1. Kan eski tou bann 144,000 pou dan lesiel?

 AVAN, bann serviter Zeova ti pe demann zotmem: ‘Kan eski dernie Kretien ki ena lesperans pou al dan lesiel pou mont dan lesiel?’ Sa lepok-la, nou ti panse ki apre lager Armagedon, sertin Kretien ki ena lesperans pou al dan lesiel, kitfwa ti pou ankor lor later kan later ti pou vinn enn paradi. Me Latour Degard 15 Ziliet 2013 ti montre nou ki tou bann 144,000 pou dan lesiel avan ki lager Armagedon koumanse.—Mat. 24:31.

2. Ki kestion sertin kapav poz zotmem, ek ki nou pou examine dan sa lartik-la?

² Me kitfwa sertin pe demann zotmem: Pandan “gran soufrans,” ki pou ariv bann “lezot mouton” ki pe servi Zeova avek fidelite? (Zan 10:16; Mat. 24:21) Zot poz zotmem sa kestion-la, parski zot trakase tansion nepli ena personn pou gid zot kan pou nepli ena okenn 144,000 lor later. Anou get de zistwar Biblik ki kitfwa fer zot pans koumsa, ek anou gete kifer fode pa nou trakase.

KI KITSOZ PA POU ARIVE?

3-4. Ki traka sertin gagne, ek kifer?

³ Sertin trakase tansion bann lezot mouton aret servi Zeova kan pou nepli ena okenn frer Komite Santral pou gid zot. Anou get de zistwar ki ena dan Labib, ki kitfwa fer zot pans koumsa. Premie zistwar-la se seki ti arive dan lepok Gran Pret Zoad. Zoad ek so madam Zeosabat, ti bien kontan Zeova. Zot ti protez Lerwa Zoas kan li ti ankor enn zanfan, ek zot ti ed li pou vinn enn bon lerwa. Tanki Zoad ti ankor vivan, Zoas ti res fidel anver Zeova. Me kan Zoad ti mor, Zoas ti vir ledo ar Zeova. Li ti ekout  bann prins ki ti bien move ek li ti aret servi Zeova.—2 Kro. 24:​2, 15-19.

⁴ Deziem lexanp-la, se seki ti ariv bann Kretien dan deziem siek nou lepok. Lapot Zan ti dernie zapot Zezi ki ti ankor vivan. Li ti ena enn bon linflians lor boukou Kretien, ek li ti ed zot pou res fidel ar Zeova. (3 Zan 4) Pandan enn sertenn letan, Zan ek bann lezot zapot ti protez lasanble kont bann aposta ki ti pe fann bann fos lansegnman. (1 Zan 2:18; get not pou letid pou 2 Tes. 2:7.) Me apre lamor Zan, bann fos lansegnman ti fane koumadir lakangrin dan lasanble Kretien.

5. Ki kitsoz fode pa nou panse akoz sa de lexanp Biblik la?

⁵ Eski sa de lexanp-la montre ki mem kitsoz pou ariv bann lezot mouton kan pou nepli ena okenn 144,000 lor later? Eski bann Kretien pou abandonn Zeova parey kouma Zoas ti fer? Eski zot pou swiv bann fos lansegnman, parey kouma boukou Kretien ti fer dan deziem siek nou lepok? Non! Kan pou nepli ena okenn 144,000 lor later, nou kapav sir ki bann lezot mouton pou kontign ador Zeova dan bon fason, ek ki Li pou kontign pran zot swin. Kifer nou dir sa?

BANN SERVITER ZEOVA POU KONTIGN ADOR LI DAN BON FASON

6. Ki trwa lepok nou pou examine aster-la?

⁶ Kifer nou kapav sir ki bann serviter Zeova pou kontign ador Li dan bon fason malgre bann leprev ki pe atann nou devan? Akoz seki Labib dir lor lepok ki nou pe viv azordi. Nou lepok bien diferan ar lepok bann Izraelit ek lepok bann Kretien dan deziem siek. Anou aprann inpe plis lor sa trwa lepok-la: (1) Lepok bann Izraelit, (2) lepok apre lamor bann zapot, ek (3) nou lepok, setadir lepok kot “retabli tou bann kitsoz.”—Zist. 3:21.

