1. Kapigan nakompleto iray alanaan diad tawen?

 KASIN naisip mo met la no kapigan so iyakar ed tawen na saray nakekeran alanaan diad dalin? Nensaman, say amta tayo et wala ni ray alanaan ya manayam nin magano diad Paraison dalin kayari na Armagedon. Pero diad samay Hulyo 15, 2013 ya isyu na Say Panag-bantayan, naamtaan tayo ya onla lad tawen so amin ya nakekeran alanaan diad dalin antis ya onggapo so Armagedon.​—Mat. 24:31.

2. Antoy panaaburidoan na arum, tan antoy pantongtongan tayo ed sayan artikulo?

² Pero ompan nitepet na arum: No “baleg a kairapan” la, anto lay nagawad ‘arum a karnero,’ lalo la no anggapo lay akeran alanaan diad dalin? (Mat. 24:21; Juan 10:16) Aburido so arum ya agagi ya ompan agda la amtay gawaen da lapud anggapo lay mangidaulo ed sikara no wala lad tawen so amin ya alanaan. Pantongtongan tayo so duaran salaysay ed Biblia ya nayarin pangibabasiyan da. Insan tayo balet amtaen no akin ya anggapoy nepeg tayon panaburidoan.

ANTOY AGAN BALOT NAGAWA?

3-4. Antoy iisipen na arum, tan akin?

³ Wala ray maniisip ya ompan agla manmatoor so arum ya karnero no anggapo lay Mananguley ya Ulop ya mangigiya ed sikara. Agda kuno naiwasan so manisip na ontan ta wala ray salaysay ed Biblia ya nanrebelde iray lingkor na Dios nen anggapo lay mangigiya ed sikara. Pantongtongan tayoy duaran salaysay. Say sakey et tungkol ed Atagey a Saserdoten si Jehoiada. Makpel tan matoor iyan lingkor nen Jehova. Sikato  tan say asawa ton si Jehosabeat so namprotekta tan nampabaleg ed ugaw ya si Jehoas, tan tinulongan da pian magmaliw ya maong tan matoor ya ari. Nen mabilay ni si Jehoiada, maunor si Jehoas ed si Jehova. Pero nen inatey lay Jehoiada, nanrebelde si Jehoas. Say dinengel to la et saray mauges ya prinsipe tan tinaynan toy Jehova.​—2 Awa. 24:2, 15-19.

⁴ Say sakey nin iisipen na arum ya agagi et amay agawad saray Kristiano nen inatey lay amin ya apostol. Si apostol Juan so sampot ya inatey ed sikara. Balbaleg so nitulong to ed impanmatoor na saray Kristiano. (3 Juan 4) Nen mabilay ni ray apostol, ginawa ray anggaay nayarian da pian naprotektaan so kongregasyon ed bangat na saray apostata. (1 Juan 2:18; nengnengen iray study note na 2 Tesalonica 2:7 diad nwtsty-TG.) Pero nen inatey la ran amin, kinmalat so apostasya. Kayari labat na pigaran dekada, alooban la na saray apostata so amin ya kongregasyon.

5. Antoy agtayo dapat iisipen?

⁵ Kasin ipapanengneng na sayan duaran salaysay ya ontan met so nagawa ed arum a karnero no wala lad tawen so amin ya alanaan? Kasin manrebelde ira ya singa si Jehoas? Kasin magmaliw iran apostata ya singa agawa ed dakel ya Kristiano nen inatey lay amin ya apostol? Andi, agan balot itan nagawa! Makapantiwala tayo ya mansiansian matoor so arum a karnero tan ag-ira napaulyanan anggano anggapo lay akeran alanaan diad dalin. Akin et segurado itan?

AGLAN BALOT NADERAL SO DUGAN PANAGDAYEW

6. Anton taloran panaon so pantongtongan tayo?

⁶ Akin et segurado tayo ya aglan balot naderal so dugan panagdayew tan manmatoor so arum a karnero anggano ondalan ni so baleg ya kairapan? On ta ibabaga na Biblia ya say panaon ya pambibilayan tayo et duma ed panaon na saray Israelita tan ed panaon kayari impatey na saray apostol. Pantongtongan tayo pa iyan taloran panaon: (1) panaon na saray Israelita, (2) panaon kayari na impatey na saray apostol, tan (3) say panaon tayo, say ‘panaon na pangipawil ed amin a bengatla.’​—Gawa 3:21.

