1. Исӕрст киристӕнттӕ еугурӕйдӕр уӕлӕрвтӕмӕ ист кӕд ӕрцӕудзӕнцӕ?

 РАЗДӔР Хуцауи лӕггадгӕнгутӕмӕ уӕхӕн фарста фӕззиннидӕ: «Цума исӕрст киристӕнттӕй фӕстаг уӕлӕрвтӕмӕ ист кӕд ӕрцӕудзӕй?» Кӕддӕр уотӕ гъуди кодтан, ӕма исӕрст киристӕнттӕй кадӕртӕ Армагеддони сӕрти рахездзӕнцӕ ӕма цӕйбӕрцӕдӕр рӕстӕг зӕнхӕбӕл цӕрдзӕнцӕ. Фал 2013 анзи 15 июли «Гъӕуайгӕнӕн мӕсугӕй» базудтан, исӕрст киристӕнттӕ еугурӕйдӕр Армагеддони размӕ уӕлӕрвтӕмӕ ист ке ’рцӕудзӕнцӕ (Матф. 24:31).

2. Кӕмӕдӕр цӕхуӕн фарста фӕззиннуй ӕма аци статьяй цӕмӕ ӕркӕсдзиан?

² Фал, ка ’й зонуй, кӕмӕдӕр уӕхӕн фарста фӕззиндзӕй: «„Устур бӕллӕхи“ рӕстӕг еузӕрдонӕй ка лӕггадӕ кӕна, еци „ӕндӕр фустӕ“ ба ци бауодзӕнцӕ?» (Иоан. 10:16; Матф. 24:21). Абони беретӕ фӕттухсунцӕ, цума нин ка ӕнхус кӕндзӕй ӕма нин разамунд ка дӕтдзӕй, зӕгъгӕ, исӕрст киристӕнттӕ еугурӕйдӕр уӕлӕрвтӕмӕ ист ку ’рцӕуонцӕ, уӕд? Гъӕйдӕ ӕркӕсӕн Библийӕй дууӕ хабаремӕ ӕма базонӕн, уӕхӕн гъудитӕ кӕмӕдӕр цӕмӕн фӕззиннунцӕ. Уой фӕсте ба ӕркӕсдзиан, тухсун нӕ цӕмӕннӕ гъӕуй, уомӕ.

ТӔРСУН ЦӔМӔЙ НӔ ГЪӔУЙ?

3, 4. Еуӕй-еуетӕ цӕбӕл фӕттухсунцӕ ӕма цӕмӕн?

³ Еуӕй-еуетӕ хъӕбӕр фӕттухсунцӕ, Разамонӕг совети исӕрст ӕнсувӕртӕй зӕнхӕбӕл ку некебал уа, еци рӕстӕгути туххӕй. Аллихузи сагъӕстӕ сӕмӕ фӕззиннуй. Зӕгъӕн, ӕнӕ уонӕй, цума «ӕндӕр фустӕ» рӕстдзийнадӕй нӕ райеуварс уодзӕнцӕ? Гӕнӕн ес, ӕма уӕхӕн цӕбӕлдӕрти фӕттухсунцӕ Библий финст кӕцидӕр хабӕртти туххӕй. Гъӕйдӕ си дууемӕ ӕркӕсӕн. Нӕ зӕрдӕбӕл ӕрлӕуун кӕнӕн хестӕр саугин Иодаййи. Е адтӕй Йегови еузӕрдон лӕггадгӕнӕг. Иодай ӕма ӕ бийнойнаг Иосавефӕ багъӕуай кодтонцӕ минкъий биццеу Иоаси ӕма ин банхус кодтонцӕ, цӕмӕй хуарз паддзах иссайдӕ. Цалинмӕ Иодай уодӕгас адтӕй, уӕдмӕ Иоас Йеговӕн еузӕрдонӕй лӕггадӕ кодта. Фал хестӕр саугин ку рамардӕй, удта  Иоас Хуцауи цӕсти илгъаг гъуддӕгтӕ кӕнун райдӕдта. Йеговӕй ӕхе ка рахадта, еци фудзӕрдӕ къниӕзтӕмӕ игъосун райдӕдта (2 Анз. 24:2, 15–19).

