1. Ko ni lini pomwe odzodzewa ose adzayende kudzulu?

 MAGOLE ya kumbuyo atumiki wa Yahova ambadzibvunza kuti: ‘Ko ni lini pomwe odzodzewa omalizira adzayende kudzulu?’ Pakuyamba timbaganiza kuti odzodzewa adzakhale pano pa dziko yapasi mu paradaiso kwa kanthawe pambuyo pa Aramagedo. Koma mu Ntsanja ya ulonda ya 15 Julho, 2013, tidapfunzira kuti: Odzodzewa ose okwana 144000 adzakhale ayenda kale kudzulu nkhondo ya Aramagedo ikanati kuchitika.—Mat. 24:31.

2. Ko tingadzibvunze mbvunzo uponi ndipo tiwone chani mu nkhani ino?

² Koma panango tingadzibvunze kuti: Ko ni chani chomwe chidzachitikire wa ‘nkhosa zinango’ omwe adzakhale ankutumikira Yahova mokhulupirika pa nthawe ya ‘chisautso chikulu’? (Yoh. 10:16; Mat. 24:21) Wankhosa zinango angakhale na nkhawa ndawa yosadziwa vomwe adzachite panango ndawa yoganiza kuti adzakhale alibe owathandiza na kuwatsogolera pa nthawe yomwe Akhrisitu odzodzewa adzayende kudzulu. Panango iwo aganiza tene ndawa ya nkhani ziwiri zomwe Baibolo ichalewa. Naboni tiwone nkhani mwezi ndipo tiwone kuti ndawa chani tichadekanalini kukhala na nkhawa manjeuno.

KO NI CHANI CHOMWE CHIDZACHITIKELINI?

3-4. Ko anango angakhale na nkhawa iponi ndipo ndawa chani?

³ Anango angakhale na nkhawa yakuti wa nkhosa zinango adzaleke kutumikira Yahova pakadzakhala kuti palibe odzodzewa panango Bungwe Yotonga kuti iwatsogolere. Panango angaganize tene ndawa ya nkhani zinango za m’Baibolo. Naboni tiwone vitsanzo viwiri ivi: Chakuyamba ni cha nkulu wantsembe Yehoyada. Iye wenze ntumiki wa Mulungu wokhulupirika. Iye na nkazi wake Yehosabati adateteza mulumbwana munango dzina yake Yehoasi ndipo adamuthandiza kuti akhale mpfumu yabwino komasoti yokhulupirika. Pomwe Yehoyada wenze na moyo Yehoasi adatumikira Yahova mokhulupirika ndipo adachita vinthu vabwino. Koma pomwe Yehoyada adamwalira Yehoasi adayamba kuchita vinthu voipa. Iye adabvesera malangizo  ya nduna zoipa ndipo adasiya kutumikira Yahova.—2 Mbiri 24:2, 15-19.

⁴ Chitsanzo chachiwiri ni cha Akhrisitu omwe adakhalako pambuyo pa atumi. Pa atumi ose, mtumi Yohane ndiye adamalizira kumwalira. Pomwe iye wenze na moyo adathandiza Akhrisitu azinji kuti apitirize kukhala okhulupirika kwa Yahova. (3 Yoh. 4) Ninge momwe atumi anango wa Yesu adachitira, Yohane adachita vose vomwe angakwanise kuti ateteze mipingu ku vipfunziso vabodza vomwe vimbawanda. (1 Yoh. 2:18; 2 Ates. 2:7.) Koma pomwe Yohane adamwalira, vipfunziso vabodza vimbawanda ninge lupsa ntengo. Patsogolo pake wanthu wampatuko adayamba kupfunzisa vinthu vizinji vabodza na kulekelera vinthu voipa mu mipingu yose.

