1. Kodi ni lini pomwe Akristau wentse wakudzozedwa an’dzatengedwa aciyendesedwa kudzulu?

 M’MBUYOMU, atumiki wa Yahova akhambabzibvunza kuti: ‘Kodi ni lini pomwe Akristau wakudzozedwa wentse an’dzayenda kudzulu?’ Pakuyamba tikhakumbuka kuti Akristau winango wakudzozedwa an’dzapitiriza kukhala m’Paraizo pa dziko la pantsi pano pambuyo pa nkhondo ya Armagedo. Tsono, mu revista ya Ntsanza ya Mulindiri ya 15 Julho, 2013, tidapfunza kuti Akristau wentse wakudzozedwa an’dzatengedwa aciyendesedwa kudzulu pomwe nkhondo ya Armagedo ikanati kucitika. — Mateu 24:31.

2. Kodi ni mbvunzo uponi omwe tingakhale nawo, ndipo tin’pfunza ciyani mu nkhani ino?

² Tsono pinango tingabzibvunze kuti: ‘Kodi n’ciyani comwe cin’dzacitikira Akristau wa “mabira manango” omwe an’dzakhala akutumikira Yahova mwakukhulupirika pa nthawe ya “citsautso cikulu”?’ (Juwau 10:16; Mateu 24:21) Pinango abale winango angakhale na thupo kwene-kwene kuti nthawe imweyo ikadzafika iwo an’dzabzibva kuti asiyidwa okha pomwe Akristau wakudzozedwa an’dzakhala ayenda kudzulu. Mu nkhani ino, tin’pfunza nkhani ziwiri za m’Bibliya zomwe pinango zingacitise abalewa kukumbuka tenepo. Tikamala tiniwona mathangwe yomwe yangaticitise kuleka kukhala na thupo na bzimwebzi.

KODI N’CIYANI COMWE CIN’DZACITIKA LINI?

3-4. Kodi n’ciyani comwe wanthu winango angabzibvunze, ndipo thangwe ranyi?

³ Winango pinango angabzibvunze penu Akristau wa mabira manango an’dzasiya cadidi abale wa m’Bungwe Lakutonga akadzakhala ayenda kudzulu. Pinango iwo angakumbuke bzimwebzi thangwe ra nkhani zinango za m’Bibliya. Mbatiwoneni bziratizo bziwiri. Ciratizo cakuyamba n’ca Mkulu wa Antsembe Jehoyada. Iye akhali munthu omwe akhafuna kwene-kwene Yahova. Iye pabodzi na mkazi wace, Jehozabeti, adakhotcerera mwana  wakucemeredwa Jehowasi ndipo adamuthandiza kukhala mambo wabwino. Pa nthawe zentse zomwe Jehoyada adakhala na moyo, Jehowasi akhacita bzinthu bzabwino. Tsono pomwe Jehoyada adafa, Jehowasi adayamba kucita bzinthu bzakuipa. Iye adayamba kutetekera nduna zace zomwe zikhali zakuipa ndipo adasiya kutumikira Yahova. — 2 Nkhani 24:2, 15-19.

⁴ Ciratizo caciwiri ni ca Akristau wakuyambirira. Mpostolo Juwau, omwe adakhala mpostolo wakumalizira kufa, adathandiza Akristau azinji kupitiriza kutumikira Yahova mwakukhulupirika. (3 Juwau 4) Iye pabodzi na Akristau winango akhacita nyongo yakumalisa apanduki m’gwere. (1 Juwau 2:18; 2 Atesalonika 2:7) Tsono pomwe Juwauyo adafa, apanduki adamwazika ninga lupsa. Pomwe padapita magole mang’ono-ng’ono, gwere la Akristau lidadzala na apanduki.

5. Akristau wakudzozedwa akadzayenda kudzulu, kodi ni citsimikizo ciponi comwe tin’funika kukhala naco?

⁵ Kodi bziratizo bzimwebzi bzikulatiza kuti bzin’dzacitikambo tenepoyo na mabira ya Kristu anyakudzozedwa wentse akadzayenda kudzulu? Pa nthawe imweyo, kodi Akristau wakukhulupirika pa dziko la pantsi pano an’dzapandukambo ninga momwe bzidacitikira na Jehowasi ayai an’dzakhala apanduki ninga momwe bzidacitikira mu nthawe ya Akristau wakuyambirira? Mtawiro ngwakuti ne! Tingakhale na citsimikizo centse cakuti anyakudzozedwa akadzayenda kudzulu, Akristau wa mabira manango an’dzapitiriza kusamaliridwa bwino mwauzimu. Thangwe ranyi tikukhulupira bzimwebzi?