⁴ Нур ба радзубанди кӕнӕн дуккаг ӕноси киристӕнтти туххӕй. Цалинмӕ фӕстаг апостол Иоанн уодӕгас адтӕй, уӕдмӕ киристӕнттӕй беретӕн ӕнхус кодта Йеговӕн еузӕрдонӕй лӕггадӕ кӕнунмӕ (3 Иоан. 4). Уӕди рӕстӕг рӕстдзийнадӕ ка усхъуммӕ кодта, етӕ фулдӕрӕй-фулдӕр кӕнун райдӕдтонцӕ. Ӕма Иоанн дӕр иннӕ апостолти хузӕн уой нихмӕ нифсгунӕй тох кодта (2 Фес. 2:7; 1 Иоан. 2:18). Фал апостол Иоанн ку рамардӕй, уӕд раст дин ка ниууагъта, етӕ хъӕбӕр берӕ иссӕнцӕ. Уобӕл берӕ нӕ рацудӕй, ӕма киристон ӕмбурд рӕстдзийнадӕй хъӕбӕр райеуварс ӕй.

5. Библий ци хабӕрттӕмӕ ӕркастан, етӕ дзорӕг цӕбӕл нӕ ’нцӕ?

⁵ Цума Библий аци хабӕрттӕ уобӕл дзорӕг ӕнцӕ, ӕма уӕхӕн цидӕр ӕрцӕудзӕй Киристей иннӕ фустӕбӕл дӕр, исӕрст киристӕнттӕ уӕлӕрвтӕмӕ ист ку ’рцӕуонцӕ, уӕд? Цума уӕди рӕстӕг еузӕрдон киристӕнттӕ дӕр Иоаси хузӕн фудгъуддӕгтӕ кӕнун райдайдзӕнцӕ? Кенӕ ба нӕ эри дуккаг ӕноси киристӕнтти хузӕн рӕстдзийнадӕ усхъуммӕ кӕнун райдайдзӕнцӕ? Нӕ бон ӕй федарӕй зӕгъун, уотӕ ке нӕ уодзӕй. Мах ӕй зонӕн, исӕрст киристӕнттӕ зӕнхӕй ист ку ’рцӕуонцӕ, уӕд иннӕ фустӕ ӕнӕфӕккӕсӕг ке нӕ байзайдзӕнцӕ ӕма идарддӕр дӕр Йеговӕн еузӕрдонӕй ке лӕггадӕ кӕндзӕнцӕ. Цума уотӕ зӕгъун нӕ бон цӕмӕн ӕй?

РАСТ ДИН МӔНГӔ АХУРӔДТӔЙ НЕКӔД ФЕГЪӔСТӔ УОДЗӔЙ

6. Цӕхуӕн ӕртӕ рӕстӕгебӕл радзубанди кӕндзиан?

⁶ Кӕд нӕмӕ разӕй зин рӕстӕгутӕ ӕнгъӕлмӕ кӕсуй, уӕддӕр нӕ бон цӕмӕн ӕй федарӕй зӕгъун, ӕма раст дин мӕнгӕ ахурӕдтӕй некӕд фегъӕстӕ уодзӕй? Уотӕ нӕ бон ӕй зӕгъун, Библий нӕ рӕстӕгути туххӕй ци финст ес, уомӕ гӕсгӕ. Мах ци рӕстӕг цӕрӕн, е хъӕбӕр хецӕн кӕнуй, рагон Израили, удта нӕ эри дуккаг ӕноси рӕстӕгутӕй. Гъӕйдӕ мадта цубуртӕй ӕркӕсӕн еци ӕртӕ рӕстӕгемӕ: 1) рагон Израили рӕстӕгутӕ, 2) рӕстӕгутӕ апостолти мӕлӕти фӕсте ӕма, 3) мах ци рӕстӕг цӕрӕн, е, гъома, Хуцау «цӕй кой кодта, уони еугурейдӕр фӕстӕмӕ сӕ къахбӕл ислӕуун кӕнуни рӕстӕг» (Гъуд. 3:21).

