1. Uunake aagwayekwa ayehe taya ka ya megulu?

 OMIMVO dha ka pita, oshigwana shaJehova osha li sha ipula kutya, ‘Uunake Aakriste aagwayekwa yahugunina taya ka falwa megulu?’ Oshikando shimwe otwa li tatu dhiladhila kutya otashi vulika yamwe yomaagwayekwa taya ka kala keviparadisa uule wokathimbo konima yiita yaArmagedon. Ihe otwa ilongele mOshungolangelo yo 15 Juli 2013 kutya aagwayekwa ayehe mboka ye li natango kombanda yevi otaya ka falwa megulu manga iita yaArmagedon inaayi tameka. — Mat. 24:31.

2. Epulo lini tashi vulika li holoke po, noshike tatu ka kundathana moshitopolwa shika?

² Ihe nando ongawo, otashi vulika pu holoke epulo ndika: Oshike tashi ka ningilwa ‘oonzi dhilwe’ dhaKristus ndhoka tadhi ka adhika tadhi longele Jehova nuudhiginini kombanda yevi pethimbo ‘lyuudhigu uunene’? (Joh. 10:16; Mat. 24:21) Aamwatate naamwameme yamwe kunena otashi vulika taya ipula kutya otaya ka ninga po shike, ngele aagwayekwa ya kuthwa po ya ye megulu. Natu ka kundathaneni omahokololo gaali gopamanyolo ngoka tashi vulika ge ya ningithe ya dhiladhile ngawo. Opo nduno otatu ka taleni kutya omolwashike inaashi pumbiwa tu kale tatu ipula nasho.

SHOKA ITAASHI KA NINGILWA OONZI DHILWE

3-4. Aantu yamwe otashi vulika haya ipula nashike, nomolwashike?

³ Aantu yamwe otashi vulika taya ipula ngele oonzi dhilwe otadhi ka etha po okulongela Jehova, uuna aamwatate aagwayekwa yOlutuwiliki itaaye dhi wilike we. Otashi vulika omahokololo gamwe gopaMbiimbeli ogo tage ya tilitha. Natu taleni iiholelwa iyali. Shotango, osha kwatela mo Omuyambi Omukuluntu Jehoiada. Okwa li omupiya gwaKalunga omudhiginini. Ye nanekulu lye, Jehosheba, oya li ya gamene okamatyona Joas, noye ka kwathele ka kale omukwaniilwa e li nawa nomudhiginini. Joas okwa longele Jehova nokwa li te shi enditha nawa, sho omukokele Jehoiada a li e na omwenyo. Ihe konima sho Jehoiada a si, Joas okwa etha po  okulongela Jehova. Okwa li a pulakene kaawiliki aakolokoshi e ta etha po okulongela Jehova. — 2 Ondjal. 24:2, 15-19.

⁴ Oshiholelwa sha landula ko ooshoka shAakriste yomethelemumvo etiyali. Omuyapostoli Johannes, ngoka a li a hupu po sho aayapostoli ayehe ya si, okwa li e li enwethomo ewanawa kAakriste oyendji, moku ya kwathela ya tsikile okulongela Jehova nuudhiginini. (3 Joh. 4) Ngaashi owala aayapostoli yalwe yaJesus ya li ya ningi, Johannes okwa li a longo nuudhiginini, opo a gamene omagongalo kaashunimonima, mboka haya taandeleke omalongo giifundja. (1 Joh. 2:18; tala uuyelele wokukonakonwa wa kankamena 2 Tes. 2:7.) Konima sho Johannes a si, oyendji momagongalo oya ningi aashunimonima. Konima yomimvo omilongo dha ka landula ko, omalongo gaashunimonima oga li ga taandele megongalo lyopaKriste.

5. Ngele tashi ya pomahokololo ngoka gaali, katu na okuthika pehulithodhiladhilo lini?

⁵ Mbela omahokololo ngoka gaali gopamanyolo otaga ulike kutya oshinima sha faathana otashi ka ningilwa oonzi dhilwe dhaKristus, uuna aagwayekwa ya yi megulu? Pethimbo mpoka, mbela Aakriste aadhiginini otaya ka etha po okulongela Kalunga, ngaashi Joas a li a ningi, nenge otaya ka ninga aashunimonima, ngaashi sha li sha ningwa kAakriste oyendji yomethelemumvo etiyali E.N.? Hasho nando! Otatu vulu okukala nuushili kutya uuna aagwayekwa ya yi megulu, oonzi dhilwe otadhi ka tsikila okulongela Jehova momukalo gwa uka, nota ka tsikila oku dhi sila oshimpwiyu pambepo. Omolwashike tatu vulu okukala tu na uushili mwaashoka?

