1. Mpinjinyi yakayawu awayishewa ejima mwiwulu?

 KUNYIMA, antu jaYehova adihwileña nawu, ‘Mpinjinyi akaKristu awayishewa ashalahu yakayawu mwiwulu?’ Mpinji yimu twatoñojokeleña netu hadaha akaKristu awayishewa amakwawu akashala hanu hamaseki muParadisa hakapinji kantesha hanyima yanjita yaAmagedoni. Ilaña muKaposhi Kakutalila kaJuly 15, 2013, twadizili netu awayishewa ejima achidi hamaseki akayitwala mwiwulu henohu njita yaAmagedoni kanda yitachiki.—Mat. 24:31.

2. Lwihwinyi lutunateli kudihula, nawa yumanyi yitukuhanjekahu muchinu chibaaba?

² Hela chochu, tunateli kudihula netu: Chumanyi chikamwekana kudi “anyikoku amakwawu” aKristu akamukalakelaña Yehova nakashinshi hamaseki mumpinji ‘yalukadi lwasweja’? (Yow. 10:16; Mat. 24:21) Antu amakwawu makonu anateli kwakama nawu akatiya neyi anajimbelimu hela anayishiyi chisayikila neyi amanakwawu niahela awayishewa akeñawu anayitwali dehi mwiwulu. Tuhanjekenu hayuma yiyedi yamwekeni yashimunawu muNsona yinateli kuyiletesha atoñojoki muniyi njila. Kuhiñahu tukuhanjeka hayuma yimu yikuyiletesha abuleña kwakama.

YUMANYI YAKABULA KUMWEKANA?

3-4. Antu amakwawu anateli kwakama nawudi, nawa muloñadi?

³ Antu amakwawu anateli kwakama neyi chakwila awa anyikoku amakwawu akaleka kumukalakela Yehova neyi hiyadi cheñi nawamanakwawu awayishewa aMwizanvu Dalombolaña kulonda ayilomboleñaku. Hadaha yuma yikwawu yamwekeni yashimunawu muNsona diyaleteshaña akameña. Tuhanjekenu hayakutalilahu yiyedi. Chakutalilahu chatachi chinakuhosha hadi Kapristu Muneni Yehoyada. Wadiña kambuña aNzambi washinshika. Yena niñodindi Yehoshabeyati, akiñili kansi weyala wejina daYehowashi nawa amukwashili kwikala muntu wamuwahi nawa mwanta washinshika. Henohu kashinakaji Yehoyada kanda afwi, Yehowashi  watwalekelihu kudifukula kudi Yehova nawa welileña yuma yayiwahi. Ilaña hanyima yakwila Yehoyada nafwi dehi, hashimbwili wanyi Yehowashi watachikili kwila yuma yatama. Watachikili kutiyilila mwamulejeleñawu kudi ayilolu atama nawa walekeli kumukalakela Yehova.—2 Kushi. 24:​2, 15-19.

⁴ Chakutalilahu chamuchiyedi chinakuhosha hadi akaKristu adiñaku hanyima yakwila apostolu anafwi dehi. Kapostolu Yowanu, wadiña kapostolu wakukumishaku, wakwashili akaKristu amavulu nankashi kuumika hampinji yamukalakeleleñawu Yehova. (3 Yow. 4) Yowanu hamu nawapostolu amakwawu aYesu ashinshika, azatilili hamu hampinji yayilehi hakukañesha kasekesha kadiña nakutaanda. (1 Yow. 2:18; 2 Tes. 2:7) Hela chochu, chafwiliyi Yowanu, kasekesha kataandili neyi kesi. Muyaaka yantesha hohu yahitilihu, chipompelu chawakaKristu chatamisheweli nantañishilu yakutwamba.

5. Twatela kutondolwela kukunkulula netudi kutalisha haniyi yakutalilahu yiyedi?

⁵ Komana iyi yakutalilahu yiyedi yamuNsona yamwekeni yinakumwekesha nawu dichuma chochimu chakamwekena anyikoku amakwawu aKristu neyi awayishewa anayitwali dehi mwiwulu? Hayina mpinji, komana akaKristu ashinshika akekala hamaseki, akaleka kulondela yuma yadiziliwu neyi cheliliyi Yehowashi indi kwiji akekala akakusekesha, neyi chelili akaKristu amavulu adiñaku hanyima yakwila apostolu anafwi dehi? Ñakwilu yidi yakwila nawu chuma chamuchidiwu chakamwekana wanyi! Twatela kukuhwelela netu neyi awayishewa anafumi dehi hamaseki, anyikoku amakwawu akayakamenaña chiwahi nawa akapaminañaku kuspiritu. Yumanyi yikuletesha tukuhweleli muniyi njila?

