1. Wat taem nao bae evri anointed wan go ap lo heven?

 STAKA year go finis, pipol blo Jehovah laek for savve, ‘Wat taem nao bae last anointed Christian lo earth bae go ap lo heven?’ Lo bifor, iumi savve sei samfala anointed wan maet stap lo Paradaes earth for lelebet taem bihaen lo Armageddon. Bat lo Wastaoa blo July 15, 2013, iumi lanem dat evri anointed wan wea stap yet lo earth bae go ap lo heven bifor Armageddon start.—Matt. 24:31.

2. Wat nao kwestin wea samfala maet garem, and wat nao bae iumi discussim lo disfala article?

² Bat samfala lo iumi maet garem kwestin olsem: Wat nao bae happen lo “olketa nara sheepsheep” blo Christ wea bae gohed faithful for worshipim Jehovah during datfala ‘big trabol’? (John 10:16; Matt. 24:21) Samfala distaem olketa wari nogud olketa no garem eniwan for helpem and leadim olketa bihaen evri anointed brata and sista go ap lo heven. Distaem bae iumi ting raonem tufala story lo Bible wea maet mekem olketa for garem tingting olsem. Then bae iumi discussim olketa reason wea showimaot iumi shud no wari.

WAT NAO BAE NO HAPPEN?

3-4. Wat nao samfala maet wari abaotem, and why nao olsem?

³ Samfala brata and sista maet wari nogud nao olketa nara sheepsheep bae stop for worshipim Jehovah, bikos olketa anointed brata lo Governing Body no stap nao for leadim and helpem olketa. Maet olketa garem tingting olsem bikos lo samfala story lo Bible. Bae iumi storyim tufala Bible example. First wan, hem story blo Hae Priest Jehoiada. Hem wanfala faithful man blo God. Hem and waef blo hem, Jehoshabeath, protectim wanfala boy wea nem blo hem Jehoash and helpem hem for kamap wanfala gud and faithful king. Taem olo man  Jehoiada laef, Jehoash gohed worshipim Jehovah and duim olketa gud samting. Bat afta Jehoiada dae, Jehoash start for duim olketa nogud samting. Hem lisin lo olketa wicked prince and stop for worshipim Jehovah.—2 Chron. 24:​2, 15-19.

⁴ Nara example hem blo olketa Christian lo second-century. Aposol John hem last aposol for dae. Taem hem laef, hem helpem staka Christian for gohed faithful for worshipim Jehovah. (3 John 4) Olsem olketa nara faithful aposol blo Jesus, John tu waka hard for protectim kongregeson from olketa apostate. (1 John 2:18; lukim olketa study note blo 2 Thess. 2:7 lo English.) Bat bihaen John dae, staka insaed kongregeson followim apostate teaching. Then for staka year bihaen, olketa apostate barava spoelem evri Christian kongregeson.

5. From tufala story hia, wat kaen tingting nao iumi shud no garem?

⁵ Waswe, tufala story hia from Bible showimaot dat sem samting bae happen lo olketa nara sheepsheep bihaen evri anointed wan go ap lo heven? Lo datfala taem, waswe, olketa faithful Christian wea stap lo earth bae duim olketa samting wea no stret olsem Jehoash, or bae olketa kamap apostate, olsem staka Christian afta aposol John dae? Barava nomoa nao! Iumi sure bihaen olketa anointed wan go ap lo heven, olketa nara sheepsheep bae gohed faithful for worshipim Jehovah and hem bae gohed lukaftarem olketa. Why nao iumi sure lo datwan?

NO ENI SAMTING BAE SPOELEM TRU WORSHIP

6. Wat nao thrifala difren taem period wea iumi bae storyim?

⁶ Why nao iumi sure no eni samting bae spoelem tru worship, nomata during lo olketa hard taem wea iumi bae feisim lo future? Bikos lo wat iumi lanem from Bible abaotem taem period wea iumi stap. Taem blo iumi distaem hem barava difren from taem blo olketa Israelite bifor and olketa Christian lo second-century. So bae iumi storyim thrifala difren taem period: (1) Taem blo olketa Israelite bifor, (2) afta olketa aposol dae, and (3) lo taem blo iumi, “taem God stretem bak evri samting.”—Acts 3:21.

