1. ¿Kema itstosej nochi tlapejpenilmej ipan iluikak?

 ACHTOUIA amo tijmatiyayaj kema yaskiaj iluikak katli Jehová kintlapejpenijtok. Timoiljuiyayaj se keskij toikniuaj tlapejpenilmej momanauiskiaj kema mochiuaskia Armagedón uan itstoskiaj se keski tonali ipan Xochimili. Pero ipan La Atalaya, julio 15, 2013 tikitakej nochi tlapejpenilmej katli itstosej ipan Tlaltipaktli yasej iluikak kema nechka peuas Armagedón (Mat. 24:31).

2. ¿Tlake uelis motlajtlaniaj sekij? ¿Uan tlake tikitasej ipan ni tlamachtili?

² Uelis sekij motlajtlaniaj: ¿Tlake kinpanos toTeotsij itekipanojkauaj katli itstosej ipan Tlaltipaktli kema mochijtos nopa ueyi tlaijiyouilistli? (Mat. 24:21; Juan 10:16). Uelis sekij motekipachouaj pampa moiljuiaj amo kimatisej tlake kichiuasej kema tlapejpenilmej ayokmo itstosej ipan Tlaltipaktli. Ma tikitakaj ome tlapoualistli tlen uelis kichiua kiampa ma moiljuikaj. Nojkia tikitasej kenke amo kinamiki techtekipachos nopa tlamantli.

TLEN AMO PANOS

3, 4. ¿Tlake uelis motlajtlaniaj se keskij uan kenke?

³ Sekij uelis motlajtlaniaj tlaj katli kichiaj itstosej ipan Tlaltipaktli kitlauelkauasej Jehová kema katli kinyakanaj Jehová itlajtoltemakauaj yasej iluikak. ¿Kenke kiampa moiljuiaj? Ma tikitakaj se keski tlapoualistli tlen uelis kichijki kiampa ma moiljuikaj. Achtoui ma tikitakaj tlake kichijki nopa sumo sacerdote Joiada (o Jehoiadá), katli kuali kitekipanok toTeotsij. Ya uan isiua Josabet (o Jehosabeat),  kimokuitlauijkej Joás (Jehoás) kema nojua eliyaya se pilokichpiltsi uan kipaleuijkej amo ma kitlauelkaua Jehová uan kuali ma tlanauati. Kema Joiada ayamo mikiyaya, ni tlanauatijketl kuali kitekipanok Jehová. Pero kema Joiada mijki, Joás pejki kichiua tlen amo kuali. Ayokmo kitekipanok Jehová pampa kichijki tlen sekinok tekichiuanij kiiljuijkej (2 Crón. 24:2, 15-19).

⁴ Nojkia ma tikitakaj tlen kinpanok Cristo itokilijkauaj ipan siglo ome. Kema apóstol Juan nojua itstoya, kinpaleuik Cristo itokilijkauaj kuali ma kitekipanokaj Jehová (3 Juan 4). Uan sanse kej sekinok apóstoles, Juan nojkia kichijtoya kampeka kinpaleuis toikniuaj amo ma kineltokakaj tlen apóstatas tlamachtiyayaj (1 Juan 2:18). Pero kema mijki, miakej Cristo itokilijkauaj pejkej kineltokaj tlen apóstatas tlamachtiyayaj uan kitlauelkajkej Jehová.

5. ¿Tlake amo kinamiki timoiljuisej tlen ni ome tlapoualistli?

⁵ ¿Nojkia kiampa kinpanos Cristo itokilijkauaj katli itstosej ipan Tlaltipaktli kema tlapejpenilmej yasej iluikak? ¿Kitlauelkauasej Jehová kej kichijki Joás? ¿Kinneltokasej apóstatas kej kichijkej Cristo itokilijkauaj ipan siglo ome? ¡Amo kiampa kichiuasej! Timotemachiaj maske tlapejpenilmej ayokmo itstosej ipan Tlaltipaktli, nochi Jehová itekipanojkauaj nojua kuali kitekipanojtosej uan itstosej katli kinmokuitlauisej. ¿Kenke kiampa tikijtouaj?

NOCHIPA TIJUEYICHIUASEJ JEHOVÁ KEJ KINAMIKI

6. ¿Tlake eyi tlamantli tikitasej?

⁶ ¿Kenke timotemachiaj nojua tijueyichijtosej Jehová kej ya kipaktia maske tikixnamikisej tlaouijkayotl? Pampa Biblia kiijtoua tojuantij amo tiitstokej kej itstoyaj israeleuanij uan kej itstoyaj Cristo itokilijkauaj ipan siglo ome. Yeka ma tikitakaj tlen panok 1) kema itstoyaj israeleuanij, 2) kema ya miktoyaj nochi apóstoles uan 3) kema kikualtlalisej nochi tlamantli o tlen panoskia ipan ni tonali (Hech. 3:21).

