1. Mɛ sɔ̄ na dɛ̄dɛɛ̄ pya alu etɔ̄ nɔɔ̄ bee ekii bunyɔɔ a?

 BU PIO zua akii adumɛ pya nɛɛ Jɛhova bee kɛɛrɛ kɔ, ‘Mɛ sɔ̄ na elu esu dɛ̄dɛɛ̄ Pya Nɛɛ Kraist alu etɔ̄ nɔɔ̄ bee kuma bunyɔɔ a?’ A ɛrɛ sɔ̄ i bee kɛɛrɛ kɔ pio pya nɛɛ alu etɔ̄ nɔɔ̄ bee dap lege bu Paradais a kɛnɛkɛ̄ bu pio sɔ̄ sɔ̄ nɔ̄ Amagidɔn edɔa sah. Mɛ bu Watchtower July 15, 2013, i bee nɔ kɔ dɛ̄dɛɛ̄ pya alu etɔ̄ nɔɔ̄ bee ba le a kɛnɛkɛ̄ elu esu wa kuma bunyɔɔ lɛɛ nɔ̄ Amagidɔn gae dɔ.—Mat 24:31.

2. Amunu ebip na a dap aakɛ̄ a, e ena i kɛɛrɛbu loo bu ekobee ue ama a?

² Kɛādoo, pio ii dap bip kɔ: Ena esiraloo pya “dɔɔ̄na gbo naana pee” Kraist lo ba ele gaa taāŋabah Jɛhova bu bɔ ture nyiɛ loo sɔ̄ “gbɛnɛ etɛɛrɛloo” esira a? (Jɔn 10:16; Mat 24:21) Pio pya a le yɛɛ “dɔɔ̄na gbo naana pee” dap kɛɛrɛ kɔ ba naale e’ɛrɛ lɔgɔ nɛɛ ekuū wa dɛɛ̄ loo sɔ̄ elua esu pya wuga nɛɛdam le nɛɛwa alu etɔ̄ nɔɔ̄ bee kuma bunyɔɔ. Doraa i naa ɛp baɛ dɔ Kpa Kaɛ a dap doo kɔ ba a kɛɛrɛ doo wo. Lɛɛ i kɔnia pio nu anua a naa lu ebɛɛ̄ kɔ i nɛ taāŋa loo i.

ENA A NAALE ESIRA A?

3-4. Ena pio nɛɛ dap nɛ taāŋa loo wa loo a, e ena anua a?

³ Pio nɛɛ dap nɛ taāŋa loo wa kɔ pya dɔɔ̄na gbo naana pee dap lɛɛbahloo etaāŋabah Jɛhova sɔ̄ lɔgɔ pya wuga alu etɔ̄ nɔɔ̄ bee ba le yɛɛ Eku A Baɛ Bee naa baɛna wa loo. Ba dap kɛɛrɛ doo wo nyɔɔ pio nu alu e’ɛm bu Kpa Kaɛ. Dooraa i naa ɛp baɛ edobah. Lo tua tua kiiloo Nɛɛ Tɛsī Ewɔp Jehoiada. A bee lu nɛɛ a bee si tam nɛ Bari bu yira. Alɛ le ye wa Jehoshebeat, bee doo kɔ aa lu efɛ Jehoash sa ye yerebah nɛ kɔ alu le mɛnɛ a bɔloo eture nyiɛ loo. Sɔ̄ Jehoiada lo ebee ana bee le dum, Jehoash bee taāŋabah Jɛhova sa doo le. Sɔ̄ Jehoiada e’ua, Jehoash bee bɔātɛ̄ doo pɔrɔ. A bee gbaɛ̄tɔ̄loo pya nɛɛbee ba lu bag sa ɔbɛ etaāŋabah Jɛhova.—2 Edoo 24:2, 15-19.

