1. Mekɛ boni a bɛbava bɛdabɛ mɔɔ bɛkpokpa bɛ la amuala bɛahɔ anwuma a?

 ƐVOLƐ dɔɔnwo mɔɔ ɛze ɛhɔ la, Gyihova menli bizale bɛ nwo kɛ, ‘Mekɛ boni a bɛbava Kilisienema mɔɔ bɛkpokpa bɛ la mɔɔ li awieleɛ la bɛahɔ anwuma a?’ Mekɛ bie ɛnee yɛlɛ adwenle kɛ, wɔ Amagɛdɔn konle ne anzi, bɛdabɛ mɔɔ bɛkpokpa bɛ la bie mɔ baha azɛlɛ ye azo na bɛadɛnla Paladaese ne anu ekyii. Noko yɛzukoale ye wɔ July 15, 2013, Ɛzinzalɛ Arane ne anu kɛ, bɛbava bɛdabɛ mɔɔ bɛkpokpa bɛ mɔɔ bɛtɛbɔ azɛlɛ ye azo la amuala bɛahɔ anwuma kolaa na Amagɛdɔn ne abɔ ɔ bo.—Mat. 24:31.

2. Kpuya boni a bie a yɛ nuhua bie mɔ babiza a, na duzu a yɛbazuzu nwo wɔ edwɛkɛ ɛhye anu a?

² Noko bie a yɛ nuhua bie mɔ babiza kɛ: Duzu a bado Kelaese “mboane gyɛne” ne mɔɔ “anwongyelelɛ kpole” ne anu ɛnee bɛtɛfa nɔhalɛlilɛ bɛtɛsonle Gyihova wɔ azɛlɛ ye azo la ɛ? (Dwɔn 10:16; Mat. 24:21) Ɛnɛ, wɔannea a ɔbayɛ bie mɔ adwenleadwenle kɛ, saa bɛfa bɛ mediema mɔɔ bɛkpokpa bɛ la bɛkɔ anwuma a, bɛnrɛnwu mɔɔ ɔwɔ kɛ bɛyɛ a, anzɛɛ bɛnrɛnyia awie ɛnrɛnlea bɛ. Maa yɛzuzu kɛlɛtokɛ nwiɔ mɔɔ wɔ Ngɛlɛlera ne anu mɔɔ bie a ɔbamaa bɛanyia adwenle zɔhane la anwo. Akee yɛbazuzu deɛmɔti ɔnle kɛ yɛmaa ɔgyegye yɛ la anwo.

DUZU A ƐNRƐZI A?

3-4. Adwenle boni a bie mɔ lɛ a, na duzu ati ɔ?

³ Bie mɔ lɛ adwenle kɛ, saa mediema mɔɔ bɛkpokpa bɛ mɔɔ bɛwɔ Neazo Eku ne anu la ɛnle ɛkɛ ne bieko mɔɔ bɛbahile mboane gyɛne ne adenle a, bie a ɔbamaa bɛavi nɔhalɛ ne anu. Bie a kɛlɛtokɛ bie mɔ mɔɔ wɔ Ngɛlɛlera ne anu la a maa bɛsulo zɔhane a. Maa yɛzuzu nuhua nwiɔ anwo. Mɔɔ limoa la fale Ɛsɔfo Kpanyinli Gyɛhɔyada anwo. Ɛnee ɔle Nyamenle sonvolɛ mɔɔ di nɔhalɛ. Ɔ nee ɔ ye Gyehohyabeya bɔle kakula nrenyia  ekyi bie mɔɔ bɛfɛlɛ ye Gyɛhowahye la anwo bane na bɛboale ye bɛmaanle ɔrayɛle belemgbunli kpalɛ mɔɔ di nɔhalɛ. Mɔɔ Gyɛhɔyada mɔɔ ɛyɛ ɛrelera la tɛte aze la, Gyɛhowahye bɔle ɔ nwo mɔdenle. Noko mɔɔ Gyɛhɔyada wule ala la, Gyɛhowahye subane zɛkyele. Ɔdiele Yizilayɛ mgbanyima amumuyɛma folɛdulɛ na ɔgyakyile Gyihova ɛzonlenlɛ.—2 Ek. 24:​2, 15-19.