7. ¿Kenke israeleuanij nojua motemachijkej ipan Jehová maske sekinok kitlauelkajkej?

⁷ Kema itstoyaj israeleuanij. Kema nechka mikiskia, Moisés kiniljuik israeleuanij: “Nijmati kema nimikis inmotochonchiuasej uan inkikauasej nopa ojtli tlen niinmechnauatijtok xijtokilikaj” (Deut. 31:29). Nojkia kiniljuik tlaj kitlauelkauaskiaj Jehová, ininkualankaitakauaj kinuikaskiaj ipan seyok altepetl (Deut. 28:35, 36). ¿Nelia mochijki tlen Moisés kiijtok? Kena. Miakej tlanauatianij kitlauelkajkej Jehová uan israeleuanij nojkia kiampa kichijkej. Yeka, Jehová kintlatsakuiltik uan ayokmo kikajki ma tlanauatikaj ininteipaixuiuaj (Ezeq. 21:25-27). Kema moaxitik nochi ni tlamantli, kinyolchikajki israeleuanij katli amo kitlauelkajkej Jehová (Is. 55:10, 11).

8. ¿Kenke Cristo itokilijkauaj tlen siglo ome pejkej ayokmo tlaneltokaj?

⁸ Tlen panok kema ya miktoyaj nochi apóstoles. Ipan tlanechikoli tlen siglo ome, ayokmo kuali tlaneltokakej. ¿Kenke? Pampa Jesús ipa kiijtojtoya kiampa panoskia (Mat. 7:21-23; 13:24-30, 36-43). Ipan achtoui siglo, apóstoles Pablo, Pedro uan Juan kiijtojkej ipan nopa tonali ya itstoyaj apóstatas, kej Jesús kiijtojtoya panoskia (2 Tes. 2:3, 7; 2 Ped. 2:1; 1 Juan 2:18). Kema ya miktoya apóstol Juan, Cristo itokilijkauaj katli mochijkej apóstatas mokalakijkej ipan Ueyi Babilonia, tlen kiixnextia nochi religiones tlen amo melauak. Sampa moaxitik tlen Jesús kiijtojtoya.

9. ¿Kenke amo sanse kej nama tiitstokej kej uejkajkia itstoyaj?

 ⁹ Kema kikualtlalisej nochi tlamantli. Kej nama tiitstokej amo eli sanse kej kema itstoyaj israeleuanij yon toikniuaj tlen siglo ome, pampa ipan nopa tonali miakej apóstatas pejkej kalakij ipan tlanechikoli. Kej tiitstokej nama tojuantij tikiljuiaj “itlamia tonali”, pampa nechka kitsontlamiltisej tlen amo kuali (2 Tim. 3:1). Biblia nojkia kiijtoua pejki seyok tonali tlen más uejkauaskia uan más ipati. Eli nopa tonali kema toTeotsij “kikualtlalis nochi tlamantli” (Hech. 3:21). Pejki ipan 1914 uan tlamis kema toTeotsij iTlanauatijkayo peuas tekichiuas ipan ni Tlaltipaktli, kema nochi tielisej tixitlauakej uan Tlaltipaktli mochiuas se xochimili. ¿Uan tlake tlamantli kikualtlalik Jehová ipan 1914? Jesús pejki tekichiua ipan iluikak uan yeka Jehová sampa kipixki se tlanauatijketl tlen kiixnextiyaya iTlanauatijkayo uan eliyaya se iteipaixui David. Pero amo san ya nopa panok. Teipa sampa pejkej kiueyichiuaj Jehová kej kinamiki (Is. 2:2-4; Ezeq. 11:17-20). ¿Nochipa tijueyichijtosej Jehová kej kinamiki?

10. 1) ¿Tlake kiijtok Biblia panoskia ipan ni tonali? (Isaías 54:17). 2) ¿Kenke techyolchikaua tlen kiijtok Isaías?

¹⁰ (Xijpoua Isaías 54:17). Ma timoiljuikaj tlen kiijtoua ni tlajtolpanextili: “Niyon se tepostli tlen kichijchijtokej tlakamej axuelis inmechtsontlamiltis”. Ni texto moaxitia ipan ni tonali. Nojkia moaxitia ni tlajtoli: “Uan na niinmoteko nielis niinmotlamachtijka uan nikinmachtis nochi inmotlakauaj uan nochi inmokoneuaj kipiasej miak tlaseuilistli uan itstosej ika kuali. Inmechnauatis se tlanauatijketl tlen xitlauak uan tlen kichiua nochi tlen kuali. […] Ayok inmajmauisej pampa axaka kinekis inmechtemajmatis” (Is. 54:13, 14). Yon Satanás, katli kinauatia ni Tlaltipaktli, ueli kichiua ayokmo ma titlamachtikaj ipan nochi Tlaltipaktli (2 Cor. 4:4). Nama tijueyichiuaj Jehová kej kinamiki. ¡Uan nochipa kiampa tijchijtosej! Yon se tlamantli uelis kichiuas ayokmo ma tijueyichiuakaj Jehová.