ELONGELOKALUNGA LYASHILI ITALI KA NYATEKWA

6. Omathimbo gopatatu geni tatu ka kundathana paufupi?

⁶ Omolwashike tatu vulu okukala nuushili kutya elongelokalunga lyashili ka li na siku li ka nyatekwe kusha, nokuli nopomathimbo omadhigu gokomeho? Omolwaashoka otwa ilonga mOmbiimbeli kombinga yethimbo moka tu li. Ethimbo ndika olya yooloka ko noonkondo kwaandyoka lyAaisraeli yonale nokwaandyoka lyAakriste yomethelemumvo etiyali. Onkee ano natu konakoneni nawa omathimbo ngaka gatatu: (1) Ethimbo lyAaisraeli yonale, (2) ethimbo lyokonima sho aayapostoli ya si nosho wo (3) pethimbo lyetu, sho “iinima ayihe ya ningwa iipe.” — Iil. 3:21.

7. Omolwashike Aaisraeli yonale mboka aadhiginini ya li inaaya pumbwa okuteka omukumo, sho oshigwana naakwaniilwa yasho ya li ya longo shoka oshiwinayi?

⁷ Ethimbo lyAaisraeli yonale. Sho Moses e li pokusa, okwa li a lombwele Aaisraeli a ti: “Ondi shi shi kutya konima yeso lyandje aantu otaa ka ninga aakolokoshi notaa ekelehi shoka nde ya nongeke.” (Deut. 31:29) Okwa li wo e ya londodha kutya ngele oya tukula oshipotha otaya ka falwa muupongekwa. (Deut. 28:35, 36) Mbela oohapu ndhoka odha li ngaa dha gwanithwa? Eeno. Uule womimvo omathele, aakwaniilwa oyendji oya li ya ningi shoka oshiwinayi momeho gaJehova noya li ya pukitha oshigwana she. Shono osha ningitha Jehova a geele Aaisraeli aakolokoshi, nokuhulitha po epangelo lyaakwaniilwa yaIsraeli. (Hes. 21:25-27) Ihe Aaisraeli aadhiginini sho ya mono oohapu dhaKalunga dha gwanithwa, oshe ya tsu omukumo ya tsikile oku mu longela. — Jes. 55:10, 11.

8. Mbela otu na okukala twa kumwa sho egongalo lyopaKriste lyomethelemumvo etiyali lya li lya nyatekwa kaashunimonima? Shi yelitha.

⁸ Ethimbo lyokonima sho aayapostoli ya si. Mbela oshi na oku tu kumitha sho egongalo lyopaKriste lyomethelemumvo etiyali lya li lya nyatekwa komalongo guushunimonima? Hasho nando. Jesus okwa li a popi kutya otaku ka kala aashunimonima oyendji. (Mat. 7:21-23; 13:24-30, 36-43) Omuyapostoli Paulus, Petrus naJohannes, ayehe oya li ya koleke kutya ehunganeko  lyaJesus olya tameka nale okugwanithwa methelemumvo lyotango E.N. (2 Tes. 2:3, 7; 2 Pet. 2:1; 1 Joh. 2:18) Methelemimvo etiyali E.N., egongalo lyopaKriste olya li lya nyatekwa. Aakriste yamwe oya ningi aashunimonima noya ningi oshitopolwa shaBabiloni Oshinene, ano uukwaniilwa wuuyuni womalongelokalunga giifundja. Kungawo, ehunganeko lya nwethwa mo olya li lya gwanithwa.

9. Ongiini ethimbo ndika tu li ngashingeyi lya yooloka ko kethimbo lyaIsraeli shonale nolyegongalo lyopaKriste lyomethelemumvo etiyali?

