1. En karang’o ma biro yudo ka Jokristo duto mowal osedhi e polo?

 HIGNI moko mokalo, jotich Jehova ne penjorega niya: ‘En karang’o ma biro yudo ka Jokristo duto mowal osedhi e polo?’ Nitie kinde ma ne waparoga ni moko kuom Jokristo mowal pod biro bedo e Paradiso e piny kae kuom kinde moro bang’ lweny mar Har–​Magedon. Kata kamano, e Ohinga mar Jarito ma Julai 2013, ne wapuonjore ni ka pok lweny mar Har–​Magedon ochakore, biro yudo ka Jokristo duto mowal osedhi e polo.—Mat. 24:31.

2. En penjo mane ma jomoko nyalo penjore, to wabiro nono ang’o e sulani?

² Nitie joma nyalo penjore niya: Ang’o ma biro timore ne “rombe mamoko” mag Yesu ma biro yudo ka tiyo ne Jehova e piny kae e kinde “masira maduong’”? (Joh. 10:16; Mat. 24:21) Jomoko nyalo parore nikech ok ging’eyo gima biro timorenegi, kata giparo ni inyalo jwang’gi bang’ ka owete gi nyimine mowal duto osedhi e polo. Wanon ane weche moko ariyo miwuoyoe e Muma, ma nyalo miyo gibed gi paro ma kamano. Kae to wabiro nono gimomiyo ok onego wabed gi parruok moro amora.

ANG’O MA OK BI TIMORE?

3-4. En wach mane ma nyalo chando jomoko, to nikech ang’o?

³ Jomoko nyalo paro ni nitie jotich Jehova moko ma biro weyo adiera bang’ ka owete mowal manie Bura Matayo osedhi e polo. Ginyalo bedo gi paro ma kamano nikech weche moko ariyo ma notimore e ndalo machon. Wanon ane weche ariyogo. Mokwongo otudore gi Jehoyada ma ne en  jadolo maduong’. Ne en ng’at ma noluoro Nyasaye ahinya. En kaachiel gi jaode Jehoshabeath, ne girito Jehoash ka ne pod otin, mi gikonye mobedo ruoth maber. Ka ne pod Jehoyada ngima, Jehoash notimo gik mabeyo, to ka Jehoyada notho, Jehoash nolokore mobedo ng’at marach. Noluwo paro ma jodongo maricho nong’adone, moweyo tiyo ne Jehova.—2 We. 24:2, 15-19.

⁴ Ranyisi mar ariyo en gima notimore ne Jokristo mokwongo bang’ ka joote duto nosetho. Jaote Johana e jaote ma notho mogik, kendo nokonyo ahinya Jokristo wetene mondo ginan e tij Jehova. (3 Joh. 4) Kuom kinde moko, jaote Johana kod joote mamoko nosebedo ka kedo matek gi puonj mag miriambo ma joma nong’anyo ne adiera nosebedo ka lando. (1 Joh. 2:18; ne weche ma lero 2 Jo-Thesalonika 2:7 e Study Bible.) Bang’ ka Johana nosetho, joma nong’anyogo nolandore mapiyo mana ka mach momako bungu. Mana bang’ higni machuok, kanyakla mar Jokristo nopong’ gi puonj mag miriambo.

5. En wach mane ma ok onego ochandwa bang’ nono ranyisi ariyogo?

⁵ Be weche ariyogo nyiso ni gima kamano biro timore ne rombe mamoko bang’ ka Jokristo duto mowal osedhi e polo? Dibed ni e kindego nitie Jokristo moko e piny kae ma biro baro ma we adiera, kata ma biro ng’anyo ne adiera kaka jomoko notimo bang’ tho joote? Dwoko en ooyo. Wanyalo bedo gadier ni ka Jokristo mowal duto osedhi e polo, rombe mamoko biro dhi nyime tiyo ne Jehova, kendo obiro ritogi maber. Ang’o momiyo wanyalo bedo gadiera gi wachno?

ONGE GIMA BIRO DUWO LAMO MALER

6. Gin kinde mage adek ma wabiro nono e yo machuok?

⁶ Ang’o momiyo wanyalo bedo gadier ni onge gima biro duwo lamo maler kata e kinde matek moritowa nyime? Wan gadier nikech gik ma Muma nyisowa e wi kinde ma wadakiegi. Wadak e kinde mopogore ahinya gi kinde Jo-Israel machon, kod kinde Jokristo ma nodak bang’ tho joote. Koro wanonuru ane kinde adekgi: (1) Kinde Jo-Israel machon, (2) kinde Jokristo ma nodak bang’ tho joote, kod (3) kindewagi, ma en ‘kinde mar dwoko gik moko duto obed kaka ne gin.’—Tich 3:21.

