍ. 31:29) ໂມເຊຍັງເຕືອນເຂົາເຈົ້ານຳວ່າ ຖ້າເຂົາເຈົ້າບໍ່ສັດຊື່ຕໍ່ພະເຢໂຫວາ ເຂົາເຈົ້າຈະຖືກຈັບໄປເປັນຊະເລີຍ. (ພບຍ. 28:35, 36) ເລື່ອງນີ້ເກີດຂຶ້ນແທ້ບໍ? ເກີດຂຶ້ນແທ້. ໃນໄລຍະຫຼາຍຮ້ອຍປີ ກະສັດຂອງຊາດອິດສະຣາເອນຫຼາຍອົງເລືອກເຮັດຊົ່ວແລະເຮັດໃຫ້ປະຊາຊົນໄປນະມັດສະການພະເຈົ້າປອມ. ຍ້ອນແນວນີ້ພະເຢໂຫວາຈຶ່ງໃຈຮ້າຍຫຼາຍແລະລົງໂທດເຂົາເຈົ້າ ແລະເພິ່ນບໍ່ໃຫ້ມີກະສັດທີ່ເປັນມະນຸດປົກຄອງເຂົາເຈົ້າອີກຕໍ່ໄປ. (ອຊກ. 21:25-27) ແຕ່ຄົນອິດສະຣາເອນທີ່ສັດຊື່ບໍ່ໝົດຫວັງເມື່ອເຫັນວ່າສິ່ງທີ່ພະເຢໂຫວາບອກໄວ້ເກີດຂຶ້ນແທ້ ເຂົາເຈົ້າຈຶ່ງກ້າທີ່ຈະຮັບໃຊ້ພະເຢໂຫວາຢ່າງສັດຊື່ຕໍ່ໆໄປ.—ອຊຢ. 55:10, 11
8. ເຮົາຄວນແປກໃຈບໍທີ່ຄລິດສະຕຽນໃນສະຕະວັດທີ 2 ເຊື່ອຄຳສອນຂອງພວກທີ່ທໍລະຍົດພະເຈົ້າ? ຂໍໃຫ້ອະທິບາຍ.
8 ສະໄໝຫຼັງຈາກທີ່ອັກຄະສາວົກຕາຍໝົດແລ້ວ. ເຮົາຄວນແປກໃຈບໍທີ່ປະຊາຄົມຄລິດສະຕຽນໃນສະຕະວັດທີ 2 ເຊື່ອຄຳສອນຂອງພວກທີ່ທໍລະຍົດພະເຈົ້າ? ເຮົາບໍ່ແປກໃຈເລີຍ. ພະເຢຊູບອກລ່ວງໜ້າວ່າຈະມີການທໍລະຍົດພະເຈົ້າຄັ້ງໃຫຍ່. (ມທ. 7:21-23; 13:24-30, 36-43) ອັກຄະສາວົກໂປໂລ ເປໂຕ ແລະໂຢຮັນຢືນຢັນວ່າສິ່ງທີ່ພະເຢຊູບອກລ່ວງໜ້າໄດ້ເກີດຂຶ້ນແທ້ໃນສະໄໝຂອງເຂົາເຈົ້າ. (2ທຊ. 2:3, 7; 2ປຕ. 2:1; 1ຢຮ. 2:18) ເມື່ອຮອດສະຕະວັດທີ 2 ຄລິດສະຕຽນທີ່ມີຊີວິດຢູ່ໃນໄລຍະນັ້ນກໍພາກັນເຊື່ອຄຳສອນຂອງພວກທີ່ທໍລະຍົດພະເຈົ້າ. ສາສະໜາຄລິດສະຕຽນທີ່ທໍລະຍົດພະເຈົ້າໄດ້ກາຍເປັນສ່ວນໜຶ່ງຂອງບາບີໂລນໃຫຍ່ ເຊິ່ງໝາຍເຖິງສາສະໜາປອມທັງໝົດໃນໂລກ. ເຮົາເຫັນໄດ້ເລີຍວ່າສິ່ງທີ່ພະເຢຊູບອກລ່ວງໜ້າໄດ້ເກີດຂຶ້ນແທ້.