7. Nen nanrebelde so bansan Israel tan saray arari to, akin et agkinmapuy so pananisia na saray matoor ya Israelita?

⁷ Panaon na saray Israelita. Antis ya ompatey si Moises, oniay imbaga to ed saray Israelita: “Amtak a no inatey ak la et seguradon mauges so ikiwas yo tan taynanan yoy dalan ya ingganggan kon panakaran yo.” (Deu. 31:29) Impasakbay met nen Moises ya no manrebelde so bansan Israel, bihagen ira na arum ya bansa. (Deu. 28:35, 36) Kasin tinmua itan? On! Diad loob na nilasus ya taon, nabilang labat so matoor tan makalakal ya arari ed Israel. Maslak ed sikara et mauges, tan inimpluensyaan day interon bansa ya manrebelde ed si Jehova. Kanian inabuloyan nen Jehova ya nabihag ira tan apultot so linya na saray arari ed Israel. (Eze. 21:25-27) Pero anggano ontan so agawa, agkinmapuy so pananisia na saray matoor ya Israelita. Binmiskeg ingen so tiwala rad si Jehova lapud anengneng dan tinmua so imbaga to.​—Isa. 55:10, 11.

8. Akin et agtayo la pankelawan ya adutakan so Kristianon kongregasyon nen inatey la ray apostol? Ipaliwawa.

⁸ Panaon kayari impatey na saray apostol. Akin et agtayo la pankelawan ya adutakan so Kristianon kongregasyon nen inatey la ray apostol? On ta impasakbay ya mismo nen Jesus ya onsabi so panaon ya nalooban na saray apostata so kongregasyon. (Mat. 7:​21-23; 13:​24-30, 36-43) Diad tua, nen mabilay ni ra di  apostol Pablo, Pedro, tan Juan, anengneng da ya onggagapo lay apostasya. (2 Tes. 2:3, 7; 2 Ped. 2:1; 1 Juan 2:18) Nen inatey lay amin ya apostol, adutakan lan talaga so Kristianon kongregasyon tan kontrolado la itan na saray apostata. Kanian nagmaliw la itan ya parte na Makapanyarin Babilonia, say empiryo na palson relihyon. On, tinmua imay impropesiya nen Jesus.

9. Akin ya say panaon ya pambibilayan tayo natan et duma ed panaon na saray Israelita tan ed samay panaon kayari impatey na saray apostol?

⁹ ‘Panaon na pangipawil ed amin a bengatla.’ Say panaon ya pambibilayan tayo natan et duma ed samay panaon na saray Israelita tan ed samay panaon kayari impatey na saray apostol. Antoy tawag na Biblia ed panaon tayo? Seguro, say nanonotan tayon tampol et amay ibabaga na 2 Timoteo 3:1 ya aya la imay “kaunoran iran agew.” Duga met itan. Pero wala ni arum ya tawag na Biblia ed panaon tayo. Diad Gawa 3:21, tinawag iyan ‘panaon na pangipawil ed amin a bengatla.’ Sayan panaon et ginmapo nen 1914, tan mantultuloy iya anggad naipawil la na Panarian na Dios so Paraiso diad dalin tan magmaliw lan perpekto so amin ya totoo. Anto lay nipawil manlapu la nen 1914? Nagmaliw ya Ari si Jesus diad tawen, kanian wala lamet so mangirepresenta ed uley nen Jehova ya nanlapud pamilya nen Arin David. Pero aliwan say inkaari labat so impawil nen Jehova. Impawil to met so dugan panagdayew! (Isa. 2:2-4; Eze. 11:17-20) Kasin nadutakan lamet itan?

10. (a) Antoy impropesiya na Biblia tungkol ed dugan panagdayew diad panaon tayo? (Isaias 54:17) (b) Akin et makapabiskeg na pananisia irayan propesiya?

¹⁰ Basaen so Isaias 54:17. Isip mo pan maong iyan propesiya: “Ag-ontalona so antokaman ya armas a gawaen parad sika.” Kasin nagagawa la itan natan? On! Tan nia ni sakey ya propesiya ya nasusumpal ed panaon tayo: “Bangatan nen Jehova so amin ya ananak mo, tan magmaliw a daakan so kareenan na saray ananak mo. Malet kan niletneg ed inkatunong. . . . Anggapoy takotan mo tan anggapoy sengegay panggiwgiw mo, ta ag-itan makaasingger ed sika.” (Isa. 54:13, 14) Anggan si Satanas ya “dios na sayan sistema na mundo” et anggapoy pakayari ton patundaen so kimey ya panagbangat na saray lingkor nen Jehova. (2 Cor. 4:4) On, nipawil la so dugan panagdayew tan aglan balot itan narutakan. Mansiansia itan anggad angga. Tandaan tayo sirin ya anggapon balot so armas ya makatalo ed sikatayo!

