1. Kansi Akhilisitu onse ozozewa azalute nthawe yanji kululu?

 M’VYAKA vakuvuli, ŵanthu a Yehova enzelikonsha kuti: ‘Kansi osalila ozozewa azalute nthawe yanji kululu?’ Poyamba, sewo tenzeganiza kuti ozozewa azayambe ankhalako m’Paladaiso kwa kanthawe pavuli pa nkhondo ya Aramagedo. Koma mu Nsanja ya Olonda ya 15 Djulayi 2013, sewo tephunzila kuti nkhondo ya Aramagedo ikaliyeyamba, ozozewa onse a 144.000 azankhale ali kululu.—Mat. 24:31.

2. Kansi ni makonsho otyani ŵatingalikonshe, ndipo tikambilane chinji mu nkhani ino?

² Koma ayakine a sewo angalikonshe kuti: Kansi n’chinji chikuti chizachitikile a “mbelele ziyakine” za Khilisisu amene panthawe yamene iyo azankhale otumikila Yehova mokhulupilika pano pa chalo panthawe ya “chisauso chikulu”? (Yoh. 10:16; Mat. 24:21) Ayakine mwa abale a mbelele ziyakine, angodela nkhaŵa kuti payakine azaziŵelini vinthu vakuti azafunikile kuchita pa nthawe yamene iyo, kapena kuti azankhale aliye oŵayavya komasoti oŵasogolela pavuli pakuti abale na alongo ozozewa aluta kululu. Ove payakine angoganiza vamene ivi chifukwa cha nkhani ziyakine ziŵili zamene zutomolewa m’Baibolo. Tiyeni tikambilane nkhani zamene izi, komasoti chifukwa chake tufunika lini kudela nazo nkhaŵa.

KANSI N’CHINJI CHAMENE CHIZACHITIKE LINI?

3–4. Kansi ŵanthu ayakine angalikonshe chinji, ndipo ndaŵa yanji?

³ Ŵanthu ayakine angodela nkhaŵa kuti ayakine mwa abale ambelele ziyakine angaleke kutumikila Yehova abale ozozewa am’Bungwe yutonga amene niye osogolela akezeluta kululu. Payakine ove angoganiza tetyo chifukwa cha nkhani ziyakine zamene zutomolewa m’Baibolo. Tiyeni tiwone visanzo viŵili. Chisanzo choyamba ni cha Nkulu wa ansembe Yehoyada. Yove enze ntumiki wokhulupilika wa Mulungu. Yove pamozi na mwanakazi wake Yehosabati, eteteza mulumbwana muyakine zina yake Yehoasi, ndipo emuyavya kunkhala mfumu iweme komasoti wokhulupilika. Yehoyada  penze akali moyo, Yehoasi enzetumikila Yehova mokhulupilika ndipo enzechita vinthu viweme. Koma pavuli pakuti Yehoyada wamwalila, Yehoasi eyamba kuchita vinthu viipa. Yove eyamba kumvwishila malangizo ŵa akalonga aipa ndipo eleka kutumikila Yehova.—2 Mbiri 24:2, 15-19.

⁴ Chisanzo chiyakine ni cha Akhilisitu amene enkhalako pavuli pa atumwi. Ntumwi Yohane niye esilijila kumwalila. Pa nthawe yenze akali moyo, yove eyavya Akhilisitu anyinji kuti apitilije kunkhala okhulupilika kwa Yehova. (3 Yoh. 4) Molingana na mwechichitila atumwi ayakine a Yesu, Yohane echita vonse vangakwanishe kuti ateteze mpingo ku viphunziso vampatuko vamene venze paliponse pa nthawe yamene iyo. (1 Yoh. 2:18; 2 Ates. 2:7) Koma pavuli pakuti Yohane wamwalila, viphunziso vampatuko viyamba kufalikila monga ni mwauchitila mulilo nsanga. M’vyaka vokonkhapo, ŵanthu ampatuko amene awo eyamba kuphunzisa viphunziso vinyinji vawenye mwakuti mipingo yonse iyamba kuchita vinthu viipa.

