1. Hawaʼara teʼowuloi fefu ndra niha nibayoini ba zorugo?

 NO IRAI manofu-nofu nono mbanua Yehowa, ’Hawaʼara dania tefazawa ba zorugo fefu niha Keriso nibayoini?’ No irai tawaʼö tödöda wa so ösa ba gotaluara zi toröi ba gulidanö Faradaiso na no aefa Hamagedo, hewaʼae na lö arara. Hizaʼi ba wamahaʼö Menara Pengawal 15 Mbaŵa si Fitu 2013, tafahaʼö ita wa fefu niha nibayoini si so ba gulidanö, no ahori tefazawa ira ba zorugo fatua lö alua Hamagedo.—Mat. 24:31.

2. Hadia wanofu si tumbu ba wangera-ngerada, ba hadia nitutunöda ba artikel daʼa?

² Hizaʼi, te manofu ita: Sagötö ”wamakao sabölö-bölö” dania, hewisa ”mbiri-biri tanö böʼö” khö Keriso si lö faröi ba wamosumange Yehowa ba gulidanö? (Yoh. 10:16; Mat. 24:21) Iadaʼa, te so zaombö tödö, alai dania na laʼositengagö mazui laʼolifugö ira ba ginötö tefazawa fefu ndra talifusöra niha nibayoini. Datatutunö dombua waö-waö nisura ba Zura Niʼamoniʼö hadia mbörö wa tumbu ba gera-erara daʼö. Tatutunö göi hadia mbörö wa lö moguna aombö dödöda.

HADIA ZI LÖ ALUA?

3-4. Hadia niʼaombösi tödö niha sato, ba hadia mbörö?

³ Te so zaombö tödö alai dania na laröi zindruhu ira biri-biri tanö böʼö na lö hadöi saʼae ba gotaluara niha nibayoini si tobali Boto Solohe sameʼe khöra fanuturu lala. Te itörö tödöra waö-waö nisura ba Zura Niʼamoniʼö. Datafaigi dombua duma-dumania. Si oföna, waö-waö sanandrösa khö Gere Sebua Yehoyada hegöi Yehoasi. No atua Yehoyada, hizaʼi lö faröi ia ba  wamosumange Lowalangi. Yaʼia hegöi foʼomonia Yozabata, lalumöʼö zi samösa ono side-ide sotöi Yehoasi ba latolo nono andrö enaʼö tobali ia razo si sökhi ba si lö faröi. Sagötö faʼauri Yehoyada, lö tebulö ifalua zatulö Yehoasi. Hizaʼi, me no mate Yehoyada, ibörögö ifalua zi lö sökhi. Ifondrondrongo wanuturu lala moroi khö ndra sondröniaʼö si lö sökhi ba iröi Yehowa.—2 Ng. 24:2, 15-19.

⁴ Duma-duma si dua yaʼia daʼö sinenge sotöi Yohane hegöi ira niha Keriso me abad si dua M. Me luo daʼö, hatö Yohane zinenge safuria si lö si mate. Ato niha Keriso nitolonia enaʼö anau gölöra ba wangai halöwö khö Yehowa. (3 Yo. 4) Simane ira sinenge Yesu tanö böʼö si lö faröi, no iforege Yohane ba wolumöʼö banua niha Keriso moroi ba wamahaʼö faya si no ibörögö muzawili me luo daʼö. (1 Yo. 2:18; 2 Te. 2:7) Hizaʼi, me no mate Yohane, ato sibai ndra talifusö ba mbanua niha Keriso zondröi sindruhu. Ha ba zi hauga wulu fakhe, no saʼae raʼiö mbanua niha Keriso faoma famahaʼö faya.

5. Hadia rahu-rahu si fasala moroi ba waö-waö si dombua andrö?

⁵ Moroi ba waö-waö Zura Niʼamoniʼö andrö, hadia daʼö geluahania wa simane daʼö dania zalua ba mbiri-biri tanö böʼö na no ahori tefazawa ndra niha nibayoini ba zorugo? Hadia ibörögö lafalua zi lö sökhi simane nifalua Yehoasi mazui laröi zindruhu simane niha Keriso me abad si dua? Tatu manö löʼö! Faduhu dödöda wa hasambalö larorogö waʼalöfaröira ira biri-biri böʼö ba lö laʼosiwawöi ira hewaʼae no ahori tefazawa ba zorugo fefu niha nibayoini. Hadia mbörö wa faduhu dödöda?

