1. Ampindi ci pano awapakwe wano wacili munsi walilecelezya ukuya kwi yulu?

 KU MYAKA ya kunsizi awawomvi wa kwe Yehova wayikolowozyanga ukuti, ‘Ampindi ci pano awapakwe wano wacili munsi walilecelezya ukuya kwi yulu? Pa mpindi yimwi twamanyile ukuti pansizi ya Armagedoni awapakwe wamwi waliyikalako katici mu Paradaise pano watani waye kwi yulu. Lelo mu Ulupungu lwa kwe Malonda ulwa July 15, 2013, twasambilizile ukuti awapakwe wonsinye walilanga lyo wali kwi yulu pano inkondo ya Armagedoni yitani yitalike.—Mat. 24:31.

2. Aliwuzyo ci ncepamwi lino tungayikolowozya, swinya avyani vino twandi tusambilile?

² Mpindi zimwi tungayikolowozya ukuti: Avyani vino vilicitika ku “ng’onzi zinji” wano walitwalilila ukuwombela Yehova ni cisinka mu ‘wucuzi wukulu’? (Yoha. 10:16; Mat. 24:21) Wamwi wangasakamikwa nu kulola ukuti walisyala wonga nga cakuti awanawitu na wankazi awapakwe wiza waya kwi yulu. Lekani tulande pa malyasi ya mu Baibolo yawili yano ncepamwi yangalenga wamwi wakwelenganya wo-o. Swinya twandi tusambilile na pe vino vingalenga watasakamikwa.

VINO VITALICITIKA

3-4. Avyani vino wamwi wangakwelenganya, swinya amulandu ci?

³ Wamwi wangakwelenganya ukuti ing’onzi zinji walileka ukuwombela e Yehova ni cisinka nga cakuti awapakwe wano wawa mwi Wumba Lino Likatungulula wiza wapita kwi yulu. Ncepamwi cino cingalenga wakwelenganya wo-o, apa mulandu na malyasi yamwi aya mu Baibolo. Lekani tulande pe yamwi yawili yano yangalenga wakwelenganya wo-o. Ilyakutalicila, alya kwe Simapepo Mukulu Jehoiada. E Jehoiada walinji  amuwomvi wa kwe Yehova uwa cisinka. Weliwe nu muci e Jehoshabeati, wacinjilizile e Joashi lyo acili amutici nu kumwavwa ukuwa amuntu umuzima swinya imfumu iya cisinka. Co-o calenzile e Joashi awapepa e Yehova nu kucita ivizima. Lelo e Jehoiada watili wafwa, e Joashi watalisile ukucita iviwipe. Wivwilanga awana wa mfumu wano wacitanga iviwipe nu kuleka ukuwombela Yehova.—2 Imila. 24:​2, 15-19.

⁴ Ilya citi wili, alya wina Klistu wano wizile awawako pansizi ya watumwa. Umutumwa Yohani awino walecelezizye ukufwa pa watumwa wonsinye. Pano walinji nu wumi wavwizye awina Klistu awavule ukutwalilila ukuwombela Yehova ni cisinka. (3 Yoh. 4) Ndi wulyanye vino awatumwa wanji wawombesyanga, avino umutumwa Yohani wawombesyanga ukucinjilila amawungwe kwe wano wasambilizyanga ivya wufi. (1 Yoh. 2:18) Pano Yohani wafwile, uwusangu wizile awusalangana ngati alupya. Patazimvile awasangu wizile awatalika ukusambilizya ivya wufi swinya watalisile ukuzumilizya awa mu mawungwe ukucita iviwipe.

