1. Bakreste kaufela babatozizwe bakaya lili kwa lihalimu?

 LILIMO zeñata kwamulaho, batu ba Jehova nebaipuzanga kuli: ‘Bakreste babatozizwe ba mafelelezo bakaya lili kwa lihalimu?’ Nelunahananga kuli mwendi babañwi kwa Bakreste babatozizwe bakasiyala fa lifasi ni kupila nakonyana mwa Paradaisi hamulaho wa ndwa ya Armagedoni. Kono mwa Tawala ya Mulibeleli ya July 15, 2013, neluitutile kuli Bakreste babatozizwe kaufela babasiyezi fa lifasi bakaangelwa kwa lihalimu pili ndwa ya Armagedoni isika kalisa kale.—Mat. 24:31.

2. Ki puzo mañi yelukona kuipuza, mi lukanyakisisañi mwa taba ye?

² Nihakulicwalo, mwendi lukona kuipuza kuli: Ki lika mañi zekaezahala kwa Bakreste ba “lingu zeñwi” babaka sebeleza Jehova ka busepahali fa lifasi ka nako ya “ñalelwa yetuna”? (Joa. 10:16; Mat. 24:21) Babañwi kacenu bakona kuikalelwa kuli mwendi habana kuziba za kueza kamba bakayubekiwa mizwale ni likaizeli babona babatozizwe habaka angelwa kwa lihalimu. Halunyakisiseñi mitala yemibeli ya mwa Mañolo yekona kutahisa kuli baikutwe cwalo. Kihona lukanyakisisa mabaka halusa swaneli kuikalelwa.

KI LIKA MAÑI ZESIKE ZAEZAHALA?

3-4. Ki lika mañi zekona kubilaeza batu babañwi, mi ki kabakalañi?

³ Babañwi bakona kunahana kuli mwendi ba lingu zeñwi bakatuhela kusebeleza Jehova mizwale babatozizwe ba mwa Sitopa Sesietelela habaka tuhela kubaetelela. Mwendi bakona kuikutwa cwalo kabakala litaba zeñwi za mwa Bibele. Halunyakisiseñi mitala yemibeli. Mutala wapili uama Muprisita Yapahami Jehoyada. Naali mutangaa Mulimu yasepahala. Yena ni musalaa hae Joshabeati, nebasilelelize mushimani yabizwa Joasi ni kumutusa kuba mulena yomunde, ili yasepahala. Jehoyada hanaasa  pila, Joasi naazwezipili kusebeleza Jehova ni kueza lika zende. Kono Jehoyada hasaashwile, Joasi akala kueza lika zemaswe. Naatelelize kwa manduna babamaswe mi atuhela kusebeleza Jehova.—2 Makol. 24:​2, 15-19.

⁴ Mutala wabubeli uama Bakreste bane bapilile hamulaho wa lifu la baapositola. Muapositola Joani, yanaapilile nako yetelele kufita baapositola babañwi, naatusize Bakreste babañata kuzwelapili kusebeleza Jehova ka busepahali. (3 Joa. 4) Ka kuswana ni baapositola ba Jesu babañwi, Joani naasebelize ka taata kusileleza liputeho kwa batu bane baluta lituto za buhata. (1 Joa. 2:18; 2 Mates. 2:7.) Kono hamulaho wa lifu la Joani, bukwenuheli bwayamba sina mulilo wa lubya. Mwa lilimo zenelatelezi, bakwenuheli bao nebaluta lituto zeñata za buhata ni kutuhelela muzamao omaswe mwa liputeho kaufela.

5. Ki lika mañi zelusa swaneli kunahana ka za mitala yemibeli yeo?

⁵ Kana mitala yemibeli yeo ya mwa Mañolo ibonisa kuli kukaezahala nto yeswana kwa Bakreste ba lingu zeñwi, Bakreste babatozizwe hase baangezwi kwa lihalimu? Ka nako yeo, kana Bakreste babasepahala fa lifasi bakatuhela kusebelisa zebaitutile, sina mone kubezi ku Joasi, kamba kana bakaba bakwenuheli, sina mone baezelize Bakreste babañata hamulaho wa lifu la baapositola? Kutokwa nihanyinyani! Lwakona kuba ni buikolwiso bwa kuli Bakreste babatozizwe hase baangezwi kwa lihalimu, ba lingu zeñwi bakababalelwa hande mi bakazwelapili kusebeleza Jehova ka nzila yelukile. Ki kabakalañi halukona kuba ni buikolwiso bo?