LÖ RAʼIÖ WAMOSUMANGE SATULÖ

6. Hadia zi tölu ginötö nitutunöda?

⁶ Hana wa faduhu dödöda wa lö raʼiö wamosumange satulö hewaʼae alua wamakao ba zi so miföna? Börö me no itutunö Sura Niʼamoniʼö wa faböʼö sibai ginötö si so yaʼita iadaʼa moroi ba götö ndraono Gizaraʼeli me föna hegöi me no ahori mate ndra sinenge. Börö daʼö, datatutunö zi tölu ginötö andre: (1) ba götö ndraono Gizaraʼeli me föna, (2) me no ahori mate ndra sinenge, hegöi (3) inötö ”teʼazökhi fefu hadia ia”.—Hal. 3:21.

7. Ba götö ndraono Gizaraʼeli me föna, hadia mbörö wa lö moguna ide-ide dödö ndra niha si lö faröi me lafalua zi lö sökhi ira sondröniaʼö hegöi ono mbanua sato?

⁷ Ba götö ndraono Gizaraʼeli me föna. Lö ara fatua lö mate Moze, imane ba ndraono Gizaraʼeli, ”Uʼila ba aboto ba dödögu, na no mate ndraʼo dania ba hasambalö mifalua zi lö sökhi ba miholeʼö ami moroi ba lala si no uʼoroisi.” (5 Mo. 31:29) Ifangelama ira Moze wa hasambalö laʼohe ira ba wangoloiʼö na mamadaö ira. (5 Mo. 28:35, 36) Hadia itörö niwaʼönia andrö? Itörö. Sagötö zi hauga abad, ato razo ndraono Gizaraʼeli samadaö khö Yehowa ba ladönisi göi dödö nono mbanua ba wamalua simane daʼö. Andrö wa ihuku nono mbanuania Yehowa ba itehegö aetu ngaʼötö razo. (Hez. 21:25-27) Hizaʼi, so ösa ndraono Gizaraʼeli si lö faröi, ba itugu laʼosambuaʼö dödöra ba wondrorogö faʼalöfaröira khö Yehowa me laʼila waʼalua fefu niwaʼö Lowalangi.—Yes. 55:10, 11.

8. Hadia mbörö wa lö ahöli-höli dödöda me ato zondröi sindruhu me abad si dua?

⁸ Me no ahori mate ndra sinenge. Hadia ahöli-höli dödöda me ato zondröi sindruhu me abad si dua? Sindruhunia löʼö. No ifaʼeleʼö daʼö Yesu. (Mat. 7:21-23; 13:24-30, 36-43) Me abad siföföna M, lasura ira sinenge sotöi Faulo, Fetero hegöi Yohane wa no ibörögö alua wamaʼeleʼö andrö. (2 Te. 2:3, 7; 2 Fe. 2:1; 1 Yo. 2:18) Aefa daʼö, me no ahori mate  ndra sinenge, raʼiö saʼae mbanua niha Keriso, ba ato niha zondröi sindruhu farahu ira ba Mbabilona Sebua mazui angorudua agama sofaya ba zi sagörö ulidanö. Alua zi no ifaʼeleʼö Yesu.

