1. AmaKhristu okucina agcotshiweyo azahamba nini ezulwini?

 KUDALA abantu bakaJehova babezibuza umbuzo lo othi, ‘AmaKhristu okucina agcotshiweyo wona azahamba nini ezulwini?’ Sasicabanga ukuthi ngemva kwempi ye-Amagedoni amanye amaKhristu agcotshiweyo ayezaqhubeka ephila emhlabeni olipharadayisi okwesikhathi esithile. Kodwa iNqabayokulinda kaJuly 15, 2013, yasicacisela ukuthi bonke abagcotshiweyo abazabe besesemhlabeni bazathathwa baye ezulwini impi ye-Amagedoni ingakaqalisi.—Mat. 24:31.

2. Yiwuphi umbuzo ongaba khona futhi sizaxoxa ngani esihlokweni lesi?

² Kodwa umbuzo ongaba khona ngowokuthi kuzakwenzakalani ‘ngezinye izimvu’ zikaKhristu ezizabe zikhonza uJehova zithembekile emhlabeni ngesikhathi ‘sokuhlupheka okukhulu’? (Joh. 10:16; Mat. 24:21) Abanye abezinye izimvu bangakhathazeka ngokuthi bazasala bengakwazi lokuthi benzeni nxa abafowethu labodadewethu abagcotshiweyo sebesezulwini. Khathesi asihloleni indaba ezimbili eziseBhayibhilini okungabe kuyizo ezibenza bakhathazeke. Ngemva kwalokho sizaxoxa ngokuthi kungani kungamelanga sikhathazeke.

OKUNGASOZE KWENZAKALE

3-4. Yiwuphi umbuzo abanye abangazibuza wona futhi kungani?

³ Abanye bangazibuza ukuthi abezinye izimvu abasoze batshiye ukukhonza kweqiniso yini nxa abafowethu abagcotshiweyo abeQula Elikhokhelayo bengasekho ukuthi babakhokhele. Mhlawumbe okwenza bazibuze lokhu ngezinye izindaba eziseBhayibhilini. Asixoxeni ngezibonelo ezimbili. Esokuqala simayelana loMphristi Omkhulu uJehoyada, indoda eyayimthanda  uJehova. Yena lomkakhe uJehoshabhethi bavikela uJehowashi ngesikhathi esesemncane futhi bamncedisa ukuthi abe yinkosi elungileyo lethembekileyo. UJehowashi waqhubeka esenza kuhle ngesikhathi uJehoyada esaphila. Kodwa kwathi uJehoyada esefile uJehowashi waqalisa ukwenza izinto ezimbi. Walalela abakhokheli ababesenza okubi wasetshiya ukukhonza uJehova.—2 Imilan. 24:​2, 15-19.

⁴ Isibonelo sesibili simayelana lamaKhristu aphila ngemva kwesikhathi sabaphostoli. Umphostoli owacinela ukufa nguJohane. Ngesikhathi esaphila wayekhuthaza amaKhristu, ewancedisa ukuthi aqhubeke ethembekile kuJehova. (3 Joh. 4) UJohane labanye abaphostoli ababethembekile babesebenze nzima okwesikhathi eside ukuthi bavikele ibandla ebantwini ababefundisa izinto ezingamanga. (1 Joh. 2:18; khangela imicijo yokutaditsha eku-2 Thes. 2:7 ku-Nguqulo Yomhlaba Omutsha yesiNgisi.) UJohane wathi esefile abanengi emabandleni baqalisa ukulandela imfundiso zabahlamuki. Eminyakeni eyalandelayo kuwo wonke amabandla amaKhristu kwasekufundiswa izimfundiso zamanga futhi lezinto ezimbi sezivunyelwa.

5. Kuyini okungamelanga sicabange ukuthi kuzakwenzakala?

⁵ Kambe lokho okwenzakala ezindabeni lezi ezimbili yikho yini okuzakwenzakala kwabezinye izimvu zikaKhristu nxa abagcotshiweyo sebeye ezulwini? AmaKhristu athembekileyo ayabe esemhlabeni azatshiya yini lokho ayabe ekufundisiwe njengoJehowashi? Azahlamuka yini njengalokho okwenziwa ngamaKhristu amanengi abaphostoli sebefile? Hatshi. Ayisikho okuzakwenzakala. Siyaqiniseka ukuthi nxa abagcotshiweyo bengasekho emhlabeni abezinye izimvu bazaqhubeka bemkhonza kuhle uJehova futhi uzaqhubeka ebanakekela. Kuyini okwenza siqiniseke kangaka?

