1. Wakat-bʋg la sẽn paam-b vʋʋsem sõng zaeeb n ket tẽngã zugã fãa na n kẽng saasẽ?

 YƲƲM a wãn sẽn looge, a Zeova nin-buiidã ra sokda b mens yaa: ‘Wakat-bʋg la b na n tall kiris-neb nins sẽn paam vʋʋsem sõng zaeebã yaoolem dãmbã n kẽng saasẽ?’ Pĩndã d ra tagsdame tɩ tõe tɩ Armagedõ zabrã poore, kiris-neb kẽer sẽn paam vʋʋsem sõng zaeebã na n vɩɩmda wakat bilf tẽngã sẽn na n lebg arzãnã zugu. La yʋʋmd 2013 sẽoog kiuug pipi daar Gũusg Gasgã pʋgẽ, b wilgame tɩ sẽn paam-b vʋʋsem sõng zaeeb n ket tẽngã zugã fãa na n looga saasẽ nand tɩ Armagedõ sɩnge.—Mat. 24:31.

2. Sok-bʋg la neb kẽer tõe n sokd b menga, la bõe yell la d na n gom sõs-kãngã pʋgẽ?

² La tõe tɩ kẽer sokda b mens yaa: Yɛlã na n yɩɩ wãn ne Kiristã “piis a taabã” sẽn na n tũud a Zeova ne b sũy fãa tẽngã zug “to-kãsengã” sasa wã? (Zã 10:16; Mat. 24:21) A Zeezi “piis a taabã” kẽer tõe n maanda yɩɩre, n tagsdẽ tɩ b saam-biis la b saam-bi-pogs nins sẽn paam vʋʋsem sõng zaeebã fãa sã n wa loog saasẽ, b pa na n mi b sẽn maandg ye. D na n goma Biiblã kibay a yiib sẽn tõe n kɩt tɩ b tagsd woto yelle. Rẽ poore d na n yãa bũmb a wãn sẽn kɩt tɩ b pa segd n maan yɩɩr ye.

BÕE N PA NA N MAANE?

3-4. Neb kẽer tõe n maanda yɩɩr ne bõe, la bõe yĩnga?

³ Neb sãnda tõe n yɛɛsdame, n tagsdẽ tɩ Siglgã taoor lʋɩtb Sull saam-biisã sẽn paam vʋʋsem sõng zaeebã sã n wa pa le be yambẽ n na n wilgd piis a taabã sore, b na n basa sɩdã. Tõe tɩ yaa Biiblã kibay kẽer n kɩt tɩ b tagsd woto. D gom kiba-kãens a yiib yelle. Pipi soabã gomda maan-kʋʋdb kãsem a Zehoyada yelle. A yɩɩ ned sẽn tũ Wẽnnaam ne a sũur fãa. Yẽ ne a pag a Zosebat kogla biig yʋʋr sẽn boond t’a Zowase, la b sõng-a t’a wa lebg rĩm-sõng la sẽn maand sɩda. A Zowas kell  n maana sẽn yaa tɩrg n tãag a Zehoyada sẽn da kʋʋlã kũum. La a Zehoyada kũumã poore, pa yã n kaoos la a Zowas sɩng sẽn yaa wẽng maaneg ye. A kelga nanambs sẽn yaa wẽnse, tɩ kɩt t’a bas a Zeova tũubu.—2 Kib 24:​2, 15-19.

⁴ Yiib-n-soabã yaa kiris-neb nins sẽn vɩɩmd tẽn-tʋmdbã kũum poorã kibare. Tẽn-tʋmdbã sʋka, a Zã n yɩ yaoolem soab n ki. A sẽn wa n vɩ wã, a sõnga kiris-neb wʋsg tɩ b kell n maan sɩd ne a Zeova. (3 Zã 4) A Zã ne a Zeezi tẽn-tʋmdb a taabã modga wʋsgo, n kogl tigingã ne sɩdã kɩɩsg sẽn da paamd pãngã. (1 Zã 2:18; 2 Tes. 2:7) La a Zã kũumã poore sɩdã kɩɩsg paama pãng wa bugum sẽn yõk weoogo. Yʋʋm a wãn pʋgẽ bala, kiris-neb tigingã pida ne sɩdã kɩɩsdb zãmsgo, la tʋʋm-yoodo.