 ⁴ Lo dɔɔ̄na edobah na lo akiiloo Pya Nɛɛ Kraist bu baɛ sɔ̄ o’oo tup zua. Kpɛdumɛ nɛɛ lɛɛratam a bee siga dum na Jɔn. Sɔ̄ a bee le dum a bee yerebah nɛ gbɛnɛ-edo Pya Nɛɛ Kraist kɔ ba a taāŋabah Jɛhova bu yira. (3 Jɔn 4) Dookɛ̄ pya dɔɔ̄na nɛɛ lɛɛratam bee doo, Jɔn bee si ekpo lo ebaɛloo bɔŋanaloo lokwa pɔrɔ tɔgɛnu le pɔrɔ dogo naa yii bu bɔŋanaloo. (1 Jɔn 2:18; ɛp nu enɔ nu nyɔɔ loo 2 Tɛs 2:7 NWT.) Mɛ sɔ̄ Jɔn e’ua sah, gbɛnɛ-edo nɛɛ a bee le bu bɔŋanaloo bee anna yira. Bu pya zua a nyɔɔnɛ, pya anna yira ama bee tɔgɛ ekwɔ tɔgɛnu sa yerekpotɛ̄ pɔrɔ dogo bu dɛ̄dɛɛ̄ bɔŋanaloo Pya Nɛɛ Kraist.

5. Ena a naa lee kɔ i ɛmadɛɛ̄ kɔ esira dɛɛa nyɔɔ baɛ lo e’ɛma a?

⁵ Ekɔ baɛ e’ɛma a le bu Baibol ama tɔgɛge kɔ dua nu ama na esiraloo pya dɔɔ̄na eku naana pee sɔ̄ elua esu pya alu etɔ̄ nɔɔ̄ bee kuma bunyɔɔ ani? Lo sɔ̄, ekɔ Pya Nɛɛ Kraist ba bɔloo eture nyiɛ loo ba le a kɛnɛkɛ̄ naale enyɔɔnɛ na kɛ̄ a bee lu ekpɔā wa doo dookɛ̄ Jehoash bee doo, ale ba esikɛ̄ lu pya a anna yira dookɛ̄ gbɛnɛkpo Pya Nɛɛ Kraist bu baɛ sɔ̄ o’oo tup zua bee doo ni? Ye ture na eeye. I suā leere kɔ sɔ̄ elua esu pya alu etɔ̄ nɔɔ̄ bee kuma bunyɔɔ, elu ekuūdɛɛ̄loo pya dɔɔ̄na gbo naana pee leere sa ba ekiisī lo etaāŋabah Jɛhova bu sīdee a bɔloo. Ena anua i suā leere doo wo a?

PYA NƐƐ JƐHOVA EKIISĪ LO ETAĀŊA YE BAH BU SĪDEE A GBĪ

6. Taa amunu eku sɔ̄ na i gaa le kɛɛrɛ kina nu akiiloo a?

⁶ Ena anua i suā leere kɔ logaloga taāŋabah naale e’ɔp kere sɔ̄ kɛ̄tɔɔ̄ e’aga li deesī a? I suā doo wo nyɔɔ nu Kpa Kaɛ kɔ akiiloo sɔ̄ i tɔɔ̄dum ama. Sɔ̄ i tɔɔ̄dum ama lu kaāna kee loo bu dee pya Izrɛl a kere le bu dee Pya Nɛɛ Kraist bu eree baɛ sɔ̄ o’oo tup zua a. Dooraa i naa ɛp taa eku sɔ̄ ama kaāna: (1) Bu dee pya Izrɛl a dee kere, (2) sɔ̄ pya nɛɛ lɛɛratam ebee u tah, le (3) ‘sɔ̄ elu e’obara dɛ̄dɛɛ̄ nu sere wa dɔ,’ ilii dee ama.—Doonu 3:21.

7. Bu Izrɛl a dee kere, ena anua pya Izrɛl a bɔloo eture nyiɛ loo naa bee pee beenyiɛ sɔ̄ pya mɛnɛ Izrɛl le gbɛnɛ-edo pya dɔɔ̄na bee wa nyɔɔnɛ doo nu a bee piya a?