9. ໄລຍະເວລາທີ່ເຮົາມີຊີວິດຢູ່ໃນຕອນນີ້ຕ່າງກັບສະໄໝຂອງຊາດອິດສະຣາເອນບູຮານແລະສະໄໝຂອງຄລິດສະຕຽນໃນສະຕະວັດທີ 2 ແນວໃດ?
9 “ຕອນທີ່ທຸກສິ່ງຈະໄດ້ຮັບການຟື້ນຟູ.” ໄລຍະທີ່ເຮົາມີຊີວິດຢູ່ໃນຕອນນີ້ຕ່າງຈາກສະໄໝຂອງຊາດອິດສະຣາເອນບູຮານແລະສະໄໝທີ່ມີການທໍລະຍົດພະເຈົ້າຄັ້ງໃຫຍ່ໃນສະຕະວັດທີ 2. ສະໄໝທີ່ເຮົາມີຊີວິດຢູ່ເອີ້ນວ່າຫຍັງ? ຕາມປົກກະຕິແລ້ວ ເຮົາຈະເອີ້ນວ່າ “ສະໄໝສຸດທ້າຍ” ຂອງໂລກນີ້. (2ຕມ. 3:1) ແຕ່ທີ່ຈິງແລ້ວ ເຮົາມີຊີວິດຢູ່ໃນໄລຍະເວລາທີ່ຄຳພີໄບເບິນເອີ້ນວ່າ “ຕອນທີ່ທຸກສິ່ງຈະໄດ້ຮັບການຟື້ນຟູ” ນຳ. ໄລຍະເວລານີ້ເລີ່ມຕົ້ນພ້ອມກັບສະໄໝສຸດທ້າຍ ແຕ່ຍິ່ງໃຫຍ່ກວ່າແລະດົນກວ່າສະໄໝສຸດທ້າຍ. ໄລຍະເວລາຂອງການຟື້ນຟູຈະຍາວນານໄປຮອດຕອນທີ່ການປົກຄອງຂອງພະເຈົ້າເຮັດໃຫ້ມະນຸດທຸກຄົນກາຍເປັນຄົນສົມບູນແບບແລະເຮັດໃຫ້ທົ່ວໂລກກາຍເປັນບ່ອນທີ່ງາມໆ. (ກຈກ. 3:21) ໄລຍະເວລານີ້ເລີ່ມຕົ້ນແຕ່ປີ 1914. ມີຫຍັງແດ່ທີ່ໄດ້ຮັບການຟື້ນຟູແລ້ວ? ພະເຢຊູຖືກແຕ່ງຕັ້ງໃຫ້ເປັນກະສັດໃນສະຫວັນ. ດັ່ງນັ້ນ ພະເຢໂຫວາຈຶ່ງມີຜູ້ປົກຄອງທີ່ເປັນຕົວແທນຂອງເພິ່ນອີກເທື່ອໜຶ່ງເຊິ່ງເປັນລູກຫຼານຂອງກະສັດດາວິດ. ພະເຢໂຫວາບໍ່ໄດ້ຟື້ນຟູແຕ່ເລື່ອງນີ້. ຫຼັງຈາກພະເຢຊູໄດ້ເປັນກະສັດ ການນະມັດສະການແທ້ກໍໄດ້ຮັບການຟື້ນຟູຄືກັນ. (ອຊຢ. 2:2-4; ອຊກ. 11:17-20) ການນະມັດສະການແທ້ຈະຍັງມີຢູ່ຕໍ່ໄປບໍ?
10. (ກ) ຄຳພີໄບເບິນມີຄຳພະຍາກອນຫຍັງກ່ຽວກັບການນະມັດສະການແທ້ໃນສະໄໝຂອງເຮົາ? (ເອຊາຢາ 54:17) (ຂ) ເປັນຫຍັງຄຳພະຍາກອນເຫຼົ່ານີ້ຈຶ່ງໃຫ້ກຳລັງໃຈເຮົາ?