⁴ Neazo bieko a le ɛvoya mɔɔ tɔ zo nwiɔ anu Kilisienema ne. Dwɔn, mɔɔ le ɛzoanvolɛ mɔɔ li awieleɛ la boale Kilisienema dɔɔnwo maanle bɛhɔle zo bɛzonlenle Gyihova. (3 Dwɔn 4) Dwɔn nee Gyisɛse ɛzoanvolɛ nɔhavoma gyɛne bɔle mɔdenle ɛsesebɛ honle tiale kpɔkyevolɛma adalɛ ngilehilelɛ mɔɔ ɛnee ɛlɛsalo la wɔ mekɛ bie anu. (1 Dwɔn 2:18; nea 2 Tɛs. 2:7 study notes ne.) Noko mɔɔ Dwɔn wule la, menli dɔɔnwo mɔɔ wɔ asafo ne anu la rayɛle kpɔkyevolɛma. Ɛvolɛ ekyii guale nu la, adalɛ ngilehilelɛ nee subane ɛtane akee zɛkyele Kilisiene asafo ne bɔkɔɔ.

5. Duzu a ɔwɔ kɛ yɛnwu ye wɔ neazo nwiɔ ɛhye mɔ anwo a?

⁵ Asoo neazo nwiɔ ɛhye mɔ kile kɛ saa bɛfa bɛdabɛ mɔɔ bɛkpokpa bɛ la bɛkɔ anwuma a, Kelaese mboane gyɛne ne babɔ ɔ bo ayɛ ninyɛndane kɛ mɔɔ Gyɛhowahye yɛle la, anzɛɛ bɛbayɛ kpɔkyevolɛma kɛ mɔɔ Kilisienema mɔɔ dɛnlanle aze wɔ ɛzoanvolɛma ne ewule nzi la yɛle la ɔ? Ɔnle zɔ fee! Yɛbahola yɛanyia anwodozo kɛ, saa bɛdabɛ mɔɔ bɛkpokpa bɛ la fi azɛlɛ ye azo a, Gyihova bahɔ azo anlea mboane gyɛne ne kpalɛ na bɛazonle ye wɔ adenle mɔɔ ɔdie ɔto nu la azo. Duzu ati a yɛkola yɛnyia anwodozo zɔhane a?

BƐNRƐHOLA BƐNRƐZƐKYE NƆHALƐ ƐZONLENLƐ

6. Mekɛ ngakyile nsa boni a yɛbazuzu nwo sikalɛ a?

⁶ Duzu ati a yɛbahola yɛanyia anwodozo kɛ bɛnrɛhola bɛnrɛzɛkye nɔhalɛ ɛzonlenlɛ, bɔbɔ wɔ mekɛ mɔɔ anu yɛ se mɔɔ la yɛ nyunlu la anu a? Ɔlua mekɛ ɛhye mɔɔ yɛde nu la anwo ninyɛne mɔɔ yɛzukoa yɛvi Baebolo ne anu la ati ɔ. Mekɛ ɛhye le ngakyile kpalɛ fi tete Yizilayɛ nee ɛvoya mɔɔ tɔ zo nwiɔ anu Kilisienema ne mekɛ ɛdeɛ ne anwo. Ɔti maa yɛzuzu mekɛ ngakyile nsa ɛhye mɔ anwo kpalɛ: (1) Tete Yizilayɛma mekɛ zo, (2) ɛzoanvolɛma ewule nzi mekɛ ɛdeɛ ne, yɛɛ (3) yɛ mekɛ ye azo, “mekɛ mɔɔ bɛbayɛ ninyɛne kɔsɔɔti fofolɛ” la.—Gyi. 3:21.

7. Duzu ati a Yizilayɛma mɔɔ di nɔhalɛ la asa anu ando wɔ mekɛ mɔɔ maanle ne nee ye arelemgbunli ne mɔ kpale kɛ bɛbayɛ ninyɛndane la ɛ?

