1. ¿Kemanian nochin taijitalmej yetoskejya iluikak?

 NE UEJKAUJ, itekitikauan Dios motajtaniayaj nejin: “¿Kemanian amo mokauasok nion se taijital nikan taltikpak?”. Achto tiknemiliayaj ke xa sekin taijitalmej mokauaskiajok nikan taltikpak satepan ke mochiuas Armagedón uan nemiskiaj itech xochital se tiempo. Sayoj ke itech amaix Tanejmachtijkej 15 de julio de 2013, timomachtijkej ke nochin taijitalmej yetoskejya iluikak achto ke peuas Armagedón (Mat. 24:31).

2. ¿Toni ueliskia timotajtaniskej? Uan, ¿toni tikitaskej itech nejin tamachtilis?

² Sayoj ke xa timotajtaniskej: ¿Toni kinpanos “okseki ichkamej” akin kitekitilijtoskej Jehová nikan taltikpak keman mochiujtos “tetsaujkatajyouilis”? (Juan 10:16; Mat. 24:21). Xa sekin kintekipachoua maj kinsenkauakan oso maj amo kimatikan toni kichiuaskej keman tokniuan taijitalmej amo yetoskejok nikan taltikpak. Maj tikitakan ome taman tein ika tajtoua Biblia tein xa kichiuak maj ijkon tanemilikan. No tikitaskej keyej amo moneki maj timotekipachokan.

TEIN AMO PANOS

3, 4. ¿Toni motajtaniaj sekin, uan keyej?

³ Sekin xa motajtaniaj ox okseki ichkamej kikauaskej Jehová keman Oloch Taojtokaltianij amo yetoskejok nikan taltikpak para techixyekanaskej. ¿Keyej? Maj tikitakan seki taman tein ika tajtoua Biblia tein xa kichiua maj ijkon tanemilikan. Yekinika ika titajtoskej tayekankatiopixkat Jehoiadá, se kuali itekitikauj Dios. Yejua uan isiuatsin Jehosabeat, kiyekpiakej se okichpiltsin akin monotsaya Jehoás uan kipaleuijkej maj mochiua se kuali tekiuaj uan maj yolkuali. Keman Jehoiadá nemiaok, Jehoás amo keman kikauak Jehová. Sayoj ke keman momikilij Jehoiadá,  Jehoás peuak kichiua tein amo kuali. Kikauak Jehová keman peuak kintajtolkaki akin kitekitiliayaj tekiuaj, yejuan amo yolkualmej katkaj (2 Crón. 24:​2, 15-19).

⁴ No ininka titajtoskej tokniuan akin nenkej satepan ke momikilijkej itatitaniluan Jesús. De nochin tatitanilmej, yejua Juan akin satepan momikilij, keman nemia kinpaleuij miakej maj amo kikauakan Jehová (3 Juan 4). Ijkon kemej kichiujkej itatitaniluan Jesús, Juan no semi mochikauak kinyekpias nechikolmej para maj amo kinkajkayauanij nion kinmachtianij tein amo kuali (1 Juan 2:18). Sayoj ke satepan ke Juan momikilij, miakej itech nechikol peuak kiixnamikij tamachtilis tein melauak. Xiujmej satepan yejuan no peuak tamachtiaj nejon, uan kikauayaj maj tokniuan itech nochi nechikolmej kichiuanij tein amo kuali.

5. ¿Toni amo moneki tiknemiliskej keman Biblia ika tajtoua tein kichiujkej sekin?

⁵ ¿No ijkon kichiuaskej okseki ichkamej keman taijitalmej yaskej iluikak? ¿Kichiuaskej kemej Jehoás uan kikauaskej Jehová? ¿No kiixnamikiskej tamachtilis tein melauak ijkon kemej kichiujkej miakej satepan ke momikilijkej tatitanilmej? ¡Amo! Tikyekmatij ke maski taijitalmej amo yetoskejok nikan taltikpak, okseki ichkamej kisentokaskej kiueyichiuaskej Jehová kemej moneki uan yejuatsin kisentokas kinyekpias. ¿Keniuj tikmatij?

NOCHIPA TIKUEYICHIUASKEJ JEHOVÁ KEMEJ KIYOLPAKTIA

6. ¿Toni eyi taman timomachtiskej?

⁶ ¿Keyej tikmatij ke tiksentokaskej tiktekitiliskej Jehová kemej kiyolpaktia maski titajyouiskej satepan? Porin Biblia tamachtia ke kemej tinemij axkan, amo ijkon kemej nemiaj israelitas nion kemej nemiaj tokniuan satepan ke momikilijkej nochin tatitanilmej. Yejua ika maj kuali timomachtikan tein panok: 1) keman nemiaj israelitas, 2) satepan ke momikilijkej nochin tatitanilmej, uan 3) “tonalmej keman nochi motayektalis” oso itech nejin tonalmej (Hech. 3:21).