BULAPELI BWA NITI HABUNA KUSILAFAZWA

6. Ki linako lifi zetaalu zeluka nyakisisa ka bukuswani?

⁶ Ki kabakalañi halukona kuba ni buikolwiso bwa kuli bulapeli bwa niti habuna kusilafazwa, nihaiba ka nako yeluka kopana ni miinelo yetaata hahulu kwapili? Ki kabakala zeluitutile mwa Bibele ka za nako yelupila ku yona. Nako yelupila ku yona ishutana hahulu ni nako yene bapilile ku yona Maisilaele ba kwaikale ni nako yene bapilile ku yona Bakreste hamulaho wa lifu la baapositola. Kacwalo, halunyakisiseñi ka tokomelo linako zetaalu ze: (1) Nako yene bapilile ku yona Maisilaele ba kwaikale, (2) nako yene bapilile ku yona Bakreste hamulaho wa lifu la baapositola, ni (3) linako zaluna, ili “linako za kukutiswa sinca kwa lika kaufela.”—Lik. 3:21.

7. Ki kabakalañi Maisilaele babasepahala hane basatokwi kuzwafa malena ni batu babañwi hane baiketezi kueza lika zemaswe?

⁷ Nako yene bapilile ku yona Maisilaele ba kwaikale. Nakonyana pili asika shwa kale, Mushe naabulelezi Maisilaele kuli: “Naizibela hande kuli hase nishwile, kaniti mukaeza zemaswe mi mukakeluha mwa nzila yeni milaezi.” (Deut. 31:29) Mushe hape naalemusize Maisilaele kuli nebaka iswa mwa buhapiwa hane bakakwenuhela Jehova. (Deut. 28:​35, 36) Kana manzwi ao naatalelelizwe? Eni. Ka lilimo zeñata, malena babañata nebaezize lika zemaswe mwa meeto a Jehova ni kutahisa kuli batu balapele milimu ya buhata. Kabakaleo, Jehova afa koto Maisilaele babamaswe mi naasika lumeleza malena ba Isilaele kuli bazwelepili kubusa sicaba sahae. (Ezek. 21:​25-27) Kono manzwi a Mulimu hanaa talelelizwe, Maisilaele babasepahala nebabile ni bundume mi nebazwezipili kumusebeleza ka busepahali.—Isa. 55:​10, 11.

8. Kana lwaswanela kukomokiswa ki taba ya kuli puteho ya Sikreste neisilafalizwe hamulaho wa lifu la baapositola? Mutaluse.

⁸ Nako yene bapilile ku yona Bakreste hamulaho wa lifu la baapositola. Kana lwaswanela kukomokiswa ki taba ya kuli puteho ya Sikreste neisilafalizwe hamulaho wa lifu la baapositola? Batili. Jesu naapolofitile kuli nekukaba ni bakwenuheli babañata.  (Mat. 7:​21-23; 13:​24-30, 36-43) Baapositola babacwale ka Paulusi, Pitrosi, ni Joani, kaufelaa bona nebabonisize kuli bupolofita bwa Jesu nebukalile kutalelezwa mwa linako za baapositola. (2 Mates. 2:​3, 7; 2 Pit. 2:1; 1 Joa. 2:18) Hamulaho wa lifu la baapositola, puteho ya Sikreste neisilafalizwe. Bakreste babañata nebabile bakwenuheli mi baba kalulo ya Babilona Yomutuna, bona bulapeli kamukana bwa buhata mwa lifasi. Ka nako yeo, bupolofita bwa Jesu nebutalelelizwe hape.

9. Nako yelupila ku yona ishutana cwañi ni nako yene bapilile ku yona Maisilaele ba kwaikale ni nako yene bapilile ku yona Bakreste hamulaho wa lifu la baapositola?