⁷ Tete Yizilayɛma mekɛ zo. Ɔka ekyii Mosisi wu la, ɔhanle ɔhilele Yizilayɛma kɛ: “Meze kɛ saa mewu a, bɛbayɛ ninyɛndane na bɛahwe bɛ nwo bɛavi adenle ne mɔɔ mengilele bɛ la azo.” (Dit. 31:29) Eza Mosisi bɔle Yizilayɛma kɔkɔ kɛ saa bɛte atua a, bɛ nee bɛ bahɔ akɛlɛzonlenlɛ nu. (Dit. 28:​35, 36) Asoo edwɛkɛ zɔhane rale nu? Ɛhɛe. Wɔ ɛvolɛ ɛya dɔɔnwo anu, arelemgbunli dɔɔnwo yɛle ninyɛndane na bɛmaanle menli ne hwenle bɛ nwo vile Nyamenle anwo. Ɛhye maanle Gyihova hwenle ye menli amumuyɛma ne anzo na yeammaa Yizilayɛnli biala anli belemgbunli wɔ bɛ nwo zo bieko. (Yiz. 21:​25-27) Noko mɔɔ Yizilayɛma mɔɔ di nɔhalɛ la nwunle kɛ Nyamenle edwɛkɛ ne ɛra nu la, ɔmaanle bɛnyianle akɛnrasesebɛ bɛhɔle zo bɛzonlenle ye.—Aye. 55:​10, 11.

8. Asoo ɔwɔ kɛ yɛmaa ɔsi yɛ nwo kɛ bɛvale adalɛ ngilehilelɛ bɛzɛkyele ɛvoya mɔɔ tɔ zo nwiɔ anu Kilisiene asafo ne la ɔ? Kilehile nu.

⁸ Ɛzoanvolɛma ne ewule nzi. Asoo ɔwɔ kɛ yɛmaa ɔsi yɛ nwo kɛ bɛvale adalɛ ngilehilelɛ bɛzɛkyele ɛvoya mɔɔ tɔ zo nwiɔ anu Kilisiene asafo ne la ɔ? Kyɛkyɛ. Gyisɛse hanle dole ɛkɛ ne kɛ kpɔkyevolɛma dɔɔnwo bara. (Mat. 7:​21-23; 13:​24-30, 36-43) Ɛzoanvolɛ ɛhye mɔ,  Pɔɔlo, Pita nee Dwɔn amuala hanle kɛ ɛnee Gyisɛse ngapezo ne ɛbɔ ɔ bo ɛlɛba nu wɔ ɛvoya mɔɔ limoa wɔ Y.M. la anu. (2 Tɛs. 2:​3, 7; 2 Pita 2:1; 1 Dwɔn 2:18) Na wɔ ɛvoya mɔɔ tɔ zo nwiɔ wɔ Y.M. anu, ɛnee akee bɛva adalɛ ngilehilelɛ bɛzɛkye Kilisiene asafo ne. Akee Kilisiene ɛzonlenlɛ ne mɔɔ ɛkpɔkye la rayɛle Babelɔn Kpole ne, ewiade amuala adalɛ ɛzonlenlɛ maanle ne foa titili kpalɛ. Ɔti eza mɔɔ Gyisɛse hanle dole ɛkɛ ne la ɛlɛba nu.

9. Kɛzi yɛ mekɛ ɛdeɛ ne le ngakyile fi tete Yizilayɛma mekɛ zo nee ɛvoya mɔɔ tɔ zo nwiɔ anu Kilisienema ne mekɛ ɛdeɛ ne anwo ɛ?

⁹ “Mekɛ mɔɔ bɛbayɛ ninyɛne kɔsɔɔti fofolɛ” la. Yɛ mekɛ ɛdeɛ ne le ngakyile fi tete Yizilayɛma mekɛ zo nee mekɛ mɔɔ kpɔkyevolɛma rale kpole wɔ ɛvoya mɔɔ tɔ zo nwiɔ wɔ Y.M. la anwo. Kɛzi bɛfɛlɛ yɛ mekɛ ye ɛ? Bie a ɛkɛ ne ala yɛbavɛlɛ ye ewiade ɛtane ɛhye “mekɛ mɔɔ li awieleɛ la.” (2 Tim. 3:1) Noko Baebolo ne maa ɔda ali kɛ, mekɛ titili bie mɔɔ wale la eza bɔle ɔ bo wɔ mekɛ ko ne ala. Ɔbadoa zo kɔkpula kɛ Mɛzaya Belemgbunlililɛ ne bamaa alesama ali munli bieko na yeamaa azɛlɛ ne ayɛ paladaese la. Bɛfɛlɛ mekɛ ɛhye “mekɛ mɔɔ bɛbayɛ ninyɛne kɔsɔɔti fofolɛ” la. (Gyi. 3:21) Mekɛ ɛhye bɔle ɔ bo wɔ 1914. Duzu a bɛyɛle ye fofolɛ a? Bɛziele Gyisɛse Belemgbunli wɔ anwuma. Ɔti Gyihova nyianle belemgbunli bieko maanle ɔgyinlanle Ɔ gyakɛ anu, Belemgbunli Devidi mɔɔ le nɔhavo la koliagya. Noko tɛ belemgbunlililɛ zɔhane angomekye a Gyihova yɛle ye fofolɛ a. Yeangyɛ, bɛbɔle ɔ bo kɛ bɛfa nɔhalɛ ɛzonlenlɛ bɛazie ɛkɛ ne bieko! (Aye. 2:​2-4; Yiz. 11:​17-20) Asoo bɛbazɛkye ye bieko?