7. ¿Keyej israelitas akin tatakamatiaj amo monekia mosenkauaskej keman tekiuanij uan oksekin kichiuayaj tein amo kuali?

⁷ Keman nemiaj israelitas. Tepitsin achto ke Moisés momikiliskia, yejua kiniluij israelitas: “Nikmati ke satepan ke nimomikilis, namejuan nankichiuaskej tein amo kuali uan amo nankitakamatiskej tein namechnauatij xikchiuakan” (Deut. 31:29). No kinnejmachtij ke komo taixnamikiaj, kinuikaskiaj itech okse altepet (Deut. 28:​35, 36). ¿Mochiuak tein Moisés kijtojka? Kemaj. Miakej tekiuanij miak xiujmej amo kitakamatkej Jehová uan israelitas no ijkon kichiujkej, yejua ika kintatsakuiltij akin amo kitakamatkej uan amo kikauakok maj nion se israelita mochiua tekiuaj (Ezeq. 21:​25-27). Sayoj ke israelitas akin amo kikaujkej Jehová, semi kinyolchikauak keman kiitakej ke mochiujka tein moijtojka (Is. 55:​10, 11).

8. ¿Keyej amo moneki tikmojkaitaskej maj miakej kikauanij uan kiixnamikinij tamachtilis tein melauak?

⁸ Satepan ke momikilijkej nochin tatitanilmej. Amo moneki tikmojkaitaskej maj itech nechikol, miakej kikauanij tamachtilis tein melauak uan maj kiixnamikinij. ¿Keyej? Porin Jesús ipa kijtojkaya ke tel miakej ijkon kichiuaskiaj (Mat. 7:​21-23; 13:​24-30, 36-43). Itech yekinika siglo, tatitanilmej Pablo, Pedro uan Juan, kijtojkej ke mochiujtoyaya tein Jesús kijtojka  porin miakej kikaujkaj uan kiixnamiktoyajya tamachtilis tein melauak (2 Tes. 2:​3, 7; 2 Ped. 2:1; 1 Juan 2:18). Tepitsin satepan ke tatitanil Juan momikilij, akin kiixnamikiaj tamachtilis tein melauak peuak pouij itech Ueyi Babilonia, nochi taneltokalismej tein amo melaujkej. ¡Oksepa mochiujtoya tein Jesús kijtojka!

9. ¿Itech toni tonalmej tinemij axkan, uan toni mochiujtok?

⁹ “Tonalmej keman nochi motayektalis”. Axkan amo tinemij kemej nemiaj israelitas uan akin nenkej satepan ke momikilijkej nochin tatitanilmej, keman miakej kiixnamikkej tamachtilis tein melauak. ¿Keniuj moixmatij nejin tonalmej? Tikixmatij kemej “tonalmej keman tatamitiya” keman amo uejkaua tamis nochi tein amo kuali (2 Tim. 3:1). Sayoj ke Biblia kinextia ke ijkuak no peuak okseki tonalmej tein okachi uejkauaskiaj uan tein okachi kualtsin. Motokaytia “tonalmej keman nochi motayektalis” (Hech. 3:21). Peuak itech xiuit 1914 uan tamis keman amo akinok yeski tajtakolej uan taltikpak yeski se xochital kampa taixyekantos Cristo. ¿Uan toni kiyektalij Jehová itech xiuit 1914? Kemej Jesús peuak tekiuajti iluikak, Jehová oksepa kipiaya akoni taixyekanas, katka semej ichankauan tekiuaj David. Uan no, tepitsin satepan, Jehová kinpaleuij itekitikauan maj oksepa kiueyichiuanij kemej yejuatsin kineki (Is. 2:​2-4; Ezeq. 11:​17-20). Sayoj ke, ¿uelis ijkon tikueyichiuaskej nochipa?

10. 1) ¿Keniuj kijtoua Biblia ke tikueyichiuaskiaj Jehová axkan? (Isaías 54:17). 2) ¿Keyej techyolchikaua tein moijtojka itech Isaías?

¹⁰ (Xikonixtajtolti Isaías 54:17). Maj tikitakan nejin tein achto moijtojka ke mochiuaskia: “Nion se tepos tein kichijchiuaskej para ika mitsixnamikiskej, amo kualtias”. Nejin tajtolmej mochiujtokya axkan. No mochiujtokya nejin okseki tajtolmej: “Jehová kinmachtis nochin mokoneuan, uan mokoneuan semi yolseujtoskej. Tinemis kampa nochipa mochiuas tein kuali yetok. […] Amo tikmouilis nion teyi uan amo teyi mitsmojmoujtis, porin amo timouisok” (Is. 54:​13, 14). Nion Satanás, “dios tein taixyekantok nikan taltikpak”, amo uelis kitsakuilis maj amo motamachtiok kemej kichiujtok ixolal Jehová (2 Cor. 4:4). Axkan tikueyichiuajya Jehová kemej kiyolpaktia uan nochipa ijkon tikchiuaskej. Amo teyi techchiuilis nion se tepos tein kichijchiuaskej para ika techixnamikiskej.

