1. Kal tempu ku tudu unjidus na sta na seu?

 MANGA di anus atras povu di Jeova ta punta: ‘Kal tempu ku ultimu kriston unjidu na lebadu pa seu?’ No ta pensaba di kuma alguns kristons unjidus pudi kontinua vivi na paraísu na Tera algun tempu dipus di gera di Armajedon. Ma na Sintinela di 15 di Juliu di 2013 no aprindi di kuma tudu kristons unjidu ku sta inda na Tera, na lebadu pa seu antis di gera di Armajedon kumsa. — Mat 24:31.

2. Kal purgunta ku no pudi fasi, i ke ku no na bin fala del nes studu?

² Ma no pudi punta: Ke ku na kontisi ku “utru karnel” di Kristu ku na sirbi Jeova ku fidelidadi na Tera duranti “garandi foronta”? (Jon 10:16; Mat 24:21) Alguns pudi pensa di kuma e na bandonadu, ora ku se kiridus ermons ku irmas unjidus lebadu pa seu. No na jubi dus storias di Biblia ku pudi leba elis pensa des manera. Dipus no na fala di motivus ku pui no ka pirsisa di preokupa.

KE KU KA NA KONTISI?

3-4. Kal purgunta ku alguns pudi fasi, i pabia di ke?

³ Alguns pudi punta si utrus karnelis na kontinua sirbi Jeova ora ki ka ten mas ermons unjidu di Korpu Guvernanti pa gia elis. Talves e ta tene es tipu di medu pabia di alguns storias di Biblia. No jubi dus isemplus. Purmeru i di Ŝef di Saserdoti Jeoiada. I seduba un servu fiel di Deus. El ku si minjer Jeoseba, e proteẑi un joven comadu Joás e judal pa i sedu un bon rei i fiel.  Jeoiada bejuba, ma nkuantu i staba di vida, Joás ta adoraba Jeova i fasi bon kusas. Ma dipus ku Jeoiada muri, Joás kumsa logu ku fasi mau kusas. I sukuta ŝefis mau i para sirbi Jeova. — 2 Kron 24:​2, 15-19.

⁴ Utru isemplu i di kristons ku vivi dipus ku apostolus muri. Ultimu apostolu ku muri seduba Jon. Nkuantu i staba di vida i juda manga di kristons kontinua sedu fiel pa Jeova. (3 Jon 4) Juntu ku utrus apostolus fiel, Jon luta kontra apostasia ku staba na spalia. (1 Jon 2:18; jubi notas di studu na 2 Tes 2:7.) Ma dipus ku Jon muri, apostasia spalia suma fugu. Dentru di puku tempu, es apostatas staba na nsina manga di ideias falsu i pirmiti mau komportamentu na tudu kongregasons.

5. Ke ku no ka dibi di pensa nel na basi des dus storia di Biblia?

⁵ Sera ki es dus storia di Biblia ta mostra di kuma, mesmu kusa na kontisi ku utrus karnelis di Kristu ora ku unjidus lebadu pa seu? Na ki tempu, sera ki kristons fiel na Tera na kumsa ku fasi mau kusas suma Joás, o sedu apostatas suma manga di kristons dipus ku apostolus muri? Resposta i nau! No pudi tene sertesa di kuma, ora ku unjidus lebadu pa seu, utrus karnelis na kontinua kuidadu ben del i sta ben na sintidu spiritual. Pabia ku no pudi tene es sertesa?

ADORASON PURU KA NA DANADU

6. Kal diferenti tempus ku no na bin fala un bokadu del?

⁶ Pabia ku no pudi tene konfiansa di kuma adorason puru ka na danadu, mesmu na tempu difisil ku na bin? Pabia di ke ku no aprindi na Biblia aserka di tempu ku no sta na vivi. Es tempu ku no sta na vivi diferenti ciu ku tempu di antigu Israel i ku tempu dipus ku apostolus muri. Pa kila, no jubi diritu es tris tempus: (1) tempu di antigu Israel, (2) tempu dipus ku apostolus muri, ku (3) no tempu, ‘tempu ku Deus na arnoba tudu kusa’. — At 3:21.

7. Na antigu Israel, pabia ku jintis fiel ka fika disanimadu oca nason ku si reis disidi fasi ke ki mau?

⁷ Tempu di antigu Israel. Puku antis di Moisés muri i fala israelitas: “N sibi kuma, dipus di ña mortu, kurupson na toma konta di bo vida. Bo na disvia di kamiñu ku N manda bos pa bo yanda nel.” (Lei 31:29) Tambi Moisés avisa israelitas di kuma se rebela e na lebadu pa un tera ke ka kunsi. (Lei 28:​35, 36) Sera ki es palabras bin kumpri? Sin. Manga di anus dipus, manga di reis disidi fasi ke ki mau, e pui pa povu di Deus disvia di adorason di bardadi. Pabia des, Jeova kastiga si povu ku sedu mau i ka disa pa reis di Israel kontinua manda. (Eze 21:​25-27) Ma oca israelitas fiel oja palabra di Deus kumpri, e ngaña koraẑen. — Isa 55:​10, 11.