10. (a) Duzu a Baebolo ne ka ye wɔ nɔhalɛ ɛzonlenlɛ wɔ yɛ mekɛ ye azo anwo a? (Ayezaya 54:17) (b) Duzu ati a ngapezo ɛhye mɔ maa yɛnyia anwodozo a?

¹⁰ Kenga Ayezaya 54:17. Dwenle ngapezo zɔhane anwo: “Akodeɛ biala mɔɔ bɛbayɛ bɛatia wɔ la ɛnrɛyɛ kpalɛ”! Ngapezo zɔhane ɛlɛba nu ɛnɛ. Eza arɛlekyekyelɛ edwɛkɛ ɛhye fale yɛ mekɛ ye anwo: “Gyihova bahilehile ɛ mra kɔsɔɔti, na ɛ mra banyia anzodwolɛ kpole kpalɛ. Ɛbagyinla kpundii wɔ tenleneyɛlɛ nu. . . . Ɛnrɛzulo ɛhwee yɛɛ debie biala ɛnrɛdu wɔ ahonle, ɔluakɛ ɔnrɛbikye wɔ.” (Aye. 54:​13, 14) Seetan mumua ne, mɔɔ le “ewiade ɛhye nyamenle ne” bɔbɔ la ɛnrɛhola ɛnrɛmaa Gyihova menli ɛnrɛgyakyi ngilehilelɛ gyima ne mɔɔ bɛlɛyɛ la. (2 Kɔl. 4:4) Bɛva nɔhalɛ ɛzonlenlɛ bɛzie ɛkɛ ne bieko, na bɛnrɛhola bɛnrɛzɛkye ye bieko ɛlɛ. Ɔbadɛnla ɛkɛ ne mekɛ mɔɔ ɛnlɛ awieleɛ. Akodeɛ biala mɔɔ bɛyɛ bɛtia ye la ɛnrɛyɛ kpalɛ!

 DUZU A BAZI A?

11. Duzu a maa yɛdie yɛdi kɛ, saa bɛdabɛ mɔɔ bɛkpokpa bɛ la kɔ anwuma a, bɛnrɛkpo menli ekpunli kpole ne a?

¹¹ Saa bɛfa menli mɔɔ bɛkpokpa bɛ la bɛkɔ anwuma a, duzu a bazi a? Kakye kɛ Gyisɛse a le yɛ Neavolɛ a. Ɔdaye a ɔle Kilisiene asafo ne ati a. Gyisɛse hanle ye wienyi kɛ: “Bɛ Adekilevolɛ kokye, yemɔ a le Kelaese ne.” (Mat. 23:10) Yɛ Belemgbunli ne mɔɔ ɛlɛdi tumi la bayɛ ye gyima dahuu. Kɛmɔ Kelaese a ɛlɛkile ye ɛdoavolɛma adenle la ati, ɔnle kɛ bɛdabɛ mɔɔ bɛwɔ azɛlɛ ye azo la maa debie biala ka bɛ ɛzulolɛ. Nɔhalɛ nu, yɛnze kɛzi Kelaese bahile ye menli ne adenle wɔ mekɛ zɔhane la anwo edwɛkɛ kɔsɔɔti. Ɔti maa yɛzuzu Baebolo ne anu neazo bie mɔ mɔɔ bamaa yɛanyia anwodozo la anwo.

