1.‏ پاک روح نال مسح ہوئے سارے مسیحیاں نُوں کدوں اسمان تے چُکیا جائے گا؟‏

 کئی سال پہلاں اَسی سوچنے ساں کہ پاک روح نال مسح ہوئے جیہڑے مسیحی زمین تے رہ گئے ہون گے اوہ سارے کدوں اسمان تے جان گے؟ ساڈا خیال سی کہ اوہناں وچوں کجھ مسیحی ہر مجدون دی جنگ توں بعد کجھ چِر لئی زمین تے نوِیں دُنیا چ ہون گے۔ پر 15 جولائی 2013 دے ‏”‏مینارِنگہبانی“‏ چ دَسیا گیا سی کہ پاک روح نال مسح ہوئے جِنّے وی مسیحی زمین تے ہون گے، اوہناں ساریاں نُوں ہر مجدون دی جنگ شروع ہون توں پہلاں اسمان تے چُک لیا جائے گا۔—‏متی 24:‏31‏۔‏

2.‏ کجھ مسیحیاں دے ذہن چ کیہڑا سوال آ سکدا اے تے ایس مضمون چ اَسی کیس بارے گل کراں گے؟‏

² پر ہوسکدا اے کہ ساڈے ذہن چ ایہہ سوال آئے:‏ مسیح دِیاں ”‏ہور وی بھیڈاں“‏ نال کیہہ ہوئے گا جیہڑیاں ”‏وڈی مصیبت“‏ دے دوران وفاداری نال یہوواہ دی خدمت کر رہیاں ہون گیاں؟ (‏یوحنا 10:‏16؛‏ متی 24:‏21‏)‏ شاید ہور وی بھیڈاں وچ شامل کجھ مسیحی ایس گلوں پریشان ہون کہ جدوں پاک روح نال مسح ہوئے ساڈے پیارے بھین بھرا اسمان تے چلے جان گے تے فیر ساڈا کیہہ بنے گا، کون ساڈی رہنمائی کرے گا۔ ہوسکدا اے کہ اوہناں دے ذہن چ ایہہ گل بائبل چ دَسے دو واقعیاں دی وجہ توں آئے۔ آؤ اوہناں واقعیاں تے غور کریئے۔ اوس توں بعد اَسی ویکھاں گے کہ سانوں پریشان ہون دی لوڑ کیوں نئیں اے۔‏

ہور وی بھیڈاں نال کیہہ نئیں ہوئے گا؟‏

3، 4.‏ کجھ بھین بھرا شاید کیہڑی گل سوچ کے پریشان ہون تے کیوں؟‏

³ کجھ بھین بھرا شاید ایس گلوں پریشان ہون کہ جدوں گورننگ باڈی دے ممبر ساڈے نال نئیں  ہون گے تے ہور وی بھیڈاں کِتے یہوواہ دی راہ توں ہٹ نہ جان۔ ہو سکدا اے کہ بائبل چ لکھے کجھ واقعیاں دی وجہ توں اوہ اِنج سوچدے نیں۔ آؤ ایہو جہے دو واقعیاں تے غور کرنے آں۔ پہلا واقعہ بادشاہ یوآس دا اے۔ جدوں اوہ چھوٹا سی تے وڈے کاہن یہویدع تے اوہدی بیوی یہوسبعت نے اوہدی جان بچائی۔ یہویدع یہوواہ دا بڑا وفادار سی تے اوہنے تے اوہدی بیوی نے یوآس دی وی اِک چنگا بادشاہ بنن چ مدد کیتی سی۔ جدوں تک یہویدع زندہ رہیا، یوآس یہوواہ دِیاں راہواں تے چلدا رہیا۔ پر اوہدے مرن توں بعد یوآس نے بھیڑے کم کرنے شروع کر دِتے۔ اوہنے بھیڑے سرداراں دی گل مننی شروع کر دِتی تے یہوواہ نُوں چھڈ دِتا۔—‏2-‏تواریخ 24:‏2،‏ 15-‏19‏۔‏