9. Hadia mbörö wa faböʼö ginötö si so yaʼita iadaʼa moroi ba götö ndraono Gizaraʼeli me föna hegöi me abad si dua?

⁹ Inötö ”ifuli teʼazökhi fefu hadia ia”. Faböʼö sibai ginötö si so yaʼita iadaʼa moroi ba götö ndraono Gizaraʼeli me föna hegöi me abad si dua M me ato zondröi sindruhu. Sasesenia, tafotöi ginötö si so yaʼita andre ”ngaluo safuria” moroi ba gulidanö si lö sökhi andre. (2 Ti. 3:1) Hizaʼi, ifotöi göi ia Sura Niʼamoniʼö, inötö ”ifuli teʼazökhi fefu hadia ia”. (Hal. 3:21) Simane ”ngaluo safuria”, tebörögö ginötö daʼa me 1914. Hizaʼi, abölö tohude nasa ginötö wangaʼazökhi andre ba ara ginötö waʼaluania, yaʼia daʼö irege iʼasiwai Famatörö Mesia ba wanolo niha enaʼö moʼahonoa ira ba labaliʼö Faradaiso gulidanö andre. Na simanö, hadia zi no ifuli muʼazökhi me 1914? Ba ndröfi daʼö, mufataro Yesu tobali razo ba zorugo. Tobali, me no ara numalö ginötö, awena ifuli so zamatörö si möi salahi Lowalangi moroi ba ngaʼötö Razo Dawido. Hizaʼi, tenga ha famatörö daʼö niʼazökhi Yehowa. Lö ara aefa daʼö, itolo göi nono mbanuania Yehowa ba gulidanö enaʼö lafalua wamosumange satulö si tefaudu ba zomasi ia! (Yes. 2:2-4; Hez. 11:17-20) Hadia ifuli zui raʼiö dania wamosumange satulö andre?

10. (a) Hadia nifaʼeleʼö Zura Niʼamoniʼö sanandrösa ba wamosumange satulö ba götöda andre? (Yesaya 54:17) (b) Hana wa möi fangaʼaroʼö wamatida wamaʼeleʼö daʼö?

¹⁰ Baso Yesaya 54:17. Nehegö wamaʼeleʼö andrö: ”Si lö boto fefu wangöna nifazökhi ba wolawa yaʼugö”! No alua iadaʼa zi no tefaʼeleʼö andrö. Alua göi iadaʼa wehede andre: ”Nifahaʼö Yehowa dania ndraonou maʼafefu, ba fahöna waʼahono dödöra. Teʼaroʼö dania wamazökhi yaʼugö ba zindruhu. . . . Lö ataʼuʼö gofu hadia ia ba lö hadöi samanizi yaʼugö, börö me lö ahatö ia khöu.” (Yes. 54:13, 14) Satana, ”lowalangi si sagötö tanö andre”, tebai ibatogö halöwö fanuriaigö nifalua nono mbanua Yehowa. (2 Ko. 4:4) Ba daʼa taʼila wa no tebohouni wamosumange satulö ba lö irai raʼiö ia saʼae. So ia irugi zi lö aetu. Lö mofozu fefu wangöna nifazökhi ba wolawa yaʼita!

HADIA DANIA ZALUA?

11. Hadia zangaʼaroʼö tödöda wa lö muröi manö ngawawa sato na no ahori tefazawa fefu niha nibayoini ba zorugo?

¹¹ Hadia dania zalua na no ahori tefazawa  fefu niha nibayoini ba zorugo? Törö tödöu wa Yesu zi tobali Kubaloda. Yaʼia högö ba mbanua niha Keriso. Imane Yesu, ”Ha samösa Zondröniaʼö yaʼami yaʼia daʼö Keriso.” (Mat. 23:10) No mamatörö Yesu tobali Razo, ba hasambalö iʼameʼegö tödö zoloʼö khönia. Börö me Keriso zi tobali Sondröniaʼö, andrö wa lö moguna ataʼu niha soloʼö khönia ba gulidanö. Sindruhu sa, lö taʼila hewisa sibai dania wokubaloinia ono mbanuania na no tefazawa fefu niha nibayoini ba zorugo. Hizaʼi, so waö-waö Zura Niʼamoniʼö sameʼe khöda famarou dödö. Datatutunö.

12. Hewisa wondrorogö Yehowa ono mbanuania (a) me no mate Moze? (b) me no itema halöwö tanö böʼö Elia? (Faigi göi gambara.)

