1. Mudhidhi baani makiristawu aatene oothikitheliwa omuzimuni enadhowiwa odhulu?

 YAKA dhamundduli nlogo na Yehova nowikohesa: ‘Makiristawu oothikitheliwa omuzimuni oogomihera enadhowe alini odhulu?’ Kale nubuwela wihina makiristawu oothikitheliwa yakale mwilaboni yela yavati mparayizu mudhidhi vang’ono Armajedo avira. Mbwenye Sentinela a 15 a Julho a 2013, nahihudhera wihina koddo ya Armajedo yahinafiye makiristawu aatene owakwana 144 000 enakale odhulu. — Mat. 24:31.

2. Nubuwelaga wodhela dhithu dhinafuna opadduwa osogolo Makoho baani enakumelelavo, ki dhithu baani nnafunihu woona muwari mwa ohudhera wula?

² Mbwenye addibila amodha podi wikohaga: Ethu baani enapaduwele mambila mamodha a Kiristu enamulabelege Yehova nuuroromelelya enakale mwilaboni yavati mudhidhi wa “mahoso manlubale?” (Juwa. 10:16; Mat. 24:21) Podi wera addibila amodha enere othuwathuwa yubuwelaga wi kinande onona ethu yowerana addibila ni arogola oothikitheliwa yadhowa odhulu. Aliwa podi wubuwelaga ni makalelo yala mwaha wa dhopadduwa biili dhinafwanyeya mBibiliyani. Kabeni noone dhopadduwa ndha dhinoniha mwahaya bwaddi kannahowela othuwathuwa.

ETHU BAANI YAHINAPADDUWE?

3-4. Makoho baani addibila amodhaya enikohiwa ki mwahaya bwaddi?

³ Addibila amodha podi okala oothuwathuwa yubuwelaga wi mambila mamodha enere ohiya omulabela Yehova addibila oothikitheliwa omuzimuni a Nikuru Nolamulela yadhowa odhulu. Podi wera addibila ala enubuwela ndo mwaha wa dhopadduwa biili dhinafwanyeya mBibiliyani. Nnere woona dhopadduwa biili, yobajha sa namakutha munlubale Jeyoyada. Oliye aali mudhaari oororomeleya a Yehova, oliye vamodha ni mwadhiye Jeyosabeyati yahimbarela mwaana dhaala ithaniwa Jeyowaji ni yahimukavihera okala mwene apama ni oororomeleya. Mudhidhi Jeyoyada ahinakwe Jeyowaji oomulabela Yehova nuuroromeleya ni owerana dhithu dhapama. Mbwenye Jeyoyada nuukwa Jeyowaji obajha werana  dhithu dhabure, oliye ahivuruwana dholaga dha amusadoro abure mwaha wa yeyo oliye omusukuma Yehova. — 2 Cró. 24:2, 15-19.

⁴ Yopadduwa emodha sa makiristawu yakalawo mudhidhi anamahara a Yesu nuukwa. Wa anamahara a Yesu murumiwi Juwawu aali oogomihedha okwa, mudhidhi murumiwi Juwawu ahinakwe oliye ahakavihera makiristawu owinjhiva okala oororomeleya wa Yehova. (3 Juwawu 4) Ndala ninga arumiwi amodha a Yesu yeriliwana Juwawu aherana dhatedhene wi abarele mulogo wi enalekethiwe ni muselu yavuwiha mapostata. (1 Juwawu 2:18.) Mbwenye murumiwi Juwawu nuukwa dhohudhiha dhowoota dha mapostata omwadheya ninga mootho onaddumeya kokola. Yaka dhoharela mapostata ala yohudhiha muselu dhowinjhiva dhowoota yenyaga dhithu dhabure wereya mmulogoni.

5. Ethu baani nahinahowelihu wubuwela wihina enere opadduwa mowiwanana ni dhopadduwa ndha dha mBibiliyani?

⁵ Nerege dhopadduwa ndha biili dhinafwanyeya mBibiliyani dhinoniha wi enere opadduwa ethu emodhave ni mambila mamodha a Kiristu, makiristawu oothikitheliwa yadhowa odhulu? Nerege makiristawu oororomeleya enafwanyeya elabo yavati enere obajha werana dhithu dabure ndala ninga Jeyowaji obe enere okala mapostata ndala ninga owinjhiva yeriliwana anamahara a Yesu nuukwa? Naari eyo kinadha epadduwa! Iyo podi okanna ebaribari wihina makiristawu oothikitheliwa omuzimuni yadhowa odhulu mambila mamodha enere odidela omulabela Yehova mwamakalelo anafuniye, teto Yehova anerege wasamalela. Mwahaya bwaddi iyo nikanna ebaribari ela?