 ANTOY NAGAWA?

11. Akin et segurado tayo ya agnapaulyanan so baleg ya ulop anggano wala lad tawen so amin ya alanaan?

¹¹ Antoy nagawa no wala lad tawen so amin ya alanaan? Agtayo amta so amin ya detalye, pero tandaan ya si Jesus so Pastol tayo. Sikato so ulo na Kristianon kongregasyon. Oniay imbaga ton mismo: “Saksakey so Lider yo, say Kristo.” (Mat. 23:10) Seguradon asikasoen itayo nen Kristo Jesus ta obligasyon to itan bilang Ari tayo. Sikato so akauley ed sikatayo, kanian anggapoy nepeg tayon pampagaan. Anggano agtayo ni amta so amin ya detalye no panon to tayon asikasoen tan igiya legan na baleg a kairapan, wala ray salaysay ed Biblia ya manpabiskeg na liknaan tayo. Pantongtongan tayoy pigara ed saratan.

12. Panon ya inasikaso nen Jehova iray lingkor to nen (a) inatey lay Moises? (b) nen anguman so asainmin nen Elias? (Nengnengen met so litrato.)

¹² Inatey lay Moises antis ya makaloob iray Israelita diad Insipan ya Dalin. Nen anggapo lay Moises, kasin pinaulyanan ira nen Jehova? Andi, inasikaso to ra. Diad tua, antis ya inatey si Moises, nampili lay Jehova na onsalat ed sikato ya mangidaulo ed bansan Israel​—si Josue, ya pigaran dekada lan ipapasal nen Moises. (Exo. 33:11; Deu. 34:9) Tan diad interon Israel, dakel so lalaki ya marunong tan eksperiensyado ya apilin mangidaulo​—‘saray pangulo na nilibo, nilasus, alimamplo, tan asamplora’ ni ingen. (Deu. 1:15) On, ag-apaulyanan iray Israelita. Ontan met so agawa diad panaon nen Elias. Abaybayag ya sikato so inusar nen Jehova ya mangidaulo ed dugan panagdayew diad samploran tribu ya panarian na Israel. Pero sinmabi panaon ya sikatoy inyasain la nen Jehova diad duaran tribu ya panarian na Juda. (2 Ara. 2:1; 2 Awa. 21:12) Kasin apaulyanan iray matoor ya Israelita diad samploran tribu? Andi, ta say sinmalat diman et si Eliseo, ya abayag lan impasal nen Elias. Tan wala met diman iray “ananak na propeta,” ya posiblin ontutukoy ed saray lalaki ya impasal parad kimey na sakey ya propeta. (2 Ara. 2:7) On, sinegurado nen Jehova ya dakel so matoor ya lalakin mangidaulo ed saray lingkor to anggan antoy nagawa. Tuloytuloy to ran inasikaso tan ag-ahadlangan so gagala to.

13. Antoy im-promise nen Jehova ya nabasad Hebreo 13:5b? (Nengnengen met so litrato.)

¹³ Base ed sarayan alimbawa ya atalakay tayo, kasin walay nepeg tayon pampagaan no anggapo lay akeran alanaan diad dalin? Malinlinew so katuaan ya ipapaseguro na Biblia:  Agbalot paulyanan nen Jehova iray lingkor to diad dalin. (Basaen so Hebreo 13:5b.) Singa si Moises tan Elias nensaman, amta na Mananguley ya Ulop ya importantin maong so pangipasal ed arum. Sayan melag ya grupo na alanaan et abayag lan mangiti-train na saray brother ya kabiangan na arum a karnero. Singa bilang, wala ray inorganisa dan eskuelaan ya mangi-train ed saray elder, manangasikaso na sirkito, membro na Branch Committee, overseer ed Bethel, misionero, tan arum ni. Saray mismon membro na Mananguley ya Ulop so mangipapasal ed saray brother ya katulongan na nanduruman committee na Mananguley ya Ulop. Natan ni labat et ambelat la ran responsabilidad so makulikulin gagampanan na sarayan katulongan. A-train iran maong, kanian baleg so tiwala tayo ya sarasarag dan asikasoen tan idaulo iray karnero nen Kristo no wala lad tawen so amin ya alanaan.