7. Ang’o momiyo Jo-Israel ma nomakore gi Jehova ne ok oweyo tiyone kata ka ruodhi kod jomamoko nong’anyone?

⁷ Kinde Jo-Israel machon. Mana matin ka pok Musa otho, nonyiso Jo-Israel niya: “Ang’eyo ni ka asetho ubiro timo gik maricho kendo ubiro wuok e yo ma asechikou ni uwuothie.” (Rap. 31:29) Bende, Musa nonyiso ogandano ni ka ging’anyo ne Nyasaye, to ne idhi tergi e tuech. (Rap. 28:35, 36) Be wechego notimore adier? Ee. Kuom higni mang’eny, ruodhi maricho ma nolocho e wi ogandano, nomiyo ging’anyo ne Jehova. Mano nomiyo Jehova oweyo ogandano, kendo noweyo ketonegi ruodhi ma ne tayogi e piny kae. (Eze. 21:25-27) Kata kamano, ka ne Jo-Israel ma nomakore gi Jehova oneno kaka wechego nochopo kare, ne gimedo makore motegno gi Jehova.—Isa. 55:10, 11.

8. Be onego okawwa gi wuoro ni puonj mag miriambo noduwo kanyakla mar Jokristo bang’ tho joote? Ler ane.

⁸ Kinde Jokristo ma nodak bang’ tho joote. Be onego okawwa gi wuoro ni lamo  madier noduwore bang’ tho joote? Ooyo. Yesu nosekoro ni puonj mag miriambo ne dhi donjo e kanyakla. (Mat. 7:21-23; 13:24-30, 36-43) Jaote Paulo, Petro, kod Johana nowacho ni gima Yesu nokorono nosechako timore e kinde Jokristo mokwongo. (2 The. 2:3, 7; 2 Pet. 2:1; 1 Joh. 2:18) Bang’ ka joote duto nosetho, puonj mag miriambo noduwo kanyakla mar Jokristo. Kwan mar joma nong’anyo ne adiera nomedore mi gibedo Babulon Maduong’, ma en dinde duto mag miriambo koriwgi kanyachiel. Mano nochopo wach ma nokor.

9. Ere kaka kinde ma wadakiegi opogore gi kinde Jo-Israel machon kod kinde Jokristo ma nodak bang’ tho joote?

⁹ ‘Kinde mar dwoko gik moko duto obed kaka ne gin.’ Kindewagi opogore ahinya gi kinde Jo-Israel machon, kod kinde ma ng’anyo maduong’ nobetie bang’ tho mar joote. Muma luongo nade kindewagi? Oluonge ni “ndalo mag giko” mar piny marachni. (2 Tim. 3:1) Kata kamano, Muma nyisowa ni nitie kinde moro makende ma nochakore riat gi kinde ma wadakiegi. Kindeno biro dhi nyime nyaka kinde ma Pinyruodh Mesia biro loko pinyni ma bed paradiso, kama dhano duto biro bedo joma kare chuth. Kindeno iluongo ni ‘kinde mar dwoko gik moko duto obed kaka ne gin.’ (Tich 3:21) Kindeno nochakore e higa mar 1914. Ang’o ma nodwok kaka ne gin? Noket Yesu mondo obed Ruoth e polo. Kuom mano, Jehova nochako bedo gi ruoth ma ne locho e loye kendo ma noa e anyuola mar Daudi. Kata kamano, mano kende ok e gima Jehova nodwoko. Bang’ ka Yesu nosebedo Ruoth, nodwok lamo maler! (Isa. 2:2-4; Eze. 11:17-20) Be ibiro duw lamo maler kendo?

10. (a) Ang’o ma Muma nokoro e wi lamo maler e kindewagi? (Isaya 54:17) (b) Ang’o momiyo weche ma nokorgo jiwowa ahinya?