TLEN KENA PANOS

11. ¿Kenke timotemachiaj amo toselti tiitstosej kema tlapejpenilmej yasej iluikak?

¹¹ ¿Tlake panos kema tlapejpenilmej yasej iluikak? Ma tikilnamikikaj Jesús eli totlamokuitlauijka uan ya kiyakana Jehová itlanechikol. Ya nojkia kiijtok: “San setsi eli inmoTlayakanka, Cristo” (Mat. 23:10). Jesús nochipa techmokuitlauijtos. Yeka, pampa ya techyakana, toTeotsij itekipanojkauaj katli  tiitstosej ipan Tlaltipaktli, amo timajmauisej. Maske amo tijmatij kenijkatsa techmanauis ipan nopa tonali, ipan Biblia onka se keski tlapoualistli tlen techpaleuis amo ma timajmauikaj. Ma tikitakaj se keski.

12. 1) ¿Kenijkatsa Jehová kinmokuitlauik israeleuanij kema mijki Moisés? 2) ¿Uan tlake kichijki kema Elías yajki tlatekipanoto sejkanok? (Nojkia xikita tlaixkopinkayotl).

¹² Moisés mijki kema israeleuanij ayamo kalakiyayaj ipan nopa tlali tlen kintenkauilijtoyaj. Uajka, ¿tlake kinpanok israeleuanij kema Moisés ayokmo itstoya? ¿Mokajkej ininselti uan ayokmo kimatkej tlake kichiuasej? Amo, pampa Jehová itstoya ininuaya kema amo kitlauelkajkej. Kema Moisés ayamo mikiyaya, Jehová kiiljuik, Josué kinyakanaskia israeleuanij uan Moisés ya kimachtijtoya miak xiuitl (Éx. 33:11; Deut. 34:9). Nojkia itstoyaj miakej tlakamej katli miak xiuitl kinyakantoyaj israeleuanij, katli kinyakanayayaj mil, cien, cincuenta uan sekij matlaktli (Deut. 1:15). Kej tikitaj, israeleuanij kuali kinmokuitlauiyayaj. Nojkia ma timoiljuikaj tlen kichijki Elías. Ya miak xiuitl kinpaleuik israeleuanij ma kiueyichiuakaj Jehová. Pero teipa Jehová kititlanki ipan Judá, tlen mokauayaya ika sur (2 Rey. 2:1; 2 Crón. 21:12). ¿Mokajkej ininselti Jehová itekipanojkauaj tlen nopa matlaktli tribus tlen Israel? Amo, pampa Elías miak xiuitl kimachtijtoya Eliseo. Nojkia kinpaleuiyayaj telpokateokamanalouanij katli uelis kinkualchijchiuayayaj ipan se escuela (2 Rey. 2:7). Kej tikitaj, nochipa itstoyaj tlakamej katli kuali tlaneltokayayaj uan katli kinyakankej toTeotsij itekipanojkauaj. Kiampa Jehová uelki kiaxitia tlen mosentlalijtoya uan kinmokuitlauik itekipanojkauaj.

13. ¿Tlake techtenkauilia Hebreos 13:5? (Nojkia xikita tlaixkopinkayomej).

¹³ Kej tikitakej ipan ni tlapoualistli, ¿tlake timoiljuiaj kinpanos toTeotsij itekipanojkauaj kema tlapejpenilmej yasej iluikak? Ya tijmatij tlake panos pampa Biblia kiijtoua Jehová amo kema kintlauelkauas (xijpoua Hebreos 13:5). Katli kinyakanaj Jehová itlajtoltemakauaj nojkia kichiuaj kej Moisés uan Elías pampa kimatij tlauel moneki kinmachtisej sekinok. Inijuantij miak xiuitl kinmachtijtokej katli mokauasej ipan Tlaltipaktli kenijkatsa kiyakanasej tlajtolmoyaualistli. Yeka kinmachtiaj ueuejtlakamej, katli tepaxalouaj chijchikuasej metstli, Katli kiyakanaj Betel uan katli kiyakanaj se tekitl ipan kali Betel uan sekinok. Nojkia toikniuaj Katli kinyakanaj Jehová itlajtoltemakauaj,  kinmachtijtokej se keskij toikniuaj para ma tlapaleuikaj ipan se keskij Comités. Ni toikniuaj kuali kichiuaj ininteki. Nopa kinextia kuali kinkualchijchijtokej para kinyakanasej Jehová itekipanojkauaj.

