1. Engtik hunah nge hriak thih zawng zawngte chu vâna lâk chhoh an nih ang?

 KUM kaltaahte khân, Jehova mite chuan, ‘Eng hunah nge hriak thih Kristian la bângte chu vâna lâk chhoh an nih ang?’ tih hi an ngaihtuah a. Armageddon indona a tâwp hnu hun eng emawti chhûng chu hriak thih Kristian ṭhenkhatin lei Paradis-ah min awmpui tûrin kan lo ngai ṭhîn a. Mahse, Vênnainsâng, July 1, 2013 thuziakah chuan leia la awm hriak thih zawng zawngte chu Armageddon indo ṭan hmain vâna lâk chhoh an ni ang tih kan zir a ni.—Mt. 24:31.

2. Eng zawhna nge awm thei a, he thuziakah hian eng nge kan sawiho vang?

² Mahse, zawhna awm thei chu: “Hrehawm nasa tak” chhûngin leia Jehova chhiahhlawh rinawm, Krista “berâm dang” chungah eng thil nge thleng ang? tih hi a ni. (Joh. 10:16; Mt. 24:21) Tûn laia mi ṭhenkhat chuan an duh tak hriak thih unaute vâna lâk chhoh an nih hun chuan hrilh hai taka awm, a nih loh leh kalsan nia inhriatna neih an hlau mai thei a. Chutianga ngaihtuahtîrtu Bible-a chanchin pahnih i lo bih chiang ang u. Tichuan, lungkhâm a ngaih loh chhante kan sawiho bawk ang.

THILTHLENG LO TUR CHU

3-4. Mi ṭhenkhatin eng nge an lungkham mai theih a, engvângin nge?

³ Mi ṭhenkhat chuan hriak thih unau Governing Body kaihhruaina a awm tawh loh chuan berâm dangte chu thutak aṭanga an tawlhbo an hlau mai thei a. Chutiang hlauhna chu Bible-a thilthleng ṭhenkhat avânga nei pawh an ni thei a ni. Entîrna pahnih i lo ngaihtuah ang u. A hmasain, Puithiam Lal Jehoiada chungchâng hi lo ngaihtuah ta ila. Ani chu Pathian  chhiahhlawh rinawm tak a ni a. A nupui, Jehosabeathi nên chuan naupang Joasa chu humhimin, mi ṭha tak leh lal rinawm tak ni tûrin an enkawl a ni. Kum upa tak Jehoiada dam chhûng chuan, Joasa chuan Jehova biain, thil ṭhate a ti a. Mahse, Jehoiada thih hnu chuan, Joasa’n thil sual a ti ṭan a. Mi suaksual a miliante thusawi chu ngaithlain, Jehova a hawisan ta a ni.—2 Chro. 24:2, 15-19.

⁴ Entîrna dang leh chu kum zabi hnihnaa Kristiante an ni a. Tirhkoh Johana chu tirhkohte zînga dam rei ber a ni a, ani chuan Kristian tam tak chu a ṭha lama thununin, Jehova chunga rinawm tlat tûrin a ṭanpui a ni. (3 Joh. 4) Isua tirhkoh rinawm dang ang bawkin, Johana chuan zirtîrna dik lo leh kalpêngte thiltih avânga kohhran chu ṭhendarha a awm loh nân theih tâwp chhuahin a vênghim a. (1 Joh. 2:18; 2 Thes. 2:7.) Johana thih hnu chuan kalpênna chu ram kâng ang maiin a rawn darh chak hle a. Kum sâwmbi rei lo te chhûngin, Kristian kohhran chhûnga mi tam tak chu kalpêngte zirtîrna dik lo leh an ngaih dân dik lo hmanga tihchhiatin an awm a ni.