¹² Mate Moze fatua lö ofeta ndraono Gizaraʼeli ba Danö Amabuʼula. Hadia zalua ba nono mbanua Lowalangi? Hadia iröi mazui iʼosiwawöi ira Yehowa? Löʼö. Sagötö lö faröi ira, lö tebulö irorogö ira Yehowa. Ngafulu fakhe iʼogunaʼö ginötö Moze ba wamahaʼö Yosua. Fatua lö mate Moze, iʼandrö khönia Yehowa enaʼö ifataro Yosua tobali sondröniaʼö soi daʼö. (2 Mo. 33:11; 5 Mo. 34:9) Baero daʼö, ato sibai nasa ndra matua sagatua-tua nifataro tobali kumandru zi saribu, si daotu, si lima wulu hegöi si dafulu. (5 Mo. 1:15) Nehegö duma-duma tanö böʼö. Sagötö zi ngafulu fakhe, iforege Elia ba wanolo iraono Gizaraʼeli enaʼö lafalua wamosumange satulö. Hizaʼi samuza inötö, itema halöwö tanö böʼö moroi khö Yehowa, ba moguna findra ia tanö raya yaʼia daʼö ba Yehuda. (2 Ra. 2:1; 2 Ng. 21:12) Hadia muröi mazui muʼosiwawöi saʼae ndraono Gizaraʼeli si lö faröi ba wamatörö si fulu mado ba Gizaraʼeli? Löʼö. No hauga fakhe silalö ibeʼe ginötönia Elia ba wamomaha Elisa. So göi nasa ”ngaʼötö ndra samaʼeleʼö” si no manema famomaha. (2 Ra. 2:7) Tobali, ato ndra matua si lö faröi niʼogunaʼö Yehowa ba wondröniaʼö ono mbanuania. Lö tebulö alua gohitö dödö Yehowa, ba lö irai iröi mazui iʼositengagö nono mbanuania si lö faröi.

13. Hadia nifabuʼu Yehowa khöda ba Heberaiʼo 13:5? (Faigi göi gambara.)

¹³ Moloʼö yaʼugö, moroi ba duma-duma andrö, hadia zalua na no ahori tefazawa fefu niha nibayoini ba zorugo? Lö moguna aombö dödöda. Ibeʼe khöda waʼaro dödö Sura Niʼamoniʼö wa lö irai iröi mazui iʼositengagö nono mbanuania Yehowa ba gulidanö. (Baso Heberaiʼo 13:5.) Simane Moze hegöi Elia, aboto ba dödö ndra Boto Solohe, yaʼia daʼö niha Keriso si no tebayoini wa moguna  sibai lafahaʼö niha böʼö. Sagötö zi ngafulu fakhe, ato sibai ndra talifusöda ira matua moroi ba gotalua mbiri-biri böʼö si no lafahaʼö ba wondröniaʼö ono mbanua Lowalangi. Duma-dumania, oya zekola si no lahenaigö ba wamomaha ira satua sokubaloi, satua samasui, panitia ndraha, sondröniaʼö ba Mbetieli, hegöi tanö böʼönia. Lafahaʼö samösa göi ndra asisten moroi ba ngawalö panitia ndra Boto Solohe. Iadaʼa, lö faröi ndra asisten andre ba wamalua halöwöra ba organisasi. No lafaʼanö ira wanohugö halöwö ba wondrorogö biri-biri Yesu.

14. Hadia rahu-rahu moroi ba wamahaʼö si no tatutunö andre?

¹⁴ Daʼa rahu-rahu moroi ba wamahaʼö si no tatutunö andre: Fatua lö teʼasiwai wamakao sabölö-bölö, no ahori tefazawa niha nibayoini ba zorugo. Hewaʼae simanö, lö aetu wamalua famosumange satulö ba gulidanö andre. Lö tebulö itolo ira Yesu, Sondröniaʼö yaʼira irege lö labato wamosumange Lowalangi. Atulö sa, ba ginötö daʼö dania tohare Gogi moroi ba Magogi yaʼia daʼö angowuloa soi sanuwö ono mbanua Lowalangi. (Hez. 38:18-20) Hizaʼi, ha sabata waʼaluania ba tebai isaisi nono mbanua Lowalangi ba wamosumange Yehowa. Ba gangilata zinenge sotöi Yohane, oroma khönia ”ngawawa sato” biri-biri tanö böʼö khö Keriso, ba irongo wa teʼorifi ira moroi ba ”wamakao sabölö-bölö”. (Fam. 7:9, 14) Faduhu dödöda wa hasambalö iʼefaʼö nono mbanuania Yehowa!