5. Bõe la kibay a yiib nins yell d sẽn gomã pa wilgda?

⁵ Kiba-kãensã a yiibã wilgdame tɩ b sã n wa tall sẽn paam-b vʋʋsem sõng zaeebã n kẽng saasẽ, bũmb a woto n na n paam Kiristã piis a taabã bɩ? Wakat kãnga, kiris-neb nins sẽn maand sɩd ne a Zeova tẽngã zugã na n basa bũmb ning b sẽn wilg-bã wa a Zowas sẽn maanã bɩ, bɩ b na n lebga sɩdã kɩɩsdb wa sẽn yɩ to-to ne kiris-neb wʋsg tẽn-tʋmdbã kũum poorã? A bada! D tõe n basa d yam tɩ sẽn paam-b vʋʋsem sõng zaeebã sã n wa loog saasẽ, a Zeezi piis a taabã na n ket n tũuda a Zeova wa sẽn segdã, t’a kell n ges b yelle. Bõe n kɩt tɩ d tõe n kɩs sɩd ne rẽ?

A ZEOVA NIN-BUIIDÃ NA N KET N TŨUD-A-LA WA A SẼN DATÃ

6. Wakat a tãab yell la d na n gome. Bãmb la bʋse?

⁶ Bõe n kɩt tɩ d tõe n bas d yam t’a Zeova nin-buiidã na n ket n tũud-a-la wa a sẽn datã, baa toodã sẽn watã sasa? Yaa bũmb ning tõnd sẽn bãng Biiblã pʋgẽ tõnd wakatã wɛɛngẽ wã yĩnga. Tõnd wakatã yaa toor fasɩ ne pĩnd wẽndẽ Israyɛll nebã wakatã, la kiris-neb nins sẽn vɩɩmd tẽn-tʋmdbã kũum poorã wakatã. Bɩ d gom wakat kãensã b taabã yelle. 1) Pĩnd wẽndẽ Israyɛll nebã wakate, 2) tẽn-tʋmdbã kũum poorã wakate, la 3) tõnd wakatã sẽn yaa “bũmb fãa lebs n manegã wakatã.”—Tʋʋ. 3:21.

7. Pĩnd wẽndẽ Israyɛllã pʋgẽ, bõe yĩng tɩ neb nins sẽn da maand sɩdã sẽn wa n ne b rĩm-dãmbã la neb a taab sẽn maand sẽn yaa wẽngã, b pa koms raoodo?

⁷ Pĩnd wẽndẽ Israyɛll nebã wakatã. A Moyiiz kũumã sẽn wa n kolgã a yeela Israyɛll nebã yaa: “Mam mengã mii vẽeneg tɩ mam kũumã poore, yãmb na n maana sẽn yaa wẽnga, n bʋdg n bas sor ning mam sẽn wilg yãmb tɩ y tũ wã.” (Tõo. 31:29) A Moyiiz leb n keooga Israyɛll nebã tɩ b sã n lebg tõatba, b na n yõg-b lame n kẽng yembdo. (Tõo. 28:​35, 36) Gom-kãensã pidsame bɩ? N-ye. Yʋʋm kobs pʋgẽ, rĩm-dãmb wʋsg maana sẽn yaa wẽnga, la b kẽes Wẽnnaam nin-buiidã moogo. Rẽ kɩtame t’a Zeova sɩbg a nin-buiidã sẽn da lebg wẽnsã, n pa le sak tɩ Israyɛll ned rɩ naam b zug ye. (Eze. 21:​25-27) La Israyɛll neb nins sẽn da maand sɩdã sẽn yã tɩ Wẽnnaam gomdã pidsame wã, kõ-b-la raoodo.—Eza. 55:​10, 11.

8. Tẽn-tʋmdbã kũum poore, kiris-neb wʋsg sẽn sak sɩdã kɩɩsdb zãmsgã la b ra tʋmd tʋʋm-beedã segd n linga tõnd bɩ? Wilg-y y leoorã võore.

