1. ¿Hämꞌu̱ ma dä ma ha mähetsꞌi gatꞌho nuꞌu̱ ma dä mända ko rä Kristo?

 MÄ HÄMꞌU̱ yä ku mi ñꞌani hämꞌu̱ ma dä ma ha mähetsꞌi gatꞌho nuꞌu̱ ma dä mända ko rä Kristo. Po nꞌa rä tiempo ndi kamfrihu̱ ge rꞌa de nuꞌu̱ ma dä mända ko rä Kristo, tobe dri ꞌmu̱kua nuꞌmu̱ xti zo̱ho̱ rä Armagedón ꞌne ndi kamfrihu̱ ge asta ma xä mꞌu̱i nꞌa rä tiempo ha rä Paraiso. Pe rä revista La Atalaya de rä 15 de julio de 2013 bi ꞌñutkägihu̱ ge nꞌa tu̱i änte de dä xotꞌi rä gerra de Armagedón, geꞌmu̱ ma dä ma ha mähetsꞌi gatꞌho nuꞌu̱ ma dä mända ko rä Kristo (Mat. 24:31).

2. ¿Rꞌabu̱ te mä ntꞌani di o̱tꞌehu̱ ꞌne te ma gä pädihu̱?

² Zäi ge rꞌaa di ñꞌani: «¿Te ma dä thogi ko nuꞌu̱ yä kristianu ma dä gohi ha rä Xiꞌmhai xti zo̱ho̱ näꞌä rä däta mbidi fädi ngu rä däta tribulación?» (Juan 10:16; Mat. 24:21). Rꞌa yä ku di ñꞌani njabu̱ ngeꞌä huyämu̱i ge ma dä mꞌu̱i abandonädo ꞌne ge ma dä njoꞌo toꞌo ma dä umbäbi rä mfatsꞌi. Pe ma gä handihu̱ te udi rä Mäkä Tꞌofo ge xä thogi mäyaꞌmu̱ ko rä hnini rä Zi Dada Jeoba, ꞌne ma gä handihu̱ ge rä Mäkä Tꞌofo rꞌakägihu̱ yä raso pa hingä ntsuhu̱ nixi gä tumämu̱ihu̱.

¿TE HINGÄ MA DÄ THOGI?

3, 4. ¿Te tupäbi yä mu̱i rꞌa yä ku ꞌne por hanja?

³ Rꞌa yä ku tuyämu̱i ꞌne enä: «Xi xti zo̱ho̱ rä däta mbidi o däta tribulación, ¿ma dä mꞌu̱i toꞌo dä giagihu̱ o habu̱räza ma gä nxanihu̱ ꞌne ma gä sentihu̱ ge ma gä mꞌu̱ihu̱ abandonädo?». ¿Por hanja rꞌa yä ku tuyämu̱i? Zäi ge ngeꞌä xä dini ha rä Mäkä Tꞌofo hanja mäyaꞌmu̱, rꞌaa bi ꞌuege de rä Zi Dada Jeoba nuꞌmu̱ bi uadi bi du nuꞌu̱ mi gu̱tꞌi rä ꞌñuu. Ma gä handihu̱ toꞌo bi me̱fi njabu̱. Mäyaꞌmu̱, nuꞌmu̱ mi te Jehoiadá ko rä zi ꞌme̱hñä mrä thuhu Jehosabeat, bi matsꞌi nꞌa rä bätsi mrä thuhu Jehoás pa bi me̱fi näꞌä xä ñho ante yä da rä Zi Dada Jeoba. Mientra mi te Jehoiadá, rä rey Jehoás mi pe̱ꞌtsi nꞌa rä hogä ntsitsꞌi ko rä Zi Dada Jeoba. Pe mi du Jehoiadá, Jehoás bi mu̱di bi me̱fi yä tꞌo̱tꞌe xä  ntsꞌo: bi de̱mbäbi yä konseho nuꞌu̱ yä tsꞌomꞌu̱i ꞌne go bi zopu̱ rä Zi Dada Jeoba (2 Crón. 24:​2, 15-19).