5. Avyani vino tutazipizile twakwelenganya pe ya-a amalyasi yawili?

⁵ Uzye ya-a amalyasi ya mu Baibolo yawili yakulanjizya ukuti vino vyacitisile avino vilicitika na ku ng’onzi zinji nga cakuti awapakwe waya kwi yulu? Uzye peyoyo impindi awina Klistu walileka ukupepa Yehova ni cisinka ngati avino Joashi wacisile? Uzye walitalika ukukoncelela ivisambilizyo vya wasangu ngati avino awina Klistu wano wizile awawako pa nsizi ya watumwa wacisile? Ukwasowa nu kuvwilika asa vino ciliwa. Tungasuwila ukuti awapakwe nga wiza waya kwi yulu, awa mu ng’onzi zinji walitwalilila ukupepa Yehova ni cisinka swinya waliwa awasakamalwe. Avyani vino vingalenga tusuwile wo-o?

UKUPEPA KWA CISINKA KULITWALILILA UKUWAKO

6. Ampindi ci zitatu zino twandi tulandepo?

⁶ Acani cino calenga tusuwile ukuti ukupepa kwa cisinka kulitwalilila ukuwako na palyanye pano tuliwapita mu ntazi ku nkolelo? Apa mulandu na vino twasambilila mu Baibolo pa mpindi yino tufisilepo. Yo-o impindi yino tufisilepo yipusine nkaninye ni ya wina Israeli na wina Klistu wano wizile awawako pa nsizi ya watumwa. Lekani tulande pa mpindi zitatu, akuli ukuti: (1) iya wina Israeli, (2) pano awatumwa wonsinye wafwile, ne (3) “impindi yakuyania ivintu vyonsi.”—Imili. 3:21.

7. Acani cino calenzile awina Israeli wano walinji ni cisinka watwalilile ukuwombela e Yehova nanti acakuti imfumu na wanji wacitanga iviwipe?

⁷ Mu mpindi zya wina Israeli. Pano Musa walinji mupipi nu kufwa, wanenile awina Israeli ukuti: “Manyilenye-nto ukuti ndinafwa muliwipa mulozye mukankamule nachino nawasambilizizye.” (Amasu. 31:29) Wawanenile nu kuti walinji nu kuwasenda muwuzya nga cakuti wapondoka. (Amasu. 28:​35, 36) Uzye vyo-o vino walanzile vizile avicitika? Ee vyacitisile. Amuno pa myaka imivule izya mfumu zya wina Israeli zyacitanga iviwipe swinya zyalenzile na wantu ukutalika ukupepa twa leza twawufi. Co-o calenzile e Yehova asunde awantu wano wacitanga iviwipe swinya wizile afumyako uwufumu wa wina Israeli wuno wamwimililangako munsi. (Ezek. 21:​25-27) Lelo pano awina Israeli wano walinji ni cisinka waweni ukuti vino vyalemvilwe mwe Baibolo vyaficiliswa, watwalilizile ukupepa Yehova.—Ayize. 55:​10, 11.

8. Uzye cingatuzungusya wo-o vino awina Klistu wano walinjiko pano awatumwa wonsinye wafwile walesile ukupepa Yehova? Londololani.

⁸ Impindi pano awatumwa wonsinye wafwile. Uzye cingatuzungusya wo-o vino awina  Klistu wano walinjiko pano awatumwa wonsinye wafwile walesile ukupepa Yehova? Awe! Amuno e Yesu walandizile lyankani ukuti wakasambilizya wawufi walivula. (Mat. 7:​21-23; 13:​24-30, 36-43) Awatumwa ponga ngati we Paulo, Peter, ne Yohani wasinincizizye ukuti vino Yesu walanzile vyatalisile kaali ukucitika ku wina Klistu awakutalicila. (2 Tes. 2:​3, 7; 2 Pet. 2:​1-3, 17-19; 1 Yoh. 2:18) Swinya pano awatumwa wonsinye wafwile, awina Klistu wano wizile awawako walesile ukupepa Yehova. Patazimvile nu kuzimba ukufumilila pano umutumwa wakulecelezya wafwile, awina Klistu wano wapondosile wizile awayisanzya mwe Babiloni Mukulu, akuli ukuti mukupepa kwa wufi. Napanye vino Yesu walandizile lyankani vizile avificiliswa.

