1. Ndîba kayi diaya bela manyi bonso mu diulu?

 KUKADI bidimu bia bungi bidi bantu ba Yehowa badiebeje ne: ‘Bela manyi ba ndekelu nebaye mu diulu dîba kayi?’ Kumpala tuvua tuela meji ne: bamue bela manyi nebashale pa buloba mu Mparadizu bua tshikondo kampanda panyima pa mvita ya Armagedone. Kadi tuakalonga mu Tshibumba tshia Nsentedi tshia dia 15/7/2013 ne: bela manyi bonso nebaye mu diulu kumpala kua mvita ya Armagedone kutuadija.—Mat. 24:31.

2. Ndukonko kayi ludi mua kujuka? Netukonkonone tshinyi mu tshiena-bualu etshi?

² Kadi lukonko elu ludi lujuka: Ntshinyi tshiafikila “mikoko mikuabu” ya Kristo ikala ne lulamatu kudi Yehowa mu “dikenga dinene?” (Yone 10:16; Mat. 24:21) Lelu, bamue badi mua kusamisha mutu ne: paya bela manyi bonso mu diulu nebadimone kabayi ne tshia kuenza ne balekelela. Tukonkononayi bilejilu bibidi bia mu Bible bidi mua kuikala bibaluila mu lungenyi. Pashishe, netukonkonone malu adi atusaka bua kubenga kusamisha mutu.

TSHIKALA KATSHIYI MUA KUENZEKA

3-4. Bamue badi mua kuikala badiebeja tshinyi? Bua tshinyi?

³ Bamue badi mua kuikala badiebeja bikala mikoko mikuabu mua kulekela Yehowa pikala bela manyi bonso ba mu Kasumbu kaludiki baye mu diulu. Pamuapa kudi malu a mu Bible adi atuluila mu lungenyi adi atusaka bua kumvua buôwa. Tuakulayi bua bilejilu bibidi. Tshia kumpala ntshia muakuidi munene Yehoyada. Uvua muena mudimu wa Nzambi wa lulamatu. Yeye ne mukajende Yehoshabata bakakuba Yoasha patshivuaye muana, kumuambuluishabu bua alue mukalenge muimpe wa lulamatu.  Too ne pakavua Yehoyada mununu, Yoasha uvua wenza malu mimpe. Kadi pakafuaye, Yoasha wakatuadija kuenza malu mabi. Wakateleja bakokeshi babi, kulekelaye Yehowa.—2 Kul. 24:2, 15-19.

⁴ Tshilejilu tshikuabu ntshia bena Kristo ba panyima pa lufu lua bapostolo. Yone ke uvua mupostolo wa ndekelu. Uvua muambuluishe bena Kristo ba bungi bua batungunuke ne kuenzela Yehowa mudimu ne lulamatu. (3 Yone 4) Yeye ne bapostolo bakuabu ba Yezu ba lulamatu bavua baluangane bikole bua kukuba bena Kristo ku malongesha a dishima avua enda atangalaka. (1 Yone 2:18; 2 Tes. 2:7) Kadi pakafuaye, butontolodi buakatangalaka anu bu mutu mudilu utu utuka mu dîtu utangalaka. Mu bidimu biakalonda, malongesha a dishima akuabuela too ne mu tshisumbu tshia bena Kristo.

5. Ntshinyi tshitudi katuyi ne bua kuamba bua bilejilu bibidi bia mu Bible bitudi bakuile?

⁵ Bilejilu bibidi bia mu Bible ebi bidiku bileja ne: bualu bua muomumue ebu nebufikile mikoko mikuabu pikala bela manyi bonso baye mu diulu anyi? Dîba adi, bena Kristo ba lulamatu bikala pa buloba kabakutumikila malu avuabu babalongeshe anu bu Yoasha anyi? Peshi nebalue batontolodi anu bu muvua bena Kristo ba bungi benze pakafua Yone? Nansha kakese! Mbimpe tuikale batuishibue ne: paya bela manyi mu diulu, nebatabalele bantu ba mu mikoko mikuabu bimpe ne nebatungunuke ne kuenzela Yehowa mudimu. Bua tshinyi mbimpe tuetu kutuishibua nanku?