⁴ دُوجا واقعہ دُوجی صدی دے مسیحیاں دا اے۔ یوحنا رسول اوہ آخری رسول سی جیہڑا اپنے جیوندے جی مسیحیاں دی مدد کردا رہیا کہ اوہ یہوواہ دی راہ تے چلن۔ (‏3-‏یوحنا 4‏)‏ یسوع دے دُوجے رسولاں وانگوں اوہ وی سخت کوشش کردا رہیا تاکہ کلیسیا چ جھوٹھی تلیم نہ پھیلے۔ (‏1-‏یوحنا 2:‏18؛‏ 2-‏تھسلُنیکیوں 2:‏7‏)‏ پر اوہدے مرن توں بعد ایہہ تلیم اَگ وانگوں پھیل گئی۔ کجھ سالاں دے اندر اندر مسیحی کلیسیا چ جھوٹھی تلیم تے غلط کم عام ہو گئے۔‏

5.‏ اَسی ماضی دے جیہڑے دو واقعیاں تے غور کیتا اے، اوہناں دی وجہ توں سانوں کیہہ نئیں سوچ لینا چاہی دا؟‏

⁵ کیہہ ایہناں دو واقعیاں توں ایہہ ثابت ہوندا اے کہ جدوں پاک روح نال مسح ہوئے مسیحی اسمان تے چلے جان گے تے مسیح دِیاں ہور وی بھیڈاں نال اِنج ای ہوئے گا؟ کیہہ اوس ویلے زمین تے رہن والے وفادار مسیحی یوآس وانگوں اوس تربیت نُوں بُھل جان گے جیہڑی اوہناں نُوں ہُن مل رہی اے یاں اوہ دُوجی صدی دے مسیحیاں وانگوں سچائی دی راہ توں ہٹ جان گے؟ ایہدا جواب ایہہ وے کہ اِنج بالکل نئیں ہوئے گا۔ اَسی ایس گل دا پورا یقین رکھ سکنے آں کہ پاک روح نال مسح ہوئے مسیحیاں دے اسمان تے جان توں بعد وی ہور وی بھیڈاں یہوواہ دی عبادت کردیاں رہن گیاں تے اوہ وی اوہناں دا خیال رکھدا رہوے گا۔ اَسی ایہہ گل پورے یقین نال کیوں کہہ سکنے آں؟‏

یہوواہ دے بندے اوہدی عبادت کردے رہن گے

6.‏ اَسی کیہڑے تِن زمانیاں بارے گل کراں گے؟‏

⁶ اَسی ایہہ یقین کیوں رکھ سکنے آں کہ آن والے مشکل وقت چ وی یہوواہ دے بندے اوہدی عبادت کردے رہن گے؟ ایہدی وجہ اوہ گلاں نیں جیہڑیاں بائبل چ ساڈے زمانے بارے دَسیاں گئیاں نیں۔ ساڈا زمانہ بنی‌اِسرائیل دے زمانے تے دُوجی صدی چ رہن والے مسیحیاں دے زمانے توں بالکل فرق اے۔ آؤ ایہناں تِناں زمانیاں بارے واری واری گل کرنے آں:‏ (‏1)‏بنی‌اِسرائیل دا زمانہ، (‏2)‏رسولاں دے مرن توں بعد والا زمانہ تے (‏3)‏ساڈا زمانہ یعنی ساریاں چیزاں نُوں بحال کرن دا زمانہ۔—‏اعمال 3:‏21‏۔‏

7.‏ وفادار اِسرائیلی ایہہ ویکھ کے مایوس کیوں نئیں ہوئے کہ بنی‌اِسرائیل تے اوہناں دے بادشاہواں نے بھیڑے کم کرنے شروع کر دِتے نیں؟‏