UKUKHONZA KWEQINISO KUZAHLALA KUKHONA

6. Yiziphi izikhathi ezintathu esizaxoxa ngazo?

⁶ Kungani singaqiniseka ukuthi ukukhonza kweqiniso kuzahlala kukhona langezikhathi ezinzima ezizayo? Kungenxa yalokho esesikufunde eBhayibhilini mayelana lesikhathi esiphila kuso. Isikhathi esiphila kuso sitshiyene kakhulu lesikhathi sama-Israyeli asendulo lesikhathi abaphostoli sebefile. Khathesi asixoxeni ngezikhathi lezi ezintathu: (1) Isikhathi sama-Israyeli asendulo (2) lesikhathi abaphostoli sebefile (3) kanye lesikhathi esiphila kuso, ‘isikhathi uNkulunkulu azabuyisela ngaso zonke izinto.’—Imiseb. 3:21.

7. Kungani abantu ababethembekile babengalahli ithemba nxa amakhosi labanye bonke babekhetha ukwenza izinto ezimbi?

⁷ Isikhathi sama-Israyeli asendulo. UMosi wathi esezakufa watshela ama-Israyeli wathi: “Ngikwazi mhlophe ukuthi nxa sengifile lizakwenza okubi sibili njalo lizaphambuka endleleni engilitshele yona.” (Dute. 31:29) UMosi waphinda waxwayisa ama-Israyeli ukuthi nxa angahlamuka ayezathunjwa. (Dute. 28:​35, 36) Akukhulumayo kwenzakala yini? Ye kwenzakala. Okweminyaka eminengi eyalandelayo amakhosi amanengi ayekhetha ukwenza okubi futhi abantu babewalandela ekukhonzeni kwamanga. Lokhu kwenza uJehova wabalahla abantu bakhe ababesenza okubi futhi kasaphindanga wavuma ukuthi kube lamakhosi ako-Israyeli. (Hez. 21:​25-27) Lanxa kunjalo ama-Israyeli ayethembekile ayesiba lesibindi sokuqhubeka ekhonza uNkulunkulu nxa ebona amazwi akhe egcwaliseka.—Isaya. 55:​10, 11.

8. Kumele kusimangalise yini ukuthi kwaba labahlamuki ebandleni lobuKhristu ngemva kokufa kwabaphostoli? Chasisa.

⁸ Isikhathi abaphostoli sebefile. Kumele kusimangalise yini ukuthi kwaba labahlamuki ebandleni lamaKhristu ngemva kokufa  kwabaphostoli? Hatshi. UJesu wayevele etshilo ukuthi abanengi babezahlamuka ebandleni. (Mat. 7:​21-23; 13:​24-30, 36-43) Umphostoli uPhawuli, loPhetro loJohane bakutsho ukuthi isiphrofetho sikaJesu sasesigcwaliseka ngesikhathi besaphila. (2 Thes. 2:​3, 7; 2 Phet. 2:1; 1 Joh. 2:18) Ngemva kwesikhathi sabaphostoli izimfundiso zamanga zagcwala ebandleni lamaKhristu. Kwaba lamaKhristu amanengi amanga njalo aba yingxenye yeBhabhiloni Enkulu, inkolo zamanga ezisemhlabeni wonke. Okwenzakalayo kwakugcwalisa isiphrofetho esakhulunywa nguJesu.