¹⁰ Som Isaya 54:17. Par ane wach ma nokorni: “Gir lweny moro amora molos mondo ohinyi ok nohinyi”! Weche ma nokorgo, chopo e kindegi. Ne ane bende weche ma nokor ma hoyo chunywagi: “Yawuoti duto nopuonj gi Jehova, kendo ginibed gi kuwe mang’eny. Miseni ibiro ger e wi tim makare. . . . Ok iniluor gimoro amora kendo onge gima nobuogi, nimar ok ginisud machiegni kodi.” (Isa. 54:13, 14) Kata  mana Satan ma en “nyasach pinyni” onge gi teko mar chungo tij puonjo ji ma jotich Jehova timo e kindegi. (2 Kor. 4:4) Lamo maler osedwoki kendo ok bi duwe kendo, obiro siko nyaka chieng’. Onge gir lweny moro amora ma biro hinyowa!

ANG’O MA BIRO TIMORE?

11. Ang’o momiyo wan gadier ni ok bi jwang’ oganda mang’ongo bang’ ka Jokristo duto mowal osedhi e polo?

¹¹ Ang’o ma biro timore bang’ ka Jokristo mowal duto osedhi e polo? Par ni Yesu e Jakwadhwa. En e wi kanyakla mar Jokristo. Bende, en owuon nowacho niya: “Jatendu en achiel, ma en Kristo.” (Mat. 23:10) Ruodhwa biro dhi nyime rito jolupne madier. Onge gimoro amora monego omiwa luoro nikech Yesu Kristo e ma biro tayowa e piny kae e kindego. Wanon ane ranyisi moko e Muma ma konyowa bedo gadier ni Yesu biro tayowa e kindego.

12. Ere kaka Jehova norito joge (a) bang’ ka Musa nosetho? (b) bang’ ka nosewil ne Elija migawo? (Ne picha bende.)

¹² Mana matin ka pok Jo-Israel odonjo e Piny ma Nosingi, Musa notho. Ang’o ma notimre ne oganda Nyasayeno? Be nojwang’ogi? Ooyo. Jehova noritogi, tek mana ni ne gidhi nyime makore kode. Ka ne pok Musa otho, Jehova nonyise ni oket Joshua mondo e ma ota joge. Musa nosebedo ka tiego Joshua kuom higni mang’eny. (Wuok 33:11; Rap. 34:9) E wi mano, ne nitie chwo mamoko ma ne konyoga e tayo jo Nyasaye. Kuom ranyisi, ne nitie jotelo ma ne nie wi ji aluf-aluf, mia-mia, piero abich-abich, to moko e wi ji apar-apar. (Rap. 1:15) Jo Nyasaye ne nie bwo arita maber. Mano bende e gima notimore e ndalo janabi Elija. Janabino nosebedo ka tayo jo Nyasaye kuom higni mang’eny. Kata kamano, kinde nochopo ma Jehova nowilone migawo motere yo milambo mar Juda. (2 Ru. 2:1; 2 We. 21:12) Be nojwang’ joma ne nie bwo pinyruoth mar dhoudi apar mag Israel? Ooyo. Elija nosebedo ka tiego Elisha kuom higni mang’eny. Bende, ne nitie “yawuot jonabi” ma nochan maber, kendo ma nosetieg ne tij Nyasaye. (2 Ru. 2:7) Kuom mano, ne nitie chwo mang’eny ma ne nyalo tayo jo Nyasaye. Jehova nodhi nyime chopo dwache kendo norito jotichne ma nomakore kode.

13. En adiera mane makende ma yudore e Jo-Hibrania 13:5b? (Ne picha bende.)

 ¹³ Ka wan gi ranyisigo e paro, diwach ni ang’o ma biro timore bang’ ka Jokristo mowal duto osedhi e polo? Ok onego waparre. Muma fwenyonwa adiera moro makende: Jehova ok bi jwang’o joge manie piny kae. (Som Jo-Hibrania 13:5b.) Mana kaka Musa gi Elija, Jokristo mowal ma pod nie piny kae ong’eyo gimomiyo dwarore ni gitieg jomamoko. Kuom higni mang’eny, owete manie Bura Matayo osebedo ka tiego owete manie kueth mar rombe mamoko kaka ginyalo tayo jo Jehova. Kuom ranyisi, gisechano skunde mopogore opogore mitiegoe jodong-kanyakla, jorit-alwora, owete manie komiti mar bad ofis, owete ma tayo migepe e Bethel, kod skunde mamoko. Jatich mogen osebedo ka tiego jokonygi e komiti mopogore opogore mag Bura Matayo, kendo sani jokonygigo e ma timo migepe mapek e riwruogwa. Osetieggi maber mondo gidhi nyime rito rombe mag Kristo.