⁸ Tẽn-tʋmdbã kũum poorã. Tẽn-tʋmdbã kũum poore, kiris-neb wʋsg sẽn sak sɩdã kɩɩsdb zãmsgã la b ra tʋmd tʋʋm-beedã segd n linga tõnd bɩ? A bada. A Zeezi ra pĩnd n togsame tɩ sɩdã kɩɩsdb wʋsg n na n zĩnd tigingã pʋgẽ. (Mat. 7:​21-23; 13:​24-30, 36-43) A Polle, a Pɩyɛɛr ne a Zã sẽn yaa tẽn-tʋmdbã fãa wilgame tɩ bãmb wakatẽ wã t’a Zeezi bãngr-gomdã zoe n sɩnga pidsgu. (2 Tes. 2:​3, 7; 2 Pɩy.  2:1; 1 Zã 2:18) Tẽn-tʋmdbã kũum poore, sɩdã kɩɩsdbã zãmsgã la tʋʋm-beedã kẽe tigingã pʋgẽ. Kiris-neb ne yʋʋrã tũudmã sɩngame, n naag Babilon-kãsengã sẽn yaa ziri tũudum toor-toorã sẽn naag taabã. Yẽ n yaa Babilon-kãsengã babg ning sẽn tar pãng n yɩɩdã. Le yaa bãngr-gomd n pidsi.

9. Bõe n kɩt tɩ tõnd wakatã yaa toor ne pĩnd wẽndẽ Israyɛll nebã wakatã, la tẽn-tʋmdbã kũum poorã?

⁹ “Bũmb fãa lebs n manegã wakate.” Tõnd wakatã yaa toor ne pĩnd wẽndẽ Israyɛll nebã wakate, la sɩdã kɩɩsg wakat sẽn sɩng tẽn-tʋmdbã kũum poorã. Wãn to la b boond tõnd wakatã? D wae n boond-a lame tɩ dũni-kãngã “yaoolem wakate.” (2 Tɩm. 3:1) La Biiblã wilgdame tɩ wakat a to n naag yaoolem wakatã n sɩnge. Wakat kãng yõodã la a woglmã yɩɩdã yaoolem wakatã. A na n tall n tãaga wakat ning Mesi wã Rĩungã sẽn na n kɩt tɩ ninsaalbã zems zãnga, la a kɩt tɩ tẽngã lebg arzãnã. B boond-a lame tɩ “bũmb fãa lebs n manegã wakate.” (Tʋʋ. 3:21) A sɩnga yʋʋmd 1914. Rẽ tɛka, bõe la b lebs n manege? Pipi, b kɩtame t’a Zeezi lebg Rĩm saasẽ. Woto, a Zeova le tara ned sẽn dɩt naam a yʋʋr yĩnga, n yaa rĩm a Davɩɩd sẽn yɩ ned sẽn maan sɩdã yagenga. La pa naamã bal la a Zeova lebs n lugl ye. Rẽ poor bilfu, a Zeova sõnga a nin-buiidã sẽn be tẽngã zugã tɩ b yaa n tõog n lebs n lugl tũudum hakɩɩkã! (Eza. 2:​2-4; Eze. 11:​17-20) Tũudum hakɩɩkã na n le wa kalma ne sɩdã kɩɩsdb bɩ?

10. a) Tũudum hakɩɩkã sẽn na n yɩ to-to tõnd wakatã wɛɛngẽ, bõe la Biiblã pĩnd n togse? (Ezayi 54:17) b) Bõe yĩng tɩ bãngr-goam a woto buudã kengd raoodo?