KUNAMATA KWAKUCENA KUN’DZAPSWIPIZIDWA LINI

6. Kodi ni nthawe zitatu ziponi zomwe tin’cezerana?

⁶ Thangwe ranyi tingakhale na citsimikizo cakuti wanthu an’dzapitiriza kunamata Yahova mu njira yakuthemera napo pa nthawe yakunesa? Ni thangwe ra bzomwe timbapfunza m’Bibliya pakulewa bza nthawe yomwe tikukhala ino. Nthawe yomwe tikukhala ino njakusiyana kwene-kwene na nthawe ya Ajirayeri pabodzi na nthawe ya Akristau wakuyambirira. Tenepo, bwerani ticezerane bza nthawe zitatu izi: (1) Nthawe ya Ajirayeri, (2) pomwe apostolo adamala kufa na (3) nthawe yathu ino, “nthawe yomwe bzinthu bzentse bzin’dzakonzedwa papsa.” — Mabasa 3:21.

7. Mu nthawe ya Ajirayeri, thangwe ranyi wanthu wakukhulupirika alibe kuwofoka pomwe adawona amambo akucita bzinthu bzakuipa?

⁷ Nthawe ya Ajirayeri. Pomwe Mozeji akhadasala pang’ono kufa, iye adauza Ajirayeri kuti: “Inepano ndikudziwa kuti ndikadzafa, imwepo mun’dzacita bzinthu bzakuipa ndipo mun’dzasiya kufamba mu njira yomwe ndidakuuzani kuti mufambe.” (Deuteronomiyo 31:29) Ndipo Mozeji adacenjezambo Ajirayeriwo kuti akapanduka angadadzayendesedwa ku ukapolo. (Deuteronomiyo 28:35, 36) Kodi bzomwe adalewabzi bzidacitikadi? Inde bzidacitika. Pomwe padapita magole mazinji, amambo wa Jirayeri adacita bzinthu bzakuipa ndipo adapambusa wanthu pa njira ya Yahova. Bzimwebzi bzidacitisa kuti Yahova asiye wanthu wace acigwatizambo m’badwo wa amambo wa pa dziko la pantsi pano. (Ezekiyeli 21:25-27) Tsono Ajirayeri wakukhulupirika adakhala wakukhwimika pomwe adawona Fala la Mulungu likukwanisika. — Zaiya 55:10, 11.

8. Kodi tin’funika kudabwa na apanduki omwe adapita mu gwere lacikristau mu nthawe ya Akristau wakuyambirira? Fotokozani.

⁸ Pomwe apostolo adamala kufa. Kodi tin’funika kudabwa thangwe ra apanduki omwe adapita mu gwere lacikristau pambuyo pa kufa kwa apostolo wentse? Ne. Jezu akhadalewa kale kuti kungadadzakhala na apanduki. (Mateu 7:21-23; 13:24-30, 36-43) Mpostolo Paulo, Pedru na Juwau adatsimikizira kuti bzomwe Jezu adalewa bzikhayamba kucitika mu nthawe imweyire. (2 Atesalonika 2:3, 7; 2 Pedru 2:1; 1 Juwau 2:18) Ndipo pomwe padadzapita magole mazinji,  m’gwere mudadzadzala na apanduki. Bzimwebzi bzidacitisa kuti Babiloniya Mkulu, omwe ni likulu la magereja yentse yakunama, awonekere. Ndipo bzidakwanirisa polofesiya yomwe Jezu adalewa.