⁷ بنی‌اِسرائیل دا زمانہ۔‏ موسیٰ نے مرن توں کجھ چِر پہلاں بنی‌اِسرائیل نُوں کہیا:‏ مَیں چنگی طرحاں جاننا واں کہ میرے مرن توں بعد تُسی ضرور بھیڑے کم کرن لگ پووو گے تے اوس راہ تے چلنا چھڈ دَوو گے جدے تے چلن دا مَیں توانوں حکم دِتا اے۔ (‏اِستثنا 31:‏29‏)‏ موسیٰ نے اوہناں نُوں ایہہ وی دَسیا کہ جے اوہ نافرمانی کرن گے تے اوہ فیر توں غلامی چ چلے جان گے۔ (‏اِستثنا 28:‏35، 36‏)‏ کیہہ اوہدیاں گلاں سچیاں ثابت ہوئیاں؟ جی بالکل۔ کئی صدیاں تک بنی‌اِسرائیل چ ایہو جہے بادشاہ آندے رہے جنہاں نے بھیڑے کم کیتے تے لوکاں نُوں وی جھوٹھے دیوتاواں دی عبادت تے لا دِتا۔ ایس وجہ توں یہوواہ نے بنی‌اِسرائیل نُوں سزا دِتی تے اِسرائیلی بادشاہواں دا سلسلہ ختم کر دِتا۔ (‏حِزقی‌ایل 21:‏25-‏27‏)‏ پر وفادار اِسرائیلیاں نُوں ایہہ ویکھ کے بڑا حوصلہ مِلیا کہ یہوواہ دِیاں کہیاں ہوئیاں گلاں پوریاں ہو رہیاں نیں۔—‏یسعیاہ 55:‏10، 11‏۔‏

8.‏ کیہہ ایہہ حیرانی دی گل اے کہ دُوجی صدی چ مسیحی کلیسیا جھوٹھی تلیم تے چلن لگ پئی سی؟ وضاحت کرو۔‏

⁸ رسولاں دے مرن توں بعد والا زمانہ۔‏ کیہہ ایہہ حیرانی دی گل اے کہ دُوجی صدی چ مسیحی کلیسیا جھوٹھی تلیم تے چلن لگ پئی سی؟  جی نئیں۔ یسوع مسیح نے پہلاں توں ای دَس دِتا سی کہ مسیحی کلیسیا چ گمراہی پھیل جائے گی۔ (‏متی 7:‏21-‏23؛‏ 13:‏24-‏30،‏ 36-‏43‏)‏ پولُس رسول، پطرس رسول تے یوحنا رسول؛ تِناں نے دَسیا کہ یسوع دی ایہہ پیشین‌گوئی پہلی صدی چ ای پوری ہونا شروع ہو گئی سی۔ (‏2-‏تھسلُنیکیوں 2:‏3،‏ 7؛‏ 2-‏پطرس 2:‏1؛‏ 1-‏یوحنا 2:‏18‏)‏ تے دُوجی صدی چ مسیحی کلیسیا چ گمراہی تے جھوٹھی تلیم پوری طرحاں پھیل چُکی سی۔ جھوٹھے مسیحی ظاہر ہو گئے سن تے وڈے بابل یعنی جھوٹھے مذہب دا خاص حصہ بن گئے سن تے ایہہ وی اِک پیشین‌گوئی سی جیہڑی پوری ہو رہی سی۔‏

9.‏ ساڈا زمانہ بنی‌اِسرائیل دے زمانے تے دُوجی صدی چ رہن والے مسیحیاں دے زمانے توں کیویں فرق اے؟‏

⁹ ساریاں چیزاں نُوں بحال کرن دا زمانہ۔‏ ساڈا زمانہ بنی‌اِسرائیل دے زمانے تے دُوجی صدی دے زمانے توں فرق اے۔ ساڈے زمانے نُوں کیہہ کہیا جاندا اے؟ اَسی ایس زمانے نُوں عام طور تے آخری زمانہ کہنے آں۔ (‏2-‏تیمُتھیُس 3:‏1‏)‏ پر بائبل چ دَسیا گیا اے کہ ایس زمانے دے نال ای اِک ہور زمانہ وی شروع ہویا اے جیہڑا اوس ویلے تک جاری رہوے گا جدوں تک مسیح دی بادشاہی دے ذریعے سارے انسان بے‌عیب نئیں ہون جان گے تے زمین عدن دے باغ وانگوں سوہنی نئیں بن جائے گی۔ ایس زمانے نُوں ساریاں چیزاں نُوں بحال کرن دا زمانہ کہیا جاندا اے۔ (‏اعمال 3:‏21‏)‏ ایہہ زمانہ 1914 چ شروع ہویا سی۔ اوس ویلے کیہڑی چیز بحال ہوئی سی؟ اوس ویلے یسوع اسمان تے بادشاہ بنیا سی۔ اِنج یہوواہ نے اپنی بادشاہی نُوں بحال کیتا سی تے اپنے وفادار بندے داؤد دی نسل چوں اِک بادشاہ نُوں کھڑا کیتا سی جیہڑا اوہدی نمائندگی کرے۔ پر یہوواہ نے صرف اپنی بادشاہی نُوں ای بحال نئیں کیتا سگوں ایہدے بعد چھیتی ای اوہدی عبادت وی بحال ہونی شروع ہو گئی۔ (‏یسعیاہ 2:‏2-‏4؛‏ حِزقی‌ایل 11:‏17-‏20‏)‏ کیہہ ہُن دُبارہ کدی یہوواہ دے بندے گمراہ ہون گے؟‏