9. Uzye impindi yino tufisilepo ampindi ci, swinya avyani vino vikacitika?

⁹ “Impindi yakuyania ivintu vyonsi.” Impindi yino tufisilepo yipusine ni mpindi ya wina Israeli ni mpindi pano uwusangu wizile awuvula sana, pano awatumwa wonsinye wafwile. Uzye yonye impindi yino tufisilepo yikakwitwa wuli? Yikakwitwa ukuti “amanda yakupelelechezya” aya kwe yo-o insi imbipe. (2 Tim. 3:1) Lelo e Baibolo yikalanjizya ukuti pano amanda ya kupelelecezya yatalisile, apano “impindi yakuyania ivintu vyonsi” nayo yatalisile. (Imili. 3:21) Yilitwalilila mpaka pano Uwufumu wa wu Mesiya wulilenga awantu ukupwililika nu kulenga insi ukuwa we paradaise. Yo-o impindi yino tukulandapo yatalisile mu 1914. Avyani vimwi vino vyatalisile ukuzipa mwe wo-o umwaka? Icakutalicila, e Yesu watalisile ukuteka kwi yulu. Acino e Yehova wizile awa ni mfumu naswinya iya kumwimililako, yino yapyanizile pa cilimba ca wufumu ica kwe Davidi. E Yehova atapelezilevye pa-a, lelo watalisile nu kunyosya ukupepa kwa cisinka. (Ayize. 2:​2-4; Ezek. 11:​17-20) Uzye ukupepa kwa cisinka kulilowa naswinya?

10. (a) Avyani vino Baibolo yalandila lyankani pa kupepa kwa cisinka? (Ayizeya 54:17) (b) Amulandu ci wuno ya-a amasesemo yakatuwomezya?

¹⁰ Wazyani Ayizeya 54:17. Teyelenganyani pa wusesemo wakuti: “Ukuwa Pasi ichanzo chimwi chino chasulwa chino chilikuchisa”! Ya-a amazwi yakuficiliswa pe yo-o impindi. Kwawa amazwi na yanjizye yano yakuficiliswa ayakuti: “Nenenye nalwane ane muntu ndisambilizya awantu wako, mbape ulongo numutende. Ukusimichila nukuchita ichete vilikuwomya, ulifyuka kukukwelengulwa nakukutinia.” (Ayize. 54:​13, 14) Ne Satana nye e “leza wa mu nsinye yoo”, nawenye atawa  na maka ayakulesya umulimo wakusambilizya wanji pe Yehova. (2 Kor. 4:4) E Yehova wanyosya ukupepa kwa cisinka swinya kutalitela kulowepo na swinya. Kulitwalilila ukuwako umuyayaya. Kusi icanzo icili consinye cino wangatupanjila cino cingawomba!

VINO VILICITIKA

11. Acani cino calenga tusinincizye ukuti e Yehova atalilecelezya awa mwi wumba kulu nga cakuti awapakwe wiza waya kwi yulu?

¹¹ Avyani vino vilicitika nga cakuti awapakwe wonsinye wiza waya kwi yulu? Mwakwizuka ukuti twawa ne Yesu e Kacema witu swinya umutwe wi wungwe. Wayilandizile umweneco ukuti: We “Mesaya-nye wenganye-nsu awili Nankolelo nanti Intunguluzi.” (Mat. 23:10) E Yesu Imfumu yitu wino akuteka kwi yulu atalipotwapo ukusakamala awantu wakwe. Wo-o vino awino aliwatungulula, awantu munsi wataliwatina nanti cimwi. Kweni tutamanya vyonsi vino Yesu alicita pa kutungulula awantu wakwe peyoyo impindi. Acino lekani tulandeko pa malyasi ya mu Baibolo yamwi yano yangatuwomya.

12. Uzye e Yehova wasakamile wuli awantu wakwe (a) pano Musa wafwile? (b) pano wapile Eliya umulimo wunji? (Lolani ni cikope.)