7. Kifer bann Izraelit ki ti fidel pa ti dekouraze kan lepep ek bann lerwa ti abandonn Zeova?

⁷ Lepok bann Izraelit. Inpe avan so lamor, Moiz ti dir bann Izraelit: “Mo kone ki apre mo lamor, zot pou fer bann move kitsoz ek zot pou aret swiv semin ki mo ti donn zot lord pou swiv.” (Det. 31:29) Moiz ti osi dir bann Izraelit, ki si zot rebel kont Zeova, zot ti pou vinn esklav bann lezot pep. (Det. 28:​35, 36) Eski sa ti arive? Wi. Pandan plizir santenn lane, boukou lerwa ti fer seki move devan lizie Zeova ek lerla, lepep ti abandonn Zeova. Akoz sa, Zeova ti pini bann Izraelit ek Li ti fer an-sort ki nepli ena okenn lerwa dan Izrael pou diriz so pep. (Eze. 21:​25-27) Kan bann Izraelit ki ti fidel ti trouve kouma tou seki Zeova ti dir ti realize, sa ti donn zot kouraz pou kontign servi Li avek fidelite.—Iza. 55:​10, 11.

8. Eski sa etonn nou ki bann Kretien ti koumans swiv bann fos lansegnman dan deziem siek nou lepok? Explike.

⁸ Lepok apre lamor bann zapot. Eski sa etonn nou ki bann Kretien ti koumans swiv bann fos lansegnman dan deziem siek nou lepok? Non. Kifer? Parski Zezi ti predir ki lansegnman bann aposta ti pou fane dan lasanble Kretien. (Mat. 7:​21-23; 13:​24-30, 36-43) Dan premie siek, Pol, Pier ek Zan ti dir ki sa profesi-la ti pe deza realize. (2 Tes. 2:​3, 7; 2 Pier 2:1; 1 Zan 2:18) Ek dan deziem siek nou  lepok, bann fos lansegnman ti fini fann partou dan lasanble Kretien. Apre lamor lapot Zan, larelizion Kretien ti vinn enn larelizion aposta, ek li’nn form parti Gran Babilonn, lanpir mondial fos relizion. Ankor enn fwa, bann profesi ki ti anonse ti realize!

9. Kifer nou lepok bien diferan ar lepok bann Izraelit ek lepok apre lamor bann zapot?

⁹ Lepok kot “retabli tou bann kitsoz.” Nou lepok bien diferan ar lepok bann Izraelit ek lepok apre lamor bann zapot. Kouma Labib apel lepok ki nou pe viv? Sirman nou pe pans “bann dernie zour” sa move lemond-la! (2 Tim. 3:1) Selman, Labib dir ki nou pe viv enn lepok ki koumans anmemtan ki bann dernie zour, me ki boukou pli long. Sa lepok-la pou kontigne ziska ki later vinn enn paradi ek ki tou dimounn lor later vinn parfe. Labib apel sa lepok-la, lepok kot “retabli tou bann kitsoz.” (Zist. 3:21) Sa lepok-la inn koumanse an 1914. Ki kitsoz inn retabli an 1914? Sa lane-la, Zezi inn vinn Lerwa dan lesiel, savedir ki Zeova ti retabli enn lerwa, enn desandan Lerwa David, pou reprezant Li. Selman, se pa zis enn lerwa ki Zeova ti retabli! Inpe apre, Zeova ti ed so bann serviter pou rekoumans ador Li dan bon fason. (Iza. 2:​2-4; Eze. 11:​17-20) Me eski bann fos lansegnman pou rant dan lasanble Kretien ankor?

10. (a) Ki Labib ti predir konsernan bann ki pe ador Bondie dan nou lepok? (Izai 54:17) (b) Kifer sa bann profesi-la bien ankourazan?

