1. Ti liini oothanliwa oothene anahaalaaya okhala wirimu?

 MU IYAAKHA sa muculi, achu a Yehova yaaniikoha: ‘Ti liini Akristu oothanliwa oohalela anahaalaaya okerihiwa wirimu?’ Mu ilukuluku ikina, nuupuwela wi Akristu akina oothanliwa anahaala otitelela okhala mparataiso mu elukuluku vakhaani emanle ovira ekhoco ya Armaketo. Nyenya mu erevista ya Mulipeleli, 15 a Yulyu a 2013, naahihuserya wi oothanliwa oothene oohalela anahaala okhala veelaponi yavathi anamukerihiwa wirimu ehaakumve ekhoco ya Armaketo.—Mat. 24:31.

2. Makoho taani anahaala okhumelela, nave tiheeni nnahaalaahu othokororya mmwaha yoola?

² Mwawiihiiha, ninnakhumelela nikoho: Tiheeni enahaala weereya ni “ipucepuche ikina” sa Kristu yaawo anahaala omurumeela Yehova moororomeleya veelaponi ya vathi variyari va “yoohooxa etokotoko?” (Yoh. 10:16; Mat. 24:21) Akina olelo ananwerya woova wi anahaala wiisoona okhala ooyeleela ni oonyanyaliwa vaavaa oosiveliwa aya, anna aya ni arokora aya oothanliwa anahaalaaya okerihiwa wirimu. Vano hankooni nthokororye saweereya sa Mpiipiliyani piili seiho akhweya saahaala oweeriha wuupuwelela mmukhalelo yoola. Voocharela, nnahaala othokororya mathowa yaawo nihinaphwanelaahu okhala awuukhuwa.

TIHEENI EHINAHAALA WEEREYA NI A IPUCEPUCHE IKINA?

3-4. Tiheeni achu akina aneeraaya yiikohe, nave ntakhara heeni?

³ Akina akhweya ananwerya wiikoha waakhanle wi a ipucepuche ikina hekhala ocai wa eparipari vaavaa aneeraaya ehikhaleno anna oothanliwa a Nikhuuru Noolamulela wi yaahooleleke. Akhweya saweereya ikina sa Mpiipiliyani sinnaaruuhela woova. Hankooni noone sootakiherya piili. Yoopacerya enamvolowela Mulipa Mukucho Yehoyata. Owo aari mulapeli oororomeleya  a Muluku. Owo ni amwaariye Yehosapiyati, yaahimukhapelela mwaana awiichaniwa Yowasi nave yaahimukhaviherya okhala mwene aphaama ni oororomeleya. Vaavaa Yehoyata aareiye mukumi, Yowasi aanamulapela Yehova nave aanapaka saphaama. Nyenya Yehoyata amanle okhwa, Yowasi aahikhala oonanara murima. Owo aahaawiriyana asitokweene oonanara murima ni amuhiya Yehova.—2 Math. 24:2, 15-19.

⁴ Yootakiherya enacharela ti ya Akristu yaawo yaakhanle emanle elukuluku ya Arummwa. Yohani murummwa ookuchula aakhanle, aari yootakiherya yaphaama wa Akristu aakhaviheryaka ovilela mmuteko aya wa Yehova. (3 Yoh. 4) Vamoha ni arummwa akina oororomeleya a Yesu, Yohani aanawaniha mwakuru mu elukuluku yincipale vooloca sa omwareya yoowo waamwaramwaxeya. (1 Yoh. 2:18; moone enoota ya yoohuserya ya 2 Ate. 2:7, a ekunya) Voocharela, vaavaa Yohani aakhwileiye, omwareya waahimwaramwaxeya ntoko mooro. Mu iyaakha vakhaani, muloko Weekristu waahaakanyeryeya moomalela.