5. Mobverana na nkhani ziwiri izi, ko ni chani chomwe chidzachitikelini?

⁵ Ko nkhani ziwiri mwezi za m’Baibolo zinkuwonesa kuti vinthu ninge mwevi vidzachitikembo Akhrisitu odzodzewa akadzayenda kudzulu? Ko Akhrisitu okhulupirika wa pano pa dziko yapasi adzayambe kuchita vinthu mosakhulupirika ninge Yehoasi, nkukhala wampatuko ninge momwe azinji adachitira pambuyo pakuti atumi amwalira? M’dawiro ni wakuti vidzachitikelini ne pang’ono! Tingakhale na chitsimikizo chakuti odzodzewa akadzayenda kudzulu, wa nkhosa zinango adzapitirize kutumikira Yahova mu njira yobvumizika. Ndipo Yahova adzapitirize kuwasamalira. Ndawa chani tichadekana kukhala na chitsimikizo mwechi?

KUPEMPHERA CHAIKO KUDZAPITIRIZE MPAKA KALEKALE

6. Ko tikambirane nthawe zitatu ziponi?

⁶ Ndawa chani tichadekana kukhala na chitsimikizo chakuti kupemphera chaiko kudzamalelini podiya pa nthawe yomwe tidzalimbane na mabvuto? Ndawa Baibolo ichafotokoza kuti tinkukhala mu nthawe yosiyana na nthawe ya Aizirayeli na pomwe atumi amwalira kale. Manje naboni tibvese bwinobwino vomwe vidachitika pa nthawe zitatu izi: (1) Nthawe ya Aizirayeli, (2) nthawe yakuti atumi ose amwalira, na (3) ‘nthawe yobwezeresa vinthu vose.’—Mac. 3:21.

7. Ndawa chani Aizirayeli okhulupirika adakhala okondwa pa kutumikira Yahova?

⁷ Nthawe ya Aizirayeli. Mose wakhala pang’ono kumwalira adauza Aizirayeli kuti: ‘Ninkudziwa bwino kuti nikandomwalira imwepo muyambe kuchita vinthu voipa na kupatuka pa njira yomwe nakulamulani.’ (Deut. 31:29) Mose adachenjeza pomwe Aizirayeli kuti akapanduka, iwo adzatengewe nkuyendesewa ku ukapolo. (Deut. 28:35, 36) Ko mawu mwaya yadakwanirisika? Inde. Kwa magole yazinji mafumu yadasiya kubvera Yahova ndipo yadachitisa wanthu anango kutumikira milungu yabodza. Ndawa ya vimwevi Yahova adasiya wanthu wake wosabvera ndipo alibe kubvuma kuti mpfumu iliyose ya Aizirayeli imbawatonge. (Ezek. 21:25-27) Koma pomwe Aizirayeli anango padawona mawu ya Yahova yankukwanirisika iwo adakhala okondwa nkuyamba kutumikira Yahova mokhulupirika.—Yes. 55:10, 11.

8. Ko tichadekana kudabwa kuti pambuyo pakuti atumi ose amwalira Akhrisitu adakhala wampatuko? Fotokozani.

⁸ Pambuyo pakuti atumi amwalira. Ko tichadekana kudabwa ndawa yakuti pambuyo pakuti atumi amwalira padabwera wampatuko? Neye. Ndawa yakuti Yesu wenze adaneneratu kuti vimwevi vidzachitike. (Mat. 7:21-23; 13:24-30, 36-43) Atumi ninge Paulo, Petulo na Yohane adanena kuti vomwe Yesu wenze adanena venze vidayamba kukwanirisiwa mu nthawe yawo. (2 Ates. 2:3, 7; 2 Pet. 2:1; 1 Yoh. 2:18) Pambuyo pakuti mtumi womalizira wamwalira,  Akhrisitu wampatuko adayamba kukhala mbali ya Babulo nkulu yomwe ni matchetchi yose yabodza. Pamwapapomwe vomwe Yesu adalewa vidakwanirisika.

