1. Чыла шӱрымӧ-влак каваште кунам погымо лийыт?

 ОНДАК Иегован служитлышыже-влакым тыгай йодыш тургыжландарен: «Пытартыш шӱрымӧ христиан кунам кавашке налме лиеш?» Ончыч ме шоненна, пуйто нунын гыч южышт Армагеддоным илен лектыт да, очыни, эше икмыняр жап мландыште илаш тӱҥалыт. Но 2013 ийын 15 июльысо «Орол башне» гыч ме пален налынна: Армагеддон сарын тӱҥалмыж деч ончыч чыла шӱрымӧ-влак каваште лийыт (Матф. 24:31).

2. Могай йодыш лектын кертеш, да мом ме тиде статьяште ончен лектына?

² Но тыгай йодыш лектын кертеш: Христосын «вес шорыкшо-влак» дене, кудышт «кугу азап» годым мландыште Иеговалан ӱшанлын служитлымым огыт чарне, мо лиеш? (Иоан. 10:16; Матф. 24:21). Таче южышт шонат, пуйто кунам нунын йӧратыме шӱрымӧ иза-ака-влак кавашке налме лийыт, нуно шкетын да полыш деч посна кодыт. Айста кок библийысе каласкалымашым ончен лектына, кудышт верч тыгай шонымаш лектын кертеш. Варажым амал-влакым ончен лектына, молан тиде шотышто тургыжланаш огеш кӱл.

МО ОГЕШ ЛИЙ?

3, 4. Южышт мо верч тургыжланат да молан?

³ Южышт лӱдын вучат тыгай жапым, кунам Вуйлатыше совет гыч шӱрымӧ иза-влак мландыште уже огыт лий. Нуно тургыжланат: «А трук нине иза-влак деч посна вес шорык-влак Иеговалан служитлымым чарнат?» Очыни, нуным южо библийысе историй-влак тыге шонаш таратеныт. Кок примерым ончен лектына. Первосвященник Иодайым шарналтена. Тудо Юмын ӱшанле служитлышыже лийын. Тудо да Иехошева ватыже Иоас лӱман изи эргым арален коденыт да тудлан сай кугыжа лияш полшеныт. Иодайын илымыж годым тиде  кугыжа Иеговалан кумалын. Но кунам первосвященник колен, Иоас осал пашам ышташ тӱҥалын. Тудо осал князь-влакым колыштын да Иегова деч кораҥын (2 Лет. 24:2, 15—19).

⁴ Тыгак кокымшо курымысо христиан-влак нерген мутланен налына. Кунам Иоанн, пытартыш апостол, мландыште эше илен, тудо шуко христианлан Иеговалан ӱшанлын служитлаш полшен (3 Иоан. 4). Вес апостол-влак дене пырля Иоанн уло вийын погынымаш-влакым тыгай еҥ-влак деч аралаш тыршен, кӧ шоя туныктымашым шаркален коштын (2 Фес. 2:7; 1 Иоан. 2:18). Но Иоаннын колымыж деч вара шукышт отступник лияш тӱҥалыныт. Икмыняр лу ий жапыште нине отступник-влак шуко шоя туныктымашым шаркаленыт, да христиан-влак гыч шукышт Юмын нормыжо почеш илымым чарненыт.

5. Ончен лекме библийысе историй-влак гыч могай иктешлымашым ышташ огеш кӱл?

⁵ Нине кок библийысе историй ончыкта мо, пуйто Христосын вес шорыкшо-влак денат тыгак лиеш, кунам шӱрымӧ-влак кавашке каят? Тунам мландыште кодшо ӱшанле христиан-влак Иоас семын осал пашам ышташ тӱҥалыт мо? Але мемнан эран кокымшо курымысо шуко христиан семын отступник лияш тӱҥалыт мо? Нине йодыш-влаклан вашмут — конешне, уке! Ме пеҥгыдын ӱшанен кертына: кунам шӱрымӧ-влак мландыште уже огыт лий, вес шорык-влак Иеговалан служитлымым огыт чарне да Иегова нунын верч умбакыжат тыршаш тӱҥалеш. Кушеч ме тидым палена?