14. Wach maduong’ ma wasewuoye chop sani en mane?

¹⁴ Ma e wach maduong’ ma wasewuoye: Bang’ ka Jokristo mowal duto osedhi e polo ka masira maduong’ chiegni chopo e gikone, lamo maler pod biro dhi nyime e piny kae. Wamor ni e bwo loch mar Kristo, jotich Nyasaye biro siko ka gin e bwo arita maber. E kindego, Gog mar Magog, ma en pinje ma biro riwore mondo omonjwa, biro kedo kodwa. (Eze. 38:18-20) Kata kamano, monjno ok bi tiekowa. Gog ok bi mono jotich Nyasaye lamo Jehova. Nyasaye biro rito joge. E fweny moro, jaote Johana noneno ‘oganda mang’ongo’ mar rombe mamoko mag Yesu Kristo. Nonyis Johana ni ogandano ‘nowuok e masira maduong’.’ (Fwe. 7:9, 14) Ee, ok bi jwang’gi kata matin!

15-16. Ka luwore gi Fweny 17:14, ang’o ma Jokristo mowal biro timo e kinde lweny mar Har–​Magedon, to ang’o momiyo wachno jiwowa?

¹⁵ Jomoko nyalo penjore ni, ‘To nade Jokristo mowal, ang’o ma gibiro timo bang’  ka gisedhi e polo?’ Muma chiwo dwoko mar penjono. Owacho ni jotelo mag pinyni ‘biro kedo gi Nyarombo.’ Kata kamano, ok gibi loye. Muma wacho ni Nyarombo ‘biro loyogi.’ Gin jomage ma biro konyo Nyarombo? Ndikono wacho ni ‘joma ne oyier’ kendo “mosechung’ motegno.” (Som Fweny 17:14.) Mago gin jomage? Gin Jokristo mowal mibiro chier! Omiyo, bang’ ka Jokristo duto mowal osedhi e polo ka masira maduong’ chiegni rumo, achiel kuom gik ma gibiro kwongo timo en kedo e lweny. To mano doko migawo makende! Moko kuom Jokristo mowal ne kedoga e lwenje mag pinyni ka ne pok gibedo Joneno mag Jehova, to ne gipuonjore ma gibedo Jokristo mohero kuwe. (Gal. 5:22; 2 The. 3:16) Ne giweyo riwo lwedo lwenje mag pinyni. Kata kamano, bang’ ka gisedhi e polo, gibiro riwore gi Yesu kod malaikene e kedo e lweny mogik ma Nyasaye biro tiekogo jowasike.

¹⁶ Parie wachni: Moko kuom Jokristo mowal manie piny kae sani oti, kendo tekogi osedok piny. Kata kamano, bang’ ka osechiergi e polo, gibiro bedo joroteke ma ok nyal tho kendo gibiro kedo kanyachiel gi Yesu Kristo. Bang’ lweny mar Har–​Magedon, gibiro konyo e tayo dhano mondo obed joma kare chuth. Wan gadier ni gibiro timo ne dhano manie piny kae gik mabeyo ahinya, moloyo gimoro amora ma ne gitimonegi ka pod ne gin e piny.

17. Ang’o momiyo wan gadier ni jotich Nyasaye duto biro bedo e bwo arita maber e kinde lweny mar Har–​Magedon?

¹⁷ Be in e kueth mar rombe mamoko? Ka en kamano, ang’o ma biro dwarore ni itim ka lweny mar Har–​Magedon ochakore? Dwoko mayot en mae: Biro dwarore ni igen Jehova kendo iluw kaka itayi. Muma jiwowa gi wechegi: “Dhiuru udonj e udi ma iye, kendo ulor dhouteu. Ponduru kuom kinde machuok, nyaka chop mirimb Nyasaye okadhi.” (Isa. 26:20) Jotich Jehova duto ma biro makore kode, bed ni gin e polo kata e piny, biro bedo e bwo arita maber e kindego. Mana kaka jaote Paulo, wan gadier ni kata “loje, kata gik ma nitie sani, kata gik ma biro . . . ok bi pogowa gi hera mar Nyasaye.” (Rumi 8:38, 39) Kinde duto ket wachni e paro: Jehova oheri ahinya, kendo ok obi jwang’i!