1. Ni ryari obu entoore boona baraabe bari omu iguru?

 OMU MYAKA ey’enyima, abaheereza ba Yehova bakaba nibeebuuza ngu, ‘Ni ryari obu entoore abatsigaireho baraatwarwe omu iguru?’ Tukaba nituteekateeka ngu bamwe aha ntoore nibabaasa kuguma omu Paradiso omu nsi kumara akaire bwanyima y’orutaro rwa Haramagedoni. Kwonka omu Munaara gw’Omurinzi ogwa Gyuraayi 15, 2013, tukeega ngu entoore boona abaraabe batsigaireho omu nsi nibaija kutwarwa omu iguru orutaro rwa Haramagedoni rutakatandikire.—Mat. 24:31.

2. Ni bibuuzo ki ebi turikubaasa kwebuuza, kandi nituza kushwijuma ki omu kicweka eki?

² Kwonka, bamwe nibabaasa kwebuuza bati: Niki ekiraahikye aha ntaama za Kristo abandi, abaraabe nibaheereza Yehova omu bwesigwa aha omu nsi omu “kubonabona kwingi?” (Yoh. 10:16; Mat. 24:21) Bamwe nibabaasa kuba nibeerarikirira ngu nibaija kuhurira nk’abatsigirweho Abakristaayo entoore ku baraatwarwe omu iguru. Ka tushwijume eby’okureeberaho bibiri eby’omu Byahandiikirwe ebirikubaasa kubareetera kuteekateeka batyo. Bwanyima nituza kureeba ahabw’enki bataine kwerarikirira.

NIKI EKITARAABEHO?

3-4. Bamwe nibabaasa kuba nibeebuuza ki, kandi ahabw’enki?

³ Bamwe nibabaasa kuba nibeebuuza yaaba ab’entaama ezindi nibaija kugumizamu nibaheereza Yehova, entoore abari aha Kakiiko Akareeberezi baaba batakiriho kubaha obuhabuzi. Obundi eby’okureeberaho ebiri omu Byahandiikirwe nibyo birikubareetera kwerarikirira. Ka tureebe bibiri ahari byo. Eky’okubanza, n’eky’Omunyamurwa Omukuru Yehoyaada. Akaba ari omuheereza wa Yehova omwesigwa. We n’omukazi we Yehoshabeasi, bakarinda omwojo orikwetwa Yoasi,  baamuhwera kuba Omugabe murungi kandi omwesigwa. Obu Yehoyaada yaabaire akihuriire, Yoasi akakora ebirungi. Kwonka Yehoyaada ku yaafiire, Yoasi akahinduka yaaba mubi. Akahurikiza abanyiginya ababi, kandi yaaruga ahari Yehova.—2 Bus. 24:​2, 15-19.

⁴ Eky’okureeberaho ekindi n’eky’Abakristaayo b’ekyasha kya kabiri. Yohaana, entumwa owaahererukireyo, akaba ari eky’okureeberaho kirungi aha Bakristaayo baingi, kandi akabahwera kugumisiriza barikuheereza Yehova. (3 Yoh. 4) Yohaana n’entumwa za Yesu abandi abeesigwa, bakaba bamazire obwire barikurwanisa okwehagura aha mazima okwabaire nikujanjaara. (1 Yoh. 2:18.) Kwonka, Yohaana ku yaafiire okwehagura aha mazima kukajanjaara nk’omuriro gw’ekyanda. Bwanyima y’emyaka mikye, enyegyesa z’abeehagwire aha mazima zikashiisha ekibiina Ekikristaayo.

5. Twine kwetantara miteekateekyere ki kurugiirira aha by’okureeberaho bibiri ebi?

⁵ Mbwenu shi eby’okureeberaho ebi bibiri nibyoreka ngu ekintu nikyo kimwe nikibaasa kuhika aha ntaama za Kristo abandi, entoore ku baratwarwe omu iguru? Mbwenu shi tugire ngu Abakristaayo abeesigwa abaraabe bari omu nsi omu bwire obwo nibaza kuhaba nka Yoasi, nari beehagure aha mazima nk’Abakristaayo ab’ekyasha kya kabiri Y.A.K.? Ngaaha buzima! Nitubaasa kuhamya ngu entoore ku baratwarwe omu iguru, ab’entaama ezindi nibaza kugumizamu nibareebererwa, kandi bari gye omu by’omwoyo. Ahabw’enki nitugira tutyo?