KUDIFUKULA KWALALA KWAKATAMISHEWA NANTAÑISHILU YAKUTWAMBA WANYI

6. Mpinjinyi jisatu jitukuhanjekahu chanti?

⁶ Muloñadi wutukukuhwelela netu kudifukula kwalala kwakatamishewa nantañishilu yakutwamba wanyi nimumpinji jakala jidi hambidi? Muloña wayuma yitwadiza muBayibolu yahosha hampinji yitunakushakamamu. Ayinu mpinji yaambukaku chikupu nampinji yawaIsarela akushankulu ninampinji yawakaKristu adiñaku hanyima yakwila apostolu anafwi dehi. Dichi tushinshikenu haniji njila jisatu: (1) Mpinji yawaIsarela akushankulu, (2) mpinji yakwila apostolu anafwi dehi, (3) niayinu mpinji yitunakushakamamu, “[mpinji] yakufuntisha yuma yejima.”—Yilw. 3:21.

7. MuIsarela yakushankulu, muloñadi antu ashinshika chabuliliwu kuzeya chelili muza nianyanta awuyuulileña atachiki kwikala nayilwilu yatama?

⁷ Mpinji yawaIsarela akushankulu. Chadiñayi kwakwihi nakufwa, Mosi wayilejeli aIsarela nindi: “Neluki chikupu nami hanyima yakufwa kwami, chakadi nikujina mwakakoñaña yuma yatama nakusenuka nakufuma munjila yinnayileji.” (Kuhit. 31:29) Mosi wasoñamishili cheñi nindi neyi aIsarela adikaña, muza akawutwala muwunkoli. (Kuhit. 28:​35, 36) Komana awa mazu ashikijeweli? Eña. Hadi yaaka yayivulu, anyanta amavulu akoñeleña yuma yatama nawa akojejeli antu jaNzambi kusenuka. Chumichi chaletesheli Yehova ayibabeshi antu jindi adiña nayilwilu yatama nawa hetejeli anyanta jaIsarela kutwalekahu kuyuula cheñiku. (Ezek. 21:​25-27) Ilaña aIsarela ashinshika ahamukili hampinji yamweniwu nawu mwahosheliyi Nzambi munashikijewi.—Isa. 55:​10, 11.

8. Komana tunateli kuhayama hakwiluka netu chipompelu chawakaKristu chekaliliku hanyima yakufwa kwawapostolu chatamisheweli nantañishilu yakutwamba? Lumbululenu.

⁸ Mpinji yakwila apostolu anafwi dehi. Komana tunateli kuhayama hakwiluka netu chipompelu chawakaKristu chekaliliku hanyima yakufwa kwawapostolu chatamisheweli nantañishilu yakutwamba? Inehi. Yesu washimwineñahu dehi nindi ntañishilu yawakakusekesha yakavula nankashi. (Mat. 7:​21-23; 13:​24-30, 36-43) Awa apostolu asatu Pawulu, Petulu niYowanu, ejima  wawu etejeli nawu wuprofwetu waYesu watachikili dehi kushikijewa mumafuku awapostolu. (2 Tes. 2:​3, 7; 2 Pet. 2:1; 1 Yow. 2:18) Chafwiliwu apostolu, chipompelu chawakaKristu chenzeli nantañishilu yakutwamba. Ntañishilu yawakaKristu akakusekesha yatachikili nawa ayilemesheli nankashi muntañishilu yaBabiloni Muneni, wanta wakaayi wakudifukula kwakutwamba. Cheñi haniyi mpinji, wuprofwetu waYesu washikijeweli.

9. Mpinji yitunakushakamamu yaambukaku ñahi nampinji yawaIsarela akushankulu ninachipompelu chawakaKristu chekaliliku hanyima yakufwa kwawapostolu?