7. Еузӕрдон израилӕгтӕ Хуцауӕн идарддӕр цӕмӕн лӕггадӕ кодтонцӕ, кӕд ӕма адӕнӕн сӕ фулдӕр, удта ма паддзӕхтӕ дӕр раст надӕй райеуварс уиуонцӕ?

⁷ Рагон Израили рӕстӕгутӕ. Ӕ мӕлӕти размӕ Моисей израилӕгтӕн загъта: «Ӕз ӕй зонун, мӕ мӕлӕти фӕсте сумах ке ниллӕудзиайтӕ исӕфти надбӕл. Ци надбӕл уин бафӕдзахстон цӕун, еци надӕй радзӕгъӕл уодзиайтӕ» (Дук. з. 31:29). Уомӕй уӕлдай ма Моисей израилӕгтӕн загъта, Хуцаумӕ ку нӕ игъосонцӕ, уӕд сӕ уацари ке фӕккӕндзӕнцӕ (Дук. з. 28:35, 36). Цума ӕ дзурдтӕ исӕнхӕст ӕнцӕ? Гъо. Ӕности дӕргъи паддзӕхтӕй беретӕ рӕдуд надбӕл ниллӕууиуонцӕ ӕма Хуцауи адӕни дӕр сӕ фӕдбӕл ракӕниуонцӕ. Уой туххӕй Хуцау ӕ адӕни бафхуардта ӕма нӕбал бауагъта, цӕмӕй израилӕгтӕй еске паддзах иссайдӕ (Йез. 21:25–27). Фал ӕй еузӕрдон израилӕгтӕ уидтонцӕ, Хуцауи дзурдтӕ ке ӕнхӕст кӕнунцӕ, ӕма уой фӕрци нифсгунӕй идарддӕр лӕггадӕ кодтонцӕ (Ис. 55:10, 11).

8. Дуккаг ӕноси киристон ӕмбурд рӕстдзийнадӕй ке райеуварс ӕй, е нӕмӕ дессаг гъӕуама кӕса? Ба ’й лӕдӕрун кӕнӕ.

⁸ Рӕстӕгутӕ апостолти мӕлӕти фӕсте. Дуккаг ӕноси киристон ӕмбурд рӕстдзийнадӕй ке райеуварс ӕй ӕма лӕгъуз гъуддӕгтӕбӕл ке бафтудӕй, е нӕ деси гъӕуама ’фтауа? Нӕъ. Киристе ӕхуӕдӕг загъта, беретӕ раст дин ке ниууадздзӕнцӕ (Матф. 7:21–23; 13:24–30, 36–43). Апостолтӕ Павел, Петур ӕма Иоанн дӕр ниффинстонцӕ, Киристей пахампарадӕ нӕ эри фиццаг ӕноси ке райдӕдта  ӕнхӕст кӕнун (2 Фес. 2:3, 7; 2 Пет. 2:1; 1 Иоан. 2:18). Нӕ эри дуккаг ӕноси киристон ӕмбурд Йеговӕн, куд ӕмбӕлуй, уотӕ нӕбӕл лӕггадӕ кодта. Киристон дин мӕнгӕ ахурӕдтӕй ке байдзаг ӕй, уомӕ гӕсгӕ иссӕй ӕгас дуйней мӕнгӕ динти хай, гъома Устур Вавилони хай. Мадта аци пахампарадӕ дӕр исӕнхӕст ӕй.