5. Chûng thilthleng pahnihte aṭang chuan eng thu tâwp nge kan siam loh vâng?

⁵ He Bible-a thilthleng pahnih hian hriak thihte vâna lâk chhoh an nih hnuah chutiang thil chu Krista berâm dangte chungah pawh a thleng thei tih a târ lang em? Chumi hunah chuan leia Kristian rinawmte chuan Joasa angin zirtîrna an dawnte chu an hnâwl ang em? A nih loh leh, C.E. kum zabi hnihna hun laia Kristian tam takte angin an kalpêng ang em? A chhânna chu kalpêng lo vang! Hriak thihte’n lei an chhuahsan hnuah pawh berâm dangte chuan kawng dik takin Jehova an be chhunzawm zêl ang a, ṭha taka ngaihsak an ni ang tih kan ring nghet tlat thei a ni. Engvângin nge kan rin ngheh tlat theih?

BIAKNA DIK CHU TIHBAWRHBAN A NI LO VANG

6. Eng hun pathum chungchâng nge tâwi têa kan ngaihtuah ang?

⁶ Engvângin nge lo thleng mai tûr hun khirh tak chhûngah pawh, biakna dik chu tihbawrhbân a ni lo vang tih kan rin ngheh tlat theih? Tûn lai kan hun chungchâng chu Bible aṭanga kan zir tawh vâng a ni. Tûn lai hun hi hmân lai Israel hun leh kum zabi hnihnaa Kristiante hun lai lakah chuan a danglam hle a. Chuvângin, hêng hun pathum: (1) Hmân lai Israel hun, (2) tirhkohte thih hnu leh, (3) kan hun, “engkim siamṭhat hun” chungchâng chu i lo bih chiang ang u.—Tirh. 3:21.

7. Hmân lai Israel hunah, engvângin nge mi rinawmte chu Israel hnam leh lalte’n thil sual an tih lai khân an beidawn loh?

⁷ Hmân lai Israel hun. Mosia chuan a thih hma lawkin Israel mite hnênah: “Ka thih hnu chuan nasa takin in intichhia ang a, ka thupêk che u kawng ata hi in pêng ang tih ka hre reng a ni,” tiin a sawi a. (Deut. 31:29) Ani chuan Israel mite chu an hel chuan sala hruai an nih tûr thu a vaukhân a ni. (Deut. 28:35, 36) Chûng thute chu a thleng dik em? Thleng dik e. Kum za tam tak chhûng chu lal tam tak chuan thil sual tiin, Pathian mite chu kawng sual an zawhtîr a. Chuvângin, Jehova chuan Israel mi suaksualte chu hremin, leia lal thlah kal zêl chu a titâwp a. (Ezek. 21:25-27) Mahse, Pathian thusawite a thleng famkim tih an hmuh chuan Israel mi rinawmte chu tihchakin an awm a ni.—Is. 55:10, 11.

8. Kum zabi hnihnaa Kristian kohhran tihbawrhbân a ni chu mak kan ti tûr a ni em? Hrilhfiah rawh.

⁸ Tirhkohte thih hnu. Kum zabi hnihnaa Kristian kohhran tihbawrhbân a ni chu mak kan ti tûr a ni em? Ni lo ve. Isua chuan kalpênna nasa tak a thlen tûr thu a sawi lâwk a. (Mt. 7:21-23; 13:24-30, 36-43) Tirhkoh Paula, Petera, leh Johana chuan Isua sawi lâwkte chu  C.E. kum zabi khatnaah a thleng famkim ṭan tih an nemnghet a ni. (2 Thes. 2:3, 7; 2 Pet. 2:1; 1 Joh. 2:18) Kum zabi hnihnaa Kristian kohhran chu tihbawrhbân a ni a. Kristian kalpêngte chu khawvêl sakhaw dik lo lalram, Babulon Khaw Ropui pêng langsâr tak an lo ni ta a. Isua sawi lâwk ang ngeiin a thleng famkim ta a ni.