WEBEDHA WEBARIBARI KUNADHA OMALA

6. Mudhidhi baani dhohiyana nnafunihu woona muwari mwa ohudhera wula?

⁶ Mwahaya bwaddi nigakanna ebaribari wi webedha webaribari kunadha omala naarive nifwanyiwaga makathamiho oorusa osogolo? Mwaha Bibiliya anowoga wi iyo nnakalawo mudhidhi wohiyana vanlubale ni wa amwaana Ezarayeli ni wohiyana ni mudhidhi wa anamahara a Yesu nuukwa. Vano nnere wonelamo pamadhene dhithu baani dhaapadduwile: (1) Mudhidhi wa amwaana Ezarayeli, (2) mudhidhi anamahara a Yesu nuukwa ni (3) ‘mudhidhi othomiwe wihina dhivenyihedhiwe dhithu dhatedhene.’ — Dhowera Dhaarumiwi 3:21.

7. Ethu baani yathukulele amwaana Ezarayeli oororomeleya okanna efunelo yomulabela Yehova?

⁷ Mudhidhi wa amwaana Ezarayeli. Ahalaga neena nukwa Moyizeji ahawaddela amwaana Ezarayeli egi: ‘Miyo gihinona pamadhene wihina gakwa nyu munere werana dhithu dhabure ni munere ohiya weedda dila guwaddelimini wihina muharege.’ (Deut. 31:29) Teto Moyizeji ahawaddela wihina aliwa yahahiye omulabela Yehova yere othukuleliwa elabo emodha wihina yakale adhaari. (Deut. 28:35, 36) Nerege madhu ala yahakwanela? Hee. Muwari mwa yaka dhowinjhiva mamwene owinjhiva yahithoma ohimwiwelela Yehova ni yahithukulela nlogo ovolowela webedha wowoota, mwaha wa yeyo Yehova osukuma nlogo naye nohiwelela ni keenyile wihina akalewo mwene mmodha aamwaana Izarayeli aathonge nlogo naye. (Eze. 21:25-27) Mbwenye amwaana Ezarayeli amodha nuwoona makalelo wakwanele mpaganyo wa Yehova aliwa okanna efunelo yomulabela Yehova nuuroromeleya.— Isa. 55:10, 11.

8. Mwahaya bwaddi kannahowela otikina mwaha onona wi anamahara a Yesu nuukwa makiristawu amodhaya yahihiya ebaribari?

⁸ Mudhidhi anamahara a Yesu nuukwa. Nerege nnohowela otikina mwaha mulogo wa makiristawu ansaka nanabiili okala mapostata? Naari, mwaha wihina Yesu ahivuhulela wihina eyo yere opadduwa. (Mat. 7:21-23; 13:24-30, 36-43) Murumiwi Pawulo, Peduru ni Juwawu yahiwoga wihina yovuhulela ya Yesu yahambela wakwanela mudhidhi yole wa nsaka noobajha. (2 Tes. 2:3, 7; 2 Ped. 2:1; 1 Juwawu 2:18) Mudhidhi vang’ono  murumiwi oogomihedha nuukwa, makiristawu yaali mapostata okala epaddi ya Babiloniya munlubale, dhili gereja dhatedhene dhowoota. Dila yanabili, wakwanela ele Yesu aawogiliye.

9. Mwahaya bwaddi mudhidhi nnakalihu ohuhiyana ni mudhidhi wa amwaana Ezarayeli vamodha ni mudhidhi wa makiristawu a nsaka nanabili?