9. Мах ци рӕстӕг цӕрӕн, е цӕмӕй хецӕн кӕнуй рагон Израили ӕма нӕ эри дуккаг ӕноси рӕстӕгутӕй?

⁹ Хуцау «цӕй кой кодта, уони еугурейдӕр фӕстӕмӕ сӕ къахбӕл ислӕуун кӕнуни рӕстӕг». Нӕ рӕстӕгутӕ хъӕбӕр хецӕн кӕнунцӕ рагон Израили рӕстӕгутӕй, удта нӕ эри дуккаг ӕноси рӕстӕгутӕй, киристон ӕмбурди мӕнгӕ ахурӕдтӕ хъӕбӕр ку рапарахат ӕнцӕ, уомӕй. Мах ци рӕстӕг цӕрӕн, уой Библи куд хонуй? Ӕвӕдзи, фиццагидӕр расагъӕс кодтай «фӕстаг бӕнтти» туххӕй (2 Тим. 3:1). Фал Библийӕй бӕрӕг ӕй, еци рӕстӕг дзӕвгарӕ устурдӕр догӕмӕ ке амонуй. Еци догӕ фӕууодзӕй, Хуцауи Паддзахадӕ ӕгас адӕни дӕр ӕнхӕстдзийнадӕмӕ ку ’ркӕна ӕма зӕнхӕй дзенет ку рауайа, уӕд. Библий е хуннуй, Хуцау «цӕй кой кодта, уони еугурейдӕр фӕстӕмӕ сӕ къахбӕл ислӕуун кӕнуни рӕстӕг» (Гъуд. 3:21). Еци догӕ райдӕдта 1914 анзи. Цума еци анз ци ’рцудӕй? Уӕд Киристе иссӕй уӕларвон Паддзахади Паддзах. Уотемӕй бабӕй фӕззиндтӕй, Йегови номӕй ка архайдта ӕма еузӕрдон паддзах Давиди байзӕддаг ка адтӕй, уӕхӕн хецау. Фал Йеговӕ айдагъ еци паддзахадӕ не ’рлӕуун кодта ӕ къахбӕл. Уомӕй берӕ нӕ рацудӕй, уотемӕй Йеговӕ раст дин дӕр райдӕдта ӕ къахбӕл лӕуун кӕнун (Ис. 2:2–4; Йез. 11:17–20). Цума ма раст дин ескӕд мӕнгӕ дини ахурӕдтӕй фегъӕстӕ уодзӕй?

10. а) Раст дин ци уавӕри уодзӕй, уой туххӕй Библий ци финст ес? (Исай 54:17). б) Уӕхӕн пахампарӕдтӕ нин федӕни туххӕй нӕ нифс куд федар кӕнунцӕ?

¹⁰ Бакӕсӕ Исаййи 54:17. Расагъӕс кӕнӕ аци дзурдтӕбӕл: «Дӕ нихмӕ ци тохӕндзаумӕуттӕ конд ӕрцӕуа, уонӕй еу дӕр нӕ фӕррӕстмӕ уодзӕй»! Аци пахампарадӕ ӕнхӕст кӕнуй нӕ рӕстӕги. Уомӕй уӕлдай ма абони ӕнхӕст кӕнунцӕ уӕхӕн дзурдтӕ дӕр: «Дӕ фуртти дин сӕ еугурейдӕр ахур кӕндзӕй Йеговӕ, ӕма исхайгин уодзӕнцӕ ӕнӕкӕрон фарнӕй. Ду ӕрфедар уодзӕнӕ рӕстдзийнади. ...Уодзӕнӕ идард, зӕрди тас ка уадзуй, уонӕй, уомӕн ӕма дӕмӕ хӕстӕг дӕр не ’рбацӕудзӕнцӕ» (Ис. 54:13, 14). Йегови лӕггадгӕнгутӕ ӕгас зӕнхӕбӕл дӕр адӕнӕн амонунцӕ, Библи ци дзоруй, уой. Ӕма сауӕнгӕ Сайтанӕн дӕр, «аци цардӕвӕрди хуцауӕн», ӕ бон нӕй еци куст бауорамун (2 Кор. 4:4). Раст дин ӕцӕгӕйдӕр ӕ къахбӕл ӕрлӕудтӕй ӕма мӕнгӕ дини ахурӕдтӕй некӕдбал фегъӕстӕ уодзӕй. Е уодзӕй ӕносӕй-ӕносмӕ. Нӕ нихмӕ  цийфӕнди тохӕндзаума ма искӕнонцӕ, еу дӕр си нӕ фӕррӕстмӕ уодзӕй!