7. Why nao olketa faithful Israelite no lus hope taem olketa king and staka pipol chus for duim wicked samting?

⁷ Taem blo olketa Israelite bifor. No longtaem bifor Moses dae, hem talem olketa Israelite: “Mi savve finis dat bihaen mi dae, iufala bae duim olketa wicked samting and tane difren from olketa samting wea mi komandim iufala for duim.” (Deut. 31:29) Moses warnim olketa tu dat if olketa Israelite bighed, olketa bae kamap prisoner lo nara nation. (Deut. 28:​35, 36) Hao, olketa toktok hia kamap tru? Yes. For staka handred year, staka king duim samting wea nogud lo eye blo Jehovah and leadim pipol blo God for worshipim olketa false god. From datwan, Jehovah panisim wicked pipol lo Israel and hem no letem eni Israelite king for rul moa. (Ezek. 21:​25-27) Bat olketa faithful Israelite gohed strong for worshipim Jehovah taem olketa lukim samting wea hem talem hem kamap tru.—Isa. 55:​10, 11.

8. Hao, iumi shud sapraes dat olketa Christian kongregeson lo second-century start for followim olketa teaching wea no tru? Explainim.

⁸ Afta olketa aposol dae. Hao, iumi shud sapraes dat Christian kongregeson lo second-century start for followim olketa teaching wea no tru? Nomoa. Jesus profesi abaotem hao wei for apostate bae kamap big. (Matt. 7:​21-23; 13:​24-30, 36-43) Aposol Paul, Peter,  and John confirmim hao profesi blo Jesus hem start for fulfill lo first century C.E. (2 Thess. 2:​3, 7; 2 Pet. 2:1; 1 John 2:18) No longtaem afta olketa aposol dae, olketa apostate Christian kamap part lo bigfala Babylon, wea hem nao evri false religion lo world. So wat Jesus profesi abaotem hem fulfill.

9. Hao nao taem period wea iumi stap hem barava difren from taem blo olketa Israelite bifor and taem wea apostate kamap big bihaen olketa aposol dae?

⁹ “Taem God stretem bak evri samting.” Taem wea iumi stap hem barava difren from taem blo olketa Israelite bifor and taem wea apostate kamap big lo second-century C.E. Wat nao Bible kolem lo taem period wea iumi stap? Hem kolem disfala taem period lo “olketa last day” blo disfala nogud world. (2 Tim. 3:1) Bat Bible showim hao wanfala important taem period hem start tu lo semtaem and bae hem gohed for longfala taem. Hem bae gohed kasem taem wea Kingdom blo Messiah hem helpem olketa man for kamap perfect and mekem full earth for kamap paradaes. Disfala taem period Bible kolem lo “taem [for] God stretem bak evri samting.” (Acts 3:21) Disfala taem period hem start lo 1914. Wat nao God stretem bak moa lo datfala taem? Jehovah mekem Jesus for kamap King lo heven. So Jehovah mekem wanfala ruler for representim hem moa wea kam from laen blo faithful King David. Bat Jehovah no duim datwan nomoa. No longtaem afta datwan, hem mekem tru worship for kamap moa! (Isa. 2:​2-4; Ezek. 11:​17-20) Waswe, eni samting bae spoelem moa tru worship enitaem?

10. (a) Wat nao Bible profesi talem abaotem tru worship lo taem blo iumi? (Isaiah 54:17) (b) Why nao olketa profesi olsem hem comfortim iumi?