¹⁰ Karm-y Ezayi 54:17. Tags-y bãngr-gom-kãngã zug n gese: “Zab-teoog ning fãa b sẽn na n maan n zab ne foom pa na n tõog ye”! Gom-kãensã Wẽnnaam sẽn vẽneg tɩ b gʋlsã pidsda rũndã-rũndã. Ad goam a taab me sẽn pidsd rũndã-rũndã tɩ kengd raoodo: “Fo kom-dibli wã fãa na n paama zãmsg a Zeova nengẽ, la fo kom-dibli wã bãanã na n yɩɩ wʋsgo. B na n vigla foom kãn-kãe tɩrlem pʋgẽ. . . . Fo pa na n yɛɛs bũmb baa fʋɩ ye. Bũmb me kõn kẽes-f rabeem ye. Bala bũmb a woto kõn kolg foom ye.” (Eza. 54:​13, 14) Baa a Sʋɩtãan sẽn yaa “dũni-kãngã wẽnnaamã” meng pa tõe n gɩdg a Zeova nin-buiidã tɩ b pa wilg nebã a Zeova sẽn yaa Wẽnnaam ning buudã ye. (2 Kor. 4:4) B lebs n lugla tũudum hakɩɩkã, t’a pa na n tol n le kalem ne sɩdã kɩɩsdb ye. A na n kell n paa wakat fãa yĩnga. Zab-teoog ning fãa b sẽn na n maan n zab ne tõnd pa na n tõog ye!

 BÕE N NA N MAANE?

11. Bõe n kɩt tɩ d kɩs sɩd tɩ sẽn paam-b vʋʋsem sõng zaeebã sã n loog saasẽ, kʋʋn-kãsengã neb na n paamdame tɩ b wilgd-b sore?

¹¹ B sã n wa tall sẽn paam-b vʋʋsem sõng zaeebã n loog saasẽ, bõe n na n maane? Tẽeg-y t’a Zeezi n yaa d Pe-kɩɩmã. Yẽ n yaa kiris-neb tigingã zu-soaba. A Zeezi yeela vẽeneg yaa: “Yãmb Taoor soab yaa a yembre: Yaa Kiristã.” (Mat. 23:10) A Zeezi sẽn yaa Rĩm n be saasẽ wã na n gesa a karen-biis hakɩɩkã yell wakat fãa. Sẽn yaa Kiristã n na n ges a karen-biisã sẽn be tẽngã zugã yellã, b pa segd n bas tɩ bũmb kẽes-b rabeem ye. La d pa mi Kiristã sẽn na n wilgd a poorẽ dãmbã sor to-to wakat kãngã takɩ ye. Woto wã, bɩ d gom Biiblã kibay a wãn sẽn kengd raood yelle.

12. Wãn to la a Zeova ges a nin-buiidã yell a) a Moyiiz kũumã poore? b) b sẽn kõ a Eli tʋʋmd a to wã poore? (Ges-y fotã me.)

¹² Nand tɩ Israyɛll nebã kẽ kãabg tẽngã pʋgẽ, a Moyiiz kiime. La yɛlã yɩɩ wãn ne Wẽnnaam nin-buiidã? Nin-kãngã sẽn da maand sɩdã kũum poore, a Zeova basa a nin-buiidã sõngr bɩ? Ayo. B sẽn wa n maand sɩd ne a Zeova wã, a Zeova ra geta b yelle. Nand t’a Moyiiz ki, a Zeova yeel-a lame t’a yãk a Zozuwe t’a lʋɩ nin-buiidã taoore. Sẽn deng rẽ, a Moyiiz zãmsa a Zozuwe bũmb toor-toor yʋʋm wʋsg pʋgẽ. (Yik. 33:11; Tõo. 34:9) Sẽn paase, rap wʋsg sẽn da tar minim n da sõngd n get nin-buiidã yelle. Yaa neb tusr-tusr nanambse, neb koabg-koabg nanambse, neb pis-nu-nu nanambse, la baa neb piig-piig nanambse. (Tõo. 1:15) Wẽnnaam nin-buiidã ra paamdame tɩ b get b yell sõma. Yɩɩ woto me a Eli wakatẽ wã. Yʋʋm wʋsg pʋgẽ, a ra lʋɩta taoor tũudum hakɩɩkã wɛɛngẽ, n sõngd Israyɛll nebã. La wakat wa n taame t’a Zeova na n dɩk-a n kẽng Zida sẽn da be goabgã, n tɩ kõ-a tʋʋmd a to. (2 Rĩm. 2:1; 2 Kib 21:12) Woto wã, neb nins sẽn da maand sɩd ne Wẽnnaam Israyɛll buud piigã rĩungã pʋgẽ wã pa na n le paam sõngr bɩ? Pa woto ye. Sẽn deng rẽ, a Eli zãmsa a Eliize bũmb toor-toor yʋʋm wʋsg pʋgẽ. “No-rɛɛsdbã kom-dibli” me n da be. Tõe tɩ b ra sigla nin-kãensã n sõng-b tɩ b paam minim. (2 Rĩm. 2:7) Rẽnd rap wʋsg sẽn maand sɩd n da be, n tõe n sõng n ges Wẽnnaam nin-buiidã yelle. A Zeova kell n pidsa a raabã, la a ges neb nins sẽn maand sɩd ne-a wã yelle.