⁹ Ethimbo sho “iinima ayihe ya ningwa iipe.” Ethimbo lyetu olya yooloka ko kethimbo lyAaisraeli yonale nokwaandyoka sho uushunimonima wa li wa ihanena apuhe methelemimvo etiyali E.N. Ethimbo ndyoka tu li mulyo ohali ithanwa ngiini? Ohali ithanwa ‘omasiku gahugunina’ guuyuni mbuka wa yonana. (2 Tim. 3:1) Ihe Ombiimbeli otayi ulike kutya ethimbo endhindhilikwedhi nele nalyo olya tameke pethimbo lya faathana. Otali ka tsikila sigo Uukwaniilwa wopaMesiasa wa thikitha aantu ayehe megwaneneno nokuninga evi alihe oparadisa. Ethimbo ndyono ohali ithanwa wo ethimbo sho “iinima ayihe ya ningwa iipe,” nenge ya shunwa pomahala gayo. (Iil. 3:21) Ethimbo ndyoka olya tameka mo 1914. Mbela iinima yini ya li ya shunwa pomahala gayo? Jesus okwa li a langekwa po e li Omukwaniilwa megulu. Kungawo, Jehova okwa kala ishewe e na omupangeli ngoka e mu lile po, a za mezimo lyomukwaniilwa omudhiginini, David. Nonando ongawo, uukwaniilwa hawo owala wa li wa shunwa pehala. Nziya konima yaashono, okwa kwathele aapiya ye kombanda yevi ye mu longele ishewe momukalo ngoka a hokwa. (Jes. 2:2-4; Hes. 11:17-20) Mbela opu na sha ishewe tashi ka ya elongelokalunga ndyoka moshipala?

10. (a) Ombiimbeli oya hunganeka shike kombinga yelongelokalunga lyashili pethimbo lyetu? (Jesaja 54:17) (b) Omolwashike omahunganeko ngoka tage tu tsu omukumo?

¹⁰ Lesha Jesaja 54:17. Dhiladhila kombinga yehunganeko ndika: “Oshikondjitho kehe tashi hambulwa shi ku kondjithe, itashi tompola sha.” Oohapu ndhoka dha nwethwa mo otadhi gwanithwa kunena. Oohapu tadhi hekeleke tadhi landula, nadho otadhi longo pethimbo lyetu. Otadhi ti: “Ongame mwene tandi ka longa aantu yandje, notandi ya pe elago nombili. Eutho nuuyuuki otau ke ku koleka. . . . Ito pumbwa okutila. Omahalutho oga gamuka ko, itage ku hedha popepi.” (Jes. 54:13, 14) Nokuli “kalunga komuuyuni mbuka,” Satana, ke na oonkondo okwiindika oshigwana shaJehova shi longe aantu kombinga yaJehova. (2 Kor. 4:4) Elongelokalunga lya yogoka olya li lya totululwa, noitali ka nyatekwa we nando kusha. Otali ka kala po  sigo aluhe. Oshikondjitho kehe tashi hambulwa shi tu kondjithe, itashi tompola sha.

OSHIKE TASHI KA NINGWA PO?

11. Oshike she tu tompa kutya ongundu onene otapu ka kala ngoka te yi kwatele komeho, uuna aagwayekwa ya yi megulu?

¹¹ Oshike tashi ka ningwa po ngele aagwayekwa ya falwa megulu? Dhimbulukwa kutya Jesus oye Omusita gwetu noye omutse gwegongalo lyopaKriste. Okwa li e shi popi sha yela a ti: “Omu na owala Omuwiliki gumwe, Kristus.” (Mat. 23:10) Omukwaniilwa gwetu, ngoka ta pangele ngashingeyi megulu, ke na esiku a nyengwe okulonga iilonga ye. Molwaashoka Kristus oye ta wilike, aalanduli ye huka kombanda yevi inaya pumbwa okutila. Odhoshili kutya tse katu shi uuyelele awuhe kombinga yankene Kristus ta ka wilika oshigwana she ethimbo ndyono. Onkee ano natu taleni iiholelwa yontumba mOmbiimbeli mbyoka tayi vulu oku tu tsa omukumo.

12. Jehova okwa li a sile ngiini oshimpwiyu oshigwana she, (a) konima sho Moses a si? (b) konima sho Elia a pewa oshinakugwanithwa shilwe? (Tala wo ethano.)