⁹ “[Mpinji] yakufuntisha yuma yejima.” Mpinji yitunakushakamamu yaambukaku nampinji yawaIsarela akushankulu ninampinji yaswejeli ntañishilu yawakakusekesha yatachikili hanyima yakufwa kwawapostolu. Ayinu mpinji yitunakushakamamu ayitenaña nawu mpinjinyi? Twavula kuyitena netu “[mafuku] akukuminina” anshakaminu yamakonu yatama. (2 Tim. 3:1) Ilaña Bayibolu yamwekeshaña nawu mpinji yalema nawa yayilehi yatachikili hatachikili mafuku akukuminina. Yikatwalekahu kushika nimpinji Wanta wawuMesiya yiwakelisha antu kwikala awanina nikubalumuna iseki kwikala paradisa. Iyi mpinji ayitenaña nawu “[mpinji] yakufuntisha yuma yejima.” (Yilw. 3:21) Iyi mpinji yatachikili mu 1914. Hanu dinu yumanyi yafuntishiliwu? Yesu amwilishili kwikala Mwanta mwiwulu. Dichi Yehova wekalili cheñi nanyuuli wakumwimenaku, nswana yaMwanta washinshika Davidi. Hela chochu, iwu Wanta hidichuma hohu chafuntishiliyi Yehovaku. Hashimbwili wanyi, kudifukula kwalala nikwena atachikili kukufuntisha! (Isa. 2:​2-4; Ezek. 11:​17-20) Komana kwakatamishewa cheñi?

10. (a) Bayibolu yashimwineñahu dehi nawudi kutalisha hakudifukula kwalala muyinu mpinji yitunakushakamamu? (Isaya 54:17) (b) Muloñadi wuprofwetu wamuchidiwu chiwunakutukoleshela?

¹⁰ Tañenu Isaya 54:17. Toñojokenu haniwu wuprofwetu wahosha nawu: “Kwosi chitwa chanjita chakachilawu nawu akukatishi nachu chakazatika hela hantiku”! Awa mazu onenewa anakushikijewa makonu. Mazu akukundeja analondelihu niwena anakushikijewa muyinu mpinji yitunakushakamamu, akwila nawu: “Anyaneyi ejima akayidizisha kudi Yehova, nawa kuwunda kwawanyaneyi kwakasweja nankashi. Akakukolesha chikupu mukuloña. . . . Kwosi chuma chiwakatiya woma hela chikakufwisha mutentuku, muloña hichakenza kwakwihi naneyiku.” (Isa. 54:​13, 14) “[Ninzambi] wanshakaminu yamakonu” hakweti ñovu yakukañesha mudimu wunakuzatawu antu jaYehova wakudizisha antu hadi Yehovaku. (2 Kor. 4:4) Kudifukula kwalala anakufuntishi dehi, nawa hikwakatamishewahu cheñi nantañishilu yakutwambaku. Kwakatwalekahu  haya nyaaka nanyaaka. Kwosi chitwa chanjita chakachilawu nawu atukatishi nachu chakazatikaku!

YUMANYI YAKAMWEKANA?

11. Chumanyi chatuleteshaña kukuhwelela chikupu netu izaza deneni hiyakadishiya chisayikila neyi awayishewa anayi dehi mwiwuluku?

¹¹ Yumanyi yakamwekana neyi awayishewa anayitwali dehi mwiwulu? Anukenu nenu, Yesu diyi Kabiña ketu. Diyi mutu wachipompelu chawakaKristu. Yesu wahosheli hatooka nindi: “Nlomboli yenu wumu hohu, yowu Kristu.” (Mat. 23:10) Mwanta wetu wunakuyuula hakakañanya kuzata mudimu windi. Chineli Kristu diyi wunakuyuula, akakumulondela hanu hamaseki hiyakatiya woma chuma chidi chejimaku. Hela chochu, hituneluki wunsahu wejima kutalisha hachakalombolañayi Kristu antu jindi hayina mpinjiku. Dichi tuhanjekenu hayuma yimu yashimunawu muBayibolu yinateli kutukolesha.

12. Yehova wayakameneni ñahi antu jindi (a) hanyima yakwila Mosi nafwi dehi? (b) hanyima yakwila Elija natambwili dehi mudimu wacheñi? (Talenu cheñi mwevulu.)