5. Kansi tufunikila kupewa kuganizila kuti n’chinji chikuti chizachitike mokatijana na nkhani ziŵili za m’Baibolo?

⁵ Kansi nkhani za m’Baibolo ziŵili zamene izi zuwonesha kuti vinthu volingana na vamene ivi niye vikuti vizachitikile mbelele za Khilisitu ozozewa akezeluta kululu? Kansi Akhilisitu okhulupilika amene akuti azankhale pano pa chalo azayambe kuchita vinthu viipa monga nimwechichitila Yehoasi, olo kuyamba mpatuko monga ni mwechichitila ŵanthu anyinji pavuli pakuti atumwi amwalila? Kutali-tali! Sewo tingankhale na chidalilo chakuti ozozewa akezeluta kululu, ambelele ziyakine azapitilije kulambila Yehova munjila yakuvomekeja yove, ndipo Mulungu azapitilije kuŵasamalila. Ndaŵa yanji sewo tingankhale na chidalilo monga ni chamene ichi?

KULAMBILA KUTUŴA KUPITILIJE MPAKA KALE-KALE

6. Kansi ni nkhani zitatu zotyani zatikuti tikambilane?

⁶ Ndaŵa yanji tingankhale na chidalilo chakuti kulambila kutuŵa kuzasilelini mosasamala kanthu za mavuto ŵatikuti tizakumane nawo? Chifukwa Baibolo yufotokoza kuti sewo tunkhala mu nthawe yosiyana ngako na nthawe ya Aisiraeli komasoti nthawe yechinkhalako ŵanthu pavuli pa imfwa ya atumwi. Tetyo, tiyeni tikambilane momvwika luweme za vinthu vechitika mu nthawe zitatu izi zokonkhapo: (1) Mu nthawe ya Isiraeli wakale, (2) pavuli pa imfwa ya atumwi, komasoti (3) vuchitika masiku ŵano yamene ni “nthawe yowejelesha vinthu vonse.”—Mach. 3:21.

7. Ndaŵa yanji Aisiraeli okhulupilika elimbikisiwa kutumikila Yehova?

⁷ Nthawe ya Isiraeli wakale. Pechingoti wasala patontho kumwalila, Mose euja Aisiraeli kuti: “Nuziŵa luweme kuti pavuli pa imfwa yangu, mosakaikila mwewo muzachite vinthu viipa nopatuka kusiya njila yanakulamulani.” (Deut. 31:29) Mose eŵachenjejasoti Aisiraeli kuti keno ove angaleke kumvwila Mulungu, adani ŵawo azaŵatole noluta nawo ku ukapolo. (Deut. 28:35, 36) Kansi mawu amene aŵa ekwanilishiwa chendi? Eye ekwanilishiwa. Pavuli pa vyaka mahandiledi, mafumu anyinji eyamba kupandukila Yehova ndipo echitisha kuti ŵanthu ayambe kulambila kwawenye. Chifukwa cha vamene ivi, Yehova ekana ŵanthu ŵake opanduka amene awo ndipo aliyelole kuti mafumu Achiisiraeli apitilije kulamulila ŵanthu. (Eze. 21:25-27) Koma Aisiraeli ayakine pechiwona mwamene mawu a Yehova mwechikwanilishiliwa, elimbikisiwa kuti akotumikila Yehova mokhulupilika.—Yes. 55:10, 11.