5. Makuchuwelo taani nihinaphwanelaahu okhalano moorweela wa saweereya seiha piili?

⁵ Apwanne saweereya seiya piili sinathoonyerya echu yoolikana yeeyo enahaala weereya ni a ipucepuche ikina sa Kristu vaavaa oothanliwa oohalela anahaalaaya okuxiwa wi yakhale wirimu? Apwanne sootakiherya seiya sa Mpiipiliyani sinooniherya wi emanle oya wirimu oothanliwa, a ipucepuche ikina sa Kristu anahaala opacerya opaka ichu soonanara ntoko Yowasi eenreiye, naari hiihaa ntoko ancipale yeenraaya arummwa emanle okhwa mu nsana nanaawiili E.K.? Naakhulo ti nawi chiryene hooye! Nnanwerya olekecheya wi, vaavaa oothanliwa anahaalaaya ohiya muteko aya veelaponi, a ipucepuche ikina anahaala okhala ookhapeleleya nave anahaala otitelela oya vahoolo omunepani. Ntakhara heeni nnaroromelaahu yeela?

MALAPELO AWEELA HERWA YAAKANYERYIWA

6. Ilukuluku taani raru nneeraahu nthokororye moohilekela?

⁶ Ntakhara heeni nnanwerya okhala oolekecheya wi malapelo aweela hiyaakanyeryiwa, naamwi variyari va ilukuluku sookacamiha seiyo inahaala orwa? Wanthowa na yeeyo nihusenryaahu Mpiipiliyani vooloca sa elukuluku yeela nnakhalaahu. Elukuluku yeela ti yoohiyana vancipale ni elukuluku ya Aisarayeli akhalai ni elukuluku ya arummwa. Mwawiihiiha, hankooni nthokororye mwawiiseela vooloca sa ilukuluku seiha raru: (1) Elukuluku ya Aisarayeli akhalai, (2) variyari va elukuluku ya arummwa emanle okhwa ni (3) elukuluku ahu, ‘elukuluku yeeyo Muluku oneereiye arehererye ichu soothene’—Saw. 3:21.

7. Mu Aisarayeli akhalai, ntakhara heeni achu hiyaaceecheya vaavaa nloko ni mamwene aya yaathanlaaya weera ichu soonanara?

⁷ Elukuluku ya Aisarayeli akhalai. Ahalaka vakhaani okhwa, Mose aahiloca wa Aisarayeli: “Koosuwela wi kakhwa, munamuhuwela chiri, munamuhiya ephiro yeeyo kithonnyaaka.” (Malam. 31:29, PMM) Mose tho aahaalopola wi, wakhala wi Aisarayeli ammwareela Muluku, nloko naahaala okerihiwa wookapuroni. (Malam. 28:35, 36) Apwanne masu yaala yaahaakhwanela? Aai. Evinrevo elukuluku yincipale, mamwene mancipale yaahithanla meecelo oohiphwanelela nave yaahaahuweliha achu a Muluku. Wanthowa na yeeyo, Yehova aahaalaka achu yaale oohiiwelela nave haaweemerenrye tho wi mamwene yaale Aisarayeli yaalamuleleke yaawo. (Ese. 21:25-27) Vaavaa yoonaaya wi yeeyo Muluku aalonceiye yaahaakhwanela, eyo yaahaavaha olipa murima wa otitelela omurumeela Yoowo moororomeleya.—Yes. 55:10, 11.

8. Ntakhara heeni nihinaphwanelaahu otikhiniheya osuwela wi muloko Wekristu mu nsana nanaawiili, arummwa emanle okhwa waahaakanyereya? Mutharihe.

⁸ Elukuluku vakhaani ohoolo waya arummwa emanle okhwa. Apwanne ninnaphwanela  otikhiniheya wi muloko Weekristu waahaakanyeryeya arummwa emanle okhwa? Mweeparipari hooye. Yesu aahiloherya wi omwareya otokweene waahaala weereya. (Mat. 7:21-23; 13:24-30, 36-43) Murummwa Paulo, Petru ni Yohani yaahoona wi yooloherya ya Yesu yaahipacerya waakhwanela mu nsana noopacerya E.K. (2 Ate. 2:3, 7; 2 Pet. 2:1; 1 Yoh. 2:18) Arummwa emanle okhwa mu nsana nanaawiili E.K., muloko Weekristu waahaakanyereya. Amanle okhwa murummwa ookuchula, moohilekela Akristu oomwaryeya yaahiivoliiherya mu Papulu Mutokotoko. Wanaawiili, yooloherya yaaveereliwe yaahaakhwanela.

9. Ti mwawiihai elukuluku yeela nnakhalaahu ti yoohiyana ni elukuluku ya Aisarayeli akhalai ni elukuluku ya muloko Weekristu mu nsana nanaawiili?