⁷ Bu dee pya Izrɛl a dee kere. Nwīgbagbara sɔ̄ lɛɛ Mozis gae u, a bee kɔ nɛ pya nɛɛ Izrɛl kɔ: “Nyɔnɛbee m suā kɔmɛ sɔ̄ mda e’ua, bu kaka bui gaa le gbee bui loo, sa kiiya aa nyɔɔ dee lo mda bee i nɛ bu lok.” (Deut 31:29) Mozis bee zuuranage bahtɔ̄ pya Izrɛl kɔ lo ba lɛɛbeekɛɛ̄, elu e’aa wa kuma dɔɔ̄na buɛ̄. (Deut 28:35, 36) Ekɔ a bee dooage doo wo ni? Aiī. Bu gbɛnɛ-edo zua, gbɛnɛkpo pya wa mɛnɛ bee doo nu a bee piya kɛ̄dɛɛ̄ Jɛhova sa pya nɛɛ bee wa nyɔɔnɛ taāŋabah ekwɔ bari. Lo ama bee doo kɔ Jɛhova a su kpɔte nua nyɔɔ pya Izrɛl sa naa lɛɛna bahloo kɔ pya mɛnɛ alu Izrɛl a bɛɛ wa. (Ezek 21:25-27) Kerewo, sɔ̄ pya nɛɛ Izrɛl a bɔloo eture nyiɛ loo bee muɛ kɛ̄ Muɛ̄ Ue Bari dooa doo, a bee wa nɛ mɛm sa doo kɔ ba a kiisī lo etaāŋa ye bah.—Ais 55:10, 11.

8. Bɔgeloo kɔ alu i nyɛŋialoo kɔ bɔŋanaloo Pya Nɛɛ Kraist bu eree baɛ sɔ̄ o’oo tup zua a bee gbe ni? Naa baatɛ̄.

⁸ Sɔ̄ pya nɛɛ lɛɛratam ebee u tah. Bɔgeloo kɔ alu i nyɛŋialoo kɔ bɔŋanaloo Pya Nɛɛ Kraist a bee le bu eree baɛ sɔ̄ o’oo tup zua a bee gbe ni? Eeye doo pippip. Jizɔs bee kɔ gbɛnɛkpo pya a anna yira e’aakɛ̄. (Mat 7:21-23; 13:24-30, 36-43)  Nɛɛ lɛɛratam Pɔɔl, Pita, le Jɔn bee yere nukuādɛɛ̄loo kɔ mɔmanudɛɛ̄ Jizɔs ama bee bɔātɛ̄ edooa bu tua sɔ̄ o’oo tup zua a. (2 Tɛs 2:3, 7; 2 Pit 2:1; 1 Jɔn 2:18) Bu eree baɛ sɔ̄ o’oo tup zua a, bɔŋanaloo Pya Nɛɛ Kraist bee bɔātɛ̄ egbe. Pya Nɛɛ Kraist a anna yira bee aakɛ̄ sa lu pya a le sī Babilɔn Lo Gbɛnɛ, lo a le dɛ̄dɛɛ̄ ekwɔ sīdee taāŋabah. E lo ama tɔgɛ kɔ mɔmanudɛɛ̄ Jizɔs gaa bee doo a.

9. Bu mɛ sīdee na ilii eku sɔ̄ lu kee loo sɔ̄ pya Izrɛl a dee kere le eku sɔ̄ Pya Nɛɛ Kraist bu eree baɛ sɔ̄ o’oo tup zua a?