⁴ Geꞌä bi thogi ꞌnehe ko nuꞌu̱ yä mu̱di kristianu. Mientra mi te yä apostol, yä kristianu mi yꞌo ha rä ꞌñuu rä Zi Dada Jeoba (3 Juan 4). Ko rä tiempo bi du yä apostol asta xa bi gohi ho̱nse̱ rä apostol Juan. Ja ngu xki ja nuꞌu̱ märꞌaa, rä apostol Juan bi sigi bi matsꞌi yä kristianu pa dä sigi dä ñꞌo ha rä ꞌñuu rä Zi Dada Jeoba, ꞌne mi defende yä congregación pa hindä yu̱tꞌi nuꞌu̱ yä ntꞌudi hingä mäjuäni (1 Juan 2:18). Pe mi du rä apostol Juan, bi mu̱di bi ntu̱ngi nuꞌu̱ yä ntꞌudi di nkontraui ko näꞌä xki ꞌñudi rä Hesu. Nuya yä ntꞌudi bi ntsini ngu nꞌa rä ñheni ha yä congregación.

5. ¿Te hindi debe gä mbenihu̱?

⁵ Xti ma ha mähetsꞌi gatꞌho nuꞌu̱ ma dä mända ko rä Kristo, ¿te ma dä me̱fi nuꞌu̱ yä kristianu ma dä gohi ha rä Xiꞌmhai? ¿Ma dä ꞌuengi de rä ꞌñuu rä Zi Dada Jeoba ja ngu bi me̱fi Jehoás o ja ngu bi me̱fi ndunthi yä kristianu mi du gatꞌho yä apostol? ¡Hinä, hingä ma dä thogi njabu̱! Mäske ha rä Xiꞌmhai ya hingä ma dä gohi ninꞌa de nuꞌu̱ ma dä mända ko rä Kristo ha mähetsꞌi, nuꞌu̱ yä kristianu ma dä gohiua, ma dä sigi dä me̱päbi rä Zi Dada Jeoba ko ngatꞌho yä koraso ꞌne hinte ma dä mꞌe̱päbi. ¿Por hanja di pädihu̱ ge ma dä thogi njabu̱?

YA NUNKA TOꞌO MA DÄ TSꞌONI NÄꞌÄ RÄ SO̱KÄMBENI TꞌUMBÄBI RÄ ZI DADA JEOBA

6. ¿Ndaꞌu̱ nuꞌu̱ hñuu yä tiempo ma gä handihu̱?

⁶ ¿Por hanja di ꞌmu̱ihu̱ seguro ge nuꞌu̱ yä kristianu ma dä gohiua ha rä Xiꞌmhai, ma dä sigi dä me̱päbi Jeoba mäske ma dä thogi yä däta xuñha? Ngeꞌä nuya yä pa di ꞌmu̱ihu̱ hingä mähye̱gi ko nuꞌu̱ yä pa bi ñhandui nuꞌu̱ yä israelita mäyaꞌmu̱, nixi mähye̱gi ko nuꞌu̱ yä pa bi ñhandui nuꞌu̱ yä mu̱di kristianu. Po geꞌä ma gä handihu̱ te udi rä Mäkä Tꞌofo de nuya hñuu yä tiempo: 1) Näꞌä rä tiempo bi mꞌu̱i yä israelita mäyaꞌmu̱. 2) Ha näꞌä rä tiempo mꞌe̱fa de bi du yä apostol. ꞌNe 3) näꞌä «rä tiempo habu̱ ma dä thoki mänꞌaki gatꞌho yä tꞌo̱tꞌe», o sea nuya yä pa di ꞌmu̱hu̱ (Hech. 3:​21, TNM).

7. ¿Por hanja himbi desanimä nuꞌu̱ yä israelita mi yꞌo mänjuäntho ha rä ꞌñuu rä Zi Dada Jeoba mäske mi handi ge tanto yä rey ngu märꞌa yä israelita mi pe̱fi näꞌä xä ntsꞌo?