⁹ ‘Mudhidhi othomiwe wihina dhivenyihedhiwe dhithu dhatedhene.’ Mudhidhi nnakalihu bohiyana ni mudhidhi wamwaana Izarayeli ni mudhidhi wa makiristawu oobajha yaaliwa mapostata. Mudhidhi nnakalihu onithaniwa aavi? Iyo nnithanesa mudhidhi nnakalihu ‘malabo ookuthula’ a elabo ela yabure. (2 Tim. 3:1) Mbwenye Bibiliya anowoniha wihina mudhidhi modhave ebanjhe malabo okuthula, wahambela mudhidhi wathima vanlubale waagonele vanlubale. Teto mudhidhi ola onerege odhowagave ofiyedha Omwene oli mmadani mwa Yesu ovenyihedha webedha webaribari, wathukulela athu aatene okala oologomana ni osaddula elabo okala parayizu. Mudhidhi ola onithaniwa ‘mudhidhi othomiwe wihina dhivenyihedhiwe dhithu dhatedhene.’ (Dho. 3:21) Mudhidhi ola obanjhe yaka ya 1914. Mbwenye ethu baani evenyihedhiwe? Vobajha Yesu wambela othonga odhulu. Ni makalelo yaala, dila yanabili Yehova omuthoma mwene wihina amwimelele Oliye, teto mweneya aakale odhulu wa Davidi. Mbwenye ela kahi ethu Yehova avenyihedhiye baahi. Nuumala ovenyihedha Omwene ola, webedha webaribari obajha ovenyihedhiwa! (Isa. 2:2-4; Eze. 11:17-20) Mbwenye webedha webaribari onere ovunganyedhiwa dila biili?

10. (a) Ethu baani Bibiliya anawogiye wodhela webedha webaribari mudhidhi nnakalihu? (Isaías 54:17) (b) Mwahaya bwaddi dhovuhulela ndha dhinonihagalasa?

¹⁰ Omwileri Isaías 54:17. Kasugwa yovuhulela: ‘Kayiwo  futhi onahaneliwiwe enapare mabasa!’ Madhu ala enowakwanela peeno. Ohiya eyo, madhu enafwanyeya va Isaías 54:13, 14 enna wakwanela peeno teto enonlibiha vanlubale. Enihina: ‘Aninyu aatene enerege ohudhihiwa ni Yehova, teto aninyu enere okanna murenddele wowinjhiva. We onere wimesiwa pamadhene ni wogowa. . . . Newene kunovege ethu, newene kawo ethu enuthusege, mwaha kawo ethu yabure enuwaddamele.’ Newene Saddana, ‘mulugu a malabo yala,’ kananda wamaaliha mabasa enapariwa owahudhiha athu wodhela Yehova. (2 Kor. 4:4) Webedha webaribari ohuvenyihedhiwa ni kunadha otakalihiwa dila biili ni dhohudhiha dha gereja dhowoota. Mbwenye onere okalawo ni mukalakala. Kawo futhi enande ogujhula nlogo na Yehova!

ETHU BAANI ENAPADDUWE?

11. Ethu baani enaniroromeliha wihina muthithi wa athu kunanyanyiliwe mudhidhi makiristawu aatene oothikitheliwa yadhowa odhulu?

¹¹ Ethu baani enaapadduwe makiristawu oothikitheliwa  yadhowa odhulu? Kudduwale wihina Yesu dili namakukula ehu. Oliye musolo wa mulogo dhatedhene. Yesu ohoniha pamadhene eyo nuwoga egi: “Namasogolela enyu di Kiristu baahi.” (Mat. 23:10) Teto oliye anere wakwanihedha pamadhene mutholo waye. Woona wihina Yesu mwaana a Mulugu dili omukomboniwa, iyo nili elabo yavati kannahowela woova ethu-sithu. Ebaribari wi kannone makalelo Yesu anaholelegiye nlogo naye mudhidhi oyo wafiya. Bumwahaya kabeni none dhopadduwa dhinafwanyeya mBibiliyani dhinanikurumuse.