ХУЦАУ Ӕ АДӔНИ НЕКӔД НИУУАДЗДЗӔЙ

11. Нӕ бон цӕмӕн ӕй федарӕй зӕгъун, исӕрст киристӕнттӕ уӕлӕрвтӕмӕ ист ку ’рцӕуонцӕ, уӕддӕр хъӕбӕр берӕ адӕни тӕрсун ке нецӕмӕй гъӕудзӕй?

¹¹ Исӕрст киристӕнттӕ уӕлӕрвтӕмӕ ист ку ’рцӕуонцӕ, уӕд ци ’рцӕудзӕй? Гъӕуама нӕ гъудий дарӕн, нӕ фиййау Йесо Киристе ке ӕй. Е ӕй киристон ӕмбурди сӕргълӕууӕг. Йесо ӕхуӕдӕг загъта: «Еу Разамонӕг [уин] ес – Киристе» (Матф. 23:10). Нӕ Паддзах алкӕддӕр ӕ еузӕрдон фӕдбӕлдзӕугутӕбӕл тухсдзӕй. Ӕма нин разамунд ӕхуӕдӕг ке дӕттуй, уомӕ гӕсгӕ нӕ тӕрсун нецӕмӕй гъӕуй. Ке зӕгъун ӕй гъӕуй, листӕг гъуддӕгти уӕнгӕ нӕ зонӕн, Киристе нин еци рӕстӕг разамунд кутемӕй дӕтдзӕй, уой. Фал нӕ бон ӕй Библий ӕркӕсун, нӕ нифс нин ка бафедар кӕндзӕй, цалдӕр уӕхӕн хабаремӕ.

12. Йеговӕ ӕ адӕнбӕл куд тухстӕй: а) Моисей ку рамардӕй, уӕд? б) Илийайӕн ӕндӕр гъуддаг ку баихӕс кодта, уӕд? (Кӕсӕ ма хузӕмӕ.)