⁹ “Linako za kukutiswa sinca kwa lika kaufela.” Nako yelupila ku yona yashutana ni nako yene bapilile ku yona Maisilaele ba kwaikale ni nako yene kubile ni bukwenuheli bobutuna hamulaho wa lifu la baapositola. Nako yelupila ku yona ibizwa cwañi? Hañata lubizanga nako yelupila ku yona kuli ki “mazazi a mafelelezo” a lifasi lelimaswe le. (2 Tim. 3:1) Kono Bibele ibonisa kuli kunani nako ya butokwa hahulu ni yetelele yenekalile ka nako yeswana yanaakalile mazazi a mafelelezo. Ikazwelapili kufitela Mubuso wa Mesia utusa batu kuba babapetahalile hape ni kufetula lifasi kuba paradaisi. Nako yeo ibizwa “linako za kukutiswa sinca kwa lika kaufela.” (Lik. 3:21) Nako yeo neikalile ka 1914. Ki lika mañi zenekutisizwe sinca ka nako yeo? Jesu naabile Mulena kwa lihalimu. Kacwalo, Jehova hape naabile ni mubusi yanaa muyemela, ili yanaanani tukelo ya kuyola Mulena Davida yasepahala. Kono bulena bo haki yona feela nto yanaakutisize sinca Jehova. Nakonyana kuzwa fo, batu nebakalile kulapela Jehova hape ka nzila yelukile! (Isa. 2:​2-4; Ezek. 11:​17-20) Kana bulapeli bwa niti bukasilafazwa hape?

10. (a) Bibele ibulelañi ka za bulapeli bwa niti mwa linako zaluna? (Isaya 54:17) (b) Ki kabakalañi bupolofita bobucwalo habulutusa kuba ni buikolwiso?

¹⁰ Mubale Isaya 54:17. Munahane ka za bupolofita bo, bobuli: “Hakuna silwaniso sesiezezwa wena sesika konda.” Manzwi ao anaañozwi ka kususumezwa ki moya wa Mulimu, asweli atalelezwa kacenu. Manzwi alatelela ili aomba-omba ni ona aama kwa nako yaluna, ali: “Bana bahao kaufela bakalutiwa ki Jehova, mi kozo ya bana bahao ikaba yetuna. Ukatiiswa ka kuluka. . . . Hakuna seuka saba mi hakuna nto yeka kutahiseza luwewe, kakuli halina kusutelela ku wena.” (Isa. 54:​13, 14) Nihaiba Satani kasibili, yena “mulimu wa lifasi le,” haana maata a kuyemisa musebezi wa kuluta batu obaeza batu ba Mulimu. (2 Makor. 4:4) Bulapeli bwa niti bukutisizwe sinca mi habuna kusilafazwa nikamuta. Bukazwelapili kubateñi kuya kuile. Hakuna silwaniso sesiezelizwe luna sesika konda!

 KI LIKA MAÑI ZEKAEZAHALA?

11. Ki lika mañi zelukolwisa kuli ba lingu zeñwi habana kuyubekiwa Bakreste babatozizwe hase baangezwi kwa lihalimu?

¹¹ Ki lika mañi zekaezahala Bakreste babatozizwe habaka angelwa kwa lihalimu? Muhupule kuli Jesu ki yena Mulisanaa luna. Ki yena toho ya puteho ya Sikreste. Jesu naabulezi ka kuutwahala kuli: “Mueteleli wamina ki alimuñwi, yena Kreste.” (Mat. 23:10) Mulenaa luna yabusa haana kupalelwa kueza musebezi wahae. Balateleli ba Kreste fa lifasi habana kutokwa kusaba sesiñwi kakuli ki yena yabaetelela. Niti kikuli, haluzibi litaba kaufela ka za mo Kreste akaetelela batu bahae ka nako yeo. Kacwalo, halunyakisiseñi mitala isikai ya mwa Bibele yekona kulutusa kuba ni buikolwiso.

12. Jehova naatusize cwañi batu bahae (a) hamulaho wa lifu la Mushe? (b) Elia hasaafilwe musebezi usili? (Mubone ni siswaniso.)