12. Yehova aasamalele aavi nlogo naye (a) Moyizeji nuukwa? (b) Eliyaji numala wakela mutholo muxa? (Osugwe fotu.)

¹² Mudhidhi amwana Izarayeli yahinathi ovolowa elabo yothomeliwa, Moyizeji okwa. Ethu baani yapadduwile namwaana Izarayeli voharela? Woona wihina Moyizeji ahikwa, nerege aliwa kiyanna yowera? Naari. Aliwa yahakaleve ororomeleya wa Yehova, Yehova erege wasamalela. Moyizeji ahinakwe, Yehova omwaddela wihina amuthome Jozuwe wihina aholelege nlogo namwaana Izarayeli. Moyizeji ahimuxagiha Jozuwe muwari mwa yaka dhowinjhiva. (Êxo. 33:11; Deut. 34:9) Ohiya eyo, yahikalawo alobwana owinjhiva yaxagihiwe wihina eholele nlogo. Motajhiha yahikalawo anamasogolela aathu 1000, 100, 50, ni aathu 10. (Deut. 1:15) Mwebaribarene nlogo na Yehova nerege osamaleliwa pamadhene. Yopadduwa emodha sa namavuhulela Eliyaji. Muwari mwa yaka dhowinjhiva Eliyaji ahakavihera amwana Izarayeli odhowagave emwebedhaga Yehova mwamakalelo oweela. Mbwenye nlabo dhaala Yehova ovaha Eliyaji mutholo muxa, wihina alabege epaddi yomayelo nduwa elabo yo Juda. (2 Reis 2:1; 2 Crô. 21:12) Nerege amwaana Izarayeli yaali oororomeleya a mahimo kumi yahinyanyaliwa? Naari. Eliyaji ahimuxaghiha Elizewu muwari mwa yaka dhowinjhiva. Teto yahikalawo ‘makuru aanamavuhulela,’ podi wera aliwa yaali owiwegeredhene makuru ni makuru ni yahixagihiwa. (2 Reis 2:7) Eyo enowoniha wihina yahikalawo alobwana owinjhiva ni oororomeleya yivahedhile wihina eholele nlogo na Yehova. Yehova ahididela wakwanihedha efunelo yaye ni wasamalela pamadhene adhaari aye.

13. Ethu baani Yehova ananipaganyiye va Hebreus 13:5b? (Osugwe fotu.)

¹³ Nuumala woona dhopadduwa ndha, enaapadduwe ddi makiristawu aatene oothikitheliwa omuzimuni yadhowa odhulu? Yowakulaya sokweya. MBibiliyani, nnofwanyamo yowakula enanikurumusa: Yehova kanadha anyanyala nlogo naye velaboni yavati. (Omwileri Eberewu 13:5b.) Peeno nihikalawo nikuru ning’ono na makiristawu oothikitheliwa omuzimuni enaholela nlogo na Mulugu, eli addibila a Nikuru Nolamulela. Ndala ninga Moyizeji ni Eliyaji, aliwa enowaxagiha alobwana a mambila  mamodha wihina yakavihere mabasa osamalela nlogo na Mulugu. Motajhiha, Nikuru Nolamulela nnowegeredha dhiskola dhowinjhiva wihina yaxagihe anamaholela mulogo, anameeddela mulogo, ni addibila enasogolela komisawu ya Filiyale, anamasogolela a departamentu dhoBeteli ni addibila amodhaya. Teto kadda ddibila a Nikuru Nolamulela anowavolowela mabasa owaxagiha anamakavihera a komisawu dhohiyanahiyana dha Nikuru Nolamulela. Okuma ovanene anamakavihera ala ehikanna mutholo munlubale ni eli owiwegeredhene wihina edhowegeve yaparaga mabasa owasamalela mambila a Kiristu.

14. Ethu baani nandilihu wonelamo pamadhene muwari mwa ohudhera wula?

¹⁴ Ofiyedha vala, nihonelamo pamadhene wihina makiristawu oothikitheliwa yadhowa odhulu waddamela omakuthulo wa mahoso manlubale, adhaari a Yehova enerege odhowave emulabelaga oliye nuuroromeleya. Mwaha wa oholeliwa ni Yesu Kiristu, iyo kannadha nihiya omulabela Yehova. Ebaribari wi mudhidhi yoyo iyo nnere orijhiwa ni Gogi a Magoge, wili wiwanana wa malogo. (Eze. 38:18-20) Mbwenye orijhiwa wula kawinalegele, kinande onigonjhiha newene kinande weeriha wihina nlogo na Mulugu nihiye omulabela Yehova. Mwebaribarene Yehova anere onivulusa! Murumiwi Juwawu ahikanna yowoona dhaala ooniliye ‘muthithi waathu’ a mambila mamodhaya a Kiristu. Teto murumiwi Juwawu ahaddeliwa wihina ‘muthithi waathu’ awooniliye yaali ale yavuluwe muhoseya winlubale. (Ovuhu. 7:9, 14) Mohanganyedha, Yehova aneere onivulusa!