10 ອ່ານເອຊາຢາ 54:17. ໃຫ້ຄິດເຖິງຄຳພະຍາກອນທີ່ບອກວ່າ: “ອາວຸດໃດກໍຕາມທີ່ສ້າງຂຶ້ນມາເພື່ອທຳຮ້າຍເຈົ້າຈະເຮັດຫຍັງເຈົ້າບໍ່ໄດ້.” ຄຳພະຍາກອນນີ້ກຳລັງເກີດຂຶ້ນແທ້ໃນສະໄໝຂອງເຮົາ. ນອກຈາກນັ້ນຍັງມີອີກຄຳພະຍາກອນໜຶ່ງທີ່ເກີດຂຶ້ນແທ້ໃນສະໄໝຂອງເຮົາທີ່ບອກວ່າ: “ພວກລູກຂອງເຈົ້າຈະໄດ້ຮັບການສອນຈາກພະເຢໂຫວາ ແລະຊີວິດຂອງເຂົາເຈົ້າຈະມີແຕ່ຄວາມສະຫງົບສຸກ. ເຈົ້າຈະຕັ້ງຢູ່ຢ່າງໝັ້ນຄົງຍ້ອນເຈົ້າເຮັດສິ່ງທີ່ຖືກຕ້ອງ. . . . ເຈົ້າຈະບໍ່ຢ້ານຫຍັງແລະຈະບໍ່ມີສິ່ງໃດເຮັດໃຫ້ເຈົ້າຢ້ານ. ສິ່ງທີ່ເປັນຕາຢ້ານຈະບໍ່ມາໃກ້ເຈົ້າເລີຍ.” (ອຊຢ. 54:13, 14) ແມ່ນແຕ່ຊາຕານທີ່ເປັນ “ພະເຈົ້າຂອງໂລກນີ້” ກໍບໍ່ສາມາດຢຸດວຽກທີ່ປະຊາຊົນຂອງພະເຢໂຫວາກຳລັງເຮັດເພື່ອສອນຄົນອື່ນໃຫ້ຮູ້ຈັກພະເຢໂຫວາ. (2ກຣ. 4:4) ການນະມັດສະການແທ້ໄດ້ຮັບການຟື້ນຟູແລ້ວ ແລະການນະມັດສະການນີ້ຈະຢູ່ຕະຫຼອດໄປ. ອາວຸດໃດກໍຕາມທີ່ສ້າງຂຶ້ນມາເພື່ອທຳຮ້າຍເຮົາຈະເຮັດຫຍັງເຮົາບໍ່ໄດ້!
ຈະເກີດຫຍັງຂຶ້ນ?
11. ອັນໃດເຮັດໃຫ້ເຮົາໝັ້ນໃຈວ່າຄົນກຸ່ມໃຫຍ່ຈະບໍ່ຖືກປະຖິ້ມຫຼັງຈາກທີ່ຜູ້ຖືກເລືອກຂຶ້ນໄປສະຫວັນໝົດແລ້ວ?
11 ຫຼັງຈາກຜູ້ຖືກເລືອກຂຶ້ນໄປສະຫວັນໝົດແລ້ວຈະເກີດຫຍັງຂຶ້ນ? ເຮົາຕ້ອງຈື່ໄວ້ວ່າ ພະເຢຊູເປັນຜູ້ລ້ຽງແກະຂອງເຮົາແລະເພິ່ນເປັນຜູ້ນຳປະຊາຄົມຄລິດສະຕຽນ. ພະເຢຊູບອກຢ່າງຈະແຈ້ງວ່າ: “ພວກເຈົ້າມີຜູ້ນຳແຕ່ຜູ້ດຽວ ແລະຜູ້ນັ້ນແມ່ນພະຄລິດ.” (ມທ. 23:10) ພະເຢຊູທີ່ເປັນກະສັດທີ່ກຳລັງປົກຄອງໃນສະຫວັນຈະເບິ່ງແຍງລູກສິດຂອງເພິ່ນສະເໝີ. ຍ້ອນພະເຢຊູກຳລັງຊີ້ນຳພວກລູກສິດຂອງເພິ່ນທີ່ຢູ່ໃນໂລກ ເຂົາເຈົ້າຈຶ່ງບໍ່ຕ້ອງຢ້ານຫຍັງ. ເຮົາບໍ່ຮູ້ລາຍລະອຽດທຸກຢ່າງວ່າພະເຢຊູຈະນຳໜ້າເຮົາແນວໃດໃນຕອນນັ້ນ ແຕ່ຕົວຢ່າງບາງເລື່ອງໃນຄຳພີໄບເບິນຈະຊ່ວຍເຮົາໃຫ້ໝັ້ນໃຈວ່າເຮົາຈະບໍ່ຖືກຖິ້ມແນ່ນອນ. ໃຫ້ເຮົາມາເບິ່ງນຳກັນ.