¹² E Musa wafwile lyo awina Israeli watani winjile na Munsi ya Wulayo. Nomba uzye awantu wa kwe Yehova wasyazile wuli? Uzye Yehova walesile ukuwasakamala? Awe mukwai! E Yehova wasakamalanga wano watwalilizile ukuwa ni cisinka. Wanenile Musa pano atani afwe ukuti asambilizye Joshua ivyakutungulula awantu. Acino e Musa wasambilizizye Joshua pa myaka imivule. (Ukuf. 33:11; Amasu. 34:9) Cinji acakuti, kwalinji na wonsi wanji wano wasonsilwe ukutungulula awantu. (Amasu. 1:15) E Yehova wasakamile sana awantu wakwe. Wonye avino calinji na mu mpindi ya kwe Eliya. E Eliya wawombesizye pa myaka imivule ukwavwa awina Israeli ukupepa e Yehova ukulingana na vino akalonda. Lelo mukupita kwa mpindi, e Yehova wizile apa e Eliya umulimo wunji. (2 Izya. 2:1; 2 Imila. 21:12) Nomba uzye e Leza walecelezizye awantu wakwe awa cisinka awa mu wufumu wa myiko 10 uwa wina Israeli? Awe. Amuno wasyazile ne Elisha wino Eliya wasambilizizye pa myaka imivule. Swinya kwalinji “nawatumwa” [“awana wakasesema,” NWT] wano wawasambilizye ivya kutungulula awantu wa kwe Yehova. (2 Izya. 2:7) Fwandi kwalinji awonsi wa cisinka awavule awakutungulula awantu. E Yehova watwalilizile ukuficilisya ukulonda kwakwe nu kusakamala wakapepa wakwe awa cisinka.

13. Avyani vino Yehova watulaya pa Waheberi 13:5? (Lolani ni cikope.)

 ¹³ Ndi vino twasambilila, uzye mukwelenganya ukuti avyani vino vilicitika nga cakuti awapakwe wonsinye wano wacili wali munsi wiza waya kwi yulu? Tutazipizile twasakamikwa. E Baibolo yalanda ukwasowa ukupita na mumbali ukuti: E Yehova atalitela alecelezye awantu wakwe awa munsi. (Wazyani Waheberi 13:5.) Ndi wulyanye vino calinji kwe Musa ne Eliya, iwumba litici ilya wina Klistu awapakwe lyamanya ukuti cacindama ukusambilizyako wanji imilimo. Pa myaka imivule awa mwi Wumba Lino Likatungulula wakasambilizya awonsi awa mu ng’onzi zinji ivya kutungulula awantu. Ku cakulolelako, wapekanya ama sukulu ya kusambilizya wa eluda, wa kangalila wa miputule, wano wakalolecesya pa milimo pa bethel, awa mwe Komiti ya Musambo, wamisionari na ma sukulu yanji. Iwumba Lino Likatungulula likasambilizya na wakavwa wawo ivya kuwomba imilimo. Wa-a wakavwa wakawomba ni cisinka mwi wungwe swinya wayipekanya ukusakamala ing’onzi zya kwe Klistu nga cakuti awapakwe wiza waya kwi yulu.

14. Avyani vino twasambilila?

¹⁴ Ukufika pa-a, twasambilila ukuti: Ukupepa kwa cisinka kulitwalilila munsi, asa mulandu nu kuti awapakwe awakulecelezya waliya kwi yulu lyo nu wucuzi wukulu wutani wusile. Swinya nanti acakuti ukulemenkana kwa nko kuno kukakwitwa ukuti e Gogi wa ku Magogi kulisansa awantu wa kwe Leza, ukupepa kwa cisinka kweni kutalitela kulowe. Amuno e Yesu Klistu awino aliwatungulula. (Ezek. 38:​18-20) Ko-o ukusansa kuliwakovye pampindi ntici swinya kutalicimvya awantu wa kwe Yehova nanti ukuwalesya ukumupepa. Umutumwa Yohani waweni “iwumba kulu” ilya ng’onzi zinji mu cilolwa. Wamunenile ukuti lyo-o “iwumba kulu” likufuma ‘mu wucuzi wukulu’ (Ukuwu. 7:​9, 14) Fwandi co-o calenga tusuwile ukuti e Yehova alitupususya!