 TEIN KEMAJ PANOS

11. ¿Keniuj tikmatij ke Jehová amo kisenkauas ixolal keman nochin taijitalmej yetoskejya iluikak?

¹¹ ¿Toni kemaj panos keman taijitalmej yaskej iluikak? Maj tikelnamikikan ke Jesús yejua toTajpixkauj uan yejua kiixyekana nechikol. Yejua kijtoj: “Sayoj se namoueyi Taixyekankauj, Cristo” (Mat. 23:10). Jesús akin taixyekantok ne iluikak nochipa kinyekpias itatojtokakauan akin kitakamatij. Uan kemej yejua taixyekantok, tokniuan akin mokauaskej nikan taltikpak amo moneki momoujtiskej. Maski amo tikmatij keniuj Cristo kipaleuis ixolal Jehová, uelis techyolseuis tein Biblia kijtoua. Maj tikitakan.

12. 1) ¿Keniuj Jehová kiyekpiak ixolal satepan ke momikilij Moisés? 2) ¿Keniuj no ijkon kiyekpiak keman Elías yajki okseko? (No xikonita taixkopin).

¹² Moisés momikilij achto ke israelitas kalakiskiaj itech tal tein Dios motenkaujka kinmakas. ¿Kisenkauak Jehová ixolal satepan ke Moisés momikilij? Amo, Jehová kinpaleuiaya keman yejuan kitakamatiaj. Achto ke momikiliskia Moisés, Jehová kiluij ke Josué yejua akin satepan kinixyekanaskia israelitas, Moisés miak xiujmejya kimachtijka Josué (Éx. 33:11; Deut. 34:9). No moajsiaj okseki takamej akin kinixyekanayaj israelitas: sekin kinixyekanayaj mil, sekin cien, sekin cincuenta uan sekin majtakti (Deut. 1:15). Ixolal Dios amo yetoya iselti porin yetoya akoni kiyekpias. No ijkon kipanok Elías. Miak xiujmej kinpaleuij israelitas maj kiueyichiuakan Jehová. Sayoj ke Jehová kititanik maj okseko kitekitiliti, ompa Judá (2 Rey. 2:1; 2 Crón. 21:12). ¿Mokauaskiaj ininselti majtakti uejueyi kalyetonij israelitas? Amo. Elías miak xiujmejya kimachtijka Eliseo. Uan “ininkoneuan tanauatianij” akin kuali kinmachtiayaj keniuj kichiuaskej inintekiuj, no kinpaleuiayaj (2 Rey. 2:7). Nochipa yetoyaj akonimej kuali kiixyekanaskiaj ixolal Dios. Yejua ika Jehová kisentokak kichiuak tein kiixtalijtoya uan kinyekpiak itekitikauan.

13. ¿Toni motenkaua Jehová itech Hebreos 13:5b? (No xikonita taixkopimej).

¹³ Axkan ke tikitakejya tein kinpanok seki itekitikauan Dios akin nenkej ne uejkauj, ¿toni tikonnemilia ke kinpanos itekitikauan Jehová akin mokauaskej nikan taltikpak satepan ke nochin taijitalmej yaskej iluikak? Niman se kimati toni porin Biblia kijtoua ke Jehová amo keman kinsenkauas itekitikauan (xikonixtajtolti  Hebreos 13:5b). Ijkon kemej kichiujkej Moisés uan Elías, sekin tokniuan taijitalmej akin axkan kiixyekanaj ixolal Jehová kimatij ke semi moneki kinmachtiskej oksekin. Miak xiujmejya, Oloch Taojtokaltianij kinmachtianij takamej akin pouij iniuan okseki ichkamej para maj yejuan kichiuakan tekit tein mochiujtok. Moixtaliani maj tokniuan kiselikan tamachtilis, kemej tayekananij, akin takalpanouaj itech circuito, tokniuan akin taixyekanaj itech sucursal uan tokniuan akin kiixyekanaj sejse tekit tein mochiua Betel. Uan no, tokniuan akin pouij iuan Oloch Taojtokaltianij kinmachtiaj seki tokniuan para maj kinpaleuikan itech tekit tein sejsemej kichiuaj. Nejin tokniuan kuali kichiujtokejya miak taman tekit. Yejua ika tikmatij ke yejuan kuali kinyekpiaskej iichkauan Cristo satepan ke taijitalmej yaskej iluikak.