NTENDELELU MUKEZUKE KAKUNYANGUKA NANSHA

6. Netuakule mu tshikoso bua bikondo kayi bisatu?

⁶ Bua tshinyi tudi ne bua kuikala batuishibue ne: ntendelelu mukezuke kakunyanguka nansha mu bikondo bikole bidi bituindile kumpala eku? Mbua malu a mu Bible atudi balonge bua tshikondo tshitudi etshi. Tshikondo tshitudi etshi ntshishilangane bikole menemene ne tshia Isalele wa kale ne tshia bena Kristo bavua ne muoyo panyima pa lufu lua bapostolo. Tuakulayi mpindieu bua bikondo bisatu ebi: 1) tshia Isalele wa kale, 2) tshia panyima pa lufu lua bapostolo ba Yezu, ne 3) bikondo bietu ebi, mmumue ne: “bikondo bia diakajilula tshiakabidi bintu bionso.”—Bien. 3:21.

7. Bua tshinyi bantu bavua ne lulamatu mu Isalele wa kale kabavua batekete mu mikolo pavua bena Isalele bakuabu ne bakalenge batuadije kuenza malu mabi?

⁷ Tshikondo tshia Isalele wa kale. Matuku makese kumpala kua Mose kufua, wakambila bena Isalele ne: “Ndi mumanye bimpe ne: panyima pa lufu luanyi, nenuenze bushuwa malu mabi ne nenusesuke mu njila undi munutumine dîyi bua kulonda.” (Dut. 31:29) Mose wakabadimuija kabidi ne: bobu batombokele Yehowa, bavua ne bua kubakuata ku bupika. (Dut. 28:35, 36) Ke tshiakenzeka anyi? Eyowa. Pakapita nkama ya bidimu, bakalenge ba bungi bakatuadija kuenza malu mabi, kufikishabu bantu ba Nzambi ku ditendelela nzambi ya dishima. Biakafikisha Yehowa ku dibanyoka, kakutshiyi kabidi mukalenge ukokesha munkatshi muabu to. (Yeh. 21:25-27) Kadi bena Isalele bavua ne lulamatu bakapeta dikima pavuabu bamone mêyi a Mose au makumbane.—Yesh. 55:10, 11.

8. Bidiku ne bua kutukemesha bua muvua malongesha a dishima mabuele mu tshisumbu tshia bena Kristo panyima pa lufu lua bapostolo anyi? Umvuija.

⁸ Tshikondo tshia panyima pa lufu lua bapostolo ba Yezu. Bidiku bitukemesha bua muvua malongesha a dishima mabuele mu tshisumbu tshia bena Kristo panyima pa lufu lua bapostolo anyi? Tòo. Yezu ukavua muambe ne: butontolodi bua bungi buvua ne bua kujuka. (Mat. 7:21-23; 13:24-30, 36-43) Mupostolo  Paulo, mupostolo Petelo, ne mupostolo Yone, bakajadikila bantu ne: mêyi a Yezu au akavua matuadije kukumbana patshivuabu ne muoyo apu. (2 Tes. 2:3, 7; 2 Pet. 2:1; 1 Yone 2:18) Matuku makese Yone mumane kufua, bena Kristo bavua balue batontolodi bakalua bena mu Babilona munene udi nsangilu wa bitendelelu bia dishima. Nanku mêyi a Yezu au akakumbana kabidi.

9. Mmushindu kayi udi tshikondo tshitudi etshi tshishilangane ne tshia Isalele wa kale ne tshivua malongesha a dishima mabuele mu tshisumbu tshia bena Kristo panyima pa lufu lua bapostolo ba Yezu?