⁷ Näꞌä rä tiempo bi mꞌu̱i yä israelita mäyaꞌmu̱. Himi ꞌme̱di ndunthi pa dä du Moisés nuꞌmu̱ bi ꞌñembäbi yä israelita: «Di pädi ge nu xkä tu, nuꞌähu̱ ma gi ntsꞌomꞌu̱ihu̱ ꞌne ma gi ꞌuegehu̱ de näꞌä rä ꞌñuu xtä mändaꞌihu̱ gi yꞌohu̱» (Deut. 31:29). ꞌNehe bi xipäbi te mä xuñha ma xä xofo po näꞌä ma xä me̱fi. Bi xipäbi ge ma xä tsꞌitsꞌi de gä esclavo (Deut. 28:​35, 36). ¿Bi thogi ja ngu bi mää Moisés? Hää. Durante yä nthebetho yä je̱ya, ndunthi de nuꞌu̱ yä rey bi mända ha rä hnini bi desidi bi ꞌuengi de rä ꞌñuu rä Zi Dada Jeoba ꞌne yä jäꞌi bi de̱mbäbi yä paso. Po geꞌä, rä Zi Dada Jeoba bi kastiga ꞌne bi desidi ya hindä hñutsꞌi yä rey ha rä hnini Israel (Ezeq. 21:​25-27). Pe bi mꞌu̱pu̱ rꞌa yä israelita nuꞌu̱ himbi ꞌuengi de rä ꞌñuu rä Zi Dada Jeoba, ꞌne xa bi nupäbi yä mfeni mi hyandi ge rä Zi Dada Jeoba mi kumpli gatꞌho näꞌä xki mää (Is. 55:​10, 11).

8. Mää por hanja hindi debe dä sorprendegihu̱ ge ha yä pa nuꞌu̱ yä mu̱di kristianu, ndunthi bi ꞌuengi de näꞌä xki ꞌñudi rä Hesu.

⁸ Ha näꞌä rä tiempo mꞌe̱fa de bi du yä apostol. ¿Di debe dä sorprendegihu̱ gä pädihu̱ ge mꞌe̱fa bi mꞌu̱i yä hyate kristianu? ¡Hinä! Ngeꞌä rä Hesu ya xki mää ge ma xä thogi njabu̱ (Mat. 7:​21-23; 13:​24-30, 36-43). Mꞌe̱fa, rä apostol Pablo, Pedro ꞌne rä apostol Juan, bi mää ge ha yä congregación ya mi fu̱di mi nheki yä hyate kristianu ja ngu xki mää rä Hesu (2 Tes. 2:​3, 7; 2 Ped. 2:1; 1 Juan 2:18). Mi du gatꞌho yä apostol, nubye̱ nuꞌu̱ yä hyate kristianu bi  nthe̱tui näꞌä fädi ngu rä Däta Babilonia (gehnä rä thuhu gatꞌho nuꞌu̱ relijion ja po gatꞌho rä Xiꞌmhai ꞌne hingi udi näꞌä mäjuäni). Njabu̱ bi kumpli näꞌä mi mää rä Mäkä Tꞌofo ge ma xä thogi.

9. ¿Por hanja nuya yä pa di ꞌmu̱ihu̱, hingä mähye̱gi ko nuꞌu̱ yä pa yä israelita de mäyaꞌmu̱, nixi hingä mähye̱gi ko nuꞌu̱ yä pa bä ehe mꞌe̱fa de mi du gatꞌho yä apostol?