¹² Моисей рамардӕй, израилӕгтӕ Зӕрдӕвӕрд зӕнхӕмӕ ку нӕмӕ бацудӕнцӕ, уӕд. Цума ӕ мӕлӕти фӕсте ци ’рцудӕй? Израилӕгтӕ ӕнӕфӕккӕсӕг байзадӕнцӕ? Нӕъ. Йеговӕ сӕбӕл тухстӕй, цалинмӕ ибӕл еузӕрдон адтӕнцӕ, уӕдмӕ. Моисеййи мӕлӕтмӕ берӕ ку нӕбал гъудӕй, уӕд ин Хуцау баихӕс кодта, цӕмӕй разамонӕгӕй Йесо Навини исӕвӕра. Уой размӕ Моисей Йесой берӕ ӕнзти дӕргъи ахур кодта (Рац. 33:11; Дук. з. 34:9). Йесо Навинӕй уӕлдай ма Израили адтӕй, разамунд дӕттунмӕ ка арӕхстӕй, ӕндӕр уӕхӕн нӕлгоймӕгтӕ дӕр. Еуетӕ си лӕудтӕнцӕ мин адӕймагей сӕргъи, иннетӕ – сӕдӕ адӕймагей сӕргъи, кадӕртӕ – фӕндзай адӕймагей сӕргъи, сауӕнгӕ ма си адтӕй, дӕс адӕймагей сӕргъи ка лӕудтӕй, уӕхӕнттӕ дӕр (Дук. з. 1:15). Мадта бӕрӕг ӕй, Хуцауи адӕнмӕ ӕ цӕстӕ ка дардта, уӕхӕнттӕ алкӕддӕр ке адтӕй. Уӕхӕн хабар ма адтӕй пахампар Илийай рӕстӕгути дӕр. Е берӕ ӕнзти дӕргъи израилӕгтӕн ӕнхус кодта рӕстдзийнади надбӕл цӕунмӕ. Фал ин фӕстӕдӕр Хуцау Иудейи ӕндӕр гъуддаг баихӕс кодта (2 Пад. 2:1; 2 Анз. 21:12). Цума Израили дӕс муггагеми Хуцауӕн еузӕрдонӕй ка лӕггадӕ кодта, етӕ ӕнӕ разамонӕгӕй байзадӕнцӕ? Нӕъ. Уой размӕ цалдӕр анзей дӕргъи Илийа Елисеййи ахур кодта. Уомӕй уӕлдай ма си адтӕй «пахампарти фурттӕ» дӕр (2 Пад. 2:7). Ӕвӕдзи, етӕ адтӕнцӕ, еумӕ ка ахур кодта, уӕхӕн пахампартӕ. Мадта бӕрӕг ӕй, ӕууӕнки аккаг ка адтӕй ӕма Хуцауи адӕнӕн разамунд ка лӕвардтайдӕ, уӕхӕн нӕлгоймӕгтӕ берӕ ке адтӕй. Йеговӕ идарддӕр дӕр ӕ фӕндон ӕнхӕст кодта ӕма ӕ еузӕрдон лӕггадгӕнгутӕбӕл тухстӕй.

13. Дзиуиттӕгтӕмӕ 13:5 цӕхуӕн зӕрдӕвӕрд финст ес? (Кӕсӕ ма хузӕмӕ.)

 ¹³ Аци хабӕрттӕ дӕ зӕрдӕбӕл даргӕй расагъӕс кӕнӕ: исӕрст киристӕнттӕй фӕстаг уӕлӕрвтӕмӕ ист ку ’рцӕуа, уӕд ци ’рцӕудзӕй? Уобӕл нӕ нӕ сӕр сӕттун нӕ гъӕуй. Библий уой туххӕй хумӕтӕгӕй финст ӕй: Йеговӕ ӕ адӕни некӕд ниууадздзӕй. (Бакӕсӕ Дзиуиттӕгтӕмӕ 13:5.) Абони дӕр ес, Моисей ӕма Илийай хузӕн разамунд ка дӕттуй ӕма иннети ахур кӕнунмӕ берӕ рӕстӕг ка харз кӕнуй, уӕхӕн исӕрст киристӕнтти минкъий къуар. Разамонӕг совети ка лӕггадӕ кӕнуй, етӕ берӕ ӕнзти дӕргъи ахур кӕнунцӕ, ӕндӕр фустӕй ка ’й, еци ӕнсувӕрти, цӕмӕй Хуцауи адӕнмӕ сӕ цӕстӕ даронцӕ. Зӕгъӕн, бацӕттӕ кӕнунцӕ аллихузи скъолатӕ хестӕр нӕлгоймӕгтӕн, районон цӕстӕдаргутӕн, филиали комитети ӕма Вефили ка лӕггадӕ кӕнуй, еци ӕнсувӕртӕн. Разамонӕг совети ӕнсувӕртӕ сӕхуӕдтӕ фӕййахур кӕнунцӕ, ка син ӕнхус кӕнуй ӕма аллихузи комитетти ка лӕггадӕ кӕнуй, уони. Еци еузӕрдон ӕнсувӕртӕ абони дӕр нӕ организаций берӕ ӕхсидзгӕ ихӕстӕ ӕнхӕст кӕнунцӕ. Исӕрст киристӕнттӕй зӕнхӕбӕл ку некебал байзайа, уӕд еци ӕнсувӕртӕ цӕттӕ уодзӕнцӕ Киристей уӕриккитӕн разамунд дӕттунмӕ.