15-16. Ukulingana nu Ukuwumbulika 17:​14, avyani vino awapakwe waliwacita pa Armagedoni, swinya amulandu ci wuno ukumanya wo-o kukatuwomezya?

¹⁵ Wamwi wangayikolowozya ukuti: ‘Avyani  vino awapakwe waliya mukuwomba nga waya kwi yulu?’ E Baibolo yasuka lyo-o iwuzyo ukwasowa nu kupita mu mbali. Yikalanda ukuti ama wuteko yamwe yo-o insi ‘yaliwalwa nu Mwana-ng’onzi’ lelo yatalicimvya. Amuno e Baibolo yalanda nu kuti: “Umwana-ng’onzi aliwacimvya.” Awaweni wano walimwavwa? Awano “wawita,” “wano wawasola,” swinya “awasuwilwa.” (Wazyani Ukuwumbulika 17:14.) Awaweni wanye wa-a? Awapakwe wano walizyulupuka. Waliya kwi yulu lyo nu wucuzi wukulu wuli mukusila. Umulimo uwukulu wuno walitalicila ukuwomba, akulwa. Awapakwe wamwi pano watani wawe Ante zya kwe Yehova, walwanga na wantu wanji ne wamwi walinjipo awasilika. Nomba wiza wasambilila icine nu kuwa awantu wa mutende. (Gal. 5:22; 2 Tes. 3:16) Swinya wasya ni vyanzo vyonsinye vino wawomvyanga. Lelo walila waya kwi yulu, waliwombela ponga ne Yesu na wangeli, kukulwa inkondo ya kulecelezya na walwani wa kwe Yehova.

¹⁶ Nga mwelenganyapo sana, awapakwe wamwi wakota swinya na maka yasila. Lelo nga wazyulupucila kwi yulu, waliwa na maka nkaninye swinya waliwa avyelewulwa vya kumuzimu. Cinji acakuti pano waliwawalwa, waliwa ponga ne Songo Wavita, e Yesu Klistu Imfumu. Ne pa nsizi ya Armagedoni, waliwombela ponga ukwavwa awantu munsi ukuwa awapwililike. Asa vyo-o vitupu, waliyavwa nkaninye awanawitu na wankazi munsi ukucila na pe vino wakawavwa pe yo-o impindi pano watani wapwililike.

17. Twamanya wuli ukuti awawomvi wa kwe Leza walicinjililwa pa Armagedoni?

¹⁷ Uzye mwawa mwi wumba lya ng’onzi zinji? Avyani vino muliwalondeka ukucita nga cakuti inkondo ya Armagedoni yatalika? Ukwasowa nu kuvwilika muliwalondeka ukusuwila sana Yehova nu kukonka vino akuminena. Pe vino aliwatunena pawa na vino walanda mu Baibolo ukuti: “Yinjilani mu ng’anda zinu muyiyalile nivisakati. Mutele muvwame katichi wusuke uwukali wakwe Leza wusile.” (Ayize. 26:20) E Yehova alicinjilila wonsinye awa cisinka munsi na mwi yulu. Ndi wulyanye vino umutumwa Paulo walanzile, nasweswenye twasuwila ukuti ‘pasi nanti cimwi cino cingatupatula ku lukundo lwakwe Leza. Nanti amfumu nanti ivintu vino vilipo, nanti avintu vino viliyiza.’ (Roma. 8:​38, 39) Lyonsinye mwakwizuka ukuti, e Yehova wamikunda nkaninye swinya atalimilecelezya!