9. Isikhathi esiphila kuso sitshiyene njani lesikhathi sama-Israyeli asendulo lesikhathi abaphostoli sebefile?

⁹ ‘Isikhathi uNkulunkulu azabuyisela ngaso zonke izinto.’ Isikhathi esiphila kuso sitshiyene lesikhathi sama-Israyeli asendulo lesikhathi sokuhlamuka okwenzakala abaphostoli sebefile. Thina siphila kusiphi isikhathi? Sijayele ukubiza isikhathi esiphila kuso ngokuthi ‘zinsuku zokucina’ zomumo lo wezinto omubi. (2 Thim. 3:1) Kodwa iBhayibhili litshengisa ukuthi kulesinye isikhathi esaqalisa ngesikhathi kuqalisa insuku zokucina. Isikhathi leso side ukwedlula insuku zokucina futhi sizaqhubeka uMbuso kaMesiya uze ususe isono ebantwini njalo utshintshe lomhlaba ube lipharadayisi. Sibizwa ngokuthi “yisikhathi uNkulunkulu azabuyisela ngaso zonke izinto.” (Imiseb. 3:21) Isikhathi leso saqalisa ngo-1914. Manje kuyini okwabuyiselwayo ngalesosikhathi? UJesu waba yiNkosi ezulwini. Ngakho uJehova waphinda waba leNkosi emmelayo, eyayiyindlalifa yeNkosi eyayithembekile uDavida. Lanxa kunjalo uMbuso lo ayisiwo wodwa uJehova awubuyiselayo. Ngemva kwalokho ukukhonza kweqiniso kwaqalisa ukuvuselelwa. (Isaya. 2:​2-4; Hez. 11:​17-20) Kuzaphinda kuphambaniseke futhi yini?

10. (a) IBhayibhili lathi kuzahamba njani ngokukhonza kweqiniso ngesikhathi sethu? (U-Isaya 54:17) (b) Iziphrofetho lezo zisiduduza njani?

¹⁰ Bala u-Isaya 54:17. Cabanga ngesiphrofetho lesi esithi: “Akulasikhali esilungiselwe ukukuhlasela esizaphumelela.” Amazwi la aphefumulelweyo ayagcwaliseka lamuhla. Nansi esinye isiphrofetho esiduduzayo esigcwaliseka kithi lamuhla: ‘Bonke abantwabakho bazafundiswa nguJehova, lokuthula kwabantwabakho kuzakuba kukhulu. Uzamiswa uqine ekulungeni. Awusoze wesabe lutho njalo awusoze ube lesizatho sokwethuka, ngoba akulalutho olwesabekayo oluzasondela kuwe.’ (Isaya. 54:​13, 14) ‘Lonkulunkulu womumo lo wezinto’ uSathane, kalamandla okumisa umsebenzi wokufundisa owenziwa ngabantu bakaJehova. (2 Khor. 4:4) Ukukhonza kweqiniso  sekuvuselelwe futhi akusoze kuphinde kuphanjaniswe, kuzahlala kukhona kuze kube nini lanini. Akulasikhali esilungiselwe ukusihlasela esizaphumelela!

KUZAKWENZAKALANI?

11. Kuyini okusenza singathandabuzi ukuthi ixuku elikhulu alisoze lilahlwe nxa abagcotshiweyo sebesezulwini?

¹¹ Kuzakwenzakalani nxa bonke abagcotshiweyo sebesezulwini? Khumbula ukuthi uJesu unguMelusi wethu futhi uyinhloko yebandla lobuKhristu. UJesu wathi: “Munye uMkhokheli wenu, uKhristu.” (Mat. 23:10) INkosi yethu esibusa ezulwini kayisoze yehluleke ukwenza umsebenzi wayo. Abalandeli bakaKhristu abasemhlabeni akumelanga besabe lutho ngoba nguye ophethe intambo. Kodwa asikwazi konke okumayelana lokuthi uKhristu uzabakhokhela njani abantu bakhe ngalesosikhathi. Khathesi asixoxeni ngezinye izibonelo eziseBhayibhilini ezingasiqinisa.

12. UJehova wabanakekela njani abantu bakhe (a) uMosi esefile? (b) u-Elija esephiwe omunye umsebenzi? (Khangela lomfanekiso.)