13. Ebre-rãmb 13:5b pʋgẽ, bõe la a Zeova pʋlem tõndo? (Ges-y fotã me.)

¹³ Y sã n tik kiba-kãensã zugu, y tagsdame tɩ b sã n wa tall sẽn paam-b  vʋʋsem sõng zaeebã yaoolem dãmbã n loog saasẽ, yɛlã na n yɩɩ wãn to? D mii sẽn na n yɩ to-to wã. Biiblã wilga bũmb võor wʋmb sẽn yaa nana la sẽn kengd raoodo. A wilgame t’a Zeova pa na n tol n daag a nin-buiidã sẽn be tẽngã zugã n bas ye. (Karm-y Ebre-rãmb 13:5b.) Kiris-neb nins sẽn paam vʋʋsem sõng zaeebã sul-bil ning sẽn lʋɩt Wẽnnaam nin-buiidã taoor rũndã-rũndã wã yaa wa a Moyiiz ne a Eli. B miime tɩ neb a taabã zãmsgã tara yõod wʋsgo. Na maan yʋʋm wʋsg masã, Siglgã taoor lʋɩtb sull nebã zãmsda rap sẽn naag a Zeezi piis a taabã, tɩ b lʋɩt taoore. Wala makre, b sigla lekoll toor-toor sẽn na yɩl n zãms kãsem-dãmbã, tigims sull yel-gɛtbã, filyall-dãmbã taoor lʋɩtb sull nebã, Betɛllẽ taoor lʋɩtbã, la neb a taaba. Siglgã taoor lʋɩtb sull nebã zãmsda sõngdb b toore, sẽn na yɩl tɩ b sõng ne b sul toor-toorã tʋʋma. Sõngdb-kãens zoe n tʋmda tʋʋm-kãsems siglgã pʋgẽ ne b sũur fãa. B segla b mens sõma n na n kell n ges Kirist piisã yelle.

14. Bõe la d bãng sõs-kãngã pʋgẽ?

¹⁴ Ad bũmb d sẽn bãng sõs-kãngã pʋgẽ: Sẽn paam-b vʋʋsem sõng zaeeb n ket tẽngã zugã fãa sã n wa loog saasẽ to-kãsengã sẽn wat n kolg saabã, Wẽnnaam nin-buiidã na n ket n tũud-a-la ne b sũur fãa. A Zeezi Kirist sẽn lʋɩt b taoorã yĩnga, bũmb pa na n paoog-b ye. D miime tɩ wakat kãnga, a Goog sẽn yit Magoogã sẽn yaa buud toɛy-toɛy sẽn lagem taabã na n zaba ne Wẽnnaam nin-buiidã. (Eze. 38:​18-20) La zab-kãng pa na n kaoos ye. A pa na n tõog tɩ Wẽnnaam nin-buiidã bas a Zeova tũub ye. Sãmbg kae t’a na n fãag-b lame ye! Wẽnnaam vẽnega tẽn-tʋmd a Zã t’a yã “kʋʋn-kãseng” sẽn yaa Kiristã piis a taaba. B yeela a Zã tɩ “kʋʋn-kãsengã” yaa “neb nins sẽn põs to-kãsengã sasa wã.” (Vẽn. 7:​9, 14) Rẽnd d tõe n basa d yam t’a Zeova na n kogl-b lame!

15-16. Sã n yaa ne Vẽnegr 17:​14, bõe la kiris-neb nins sẽn paam vʋʋsem sõng zaeebã na n maan Armagedõ zabrã sasa, la bõe yĩng tɩ rẽ kengd raoodo?