10.‏ (‏الف)‏ ساڈے زمانے چ یہوواہ دی عبادت بارے بائبل چ کیہڑی پیشین‌گوئی کیتی گئی سی؟ (‏یسعیاہ 54:‏17‏)‏ (‏ب)‏سانوں ایہناں پیشین‌گوئیاں توں حوصلہ کیوں مِلدا اے؟‏

¹⁰ یسعیاہ 54:‏17 نُوں پڑھو۔‏ ذرا ایس پیشین‌گوئی بارے سوچو:‏ کوئی وی ہتھیار جیہڑا تیرے خلاف بنایا جائے گا، کم نہ آئے گا۔ ایہہ پیشین‌گوئی اَج پوری ہو رہی اے۔ ایہدے علاوہ ایہہ پیشین‌گوئی وی ساڈے زمانے چ پوری ہو رہی اے:‏ تیرے سارے پُتر یہوواہ توں تلیم حاصل کرن گے تے تیرے پُتراں دی سلامتی عظیم ہوئے گی۔ تینوں نیکی دی بنیاد تے مضبوطی نال قائم کیتا جائے گا۔ تینوں کسے گل دا ڈر نئیں ہووے گا تے نہ ای تُوں خوف کھائیں گی کیونکہ ایہہ تیرے نیڑے وی نئیں آئے گا۔ (‏یسعیاہ 54:‏13، 14‏)‏ اَج یہوواہ دے بندے تلیم دین دا جیہڑا کم کر رہے نیں، اوہنوں روکن دی طاقت ایس دُنیا دے خدا شیطان چ وی نئیں اے۔ (‏2-‏کُرنتھیوں 4:‏4‏)‏ یہوواہ دی عبادت بحال ہو چُکی اے تے ہُن اوہدے بندے کدی وی گمراہ نئیں ہون گے۔ اوہ ہمیشاں تک  اوہدی عبادت کردے رہن گے تے کوئی وی ہتھیار جیہڑا ساڈے خلاف بنایا جائے گا، کم نہ آئے گا۔‏

پاک روح نال مسح ہوئے مسیحیاں دے اسمان تے جان توں بعد کیہہ ہوئے گا؟‏

11.‏ سانوں ایس گل دا یقین کیوں اے کہ جدوں پاک روح نال مسح ہوئے مسیحی اسمان تے چلے جان گے تے وڈی بھیڑ دی دیکھ‌بھال ہوندی رہوے گی؟‏

¹¹ جدوں پاک روح نال مسح ہوئے مسیحیاں نُوں اسمان تے چُک لیا جائے گا تے اوہدوں ساڈے نال کیہہ ہوئے گا؟ ایہہ گل یاد رکھو کہ یسوع ساڈا چرواہا اے۔ اوہی مسیحی کلیسیا دا سربراہ اے۔ یسوع مسیح نے آپ ایہہ گل کہی:‏ ”‏تواڈا رہنما اِک ای اے یعنی مسیح۔“‏ (‏متی 23:‏10‏)‏ یسوع اسمان تے بادشاہ بن چُکیا اے تے اوہ ہمیشاں ساڈی دیکھ‌بھال کرے گا۔ کیونکہ یسوع آپ زمین تے رہن والے مسیحیاں دی رہنمائی کر رہیا ہوئے گا ایس لئی اوہناں نُوں ڈرن دی کوئی لوڑ نئیں ہوئے گی۔ سانوں ایہدے بارے سب کجھ نئیں پتہ کہ اوس ویلے یسوع اپنے لوکاں دی رہنمائی کیویں کرے گا۔ ایس لئی آؤ بائبل دِیاں کجھ مثالاں تے غور کرنے آں جدی وجہ توں ساڈا حوصلہ ودھے گا۔‏