¹² Henohu aIsarela kanda eñili Mwituña daChikaninu, Mosi wafwili. Chumanyi chamwekeni kudi antu jaNzambi? Chakadi ona iyala washinshika, komana ashalili nakululuta? Inehi. Chakala hohu atwalekahu kwikala ashinshika, Yehova wayakameneneña. Henohu Mosi kanda afwi, Yehova wamulejeli nindi amutondi Yoshuwa kulonda alomboleña antu. Haniyi mpinji, Mosi wadiña wamudizisha dehi Yoshuwa hadi yaaka yayivulu. (Kwid. 33:11; Kuhit. 34:9) Kubombelahu, kwadiña antu amakwawu ashikahu adiña nakulombola, antwamina amakombakaji, antwamina ajinkulakaji, antwamina amakumi atanu kushilahu niantwamina amakumi. (Kuhit. 1:15) Antu jaNzambi adiña nakuyakamena chiwahi. Dichamwekeni nimumpinji yadiñaku Elija. Diwadiña nakutwaminina kudifukula kwalala hakachi kawaIsarela hadi yaaka yayivulu. Mukuhita kwampinji, Yehova wamutemesheli kuya nakuzata mudimu wacheñi, kukabeta kakuchidiilu muYuda. (2 Anya. 2:1; 2 Kushi. 21:12) Komana antu ashinshika adiña muwanta wanyitaña 10 waIsarela ayishili chisayikila? Inehi. Haniyi mpinji Elija wadiña wamudizisha dehi Elisha hadi yaaka yayivulu. Kwadiña cheñi “anyana kawatuprofwetu awamayala,” adizishileñawu. (2 Anya. 2:7) Dichi kwadiña amayala amavulu ashinshika adiña nakwakamena antu jaNzambi. Yehova watwalekelihu kushikija nkeñelu yindi, nawa wakameneneña akakudifukula indi ashinshika.

13. Mazwinyi akukolesha itwawanaña haAHeberu 13:5b? (Talenu cheñi mwevulu.)

¹³ Kwesekeja naniyi nsañu yitunahanjekihu, munakutoñojoka nenu chumanyi chakamwekana neyi awayishewa akukumishaku anayitwali  dehi mwiwulu? Hitwatela kwakamaku. Bayibolu yashimuna chalala chaswayi kutiya nawa chatukoleshaña nawu: Yehova hamba kashiya chisayikila antu jindi hanu hamasekiku. (Tañenu AHeberu 13:5b.) Kufwana aMosi naElija, izanvu danyanya dawakaKristu awayishewa alombolaña makonu eluka chichalemena kudizisha amakwawu. Kufuma tuhu kunyima, amanakwetu aMwizanvu Dalombolaña adizishaña amanakwetu adi hakachi kawanyikoku amakwawu chakulombola. Chakutalilahu, aloñeshaku mashikola mwadizishilañawu akulumpi, ankoñi endaña, amamembala amuKometi yaMutayi, akulumpi amaDipatimenti haBeteli niamakwawu. Izanvu Dalombolaña dadizishaña dadeni ankwashi Ezanvu Dalombolaña mumakometi amboka-mboka. Awa ankwashi chayinu mpinji anakuzata nakashinshi nyidimu yayivulu yamukuloñesha. Anadiloñeshi chikupu kutwalekahu kuzata nyidimu yakwakamena nyikoku yaKristu.

14. Chikumanyi chalema chitunahanjekihu muniyi nsañu?

¹⁴ Ichi dichikuma chalema haniyi nsañu yitunahanjekihu: Neyi awayishewa akukumishaku anayitwali dehi mwiwulu kwakwihi nakukuma kwalukadi lwasweja, kudifukula kwalala kwakatwalekahu hanu hamaseki. Muloña wawunlomboli waYesu Kristu, akakudifukula aNzambi hiyakakaankilahu chuma hela chimuku. Mwamweni, hayina mpinji akatulukuka kudi Gogi wakuMagogi, kudibomba kwanyuza yazuwa. (Ezek. 38:​18-20) Ilaña iku kulukuka kwakapinji kantesha kwakakañanya kwimika mushindu, hikwakakañesha antu jaNzambi kudifukula kudi Yehovaku. Chakadi nikujina, wakayipulwisha! Kapostolu Yowanu, wamweni muchimwenu “izaza deneni” dawanyikoku amakwawu aKristu. Yowanu amulejeli nawu idi “izaza deneni” “[dinafumi] mulukadi lwasweja.” (Chim. 7:​9, 14) Mwamweni, akayikiña!