⁹ Tshikondo tshia “bikondo bia diakajilula tshiakabidi bintu bionso.” Tshikondo tshietu etshi ntshishilangane bikole ne tshia Isalele wa kale ne tshivua butontolodi bua bungi bujuke panyima pa lufu lua bapostolo ba Yezu. Tudi tubikila tshikondo tshitudi etshi mushindu kayi? Tutu tutshibikila ne: “matuku a ku nshikidilu” wa ndongoluelu wa malu mubi eu. (2 Tim. 3:1) Tshikondo tshikuabu tshile menemene tshiakatuadija anu mu matuku a ku nshikidilu aa. Netshitungunuke too ne pikala Bukalenge bua Masiya buvuije bantu bapuangane ne buvuije buloba Mparadizu. Tudi tubikila tshikondo atshi ne: “Bikondo bia dijadikulula tshiakabidi bintu bionso.” (Bien. 3:21) Tshikondo atshi tshiakatuadija mu 1914. Ntshinyi tshivuabu bajadikulule? Yehowa wakateka Yezu Mukalenge mu diulu, kupetaye kabidi mukokeshi udi muleji mpala wende, uvua mupianyi wa nkuasa wa bukalenge wa Davidi muntu wa lulamatu. Kadi kuvuija Yezu mukalenge ki ntshintu tshimue tshianana tshivua Yehowa mujadikulule to, bualu wakatuadija kujadikulula kabidi ntendelelu mukezuke. (Yesh. 2:2-4; Yeh. 11:17-20) Ntendelelu au neanyangukaku kabidi anyi?

10. a) Ntshinyi tshikavua Bible muambe bua ntendelelu mukezuke udiku lelu? (Yeshaya 54:17) b) Bua tshinyi mêyi a buprofete aa adi atukolesha?

¹⁰ Bala Yeshaya 54:17. Ela meji a dîyi dia buprofete edi: “Tshia mvita tshionso tshienza bua kukuluisha natshi katshiakutshimuna to!” Mêyi aa adi enda akumbana lelu. Mêyi adi akolesha adi alonda aa adi akumbana kabidi tshikondo tshietu etshi: “Bana bebe ba balume bonso nebalongeshibue kudi Yehowa, ne ditalala dia bana bebe ba balume nedikale divule. Nebakujadike bikole mu buakane. . . . Kuakutshina tshintu ne kuakuikala ne tshintu tshidi tshikuzakeja, bualu katshiakusemena pabuipi nebe to.” (Yesh. 54:13, 14) Nansha Satana, “nzambi wa ndongoluelu wa malu eu” kena ne bukole bua kuimanyika mudimu wa dilongeshangana udi bantu ba Yehowa benza to.  (2 Kol. 4:4) Bakadi bajadikulule ntendelelu mukezuke, kakunyanguka kabidi to. Neashalaku kashidi ne tshiendelele. Tshia mvita tshionso tshienza bua kutuluisha natshi katshiatutshimuna to!

NTSHINYI TSHIENZEKA?

11. Ntshinyi tshidi tshitujadikila ne: Yezu kakushiya bena mu musumba munene balekelela paya bela manyi mu diulu?

¹¹ Ntshinyi tshienzeka paya bela manyi mu diulu? Vuluka ne: Yezu ke mulami wetu. Yeye ke mfumu wa tshisumbu tshia bena Kristo. Wakamba patoke ne: “Mulombodi wenu udi anu umue, Kristo.” (Mat. 23:10) Mukalenge wetu udi ukokesha mu diulu eu kakupanga kukumbaja mudimu wende to. Bu mudibi ne: Kristo ke udi ukokesha, bayidi bende kabena ne tshia kutshinyina to. Kadi katuena bamanye kalu ne kalu konso ka muikala Kristo mua kulombola bantu bende tshikondo atshi to. Tumonayi malu a mu Bible adi aleja ne: katuakuikala ne tshia kutshinyina to.

12. Mmunyi muvua Yehowa mutabalele batendeledi bende a) pakavua Mose mufue? b) pakavuabu bapeshe Eliya mudimu muaba mukuabu? (Tangila kabidi tshimfuanyi.)