12.‏ (‏الف)‏یہوواہ نے موسیٰ دے مرن توں بعد اپنے بندیاں دی رہنمائی کیویں کیتی؟ (‏ب)‏یہوواہ نے ایلیاہ نُوں یہوداہ دے ملک بھیجن توں بعد اِسرائیل چ رہن والے اپنے بندیاں دی رہنمائی کیویں کیتی؟ (‏تصویر نُوں وی ویکھو۔)‏

¹² بنی‌اِسرائیل دے ملک کنعان چ جان توں پہلاں ای موسیٰ فوت ہو گیا۔ فیر بنی‌اِسرائیل نال کیہہ ہویا؟ کیہہ موسیٰ توں بعد یہوواہ نے اپنے بندیاں دی رہنمائی کرنی چھڈ دِتی؟ نئیں۔ جِنّی دیر تک اوہ یہوواہ دے وفادار رہے، اوہ اوہناں دی دیکھ‌بھال کردا رہیا۔ موسیٰ دے مرن توں پہلاں یہوواہ نے اوہنوں حکم دِتا سی کہ اوہ بنی‌اِسرائیل دی رہنمائی کرن دی ذمے‌داری یشوع نُوں دَوے۔ موسیٰ کئی سالاں توں یشوع نُوں تربیت دے رہیا سی۔ (‏خروج 33:‏11؛‏ اِستثنا 34:‏9‏)‏ ایہدے علاوہ ہور وی کئی لوک سن جیہڑے بنی اِسرائیل دی رہنمائی کرن چ مدد کر رہے سن یعنی کہ اوہ سردار جنہاں نُوں ہزار ہزار، سو سو، پنجاہ پنجاہ تے دس دس لوکاں اُتے مقرر کیتا گیا سی۔ (‏اِستثنا 1:‏15‏)‏ ایہدا مطلب اے کہ یہوواہ دے بندیاں دی چنگی طرحاں دیکھ بھال ہو رہی سی۔ ایہو جہی مثال سانوں ایلیاہ دے دَور چ وی مِلدی اے۔ اوہ وی کئی سالاں توں یہوواہ دی عبادت کرن چ بنی‌اِسرائیل دی رہنمائی کر رہیا سی۔ پر اِک وقت آیا جدوں یہوواہ نے اوہنوں یہوداہ دے ملک چ پونچا دِتا تاکہ اوہ اوتھے خدمت کرے۔ (‏2-‏سلاطین 2:‏1؛‏ 2-‏تواریخ 21:‏12‏)‏ تے کیہہ اِسرائیل دے ملک چ رہن والے یہوواہ دے بندیاں دی رہنمائی کرن لئی کوئی نئیں سی؟ ایہہ گل نئیں اے کیونکہ ایلیاہ کئی سالاں توں اِلیشع نُوں تربیت دے رہیا سی۔ ایہدے علاوہ نبیاں دے پُتر وی ہے سن جنہاں نُوں خاص تربیت ملی سی۔ (‏2-‏سلاطین 2:‏7‏)‏ ایس لئی خدا دے بوہت سارے وفادار بندے موجود سن جیہڑے اوہدے لوکاں دی رہنمائی کر سکدے سن۔ اِنج یہوواہ اپنے مقصد نُوں پورا کر رہیا سی تے اپنے وفادار بندیاں دی دیکھ بھال وی کر رہیا سی۔‏

13.‏ عبرانیوں 13:‏5 توں سانوں کیہڑی گل دا یقین ہو جاندا اے؟ (‏تصویر نُوں وی ویکھو۔)‏