9. Engtin nge tûn lai kan hun hi hmân lai Israel hun lai leh kum zabi hnihnaa Kristian kohhran hun lai laka a danglam?

⁹ “Thil engkim siam ṭhat hun.” Tûn kan hun hi hmân lai Israel hun lai leh kalpênna nasa tak a thlenna C.E. kum zabi hnihna hun lai lakah chuan a danglam hle a. Tûn lai kan hun hi eng anga koh nge a nih? He khawvêl kalhmang suaksual tak ‘ni hnuhnûngte’ tiin kan sawi thei a ni. (2 Tim. 3:1) Mahse, Bible chuan chu hun hnuhnûng inṭan ruala inṭan, hun rei zâwk leh ropui zâwk chungchâng a târ lang a. Chu hun chu Messia Lalram awpna hnuaia mihringte ṭha famkim an nih a, leilung hi paradis-a chantîr a nih hma loh a awm zawm zêl ang. Chu chu “engkim siam ṭhat hun,” tia ko a ni a. (Tirh. 3:21) Chu hun chu C.E. kum 1914-ah a inṭan a ni. A nih leh, eng nge siam ṭhat a nih? Isua chu vânah Lal niin lal ṭhutthlêngah a ṭhu a. Chuvângin, Jehova chuan Lal rinawm tak Davida thlah, a aiawha rorêltu tûr a nei leh ta a ni. Mahse, Jehova siam ṭhat chu lal nihna chauh a ni lo. Chumi hnu lawkah, biakna dik din ṭhat leh a ni ta a! (Is. 2:2-4; Ezek. 11:17-20) Chu chu tihbawrhbân a ni ang em?

10. (a) Bible-in kan hun laia biakna dik chungchângah eng nge a sawi lâwk? (Isaia 54:17) (b) Engvângin nge chûng hrilh lâwknate chu thlamuanthlâk tak a nih?

¹⁰ Isaia 54:17 chhiar rawh. “Nangmah beihna tûra hriam chher rêng rêng a sâwt lo vang,” tih hrilh lâwkna chungchâng hi han ngaihtuah teh! Chûng thlarauva thâwk khum thute chu tûn laiah a thleng famkim mêk a ni. Hêng thu thlamuanthlâk tak hian kan hun lai chungchâng a sawi a ni: “I fate zawng zawng chu LALPA zirtîrin an awm ang a, i fate thlamuanna chu nasa tak a ni ang. Felnaa tihnghehin i awm ang a . . . i hlau dâwn lo a ni; thil râpthlâk ata hla takah i awm bawk ang a, a hnaih dâwn lo che a ni,” tiin. (Is. 54:13, 14) Pathian Jehova mite’n a chungchâng mi dangte zirtîra a rawng an bâwlna chu “he khawvêl pathian” Setana ngei pawhin a titâwp thei lo vang. (2 Kor. 4:4) Biakna dik chu din ṭhat leh a ni tawh a, tihbawrhbân a ni leh ngai tawh lo vang. Chu chu chatuan atâna tihngheh  a ni tawh a ni. Min beihna tûrin eng ralthuam mah a hlawhtling lo vang!

ENG THIL NGE THLENG ANG?

11. Hriak thihte vâna lâk chhoh an nih hnu chuan engin nge mipui nasa takte chu kalsan an ni lo vang tih rinnghehna min neihtîr?

¹¹ Vâna hriak thihte lâk chhoh an nih hnuah eng thil nge thleng ang? Isua chu min vêngtu Berâmpu a ni tih hre reng rawh. Ani chu Kristian kohhran lu a ni a. Isua chuan: “In hruaitu chu pakhat chauh a ni, Krista chu,” tiin chiang takin a sawi a ni. (Mt. 23:10) Tûna rorêl mêk kan Lal chu a hnathawhah a hlawhchham ngai lo vang. Leia Krista hnungzuitute chu Jehova Fapa ngeiin a kaihhruai avângin engmah an hlauh a ngai lo. Mahse, chumi huna Krista’n a mite a kaihhruai dân tûr chungchâng chu kimchang takin kan hre lo va. Chuvângin, thlamuanna min neihtîrtu Bible-a entîrna ṭhenkhat i lo ngaihtuah ang u.

12. Engtin nge Jehova’n (a) Mosia thih hnuah a mite a ngaihsak? (b) Elija’n chanvo dang a dawn hnuah a mite a ngaihsak? (Milem en bawk rawh.)