¹² Moses okwa si, manga Aaisraeli inaaya ya mEvi lyEuvaneko. Oshike sha li sha ningilwa oshigwana shaKalunga? Mbela Jehova okwa li a etha okukwathela oshigwana she shoka, sho omulumentu nguka omudhiginini a si? Hasho nando. Molwaashoka oya li aadhiginini, Jehova okwa tsikile noku ya sila oshimpwiyu. Manga Moses inaa sa, Jehova okwa li e mu lombwele a langeke po Josua oye a kale ta kwatele komeho oshigwana. Moses okwa li a dheula Josua uule womimvo odhindji. (Eks. 33:11; Deut. 34:9) Shimwe ishewe, opwa li aalumentu yalwe oyendji taya vulu okukwatela komeho oshigwana, ano aatonateli yaantu eyuvi, yamwe oyethele, yamwe oyomilongo ntano nayamwe oyomulongo. (Deut. 1:15) Oshigwana shaKalunga osha li sha tonatelwa nawa. Elia naye okwa li a kwatele komeho nuudhiginini oshigwana shaIsraeli uule womimvo odhindji melongelokalunga lya yogoka. Ihe lwanima, Jehova okwa li e mu pe oshilonga shilwe kuumbugantu waJuda. (2 Aak. 2:1; 2 Ondjal. 21:12) Mbela aantu aadhiginini yomuukwaniilwa waIsraeli womazimo omulongo opwa li ngaa pu na ngu te ya wilike? Eeno. Elia okwa li a dheula Elisa uule womimvo. Opwa li wo ‘ongundu yaahunganeki,’ mboka ya li ya dheulwa nawa moosikola dhontumba. (2 Aak. 2:7) Ano opwa li aalumentu oyendji aadhiginini taya vulu okukwathela mokuwilika oshigwana shaKalunga. Jehova okwa li a tsikile okugwanitha po elalakano lye, nokwa li a sile oshimpwiyu aalongeli ye aadhiginini.

13. Eshilipaleko lini tatu adha mAahebeli 13:5b? (Tala wo ethano.)

¹³ Wu na iiholelwa mbyoka momadhiladhilo,  oto dhiladhila mbela kutya oshike tashi ka ningwa po ngele oshihupe shaagwayekwa sha falwa megulu? Inatu pumbwa okukala tatu ipula. Ombiimbeli oya popya oshili yimwe ndjoka tayi tu shilipaleke, tayi ti: Jehova ita ka thiga po nando oshigwana she kombanda yevi. (Lesha Aahebeli 13:5b.) Ngaashi Moses naElia, okangundu kAakriste aagwayekwa, mboka taya kwatele komeho kunena, oye uvite ko nkene sha simana okudheula yalwe. Uule womimvo odhindji, aamwatate mboka ye li iilyo yOlutuwiliki oya kala taya dheula aalumentu yamwe yomoonzi dhilwe ya kale taya kwatele komeho. Pashiholelwa, oya unganeka oosikola odhindji dhokudheula aakuluntugongalo, aatonateli aaendi, iilyo yOkomitiye yOshitayimbelewa, aatonateli yomoBetel nosho wo yalwe. Olutuwiliki olwa kala talu dheula aakwatheli yookomitiye dhi ili nodhi ili dhOlutuwiliki. Aakwatheli mbaka ngashingeyi otaya longo nuudhiginini iilonga oyindji mehangano. Oya dheulwa nawa ya tsikile niilonga yokusila oshimpwiyu oonzi dhaKristus.

14. Enenedhiladhilo lyoshikundathanwa shika olini?

¹⁴ Enenedhiladhilo lyoshikundathanwa shetu olyo: Uuna oshihupe shaagwayekwa sha yi megulu, sho uudhigu uunene wu li pokuhula, aapiya yaJehova mboka ye li kombanda yevi, otaya ka tsikila oku mu longe nuudhiginini. Molwaashoka Jesus Kristus oye ta wilike, oshigwana shaJehova kaashi na siku shi ethe po oku mu longela nuudhiginini. Otu shi kutya pethimbo ndyoka, Gog yaMagog, ano iigwana yi imanga kumwe, ota ka ponokela oshigwana shaKalunga. (Hes. 38:18-20) Ihe eponokelo ndyono lyopakathimbo itali ka imba oshigwana shaKalunga shi tsikile oku mu longela. Jehova ote ke shi gamena shili. Omuyapostoli Johannes okwa li a mono memoniko “engathithi,” nenge ongundu onene yoonzi dhilwe dhaKristus. Johannes okwa li a lombwelwa kutya “engathithi” ndyoka olya pita ‘momahepeko omanene.’ (Eh. 7:9, 14) Kapu na omalimbililo kutya Jehova ote ke ya gamena.