12. Kɛzi Gyihova nleanle ye menli ne (a) wɔ mekɛ mɔɔ Mosisi wule la ɛ? (b) wɔ mekɛ mɔɔ bɛmaanle Yilaegya gyimalilɛ fofolɛ la ɛ? (Eza nea nvoninli ne.)

¹² Mosisi wule kolaa na Yizilayɛma adwu Ɛwɔkɛ Azɛlɛ ne azo. Duzu a dole Nyamenle menli ne a? Asoo Gyihova gyakyile kɛ ɔbaboa ye menli ne wɔ mekɛ mɔɔ nrenyia nɔhavo zɔhane wule la ɔ? Kyɛkyɛ. Mekɛ ala mɔɔ bɛhɔle zo bɛlile nɔhalɛ la, Gyihova vale mɔɔ bɛhyia nwo la maanle bɛ. Kolaa na Mosisi awu la, Gyihova hanle hilele ye kɛ ɔkpa Dwɔhyua amaa yeali menli ne anyunlu. Mosisi vale ɛvolɛ dɔɔnwo tetele Dwɔhyua. (Ɛzɛ. 33:11; Dit. 34:9) Ɛnee eza bɛlɛ mrenyia gyɛne mɔɔ bɔ mɔdenle la dɔɔnwo mɔɔ kile bɛ adenle—mgbanyima mɔɔ nea menli apenle apenle, ɛya ɛya, abulanlu abulanlu yɛɛ bulu bulu bɔbɔ anwo zo la. (Dit. 1:15) Bɛnleanle Nyamenle menli ne anwo zo boɛ. Zɔhane ala a Yilaegya yɛle a. Ɔvale ɛvolɛ dɔɔnwo ɔboale Yizilayɛma ɔmaanle bɛzonlenle Gyihova. Noko mekɛ bie dwule mɔɔ Gyihova maanle ye gyimalilɛ fofolɛ a, wɔ Dwuda nyiakɛ. (2 Arl. 2:1; 2 Ek. 21:12) Asoo bɛkpole nɔhavoma mɔɔ ɛnee wɔ Yizilayɛ mbusua bulu belemgbunlililɛ ne anu la ɔ? Kyɛkyɛ. Ɛnee Yilaegya ɛva ɛvolɛ dɔɔnwo ɛtete Yilaehya. Eza ɛnee “ngapezoma ne amra ne mɔ” mɔɔ ɔda ali kɛ bɛmaanle bɛ ndetelɛ wɔ sukulu bie anu la noko wɔ ɛkɛ. (2 Arl. 2:7) Ɔti ɛnee nɔhavoma dɔɔnwo wɔ ɛkɛ mɔɔ bɛbaboa bɛamaa bɛahile Nyamenle menli ne adenle a. Gyihova hɔle zo lile ye bodane nwo gyima, na ɔnleanle ye azonvolɛ nɔhavoma.

13. Anwodozo boni a Hibuluma 13:5b maa yɛnyia a? (Eza nea nvoninli ne.)

¹³ Mɔɔ neazo ɛhye mɔ wɔ wɔ adwenle nu la, ɛsuzu kɛ saa bɛfa menli mɔɔ bɛkpokpa bɛ la mɔɔ li awieleɛ la bɛkɔ anwuma a, duzu a bazi a? Ɔngyia kɛ ɛmaa ɔgyegye wɔ. Baebolo  ne maa yɛnwu nɔhalɛ edwɛkɛ sikalɛ bie mɔɔ maa yɛnyia anwodozo la: Gyihova ɛnrɛkpo ye menli mɔɔ wɔ azɛlɛ ye azo la ɛlɛ. (Kenga Hibuluma 13:5b.) Kɛ mɔɔ Mosisi nee Yilaegya yɛle la, Kilisienema ekpunli ekyi ne mɔɔ bɛkpokpa bɛ la ze kɛzi ɔhyia kɛ bɛtete awie mɔ la. Neazo Eku ne anu amra ɛlɛfa ɛvolɛ dɔɔnwo atete mrenyia mɔɔ boka mboane gyɛne ne anwo la amaa bɛahile yɛ adenle. Kɛ neazo la, bɛyɛ sukulu ngakyile nwo ngyehyɛleɛ amaa bɛatete asafo nu mgbanyima, neavolɛ adenduvoma, Ɔfese Kɔmatii ne anu amra, Bɛtɛle mgbanyima yɛɛ menli gyɛne. Neazo Eku ne mumua ne ɛlɛtete ye boavolɛma mɔɔ yɛ gyima wɔ Neazo Eku ne kɔmatii ngakyile nu la. Boavolɛma ɛhye mɔ ɛlɛfa nɔhalɛlilɛ ali ɛzonlelilɛ mgbole nwo gyima wɔ ahyehyɛdeɛ ne anu ɛnɛ. Bɛziezie bɛ nwo kpalɛ kɛ bɛbahɔ zo bɛanlea Kelaese mboane ne wɔ mekɛ mɔɔ menli mɔɔ bɛkpokpa bɛ la ɛhɔ anwuma la.