АРУ КУМАЛМАШ ОГЕШ ПЫТЕ

6. Могай кум пагытым ме кӱчыкын ончен лектына?

⁶ Ончыкыжым мемнам чот йӧсӧ жап вуча гынат, ару кумалмаш огеш пыте манын, молан ме пеҥгыдын ӱшанен кертына? Мемнан кече-влак нерген Библийыште возымылан кӧра ме тидлан пеҥгыдын ӱшанена. Мемнан кече-влак акрет Израильын жапше деч да мемнан эран кокымшо курымысо жап деч чот ойыртемалтыт. Айста кӱчыкын ончен лектына тиде кум пагытым: 1) акрет Израиль жапым, 2) апостол-влакын колымышт деч вара лийше жапым да 3) мемнан кече-влакым, «чыла тӧрлымӧ жапым» (Ап. паш. 3:21).

7. Кунам уло калык да кугыжа-влак Иеговалан служитлымым чарненыт, молан ӱшанле израильтян-влак умбакыжат Юмылан служитленыт?

⁷ Акрет Израиль жап. Колымо деч ончыч Моисей израильтян-влаклан каласен: «Мый раш палем: колымем деч вара те йырнык пашам ышташ тӱҥалыда да тыланда каяш кӱштымӧ корно деч кораҥыда» (Втор. 31:29). Тыгак Моисей израильтян-влакым шижтарен: нуно Юмым колыштмым чарнат гын, пленыш наҥгайыме лийыт (Втор. 28:35, 36). Тудын мутшо шукталтын мо? Шукталтын. Курым-влак мучко шуко кугыжа тыгайым ышташ тӱҥалын, мо Юмылан келшен огыл, да Юмын калыкше нунын почеш ыштен. Тидлан кӧра Иегова шке калыкше деч кораҥын да еҥ кокла гыч кугыжа-влакым уже ойырен огыл (Иез. 21:25—27). Но кунам ӱшанле израильтян-влак ужыныт, кузе Юмын каласымыже шукталтеш, тиде нуным умбакыжат Юмылан ӱшанлын служитлаш таратен (Ис. 55:10, 11).

8. Кокымшо курымысо христиан погынымаш Иеговалан служитлымым чарнен манын, мемнам ӧрыктара мо? Умылтарыза.

⁸ Апостол-влакын колымышт деч вара лийше жап. Кокымшо курымышто христиан погынымаш Иеговалан служитлымым чарнен. Тиде мемнам ӧрыктара мо? Уке. Христиан-влак коклаште кугу отступничестве лиеш манын, Иисус ончылгочак каласен (Матф. 7:21—23; 13:24—30, 36—43). Иисусын ончылгоч каласымыже уже икымше курымышто шукталташ тӱҥалын. Тидым Павел, Петр  да Иоанн апостол-влак пеҥгыдемден ойленыт (2 Фес. 2:3, 7; 2 Пет. 2:1; 1 Иоан. 2:18). Кокымшо курымышто христиан погынымаште отступничестве чот шарлен. Пытартыш апостолын колымыж деч вара христиан отступник-влак Кугу Вавилонын, шоя религийын тӱнямбалысе империйын, ужашыже лияш тӱҥалыныт. Мом Иисус ончылгоч каласен, чылажат шукталтын.

9. Мемнан кече-влак акрет Израиль жап деч да мемнан эран кокымшо курымысо жап деч мо дене ойыртемалтыт?