9. Thangwe ranyi nthawe yathu ino njakusiyana na nthawe ya Ajirayeri pabodzi na nthawe ya Akristau wakuyambirira?

⁹ “Nthawe yomwe bzinthu bzentse bzin’dzakonzedwa papsa.” Nthawe yomwe tikukhala ino njakusiyana na nthawe ya Ajirayeri pabodzi na nthawe yomwe apostolo wentse adamala kufa. Kodi nthawe yathu ino imbacemeredwa tani? Cakuyamba timbadziwa kuti nthawe ino imbacemeredwa kuti “ntsiku zakumalizira” za dziko lakuipali. (2 Timotio 3:1) Tsono, Bibliya limbalatizambo kuti imweyi ni nthawe yakupambulika yomwe ikhadalewedwa kale. Ndipo nthawe imweyi ikuyenda mpaka pomwe Umambo bwa Mulungu bun’dzathandiza wanthu wentse pa dziko la pantsi kukhala wakulungamiratu na kusandusa dzikoli kukhala Paraizo. Nthawe imweyi imbacemeredwa “nthawe yomwe bzinthu bzentse bzin’dzakonzedwa papsa.” (Mabasa 3:21) Nthawe imweyi idayamba mu 1914. Kodi ni bzinthu bziponi bzomwe bzidakonzedwa papsa? Cinthu cakuyamba n’cakuti Jezu Kristu adaikhidwa kuti akhale Mambo kudzulu. Bzimwebzi bzidacitisa kuti Yahova akhale na mambo omwe akhaimira Mbadwa ya Mambo Davide. Tsono ni bzinthu lini bzimwebzi bzokha bzomwe Yahova adakonza papsa. Iye adayambambo kubwezeresa kunamata kwakucena! (Zaiya 2:2-4; Ezekiyeli 11:17-20) Tsono kodi kunamata kwakucenako kun’dzapswipizidwa pomwe?

10. (a) Kodi Bibliya limbalewa ciyani bza kunamata kwakucena mu nthawe yathu ino? (Zaiya 54:17) (b) Thangwe ranyi mapolofesiya yamweya yambatitsangalaza?

¹⁰ Werengani Zaiya 54:17. Kumbukirani bza polofesiya imweyi yomwe imbati: “Cifuzo ciri-centse comwe cidakonzedwa kuti cikudzonge, cin’dzakunda lini”! Mafala yakufuliziridwaya yakukwanisika ntsiku zino. Ndipo pana mafala manango yakutsangalaza yomwe yakuphatambo basa ntsiku zino. Mafalayo yambati: “Wana wanu wentse an’dzapfunzisidwa na Yahova ndipo mtendere wa wanawo un’dzakhala uzinji. . . . Imwepo mun’dzacita lini mantha ndipo palibe cinthu comwe cin’dzakugopswani thangwe cinthuco cin’dzafendera lini pafupi na imwepo.” (Zaiya 54:13, 14) Mafalaya yambatitsangalaza thangwe yakutitsimikizira kuti napo “mulungu wa dzikoli,” omwe ni Sathani Dyabu, alibe mphanvu yakuimisa basa lakupfunzisa wanthu lomwe atumiki wa Yahova akucita. (2 Akolinto 4:4) Kunamata kwakucena kudabwezeresedwa ndipo kun’dzapswipizidwa lini pomwe. Iko kun’dzapitiriza kuyenda na kuyenda. Palibe cifuzo ciri-centse comwe cidakonzedwera kuti citidzonge cin’dzakunda!

 KODI N’CIYANI CIN’DZACITIKA?

11. N’ciyani cimbatitsimikizira kuti thimu likulu lin’dzasiyidwa lini anyakudzozedwa akadzayenda kudzulu?

¹¹ Kumbukirani kuti Jezu ndiye M’busa wathu. Iye ndiye msolo wa gwere lacikristau. Jezu adalewa mwakubveka bwino kuti: “Mtsogoleri wanu ni m’bodzi yekha, Kristu.” (Mateu 23:10) Kodi n’ciyani comwe cimbatitsimikizira kuti thimu likulu lin’dzasiyidwa lini anyakudzozedwa wentse akadzayenda kudzulu? Mambo wathu Jezu an’dzapitiriza kulitsogolera. Ateweri wa Kristu pa dziko lino la pantsi ambabva lini mantha thangwe Mwana wa Mulungu ndiye omwe akuwatsogolera. N’cadidi kuti tikudziwa lini bwino-bwino momwe Jezu an’dzacitira kuti atsogolere wanthu wace pa nthawe imweyo. Tsono bwerani tiwone bziratizo bzinango bza m’Bibliya bzomwe bzikutitsimikizira kuti iye an’dzapitiriza kutitsogolera.

12. Kodi Yahova adasamalira tani wanthu wace (a) pomwe Mozeji adafa? (b) pomwe Eliya adapasidwa utumiki bunango? (Onani cithunzi-thunzi.)