⁹ “Ilukuluku seiho Muluku oneereiye arehererye ichu soothene.” Elukuluku ahu ti yoohiyana ni elukuluku ya Aisarayeli akhalai ni elukuluku yeeyo weeren’ye omwareya arummwa emanle okhwa mu nsana nanaawiili E.K. Elukuluku ahu yeela eniichaniwa hai? Nnanwerya wiichana ntoko ‘mahiku ookuchula’ a mukhalelo yoola wa ichu soonanara. (2 Tim. 3:1) Nyenya Piipiliya onnooniherya wi mu elukuluku emohamoha yaapacenryaaya mahiku ookuchula, yaapacerya tho elukuluku yoochuneyaxa nave enahaala olekelaxa. Enahaala otitelela ophiyerya elukuluku yeeyo Mwene Mesiya onahaaleiye waakhaviherya achu okhala oophaameya ni orehererya elapo okhala Parataiso. Elukuluku yeela eniichaniwa ntoko “ilukuluku seiho Muluku oneereiye arehererye ichu soothene.” (Saw. 3:21) Elukuluku yeela epacenrye mu 1914. Tiheeni yeeyo yaarehereryiwe voocharela? Yesu aahitikitheryiwa ntoko Mwene wirimu. Mwawiihiiha, Yehova aahikhalano mulamuleli wi eemelele, muyareriwo woororomeleya wa Mwene Tavite. Mwawiihiiha, tahi yeelaru Yehova oreherenryeiye. Emanle weereya yeela mwawaakuveya malapelo aweela yaahipacerya orehereryiwa! (Yes. 2:2-4; Ese. 11:17-20) Apwanne malapelo aweela anahaala waakanyereya wanaawiili?

10. (1) Tiheeni Piipiliya aalohenreiye vooloca sa malapelo aweela a mmahiku ahu? (Yesaya 54:17) (2) Ntakhara heeni sooloherya seiha iryaaya soohakararya?

¹⁰ Mwaalakhanye Yesaya 54:17, PMM. Muupuwele yooloherya ela: “Mavaka oothene oorehereliwaa ekaamookuvya”! Masu yaala ooveereliwa ennaakhwanela olelo. Masu oolipiha anacharela annaphariheleya tho mu elukuluku ahu: “Anamwane aa oothene anamukhala ohuserya a Apwiya; anamwana aa anamwiichaala mmureceleni. Onamutikitheriwa mwa wookololowa murima, nave ohooshiwa onamoorekamela. . . . Mwawiihiiha, horwa woovaru, naari otuthuwa hophiya wa weyo.” (Yes. 54:13, 14, PMM)  Ophiyerya wi “muluku a mukhalelo yoola wa ichu,” Satana, hawerya omaliha muteko yoowo achu a Yehova anapakaaya wi yaahusihe akina vooloca sa Yehova. (2 Ako. 4:4) Malapelo aweela aarehereryiwa nave herwa yaakanyeryiwa. Erwiile wi yiikhaleleru. Mavaka oothene erehereryiwe ekaamukuvya!

TIHEENI ENAHAALA WEEREYA?

11. Tiheeni enanlekecha wi muloko mutokotoko honyanyaliwa vaavaa oothanliwa emanle oya wirimu?

¹¹ Tiheeni enahaala weereya vaavaa oothanliwa eneeraaya ekuxiwe eyaaka wirimu? Muhirwe mucuwale, wi Yesu ti mukukhula ahu. Owo ti muru wa muloko Weekristu. Yesu ooloca mookwakwaleya: “Muhooleli anyu ori mmoharu, Kristu.” (Mat. 23:10) Mwene ahu onalamulela harwa ahiya muteko awe. Ni Kristu a Yehova alamulelaka, oomuchara awe veelaponi herwa yoovaru. Eparipari wi hannasuwela mikhalelo soothene Kristu oneereiye aweecihe achu mu elukuluku yeeyo. Mwawiihiiha hankooni nthokororye sootakiherya sa Mpiipiliyani seiho sinahaala onaakamuxa.

12. Ti mwawiihai Yehova aakhapelenleiye achu awe (1) Mose amanle okhwa? (2) Eliya amanle waakhela etesikinasau ekina? (Moone tho eruku.)