¹² UMosi wafa ama-Israyeli engakangeni eLizweni Lesithembiso. Manje kwenzakalani ebantwini bakaNkulunkulu? UJehova wahle wabalahla yini abantu bakhe ngoba sekufe uMosi? Hatshi kabalahlanga. Nxa babeqhubeka bethembekile, uJehova laye wayeqhubeka ebanakekela. UMosi wathi engakafi uJehova wamtshela ukuthi abeke uJoshuwa ukuthi akhokhele abantu bakhe. Kwasekuleminyaka eminengi uMosi eqeqetsha uJoshuwa. (Eks. 33:11; Dute. 34:9) Kanti njalo kwakulabanye abanengi ababewenza kuhle umsebenzi wokukhokhela. Kwakulezinduna zabantu abayinkulungwane, lezinduna zabalikhulu, lezinduna zabantu abangamatshumi amahlanu, lezinduna zabantu abalitshumi. (Dute. 1:15) Abantu bakaNkulunkulu babephethwe kuhle sibili. Isibonelo sesibili simayelana lo-Elija. Wayeselesikhathi eside ekhokhela ama-Israyeli ekukhonzeni kweqiniso. Kodwa kwafika isikhathi lapho uJehova amthuma khona ukuthi ayekwenza omunye umsebenzi koJuda. (2 Amakho. 2:1; 2 Imilan. 21:12) Pho abantu ababethembekile ababesembusweni wako-Israyeli wezizwana ezilitshumi basebelahliwe yini? Hatshi babengalahlwanga. Kwasekuleminyaka eminengi u-Elija eqeqetsha u-Elisha. Kanti njalo ‘kwakulamadodana abaphrofethi’ okukhanya lawo ayeqeqetshiwe. (2 Amakho. 2:7) Yikho kwakulamadoda amanengi ayethembekile ayengakhokhela abantu bakaNkulunkulu. UJehova waqhubeka egcwalisa lokho ayekuhlosile futhi enakekela abantu bakhe abathembekileyo.

13. UHebheru 13:5b usiqinisekisa ngani? (Khangela lomfanekiso.)

 ¹³ Ngemva kokuhlola izibonelo lezi ucabanga ukuthi kuzakwenzakalani nxa bonke abagcotshiweyo sebesezulwini? Kucacile ukuthi kuzakwenzakalani. IBhayibhili lisiqinisekisa ukuthi uJehova kasoze abalahle abantu bakhe abasemhlabeni. (Bala uHebheru 13:5b.) Iqembu elincane lamaKhristu agcotshiweyo akhokhelayo lamuhla liyakuzwisisa ukuthi kuqakathekile ukuqeqetsha abanye njengalokho okwakusenziwa nguMosi lo-Elija. Sekuleminyaka eminengi abazalwane beQula Elikhokhelayo beqeqetsha abazalwane bezinye izimvu ukuthi bakhokhele. Ngokwesibonelo bahlele ukuthi kube lezikolo zokuqeqetsha abadala, ababonisi beziqinti,amalunga amaKhomithi Egatsha, labafowethu abakhokhelayo eBhetheli kanye labanye. IQula Elikhokhelayo belizinika isikhathi sokuqeqetsha abasizi bamaKhomithi atshiyeneyo eQula Elikhokhelayo. Abafowethu laba abangabasizi bamakhomithi atshiyeneyo balemisebenzi eminengi abayenzayo enhlanganisweni futhi bayenza kuhle. Bakulungele ukuqhubeka ngomsebenzi wokunakekela izimvu zikaKhristu.

14. Yiwuphi umcijo oqakathekileyo endabeni le?

¹⁴ Nanku umcijo oqakathekileyo: Nxa sekuseduze ukuthi ukuhlupheka okukhulu kuphele futhi bonke abagcotshiweyo sebesezulwini, ukukhonza kweqiniso akusoze kutshabalale, kuzabe kulokhu kukhona emhlabeni. Siyambonga uJesu Khristu ngoba uzabe elokhu ebakhokhela abantu bakaNkulunkulu, baqhubeke bekhonza bethembekile. Siyakwazi ukuthi ngalesosikhathi bayabe behlaselwa liqembu lezizwe ezimanyeneyo iBhayibhili elizibiza ngokuthi nguGogi waseMagogi. (Hez. 38:​18-20) Kodwa uGogi waseMagogi kasoze aphumelele ukumisa abantu bakaNkulunkulu ukuthi baqhubeke bekhonza uJehova. UNkulunkulu uzabasindisa kumnyama kubomvu! Umphostoli uJohane watshengiswa umbono lapho abona khona “ixuku elikhulu” elibunjwa ngezinye izimvu zikaKhristu. Watshelwa ukuthi ‘ixuku lelo elikhulu’ ‘laliphuma ekuhluphekeni okukhulu.’ (Isam. 7:​9, 14) Lokho kwenza siqiniseke ukuthi uJehova uzabasindisa abantu bakhe!