⁹ ‘Sɔ̄ elu e’obara dɛ̄dɛɛ̄ nu sere wa dɔ.’ Ilii eku sɔ̄ lu kee loo sɔ̄ pya Izrɛl a dee kere le sɔ̄ pya anna yira bee bɔātɛ̄ eyii bu bɔŋanaloo a bu eree baɛ sɔ̄ o’oo tup zua C.E. a. Amunu bee na alu ekure ilii eku sɔ̄ ama a? I wee ye kure “kpɛdumɛ dee” loo pɔrɔ sɔ̄ eku ama. (2 Tim 3:1) Kerewo, Baibol tɔgɛ kɔ gbɛnɛ sɔ̄ eku a nyɔɔ dɛɛ̄ bee bɔānagetɛ̄ aba lo sɔ̄. E ekiisī mmɛ sɔ̄ Buɛ̄-mɛnɛ Mɛsaia edoo kɔ pya nɛɛ a mmana sa kiira kɛnɛkɛ̄ nua paradais. Lu esu lo sɔ̄ eku kure ‘sɔ̄ elu e’obara dɛ̄dɛɛ̄ nu sere wa dɔ.’ (Doonu 3:21) Sɔ̄ eku ama bee bɔātɛ̄ bu zua 1914. Lo sɔ̄, ena a bee lu e’obara sere ye dɔ a? Kɛādoo, bee lu ewu Jizɔs nua Mɛnɛ li bunyɔɔ. Nyɔɔwo Jɛhova bee sikɛ̄ ɛrɛ nɛɛ a bɛɛ a Ye tɔɔ̄dɔ lo a aaloo etaā manamana Mɛnɛ Devid a bee bɔ ture nyiɛ loo. Kerewo, naale aba lo bɛbɛɛ na Jɛhova bee obara sere ye dɔ a. Sɔ̄ sɔ̄ naa binia, a bee bɔātɛ̄ e’obara logaloga taāŋabah sere ye dɔ! (Ais 2:2-4; Ezek 11:17-20) Ekɔ esikɛ̄ gbe ni?

10. (a) Ena Baibol bee kɔ akiiloo logaloga taāŋabah bu ilii sɔ̄ ama a? (Aisaia 54:17) (b) Ena anua pya mɔmanudɛɛ̄ ama nɛ i egbɔ̄ nyiɛ a?

¹⁰ Buū Aisaia 54:17. Naa kɛɛrɛ nu akiiloo lo mɔmanudɛɛ̄, a kɔ: “Lɔgɔ nu nɔ̄ a bee lu edɛm a pima naale ekiisī.” Pya ue a aabah Bari ama gaa dooa gbɔ̄mɛɛ anii’ee. Pya ue egbɔ̄nyiɛ a nyɔɔnɛ ama kiinage loo ilii sɔ̄ ama, lo a kɔ: “Dɛ̄dɛɛ̄ pya o miɔŋɔ nɛɛdam elu etɔgɛ wa nu tɛ̄mabah Jɛhova, e dɛ̄dɛɛ̄ nu a lee loo pya o miɔŋɔ gaa le kuī kpo. Bu kaāna dogo na a elu ewu a agɛrɛ a; . . . bɔɔ naale e’aa a; e aaloo aa bɔɔ, nyɔnɛbee a naale elu a waɛloo.” (Ais 54:13, 14) Kunɛ Setan alu “bari nyɔuwe ama,” naa ɛrɛ ekpo esu ɔbɛ tam pya nɛɛ Jɛhova gaa si lo etɔgɛ pya nɛɛ nu akiiloo Jɛhova. (2 Kɔr 4:4) Elua e’obara logaloga taāŋabah sere ye dɔ, e a naale esikɛ̄ lu egbee lɔgɔ sɔ̄. A gaa le tɔɔ̄ ina deedee. Lɔgɔ nu nɔ̄ a bee lu edɛm i pima naale ekiisī!

 ENA A GAA LE SIRA A?

11. Ena a doo kɔ i suā leere kɔ a naale elu elɛɛbahloo pya a le yɛɛ gbɛnɛ eku nɛɛ sɔ̄ pya alu etɔ̄ nɔɔ̄ bee ekira bunyɔɔ a?

¹¹ Ena a gaa le sira sɔ̄ elua esu dɛ̄dɛɛ̄ pya alu etɔ̄ nɔɔ̄ bee kuma bunyɔɔ a? Nyɛŋiabu kɔ Jizɔs na a gaa i kuūdɛɛ̄loo doodoo nɛɛ tɔɔ̄loo naana pee a. Alɛ na ekobee loo bɔŋanaloo Pya Nɛɛ Kraist a. Jizɔs bee kɔ siā leere kɔ: “Bui ɛrɛ ziī Tɛ-ɛrɛ, lo a le Kraist.” (Mat 23:10) Ilii Mɛnɛ a gaa i bɛɛ naale elɔɛ lo edoo nu a ye kuu. Nyɔɔbee Kraist le loo pya aa ye nyɔɔnɛ dumɛ ba le a nyɔɔ kɛnɛkɛ̄ a, ba naale e’ɛrɛ bɔɔ loo lɔgɔ nu. Kɛādoo, ii suā dɛ̄dɛɛ̄ nu Kraist edoo lo ekuūdɛɛ̄loo pya ye nɛɛ bu lo sɔ̄. Nyɔɔwo, dooraa i naa ɛp pio dɔ Baibol a i dap nɛ agɛrɛ nyiɛ.