9. Ndawa chani nthawe yathu ni yosiyana na nthawe ya Aizirayeli na nthawe yakuti atumi amwalira?

⁹ ‘Nthawe yobwezeresa vinthu vose.’ Nthawe yathu ni yosiyana na nthawe ya Aizirayeli na nthawe yomwe Akhrisitu adakhala wampatuko pambuyo pakuti atumi ose amwalira. Ko nthawe yathu ino tiyichemera tani? Isepano tichayichemera nthawe yathu mweyino kuti ‘ntsiku zomalizira’ za mapeto ya dziko yoipa iyi. (2 Tim. 3:1) Baibolo ichawonesa kuti pomwe ntsiku zomalizira zidayamba, padayambapomwe nthawe yodekana maninge yomwe idzatenge nthawe ikulu. Nthawe mweyi idzapitirize mpaka Ufumu wa Yesu udzabwezerese wanthu kukhala wa ungwiro na kukonza dziko kukhala paradaiso. Nthawe mweyi ichachemelewa kuti ‘nthawe yobwezeresa vinthu vose.’ (Mac. 3:21) Nthawe mweyi idayamba mu 1914 Yesu wayenda kale kudzulu. Ko nchani chomwe chidabwezeresewa? Yesu adayamba kutonga kudzulu. Mwanjira mweyi Yahova adayikha Mpfumu kuti iyimire Ufumu wa Davide. Ufumu moyu ni voselini vomwe Yahova adabwezeresa. Pambuyo pa vimwevi kupemphera chaiko kudayamba pomwe kubwezeresewa. (Yes. 2:2-4; Ezek. 11:17-20) Manje ko kupemphera chaiko kudzasokonezewe pomwe?

10. (a) Ko Baibolo ichalewa chani va kupemphera chaiko mu nthawe yathu? (Yesaya 54:17) (b) Ndawa chani maulosi mwaya yatikondweresa?

¹⁰ Werengani Yesaya 54:17. Ganizirani va ulosi uyu: ‘Palibe chitsulo chilichose chomwe chidakonzerewa imwepo chomwe chidzapambane’! Mawu youziriwa mwaya yankukwanirisiwa ntsiku zino. Kuyingiziramwapa, mawu ya pa Yesaya 54:13, 14 yankukwanirisiwambo ntsiku zino ndipo yatinyamalisa. Pa lemba mweyi panena kuti: ‘Wana wako wose ambadzapfunzisiwe na Yahova ndipo ntendere wa wana wako udzakhale uzinji. Iwepo udzakhale wolimba mu chilungamo. . . . Udzagopelini kanthu ndawa palibe chogopsa chilichose chomwe chidzakufenderere.’ Olo Satana chaiye yemwe ni ‘mulungu wa dziko iyi,’ adzakwaniselini kutikangisa kuphata basa yomwe inkuchitika pa dziko yose yomwe ni kupfunzisa wanthu va Yahova. (2 Akor. 4:4) Kupemphera chaiko kudabwezeresewa ndipo kudzasokonezewelini pomwe na vipemphedzo vabodza ndipo kudzapitirize mpaka kalekale. Palibe chitsulo chomwe chidzakwanise kumalisa wanthu wa Yahova!

 KO NI CHANI CHOMWE CHIDZACHITIKE?

11. Ko ni chani chomwe chichatitsimikiza kuti wa nkhosa zinango adzathawiwelini pambuyo pakuti odzodzewa ose ayenda kudzulu?

¹¹ Ko chani chomwe chidzachitike odzodzewa akadzayenda kudzulu? Kumbukirani kuti Yesu ni Nyakabusa wathu. Iye ni msolo wa mpingu Wachikhrisitu. Iye adabvekesa bwino pomwe adalewa kuti: ‘Ntsogoleri wanu ni mbodzi, Khrisitu.’ (Mat. 23:10) Mpfumu yathu inkutonga ndipo idzakangirelini kukwanirisa basa yake ndawa yakuti ni mwana wa Yahova chaiye yemwe ankunyang’anira. Isepano tichadekalini kukhala na mantha pano pa dziko yapasi. Ni vobveka kuti isepano tinkudziwalini chaivo vomwe Yesu adzachite kuti atsogolere wanthu wake nthawe mweyo ikadzakwana. Manje naboni tiwone vitsanzo vinango va m’Baibolo vomwe vingatithandize kukhala odekha.