14. Edwɛkɛ titili mɔɔ wɔ mɔɔ yɛzuzu nwolɛ la anu la a le boni?

¹⁴ Edwɛkɛ titili mɔɔ wɔ mɔɔ yɛlɛsuzu nwo la anu la ɛne: Saa bɛfa bɛdabɛ mɔɔ bɛkpokpa bɛ la mɔɔ li awieleɛ la bɛkɔ anwuma wɔ mekɛ mɔɔ anwongyelelɛ kpole ne ɛlɛkɔ awieleɛ la a, Gyihova menli mɔɔ wɔ azɛlɛ ye azo la bahɔ zo azonle ye wɔ nɔhalɛ nu. Kɛmɔ Gyisɛse Kelaese le yɛ adekilevolɛ la ati, Nyamenle azonvolɛ ɛnrɛvi nɔhalɛ ne anu ɛlɛ. Yɛze kɛ wɔ zɔhane mekɛ ne, Gɔɔgo mɔɔ vi Meegɔgo, mɔɔ yemɔ a le maanle maanle mɔɔ bɛha bɛ nwo bɛbɔ nu la bateta yɛ. (Yiz. 38:​18-20) Noko ɛtetalɛ sikalɛ zɔhane ɛnrɛyɛ boɛ; ɔnrɛmaa Nyamenle menli ne ɛnrɛgyakyi Gyihova ɛzonlenlɛ. Ye biala anu ɔbalie bɛ! Ɛzoanvolɛ Dwɔn nwunle “menli ekpunli kpole” ne mɔɔ boka Kelaese mboane gyɛne ne anwo la wɔ ɛnyelɛzodeɛnwunlɛ nu. Bɛhanle bɛhilele Dwɔn kɛ “menli ekpunli kpole” ɛhye vi “anwongyelelɛ kpole ne anu.” (Yek. 7:​9, 14) Nɔhalɛ nu, bɛbalie bɛ ngoane!

15-16. Kɛ mɔɔ Yekile 17:14 kile la, duzu a Kelaese ɛdoavolɛma mɔɔ bɛkpokpa bɛ la bayɛ wɔ Amagɛdɔn konle ne anu a, duzu ati a ɛhye maa yɛ anwosesebɛ a?