¹² Mushe naashwile pili Maisilaele basika kena kale mwa Naha ya Sepiso. Ki lika mañi zeneezahezi kwa batu ba Mulimu? Kana Jehova naatuhezi kutusa batu bahae hamulaho wa lifu la mutangaa hae yanaasepahala yo. Batili. Jehova naazwezipili kubatusa hane bazwezipili kusepahala. Pili Mushe asika shwa kale, Jehova naamubulelezi kuketa Joshua kuli aetelela sicaba. Mushe naalutile Joshua musebezi ka lilimo zeñata. (Exo. 33:11; Deut. 34:9) Kutuha fo, nekunani baana babañwi babasepahala bane baetelela, ili bazamaisi ba litopa za masole ba 1,000, ba 100, ba 50, mane ni balishumi. (Deut. 1:15) Batu ba Mulimu nebababalezwi hande. Nekubile cwalo ni mwa linako za Elia. Naabelekile ka taata ka nako yetelele kuli atuse Maisilaele kulapela Jehova ka nzila yelukile. Kono hasamulaho, Jehova naamufile musebezi usili kwa mboela wa Juda. (2 Mal. 2:1; 2 Makol. 21:12) Kana batu babasepahala ba mwa mubuso wa Isilaele wa masika alishumi nebayubekilwe? Batili. Elia naalutile Elisha musebezi ka lilimo zeñata. Hape nekunani “bana ba bapolofita,” ili bane balutilwe misebezi yemiñwi. (2 Mal. 2:7) Kacwalo, nekunani baana babasepahala babañata bane bakatusa mwa musebezi wa kuetelela batu ba Mulimu. Jehova naazwezipili kupeta mulelo wahae, mi naababalezi batanga bahae babasepahala.

13. Ki buikolwiso mañi bolufumana kwa Maheberu 13:5b? (Mubone ni siswaniso.)

¹³ Hamulaho wa kunyakisisa mitala ye, munahana kuli ki lika mañi zekaezahala Bakreste babatozizwe kaufela hase baangezwi kwa lihalimu? Halutokwi kubilaela. Bibele ilutusa kuba ni buikolwiso ka kulutaluseza taba ya niti ye, yeli: Jehova haana kuyubeka batu bahae fa lifasi  nikamuta. (Mubale Maheberu 13:5b.) Ka kuswana ni Mushe ni Elia, sikwatanyana sa Bakreste babatozizwe babaetelela kacenu, bautwisisa butokwa bwa kuluta babañwi misebezi. Ka lilimo zeñata, mizwale ba mwa Sitopa Sesietelela balutile baana babañwi mwahalaa ba lingu zeñwi kuli bakone kuetelela batu ba Mulimu. Ka mutala, baonga-ongile likolo zeñata kuli balute baana-bahulu, baokameli ba mupotoloho, mizwale ba mwa Tutengo Twa Mutai, baokameli fa Betele, ni babañwi cwalo. Mizwale ba mwa Sitopa Sesietelela balutile batusi ba mwa tutengo totushutana-shutana twa Sitopa Sesietelela. Ka nako ya cwale, batusi bao bapeta misebezi yemiñata mwa kopano ka busepahali. Baitukiselize kuzwelapili kueza musebezi wa kubabalela lingu za Kreste.

14. Ki sifi sisupo sesituna seluitutile mwa tuto ye?

¹⁴ Ki se sisupo sesituna seluitutile mwa tuto yaluna: Bakreste babatozizwe babasali fa lifasi habaka angelwa kwa lihalimu ibato ba kwa mafelelezo a ñalelwa yetuna, batanga ba Jehova fa lifasi bakazwelapili kumusebeleza ka busepahali. Lwaitumela kwa ketelelo ya Jesu Kreste, kakuli ki yona yekatahisa kuli kube cwalo. Ki niti kuli ka nako yeo lukalwaniswa ki Gogo wa kwa Magogo, ili linaha zekaswalisana hamoho. (Ezek. 38:​18-20) Kono kusina taba ni twaniso yeo yekaba teñi ka nakonyana, batanga ba Jehova bakazwelapili kumusebeleza. Kusina kukakanya, uka balamulela! Mwa pono, muapositola Joani naaboni “buñata bobutuna bwa batu” ba lingu zeñwi za Kreste. Joani naataluselizwe kuli “buñata bobutuna bwa batu” bao, kaufelaa bona bazwa “mwa ñalelwa yetuna.” (Sin. 7:​9, 14) Kacwalo, lunani buikolwiso bwa kuli Jehova uka basileleza!