12. ພະເຢໂຫວາເບິ່ງແຍງປະຊາຊົນຂອງເພິ່ນແນວໃດ (ກ) ຫຼັງຈາກໂມເຊຕາຍ? (ຂ) ຫຼັງຈາກເອລີຢາໄດ້ວຽກມອບໝາຍໃໝ່? (ເບິ່ງຮູບ)
12 ໂມເຊຕາຍກ່ອນທີ່ພວກອິດສະຣາເອນຈະໄດ້ເຂົ້າໄປໃນແຜ່ນດິນທີ່ພະເຈົ້າສັນຍາໄວ້. ເມື່ອໂມເຊຕາຍ ປະຊາຊົນຂອງພະເຈົ້າເປັນແນວໃດ? ເຂົາເຈົ້າຖືກປະຖິ້ມບໍ? ບໍ່. ພະເຢໂຫວາເບິ່ງແຍງເຂົາເຈົ້າສະເໝີຕະຫຼອດເວລາທີ່ເຂົາເຈົ້າສັດຊື່ຕໍ່ເພິ່ນ. ກ່ອນໂມເຊຕາຍ ພະເຢໂຫວາສັ່ງລາວໃຫ້ມອບໜ້າທີ່ຜູ້ນຳຊາດອິດສະຣາເອນໃຫ້ໂຢຊວຍ ເຊິ່ງກ່ອນໜ້ານັ້ນໂມເຊໄດ້ຝຶກໂຢຊວຍມາຫຼາຍສິບປີແລ້ວ. (ອພຍ. 33:11; ພບຍ. 34:9) ນອກຈາກນັ້ນ ໂມເຊຍັງເລືອກຜູ້ຊາຍທີ່ມີຄວາມສາມາດອີກຫຼາຍຄົນໃຫ້ເປັນຜູ້ນຳຄືກັນ ເຊັ່ນ: ບາງຄົນເປັນຫົວໜ້າເບິ່ງແຍງພັນຄົນ ເປັນຫົວໜ້າເບິ່ງແຍງຮ້ອຍຄົນ ເປັນຫົວໜ້າເບິ່ງແຍງຫ້າສິບຄົນ ແລະເປັນຫົວໜ້າເບິ່ງແຍງສິບຄົນ. (ພບຍ. 1:15) ປະຊາຊົນຂອງພະເຢໂຫວາໄດ້ຮັບການເບິ່ງແຍງຢ່າງດີແທ້ໆ. ເຮົາຍັງເຫັນອີກຕົວຢ່າງໜຶ່ງທີ່ຄ້າຍຄືກັນ ນັ້ນແມ່ນເອລີຢາ. ເອລີຢານຳໜ້າປະຊາຊົນຂອງພະເຈົ້າໃນການນະມັດສະການແທ້ເປັນເວລາຫຼາຍສິບປີ. ແຕ່ຕໍ່ມາ ພະເຢໂຫວາໄດ້ມອບໝາຍລາວໃຫ້ໄປຮັບໃຊ້ຢູ່ຢູດາ. (2ກສ. 2:1; 2ຂຄ. 21:12) ຜູ້ຮັບໃຊ້ທີ່ສັດຊື່ຂອງພະເຢໂຫວາທີ່ຢູ່ໃນອິດສະຣາເອນ 10 ຕະກູນທາງເໜືອຖືກປະຖິ້ມບໍ? ບໍ່. ເອລີຢາໄດ້ຝຶກເອລີຊາເປັນເວລາຫຼາຍປີແລ້ວ. ນອກຈາກນີ້ຍັງມີ “ລູກຫຼານ . . . ຂອງພວກຜູ້ພະຍາກອນ” ເຊິ່ງເຂົາເຈົ້າອາດໄດ້ຮັບການຝຶກຈາກໂຮງຮຽນສອນຜູ້ພະຍາກອນ. (2ກສ. 2:7) ເຫັນໄດ້ວ່າມີຜູ້ຊາຍທີ່ສັດຊື່ຫຼາຍຄົນທີ່ພ້ອມຈະນຳໜ້າປະຊາຊົນຂອງພະເຢໂຫວາ. ບໍ່ມີຫຍັງຂັດຂວາງຄວາມຕ້ອງການຂອງພະເຢໂຫວາໄດ້ ແລະເພິ່ນຈະເບິ່ງແຍງຜູ້ຮັບໃຊ້ທີ່ສັດຊື່ຂອງເພິ່ນຢ່າງແນ່ນອນ.