¹² Israel mite Ram Tiama an luh hmain Mosia chu a thi a. Pathian mite chungah eng thil nge thleng? Chu mi rinawm tak a thih hnu chuan Jehova’n a mite chu a kalsan em? Kalsan lo ve. A chunga an rinawm chhûng zawng a ṭanpui chhunzawm zêl a ni. Mosia thih hmain Jehova chuan a mite hruaitu atân Josua ruat tûrin a hrilh a. Mosia chuan Josua chu kum tam tak chhûng a lo zirtîr tawh a ni. (Ex. 33:11; Deut. 34:9) Chu bâkah, hruaitu tling tak—sâng chunga hotu te, za chunga hotu te, sawmnga chunga hotu te, sâwm chunga hotute an awm bawk a. (Deut. 1:15) Chuvângin, Pathian mite chu ṭha taka ngaihsak an ni. Chutiang entîrna chu Elija chungchângah pawh kan hmu thei a. Ani chuan kum sâwmbi têl chu Israel mite zîngah biakna dik a kaihruai a. Mahse, a hnuah chhim lam Judai rama rawngbâwl tûrin Pathianin a ruat a ni. (2 Lal. 2:1; 2 Chro. 21:12) Chuti a nih chuan, Israel hnam sâwma mi rinawmte chu kalsan an ni em? Ni lo ve. Elija chuan Elisa chu kum tam tak chhûng a lo zirtîr tawh a. Chu bâkah, zirtîrna ṭhenkhat dawng “zâwlneiho fapate” an awm bawk. (2 Lal. 2:7) Chuvângin, mi rinawm tam tak chuan Pathian mite kaihhruainaah an ṭanpui thei a ni. Jehova chuan a thiltumte hlen tûrin hma a la zawm zêl a, rinawm taka amah betute chu a ngaihsak hle a ni.

13. Hebrai 13:5b-ah eng thu thlamuanthlâk tak nge kan hmuh theih? (Milem en bawk rawh.)

¹³ Chûng entîrnate chu rilruah dahin, hriak thihte vâna lâk chhoh an nih hnu chuan  eng thil nge thleng tûra i rin? Chu chu kan lungkham a ngai lo. Bible-in: Jehova chuan leia a mite chu engtikah mah a thlahthlam ngai lo vang tih thu thlamuanthlâk tak a târ lang a ni. (Hebrai 13:5b chhiar rawh.) Mosia leh Elija angin tûn laia hmahruaitu Krisian hriak thih pâwl tlêm tê chuan mi dangte zirtîr a pawimawhzia an hria a. Governing Body unaupate chuan berâm dang zînga unaupate chu hmahruaitu atân kum sâwmbi têl an lo zirtîr tawh a ni. Entîr nân, anni chuan kohhran upate, bial kantute, Branch Committee member-te, Bethel-a overseer-te leh, mi dangte pawh zirtîr tûrin school tam tak an ruahman a. Governing Body chuan a mi mal takin, Governing Body committee hrang hranga ṭanpuitute zirtîrna an nei bawk. Chûng Governing Body ṭanpuitute chuan an mawhphurhna rit tak chu rinawm takin an hlen a. Anni chu Krista berâmte ngaihsak zawm zêl tûrin ṭha taka zirtîr an ni.

14. Kan sawiho tâka thu pawimawh ber chu eng nge ni?

¹⁴ Kan sawiho tâka thu pawimawh ber chu hei hi a ni: Hrehawm nasa tak tâwp dâwn lama hriak thihte vâna lâk chhoh vek an nih hnuah pawh, he leia Jehova mite chuan rinawm takin amah an be chhunzawm zêl ang. Isua Krista chu Pathian mite tân hruaitu a ni chu thil lâwmawm tak a ni. Ni e, chumi hunah chuan Magog rama Goga, hnam insuihkhâwm beihna chu kan tâwk ngei ang. (Ezek. 38:18-20) Mahse, chu beihna hun chhûng tâwi têah chuan a hlawhchham ang a; Pathian mite’n Jehova an biakna chu a titâwp lo vang. Ani chuan a va chhan chhuak chiang dâwn tak êm! Tirhkoh Johana chuan Krista berâm dang “mipui tam tak” chu inlârnaah a hmu a. Ani chuan chûng “mipui tam tak” chu “hrehawm nasa tak” ata dam khawchhuakte an ni tih a sawi a ni. (Thup. 7:9, 14) Ni e, anni chu Jehova’n a chhanhim ang tih a chiang hle!