12. Ko Yahova adasamalira tani wanthu wake (a) pambuyo pakuti Mose wamwalira? (b) pambuyo pakuti Eliya wapasiwa utumiki unyowani? (Onani pomwe foto)

¹² Aizirayeli akanati kungena mu dziko yopolomisiwa, Mose adamwalira. Ko chani chomwe chidachitikira Aizirayeli? Ko iwo alibe kudziwa chomwe angadekana kuchita ndawa Mose wenze adamwalira? Neye. Pomwe iwo ambapitiriza kukhala okhulupirika, Yahova ambawasamalira. Mose akanati kumwalira Yahova adauza kuti ayikhe Yoswa kukhala ntsogoleri wa Aizirayeli. Mose Adatherena Yoswa kwa magole yazinji. (Eks. 33:11; Deut. 34:9) Kuyingizira mwapo, amuna anango azinji enzembo okonzeka kukhala atsogoleri wa wanthu 1000, atsogoleri wa wanthu 100, atsogoleri wa wanthu 50 mpaka atsogoleri wa wanthu 10. (Deut. 1:15) Wanthu wa Mulungu enze wosamalilika bwino. Chitsanzo chinango chomwe tinacho ni cha mneneri Eliya. Kwa magole yazinji Eliya adathandiza Aizirayeli kuti apitirize na kupemphera chaiko ndipo pa nthawe yoikhiwiratu Yahova adamupasa utumiki munango kuti ayende ku sul kwa Yuda. (2 Maf. 2:1; 2 Mbiri 21:12) Ko Aizirayeli okhulupirika wa ufumu wa madzinza 10 enze adathawiwa? Neye. Eliya adatherena Elisa kwa magole yazinji ndipo penzepomwe ‘wana wa aneneri’ omwe enze adayikhiwa mu tumagulu. Mwawa enze adatherenewambo. (2 Maf. 2:7) Panango kuti penze amuna azinji okhulupirika omwe enze okonzeka kutsogolera wanthu wa Mulungu. Yahova adapitiriza kukwanirisa cholinga chake na kusamalira bwino atumiki wake.

13. Ko Yahova ankutipolomisa chani pa lemba ya Aheberi 13:5b? (Onani pomwe foto)

¹³ Ninge momwe tawonera mu vitsanzo vimwevi, ko munkuganiza kuti chani chomwe  chidzachitike pomwe odzodze omalizira akadzatengewa nkuyenda kudzulu? Tichadekanalini kuganizira maninge vimwevi. M’Baibolo tigumanamo chonadi chosashupa kubva chomwe chitithandiza kukhala odekha. Yahova adzathawelini atumiki wake pano padziko yapasi. (Werengani Aheberi 13:5b.) Ntsiku zino kagulu kochepa ka Akhrisitu odzodzewa kankutsogolera wanthu wa Mulungu komwe kachemerewa kuti Bungwe Yotonga. Ninge Mose na Eliya, wa m’Bungwe Yotonga ankutherena wa nkhosa zinango kuti athandize kusamalira wanthu wa Mulungu. Mwakulinganiza, Bungwe Yotonga, ikonza mashikola yazinji kuti atherene akulu, onyang’anira madera, wa Mukomiti ya Nthambi, onyang’anira pa Beteli na abale anango. Iwo, aliyese payekha atherenambo wothandizira makomiti ya m’Bungwe Yotonga. Kuyambira manjeuno othandizira mwawa, anamaudindo yazinji ndipo ni okonzeka kuphata basa ya kusamalira nkhosa za Khrisitu.

14. Ko chani chomwe tachibvesesa mu pfunziro mweyi?

¹⁴ Pofika pano mu pfunziro mweyi, tabvesesa kuti: Odzodzewa omalizira akadzayenda kudzulu kumapeto kwa chisautso chikulu, atumiki wa Yahova adzapitirize kumutumikira mokhulupirika. Ndawa yotsogolerewa na Yesu Khrisitu, isepano tidzalekelini kutumikira Yahova. Ni shuwadi kuti nthawe mweyi tidzadzudziwe na Gogui wa Kudziko ya Magogui yemwe ni mbverano wa mabungwe yose. (Ezek. 38:18-20) Chisautso chimwechi chidzamalelini nthawe ikulu, ndipo adzakwaniriselini vofuna vawo. Adzakwaniselini kukangisa wanthu wa Yahova kumutumikira. Mosakayika Yahova adzatipulumuse. Mtumi Yohane adawona ‘gulu ya wanthu’ wa nkhosa zinango wa Khrisitu. Ndipo Yohane adazindikira kuti gulu ikulu mweyi ndiwo omwe ‘abula mu chisautso chikulu.’ (Chiv. 7:9, 14) Mosakayika Yahova adzatipulumuse!