15-16. Sha ikolelela kEhololo 17:14, aagwayekwa yaKristus otaya ka ninga shike piita yaArmagedon, nomolwashike shoka tashi tu tsu omukumo?

¹⁵ Ihe yamwe otashi vulika taya ipula kutya: ‘Aagwayekwa otaya ka ninga shike, konima ngele ya yi megulu?’ Ombiimbeli otayi gandja eyamukulo kepulo ndyoka. Otayi holola kutya omapangelo  gomuuyuni mbuka otaga ka “kondjitha Onzigona.” Ihe itaga ka sindana. Enyolo olya ti: ‘Onzigona otayi ke ya sinda.’ Mbela otayi ka kwathelwa kulye? Ovelise oya tayi ti kutya ‘okaayithanwa, aahogololwa naainekelwa.’ (Lesha Ehololo 17:14.) Mbela aantu mboka oyo oolye? Aagwayekwa aayumudhwa. Onkee ano shampa oshihupe shaagwayekwa sha yi megulu sho uudhigu uunene wu li pokuhula, shimwe shomiinakugwanithwa yawo yotango otashi ka kala okukondja. Oshinakugwanithwa shono oshihokithi lela. Yamwe yomAakriste aagwayekwa oya li ye hole omalugodhi manga inaaya ninga Oonzapo dhaJehova. Yamwe oya li nokuli aakwiita. Ihe lwanima oya ningi Aakriste yashili e taya ilongo okukala nombili nayalwe. (Gal. 5:22; 2 Tes. 3:16) Oya etha po okukutha ombinga miita. Ihe ngele ya yi megulu, otaya ka kondja pamwe naKristus nosho wo naayengeli ye aayapuki, ya kondjithe lwahugunina aatondi yaKalunga.

¹⁶ Dhimbulukwa kutya yamwe yomAakriste aagwayekwa mboka ye li natango kombanda yevi omimvo odha ya, nokaye na we uukolele. Ihe ngele ya yumudhilwa omwenyo gwomegulu, otaya ka kala iishitwa yopambepo iinankondo, ye na omwenyo ihaagu si, e taya ka kondja pamwe nOmukwaniilwa gwawo Omusindani, Jesus Kristus. Konima yiita yaArmagedon, otaya ka longa pamwe naJesus, ya kwathele aantu ya kale ya gwanenena. Kapu na omalimbililo kutya sho ye li megulu otaya ka kwathela lela aamwatate naamwameme kombanda yevi, shi vulithe sho ya li aantu inaaya gwanenena.

17. Otu shi shi ngiini kutya aapiya yaJehova ayehe otaya ka kala ya gamenwa pethimbo lyiita yaArmagedon?

¹⁷ Mbela owu li gumwe gwomoonzi dhilwe? Oshike nduno wa pumbwa oku ka ninga ngele iita ya simanenena yaArmagedon ya tameke? Kala wa inekela muJehova nokuvulika komalombwelo ge. Shono otashi vulika shi ka kale sha kwatela mo shike? Ombiimbeli otayi tu hekeleke tayi ti: “Indeni momagumbo geni, mu iyedhilile mo. Holameni okathimbo, manga ondjahi yaKalunga tayi pitilile po.” (Jes. 26:20) Aapiya yaKalunga ayehe aadhiginini megulu nokombanda yevi, otaya ka kala ya gamenwa pethimbo ndyoka. Ngaashi omuyapostoli Paulus otwa tompwa kutya kapu na ‘aapangeli, haambyoka yongashingeyi nenge mbyoka tayi ke ya tayi vulu oku tu topola ko kohole yaKalunga.’ (Rom. 8:38, 39) Dhimbulukwa aluhe kutya Jehova oku ku hole noke na siku e ku thige po.