OKURAMYA OKUSHEMEIRE TIKURIKWIJA KUSHIISHWA

6. Ni bwire ki bw’emiringo eshatu obu turikuza kugambaho omu bugufu?

⁶ Ahabw’enki nitubaasa kuhamya ngu okuramya okushemeire tikurikwija kushiishwa, n’omu mbeera ezigumire eziraabeho? Ahabw’okuba twegire omu Baibuli ebirikukwata aha bwire obu turimu. Obwire obu turimu nibutaanira kimwe n’obwa Israeli eya ira n’obw’Abakristaayo ab’ekyasha kya kabiri. Ka twongyere kureeba ebirikukwata aha bwire obwo obw’emiringo eshatu: (1) Obwire obwa Israeli eya ira, (2) obw’Abakristaayo b’ekyasha kya kabiri, (3) “n’obwire bw’okugarura ebintu byona busya.’—Byak. 3:21.

7. Omuri Israeli eya ira, ahabw’enki abantu abeesigwa batarahahaire mutima obu ihanga n’abagabe baryo baakora ebintu bibi?

⁷ Obwire obwa Israeli eya ira. Musa atakafiire, akagambira Abaisraeli ati: “Ahabw’okuba nimmanya ngu, ku ndiheza kufa, muryayesiisira kimwe, muteishukye omuhanda ogu naabaragiire.” (Bir. 31:29) Kandi Musa akabarabura ngu ku baraabe abagomi nibaija kutwarwa omu bukwatwa. (Bir. 28:​35, 36) Ebigambo ebyo bikahikiirira? Eego. Okumara ebyasha bingi, abagabe baingi bakakora ebintu bibi, kandi baahabisa abantu ba Ruhanga. Eki kikareetera Yehova kufubira abantu aba ababi n’okuhendera orunyiriri rw’abagabe ba Israeli omu nsi. (Ezk. 21:​25-27) Kwonka, Abaisraeli abeesigwa bakagira obumanzi ku baareebire oku ebigambo bye byahikiriire.—Isa. 55:​10, 11.

8. Mbwenu shi tushemereire kutangaara ngu Abakristaayo b’ekyasha kya kabiri bakashiishwa? Shoboorora.

⁸ Obwire bw’Abakristaayo b’ekyasha kya kabiri. Mbwenu shi kiine kututangaaza kumanya ngu ekibiina Ekikristaayo eky’ekyasha kya kabiri kikasiisikara? Ngaaha. Yesu akaba yaagambire ngu okwehagura aha mazima kukaba nikwija kujanjaara munonga. (Mat. 7:​21-23; 13:​24-30, 36-43) Entumwa Paulo, Petero, na Yohaana boona bakahamya ngu Obunabi bwa Yesu obwo bukaba butandikire kuhikiirira omu kyasha ky’okubanza Y.A.K.  (2 Tes. 2:​3, 7; 2 Pet. 2:1; 1 Yoh. 2:18) Omu kyasha ekyakuratsireho, ekibiina Ekikristaayo kikashiishwa. Bwanyima y’okufa kw’entumwa owaahererukireyo, Abakristaayo abeehagwire aha mazima bakeegaita ahari Babulooni Orukuru, nigo madiini g’ebishuba. Ekyo nakyo, kikaba nikihikiiriza obunabi bwa Baibuli.