¹⁰ Readim Isaiah 54:17. Ting abaotem disfala profesi: “Eni weapon wea olketa wakem for againstim iu bae no savve win”! Disfala profesi hem fulfill distaem. Nara encouraging toktok hia hem fitim taem blo iumi tu: “Evri son blo iu, Jehovah nao bae teachim olketa, and peace wea olketa son blo iu garem bae kamap evriwea. Lo raeteous fasin blo mi, bae mi mekem iu kamap strong. . . . Iu bae no fraetem eni samting and no eniting for iu wari lo hem, bikos datfala samting bae no kam klosap lo iu.” (Isa. 54:​13, 14) Nomata Satan hem “god bilong disfala world,” hem no garem paoa for stopem waka wea pipol blo Jehovah duim for teachim olketa narawan abaotem Jehovah. (2 Cor. 4:4) Jehovah mekem tru worship kamap finis, and no eni samting bae spoelem moa. Tru worship bae gohed  for olowe. No eni weapon wea olketa wakem for againstim iumi bae win!

WAT NAO BAE HAPPEN?

11. Wat nao mekem iumi sure God bae no lusim datfala big crowd taem olketa anointed Christian go ap lo heven?

¹¹ Wat nao bae happen taem olketa anointed Christian go ap lo heven? Remember, Jesus hem Shepherd blo iumi. Hem nao hed lo Christian kongregeson. Jesus sei: “Wanfala Leader nomoa iufala garem, and hem nao Christ.” (Matt. 23:10) Jesus wea hem rul lo heven, bae evritaem lukaftarem olketa tru follower blo hem. From Christ nao leadim olketa follower blo hem lo earth, olketa bae no need for fraetem eni samting. Bat, iumi no savve lo evri detail abaotem hao Christ bae leadim pipol blo hem lo datfala taem. So bae iumi storyim samfala Bible example wea savve encouragem iumi.

12. Hao nao Jehovah lukaftarem pipol blo hem (a) afta Moses dae? (b) afta Elijah kasem niu assignment? (Lukim tu piksa.)

¹² Bifor olketa Israelite go insaed Promis Land, Moses hem dae. Wat nao happen lo pipol blo God? Hao, Jehovah stop nao for helpem pipol blo hem afta datfala faithful servant blo hem dae? Nomoa. Taem olketa faithful, Jehovah gohed provaed for olketa. Bifor Moses dae, Jehovah talem hem for markem Joshua for leadim pipol blo hem. Moses hem bin trainim Joshua for staka year. (Ex. 33:11; Deut. 34:9) And tu, staka man wea fit for lead olketa stap. Olketa hia hed ovarem wan thousand pipol, hed ovarem wan handred, hed ovarem fifti, and even hed ovarem ten. (Deut. 1:15) God barava lukaftarem gud pipol blo hem. Iumi lukim sem samting tu lo example blo Elijah. For staka year, hem leadim olketa Israelite lo tru worship. Bat gogo, assignment blo Elijah hem change, and Jehovah transfarem hem go lo south Judah. (2 Ki. 2:1; 2 Chron. 21:12) Hao, datwan minim God lusim faithful pipol blo hem lo ten-tribe kingdom blo Israel? Nomoa. Elijah bin trainim Elisha for staka year. And olketa “son blo olketa profet” tu kasem samfala training. (2 Ki. 2:7) So staka faithful man stap for leadim pipol blo God. So no eni samting spoelem plan blo Jehovah and hem kea for olketa wea faithful for worshipim hem.

13. Wat nao Jehovah promisim for iumi lo Hebrew 13:5b? (Lukim tu piksa.)

¹³ Taem iumi tingim olketa Bible example hia, wat nao iu tingim bae hem happen taem last anointed Christian hem go ap lo heven? Iumi no need for wari. Bible talem klia disfala  tru samting wea encouragem iumi. Hem sei: Jehovah bae nating lusim pipol blo hem wea stap lo earth. (Readim Hebrew 13:5b.) Olsem Moses and Elijah, wanfala smol grup blo olketa anointed Christian wea lead distaem luksavve hao hem barava important for trainim olketa narawan. For staka year finis, Governing Body bin trainim olketa brata lo nara sheepsheep for duim olketa waka for lead. For example, olketa organizem staka skul for trainim olketa elder, traveling overseer, Branch Komiti member, olketa overseer lo Bethel, missionary, and olketa narawan. Governing Body seleva bin trainim olketa helper for duim waka lo olketa difren komiti blo Governing Body. Olketa helper hia faithful for duim staka responsibility distaem lo organization. Olketa barava redi for gohed duim waka for lukaftarem olketa sheepsheep blo Christ.