12. Bu mɛ sīdee na Jɛhova bee kuūdɛɛ̄loo pya ye nɛɛ (a) sɔ̄ Mozis e’ua a? (b) sɔ̄ elua enyaana tam Elaija a? (Ɛpnage foto.)

¹² Mozis bee u lɛɛ pya Izrɛl gae yii bu Buɛ̄ A Bee Lu Eyira Yii Loo a. Ena a bee siraloo pya nɛɛ Bari a? Ekɔ Jɛhova bee ɔbɛ eyerebah nɛ pya ye nɛɛ sɔ̄ gbara a bee bɔ ture nyiɛ loo ama e’ua ni? Eeye. Kuma sɔ̄ ba bee kiisī lo ebɔ ture nyiɛ loo, Jɛhova bee wa kuūdɛɛ̄loo. Lɛɛ Mozis gae u, Jɛhova bee ye kɔ nɛ kɔ a tubobahloo Joshua kɔ a zaasī pya ye nɛɛ. Mozis gaa bee kpɔā Joshua bu gbɛnɛ-edo zua. (A’aa 33:11; Deut 34:9) Gbaāloo wo, a bee ɛrɛnage gbɛnɛ-edo pya nɛɛbee lo ba nyim tura lo ba gaa bee zaāsī, doodoo pya a aara baɛ boo le lop tup, pya a aara o’oo tup, pya a aara baɛ tup le lop, le pya a aara lop nɛɛ. (Deut 1:15) Bee lu ekuūdɛɛ̄loo pya nɛɛ Bari leere. I muɛ dua edobah ama aāloo Elaija. Bu gbɛnɛ-edo zua, a bee kiisī lo ezaāsī logaloga taāŋabah. Mɛ a ɛrɛ sɔ̄ Jɛhova nyaana ye tam, sa ye obara ture dee kerekɛ̄ loo Juda. (2 Mɛnɛ 2:1; 2 Edoo 21:12) Ekɔ pya a bee bɔ ture nyiɛ loo ba nuūna lop gā edonyɔɔ Izrɛl naa bee ɛrɛna nɛɛ a wa baɛloo ni? Eeye. Elaija gaa bee kpɔā Elaisha loo gbɛnɛ-edo zua. A bee lunage e’ɛrɛ “miɔŋɔ nɛɛdam pya zue ue” lo a gaa bee lu etɔgɛ nu bu eku eku. (2 Mɛnɛ 2:7) Nyɔɔwo, pya nɛɛ ba dap zaāsī pya nɛɛ Bari bee le. Ekɛɛrɛ Jɛhova bee kiisī lo edooa, e a bee kuūdɛɛ̄loo pya a gaa ye taāŋabah bu bɔ ture nyiɛ loo.