¹² Mose wakafua kumpala kua bena Isalele kubuela mu Buloba Bulaya. Ntshinyi tshiakabafikila? Bakashala balekelela anyi? Tòo. Yehowa uvua ubatabalela misangu yonso ivuabu bashala ne lulamatu kudiye. Kumpala kua Mose kufua, Yehowa wakamuambila bua ateke Yoshua mulombodi wabu. Mose wakamulongesha mudimu munkatshi mua bidimu bia bungi. (Ekes. 33:11; Dut. 34:9) Kupita apu, kuvua bantu balume bakuabu bakumbane bavua balombola. Bavua bamfumu ba bantu tshinunu tshinunu, ba bantu lukama lukama, ba bantu makumi atanu makumi atanu, too ne ba bantu dikumi dikumi. (Dut. 1:15) Bavua batabalela bantu ba Nzambi bimpe. Ke muvuabi kabidi bua Eliya. Wakambuluisha bena Isalele munkatshi mua bidimu bia bungi bua batendelele Yehowa. Kadi tshikondo tshikuabu, Yehowa wakamupesha mudimu ku sud kua Yuda. (2 Bak. 2:1; 2 Kul. 21:12) Bantu ba Nzambi ba lulamatu ba mu bisa dikumi bia bukalenge bua Isalele bavua bashale balekelela anyi? Tòo. Eliya ukavua mulongeshe Elisha mudimu munkatshi mua bidimu bia bungi. Kuvua kabidi ‘bana ba baprofete’ bavuabu balongeshe mudimu. (2 Bak. 2:7) Nanku, kuvua balume ba lulamatu ba bungi bakumbane bavua balombola bantu ba Nzambi. Malu avua Yehowa mulongolole avua enda akumbana ne wakatabalela batendeledi bende.

13. Ebelu 13:5b udi utujadikila tshinyi? (Tangila kabidi tshimfuanyi.)

 ¹³ Ne bilejilu ebi mu lungenyi, udi wela meji ne: ntshinyi tshienzeka paya bela manyi mu diulu? Kakuena tshia kusamishila mutu to. Bualu Bible udi utujadikila ne: Yehowa kakulekela bantu bende badi pa buloba nansha kakese. (Bala Ebelu 13:5b.) Anu bu Mose ne Eliya, kasumbu kakese ka bela manyi badi balombola bantu ba Nzambi lelu nkamanye mudibi ne mushinga bua kulongesha bakuabu mudimu. Kukadi bidimu bia bungi bidi bena mu Kasumbu kaludiki balongesha bantu balume ba mu mikoko mikuabu mua kulombola bantu ba Nzambi. Tshilejilu, mbalongolole tusala tua bakulu, tua batangidi ba bijengu, tua bena mu Komite ya filiale, tua batangidi ba midimu ku Betele, ne tua bantu bakuabu. Bena mu Kasumbu kaludiki badi balongesha bambuluishi ba mu komite mishilashilangane ya Kasumbu kaludiki mudimu. Bambuluishi aba badi bakumbaja midimu minene mu bulongolodi bua Yehowa. Bakadi badipaye bua kutungunuka ne kutabalela mikoko ya Kristo.

14. Mbualu kayi bunene butudi tuakuila?

¹⁴ Monayi bualu bunene butudi tuakuila mu tshiena-bualu etshi: paya bela manyi bonso mu diulu katupa kakese kumpala kua dikenga dinene kujika, ntendelelu mukezuke neikale anuku. Ku diambuluisha dia bukokeshi bua Yezu, batendeledi ba Nzambi kabakupangila tshintu nansha tshimue to. Tshia kumanya tshidi ne: dîba adi, bisamba bidisange bidibu babikila ne: Goga wa ku Magoga nebitubunde. (Yeh. 38:18-20) Kadi nansha muatubundabi bua tshitupa tshîpi, kabiakututshimuna to. Kabiakupangisha bantu ba Nzambi bua kumutendelela to. Yehowa neapandishe bantu bende! Mupostolo Yone wakamona mu tshikena kumona “musumba munene” wa mikoko mikuabu ya Kristo. Kumuambilabu ne: “musumba munene” eu udi ufuma “mu dikenga dinene.” (Buak. 7:9, 14) Bushuwa, nebikale mu bukubi!