8. Kansi tingafunike kudabwa kuti pavuli pa imfwa ya atumwi Akhilisitu eleka kuyenda panjila ya chonadi? Fotokozani.

⁸ Pavuli pa imfwa ya atumwi. Kansi tingafunike kudabwa kuti mpingo wa Chikhilisitu wiyamba mpatuko pavuli pa imfwa ya atumwi? Yayi. Chifukwa Yesu enze enenelatu kuti vamene ivi vizachitike. (Mat. 7:21-23; 13:24-30, 36-43) Ntumwi Paulo, Petulo, komasoti Yohane enena kuti ulosi wa Yesu wenze wiyamba kale kukwanilishiwa ove penze akali moyo mu nthawe ya Akhilisitu oyambilila. (2 Ates. 2:3, 7; 2 Pet. 2:1; 1 Yoh. 2:18) Pechingoti wasala patontho kumwalila ntumwi  wosilijila, Akhilisitu a mpatuko eyamba kupanga mbali ya Babulo nkulu wamene ni vipembezo vonse vawenye. Panthawe yamene iyi, vinthu vechilosela Yesu vekwanilishiwasoti.

9. Ndaŵa yanji nthawe yasu ino ni yosiyana na nthawe ya Isiraeli wakale komasoti nthawe ya mpingo wa Akhilisitu oyambilila?

⁹ “Nthawe yowejelesha vinthu vonse.” Nthawe yatunkhalamo ni yosiyana na nthawe ya Isiraeli wakale komasoti nthawe yamene Akhilisitu oyambilila yechinkhala ampatuko. Kansi nthawe yasu ino yuitiwa kuti tyani? Sewo tukonda kuiita kuti “masiku osilijila” achalo chiipa. (2 Tim. 3:1) Koma Baibolo yuwonesha kuti pa nthawe imo na imo yamene iyo yechiyamba masiku osilijila, kweyambikasoti nthawe iyakine yofunika ngako yamene izankhalepo kwa nthawe itali. Nthawe yamene iyi izapitilije kunkhalapo mpaka Ufumu wa Mulungu wamene wolamulila wake ni Yesu, uzawejeleshe vinthu vonse, kuyavya ŵanthu kunkhala angwilo, komasoti kuwamya chino chalo kunkhala Paladaiso. Nthawe yamene iyi yuitiwa kuti “nthawe yowejelesha vinthu vonse.” (Mach. 3:21) Nthawe yamene iyi iyamba mu 1914. Koma kansi n’chinji chawejeleshewa? Chabwino, Yesu eyamba kulamulila monga Mfumu kululu. Mwanjila yamene iyi, kachiŵilisoti Yehova wasankha mbadwa ya Davide kuti ikolamulila monga Mfumu mmalo mwa yove. Koma sikuti Yehova wawejelesha tyala Ufumu wolamulila ŵanthu. Papita tyala nthawe itontho kufumila pewinkhazikishiwa Ufumu wamene uyu, kulambila kutuŵa nako kwiyambasoti kuwejeleshewa! (Yes. 2:2-4; Eze. 11:17-20) Lomba kansi kulambila kutuŵa kuzaipishiwesoti?

10. (a) Kansi Baibolo yenenelatu chinji vokhuza kulambila kutuŵa kwa masiku ŵano? (Yesaya 54:17) (b) Ndaŵa yanji maulosi amene aŵa ni olimbikisa?

¹⁰ Ŵelengani Yesaya 54:17. Ganizilani za ulosi uyu wokonkhapo: “Chisulo chilichonse chikuti chizapangiwe kuti chikuchite chizapambane lini”! Mawu oujiliwa amene aŵa okwanilishiwa masiku ŵano. Kuyangijila pamene apo, mawu apa Yesaya 54:13, nawo okwanilishiwa masiku ŵasu ŵano ndipo otitonthoja ngako, mawu amene awo onena kuti: “Ŵana ŵako onse azankhale ŵanthu ophunzisiwa na Yehova, ndipo ntendele wa ŵana ŵako uzankhale unyinji. Uzankhazikike motang’a m’chilungamo. . . . Uzayopelini kanthu, ndipo paliye chamene chikuti chizakuchitishe wowa chifukwa paliye chilichonse choyofya chamene chikuti chizakuvwendelele.” (Yes. 54:13, 14) Olo Satana ngaye-ngaye wamene ni “mulungu wa ino nthawe,” angakwanishelini kulesha ntchito yophunzisa ŵanthu vokhuza Yehova yamene yuchitika masiku ŵano. (2 Ako. 4:4) Kulambila kutuŵa kwawejeleshewa, ndipo kuzaipishiwelinisoti na chipembezo chawenye. Kulambila kwamene uku kuzankhalepo mpaka kale-kale. Paliye chisulo chilichonse chamene chikuti chizakwanishe kuwononga ŵanthu a Yehova!