ໂມເຊ (ຢູ່ເບື້ອງຊ້າຍ) ແລະເອລີຢາ (ຢູ່ເບື້ອງຂວາ) ຝຶກຜູ້ຊາຍທີ່ມີຄວາມສາມາດໃຫ້ເຮັດວຽກຕໍ່ຈາກເຂົາເຈົ້າ (ເບິ່ງຂໍ້ 12)
13. ເຮັບເຣີ 13:5ຂ ຊ່ວຍເຮົາໃຫ້ໝັ້ນໃຈໃນເລື່ອງໃດ? (ເບິ່ງຮູບ)
13 ເມື່ອຄິດເຖິງຕົວຢ່າງເຫຼົ່ານີ້ແລ້ວ ເຈົ້າຄິດວ່າຈະເກີດຫຍັງຂຶ້ນຫຼັງຈາກທີ່ຜູ້ຖືກເລືອກທຸກຄົນຂຶ້ນໄປສະຫວັນໝົດແລ້ວ? ເຮົາບໍ່ຕ້ອງອຸກໃຈໃນເລື່ອງນີ້. ຄຳພີໄບເບິນເວົ້າໃຫ້ເຂົ້າໃຈງ່າຍໆວ່າ ພະເຢໂຫວາຈະບໍ່ປະບໍ່ຖິ້ມປະຊາຊົນຂອງເພິ່ນທີ່ຢູ່ໃນໂລກ. (ອ່ານເຮັບເຣີ 13:5ຂ) ຄືກັບໂມເຊແລະເອລີຢາ ຜູ້ຖືກເລືອກກຸ່ມນ້ອຍໆທີ່ນຳໜ້າໃນອົງການຮູ້ດີວ່າສຳຄັນແທ້ໆທີ່ເຂົາເຈົ້າຕ້ອງຝຶກພີ່ນ້ອງຄົນອື່ນໃຫ້ຮູ້ນຳໜ້າ. ຫຼາຍສິບປີມາແລ້ວທີ່ຄະນະກຳມະການປົກຄອງໄດ້ຝຶກພີ່ນ້ອງຊາຍທີ່ເປັນແກະອື່ນໃຫ້ນຳໜ້າ. ຕົວຢ່າງເຊັ່ນ: ຄະນະກຳມະການປົກຄອງໄດ້ຕັ້ງໂຮງຮຽນຕ່າງໆເຊັ່ນ: ໂຮງຮຽນສຳລັບຜູ້ເບິ່ງແຍງໃນປະຊາຄົມ ໂຮງຮຽນສຳລັບຜູ້ເບິ່ງແຍງໝວດ ໂຮງຮຽນສຳລັບສະມາຊິກຄະນະກຳມະການສາຂາ ໂຮງຮຽນສຳລັບຜູ້ເບິ່ງແຍງໃນເບເທນ ແລະໂຮງຮຽນອື່ນໆ. ຄະນະກຳມະການປົກຄອງຍັງໄດ້ຝຶກຜູ້ຊ່ວຍຄະນະກຳມະການຝ່າຍຕ່າງໆຂອງຄະນະກຳມະການປົກຄອງນຳອີກ. ຕອນນີ້ ຜູ້ຊ່ວຍເຫຼົ່ານີ້ກຳລັງເຮັດໜ້າທີ່ຮັບຜິດຊອບທີ່ສຳຄັນຫຼາຍຢ່າງໃນອົງການຂອງພະເຢໂຫວາ ແລະເຂົາເຈົ້າກໍພ້ອມທີ່ຈະເຮັດໜ້າທີ່ເບິ່ງແຍງແກະຂອງພະຄລິດຕໍ່ໆໄປ.