⁹ «Rä tiempo habu̱ ma dä thoki mänꞌaki gatꞌho yä tꞌo̱tꞌe». Rä Mäkä Tꞌofo udi ge ha nuya yä pa di ꞌmu̱ihu̱, hingä mähye̱gi ko nuꞌu̱ yä pa bi mꞌu̱i yä israelita de mäyaꞌmu̱; nixi hingä mähye̱gi ko nuꞌu̱ yä pa bä ehe mꞌe̱fa de mi du gatꞌho yä apostol habu̱ go bi dominä nuꞌu̱ yä hyate kristianu. ¿Nuꞌmu̱ te rä thuhu nuya yä pa di ꞌmu̱ihu̱? Rä Mäkä Tꞌofo embäbi yä gäxä pa (2 Tim. 3:1). Pe mi mu̱di yä gäxä pa, ꞌnehe bi mu̱di märꞌa yä pa nuꞌu̱ mänꞌa ma xä dura ndunthi. Rä Mäkä Tꞌofo embäbi nuya yä pa ngu «rä tiempo habu̱ ma dä thoki mänꞌaki gatꞌho yä tꞌo̱tꞌe» (Hech. 3:​21, TNM). Nuya yä pa bi mu̱di ha näꞌä rä je̱ya 1914, ꞌne ma dä uadi asta nuꞌmu̱ rä Tsꞌu̱tꞌhui Äjuä ma dä logra dä japäbi yä jäꞌi dä mperfecto ꞌne dä japäbi rä Xiꞌmhai dä Mparaiso. Pe, ¿te bi “hyoki mänꞌaki” rä Zi Dada Jeoba ha rä je̱ya 1914? Ja ngu xki ja mäyaꞌmu̱ ha rä hnini Israel, rä Zi Dada Jeoba go geꞌä mismo bi hñutsꞌi nꞌa rä rey ngu rä representante näꞌä xki ꞌñehe de rä familia rä rey David. ¿Xi toꞌo näꞌä rey? ¡Rä Hesu! ꞌNe näꞌä bi mu̱di bi mända ha rä je̱ya 1914. Pe hingä ho̱nse̱ꞌä bi me̱fi rä Zi Dada Jeoba. Sino ke nuua ha rä Xiꞌmhai bi matsꞌi nuꞌu̱ yä ꞌme̱go pa bi xo̱kämbeni ꞌne bi me̱päbi ja ngu mi ja nuꞌu̱ yä ꞌme̱go mäyaꞌmu̱ (Is. 2:​2-4; Ezeq. 11:​17-20). Pe xibye̱, ¿ma dä ntsꞌoni mänꞌaki näꞌä rä so̱kämbeni tꞌumbäbi rä Zi Dada Jeoba ja ngu bi thogi mäyaꞌmu̱?

10. Ja ngu di handihu̱ ha Isaías 54:​17, ¿te di prometegihu̱ rä Zi Dada Jeoba ꞌne por hanja di nupkägihu̱ mä mfenihu̱?

¹⁰ (Hñeti Isaías 54:17). Rä profeta Isaías bi ꞌñenä: «Hinte ma dä yꞌo̱tꞌäꞌi ninꞌa de nuꞌu̱ yä arma ma dä thoki kontra geꞌi». Nuya yä noya ya di kumpli mäpaya. ꞌNehe di kumpli nuya märꞌa yä noya bi yꞌofo Isaías nuꞌmu̱ bi ꞌñenä: «Jeoba go ma dä ꞌñuti hanja dä mꞌu̱i ri bätsi, ꞌne nuyu̱ ma dä me̱ꞌtsi nꞌa rä mꞌu̱i temäꞌentho. ꞌNe ma gi mꞌu̱i habu̱ ma dä nja rä justisia [...]. Ya hinte ma gi tsu nixi hinto ma dä piꞌi. Rä ntsu ya nunka ma dä zu̱ꞌi» (Is. 54:​13, 14). Nisiquiera rä Zithu nunka ma dä logra dä hñäkuäbi yä ꞌme̱go rä Zi Dada Jeoba de dä ꞌñuti yä jäꞌi po gatꞌho rä Xiꞌmhai (2 Cor. 4:4). Mäpaya ya dri so̱kämbeni rä Zi Dada Jeoba ja ngu di hoꞌä ꞌne ya nunka toꞌo ma dä logra dä kꞌaꞌtsi. ¡Hingä  ma dä ntäte ninꞌa rä arma näꞌä ma dä thoki kontra gekhu̱!

NÄꞌÄ HÄÄ MA DÄ THOGI

11. ¿Te ma dä thogi ko rä hnini rä Zi Dada Jeoba xti ma ha mähetsꞌi gatꞌho nuꞌu̱ ma dä mända ko rä Kristo?

¹¹ Mäpaya, rꞌa de nuꞌu̱ ma dä mända ko rä Kristo, tobe ꞌmu̱kua ha rä Xiꞌmhai ꞌne rꞌa de geꞌu̱ gu̱tꞌi rä ꞌñuu ha rä hnini rä Zi Dada Jeoba. ¿Pe te ma dä thogi xti ma gatꞌho ha mähetsꞌi? Mähyoni gä benihu̱ ge rä Hesu go geꞌä mä mayꞌohu̱ ꞌne go geꞌä rä ñäxu de gatꞌho yä mhuntsꞌi. Mi mꞌu̱kua rä Hesu ha rä Xiꞌmhai bi ꞌñenä: «Nꞌatho näꞌä ri Liderhu̱ ꞌne go geꞌä rä Kristo» (Mat. 23:​10, TNM). Koꞌmu̱ rä Hesu go geꞌä mä Liderhu̱ ꞌne mä Reyhu̱, näꞌä nunka ma dä zopu̱ näꞌä rä responsabilida pe̱ꞌtsi nuua ha rä Xiꞌmhai de dä sugägihu̱. Hänge gatꞌho nuꞌu̱ yä kristianu ma dä gohi nuua ha rä Xiꞌmhai, hinte mä raso pe̱ꞌtsi pa dä ntsu. Mäjuäni ge hindi pädihu̱ te gatꞌho ma dä me̱fi rä Kristo pa dä giabi rä hnini rä Zi Dada Jeoba. Pe dä za gä pädihu̱ ndunthi de näꞌä bi thogi ko rä hnini rä Zi Dada Jeoba mäyaꞌmu̱. Ma gä handihu̱.