14. Нӕ статьяй сӕйраг гъуди цӕхуӕн ӕй?

¹⁴ Аци статьяй сӕйраг гъуди уӕхӕн ӕй: исӕрст киристӕнттӕй фӕстаг уӕлӕрвтӕмӕ ист ку ’рцӕуа, уӕддӕр раст дин мӕнгӕ дини ахурӕдтӕй нӕ фегъӕстӕ уодзӕй. Киристей разамунди фӕрци мах идарддӕр дӕр Йеговӕн еузӕрдонӕй лӕггадӕ кӕндзиан. Кӕд нӕбӕл еци рӕстӕг Магоги зӕнхӕй Гог, гъома зӕнхон хецауӕдти цӕдес ӕхе ниццӕвдзӕй, уӕддӕр е берӕ рӕстӕг нӕ рахӕсдзӕй ӕма си неци рауайдзӕй (Йез. 38:18–20). Йеговӕн куд лӕггадӕ кодтан, уотӕ ин идарддӕр дӕр лӕггадӕ кӕндзиан. Е нӕ ӕнӕмӕнгӕй фӕййервӕзун кӕндзӕй. Цӕстӕбӕлуайӕни апостол Иоанн фӕууидта, ӕндӕр фустӕмӕ ка хауй, еци «хъӕбӕр берӕ адӕн». Иоаннӕн куд загъд адтӕй, уомӕ гӕсгӕ «етӕ ӕнцӕ, устур бӕллӕхи сӕрти ка рахизтӕй, еци адӕн» (Рарг. 7:9, 14). Мадта нӕ Йеговӕ ӕнӕмӕнгӕй фӕййервӕзун кӕндзӕй!

15, 16. Раргомади 17:14 финст дзурдтӕмӕ гӕсгӕ исӕрст киристӕнттӕ Армагеддони рӕстӕг ци косдзӕнцӕ ӕма нин е нӕ нифс цӕмӕн федар кӕнуй?

¹⁵ Фал, ка ’й зонуй, кӕмӕдӕр уӕхӕн фарста  фӕззиндзӕй: «Исӕрст киристӕнттӕ ци косдзӕнцӕ, зӕнхӕй ист ку ’рцӕуонцӕ, уӕд?» Библий уомӕн ес комкоммӕ дзуапп. Уоми финст ӕй, аци дуйней хецауӕдтӕ ке «истохдзӕнцӕ Уӕрикки хӕццӕ», фал еци тохи ке фӕххуӕрд уодзӕнцӕ. Уӕхӕн дзурдтӕ си финст ес: «Фал сӕбӕл Уӕриккӕ фӕууӕлахез уодзӕй». Цума ин ка ӕнхус кӕндзӕй? Аци фарстабӕл дӕр дзуапп финст ӕй аци стихи: «Ӕ хӕццӕ фӕууӕлахез уодзӕнцӕ, хунд ка ӕй, етӕ, ӕвзурститӕ ӕма еузӕрдонтӕ». (Бакӕсӕ Раргомадӕ 17:14.) Цума етӕ ка ’нцӕ? Ка райгас ӕй, еци исӕрст киристӕнттӕ. Мадта устур бӕллӕхи размӕ исӕрст киристӕнттӕй фӕстаг уӕлӕрвтӕмӕ ист ку ’рцӕуа, уӕд сӕ фиццаг ихӕстӕй еу уодзӕй тугъди ӕнхус кӕнун. Ӕцӕгӕйдӕр е ци дессаги ихӕс ӕй! Исӕрст киристӕнттӕй кадӕртӕ рӕстдзийнадӕ ку нӕма базудтонцӕ, уӕд сӕ фарнӕуарзагӕ адӕн исхонӕн н’ адтӕй. Кадӕртӕ ма си тохгӕ дӕр кодтонцӕ. Фал фӕстӕдӕр ба ӕцӕг киристӕнттӕ иссӕнцӕ ӕма иннети хӕццӕ фӕрнӕй цӕрунбӕл исахур ӕнцӕ (Гал. 5:22; 2 Фес. 3:16). Етӕ тохӕндзаума сӕ къохмӕ нӕбал истонцӕ. Фал уӕлӕрвти ба Киристей ӕма ӕ сугъдӕг изӕдти хӕццӕ фӕстаг тугъдмӕ рацӕудзӕнцӕ Хуцауи знӕгти нихмӕ.