¹⁰ Lir Izai 54:17. Reflesi lor sa profesi-la: “Okenn zarm ki forme kont twa pa pou reisi”! Sa bann parol-la pe realize azordi. Ena osi sa parol bien ankourazan la ki pe realize azordi: “Tou to bann garson pou ansegne par Zeova, ek lape to bann garson pou an-abondans. Dan lazistis pou etabli twa solid. . . . To pa pou per nanye ek pa pou ena okenn rezon pou ki to per, parski sa pa pou vinn pre ar twa.” (Iza. 54:​13, 14) Azordi, bann serviter Zeova pe fer enn gran travay lansegnman dan lemond antie. Mem Satan,“bondie sa lemond-la,” pa pe kapav aret zot. (2 Kor. 4:4) Bann serviter Zeova pe ador Li dan bon fason, ek zot pou kontign fer sa pou touletan. Avredir, ‘okenn zarm ki forme kont nou pa pou reisi’!

 KI KITSOZ POU ARIVE?

11. Kifer nou sir ki Zeova pa pou abandonn nou kan tou bann 144,000 pou fini mont dan lesiel?

¹¹ Ki pou arive apre ki tou bann 144,000 fini mont dan lesiel? Fode pa nou bliye ki Zezi, nou Berze, li sef lasanble Kretien. Anplis, li ti dir: “Zot ena enn sel Met, Lekris.” (Mat. 23:10) Zezi pe regne dan lesiel, ek li touletan pran swin so bann disip. Alor, nou pena pou per! Kifer? Parski se Zeova so Garson ki pe diriz nou! Li vre ki nou pa konn tou bann detay lor fason ki Zezi pou diriz nou pandan sa lepok-la. Selman, ena sertin lexanp Biblik ki kapav rasir nou.

12. Kouma Zeova ti pran swin so pep (a) apre lamor Moiz? (b) apre ki Eliya ti gagn enn lot responsabilite? (Get zimaz osi.)

¹² Moiz ti mor avan ki bann Izraelit rant dan Later Promiz. Ki ti ariv pep Bondie sa lepok-la? Eski Zeova ti aret ed so pep apre ki Moiz ti mor? Non. Tanki zot ti res fidel, Zeova ti ed zot. Avan ki Moiz mor, Zeova ti donn lord Moiz pou form Zozwe pou diriz lepep. Moiz ti form Zozwe pandan plizir lane. (Ex. 33:11; Det. 34:9) Anplis, Moiz ti osi form bann zom ki ti ena sazes ek lexperyans, ek li ti etabli zot kouma bann sef lor lepep; bann sef group mil, sef group san, sef group sinkant, ek sef group dis. (Det. 1:15) Zeova pa ti abandonn so pep! Dan lepok Eliya osi Zeova ti pran swin so pep. Pandan boukou lane, Eliya ti fer boukou zefor pou ed bann Izraelit ador Zeova. Me plitar, Zeova ti donn li enn lot responsabilite, ek li ti al servi kouma profet dan lesid Zida. (2 Ler. 2:1; 2 Kro. 21:12) Eski Zeova ti abandonn so bann fidel serviter ki ti res dan rwayom dis tribi Izrael? Non. Pandan boukou lane, Eliya ti form Elize. Anplis sa lepok-la, ti ena osi bann lezot “profet” ki ti gagn bann formasion. (2 Ler. 2:7) Alor, ti ena boukou zom fidel ki ti kapav ed lepep pou kontign servi Zeova. Zeova ti kontign realiz so proze ek Li ti kontign pran swin so bann fidel serviter.

13. Ki lankourazman nou gagne dan Ebre 13:5b? (Get zimaz osi.)

¹³ Apre ki nou’nn examinn sa de lexanp-la, ki to panse pou arive kan sa dernie Kretien ki ena lesperans pou al dan lesiel la, pou mont dan lesiel? Nou  deza konn repons sa kestion-la. Labib rasir nou kan li dir: Zeova zame pa pou abandonn so pep ki lor later. (Lir Ebre 13:5b.) Parey kouma Moiz ek Eliya, sa ti group Kretien ki ankor lor later ek ki pe diriz nou azordi la, zot konpran ki li bien inportan pou form lezot. Depi plizir dizenn lane, bann frer Komite Santral pe form bann frer ki form parti bann lezot mouton, pou zot diriz pep Bondie. Par exanp, zot organiz bann lekol pou form bann ansien, bann responsab sirkonskripsion, bann manb Komite Biro Nasional, bann frer responsab dan Betel, ek lezot ankor. Komite Santral form osi bann asistan pou ede dan bann diferan komite ki dirize par Komite Santral. Sa bann asistan-la pe asim zot bann responsabilite avek fidelite. Zot pare pou kontign pran swin pep Zeova.