⁹ «Чыла тӧрлымӧ жап». Мемнан кече-влак ойыртемалтыт акрет Израиль жап деч да мемнан эран кокымшо курымысо жап деч, кунам отступничестве чот шарлен. Мемнан жапна кузе маналтеш? Чӱчкыдын ме тудым тиде тӱнян «пытартыш кече-влак» манына (2 Тим. 3:1). Но эше Библий ончыкта: тиде кече-влак дене тыгай пагыт тӱҥалын, кудыжо кугурак рольым шукта да шукырак жап шуйна. Тиде пагыт пыта, кунам Мессиан Кугыжаныш еҥ-влаклан сулыкдымо лияш полша да мландым райыш савыра. Тиде пагыт «чыла тӧрлымӧ жап» маналтеш (Ап. паш. 3:21). Тудо 1914 ийыште тӱҥалын. Тунам мо тӧрлымӧ лийын? Иисус Юмын Кугыжаныште кава гыч вуйлаташ шогалтыме лийын. Тыгела, Иегова угыч вуйлатышым ойырен налын, кудыжо тудын представительже да ӱшанле Давид кугыжан наследникше лийын. Но Иегова тидым гына огыл тӧрлатен. Вашке тидын деч вара тудо ару кумалмашым тӧрлаташ тӱҥалын (Ис. 2:2—4; Иез. 11:17—20). Ару кумалмаш угыч иктаж-кунам пыта мо?

10. а) Мемнан жапысе ару кумалмаш нерген Библийыште мом ончылгоч каласыме лийын? (Исайя 54:17). б) Молан тыгай ончылгоч каласымаш-влак ончыко пеҥгыде ӱшан дене ончаш полшат?

¹⁰ Исайя 54:17 лудын лекса. Шоналтыза гына тиде ончылгоч каласымаш нерген: «Тыйым пытараш ыштыме кеч-могай саргурал шке цельжым огеш шукто»! Тиде мемнан жапыште шукталтеш. Тыгак таче тыгай лыпландарыше шомак шукталтеш: «Чыла йочатым Иегова туныкташ тӱҥалеш, да нунын шуко тыныс лиеш. Тый чынжымак чын ыштыше лият... Тый нимо деч лӱдаш да чытыраш от тӱҥал — лӱдмаш тыйым ок авалте» (Ис. 54:13, 14). Сатанат, «тиде курымысо юмо», Иегован служитлышыже-влак дене эртарыме туныктымаш пашам чарен ок керт (2 Кор. 4:4). Ару кумалмашым тӧрлатыме, да тудо нигунамат огеш пыте. Тудо эре, курым-курымеш лиеш. Мемнам чараш ыштыме кеч-могай саргурал шке цельжым огеш шукто!

 МО ЛИЕШ?

11. Кунам шӱрымӧ христиан-влак каваш налме лийыт, моткоч шуко калыклан нимо деч лӱдаш огеш кӱл манын, молан пеҥгыдын ӱшанен кертына?

¹¹ Мо лиеш, кунам шӱрымӧ христиан-влак каваш налме лийыт? Шарныза: мемнан Кӱтӱчына — Иисус. Тудо христиан погынымашын Вуйжо. Тудо шкежат каласен: «Тендан илыш корным Ончыктышыда икте веле — Христос» (Матф. 23:10). Вуйлатыше Кугыжана чын тунемшыж-влак верч тыршымыжым нигунамат огеш чарне. Мемнам Христос вуйлата, сандене ту жапыште нимо деч лӱдаш огеш кӱл. Конешне, ме чылажымат она пале, кузе Христос шке тунемшыж-влаклан тунам кӱштымашым пуаш тӱҥалеш. Айста библийысе пример-влакым ончен лектына, кудышт мемнам лыпландарат.

12. Кузе Иегова шке калыкше верч тыршен: а) Моисейын колымыж деч вара? б) Ильялан у заданийым пуымо деч вара? (Тыгак сӱретым ончыза.)