ຄະນະກຳມະການປົກຄອງຝຶກຜູ້ຊ່ວຍຂອງເຂົາເຈົ້າແລະຕັ້ງໂຮງຮຽນຕ່າງໆເພື່ອຝຶກຜູ້ເບິ່ງແຍງໃນປະຊາຄົມ ຜູ້ເບິ່ງແຍງໝວດ ຄະນະກຳມະການສາຂາ ຜູ້ເບິ່ງແຍງໃນເບເທນ ແລະມິດຊັນນາຣີຢູ່ທົ່ວໂລກ (ເບິ່ງຂໍ້ 13)
14. ຈຸດສຳຄັນຂອງເລື່ອງທີ່ເຮົາໄດ້ຮຽນແມ່ນຫຍັງ?
14 ຈຸດສຳຄັນຂອງເລື່ອງທີ່ເຮົາໄດ້ຮຽນແມ່ນ ການນະມັດສະການແທ້ຈະຍັງມີຢູ່ຕໍ່ໄປໃນໂລກເຖິງວ່າຜູ້ຖືກເລືອກຂຶ້ນໄປສະຫວັນໝົດແລ້ວຕອນຄວາມທຸກລຳບາກຄັ້ງໃຫຍ່ໃກ້ຈະຈົບ. ຍ້ອນເຮົາມີພະເຢຊູເປັນຜູ້ນຳ ເຮົາຈຶ່ງນະມັດສະການພະເຢໂຫວາຢ່າງສັດຊື່ຕໍ່ໆໄປໄດ້. ເຖິງວ່າຕອນນັ້ນເຮົາຈະຖືກໂຄກແຫ່ງມາໂຄກເຊິ່ງກໍຄືກຸ່ມຊາດຕ່າງໆໂຈມຕີ ແຕ່ການໂຈມຕີນັ້ນຈະບໍ່ສຳເລັດ. (ອຊກ. 38:18-20) ເຂົາເຈົ້າຈະບໍ່ສາມາດຂັດຂວາງຄົນຂອງພະເຢໂຫວາໃຫ້ເຊົານະມັດສະການເພິ່ນໄດ້. ເພິ່ນຈະປົກປ້ອງເຂົາເຈົ້າແນ່ນອນ! ໃນນິມິດອັກຄະສາວົກໂຢຮັນບອກວ່າ ລາວເຫັນ “ຄົນກຸ່ມໃຫຍ່” ເຊິ່ງເປັນແກະອື່ນຂອງພະຄລິດລອດຜ່ານ “ຄວາມທຸກລຳບາກຄັ້ງໃຫຍ່. (ພນມ. 7:9, 14) ແມ່ນແລ້ວ ພະເຢໂຫວາຈະຊ່ວຍປະຊາຊົນຂອງເພິ່ນໃຫ້ລອດ!
15-16. ໃນພະນິມິດ 17:14 ຄລິດສະຕຽນຜູ້ຖືກເລືອກຈະເຮັດຫຍັງໃນສົງຄາມອາມາເຄໂດນ? ແລະການຮູ້ເລື່ອງນີ້ໃຫ້ກຳລັງໃຈເຮົາແນວໃດ?