15-16. Mowiwanana ni Ovuhulela 17:14, ethu baani makiristawu oothikitheliwa enafuniwa wera mudhidhi wa koddo ya Armajedo, ki mwahaya bwaddi eyo eganilibiha?

¹⁵ Naarive dhigaali ndo, podi wera amodhaya enowubuwela yegi: “Ki ethu baani enapadduwele makiristawu oothikitheliwa omuzimuni? Ddiniyani enafuniwa wera yafiya odhulu? Bibiliya anowawakula pamadhene makoho ala. Bibiliya anowoga wihina anamathonga a elabo ela ‘enere owana ni Mwana Nimbila.’ Mbwenye iyo nihinona wihina aliwa enere ogonjhihiwa. Bibiliya anowoga egi: ‘Mwana nimbila anere wagonjhiha.’ Mbwenye baani anaamukavihere Yesu? Bibiliya anowaakula nikoho nna egi: ‘Oosakuliwa ni oororomeleya.’ (Omwileri Ovuhulela 17:14.) Oosakuliwa ala enagiwana aani? Bi makiristawu  oothikitheliwa evenyihiwe muukwani! Vano makiristawu aatene othikitheliwa omuzimuni yadhowa odhulu waddamela omakuthulo wa mahoso manlubale, mutholo wobajha enaakeliwa, onaakale owana. Mwebaribarene ola onaakale mutholo onahagalese vanlubale. Mwaha wihina makiristawu oothikitheliwa omuzimuni amodhaya yahinathi okala Anamoona a Yehova yaali anyakoddo ni yodhiveliwa owana ni athu amodha, mbwenye aliwa nuukala makiristawu onona dila ya murenddele. (Gal. 5:22; 2 Tes. 3:16) Aliwa ohiya okavihera koddo, mbwenye yamala othukuleliwa odhulu aliwa enakale ni Yesu vamodha ni angero ni enere owana koddo yogomihedha ni amwiddani a Mulugu.

¹⁶ Kubuwela vang’ono, malabo yala a peeno makiristawu mamodha oothikitheliwa ehimala wuluvala ni kinna kopolo. Mbwenye yamala ovenyihiwa wihina yakalege odhulu aliwa enakale dhopaddusa dhomuzimuni dha kopolo ni kinadha ekwa. Bumwahaya enere omukavihera Yesu owaniha koddo ya Armajedo. Koddo ela ya Armajedo yavira aliwa enere olaba vamodha ni Yesu wihina yakavihere athu velaboni yavati okala oologomana. Mwebaribarene makiristawu oothikitheliwa omuzimuni yakala odhulu enere wanda werana dhithu dhowinjhiva wihina yakavihere addibiliwa ni arogoliwa enafwanyeya velaboni yavati opitha mudhidhi yaaliwa velaboni yavati ninga athu ohilogomana!

17. Nnonne aavi wihina adhaari aatene a Yehova enere okala oobareleyene mudhidhi wa Armajedo?

¹⁷ We oli epaddi ya mambila mamodhaya? Akala oni hee, ddiniyani onahoweliwe werana koddo enlubale ya Armajedo yahinakalegewo velaboni yavati yabajha? Ethuya sokweya: Omuroromelege Yehova ni oharege dhoholela dhaye. Eyo enavolowelavo wera ddi? Bibiliya anowoga va Isaías 26:20: ‘Mudhowe mwavolowe mba mweenyu ni nfuge musiwodha. Mwipite mudhidhi vang’ono, ofiyedha ovira owali watene.’ Obe neere adhaari aatene oororomeleya a Yehova enakale odhulu ni velaboni yavati enakale oobareleyene mudhidhi wa Armajedo. Ndala ninga murumiwi Pawulo alebiliye iyo nihikanna ebaribari wihina ‘newene anamathonga, newene dhithu dhiriwo, newene dhithu dhinafuna odha . . . enere owedha onimwalaniha ni odhivela wa Mulugu.’ (Rom. 8:38, 39) Bumwahaya kudduwale, Yehova anowuudhivela vanlubale teto Oliye kanadha unyanyala!