15-16. Thu Puan 17:14-a sawi angin, Armageddon indo chhûngin Krista hnungzuitu hriak thihte chuan eng nge an tih ang a, engvângin nge chu chu phûrawm tak a nih?

¹⁵ Mi ṭhenkhat chuan: ‘Hriak thihte chungchâng hi eng nge ni ve? Vâna lâk chhoh an nih hnu chuan eng nge an thawh ang?’ tiin an ngaihtuah mai thei a. Bible-ah chiang taka  chhânna kan hmu thei a ni. Leia rorêltute’n “Berâm No chu an do” tûr thu a sawi a. Mahse, anni chuan an hneh lo vang. Heti hian kan chhiar a ni: “Berâm No chuan . . . a hneh ang,” tiin. Tute’n nge ani chu ṭanpui ang? Chu châng vêk chuan “kohva te, thlana te, rinawma te,” tiin a chhâng a ni. (Thu Puan 17:14 chhiar rawh.) Chûng mite chu tute nge an nih? Hriak thih tho lehte an ni! Chuvângin, hrehawm nasa tak tâwp dâwn hnaiha leia hriak thihte vâna lâk chhoh an nih hnua an chanvo dawn hmasa ber chu indo a ni ang. Chanvo danglam tak a va ni êm! Hriak thih Kristian ṭhenkhat chuan Jehova Thuhretute an nih hmain mi dangte an do ṭhîn a. Mi ṭhenkhat chu sipaiahte an ṭang hial a. Mahse, anni chuan Kristian dik rawn niin, remna siamtu nih dân an zir a ni. (Gal. 5: 22; 2 Thes. 3: 16) Anni chu tisa lam indona zawng zawngah an inhnamhnawih tawh lo va. Mahse, vâna lâk chhoh an nih hnu chuan, Krista leh a vântirhkoh thianghlimte nên rawngbâwlin Pathian hmêlmate nêna indona hnuhnûng berah an tel ang.

¹⁶ Han ngaihtuah teh! Leiah Kristian hriak thih ṭhenkhat chu kum lama upa leh bawrhsâwm takte an ni a. Mahse, vâna kaihthawh an nih hnuah chuan thi thei lo thlarau taksa puin, thiltihtheihna nasa tak an nei ang a, Râl do thiam an Lal Isua Krista lamah ṭangin râl an do vang a. Armageddon indona a zawh hnu chuan, Isua nên mihringte chu ṭha famkim ni tûrin an ṭanpui ang. Chutih hunah chuan, mihring ṭha famkim lo an nih lai aiin leia an unau duh takte chu an ṭanpui nasa lehzual thei ang tih chu rinhlelh rual a ni lo!

17. Engtin nge Pathian chhiahhlawh zawng zawngte chu Armageddon indo hun chhûngin humhim an ni ang tih kan hriat?

¹⁷ Berâm dang zînga mi i ni em? I nih chuan Armageddon indona a inṭan huna i tih ngai chu eng nge ni ang? Jehova rinchhan a, a kaihhruainate zawm hi a ni. Chutah chuan eng nge tel thei ang? Bible chuan: “In pindan chhûngahte lût ula, in kawngte chu inkhâr khum rawh u: lungnih lohna hi a kian hmâ loh chu mitkhapkâr lek biru rawh u,” tiin thu thlamuanthlâk tak a sawi a. (Is. 26:20) Chu hun chhûng chuan lei leh vâna Pathian chhiahhlawh rinawm zawng zawngte chu humhim an ni ang. Tirhkoh Paula angin keini pawhin “lalna te, thil awm sa te, thil lo la awm tûr te . . . pawhin, . . . Pathian hmangaihna ata chu mi ṭhen thei lo vang,” tih kan ring nghet tlat a ni. (Rom 8:38, 39) Jehova’n min hmangaih a, min kalsan ngai lo vang tih hi hre reng ang che!