¹³ ایہناں مثالاں تے غور کرن توں بعد تُسی کیہہ سوچدے او کہ جدوں پاک روح نال مسح ہوئے مسیحی اسمان تے چلے جان گے تے اوہدوں کیہہ ہوئے گا؟ سانوں ایہدے جواب لئی کوئی اندازہ لان دی لوڑ نئیں اے۔ کیونکہ بائبل چ سانوں یقین دَوایا گیا اے کہ یہوواہ زمین تے رہن والے اپنے بندیاں نُوں کدی نئیں چھڈے گا۔ (‏عبرانیوں 13:‏5 نُوں پڑھو۔)‏ موسیٰ تے ایلیاہ وانگوں پاک روح نال مسح ہوئے مسیحی وی جان دے نیں کہ دُوجیاں نُوں تربیت دینا کِنّاں اہم اے۔ کئی سالاں توں گورننگ باڈی دے ممبر ہور وی بھیڈاں چ شامل بھراواں نُوں تربیت دے رہے نیں تاکہ اوہ یہوواہ دے بندیاں دی رہنمائی کر سکن۔ مثال لئی، اوہناں نے بزرگاں، حلقے دے نگہباناں، برانچ کمیٹی دے ممبراں، بیت ایل چ فرق فرق شعبیاں دی نگہبانی کرن والے بھراواں تے ہور کئی بھراواں نُوں تربیت دین لئی سکولاں دا بندوبست کیتا اے۔ ایہدے نال نال گورننگ باڈی دے ممبر آپ اوہناں بھراواں نُوں تربیت دے رہے نیں جیہڑے گورننگ باڈی دِیاں کمیٹیاں دے مدد گاراں دے طور تے کم کر رہے نیں۔ ایہہ مددگار بھرا بوہت ساریاں ذمے‌داریاں نبھا رہے نیں تے مسیح دِیاں بھیڈاں دی دیکھ‌بھال کرن لئی بالکل تیار نیں۔‏

14.‏ ایس مضمون چ اَسی کیہہ سکھیا اے؟‏

¹⁴ ایس مضمون چ اَسی ہُن تک ایہہ سکھیا اے:‏ وڈی مصیبت دے ختم ہون توں پہلاں جدوں پاک روح نال مسح ہوئے مسیحیاں نُوں اسمان تے چُک لیا جائے گا، اوہدوں زمین تے رہن والے یہوواہ دے بندے یسوع دی رہنمائی چ یہوواہ دی عبادت کردے رہن گے۔ ایہہ گل سچ اے کہ اوس ویلے ماجوج دا جوج یعنی غصے نال بھریاں ہوئیاں قوماں دا گروہ اوہناں تے حملہ کرے گا۔ (‏حِزقی‌ایل 38:‏18-‏20‏)‏ پر ایہہ حملہ ناکام ہو جائے گا تے قوماں دا ایہہ گروہ یہوواہ دے بندیاں نُوں اوہدی عبادت کرن توں نئیں روک سکے گا۔ یہوواہ اپنے بندیاں نُوں بچا لوے گا۔ یوحنا رسول نے اِک رویا چ مسیح دِیاں ہور وی بھیڈاں دی اِک وڈی بِھیڑ نُوں ویکھیا سی جدے بارے اوہنوں دَسیا گیا سی کہ ایہہ ”‏وڈی مصیبت“‏چوں نکل آئی اے۔ (‏مُکاشفہ 7:‏9،‏ 14‏)‏ ایس لئی اَسی پورے یقین نال کہہ سکنے آں کہ یہوواہ اپنے بندیاں نُوں محفوظ رکھے گا۔‏

15، 16.‏ مکاشفہ 17:‏14 دے مطابق پاک روح نال مسح ہوئے مسیحی ہرمجدون دی جنگ دے دوران کیہہ کرن گے تے ایہہ جان کے سانوں حوصلہ کیوں مِلدا اے؟‏