15 ບາງຄົນອາດສົງໄສວ່າ “ຜູ້ຖືກເລືອກຈະເຮັດຫຍັງຫຼັງຈາກເຂົາເຈົ້າຂຶ້ນໄປສະຫວັນແລ້ວ?” ຄຳພີໄບເບິນຕອບເລື່ອງນີ້ຢ່າງຈະແຈ້ງ. ຄຳພີໄບເບິນບອກວ່າ ລັດຖະບານຕ່າງໆໃນໂລກ “ຈະຕໍ່ສູ້ກັບແກະນ້ອຍຂອງພະເຈົ້າ ແຕ່ແກະນ້ອຍຈະຊະນະເຂົາເຈົ້າ.” ໃຜຈະຊ່ວຍແກະນ້ອຍຂອງພະເຈົ້າໃນການຕໍ່ສູ້? ຄຳພີໄບເບິນບອກວ່າຜູ້ທີ່ຈະຊ່ວຍແມ່ນຜູ້ທີ່ພະເຈົ້າໄດ້ “ເອີ້ນແລະເລືອກໄວ້ ແລະເປັນຄົນທີ່ສັດຊື່ຕໍ່ພະເຈົ້າ.” (ອ່ານພະນິມິດ 17:14) ຄົນເຫຼົ່ານີ້ແມ່ນໃຜ? ເຂົາເຈົ້າແມ່ນຜູ້ຖືກເລືອກທີ່ຖືກປຸກໃຫ້ຄືນມາຈາກຕາຍ. ເມື່ອຜູ້ຖືກເລືອກທຸກຄົນທີ່ຢູ່ໃນໂລກຂຶ້ນໄປສະຫວັນໝົດແລ້ວຕອນຄວາມທຸກລຳບາກຄັ້ງໃຫຍ່ໃກ້ຈະຈົບ ວຽກມອບໝາຍທຳອິດຂອງເຂົາເຈົ້າແມ່ນຕໍ່ສູ້ໃນສົງຄາມອາມາເຄໂດນ. ນີ້ເປັນວຽກມອບໝາຍທີ່ພິເສດຫຼາຍແທ້ໆ! ຕອນເຂົ້າມາເປັນພະຍານພະເຢໂຫວາ ຄລິດສະຕຽນຜູ້ຖືກເລືອກບາງຄົນເຄີຍຕໍ່ສູ້ກັບຄົນອື່ນມາກ່ອນ. ບາງຄົນເຄີຍເປັນຮອດທະຫານຊ້ຳ. ແຕ່ຕໍ່ມາເຂົາເຈົ້າໄດ້ເຂົ້າມາເປັນຄລິດສະຕຽນແທ້ແລະຮຽນຮູ້ທີ່ຈະຢູ່ແບບສະຫງົບສຸກກັບຄົນອື່ນ. (ຄລຕ. 5:22; 2ທຊ. 3:16) ເຂົາເຈົ້າເຊົາສະໜັບສະໜູນສົງຄາມທຸກຮູບແບບ. ແຕ່ຫຼັງຈາກຂຶ້ນໄປສະຫວັນແລ້ວ ເຂົາເຈົ້າຈະຮ່ວມກັບພະເຢຊູແລະພວກທູດສະຫວັນເພື່ອຕໍ່ສູ້ກັບສັດຕູຂອງພະເຈົ້າໃນສົງຄາມອາມາເຄໂດນ.