¹² Mozeji adafa pomwe Ajirayeri akhanati kupita mu Dziko Lakupiciridwa. N’ciyani cidacitika na atumiki wa Mulungu? Kodi bzinthu bzingadawafambira lini bwino thangwe rakuti munthu wakukhulupirika ule akhadafa? Ne. Iwo angadapitiriza kukhala wakukhulupirika kwa Yahova, Yahovayo angadawathandiza. Pomwe Mozeji akhanati kufa, iye adauzidwa na Yahova kuti aikhe Djoswa kuti atsogolere wanthuwo. Mozeji akhapfunzisa kale Djoswa basa limweri kwa magole mazinji. (Ekisodo 33:11; Deuteronomiyo 34:9) Kuthumizira bzimwebzi, pakhana amuna winango omwe akhasankhulidwa kuti atsogolere wanthuwo, omwe akhali atsogoleri wa wanthu 1000, wa wanthu 100, wa wanthu 50 na wa wanthu 10. (Deuteronomiyo 1:15) Wanthu wa Mulungu akhasamaliridwa bwino. Timbawona ciratizo cakundendemerana na cimweci pa nkhani ya Eliya. Iye adamala magole mazinji akutsogolera kunamata kwakucena pakati pa Ajirayeri. Tsono idafika nthawe yomwe Yahova adamupasa basa linango ku nyantsi kwa Djuda. (2 Amambo 2:1; 2 Nkhani 21:12) Kodi wanthu wakukhulupirika wa madzinza 10 ya Jirayeri adasiyidwa tenepo? Ne. Eliya akhapfunzisa Elizeu. Ndipo pakhanambo “wana wa apolofeta” omwe akhapfunzisidwa. (2 Amambo 2:7) Tenepo pakhana amuna azinji wakukhulupirika omwe akhapfunzisidwa kuti athandize wanthu wa Mulungu. Cakulinga ca Yahova cikhapitiriza ndipo iye akhasamalira atumiki wace wakukhulupirika.

13. Kodi ni citsimikizo ciponi comwe timbacigumana pa Ahebereu 13:5b? (Onani cithunzi-thunzi.)

¹³ Pa bziratizo bzomwe tacezeranabzi, kodi imwepo mukukumbuka kuti n’ciyani comwe cin’dzacitika anyakudzozedwa wentse akadzatengedwa aciyenda kudzulu? Tin’funika lini kucita  thupo. Bibliya limbafotokoza mwakubveka bwino mafala yakutsangalaza. Iro limbati: Yahova an’dzasiya lini wanthu wace pa dziko la pantsi. (Werengani Ahebereu 13:5b.) Ninga Mozeji na Eliya, Akristau wakudzozedwa ambawonambo kuti mpsakufunika kwene-kwene kupfunzisa anzawo. Kuyambira kale-kale, abale wa m’Bungwe Lakutonga akupfunzisa amuna wakukhulupirika pakati pa Akristau wa mabira manango kuti akwanise kutsogolera wanthu wa Mulungu. Mwa ciratizo, iwo adakonza maxikola kuti apfunzise akulu wa magwere, anyakunyang’anira dera, abale wa m’Makomiti ya Mthambi, anyakunyang’anira madepatimenti pa Beteli, amisiyonario na winango. Bungwe Lakutonga limbapfunzisambo abale omwe ambathandizira m’makomiti ya Bungwe Lakutonga. Athandizi amwewa akucita mabasa mazinji yakusiyana-siyana mwakukhulupirika. Iwo ali wakukonzeka kuti adzapitirize kuthandiza mabira ya Kristu.

14. Kodi nfundo ikulu ya nkhani ino njiponi?

¹⁴ Nfundo ikulu kwene-kwene ya nkhani yathuyi njakuti Akristau wakudzozedwa wakumalizira akadzatengedwa aciyenda kudzulu kuphampha kwa citsautso cikulu, kunamata kwakucena kun’dzapitiriza pa dziko la pantsi pano. Atumiki wa Yahova an’dzapitiriza kumunamata thangwe ra kutsogoleredwa na Jezu Kristu. Tikudziwa kuti pa nthawe imweyo mbverano wa mitundu wakucemeredwa Gogi wa ku Magogi an’dzafuna kupfudza wanthu wa Mulungu. (Ezekiyeli 38:18-20) Tsono bzimwebzi bzin’dzacitisa lini kuti atumiki wa Yahova asiye kunamata Yahovayo. Iye an’dzawapulumusa! M’masomphenya yanango, mpostolo Juwau adawona “thimu likulu” la mabira yanango ya Kristu. Mpostolo Juwau adauzidwa kuti “thimu likulu” limweri likhacoka “ku citsautso cikulu.” (Apokalipse 7:9, 14) Bzimwebzi bzikulatiza kuti iwo an’dzakhotcereredwa!