¹⁵ ہو سکدا اے کہ کجھ بھین بھرا سوچن کہ ”‏پاک روح نال مسح ہوئے  مسیحی اسمان تے جا کے کیہہ کرن گے؟“‏پاک کلام چ ایہدا صاف صاف جواب دِتا گیا اے۔ ایہدے چ دَسیا گیا اے کہ ایس دُنیا دِیاں حکومتاں میمنے نال جنگ کرن گیاں پر اوہ ہار جان گیاں۔ بائبل چ اَسی پڑھنے آں:‏ میمنا اوہناں تے جت حاصل کرے گا۔ ایس جنگ چ میمنے دی مدد کون کرے گا؟ ایت چ دَسیا گیا اے:‏ میمنے دے ساتھی اوہدی مدد کرن گے جنہاں نُوں بلا‌یا گیا اے، چُنیا گیا اے تے جیہڑے وفادار نیں۔ ‏(‏مُکاشفہ 17:‏14 نُوں پڑھو۔)‏ ایہہ کون لوک نیں؟ ایہہ پاک روح نال مسح ہوئے اوہ مسیحی نیں جیہڑے اسمان تے چلے گئے ہون گے۔ ایہدا مطلب اے کہ جدوں پاک روح نال مسح ہوئے سارے مسیحی اسمان تے چلے جان گے تے اوہناں دا اِک کم جنگ لڑنا ہوئے گا۔ ایہہ کِنّی خاص ذمے‌داری اے۔ پاک روح نال مسح ہوئے کجھ مسیحی یہوواہ دے گواہ بنن توں پہلاں مارکٹائی کردے سن۔ اوہناں وچوں کجھ تے فوج چ وی سن۔ پر بعد چوں اوہ یہوواہ دی راہ تے چلن لگ پئے تے صلح‌پسند بن گئے۔ (‏گلتیوں 5:‏22؛‏ 2-‏تھسلُنیکیوں 3:‏16‏)‏ اوہناں نے ہر قسم دے لڑائی جھگڑے نُوں چھڈ دِتا۔ پر اسمان تے جان توں بعد اوہ یسوع تے اوہدے فرشتیاں نال مِل کے خدا دے دُشمناں دے خلاف آخری جنگ لڑن گے۔‏

¹⁶ ذرا سوچو کہ پاک روح نال مسح ہوئے جیہڑے مسیحی زمین تے نیں، اوہ کافی وڈیرے ہو چُکے نیں یاں بڑے ای کمزور نیں۔ پر جدوں اوہ اسمان تے ہمیشاں لئی زندہ کیتے جان گے تے اوتھے اوہ طاقت‌ور فرشتیاں وانگوں ہون گے تے اپنے بادشاہ یسوع مسیح نال مِل کے ہر مجدون دی جنگ لڑن گے۔ ایس جنگ توں بعد اوہ یسوع نال مِل کے انساناں دی رہنمائی کرن گے تاکہ اوہ بے‌عیب بن سکن۔ اوتھوں اوہ زمین تے موجود اپنے پیارے بھین بھراواں دی اوس توں کِتے زیادہ مدد کر سکن گے جِنّی اوہ زمین تے کر سکدے نیں۔‏

17.‏ سانوں کیویں پتہ اے کہ ہرمجدون دی جنگ دے دوران خدا دے سارے بندے محفوظ رہن گے؟‏

¹⁷ کیہہ تُسی مسیح دِیاں ہور وی بھیڈاں وچ شامل او؟ جے ہاں تے توانوں اوس ویلے کیہہ کرن دی لوڑ ہوئے گی جدوں ہرمجدون دی جنگ شروع ہوئے گی۔ توانوں بس یہوواہ تے بھروسا کرنا ہوئے گا تے اوہدیاں ہدیتاں نُوں مننا پووے گا۔ ایہدے چ کیہہ کجھ شامل ہو سکدا اے؟ بائبل چ ایہدے بارے دَسیا گیا اے:‏ جاؤ اپنیاں کوٹھڑیاں وچ وڑھ جاؤ تے اپنے بوہے بند کر لوو۔ اپنے آپ نُوں تھوڑے چِر لئی لُکا لوو جدوں تک غضب ٹل نئیں جاندا۔ (‏یسعیاہ 26:‏20‏)‏ یہوواہ دے جِنّے وی بندے اوس ویلے اسمان یاں زمین تے ہون گے، اوہ محفوظ رہن گے۔ پولُس رسول وانگوں سانوں وی ایس گل دا یقین اے:‏ نہ حکومتاں، نہ موجودہ شیواں، نہ آن والیاں شیواں سانوں خدا دی محبت توں جدا کر سکدیاں نیں۔ (‏رومیوں 8:‏38، 39‏)‏ ہمیشاں یاد رکھو کہ یہوواہ توانوں بڑا پیار کردا اے تے اوہ توانوں کدی وی نئیں چھڈے گا۔‏