14. Wat nao main point lo disfala discussion?

¹⁴ Diswan nao main point lo discussion blo iumi: Klosap lo end blo datfala big trabol, taem last wan blo olketa anointed wan go ap lo heven, tru worship bae still gohed lo disfala earth. From Jesus Christ nao leadim pipol blo God, olketa bae gohed faithful for worshipim Jehovah. Hem tru, lo datfala taem, grup blo olketa nation wea Bible kolem lo Gog blo Magog bae attakim pipol blo God. (Ezek. 38:​18-20) Bat datfala attak bae fail bikos hem bae no stopem pipol blo God for gohed worshipim hem. Hem bae rescuem olketa! Aposol John lukim lo vision wanfala “big crowd” blo olketa nara sheepsheep blo Christ. John herem hao disfala “big crowd” hem “olketa wea no dae long datfala big trabol.” (Rev. 7:​9, 14) So iumi sure Jehovah bae sevem olketa!

15-16. Olsem Revelation 17:14 storyim, wat nao olketa anointed wan bae duim during war blo Armageddon, and why nao datwan encouragem iumi?

¹⁵ Bat samfala maet wonder: ‘Waswe lo olketa anointed wan? Wat nao bae olketa duim afta olketa go lo heven?’ Bible ansarem stret datfala kwestin. Hem storyim hao olketa gavman blo disfala world bae “faetem datfala Pikinini Sheepsheep.” Bat bae olketa lus. Bible  sei: “Datfala Pikinini Sheepsheep bae winim olketa.” And hu nao bae helpem datfala Pikinini Sheepsheep? Datfala sem verse hem sei: “Olketa wea God chusim and wea faithful.” (Readim Revelation 17:14.) Hu nao olketa hia? Olketa anointed wan wea resurrect! So taem last wan lo olketa anointed wan go ap lo heven klosap lo end blo datfala big trabol, wanfala lo olketa first assignment blo olketa hem for faet. Datwan hem barava spesol assignment! Samfala anointed wan, olketa pipol for faet bifor olketa kamap Jehovah’s Witness. Samfala even joinim army bifor. Bat bihaen olketa kamap Christian and lane for stap lo peace witim pipol. (Gal. 5:22; 2 Thess. 3:16) Olketa stop for duim eni samting for sapotim war. Bat afta olketa go ap lo heven, olketa bae joinim Christ and olketa holy angel for faet lo datfala last war againstim olketa enemy blo God.

¹⁶ Tingim diswan! Samfala anointed Christian wea stap yet lo earth olketa olo, and even no strong nao. Bat taem olketa resurrect and go lo heven, olketa bae strong and kamap olketa spirit wea no savve dae, and kasem assignment for joinim Jesus Christ, wea hem Warrior-King blo olketa. Afta olketa faet lo war blo Armageddon, olketa bae waka witim Jesus for helpem olketa man for kamap perfect. Iumi sure taem olketa lo heven, olketa bae fit for helpem olketa brata and sista blo olketa lo earth witim staka samting moa, winim taem wea olketa no perfect and stap yet lo earth!

17. Hao nao iumi savve dat evri servant blo God bae sef during war blo Armageddon?

¹⁷ Waswe, iu blo nara sheepsheep? If olsem, wat nao bae iu duim taem datfala barava important war blo Armageddon hem start? Trustim Jehovah, and followim direction blo hem. Wat nao maet insaed diswan? Bible sei: “Go insaed olketa rum blo iufala, and satem kam door. Iufala haed insaed for lelebet taem go kasem taem kros blo God hem finis.” (Isa. 26:20) During lo datfala taem, evri faithful servant blo God lo heven and earth bae sef. Olsem aposol Paul, iumi sure no eni samting wea ‘gavman duim, or eni samting wea stap distaem or wea bae kamap savve stopem iumi for no kasem love blo God.’ (Rome 8:​38, 39) Hem gud for evritaem tingim hao Jehovah lovem iu, and hem bae no enitaem lusim iu!