13. Amunu ue agɛrɛ nyiɛ na a le bu kpa Pya Hibru 13:5b a? (Ɛpnage foto.)

¹³ Sɔ̄ o kɛɛrɛbu loo pya edobah ama, ena o kɛɛrɛ kɔ esira sɔ̄ elu esu kpɛdumɛ  yɛɛ pya alu etɔ̄ nɔɔ̄ bee kuma bunyɔɔ a? Naa lu ebɛɛ̄ kɔ i nɛ taāŋa loo i. Baibol muūna ziī ewɛp bah kaka ue a i gbɔ̄ nyiɛ kɔ: Jɛhova naale elɛɛ bahloo pya ye nɛɛ a le a nyɔɔ kɛnɛkɛ̄ bie doo pippip. (Buū Hibru 13:5b.) Doodoo Mozis le Elaija, nwīgbagbara eku Pya Nɛɛ Kraist alu etɔ̄ nɔɔ̄ bee lo ba gaa zaāsī tam anii’ee dābeeloo ebɛɛ̄ a le kɛ̄ lo ekpɔā pya dɔɔ̄na. Bu gbɛnɛ-edo zua lo, pya wuga nɛɛdam a le yɛɛ Eku A Baɛbee ekirasī lo ekpɔā pya nɛɛdam a le yɛɛ dɔɔ̄na eku naana pee kɔ ba a dap zaāsī tam. Bu edobah, ba enɔɔna keekee tɔkpa lo ekpɔā pya kanɛɛ, pya kuūdɛɛ̄loo sɛkiut, pya a le yɛɛ Kɔmitii A Gaa Kuūdɛɛ̄loo Tɔ-naatam, pya a gaa zaāsī tam bie Bɛtɛl, le pya dɔɔ̄na. Eku A Baɛbee gaa su alaba bah kpɔā pya a wee wa yerebah nɛ bu keekee kɔmitii loo Eku A Baɛbee. Nyaawo, pya a gaa wa yerebah nɛ ama gaa si gbɛnɛ-edo tam bu bɔŋanaloo. Ba le ekpɛ̄naloo kaāna lo ekuūdɛɛ̄loo pya naana pee Kraist.

14. Ena alu kpog-bee ue a le bu nu i gaa kɔnia a?

¹⁴ Kpog-bee ue a le bu nu i gaa kɔ na kɔ: Sɔ̄ elua esu pya kpɛdumɛ nɛɛ a le yɛɛ pya alu etɔ̄ nɔɔ̄ bee kuma bunyɔɔ dee waɛloo kuma gbɛnɛ etɛɛrɛloo, logaloga taāŋabah ele gaa kiisī a kɛnɛkɛ̄. Alu nu ɛɛbu kɔ Jizɔs Kraist a gaa i zaāsī naale edoo kɔ pya a gaa taāŋabah Bari a peere kunɛ ziī nu. Kaka ue a le na kɔ bu lo sɔ̄ Gɔg loo Magɔg lo a le dɛ̄dɛɛ̄ edonyɔɔ a gbaaloo ziī ele gaa i bebe loo. (Ezek 38:18-20) Mɛ be a naale enyɔɔ dɛɛ̄ ama naale ekiisī leere, a naale edap doo kɔ pya nɛɛ Jɛhova aa dapna ye taāŋabah. Bu kaka, a gaa le agara wa! Bu ziī mɔmanudɛɛ̄, nɛɛ lɛɛratam Jɔn bee muɛ “gbɛnɛ-edo nɛɛ” a nuūna dɔɔ̄na eku naana pee Kraist. A bee lu ekɔ nɛ Jɔn kɔ “gbɛnɛ-edo nɛɛ” ama aabu “gbɛnɛ etɛɛrɛloo.” (Mum 7:9, 14) Bu kaka, elu ekpega wa!

15-16. Dookɛ̄ kpa Mumuūna 17:14 kɔ doo, ena Pya Nɛɛ Kraist alu etɔ̄ nɔɔ̄ bee edoo sɔ̄ nɔ̄ Amagidɔn gaa dɔ a, e ena anua lo ama yere i mɛm loo a?