14. ¿Tlake tlamantli techmachtia tlen tikitstokej?

¹⁴ Nochi tlen tikitstokej techmachtia se tlamantli tlen tlauel ipati: kema tlapejpenilmej yasej iluikak uan kema nechka tlamis ueyi tlaijiyouilistli, Jehová itekipanojkauaj nojua kiueyichijtosej kej kinamiki ipan Tlaltipaktli. Uan pampa techyakanas Jesucristo, nochipa kiampa tijchijtosej. Ipan nopa tonali, techteuisej tokualankaitakauaj, tlen Biblia kintokaxtia Gog tlen Magog (Ezeq. 38:18-20). Pero amo uejkauas techteuijtosej uan amo techtlanisej. Jehová techmanauis, yeka nochipa tijueyichijtosej. Ipan se tlanextilili, apóstol Juan kinitak “onpano miak tlakamej” tlen Cristo itokilijkauaj uan nojkia kiiljuijkej inijuantij elij katli kisaj tlen “ueyi tlaijiyouilistli”. Uajka ni kiijtosneki amo tleno kinpanos (Apoc. 7:9, 14).

15, 16. Kej kiijtoua Apocalipsis 17:14, ¿tlake kichiuasej tlapejpenilmej ipan Armagedón uan kenke techyolchikaua tijmatisej nopa tlamantli?

¹⁵ Pero uelis timotlajtlaniaj seyok tlamantli: ¿Tlake kichiuasej tlapejpenilmej kema itstosej iluikak? Biblia kiijtoua tekichiuanij “kiteuisej nopa Pilborregojtsi, pero nopa Pilborregojtsi kintlanis”. Uan ¿ajkia inijuantij kipaleuisej ma tlatlani? Nopa texto kiijtoua: “Katli Dios kinnotstok, kintlapejpenijtok uan amo kitlauelkajtokej”. Inijuantij elij nopa tlapejpenilmej katli ya moyolkuitosej iluikak (xijpoua Apocalipsis 17:14 a). Nopa kiijtosneki kema nochi tlapejpenilmej itstosej iluikak, achtoui monekis tlateuisej. ¡Tlauel ueyi tekitl tlen kichiuasej! Se keskij tlapejpenilmej kinpaktiyaya tlateuisej kema ayamo kitekipanouayayaj Jehová uan se keskij eliyayaj soldados, pero kema mochijkej Cristo itokilijkauaj ayokmo mosisinijkej yon tlateuijkej  (Gál. 5:22; 2 Tes. 3:16). Kema itstosej iluikak tlateuisej iuaya Cristo uan sekinok ángeles ipan Armagedón.

¹⁶ Ma timoiljuikaj ipan ni tlamantli: se keskij toikniuaj katli kintlapejpenijtokej yasej iluikak uan nojua itstokej ipan Tlaltipaktli, ayokmo kipiaj chikaualistli pampa ya uejueyij. Pero kema itstosej iluikak, ayokmo kema mikisej, kipiasej chikaualistli uan tlateuisej iuaya Jesucristo. Kema ya panotos Armagedón kinpaleuisej maseualmej ma elikaj xitlauakej. Kema itstosej iluikak más kinpaleuisej ininikniuaj uan amo kej kema itstoyaj ipan Tlaltipaktli.

17. ¿Kenijkatsa tijmatij Jehová itekipanojkauaj amo tleno kinpanos ipan Armagedón?

¹⁷ Tlaj timotemachia tiitstos ipan Tlaltipaktli, ¿tlake monekis tijchiuas kema mochijtos Armagedón? San monekis timotemachis ipan Jehová uan tijkauas ma mitsyakana. Uelis monekis tijchiuas tlen kiijtoua Isaías 26:20: “Xiakaj inmochaj uan xijtsakuakaj inmopuertas kampa initstosej temachtli. Ximotlatikaj se tlalochtli hasta kema ya panotos ikualankayo TOTEKO”. Tlauel techyolchikaua tijmatisej Jehová itekipanojkauaj katli itstosej iluikak uan ipan Tlaltipaktli amo tleno kinpanos. Kej apóstol Pablo, nojkia timotemachiaj “yon tekichiuanij, yon tlamantli tlen nama onka yon tlen teipa onkas [ . . . ] uelis kichiuas Dios ayokmo ma techikneli” (Rom. 8:38, 39, TNM). Amo kema xikilkaua Jehová mitsiknelia uan amo kema mitstlauelkauas.