15-16. Mwakubverana na Apokalipse 17:14, kodi ni basa liponi lomwe anyakudzozedwa an’dzacita pa nkhondo ya Armagedo, ndipo thangwe ranyi bzimwebzi bzimbatilimbikisa?

¹⁵ Napo bziri tenepo, pinango winango angabzibvunze kuti: ‘Tsono tani pakulewa bza anyakudzozedwawo? N’ciyani comwe iwo an’dzacita akadzayenda kudzulu?’ Bibliya limbatawira mbvunzo umweyu. Iro limbalewa kuti maboma ya dziko “[yan’dzakamenya] nkhondo na Mwana wa Bira.” Ndipo tikudziwiratu kuti mabomayo  yan’dzakundidwa, thangwe Bibliya limbalewa kuti: “Mwana wa Birayo . . . an’dzawakunda.” Kodi mbani omwe an’dzamuthandiza? Vesiri limbatawira kuti: Iye an’dzathandizidwa na “anyakucemeredwa,” omwe “asankhulidwa” pabodzi na “wakukhulupirika.” (Werengani Apokalipse 17:14.) Kodi mbani amwewa? Ni anyakudzozedwa omwe an’dzalamusidwa aciyenda kudzulu! Tenepo anyakudzozedwa wentse omwe ali pa dziko la pantsi akadzayenda kudzulu kuphampha kwa citsautso cikulu, basa lakuyamba lomwe iwo an’dzacita lin’dzakhala la kumenya nkhondo. Limweri lin’dzakhala basa lakupambulika kwene-kwene kwa iwo! Akristau winango wakudzozedwa akhamenya nkhondo pomwe akhanati kukhala Mboni za Yahova. Ndipo winango adacita basa la ucikunda m’dzikoli. Tsono iwo adadzasiya bzentsenebzi pomwe adapfunza cadidi ndipo adayamba kukhala wanthu wakufuna mtendere. (Agalatiya 5:22; 2 Atesalonika 3:16) Iwo adasiya kumenya nkhondo. Tsono akadzalamusidwa aciyenda kudzulu, iwo an’dzaphata basa pabodzi na Jezu na anjo wakucena pa kumenya nkhondo yakumalizira na anyamadulanthaka wa Mulungu.

¹⁶ Kumbukirani kuti Akristau winango wakudzozedwa omwe akali pa dziko la pantsi pano ni nkhalamba ndipo alibe mphanvu! Tsono iwo akadzalamusidwa aciyenda kudzulu an’dzakhala bzakulengedwa bzauzimu bza mphanvu na bzakusaya kufa bzomwe bzin’dzacita basa la kumenya nkhondo pabodzi na Jezu Kristu. Iwo akadzamala kumenya nkhondo ya Armagedo, an’dzathandizira pa basa la kuthandiza wanthu kuti akhale wakulungamiratu. Iwo an’dzacita bzizinji kwene-kwene kuti athandize abale na mpfumakazi zawo kuposa momwe iwo akuwathandizira pomwe ali pa dziko la pantsi pano!

17. Kodi timbadziwa tani kuti atumiki wentse wa Yahova an’dzakhala wakukhotcerereka pa nkhondo ya Armagedo?

¹⁷ Kodi imwepo mumbacita mbali ya mabira manango? Penu ndibzo, kodi n’ciyani comwe imwepo mun’dzafunika kucita nkhondo ya Armagedo ikadzayamba? Imwepo mun’dzafunika kucita ibzi: Dzakhulupireni Yahova ndipo dzatewezeni malango yace. Kodi bzimwebzi bzikuthandauza ciyani? Na mafala yakutsangalaza, Bibliya limbalewa kuti: “Ndokoni mukapite m’bzipinda bzanu bza mkati mucikafunga misuwo. Mukabisale kwa kanthawe mpaka ukali butapita.” (Zaiya 26:20) Atumiki wentse wakukhulupirika wa Yahova kudzulu na pa dziko la pantsi, an’dzakhala wakukhotcerereka pa nthawe imweyi. Ninga mpostolo Paulo, ifepano tikutsimikizira kuti ne “atongi, ne bzinthu bzomwe bziripo tsapano, ne bzinthu bzomwe bzikubwera . . . [bzin’dzakwanisa] kutilekanisa na lufoyi la Mulungu.” (Aroma 8:38, 39) Nthawe zentse mbakumbukirani kuti Yahova ambakufunani ndipo cipo acidzakusiyani!