¹² Ehaakumve Aisarayeli ovolowa mu elapo ya nlakano, Mose aahikhwa. Tiheeni yeeren’ye ni achu a Muluku? Apwanne Yehova aahihiya waakhaviherya achu awe, alopwana yaala oororomeleya emanle okhwa? Hooye. Vaavaa awo yaatitelelaaya okhala oororomeleya, Yehova aanatitelela waakhaviherya. Mose ahaakumve okhwa, Yehova aahimuleela wi amuthanle Yosuwa wi aahooleleke achu awe. Mose aanamuvyakiha Yosuwa mu iyaakha sincipale. (Muk. 33:11; Malam. 34:9) Ohiya yeeyoru, yaakhalavo alopwana oowerya yaahoolela nikhuuru na anakhoco nsana, macikhwi, ophiyerya macikhwi macikhweene. (Malam. 1:15) Achu a Muluku yaahikhala ookhapeleleya. Yootakiherya emoha ya yeela, yaaheereeya mu elukuluku ya Eliya. Owo aahihoolela malapelo aweela mu iyaakha sincipale variyari va Aisarayeli. Nyenya yaahiphiya elukuluku yeeyo Yehova aamuthaaminheiye ntakhara muteko woohiyana makupa oohico o Yuta. (2 Mam. 2:1; 2 Math. 21:12) Apwanne achu oororomeleya a omwene wa mahimo khumi a Aisarayeli, yaahinyanyaliwa? Hooye. Eliya aanamuvyakiha Eliseu mu iyaakha sincipale. Yaahikhalawo tho anamwane “a alipa miririmu” yaawo yaavyakihiwe mmikhalelo sammoori. (2 Mam. 2:7, PMM) Mwawiihiiha, alopwana ancipale oororomeleya yaahikhala ooreheryeya wi yaahooleleke achu a Muluku. Yookhwela ya Yehova yaahititelela oya vahoolo, nave Owo aahititelela waakhapelela alapeli awe oororomeleya.

13. Ti heeni Yehova onaniroromeliheiye mu Ahepri 13:5? (Moone tho eruku.)

 ¹³ Ni sootakiherya seiha mmuupuweloni, tiheeni nyuwaano munoonaanyu wi enahaala weereya vaavaa oothanliwa ookuchula enahaalaaya okusiwa wi eye wirimu? Hannaphwanela okhala awuukhuwa. Piipiliya onnathariha eparipari yookhweya ni yoomaaliha: Yehova harwa aanyanyala achu awe veelaponi. (Mwaalakhanye Ahepri 13:5.) Ntoko Mose ni Eliya, nikhuuru nikhaani na Akristu oothanliwa yaawo enahoolela olelo enniiwexexa ochuneya waya wa waavyakiha akina. Variyari va iyaakha sincipale, anna a Nikhuuru Noolamulela annaavyakiha alopwana a ipucepuche ikina wi ehooleleke. Ntoko yootakiherya, awo annarehererya ixikola wi yaavyakihe atokweene, ooweherya a ikulucu, Anna a Nikhuuru na Ifiliyale, oohoolela a Ipeteli, ni akina. Anna a Nikhuuru Noolamulela annaavyakiha mukhataaya akhaviheryi aya mu Itepartamentu sincipale. Akhaviheryi yaala mu elukuluku yeela annateexa moororomeleya murici woochuneyaxa. Awo ari ooreheryeya phaama opwahiherya muteko wa okhapelela ipucepuche sa Kristu.

14. Teevi eri epontu ya vasulu ya mwaha yoola?

¹⁴ Iva ennaphwanyeya epontu ya vasulu ya mwaha ahu: Vaavaa oothanliwa ookuchula enahaalaaya okusiwa ntakhara wirimu waacamela wa makuchuwelo wa yoohooxa etokotoko, malapelo aweela anahaala otitelela weereya veelaponi ya vathi vaava. Ni ohoolela woophaameya wa Kristu, alapeli a Muluku heyeleelaru echu. Eparipari wi, mu elukuluku yeeyo, nnahaala ohipheliwa ni Koki a Makoki, wiiwanana wa maloko. (Ese. 38:18-20) Nyenya ohiphela yoola wawaakuveya onahaala okuvya; horwa waahiiha achu a Muluku omulapela Yehova. Owo chiryene onahaala waavuluxa! Mu yawoona, murummwa Yohani aahoona “muloko mutokweene” wa ipucepuche ikina sa Kristu. Aahileeliwa wi “muloko mutokweene” onarweela wa “yoohooxa etokotoko.” (Wup. 7:9, 14) Chiryene, owo onahaala otitelela okhapeleliwa!