15-16. Ka kuya ka Sinulo 17:​14, ki lika mañi zebaka eza Bakreste babatozizwe ka nako ya ndwa ya Armagedoni, mi ki kabakalañi taba yeo haisusueza?

¹⁵ Niteñi, babañwi bakona kuipuza kuli: ‘Ki musebezi mañi obaka eza Bakreste babatozizwe hase baile kwa lihalimu?’ Bibele ialaba puzo yeo ka kunonga. Ibonisa kuli mibuso ya lifasi le ‘ikalwana ni Ngunyana.’ Kono mibuso yeo ikatulwa. Lubala kuli: “Ngunyana uka batula.” Mi ki bo mañi babaka mutusa? Lufumana kalabo mwa timana yeswana. Ki “bababizizwe,” “babaketilwe,” ni “babasepahala.”  (Mubale Sinulo 17:14.) Ki bo mañi ona bao? Ki Bakreste babatozizwe babaangezwi kwa lihalimu! Kacwalo, Bakreste babatozizwe babasali fa lifasi hase baangezwi kwa lihalimu ibato ba kwa mafelelezo a ñalelwa yetuna, omuñwi wa misebezi yapili yebaka eza ki kulwana. Wo ki musebezi omutuna luli! Bakreste babatozizwe babañwi neli balwani pili basikaba kale Lipaki za Jehova. Babañwi mane neli masole. Kono hasamulaho baba Bakreste ba niti mi baituta mwa kupilisanela ka kozo ni babañwi. (Magal. 5:22; 2 Mates. 3:16) Nebatuhezi kuikenya mwa lindwa. Nihakulicwalo, hase baangezwi kwa lihalimu, bakatusana ni Kreste ni mangeloi akenile, kulwanisa lila za Mulimu mwa ndwa ya mafelelezo.

¹⁶ Munahane feela taba yeo! Bakreste babatozizwe babañwi babasali fa lifasi ki basupali, mane habasana hande maata. Kono hase baangezwi kwa lihalimu, bakaba ni maata ni kuba libupiwa za moya zesashwi, mi bakafiwa musebezi wa kulwana hamoho ni Mulena Yali Ndwalume, yena Jesu Kreste. Hamulaho wa ndwa ya Armagedoni, bakasebelisana ni Jesu kutusa batu kuba babapetahalile. Kusina kukakanya, Bakreste babatozizwe hase baangezwi kwa lihalimu, bakatusa hahulu mizwale ni likaizeli babona fa lifasi kufita mone baezelize hane bali fa lifasi!

17. Luziba cwañi kuli batanga ba Mulimu kaufela bakasilelezwa ka nako ya ndwa ya Armagedoni?

¹⁷ Kana muba lingu zeñwi? Haiba ki cwalo, ki lika mañi zemuka tokwa kueza ndwa ya butokwa hahulu ya Armagedoni haika kalisa? Musepe Jehova, ni kulatelela ketelelo yahae. Kueza cwalo kukona kuamañi? Bibele ilutaluseza manzwi aomba-omba a, ali: “Mukene mwa mizuzu yamina ya mwahali, mi hamukena, mukwale likwalo zamina. Muipate ka nakonyana kufitela buhali bufela.” (Isa. 26:20) Batanga ba Mulimu kaufela babasepahala, kwa lihalimu ni fa lifasi, bakasilelezwa ka nako yeo. Ka kuswana ni muapositola Paulusi, lukozwi kuli nihaiba “mibuso kamba lika zeliteñi cwale kamba zesataha . . . halina kulukauhanya kwa lilato la Mulimu.” (Maro. 8:​38, 39) Kamita muhupulange taba ye: Jehova wamilata, mi haana kumiyubeka nikamuta!