14. Antoy manunan punto ed sayan artikulo ya labay tayon tandaan?

¹⁴ Nia so manunan punto ya labay tayon tandaan: Anggano kasagsagan na baleg a kairapan tan wala lad tawen so amin ya alanaan, makapantiwala tayo ya agbalot ontunda so dugan panagdayew diad dalin. Tuloytuloy tayon idaulo nen Kristo diad panagdayew tayod si Jehova. Tua, atakien itayo na alyansa na saray bansa, say Gog na Magog. (Eze. 38:18-20) Pero ompalpak so plano ra. Agda tayon balot napatunda ya mandayew ed si Jehova. Seguradon iligtas to tayo! Diad sakey ya pasingawey, anengneng nen apostol Juan so “baleg ya ulop” na arum a karnero nen Kristo. Naamtaan nen Juan ya sayan “baleg ya ulop” et “nanlapud baleg a kairapan.” (Apo. 7:9, 14) On, akapropesiya la ed Biblia ya makaligtas iray matoor ya lingkor na Dios!

15-16. Base ed Apocalipsis 17:​14, antoy gawaen na saray alanaan no Armagedon, tan akin et makapabiskeg itan na liknaan?

¹⁵ No wala lad tawen so amin ya alanaan, antoy gawaen da ey? Walay direktan ebat na Biblia ed satan. Diad Armagedon, saray gobierno ed interon mundo et “milaban . . . ed Kordero.” Pero siempre, natalo ira. Nabasa tayo: “Taloen ira na Kordero.” Siopay kaiba na Kordero  ya milaban ed sikara? Ibabaga na Biblia ya kaiba to iramay “tinawag,” “pinili,” tan “matoor.” (Basaen so Apocalipsis 17:14.) Siopa iraya? Saray alanaan. Kanian no onla lad tawen iray nakekeran alanaan diad dalin diad bandad sampot na baleg a kairapan, say sankaunaan ya asainmin da et milaban. Matindi itan ya asainmin da! Diad tua, say arum ya alanaan et sanay tan marunong ya milaban antis iran nagmaliw ya Tasi. Wala ra ingey datin sundalo. Pero nen naamtaan day katuaan, naaralan day manbilay ya mareen. (Gal. 5:22; 2 Tes. 3:16) Agla ran balot sinmuporta ed antokaman ya guerra. Pero kasegep dad tawen, ibaan day Jesus tan saray masanton anghel ya milaban diad guerra na Armagedon. Taloen da iray kakabusol na Dios!

¹⁶ Isip mo pa: Wala ray alanaan ya Kristiano natan ya matatken lan maong tan makapuy lay laman da. Pero kasabi dad tawen, magmaliw iran mabisbiskeg tan imortal ya espiritu! Kaiba iran tampol ed armada ya say Komander et si Jesu-Kristo. Kayari na Armagedon, mikimeyan ira ed si Jesus tan ontulong ira pian magmaliw ya perpekto so amin ya totoo. Kanian diad tua, mas dakel so nagawaan da parad sikatayo no wala la rad tawen kompara nen wadia ni rad dalin.

17. Akin et segurado tayo ya protektaan nen Jehova so amin ya matoor ya lingkor to no Armagedon?

¹⁷ Kasin kabiangan ka na arum a karnero? No on, anto met sirin so kailangan mon gawaen no Armagedon? Simpli labat: Mantiwala kad si Jehova tan unor moy instruksion to. Antoy nayarin kaiba ed satan ya instruksion? Oniay ibabaga na Biblia: “Loob kayod saray kuarto yo, tan ikapot yo iray puerta. Amot kayon magano anggad onlabas so sanok na Dios.” (Isa. 26:20) Diad satan ya panaon, seguradon protektaan nen Jehova so amin ya matoor ya lingkor to diad tawen tan diad dalin. Singa si apostol Pablo, kombinsido tayo ya anggan “saray gobierno odino saray bengatlan wala natan odino saray bengatlan onsabi . . . et agbalot makapangisian ed sikatayo ed panangaro na Dios.” (Roma 8:38, 39) Tandaan, inar-aro ka nen Jehova, tan agto kan balot paulyanan!