9. Obwire obu turimu nibutaana buta n’obwa Israeli eya ira n’obw’Abakristaayo b’ekyasha kya kabiri?

⁹ ‘Obwire bw’okugarura ebintu byona busya.’ Obwire obu turimu nibutaana n’obwa Israeli eya ira hamwe n’obw’okweyongyera kw’abeehagwire aha mazima omu kyasha kya kabiri Y.A.K. Itwe turi mu bwire ki? Nitubaasa kugira ngu turi omu ‘biro by’emperu’ eby’ensi egi embi. (2 Tim. 3:1) Kwonka Baibuli neeyoreka ngu hariho obundi bwire buraingwa obwatandikire omu bwire nibwo bumwe obu ebiro by’emperu byatandika. Nibwija kugumizamu kuhitsya obu Obukama bwa Mesia buraareetere abantu kuba abahikiriire kandi bukahindura ensi paradiso. Obwire obwo nibumanywa ‘nk’obw’okugarura ebintu byona busya.’ (Byak. 3:21) Obwire obwo bukatandika 1914 Y.A.K. Niki ekyagarwirwe busya? Yesu, akeemekwa nk’Omugabe omu iguru. N’ahabw’ekyo, Yehova akagaruka yaatunga omugabe w’okumujwekyera kuruga omu runyiriri rw’Omugabe Daudi omwesigwa. Kwonka, Yehova taraagarwireho obugabe bwonka. Bwanyima y’ekyo, okuramya okushemeire kukatandika kugarurwaho! (Isa. 2:​2-4; Ezk. 11:​17-20) Mbwenu shi nikwija kugaruka kushiishwa?

10. (a) Baibuli ekagamba ki aha kuramya okushemeire omu bunaku bwaitu? (Isaaya 54:17) (b) Ahabw’enki obunabi obu burikutuhuumuriza?

¹⁰ Shoma Isaaya 54:17. Teekateeka aha bunabi obwo: “Tihariho ky’okurwanisa, eki baheesire kukurwanisa, ekirikubaasa!” Ebigambo ebyo nibihikiirira omu bunaku obu. Ebigambo ebirikukurataho ebirikuhuumuriza nabyo nibigamba aha bwire obu turimu, nibigira biti: ‘Batabani baawe boona nibaija kuba abarikwegyesibwa [Yehova], kandi okugogyera kwabo nikwija kuba kwingi. Omu kuhikiirira nimwo orahamizibwe. . . . Toratiine, n’ebirikwitsa obwoba nibiija kukuba hare, ahabw’okuba tibirakuhikeho.’ (Isa. 54:​13, 14) Kandi, Sitaane “ruhanga w’ensi egi” nawe taine maani g’okuremesa omurimo gw’okwegyesa ogurikukorwa abaheereza ba Yehova. (2 Kor. 4:4) Okuramya okushemeire kugarwirweho, kandi tikurikwija kugaruka kushiishwa. Nikwija kugumaho ebiro byona. Tihariho ky’okurwanisa eki baheesire kuturwanisa, ekiraije kutubaasa.

 NIKI EKIRAABEHO?

11. Niki ekirikutuhamiza ngu ab’omutwe omuhango tibarikwija kutsigwaho entoore ku baraaze omu iguru?

¹¹ Niki ekiraabeho entoore boona ku baratwarwe omu iguru? Ijuka ngu Yesu niwe Muriisa waitu. Niwe mutwe gw’ekibiina Ekikristaayo. Yesu akagira ati: “Mwine Omukama omwe, niwe Kristo.” (Mat. 23:10) Omugabe waitu orikutegyeka tarikwija kuremwa kuhikiiriza obujunaanizibwa bwe. Kristo yaaba naategyeka, abakuratsi be omu nsi tibarikwija kugira eki baatiina. Amazima gari ngu, titurikumanya omu bwijwire oku Kristo araabe naayebembera abantu be omu bwire obwo. Ka tureebe eby’okureeberaho bimwe omu Baibuli ebirikubaasa kutuhamiza.

12. Yehova akareeberera ata abantu be (a) bwanyima y’okufa kwa Musa? (b) bwanyima ya Eliya kuheebwa obujunaanizibwa obundi? (Reeba n’ekishushani.)