¹⁶ Расагъӕс кӕнӕ: абони исӕрст киристӕнттӕй беретӕ сӕ кари бацудӕнцӕ ӕма исӕнӕхъаурӕ ’нцӕ. Фал ку райгас уонцӕ, уӕд исуодзӕнцӕ хъаурӕгин ӕнӕмӕлгӕ уӕларвон уодгоймӕгтӕ. Етӕ сӕ уӕлахезгӕнӕг Паддзах Йесо Киристей хӕццӕ Армагеддони тугъди фӕрсӕй-фарсмӕ тохдзӕнцӕ. Еци тугъд ку фӕууа, уӕд Киристей хӕццӕ еумӕ архайдзӕнцӕ, цӕмӕй адӕни ӕнхӕстдзийнадӕмӕ ӕркӕнонцӕ. Зӕнхӕбӕл ӕнӕнхӕст адӕймӕгтӕ уогӕй дӕр сӕ бон адтӕй сӕ уарзон хуӕртӕ ӕма ӕнсувӕртӕн берӕ кӕнун, фал уӕлӕрвтӕмӕ ку иссӕуонцӕ, удта сӕ бон уодзӕй дзӕвгарӕ фулдӕр кӕнун.

17. Кӕцӕй ӕй зонӕн, Армагеддони рӕстӕг Хуцауи лӕггадгӕнгутӕн тӕссаг ке нецӕмӕй уодзӕй?

¹⁷ Армагеддон ку райдайа, уӕд ӕндӕр фусти ци кӕнун гъӕудзӕй? Гъӕудзӕй сӕ Йеговӕбӕл сӕ зӕрдӕ дарун ӕма ин ӕ разамундмӕ игъосун. Цума уомӕ ци хауй? Библий финст ӕй, нӕ зӕрдӕ нин ка сабур кӕнуй, уӕхӕн дзурдтӕ: «Цотӕ, мӕ адӕн, уӕ медӕггаг уӕттӕмӕ бацотӕ, уӕхебӕл дуӕрттӕ нихгӕнетӕ. Цӕйбӕрцӕдӕр рӕстӕг уӕхе баримӕхсетӕ, цалинмӕ фудӕнхӕ нӕ райевгъуйа, уӕдмӕ» (Ис. 26:20). Еци рӕстӕг Хуцауи еузӕрдон лӕггадгӕнгутӕн уӕлӕрвти дӕр ӕма зӕнхӕбӕл дӕр тӕссаг нецӕмӕйбал уодзӕй. Мах дӕр апостол Павели хузӕн федарӕй ӕууӕндӕн: «Нӕдӕр хецауӕдтӕ, нӕдӕр, нуртӕккӕ ци ес ӕма нӕдӕр, федӕни ци уодзӕй... уонӕй дӕр нӕ неци рахецӕн кӕндзӕй, Хуцау нӕмӕ... ци уарзондзийнадӕ бавдиста, уомӕй» (Ром. 8:38, 39). Гъӕйдӕ мадта макӕд иронх кӕнӕн: Йеговӕ нӕ уарзуй ӕма нӕ некӕд ниууадздзӕй!