12. a) Mi du Moisés, ¿te bi me̱fi rä Zi Dada Jeoba pa bi su rä hnini? b) ¿Te bi me̱fi rä Zi Dada Jeoba pa bi su rä hnini nuꞌmu̱ Elías bi ꞌme̱hni ha mä nꞌa rä luga? (Hyandi ꞌnehe rä foto).

¹² Mäyaꞌmu̱, Jeoba bi huahni Moisés pa dä giabi yä israelita ꞌne dä yu̱tꞌi ha näꞌä rä Hogä Hai xki prometebi. Pe Moisés bi du änte de xä logra xä tso̱ni ha nunä Hogä Hai. ¿Te bi thogi ko rä hnini rä Zi Dada Jeoba? ¿Bi mꞌu̱i abandonädo? ¡Hinä! Ngeꞌä mientra yä israelita mi o̱te yä mhända rä Zi Dada Jeoba, näꞌä nunka bi bandonä. Por ejemplo, änte de ke Moisés xä du, rä Zi Dada Jeoba bi mää ge Josué go geꞌä ma xä gu̱tꞌi rä ꞌñuubye̱. Josué ya mi pädi hanja dä gia nunä hnini, ngeꞌä po ndunthi yä je̱ya, Moisés xki ꞌñuti hanja dä ja (Éx. 33:11; Deut. 34:9). ꞌNehe mi ꞌmu̱i märꞌa yä ñꞌo̱ho̱ nuꞌu̱ mi pe̱ꞌtsi ndunthi rä esperiensia de hanja dä gu̱hni nunä hnini (Deut. 1:15). Ja ngu di handihu̱, rä Zi Dada Jeoba himbi bandonä rä hnini. ꞌNehe rä Mäkä Tꞌofo pede de rä profeta Elías. Durante ndunthi yä je̱ya bi matsꞌi yä israelita pa bi xo̱kämbeni rä Zi Dada Jeoba ja ngu ri ꞌñehe. Pe nꞌa rä pa, Jeoba bi me̱hni Elías ha mä nꞌa rä luga (2 Rey. 2:1; 2 Crón. 21:12). Xibye̱, ¿bri bandonä nuꞌu̱ yä israelita mi pertenese ha nuꞌu̱ 10 yä tꞌu̱kä hnini mi fädi ngu yä tribu de Israel? Hinä. Durante ndunthi yä je̱ya, rä profeta Elías ya xki ꞌñuti Eliseo hanja dä giabi nuyu̱ 10 yä tꞌu̱kä hnini. ꞌNehe bi thutsꞌi pa dä mfaxte nuꞌu̱ mi tꞌembäbi «yä bätsi yä profeta» (2 Rey. 2:7). Ja ngu di handihu̱, rä Zi Dada Jeoba nunka bi zoogise̱ rä hnini  ꞌne nzäntho bi hñutsꞌi nuꞌu̱ yä ñꞌo̱ho̱ mi pe̱ꞌtsi ndunthi rä esperiensia pa bi su ꞌne bi gia rä hnini.

13. ¿Te di prometegihu̱ rä Zi Dada Jeoba ha Hebreos 13:5b? (Hyandi ꞌnehe yä foto).