16 ຕອນນີ້ຄລິດສະຕຽນຜູ້ຖືກເລືອກບາງຄົນກໍເຖົ້າແລ້ວແລະບໍ່ແຂງແຮງ. ແຕ່ເມື່ອເຂົາເຈົ້າຂຶ້ນໄປສະຫວັນແລ້ວ ເຂົາເຈົ້າຈະມີຮ່າງກາຍສຳລັບສະຫວັນທີ່ເປັນອະມະຕະແລະມີລິດເດດຫຼາຍ. ເຂົາເຈົ້າຈະຮ່ວມຕໍ່ສູ້ຄຽງບ່າຄຽງໄຫຼ່ກັບພະເຢຊູກະສັດທີ່ເປັນນັກຮົບ. ຫຼັງຈາກຕໍ່ສູ້ໃນສົງຄາມອາມາເຄໂດນ ເຂົາເຈົ້າຈະເຮັດວຽກກັບພະເຢຊູເພື່ອຊ່ວຍມະນຸດໃຫ້ກາຍເປັນຄົນສົມບູນແບບ. ຕອນທີ່ຢູ່ໃນສະຫວັນ ເຂົາເຈົ້າຈະສາມາດຊ່ວຍພີ່ນ້ອງທີ່ຢູ່ໃນໂລກໄດ້ຫຼາຍກວ່າຕອນທີ່ເຂົາເຈົ້າເປັນມະນຸດທີ່ບໍ່ສົມບູນແບບ.
17. ເຮົາຮູ້ໄດ້ແນວໃດວ່າຜູ້ຮັບໃຊ້ຂອງພະເຢໂຫວາທຸກຄົນຈະປອດໄພຕອນສົງຄາມອາມາເຄໂດນ?
17 ເຈົ້າເປັນແກະອື່ນບໍ? ຖ້າເປັນ ເຈົ້າຕ້ອງເຮັດຫຍັງຕອນທີ່ສົງຄາມອາມາເຄໂດນເລີ່ມຕົ້ນ? ສິ່ງທີ່ເຈົ້າເຮັດໄດ້ກໍມີແຕ່ໄວ້ວາງໃຈພະເຢໂຫວາແລະເຮັດຕາມທີ່ເພິ່ນຊີ້ນຳ. ເລື່ອງນີ້ອາດລວມເຖິງຫຍັງແດ່? ຄຳພີໄບເບິນບອກວ່າ: “ປະຊາຊົນຂອງເຮົາ ໃຫ້ພວກເຈົ້າເຂົ້າໄປຫ້ອງທາງໃນແລະອັດປະຕູໄວ້ແມ້. ເຂົ້າໄປລີ້ຢູ່ຫັ້ນບຶດໜຶ່ງຈົນກວ່າເຮົາຈະເຊົາໃຈຮ້າຍ.” (ອຊຢ. 26:20) ຜູ້ຮັບໃຊ້ທີ່ສັດຊື່ຂອງພະເຢໂຫວາທຸກຄົນທັງຢູ່ໃນສະຫວັນແລະຢູ່ໃນໂລກຈະປອດໄພໃນຕອນນັ້ນ. ເຮົາໝັ້ນໃຈໄດ້ຄືກັບທີ່ອັກຄະສາວົກໂປໂລເວົ້າວ່າ: “ບໍ່ມີຫຍັງສາມາດຂັດຂວາງຄວາມຮັກທີ່ພະເຈົ້າສະແດງຕໍ່ພວກເຮົາ. ບໍ່ວ່າຈະເປັນ . . . ລັດຖະບານ ຫຼືສິ່ງທີ່ມີຢູ່ຕອນນີ້ ຫຼືສິ່ງທີ່ຈະມາໃນອະນາຄົດ.” (ຣມ. 8:38, 39) ຂໍໃຫ້ຈື່ໄວ້ສະເໝີວ່າພະເຢໂຫວາຮັກເຈົ້າ ແລະເພິ່ນຈະບໍ່ປະບໍ່ຖິ້ມເຈົ້າຈັກເທື່ອ!
ເມື່ອຜູ້ຖືກເລືອກຂຶ້ນໄປສະຫວັນໝົດແລ້ວ . . .
-
ອັນໃດຈະເກີດຂຶ້ນ?
-
ເປັນຫຍັງເຮົາໝັ້ນໃຈວ່າການນະມັດສະການແທ້ຈະຍັງມີຢູ່ຕໍ່ໄປ?
-
ເປັນຫຍັງເຮົາໝັ້ນໃຈວ່າພະເຢໂຫວາຈະເບິ່ງແຍງປະຊາຊົນຂອງເພິ່ນ?
ເພງທີ 8 ພະເຢໂຫວາເປັນທີ່ເພິ່ງຂອງພວກເຮົາ