¹² Musa, akafa Abaisraeli batakataahire omu Nsi Eyaaraganisiibwe. Niki ekyabaire aha bantu ba Ruhanga? Mbwenu shi bakaba nibaija kwereeba nk’abatsigirweho, ahabw’okugira ngu Musa akaba atakiriho? Ngaaha. Ku baabaire baguma bari abeesigwa, Yehova akaba abareeberera. Musa atakafiire, Yehova akamugambira kutoorana Yoshua kwebembera abantu be. Musa akaba atendekire Yoshua kumara emyaka mingi. (Kur. 33:11; Bir. 34:9) Kandi hakaba hariho abandi abashaija baingi abaabaire nibeebembera, buri omwe rukumi, abandi igana, abandi ataano, n’abandi ikumi. (Bir. 1:15) Abaheereza ba Ruhanga bakaba nibareebererwa gye. Eky’okureeberaho ekindi n’ekya Eliya. Akaba naayebembera Abaisraeli omu kuramya okushemeire kumara emyaka mingi. Kwonka, Yehova akamuha obujunaanizibwa obundi omuri bukiizi bwa buryo bwa Yuda. (2 Bag. 2:1; 2 Bus. 21:12) Mbwenu shi abantu abeesigwa abaabaire bari omu bugabe bwa Israeli obw’enganda ikumi bakaba batsigirweho? Ngaaha. Eliya akaba atendekire Elisa kumara emyaka mingi. Kandi hakaba hariho ‘n’abaana ba baanabi,’ abaabaire nibatendekyerwa omu mashomero. (2 Bag. 2:7) N’ahabw’ekyo, hakaba hariho abashaija baingi abeesigwa abaabaire nibabaasa kwebembera abantu ba Ruhanga. Yehova akagumizamu naahikiiriza ekigyendererwa kye, kandi arikureeberera n’abaheereza be abeesigwa.

13. Abaheburaayo 13:5b nihatuhamiza ki? (Reeba n’ekishushani.)

¹³ Mbwenu shi kurugiirira aha by’okureeberaho ebyo, nooteekateeka ngu niki ekiraabeho entoore abaraabe batsigaireho ku baratwarwe omu iguru? Titwine kwerarikirira. Baibuli  neetworeka amazima makuru agarikutuhamiza ngu, Yehova tarikwija kutsigaho abaheereza be omu nsi. (Shoma Abaheburaayo 13:5b.) Nka Musa na Eliya, guruupu nkye ey’Abakristaayo entoore abarikutureeberera omu by’omwoyo obunaku obu nibeetegyereza obukuru bw’okutendeka abandi. Kumara emyaka mingi, abari aha Kakiiko Akareeberezi batwire nibatendeka ab’eishe-emwe abamwe ab’entaama ezindi kureeberera abandi. Nk’eky’okureeberaho, nibatebeekanisa amashomero maingi kutendeka abareeberezi b’ebibiina, aba saketi, abari aha Bukiiko bw’Amataagi, abareeberezi aha Beseeli, n’abandi. Akakiiko Akareeberezi nikatendeka abarikubahwera aha bukiiko butari bumwe obw’Akakiiko Akareeberezi. Abahwezi baabo baine obujunaanizibwa bw’amaani obu barikuhikiriza omu bwesigwa. Kandi betebeekanise gye kugumizamu nibareeberera entaama za Kristo.

14. Ni nshonga ki enkuru eyaagambwaho?

¹⁴ Enshonga enkuru n’egi: Entoore abaraabe batsigaireho ku baratwarwe omu iguru okubonabona kwingi kuri haihi kuhendera, okuramya okushemeire nikwija kugumizamu aha omu nsi. Ahabw’obutegyeki burungi bwa Yesu Kristo, abaheereza ba Ruhanga nibaija kugumizamu nibamuheereza. N’amazima, omu bwire obwo nitwija kutaahirirwa Googi owa Magoogi, amahanga agaraabe geegaitsire hamwe. (Ezk. 38:​18-20) Kwonka, okutaahirirwa okwo okuraamare obwire bukye, tikuraazibire abaheereza ba Yehova kugumizamu nibamuramya. Buzima naija kubajuna! Entumwa Yohaana omu kworekwa, akareeba “omutwe muhango gw’abantu,” nibo ab’entaama ezindi eza Kristo. Akagambirwa ngu ogu “n’omutwe muhango gw’abantu” abarugire “omu kubonabona kwingi.” (Kush. 7:​9, 14) Buzima, nibaija kurindwa gye!