 KANSI N’CHINJI CHIKUTI CHIZACHITIKE?

11. Kansi n’chinji chutisimikijila kuti agulu ikulu Mulungu azaŵatayelini pavuli pakuti ozozewa aluta kululu?

¹¹ Kansi n’chinji chikuti chizachitike ozozewa akezeluta kululu? Kumbukilani kuti Yesu niye nchiŵeta wasu. Yove niye mutu wa mpingo wa Chikhilisitu. Yesu etiyavya kumvwisha mfundo yamene iyi pechilaŵila kuti: “Nsogoleli wanu ni mmozi Khilisitu.” (Mat. 23:10) Mfumu yasu yayamba kale kulamulila ndipo yove izakangiwelini kukwanilisha ntchito yake. Chifukwa chakuti Wolamulila wa Ufumu wa Mulungu ni Khilisitu, sewo tufunikila lini kuyopa chinthu chilichonse pano pa chalo. N’chendi kuti sewo tuziŵalini vonse ponena vakuti azachite Yesu posogolela ŵanthu ŵake nsiku yamene iyo ikezefwika. Tetyo, tiyeni tikambilane vifukwa viyakine va m’Baibolo vamene vingatinkhazike ntima pansi.

12. Kansi Yehova eŵasamalila tyani ŵanthu ŵake (a) pavuli pakuti Mose wamwalila? (b) pavuli pakuti Eliya walondela utumiki uyakine? (Onanisoti chithunzi.)

¹² Ntundu wa Aisiraeli ukaliye loŵa m’Chalo cholonjezewa, Mose emwalila. Lomba kansi n’chinji cheŵachitikila? Kansi Aisiraeli enzeziŵalini vangachite chifukwa chakuti enzeve thandizo ya Mose? Yayi. Panthawe yamene Aisiraeli enzemvwila Yehova mokhulupilika, Yehova enzeŵasamalila. Mose akaliye mwalila, Yehova emuuja kuti asankhe Yoswa kuti ankhale nsogoleli wa ŵanthu a Mulungu. Mose ephunzisa Yoswa kwa vyaka vinyinji. (Eks. 33:11; Deut. 34:9) Kuyangijila pamene apo, analume ayakine anyinji nawo ephunzisiwa mwangasogolele ŵanthu—ove enkhala asogoleli a ŵanthu 1.000, a ŵanthu 100, a ŵanthu 50, mpaka a ŵanthu 10. (Deut. 1:15) Ŵanthu a Mulungu enzesamaliliwa luweme ngako. Chisanzo chiyakine chiweme ni cha Eliya. Kwa vyaka vinyinji, yove eyavya ŵanthu a ntundu wa Aisiraeli kuti apitilije pakulambila kutuŵa. Koma pavuli pake, Yehova epasa Eliya utumiki uyakine wanyowani kummwela kwa chalo cha Ayuda. (2 Maf. 2:1; 2 Mbiri 21:12) Kansi Mulungu eŵasiya Aisiraeli okhulupilika amu ufumu wamafuko 10 a Isiraeli? Yayi. Mneneli Eliya ephunzisa Elisa kwa vyaka vinyinji. Ndipo penzesoti “ŵana ŵa aneneli,” amene payakine enze eyaŵiwa mmagulu-magulu, ndipo elondela maphunzilo oŵayavya mwangachitile utumiki wawo. (2 Maf. 2:7) Mwanjila iyakine, tinganene kuti penze analume okhulupilika anyinji komasoti okonzeka kusogolela ŵanthu a Yehova. Yehova epitilija kukwanilisha chifunilo chake komasoti kuŵasamalila luweme ngako atumiki ŵake.