15-16. Kwesekeja naChimwekeshu 17:​14, yumanyi yakelañawu awayishewa aKristu hampinji yanjita yaAmagedoni, nawa chumichi chatukoleshaña ñahi?

¹⁵ Ilaña amakwawu anateli kwihula nawu: ‘Indi awayishewa? Yumanyi yakelawu hanyima yakwila anafumi dehi heseki?’ Bayibolu yaakula ilu lwihu chakadi kuhita mumbadi. Yamwekeshaña nawu jinfulumendi jakanu kaayi “[jakazuña] njita naMwana kaMukoku.” Ilaña akayimika mushindu. Twatañaña nawu: “Mwana  kaMukoku wakayimika mushindu.” Nawa anyi akamukwashaku? Vasi yaakula ilu lwihu. Ana “atambikawu,” “atondawu” nawa “ashinshika.” (Tañenu Chimwekeshu 17:14.) Hiyanyi wenawa? Awayishewa akasañulawu! Dichi neyi awayishewa akukumishaku hanu hamaseki anayitwali dehi mwiwulu kwakwihi nakukuma kwalukadi lwasweja, mudimu watachi wakayinkawu hikuzuña. Iwu mudimu walema chikupu! Awayishewa amakwawu adiña akakuzuña henohu kanda ekali aYinsahu jaYehova. Amakwawu azatiliku nimudimu wawushidika wamukanu kaayi. Nkumininaku, ekalili akaKristu alala nawa adizili njila yakuwunda. (Ñal. 5: 22; 2 Tes. 3:16) Alekeli yuma yejima yahakwilañaku njita. Hela chochu, neyi anayi dehi mwiwulu akakalakela hamu naKristu niañelu jindi ajila, kuzuña njita yakukumishaku nawayilumbu jaNzambi.

¹⁶ Toñojokenu hachumichi! AkaKristu awayishewa amakwawu adi hanu hamaseki anashinakaji dehi nawa anazeyi. Ilaña chakayisañwilawu kuwumi wamwiwulu, akekala nañovu nawa yileñaleña yakuspiritu yakafwaña, akayinka mudimu wakuzuña hamu naMwanta Wanjita, Yesu Kristu. Hanyima yakuzuña njita yaAmagedoni, akazata mudimu wakukwasha antu kwikala awanina. Chakadi nikujina, hakekalawu mwiwulu akayilila amanakwawu niahela akeñawu akekala hanu hamaseki yuma yayivulu yayiwahi kubadika yinakuyililawu chayinu mpinji hadiwu mumujimba wawuntu wabula kuwanina!

17. Tuneluki ñahi netu ambuña aNzambi ejima akekala akiñewa hampinji yanjita yaAmagedoni?

¹⁷ Komana mudi hakachi kawanyikoku amakwawu? Hanu dinu chumanyi chimwakela neyi njita yalema yaAmagedoni yitachika? Ichi dichuma chimwakela: Kumukuhwelela Yehova nikwovwahila wunlomboli windi. Yumanyi yikwawu yinabombelimu? Bayibolu yashimuna mazu akukundeja akwila nawu: “Iñilenu mutupeka twenu twamukachi, nawa mudenzeleliku. Swamenu hakapinji kantesha sampu kuzuwa kunahiti dehi.” (Isa. 26:20) Ambuña aNzambi ashinshika ejima, mwiwulu nihamaseki akekala akiñewa haniyi mpinji. Kufwana kapostolu Pawulu, tuneluki chikupu netu hela “nfulumendi, hela yuma yidiku chayinu mpinji, hela yuma yakenza . . . hijinateli kutwambula kukukeña [kwaNzambiku].” (Rom. 8:​38, 39) Mpinji yejima anukenuña nenu: Yehova wayikeña nawa hamba kayishiya chisayikilaku!