15-16. Mwawiiwanana ni Wupulula 17:14, Tiheeni oothanliwa a Kristu enahaalaaya weera variyari va ekhoco ya Armaketo, ni ntakhara heeni eyo eryaaya yoolipiha?

¹⁵ Ophiyerya akina enanwerya wiikoha: ‘Hanka vooloca sa oothanliwa? Tiheeni enahaala weereya emanle okusiwa eyaaka wirimu?’ Piipiliya  onnaakhula makoho yaala mooluluwanya. Owo onnaloca wi alamuleli a elapo anahaala “owana ni Mwaasaana Eepucepuche.” Mweeparipari, awo enahaala ovoothiwa. Ninnaalakhanya: “Mwaasaana Eepucepuche onamwaavootha.” Nave taani onahaala omukhaviherya yoowo? Eversikulu yeela ennaakhula. “awiichaniwa, oothanliwa ni oororomeleya.” (Mwaalakhanye Wupulula 17:14.) Taani yaala? Oothanliwa eviihiwe mookhwaani! Vaavaa oothanliwa ookuchula eneeraaya ekusiwe eyaaka wirimu omakuchuwelo wa yoohooxa etokotoko, murici aya woopacerya oni okhale owaniha. Ola murici woohakalalihaxa! Akristu akina oothanliwa yaanawaniha ehaakumve okhala Anamoona a Yehova. Ophiyerya wi akina yaari anakhoco a elapo yeela. Voocharela awo yaahikhala Akristu eeparipari nave yaahihuserya ephiro ya murecele. (Aka. 5:22; 2 Ate. 3:16) Awo yaahihiya okhaviherya ikhoco. Nyenya emanle okusiwa eyaaka wirimu, awo vamoha ni Kristu ni ankelo awe aweela enahaala owana mu ekhoco yookuchula ntakhara amwiicani a Muluku.

¹⁶ Muupuwele ela! Eri veelaponi yavathi, Akristu akina oothanliwa yaari awuuluvala, ophiyerya tho ooceecheya. Nyenya pahiru yaviihiwa mookhwani ntakhara okumi wirimu, awo anahaala okhala oowerya ni soopatuxiwa ikina soohikhwa, eri ni murici wa owaniha, eri ni Mwene Oowerya, Yesu Kristu. Emanle owaniwa ekhoco ya Armaketo, awo enahaala opaka makupa mu waahoolela achu ntakhara ophaameya. Moohikhwa minikwa, awo anahaala opaka sincipale ntakhara anna aya ni arokora aya oosiveliwa eri wirimu opwaha vaavaa yaaryaaya oohiphaameya eri veelaponi yavathi!

17. Nnasuwela hai wi alapeli oothene a Muluku enahaala okhala ookhapeleleya variyari va ekhoco ya Armaketo?

¹⁷ Apwanne nyuwaano mwa a ipucepuche ikina? Waakhanle wi aai, tiheeni nyuwaano munaphwanelaanyu weera vaavaa ekhoco ya Armaketo eneeraaya epacerye? Pahiru ela: Omuroromela Yehova, ni ochariha ohoolela wawe. Tiheeni enavolowelavo? Piipiliya onnanilipiha ariki: “haweni mwiipithe, mwiiwalele mpa mwanyu! Mukhale mwemmo elukuluku tonto, ophiyerya evinre esara ya Apwiya.” (Yes. 26:20, PMM) Alapeli oothene oororomeleya a Muluku, wirimu ni veelaponi ya vathi, anahaala okophola variyari va elukuluku yeeyo. Hiihaa ntoko murummwa Paulo, hiyaano noolekecheya wi hiyaavo ‘mamwene, naari ichu samutano, naari ichu sinoorwa. . . sinahaala onimwalanya hiyo ni osivela wa Muluku.’ (Aro. 8:38, 39) Muhirwe mucuwale: Yehova onnoosivelaani nave owo harwa oonyanyalaani!