13. Kansi Yehova watilonjeza chinji pa Aheberi 13:5b? (Onanisoti chithunzi.)

¹³ Pavuli pakuti mwawona visanzo vamene ivi, kansi muganiza kuti n’chinji chikuti chizachitike ozozewa osilijila akezetolewa kuluta kululu? Sewo tufunikalini kudela nkhaŵa na patontho kumo. M’Baibolo muli mawu ayakine a chonadi  asavuta kumvwa amene otinkhazika mitima pansi, mawu ŵake ni akuti: Yehova azaŵatayelini ŵanthu ŵake apano pachalo. (Ŵelengani Aheberi 13:5b.) Masiku ŵano, pali kagulu katontho ka Akhilisitu ozozewa amene osogolela ŵanthu a Mulungu, yamene ni Bungwe yutonga. Molingana na mwechichitila Mose komasoti Eliya, ove ophunzisa ayakine mwa analume a mbelele ziyakine kuti akoyavya pa ntchito yosamalila ŵanthu a Mulungu. Mwachisanzo, Bungwe yutonga yulinganija masikulu ŵa akulu, opanamila dela, abale am’Komiti ya nthambi, osogolela pa Beteli, komasoti abale ayakine. Bungwe yutonga yukatasoti ntchito yophunzisa abale amene oyavya m’makomiti osiyana-siyana a m’Bungwe yutonga. Abale amene oyavya m’Bungwe yutonga, alikale na maluso anyinji ndipo ni okonzeka kupitilija kukata ntchito yosamalila mbelele za Khilisitu.

14. Kansi n’chinji chatamvwisha luweme munkhani ino?

¹⁴ Pofwika pano, munkhani ino takambilana momvwika luweme: Ozozewa osilijila akezeluta kululu chisauso chikulu chikezesala patontho kuchitika, Atumiki a Yehova azapitilije kulambila Mulungu mokhulupilika. Chifukwa chakuti Yesu Khilisitu akotiyavya, sewo tizaleke lini kulambila Yehova. N’chendi kuti panthawe yamene iyo sewo tizaukiliwe na gogi waku magogi wamene ni nkatijano wamitundu. (Eze. 38:18-20) Koma kuukila kwamene uku kuzankhale kwakanthawe katontho ndipo kuzapambanelini. Kuukila kwamene uku kuzakwanishelini kuchitisha ŵanthu a Yehova kuleka kulambila Mulungu. Mosakaikila, Yehova azatipulumushe! M’mesomphenya ŵake, ntumwi Yohane ewona “gulu ikulu” ya mbelele ziyakine za Khilisitu, ndipo Yohane eziŵa kuti “gulu ikulu” yamene iyo “niya ŵanthu amene efuma muchisauso chikulu.” (Chiv. 7:9, 14) Mosakaikila, Yehova azatipulumushe!

15–16. Mokatijana na lemba ya Chivumbuluso 17:14, kansi Akhilisitu ozozewa azachite chinji panthawe ya nkhondo ya Aramagedo, ndipo ndaŵa yanji vamene ivi vutilimbikisa?