¹⁵ Baasgo, kẽer tõe n sokda b mens yaa: ‘La sẽn paam-b vʋʋsem sõng zaeebã yẽ? B sã n wa kẽng saasẽ, bõe la b na n tɩ  maane?’ Biiblã leokda sok-kãngã vẽenega. A wilgame tɩ dũni-kãngã goosneema-rãmbã “na n zaba ne Pe-bilã.” Yaa vẽeneg tɩ b pa na n tõog ye. Biiblã yeelame tɩ Pe-bilã “na n tõog-b lame.” La ãnd dãmb n na n sõng-a? Vɛrse wã yetame tɩ “yaa neb b sẽn bool la b sẽn yãke,” la “neb sẽn maand sɩda.” (Karm-y Vẽnegr 17:14.) Nin-kãens yaa ãnd dãmba? Yaa sẽn paam-b vʋʋsem sõng zaeebã sẽn vʋʋg n be saasẽ wã. Rẽnd sẽn paam-b vʋʋsem sõng zaeeb n ket tẽngã zugã fãa sã n wa vʋʋg n kẽng saasẽ to-kãsengã sẽn wat n kolg saabã, bũmb nins b sẽn na n maan pipi wã sʋka, zabr n naage. Ad sɩd na n yɩɩ tʋʋm-kãsenga! Kiris-neb nins sẽn paam vʋʋsem sõng zaeebã kẽer da yaa zab-zabdb nand tɩ b lebg a Zeova Kaset rãmba. Sãnda ra yaa sodaas menga. La b wa n lebga kiris-neb hakɩɩka, n bao n bãng b sẽn na n maan to-to tɩ laafɩ zĩnd bãmb ne neb a taabã sʋka. (Gal. 5:22; 2 Tes. 3:16) B pa le kẽesd b toog ninsaalbã zab pʋsẽ ye. La b sã n wa vʋʋg n kẽng saasẽ, b na n naaga Kiristã ne a malɛg-sõamyã wã n zab ne Wẽnnaam bɛɛbã b yaoolem zabre.

¹⁶ Tags-y n ges-y-yã. Rũndã-rũndã, kiris-neb nins sẽn paam vʋʋsem sõng zaeebã kẽer kʋʋlame, n pa le tar pãng ye. La b sã n wa vʋʋg n kẽng saasẽ b na n tara pãn-kãsenga, n lebg wa malɛgs n pa tõe n ki ye. B na n kɩtame tɩ b naag Rĩm a Zeezi Kirist sẽn yaa zabr gãndaoogã n zabe. Armagedõ zabrã poore, b na n naaga a Zeezi n sõng ninsaalbã tɩ b wa zems zãnga. Sãmbg sẽn kae, b sã n wa be saasẽ b na n tõog n sõnga b saam-biisã la b saam-bi-pogsã b sẽn nongã sẽn be tẽngã zugã, n yɩɩd b sẽn wa n yaa ninsaalb sẽn pa zems zãngã.

17. Bõe n kɩt tɩ d miẽ tɩ Wẽnnaam nin-buiidã fãa na n paama koglg Armagedõ zabrã sasa?

¹⁷ Yãmb naaga a Zeezi piis a taabã bɩ? Sã n yaa woto Armagedõ zabrã sã n wa sɩnge, bõe la yãmb segd n maane? Koɛɛg-koɛɛga, teeg-y-yã a Zeova la y tũ sor ning a sẽn na n wilg-yã. Woto tõe n dat n yeelame tɩ y maan bõe? Ad Biiblã sẽn yet tɩ kengd raoodo: “Kẽng-y-yã! Kẽ-y y ro-pʋsẽ wã, n pag kʋɩlensã. Solg-y wakat bilfu, hal tɩ sũ-puugrã looge.” (Eza. 26:20) Wakat kãnga, sẽn tũud-b Wẽnnaam ne b sũur fãa saasẽ la tẽngã zugã fãa na n paama koglgo. D kɩsa sɩd wa tẽn-tʋmd a Poll tɩ “pãn-soaadba, bũmb sẽn be, [la] bũmb sẽn wat . . . pa na n tõog n welg tõnd ne Wẽnnaam nonglmã” ye. (Rom. 8:​38, 39) Tẽegd-y wakat fãa t’a Zeova nong-y lame, la t’a pa na n tol n daag-y n bas ye!