15-16. Mobverana na lemba ya Chivumbulutso 17:14, ko odzodzewa adzachite chani panthawe ya Aramagedo, ndipo ndawa chani vimwevi vichatilimbikisa?

¹⁵ Olo nteno anango angaganize kuti: ‘Ko chani chidzachitikire odzodzewa? Ko ni chani chomwe adzachite akadzayenda kudzulu?’ Baibolo ichadawira mobveka bwino mibvunzo mwaya. Iyo ichafotokoza kuti maboma ya dziko  iyi ‘yadzamenyane na mwana wa Nkhosa.’ Koma iwo adzaluze, Baibolo inena kuti ‘mwana wa Nkhosa adzawine.’ Manje ko ni mbani adzathandize Yesu? Baibolo idawirapomwe kuti: ‘Ochemerewa’ ‘osaluliwa’ na ‘okhulupirika.’ (Werengani Chivumbulutso 17:14.) Ko osaluliwa mwawa ni mbani? Ni odzodzewa, omukisiwa. Manje odzodzewa omalizira ali pano padziko yapasi akadzayenda kudzulu, kumapeto kwa chisautso chikulu, basa yoyamba yomwe akapasiwe ni kumenya nkhondo. Imweyi idzakhale basa ikulu maninge. Akhrisitu odzodzewa anango akanati kukhala Mboni za Yahova, enze adazolowera kumenya nkhondo ndipo anango enze masocha. Koma pomwe iwo adakhala Akhrisitu adadziwa njira ya ntendere. (Agal. 5:22; 2 Ates. 3:16) Iwo adasiya kuthandizira nkhondo koma akadzayenda kudzulu, iwo akakhale pabodzi na Yesu na angelo ochena ndipo adzamenye nkhondo yomaliza yomenyana na azondi wa Mulungu.

¹⁶ Ganizirani ivi. Ntsiku zino Akhrisitu odzodzewa omwe ali pano padziko yapasi, anango alibe mphanvu ndipo ni okalamba. Koma akadzamukisiwa nkuyenda kudzulu, iwo akakhale volengewa vauzimu, vosafa, vamphanvu ndipo adzamenye nkhondo pabodzi na Mpfumu ya nkhondo, Yesu Khrisitu. Nkhondo ya Aramagedo ikadzamala, iwo adzaphate basa pabodzi na Yesu kuthandiza wanthu kukhala waungwiro. Mosakayika iwo adzakwanise kuchitira vinthu vizinji abale na alongo pano pa dziko yapasi kuposha vomwe adachita ali pano pa dziko yapasi ninge wanthu alibe ungwiro!

17. Ko tinkudziwa tani kuti atumiki ose wa Yahova adzakhale otetezeka pa nthawe ya nkhondo ya Aramagedo?

¹⁷ Ko imwepo muli mbali ya nkhosa zinango? Manje ko imwepo muchadekana kudzachita chiyani pomwe Aramagedo yomwe ni nkhondo ikulu maninge pa nkhondo zose zomwe wanthu adawona ikadzayamba? Ni vosashupa: Thembani Yahova ndipo tewedzani malangizo yake. Ko vimwevi vinkuphatanidzapo chani? Baibolo ichafotokoza pa Yesaya 26:20 pomwe ichati: ‘Ngenani muvipinda mwanu ndipo fungani vitseko kumbuyo kwanu, bishalani kwa kanthawe mpakana ukali moyu kupita.’ Panango kuti atumiki ose okhulupirika kudzulu na padziko yapasi adzakhale otetezeka pa nthawe ya Aramagedo. Ninge momwe mtumi Paulo adanembera isepano tinachitsimikizo chakuti ‘palibe boma, vinthu vomwe vilipo panango vinthu vomwe vinkubwera . . . vomwe vingalekanise chikondi chathu kwa Mulungu.’ (Aro. 8:38, 39) Nthawe zose mbakumbukirani mpfundo iyi: Yahova achakukondani maninge ndipo iye adzakuthawenilini ne pang’ono!