¹³ Ko näꞌä ya dä handihu̱, ¿te gi kamfri ge ma dä thogi ko rä hnini rä Zi Dada Jeoba xti ma ha mähetsꞌi gatꞌho nuꞌu̱ ma dä mända ko rä Kristo? Hindi debe gä tumämu̱ihu̱. Rä Zi Dada Jeoba di promete ge nunka ma dä bandonägihu̱ (hñeti Hebreos 13:5b, TNM). Ja ngu bi me̱fi Moisés ꞌne Elías mäyaꞌmu̱, näꞌä rä tꞌu̱kä grupo forma rä Cuerpo Gobernante go geꞌä di giabi rä hnini rä Zi Dada Jeoba mäpaya, pe ꞌnehe xä ꞌñuti märꞌa hanja dä ja. Por ejemplo, dende nubye̱, rä Cuerpo Gobernante uti märꞌa yä ku hanja dä atiende yä responsabilida. Pa geꞌä xä organisa yä ngunsadi pa yä anciano, yä superintendente de gä circuito, ꞌne nuꞌu̱ gu̱tꞌi rä ꞌñuu ha yä ngu Betel. Rä Cuerpo Gobernante ꞌnehe xä hyoni yä mfatsꞌi. Mäpaya nuyu̱ yä maxte ya di atiende ndunthi yä responsabilida ꞌne otho rä duda ge nuyu̱ pädi hanja dä gu̱hni rä hnini rä Zi Dada Jeoba.

14. ¿Te di pädihu̱ xä ñho?

¹⁴ ¿Hämꞌu̱ ma dä ma ha mähetsꞌi gatꞌho nuꞌu̱ to̱ꞌmi dä mända ko rä Kristo? Kasi xti gätsꞌi näꞌä rä däta mbidi fädi ngu rä däta tribulación ꞌne nꞌa zi tu̱i änte de dä zo̱ho̱ rä gerra de Armagedón. Pe hindi debe gä mbenihu̱ ge rä hnini rä Zi Dada Jeoba ma dä mꞌu̱i abandonädo. Koꞌmu̱ Ñhesukristo go geꞌä mä Liderhu̱, go geꞌä ma dä matsꞌi gatꞌho nuꞌu̱ ma dä gohi nuua ha rä Xiꞌmhai pa njabu̱ dä sigi dä me̱päbi rä Zi Dada Jeoba ja ngu ri ꞌñehe. Rä Mäkä Tꞌofo mää ge ha nuꞌu̱ yä paꞌu̱, Gog de Magog —o sea nuꞌu̱ yä gobiernu ma dä mfatsꞌi— ma dä trata dä huati rä hnini rä Zi Dada Jeoba (Ezeq. 38:​18-20). Pe hingä ma dä dura ndunthi näꞌä rä ntsꞌomꞌu̱i ma dä yꞌo̱tꞌe nuꞌu̱ yä gobiernu. Nuyu̱ yä gobiernu, hingä ma dä logra dä huati rä hnini rä Zi Dada Jeoba, ngeꞌä Jeoba mismo go ma dä ñäni rä hnini. Rä Mäkä Tꞌofo pede ge rä apostol Juan bi me̱ꞌtsi nꞌa rä thandi habu̱ bi tꞌuti ge xi ndunthi nuꞌu̱ yä jäꞌi ma dä bongi de näꞌä rä däta mbidi o däta tribulación. Hänge otho rä duda ge rä hnini rä Zi Dada Jeoba, hingä ma dä mꞌe̱di xti zo̱ho̱ näꞌä rä däta mbidiꞌä (Apoc. 7:​9, 14).

15, 16. Ja ngu di handihu̱ ha Apocalipsis 17:​14, ¿te ma dä me̱fi xti tso̱ni ha mähetsꞌi gatꞌho nuꞌu̱ ma dä mända ko rä Kristo, ꞌne por hanja xa di nupkägihu̱ mä mfenihu̱?