15-16. USambulo 17:14 uthi kuyini abagcotshiweyo abazabe bekwenza ngesikhathi se-Amagedoni njalo kungani lokho kukhuthaza?

 ¹⁵ Abanye bangazibuza ukuthi abagcotshiweyo bayafika benzeni ezulwini. IBhayibhili liyawuphendula ngokucacileyo umbuzo lo. Liyasitshela ukuthi ohulumende bomhlaba lo ‘bazakulwa leMvana’ kodwa bazanqotshwa. IBhayibhili lithi: “IMvana izanqoba.” Ngobani abazabe beyincedisa? Ivesi iyasitshela, ithi: ‘Ngababiziweyo’, ‘abakhethiweyo’ njalo “abathembekileyo.” (Bala iSambulo 17:14.) Ngobani laba? Ngabagcotshiweyo abazabe sebevusiwe. Ngakho nxa ukuhlupheka okukhulu sekuzaphela futhi abagcotshiweyo bokucina abasemhlabeni sebeye ezulwini, umsebenzi wokuqala abazawenza yikulwa. Kuyabe kungumsebenzi omkhulu lowo. Amanye amaKhristu agcotshiweyo ayekuthanda ukulwa engakabi ngoFakazi bakaJehova. Abanye bawo babengamasotsha, kodwa ngokuhamba kwesikhathi baba ngamaKhristu eqiniso basebefunda ukuhlala ngokuthula labanye. (Gal. 5:22; 2 Thes. 3:16) Bayekela ukusekela izimpi kodwa bazathi sebevusiwe sebesezulwini bancedise uKhristu lezingilosi ezingcwele ukulwa lezitha zikaNkulunkulu empini yokucina.

¹⁶ Amanye amaKhristu agcotshiweyo asesekhona emhlabeni asekhulile futhi awasaqinanga emzimbeni. Kodwa azathi esevusiwe ayaphila ezulwini azakuba yizidalwa zomoya ezilamandla futhi ezingafiyo njalo azaphiwa umsebenzi wokulwa ndawonye leNkosi eliqhawe, uJesu Khristu. Ngemva kokulwa empini ye-Amagedoni bazancedisa uJesu ukususa isono ebantwini. Akuthandabuzwa ukuthi sebesezulwini bazakwenzela abafowabo labodadewabo ababathandayo izinto ezinhle kakhulu ukwedlula lezo ababenzela zona besesemhlabeni.

17. Sikwazi njani ukuthi zonke izinceku zikaNkulunkulu zizabe zivikelekile ngesikhathi sempi ye-Amagedoni?

¹⁷ Ungowezinye izimvu yini? Nxa kunjalo kuzamele wenzeni nxa impi ye-Amagedoni isiqalisa? Nanku okuzamele ukwenze: Themba uJehova futhi ulalele lokho asitshela khona. Kugoqelani lokho? Nanku iBhayibhili elisitshela khona: ‘Ngenani ezindlini zenu zangaphakathi,beselivala iminyango yenu, licatshe okwesikhatshana ulaka luze ludlule.’ (Isaya. 26:20) Zonke izinceku zikaNkulunkulu ezithembekileyo ezulwini lasemhlabeni zizabe zivikelekile ngalesosikhathi. Siyaqiniseka njengomphostoli uPhawuli ukuthi ‘ohulumende, loba izinto ezikhona khathesi, loba ezizakuza azisoze zisehlukanise lothando lukaNkulunkulu.’ (Rom. 8:​38, 39) Hlala ukhumbula ukuthi uJehova uyakuthanda lokuthi kasoze akulahle loba sekutheni!