15-16. Moloʼö Famaʼeleʼö 17:14, hadia nifalua niha nibayoini sagötö alua Hamagedo, ba hana wa möi famarou dödöda daʼö?

¹⁵ Hizaʼi, te so zanofu-nofu: ’Hewisa dania ndra niha nibayoini? Hadia nifaluara na no teʼowuloi ira ba zorugo?’ Ibeʼe khöda wanema li Sura Niʼamoniʼö. Amatöröwa ba gulidanö andre fasuwö ira ba ”wolawa Ono Mbiri-biri”. Tatu manö, si kala ira. Iwaʼö Sura Niʼamoniʼö wa ”ikalaisi ira dania [Ono Mbiri-biri andrö]”. Haniha zanolo yaʼia? ”Niha niʼamoniʼö si lö faröi.” (Baso Wamaʼeleʼö 17:14.) Yaʼira andrö niha nibayoini si no tesusugi! Börö daʼö, fatua lö teʼasiwai wamakao sabölö-bölö, fefu niha nibayoini si so nasa ba gulidanö,  tefazawa ira ba zorugo, ba halöwö siföföna nitemara yaʼia daʼö fasuwö. No halöwö sahöli-höli dödö daʼö! So ösa niha Keriso nibayoini si no toʼölö faʼudu mböröta fatua lö tobali ira Samaduhuʼö Yehowa. So ösa zi tobali saradadu. Hizaʼi, tobali ira niha Keriso sindruhu ba lafahaʼö ira enaʼö atulö ba niha böʼö. (Gal. 5:22; 2 Te. 3:16) Lö irai saʼae fao ira fasuwö. Hewaʼae simanö, me no tefazawa ira ba zorugo, fao ira fasuwö awö Keriso hegöi ira malaʼikania niʼamoniʼö. Fao ira fasuwö ba wasuwöta safuria ba wolawa udu Lowalangi.

¹⁶ Angeragö daʼa. Iadaʼa, so ösa niha Keriso nibayoini si toröi nasa ba gulidanö, no atua ira ba tebai mbotora. Hizaʼi, na tesusugi ira ba zorugo, tobali ira boto eheha sabölö ba si tebai mate. Fao ira fasuwö awö Yesu Keriso, Razo hegöi Saradadu sabölö. Na no aefa möna ira ba wasuwöta Hamagedo, fao ira ba wanolo niha enaʼö moʼahonoa. Ba luo daʼö, tatu tola labeʼe wanolo sebua khö ndra talifusö niʼomasiʼöra ba gulidanö, töra moroi ba zi tola lafalua mböröta me niha si lö moʼahonoa ira nasa!

17. Hezo taʼila wa hasambalö telumöʼö fefu nono mbanua Lowalangi sagötö wasuwöta Hamagedo?

¹⁷ Hadia farahu ndraʼugö ba gotalua mbiri-biri tanö böʼö? Na yaʼia, hadia zinangea öfalua enaʼö telumöʼö ndraʼugö na tebörögö wasuwöta Hamagedo? Sinangea öfalua yaʼia daʼö faduhusi tödö Yehowa ba oʼö wanuturu lala nibeʼenia. Tola manö, tefarahu daʼö ba niwaʼö Zura Niʼamoniʼö, ”Miʼaeʼe ba mbateʼe tanö bakha, ba miduhö mbawandruhö furimi. Mibiniʼö ami sabata irege alö wönugu.” (Yes. 26:20) Eluahania, fefu nono mbanua Lowalangi si lö faröi ba zorugo hegöi ba gulidanö, hasambalö telumöʼö ira ba luo daʼö. Simane Faulo, faduhu dödöda wa ”he samatörö, he si so iadaʼa, he si so dania, . . . tebai ifabali ita moroi ba waʼomasi Lowalangi”. (Rom. 8:38, 39) Böi olifuʼö daʼa: Iʼomasiʼö ndraʼugö Yehowa, ba lö irai iröi ndraʼugö!