¹⁵ Koma olo n’tetyo, ŵanthu ayakine angalikonshe kuti: ‘Lomba kansi n’chinji chikuti chizachitikile Akhilisitu ozozewa? Kansi ove azachite chinji pavuli pakuti aluta kululu?’ Baibolo yuyankha makonsho amene aŵa momvwika luweme. Yove yufotokoza kuti olamulila apano pa chalo “azaniyatane na Mwana wa mbelele.” Koma n’vowonekelatu kuti ove azaluze. Baibolo yunena kuti: “Mwana wambelele wamene uyo azaŵagonjese.”  Koma kansi niŵani akuti azamuyavye Yesu? Baibolo yuyankhasoti konsho yamene iyi ponena kuti: “Oitiwa amene awo amene ni osankhiwa mwapadela komasoti okhulupilika.” (Ŵelengani Chivumbuluso 17:14.) Kansi oitiwa amene aŵa niŵani? Ni Akhilisitu ozozewa amene akuti azaushiwe! Tetyo, ozozewa osilijila akezeluta kululu chisauso chikulu chikezesala patontho kuchitika, imozi mwa ntchito yakuti azalondele niyoniyata nkhondo. Wamene uyu uzankhale utumiki ukulu ngako! Ayakine mwa Akhilisitu ozozewa enzekonda kuniyatana na ŵanthu ayakine akaliye nkhala Amboni za Yehova. Mpaka ayakine enze masodja. Koma pavuli pakuti ankhala Akhilisitu, eyamba kuphunzila kuyenda munjila ya ntendele. (Agal. 5:22; 2 Ates. 3:16) Ove eleka kuchilikiza nkhondo. Koma panthawe yakuti azatolewe kuluta kululu, ozozewa azayambe kunkhala pafupi na Yesu pamozi na angelo atuŵa, ndipo azaniyate nkhondo yosilijila polimbana na adani a Mulungu.

¹⁶ Ganizilani ivi! Masiku ŵano Akhilisitu anyinji ozozewa amene ali pano pa chalo, ni achikulile ngako komasoti aliye mphamvu. Koma akezeushiwa kuti akankhale na moyo kululu, ove azankhale volengewa vauzimu vamphamvu kamasoti vamene vingafwelini, ndipo azaniyate nkhondo pamozi na Mfumu ya nkhondo, Yesu Khilisitu. Nkhondo ya Aramagedo ikezesila, ove azakate ntchito pamozi na Yesu poyavya ŵanthu kuti ankhale angwilo. Mosakaikila, ozozewa akezeluta kululu azakwanishe kuchita vinthu vinyinji poyavya abale na alongo ŵawo okondewa pano pa chalo kupambana vakukwanisha kuchita akali pano pa chalo monga ŵanthu aliye ungwilo!

17. Kansi tuziŵa tyani kuti atumiki onse a Yehova azankhale otetezeka panthawe ya nkhondo ya Aramagedo?

¹⁷ Kansi mwewo nimwe mmozi wa mbelele ziyakine? Keno n’tetyo, kansi muzafunike kuchita tyani nkhondo ya Aramagedo, yamene ni nkhondo ikulu yamene ikaliye chitikapo mu mbili yonse ya ŵanthu ikezeyamba? Yankho yake ni yachidule: Mukodalila Yehova nokonkheja malangizo ŵake. Kansi vamene ivi vupamikijapo chinji? Baibolo pa Yesaya 26:20, yufotokoza kuti: “Mwewo mwe ŵanthu ŵangu, lutani mukaloŵe m’vipinda vanu vankati ndipo mukavale viseko. Mukafisame kwakanthawe mpaka ukali wangu usile.” (Yes. 26:20) Vamene ivi vutanthauza kuti atumuki onse okhulupilika a Yehova kululu na pa chalo, azankhale otetezeka panthawe ya Aramagedo. Mokatijana na vechilemba ntumwi Paulo, sewo tili na chidalilo chakuti “maboma, vinthu vamene vilipo, vinthu vamene vikuza kusogolo . . . vizakwanishelini kutilekanisha na chikondi cha Mulungu.” (Alo. 8:38, 39) Nthawe zonse mukokumbukila kuti: Yehova okukondani ngako mwewo, ndipo azakutayeni lini!