¹² Моисей израильтян-влакын Сӧрымӧ мландыш пурымышт деч ончыч колен. Тудын колымыж деч вара мо лийын? Израильтян-влак полыш деч посна кодыныт мо? Уке. Кунам нуно Иеговалан ӱшанле лийыныт, Иегова нунын верч тыршен. Юмын кӱштымыжӧ почеш Моисей колымыж деч ончыч Иисус Навиным Юмын калыкшын вуйлатышылан шогалтышаш ыле. Моисей Иисусым икмыняр лу ий туныктен (Исх. 33:11; Втор. 34:9). Тыгак калыкыште тӱжем, шӱдӧ, витле да лу еҥым вуйлатыше пӧръеҥ-влак лийыныт. Нунат Иисуслан полшен кертыныт (Втор. 1:15). Ме ужына: Юмын калыкше виктарымаш деч посна кодын огыл. Тыгаяк ситуаций Илья пророкын жапыштыже лийын. Тудо шуко ий израильтян-влаклан Иеговалан чын кумалаш полшен. Но толын шуын тыгай жап, кунам Юмо тудлан Иудейыште шуктышаш заданийым пуэн (2 Цар. 2:1; 2 Лет. 21:12). Юмын ӱшанле служитлышыже-влак, кудышт лу тукым гыч шогышо Израиль кугыжаныште иленыт, вуйлатымаш деч посна кодыныт мо? Уке. Уже икмыняр ий Илья Елисейым туныктен. Тыгак «пророк-влакын эргышт-влак» лийыныт (2 Цар. 2:7). Очыни, тиде пророк-влак лийыныт, кудышт Елисей дене пырля тунемыныт. Тыгела, шуко ӱшанле пӧръеҥ лийын, нуно Юмын калыкыште виктарымаш пашам шуктен кертыныт. Иегова умбакыжат шонен пыштымыжым шуктен да ӱшанле служитлышыже-влак верч тыршен.

13. Еврей-влаклан 13:5 почеламутышто могай ӱшандарыше шонымашым муына? (Тыгак сӱретым ончыза.)

¹³ Нине пример-влакым шарнен, шоналтыза: мо лиеш Юмын калыкше дене, кунам  пытартыш шӱрымӧ христиан кавашке налме лиеш. Вашмутым ме палена. Библий мыланна проста, но ӱшандарыше шонымашым почын пуа: Иегова шке калыкшым нигунамат огеш кодо. (Еврей-влаклан 13:5 лудын лекса.) Моисей ден Илья семын шӱрымӧ христиан-влак гыч шогышо кугу огыл группо, кудыжо мемнам таче виктара, умыла, мыняр чот кӱлешан весе-влакым туныкташ. Шуко лу ий мучко Вуйлатыше совет гыч иза-влак вес шорык кокла гыч пӧръеҥ-влакым Юмын калыкше верч тыршаш туныктат. Мутлан, нуно тӱрлӧ школым организоватленыт: кугурак иза-влаклан, районым эскерыше иза-влаклан, филиал-влакын комитетыштышт служышо-влаклан, Вефильыште виктарымаш пашам шуктышо иза-влаклан, миссионер-влаклан да моло-влаклан. Вуйлатыше советын тӱрлӧ комитетын полышкалышыже-влакым Вуйлатыше совет шке туныкта. Нине полышкалыше-влак уже таче организацийыште ӱшанлын служитлат да куштылго огыл тӱрлӧ виктарымаш пашам шуктат. Нуно Христосын шорыкшо-влак верч умбакыжат тыршаш сайын ямдылыме улыт.

14. Лончылен лекме статьян тӱҥ шонымашыже могай?

¹⁴ Лончылен лекме статьян тӱҥ шонымашыже теве могай: кунам кугу азапын мучаштыже пытартыш шӱрымӧ христиан кавашке налме лиеш, тунам ару кумалмаш мландыште огеш пыте. Иисус Христосын виктарымыжлан кӧра ме Иеговалан ӱшанлын служитлымым она чарне. Конешне, ту жапыште мемнан ӱмбак наций-влакын коалицийышт, Магог гыч Гог, кержалтеш (Иез. 38:18—20). Но тиде кержалтмаш кӱчык лиеш да шке цельышкыже огеш шу. Ме умбакыжат Иеговалан тыршен служитлаш тӱҥалына. Мутат уке, тудо мемнам утара! Апостол Иоанн кончымаштыже Христосын вес шорыкшо-влак гыч шогышо «моткоч шуко калыкым» ужын. «Нине еҥ-влак пеш кугу орлык гыч толыныт» манын, Иоаннлан каласыме лийын (Почм. 7:9, 14). Ме раш палена: Иегова мемнам утара!