14. ¿Toni tikajsikamatkej itech nejin tamachtilis?

¹⁴ Nochi tein tikitakejya itech nejin tamachtilis techmachtia se taman tein semi moneki. Keman tantiasya tetsaujkatajyouilis uan nochin taijitalmej yaskejya iluikak, itekitikauan Dios akin mokauaskej nikan taltikpak kisentokaskej kiueyichiuaskej Jehová. Kemej Jesús kinixyekanas, nion akin uan nion teyi uelis kintsakuilis maj kiueyichiuakan Jehová. Tikmatij ke nochin tekiuajyomej akin Biblia kintokaytia Gog akin ualeua itech tal Magog, kiixnamikiskej ixolal Dios (Ezeq. 38:​18-20). Sayoj ke amo uejkauak kintajyouiltijtoskej uan amo teyi uelis kinchiuiliskej. Amo uelis kintsakuiliskej maj amo kiueyichiuakanok Jehová porin yejuatsin kinmakixtis. Se tonal, tatitanil Juan kinitak “tel miakej” akin pouij iniuan okseki iichkauan Cristo, uan no kimatiltijkej ke yejuan akin makiskej keman mochiuak “tetsaujkatajyouilis”. Yejua ika tikmatij ke makisaskej (Apoc. 7:​9, 14).

15, 16. Kemej kijtoua Apocalipsis 17:​14, ¿toni kichiuaskej taijitalmej keman mochiujtos Armagedón, uan keyej nejon techyolchikaua?

¹⁵ Sayoj ke, ¿toni kichiuaskej taijitalmej keman yaskej ne iluikak? Biblia kijtoua  ke nochin akin taixyekanaj nikan taltikpak “iuan moteuiskej Ichkatsin”, “sayoj ke Ichkatsin kintanis”. ¿Uan akonimej kipaleuiskej maj tatani? Versículo kijtoua: “Akin Dios kinnotsak, akin kinijitak uan akin amo kikauaj”, yejuan tokniuan taijitalmej akin yetoskejya ne iluikak (xikonixtajtolti Apocalipsis 17:14). Nejin kijtosneki ke keman nochin taijitalmej yetoskejya iluikak, kinnauatiskej maj tateuikan uan yejua nejon yekinika taman tein kichiuaskej. ¡Se kimojkaita tein kichiuaskej! Sekin taijitalmej kiuelitayaj moteuiskej achto ke kiixmatiskiaj Jehová. Sekin hasta katka soldados. Sayoj ke keman kiixmatkej Jehová, peuak kuali mouikaj iniuan oksekin uan amo moteuiayajok (Gál. 5:22; 2 Tes. 3:16). Sayoj ke keman yetoskej iluikak, tateuiskej iuan Cristo uan nochin iangeluan para kinixpoloskej nochin akin kiixnamikij Dios.

¹⁶ Maj tiknemilikan nejin: seki tokniuan taijitalmej akin yetokejok nikan taltikpak tel xiuejkejya uan amo chikaujkejok. Sayoj ke keman nemiskejya iluikak yeskij espíritus tein amo momikiliskej, chikaujkej yeskij uan tateuiskej iuan Tekiuaj Jesucristo. Satepan ke mochiuas Armagedón, kinpaleuiskej akin nemiskej nikan taltikpak maj amo tajtakolejkejok. Taijitalmej okachi uelis kinpaleuiskej tokniuan keman yetoskej ne iluikak ke keman yetoyaj nikan taltikpak uan katkaj tajtakolejkej.

17. ¿Keniuj tikmatij ke nochin itekitikauan Dios kuali yetoskej keman mochiujtos Armagedón?

¹⁷ ¿Tionpoui iniuan okseki ichkamej? Komo kemaj, ¿toni moneki tikonchiuas keman mochiujtos Armagedón? Sayoj moneki tiontakuaujtamatis iuan Jehová uan tikonchiuas tein mitsonnauatia. Yejua ika xa no monekis tikonchiuas tein kijtoua Isaías 26:​20, kijtoua: “Xikalaki, noxolal, itech mocuartos tein moajsij taijtik uan ximotatsakui. Ximotati tepitsin hasta maj pano kualanyot”. Semi techyolseuia tikmatiskej ke keman mochiujtos nejon, nochin itekitikauan Dios kuali yetoskej ompa iluikak uan nikan taltikpak. Ijkon kemej tatitanil Pablo, tikmatij ke “nion tekiuanij, nion tein axkan onkak, nion tein onkas satepan” uelis kichiuas “maj Dios amo techtasojta” (Rom. 8:​38, 39). Amo keman xikonelkaua ke Jehová mitsontasojta uan nochipa mitsonpaleuis.