¹⁵ Noko bie mɔ babiza kɛ: ‘Na bɛdabɛ mɔɔ bɛkpokpa bɛ la noko ɛ? Saa bɛfi azɛlɛ ye azo a, duzu a bɛbayɛ a?’ Baebolo ne bua kpuya zɔhane fɔɔnwo. Ɔka kɛ ewiade ɛhye anu  maanyɛlɛ ngyehyɛleɛ ne “nee Boaneralɛ ne baho.” Noko ɔbali bɛ nwo zo konim. Baebolo ne ka kɛ: “Boaneralɛ ne bali bɛ nwo zo konim.” Na nwane mɔ a baboa ye a? Ngyɛnu zɔhane bua. Bɛdabɛ mɔɔ “bɛvɛlɛ bɛ,” “bɛkpa bɛ” yɛɛ “bɛdi nɔhalɛ la.” (Kenga Yekile 17:14.) Nwane mɔ ɔ? Bɛdabɛ mɔɔ bɛkpokpa bɛ mɔɔ bɛdwazo bɛ la ɔ! Ɔti saa bɛfa bɛdabɛ mɔɔ bɛkpokpa bɛ mɔɔ bɛwɔ azɛlɛ ye azo la mɔɔ li awieleɛ la bɛkɔ anwuma wɔ mekɛ mɔɔ anwongyelelɛ kpole ne ɛlɛkɔ ye awieleɛ la a, bɛ gyimalilɛ mɔɔ limoa la anu ko a le kɛ bɛbahɔ konle. Ɔle gyimalilɛ kpole kpalɛ! Kolaa na Kilisienema mɔɔ bɛkpokpa bɛ la bie mɔ arayɛ Gyihova Alasevolɛ la, ɛnee bɛko. Ɛnee bie mɔ bɔbɔ le sogyama. Noko nzinlii bɛrayɛle nɔhalɛ Kilisienema na bɛzukoale kɛ bɛ nee awie mɔ badɛnla anzodwolɛ nu. (Gal. 5:22; 2 Tɛs. 3:16) Bɛgyakyile kɛ bɛbahɔ konle. Noko saa bɛdwazo bɛ bɛkɔ anwuma a, bɛ nee Kelaese yɛɛ anwumabɔvolɛ nwuanzanwuanzama ne mɔ babɔ nu aho atia Nyamenle agbɔvolɛ wɔ konle mɔɔ li awieleɛ la anu.

¹⁶ Wɔmɔ dwenle nwolɛ nea! Mɔɔ Kilisienema mɔɔ bɛkpokpa bɛ la wɔ azɛlɛ ye azo la, ɛnee bie mɔ ɛyɛ mrelera yɛɛ bɛnlɛ anwosesebɛ bɔbɔ. Noko saa bɛdwazo bɛ bɛkɔ anwuma a, bɛbayɛ anwumabɔvolɛma mɔɔ bɛ nwo yɛ se, na bɛbamaa bɛ nee Belemgbunli Kovolɛ ne, Gyisɛse Kelaese, ahɔ konle. Saa Amagɛdɔn konle ne pɛ nu a, bɛ nee Gyisɛse bayɛ gyima aboa alesama bɛamaa bɛali munli. Ɔti saa bɛkɔ anwuma a, bɛbayɛ bɛ mediema mrenyia nee mraalɛ alɔvolɛ mɔɔ wɔ azɛlɛ ye azo la boɛ kpole bɛadɛla mɔɔ anrɛɛ bɛbahola bɛayɛ wɔ mekɛ mɔɔ bɛtɛde menli mɔɔ ɛnli munli la!

17. Kɛzi yɛkola yɛnwu kɛ Nyamenle azonvolɛ kɔsɔɔti banyia banebɔlɛ wɔ Amagɛdɔn konle ne anu ɛ?

¹⁷ Ɛboka mboane gyɛne ne anwo ɔ? Saa zɔhane a ɔde a, ɛnee duzu a ɔbahyia kɛ ɛyɛ wɔ mekɛ mɔɔ Amagɛdɔn konle ne babɔ ɔ bo la ɛ? Mɔɔ ɔwɔ kɛ ɛyɛ la ala a le ɛhye: Fa ɛ nwo to Gyihova anwo zo na di ye adehilelɛ zo. Kɛzi yɛbayɛ ye ɛ? Baebolo ne ka kɛ: “Bɛhɔwolo bɛ suakunlu, na bɛtoto bɛ nlenkɛ ne mɔ anu. Bɛva bɛ nwo bɛvea ekyii kɔkpula kɛ ɛya ne kɛpɛ nu.” (Aye. 26:20) Nyamenle azonvolɛ nɔhavoma mɔɔ wɔ anwuma nee azɛlɛ ye azo la amuala banyia banebɔlɛ wɔ mekɛ zɔhane. Yɛle kɛ ɛzoanvolɛ Pɔɔlo la, yɛdie yɛdi bɔkɔɔ kɛ ‘arane anzɛɛ ninyɛne mɔɔ wɔ ɛkɛ ne kɛkala anzɛɛ mɔɔ bara la ɛnrɛhola ɛnrɛhwe yɛ ɛnrɛvi Nyamenle ɛlɔlɛ ne anwo.’ (Wlo. 8:​38, 39) Kakye ye dahuu kɛ: Gyihova kulo wɔ, na ɔnrɛkpo wɔ ɛlɛ!