14. Ki pwin inportan sa lartik-la?

¹⁴ Ki pwin inportan sa lartik-la? Kan dernie Kretien ki ankor lor later pou mont dan lesiel avan lafin gran soufrans, pep Zeova ki lor later pou kontign ador Li avek fidelite. Nou kone ki sa lepok-la, Gog ki sorti pei Magog, setadir plizir nasion ki’nn zwenn ansam, pou atak pep Zeova. (Eze. 38:​18-20) Me sa latak-la pou bien kourt, ek sa pa pou anpes pep Zeova pou kontign ador Li. Ek alafin, Zeova pou sap so pep! Dan enn vizion, lapot Zan ti trouv enn “gran lafoul” bann lezot mouton ki “finn travers gran soufrans.” (Rev. 7:​9, 14) Alor, nou sir ki Zeova pou sap so bann serviter!

15-16. Dapre Revelasion 17:​14, ki bann Kretien ki ena lesperans pou al dan lesiel pou fer pandan lager Armagedon, ek kifer sa ankouraz nou?

¹⁵ Kitfwa sertin pe demann zotmem: ‘Ki pou ariv bann Kretien ki ena lesperans pou al dan lesiel? Ki zot pou al fer dan lesiel?’ Labib dir ki bann gouvernman sa lemond-la pou lager kont Lagno. Biensir, zot pou perdi sa lager-la. Labib dir osi: “Lagno pou gagn viktwar lor zot.” Kisann-la ki pou ed Lagno? Labib  dir: “Bann ki avek li, ki Bondie inn apele ek swazir ek ki fidel, pou gagn viktwar zot osi.” (Lir Revelasion 17:14.) Lor kisann-la sa verse-la pe koze? Lor bann Kretien ki ena lesperans pou al dan lesiel! Alor, kan dernie Kretien ki ena lesperans pou al dan lesiel pou mont dan lesiel avan lafin gran soufrans, enn parmi bann premie responsabilite ki zot pou gagne, se pou al lager. Sertin Kretien ki ena lesperans pou al dan lesiel, ti bann solda ek zot ti mem servi dan larme avan ki zot vinn bann Temwin Zeova. Me kan zot inn konn laverite, zot inn aprann pou viv anpe avek lezot. (Gal. 5:22; 2 Tes. 3:16) Zot inn aret partisip ek soutenir bann lager. Selman, kan zot pou dan lesiel, zot pou lager ansam avek Zezi ek so bann anz kont bann lennmi Bondie pandan lager Armagedon.

¹⁶ Zis mazinn sa! Lor later, sertin parmi sa bann Kretien ki ena lesperans pou al dan lesiel la, zot vie ek zot frel-frel. Me kan zot pou resisite ek zot pou mont dan lesiel, zot pou bann kreatir spiritiel bien pwisan ek zot pou lager ansam avek Zezi, zot Gran Lerwa! Apre lager Armagedon, zot pou travay ansam ar Zezi pou ed bann dimounn vinn parfe. Nou sir ki, kan zot pou dan lesiel, zot pou plis kapav ed zot bann frer ek ser!

17. Kouma nou kone ki Zeova pou protez so bann serviter pandan lager Armagedon?

¹⁷ Eski to form parti bann lezot mouton? Si wi, ki to pou bizin fer kan lager Armagedon pou koumanse? Li bien sinp: Fer Zeova konfians ek swiv so bann instriksion. Kouma to kapav fer sa? Labib dir: “Rant dan to bann lasam ki trouv andan, ek ferm laport deryer twa. Kasiet pou enn ti moman ziska ki lakoler pase.” (Iza. 26:20) Pandan sa lepok-la, Zeova pou protez so bann fidel serviter ki dan lesiel ek lor later. Parey kouma lapot Pol, nou sir ki “ni bann gouvernman, ni bann kitsoz ki ena aster-la, ni bann kitsoz ki pou ena apre . . . pa pou kapav separ nou ar lamour ki Bondie ena pou nou.” (Rom. 8:​38, 39) Alor, fode zame to bliye sa: Zeova kontan twa, ek zame Li pa pou abandonn twa!