¹⁵ Kerewo, pio nɛɛ dap bura kɔ: ‘E kiiloo  pya alu etɔ̄ nɔɔ̄ bee a? Ena ba edoo sɔ̄ ba e’aara a kɛnɛkɛ̄ a?’ Baibol agara ebip ama. A tɔgɛ kɔ pya bɛbɛɛ lo nyɔuwe ama ebe “nɔ̄ pima Nwī-naana-pee.” Kɛādoo, elu ebe wa eebah. Lo dɔ buū kɔ: “E Nwī-naana-pee gaa le be wa eebah.” E ba mɛɛ na eyerebah ye nɛ a? Lo barakpaɛ̄ agara. Lu esu wa kure “pya a ye le loo a bee lu ekue,” pya a “bee lu esagɛ su,” le pya a “bɔloo eture nyiɛ loo.” (Buū Mumuūna 17:14.) Pya lo nɛɛ na ba mɛɛ a? Aba wa na pya alu etɔ̄ nɔɔ̄ bee lo alu elɛɛ kɛ̄ bu luh! Nyɔɔwo sɔ̄ elu esu pya kpɛdumɛ nɛɛ a le yɛɛ pya alu etɔ̄ nɔɔ̄ bee lɛɛ a kɛnɛkɛ̄ dee waɛloo kuma gbɛnɛ etɛɛrɛloo, ziī yɛɛ tua tam ba edasī si na lo ebebe. Naa ɛp kɛ̄ lo tam lu keebee doo a! Pio pya alu etɔ̄ nɔɔ̄ bee ama wee bebe lɛɛ ba gae bee lu Pya Ekeebee Jɛhova. Pio aba bee le pya nɔ̄ sɔ̄ akii adumɛ a, lɛɛ ba gae lu pya kaka Nɛɛ kraist sa nɔ lo enyɔɔnɛ pya dɔɔ̄na tɔɔ̄ bu efɛɛloo. (Gal 5:22; 2 Tɛs 3:16) Ba naa bee yerena kpotɛ̄ be nɔ̄ bu namloo. Kerewo, sɔ̄ elua esu wa kuma bunyɔɔ, ba enyɔɔnɛ Kraist le pya ye ɛnjɛl a le kaɛ be kpɛdumɛ nɔ̄ pima pya nɛɛ baa Bari.

¹⁶ Naa kɛɛrɛ, pio pya alu etɔ̄ nɔɔ̄ bee a le a kɛnɛkɛ̄ e’ana, e pio aba naa agaloo. Kerewo, aba sɔ̄ elua elɛɛ wa kɛ̄ bu luh kuma bunyɔɔ, ba elu pya nɛɛ a le bu edɔɔ̄ a ɛrɛ ekpo, lo ba enyɔɔnɛ wa Nɛɛ Bee Nɔ̄ lo a le Jizɔs Kraist bebe. Sɔ̄ elua ebe nɔ̄ Amagidɔn sah, ba e’ɛrɛ bah bu baɛloo miɔŋɔ nɛɛ lo edoo kɔ ba a mmana. Bu sīdee lɔgɔ baɛbaɛ beenyiɛ naale loo, lo sɔ̄ ba eyerebah nɛ pya wa wereloo wuga nɛɛdam le nɛɛwa a le a kɛnɛkɛ̄ ee sɔ̄ ba sii bee mmana ba bee le a kɛnɛkɛ̄!

17. I tɛɛ̄ doodoo wa suā kɔ elu ekpega dɛ̄dɛɛ̄ pya nɛɛ Bari bu nɔ̄ Amagidɔn?

¹⁷ O le yɛɛ pya dɔɔ̄na eku naana pee ni? Lo a le wo, ena elu ebɛɛ̄ kɔ o doo sɔ̄ nɔ̄ Amagidɔn ebɔātɛ̄ a? Aba nu o doo na: Ture nyiɛ loo Jɛhova sa nyɔɔnɛ ye leredee bah. Pya ena a le bu lo ama a? Baibol kɔ pya ue a yere mɛm loo nɛɛ kɔ: “Yiraa bu dɛ̄dɛɛ̄ bui tɛm, sa kpaɛ̄ dɛ̄dɛɛ̄ bui bū tɛɛā dumɛ; gɔaā bui loo bu ziī nwī sɔ̄ mmɛ sɔ̄ gbɛnɛ saŋ etɛɛ̄.” (Ais 26:20) Elu ekpega dɛ̄dɛɛ̄ pya nɛɛ Bari ba kiisī lo ebɔ ture nyiɛ loo li bunyɔɔ le nyɔɔ kɛnɛkɛ̄ lo sɔ̄. Doodoo nɛɛ lɛɛratam Pɔɔl, i suā leere kɔ kere “pya a bɛɛ, ale anyaawo, ale lo a elu, . . . naale edap i kpoora lɛɛ loo wereloo Bari.” (Rom 8:38, 39) Wee nyɛŋiabu dɛ̄dɛɛ̄ sɔ̄ kɔ: Jɛhova were a loo, e a naale elɛɛ a bahloo bie doo pippip!