 ¹⁵ Pe zäi ge ꞌnehe di ñꞌanihu̱: «¿Te ma dä me̱fi nuꞌu̱ ma dä ma ha mähetsꞌi?». Rä Mäkä Tꞌofo mää ge yä politiko ꞌne yä gobiernu «ma dä ntuhni kontra rä Tꞌu̱kä De̱ti —o sea rä Kristo—. Pe rä Tꞌu̱kä De̱ti go ma dä ntäte». Hänge «nuꞌu̱ xä tsꞌohni, nuꞌu̱ xä thahni ꞌne xä ze̱ti —o sea nuꞌu̱ yä kristianu ma dä ma ha mähetsꞌi—» go geꞌu̱ ma dä mfaxhui rä Kristo xti nja nunä tuhni (hñeti Apocalipsis 17:​14, TNM). Hää, dä ntuhni geꞌä rä mu̱di ꞌme̱fi ma dä tꞌumbäbi xti ma ha mähetsꞌi gatꞌho nuꞌu̱ ma dä mända ko rä Kristo. Rꞌa de nuꞌu̱ xä thahni pa dä ma ha mähetsꞌi, mi ho dä ntuhni ngeꞌä himi pädi de rä Noya Äjuä. Rꞌaa asta xki yu̱tꞌi de gä soldado. Pe mi bädi te udi rä Mäkä Tꞌofo, pe̱ꞌtsi te bi bädi bi u̱tsa yä tuhni ꞌne bi mꞌu̱i ja ngu di mända rä Zi Dada Jeoba (Gál. 5:22; 2 Tes. 3:16). Pe xti tso̱ni ha mähetsꞌi, ma dä matsꞌi rä Kristo ꞌne yä e̱nxe̱ pa dä ntuhni ha näꞌä rä gerra rä thuhu Armagedón ꞌne ma dä huati nuꞌu̱ yä nkontra rä Zi Dada Jeoba.

¹⁶ Rꞌa de nuꞌu̱ ma dä ma ha mähetsꞌi pe tobe ꞌmu̱kua ha rä Xiꞌmhai, ya yä zi däta jäꞌi ꞌne ya kasi otho yä tsꞌe̱di. Pe xti ma ha mähetsꞌi, ma dä me̱ꞌtsi yä ndoyꞌo de gä e̱nxe̱ ꞌne xi ma dä me̱ꞌtsi ndunthi rä tsꞌe̱di. Hänge nuyu̱ ma dä matsꞌi Ñhesukristo pa dä ntuhni. Xti uadi rä gerra de Armagedón, ma dä matsꞌi nuꞌu̱ yä jäꞌi ma dä gohiua ha rä Xiꞌmhai pa dä kꞌotꞌi rꞌamätsꞌu̱ de rä pekado. Hää, ya xti mꞌu̱i ha mähetsꞌi, nuꞌu̱ mänꞌa ma dä me̱fi xi mä ndunthi po nuꞌu̱ ma dä gokua ha rä Xiꞌmhai.

17. ¿Hanja di pädihu̱ ge xti zo̱ho̱ rä gerra de Armagedón, rä Zi Dada Jeoba ma dä ñäni tanto nuꞌu̱ ma dä ma ha mähetsꞌi ngu nuꞌu̱ ma dä gohi nuua ha rä Xiꞌmhai?

¹⁷ Xi nuꞌi, ¿gi to̱ꞌmi gi mꞌu̱i nuua ha rä Xiꞌmhai pa nzäntho? Nuꞌmu̱, ¿te mähyoni gi pe̱fi xti zo̱ho̱ rä gerra de Armagedón? Mähyoni gi pe̱ꞌspäbi rä komfiansa rä Zi Dada Jeoba ꞌne gi pe̱fi gatꞌho näꞌä dä mända rä hnini. Nꞌa de nuya yä mhända ehe ha Isaías 26:20 habu̱ enä: «Ku̱tꞌi ha ri nguu, ꞌne kotꞌi ri goxthi. Ñꞌägi po nꞌa zi tu̱i rä tiempo asta xti thogi rä kue̱». ¿Hänge di nupkägihu̱ mä mfenihu̱ gä pädihu̱ ge rä Zi Dada Jeoba ma dä ñäni tanto nuꞌu̱ yä kristianu ma dä ma ha mähetsꞌi ngu nuꞌu̱ ma dä gohi ha rä Xiꞌmhai? Ja ngu rä apostol Pablo di ꞌmu̱ihu̱ kombensido ge nixi «yä gobiernu, nixi nuꞌu̱ yä kosa ja mäpaya, nixi nuꞌu̱ yä kosa ma dä nja xudi ndämäni» hingä ma dä za dä ꞌuegägihu̱ de rä mhäte Äjuä (Rom. 8:​38, 39, TNM). ¡Ogi pumfri ge rä Zi Dada Jeoba xa di mäꞌi ꞌne nunka ma dä bandonäꞌi!