15, 16. Почмаш 17:14 дене келшышын, Армагеддон сар годым Христосын шӱрымӧ тунемшыж-влак мом ышташ тӱҥалыт, да молан тиде кумылаҥда?

¹⁵ Но иктажше, очыни, йодын кертеш: «А шӱрымӧ-влак мом ышташ тӱҥалыт, кунам  каваш налме лийыт?» Библийыште раш вашмутым пуымо. Тудо палдара: «[Тиде тӱнян вуйлатыше-влак] Пача дене кредалаш тӱҥалыт». Но нуно Пачам огыт сеҥе. Ме лудына: «Пача нуным сеҥа». А кӧ тудлан полша? Вашмутым ме тиде почеламутыштак муына: «Тудын дене пырля улшо-влакше ӱжмӧ, ойырен налме да ӱшанле улыт». (Почмаш 17:14 лудын лекса.) Нуно кӧ улыт? Ылыжше шӱрымӧ-влак! Сандене, кунам нунын кокла гыч пытартышыже кугу азапын мучаште каваш налме лиеш, нуно кредалаш заданийым налыт, кудыжо икымше заданий-влак гыч иктыже лиеш. Могай ӧрыктарыше заданий! Южо шӱрымӧ-влак Иеговалан служитлаш тӱҥалме деч ончыч кредалаш йӧратеныт але сарыште лийыныт. Но вара чын христиан лиймылан кӧра нуно весе-влак дене тынысыште илаш тунемыныт (Гал. 5:22; 2 Фес. 3:16). Нуно чыла саргуралым кудалтеныт. Но каваште лийме годым шӱрымӧ-влак Христос да тудын святой суксо-влакше дене пырля Юмын тушманже-влак ваштареш пытартыш сар дене лектыт.

¹⁶ Шоналтыза гына, южо шӱрымӧ христиан-влак уже шоҥго да вийдыме улыт. Но кавасе илышлан ылыжмеке, нуно виян, колыдымо шӱлыш лийыт. Армагеддон сарыште нуно Иисус Христос Кугыжашт дене пырля Юмын тушманже-влак дене кредалаш тӱҥалыт. А тиде сарын пытымыж деч вара нуно Христос дене пырля еҥ-влаклан сулыкдымо лияш полшат. Шӱрымӧ-влак сулыкан еҥ лийме годсо дене таҥастарымаште йӧратыме иза-акашт-влаклан кава гыч шукырак ыштен кертыт.

17. Армагеддон годым Юмын чыла служитлышыже-влаклан эҥгекым нигӧ огеш кондо манын, кушеч ме палена?

¹⁷ Те вес шорык-влак гыч улыда гын, тыланда Армагеддон тӱҥалме годым мом ышташ кӱлеш лиеш? Чыла раш: Иеговалан ӱшанаш да тудын кӱштымашыже-влак почеш ышташ. Тышке мо пура? Библийыште мемнам лыпландарыше шомакым возымо: «Кӧргысӧ пӧлемышкет пуро да омсатым тӱкылӧ. Шыде пытымешке, кӱчык жаплан шыл» (Ис. 26:20). Тунам Юмын чыла служитлышыже-влаклан каваштат, мландыштат эҥгекым нигӧ огеш кондо. Апостол Павел семынак ме пеҥгыдын ӱшанена: «Юмын мыланна ончыктымо йӧратымашыж деч... Куат-влакат‚ кызытсат‚ ончыкылыкат... мемнам ойырен огыт керт» (Рим. 8:38, 39). Эре шарныза: Иегова тендам йӧрата да нигунамат огеш кодо!