15-16. Bilondeshile Buakabuluibua 17:14, ntshinyi tshienza bela manyi mu mvita ya Armagedone? Bua tshinyi kumanya tshienzabu atshi kudi kutukolesha?

¹⁵ Bamue badi mua kudiebeja ne: ‘Ntshinyi tshiafikila bela manyi? Ntshinyi tshiayabu  kuenza mu diulu?’ Bible udi wandamuna nkonko eyi bimpe. Udi uleja ne: mbulamatadi ya mu bulongolodi ebu ‘neyiluangane ne Muana wa mukoko.’ Kadi kayakuela diapa muulu to. Bible udi wamba ne: “Muana wa mukoko neabatshimune.” Mbanganyi bamuambuluisha? Udi wandamuna ne: “Babikidibue,” “basungula,” ne “bena lulamatu.” (Bala Buakabuluibua 17:14.) Mbanganyi abu? Mbela manyi babishibua ku lufu! Paya bela manyi ba ndekelu mu diulu katupa kakese kumpala kua dikenga dinene kujika, mudimu wa kumpala wenzabu ngua kuluangana mvita. Atshi netshikale mudimu wa dikema! Bamue bela manyi bavua baluanganyi ba mvita kumpala kua kuluabu Bantemu ba Yehowa. Bakuabu bavua mene basalayi. Kadi pakaluabu bena Kristo balelela, bakalonga mua kusomba mu ditalala ne bakuabu. (Gal. 5:22; 2 Tes. 3:16) Bakalekela mvita. Kadi payabu mu diulu, nebadisange ne Kristo ne banjelu ba tshijila bua kuela bena lukuna ba Nzambi mvita ya ndekelu.

¹⁶ Elabi meji bua bualu ebu. Bamue bela manyi bakadi bakulakaje, kabatshiyi ne bukole. Kadi payabu mu diulu, nebikale bifukibua bia mu nyuma bia bukole bua bungi bidi kabiyi mua kufua to. Nebaluangane mvita ku luseke lua Yezu Kristo, Mukalenge wabu muluanganyi wa mvita. Pajika mvita ya Armagedone, nebenze kabidi mudimu wa divuija bantu bapuangane. Nebenzele bena Kristo ba pa buloba malu mimpe a bungi kupita muvuabu mua kubenzelawu patshivuabu pa buloba!

17. Ntshinyi tshidi tshitujadikila ne: batendeledi ba Nzambi bonso nebikale mu bukubi mu mvita ya Armagedone?

¹⁷ Udi wa mu mikoko mikuabu anyi? Nebikengele wenze tshinyi patuadija mvita ya Armagedone? Nebikengele ne: weyemene Yehowa ne ulonde buludiki buende. Kuenza nanku pamuapa nekulombe tshinyi? Bible udi utukankamija ne: “Buelayi mu nzubu yenu ya munda, ne kangayi biibi panyima penu. Sokomayi bua mutantshi mukese too ne padi tshiji tshikole tshipita.” (Yesh. 26:20) Batendeledi ba Nzambi bonso ba lulamatu, badi mu diulu ne pa buloba, nebikale mu bukubi tshikondo atshi. Tudi batuishibue petu anu bu mupostolo Paulo ne: ‘ni mmbulamatadi, ni mmalu a mpindieu, ni mmalu atshilualua, . . . kaena mua kutupandulula ku dinanga dia Nzambi’ nansha. (Lomo 8:38, 39) Ikala anu uvuluka ne: Yehowa mmukunange, kakukulekela nansha kakese!