15-16. Kurugiirira aha Okushuuruurwa 17:​14, entoore nibaija kukora ki omu rutaro rwa Haramagedoni, kandi ahabw’enki ekyo nikitugumya?

¹⁵ Kwonka, abamwe nibabaasa kuba nibeebuuza bati: ‘Entoore nibaija kuba nibakora ki kubaraaze omu iguru?’ Baibuli neegarukamu ekibuuzo ekyo butunu. Neeyoreka ngu gavumenti z’ensi egi ‘niziza kurwanisa Omwana  gw’entaama.’ Kandi hatariho kubangaanisa niziija kusingurwa. Baibuli neegira eti: ‘Omwana gw’entaama naija kubasingura.’ N’oha oraamuhwere? Omushororongo nigubeeta, ‘abaayetsirwe,’ “abaatoorainwe,” kandi “abeesigwa.” (Shoma Okushuuruurwa 17:14.) Nibo baahi? N’entoore abaraabe baazoirwe. N’ahabw’ekyo, entoore abarahereruke omu nsi ku baraatwarwe omu iguru okubonabona kwingi kuri haihi kuhendera, obujunaanizibwa bw’okubanza obu baraaheebwe n’obw’okurwana. Obwo ka n’obujunaanizibwa bw’amaani! Bamwe aha bashukirweho omwoyo gurikwera bakaba bari abarwani batakabaire Bajurizi ba Yehova. Kandi bamwe bakaba bari n’omu mahe g’ensi. Kwonka ku baahindukire Abakristaayo ab’amazima, bakeega kuba ab’obusingye. (Gal. 5:22; 2 Tes. 3:16) Bakarekyera aho kushagika entaro. Kwonka bwanyima y’okuza omu iguru, nibaija kuheereza hamwe na Kristo na baamaraika be abarikwera, barikurwanisa abazigu ba Ruhanga omu rutaro rw’aha muheru.

¹⁶ Hati, bamwe aha Bakristaayo entoore bakaikwire kandi tibaine maani. Kwonka ku baraazoorwe kutuura omu iguru, nibaija kuba bari ebihangirwe by’omwoyo, baine amaani, kandi bahairwe obujunaanizibwa bw’okurwana bakwataniise na Yesu Kristo Omugabe kandi Omurwani rugambwa. Bwanyima y’okurwana orutaro rwa Haramagedoni, nibaija kwejumba omu murimo gw’okuhwera abantu kuhika aha kihikiirira. Hatariho kubangaanisa, entoore baaba bari omu iguru nibaija kubaasa kuhwera munonga ab’eishe-emwe na banyaanyabo omu nsi kukira obu baabaire bari aha omu nsi batahikiriire.

17. Nitumanya tuta ngu abaheereza ba Ruhanga boona omu iguru n’omu nsi, nibaija kuba baine oburinzi omu rutaro rwa Haramagedoni?

¹⁷ Ori omwe aha b’entaama ezindi? Mbwenu shi iwe niki eki oraabe oine kukora, orutaro rwa Haramagedoni rwatandika? Eky’okukora kyorobi: Yesigye Yehova, kandi okuratire obuhabuzi bwe. Ekyo nikibaasa kutwariramu ki? Baibuli neekuhuumuriza erikugira eti: “Mutaahe omu bishengye byanyu, mube mwekingirainemu akaanya kakye, okuhitsya ahu ekiniga kiraahwere.” (Isa. 26:20) Abaheereza ba Ruhanga boona, omu iguru n’omu nsi, nibaija kuba baine oburinzi omu bwire obwo. Twatooreza entumwa Paulo, nituhamiza kimwe ngu ‘abarikutegyeka, nari ebiriho, nari ebiribaho . . . tihaine kirabaase kututaanisa n’okukunda kwa Ruhanga.’ (Rom. 8:​38, 39) Butoosha guma noijuka ngu Yehova nakukunda, kandi tarikwija kukutsigaho!