8. Sera ki no dibi di fika surprendidu manera ku ideias falsu ku mau komportamentu toma konta di kongregason dipus ku apostolus muri? Bu pudi splika.

⁸ Tempu dipus ku apostolus muri. Sera ki no dibi di fika surprendidu manera ku ideias falsu ku mau komportamentu toma konta di kongregason dipus ku apostolus muri? Nau. Jesus kontaba ja di kuma i na bin ten un apostasia garandi. (Mat 7:​21-23; 13:​24-30, 36-43)  Apostolu Paulu, Pedru ku Jon konfirmaba di kuma profesia di Jesus kumsaba ja ku kumpri na se tempu. (2 Tes 2:​3, 7; 2 Ped 2:1; 1 Jon 2:18) Dipus ku apostolus muri, ideias falsu ku mau komportamentu kumsa ku toma konta di kongregasons. I kumsa ku ojadu kristons apostata, e pasa fasi parti prinsipal di Garandi Babilonia, ku sedu tudu grupu di riliẑions falsu. Ke ku Jesus fala staba na kumpri.

9. Kuma ku tempu ku no sta na vivi diferenti di tempu di antigu Israel ku tempu dipus ku apostolus muri?

⁹ ‘Tempu ku Deus na arnoba tudu kusa.’ No tempu diferenti di tempu na antigu Israel ku tempu di apostasia garandi ku ojadu dipus ku apostolus muri. Kuma ku no tempu comadu? No kustuma coma tempu ku no sta na vivi nel di “fin de tempu” des mundu mau. (2 Tim 3:1) Ma Biblia mostra di kuma un tempu mas garandi i mas kumpridu kumsa na mesmu tempu. I na kontinua te ora ku Renu Mesianiku leba pekaduris pa perfeison i torna Tera na un Paraísu. Es tempu comadu di ‘tempu ku Deus na arnoba tudu kusa.’ (At 3:21) Es tempu kumsa na 1914. Ke ku arnobadu? Jesus mposadu suma Rei na seu. Mas un bias, Jeova tene un rei ku na represental, un yerderu di rei Davi ku sedu fiel. Ma es renansa i ka uniku kusa ku Jeova arnoba. Puku tempu dipus ku Jesus kumsa rena, adorason puru kumsa ku arnobadu! (Isa 2:​2-4; Eze 11:​17-20) Sera ki ideias falsu ku mau komportamentu na ojadu mas?

10. (a) Ke ku Biblia falaba ja aserka di adorason puru na no tempu? (Isaias 54:17) (b) Ke ku manda es profesias ta nkoraẑanu?

¹⁰ Lei Isaias 54:17. Pensa nes profesia: “Tudu material di gera ku purparadu kontra bo ka na fasiu nada”! (Anos ku pui letras karegadu ku italiku.) Es palabras nspiradu sta na kumpri aos. Tambi es palabras nkoraẑanti sta na kumpri na no tempu: “SIÑOR na nsina tudu bu fijus; e na tene pas ciu. Bu na firmantadu ku justisa, . . . bu na fika libri di kilis ku ta kalkau ku kilis ku ta pantau, pabia e ka na pertu bo”. (Isa 54:​13, 14) Te mesmu “Deus de mundu” ku sedu Satanas, ka pudi para tarbaju ku povu di Jeova sta na fasi pa nsina jintis aserka del. (2 Kor 4:4) Adorason  puru arnobadu, i nunka ideias falsu ku mau komportamentu ka na toma konta del. I na fika pa sempri. Tudu materialis di gera ku purparadu kontra nos ka na fasinu nada!

KE KU NA BIN KONTISI?

11. Ke ku konvensinu di kuma garandi multidon ka na bandonadu ora ku unjidus bai pa seu?

¹¹ Ke ku na kontisi ora ku unjidus lebadu pa seu? Lembra Jesus i no Pastor. El i kabesa di kongregason kriston. Jesus fala sin di manera klaru: “Un son ki bo ŝef, ku sedu Kristu.” (Mat 23:10) No Rei ku sta na rena ka na disa nunka di fasi si tarbaju. Suma Kristu ku sta na gianu, si sigiduris ku sta na vivi na Tera ka na medi nada. Na bardadi, no ka sibi tudu kuma ku Kristu na gia si povu na ki tempu. Pa kila, no jubi alguns isemplu di Biblia ku pudi danu es garantia.

12. Kuma ku Jeova kuida di si povu (a) dipus ku Moisés muri? (b) dipus ku Elias risibi utru disignason? (Jubi tambi diseñu.)

¹² Antis di Israel yentra na Tera di Purmesa, Moisés muri. Ke ku kontisi ku povu di Deus? Sera ki Jeova para juda si povu, dipus ku es omi fiel muri? Nau. Nkuantu e seduba fiel, Jeova kontinua kuida delis. Antis di Moisés muri, Jeova falal pa i pui Josué suma lider di povu. Moisés trena Josué pa manga di anus. (Sai 33:11; Lei 34:9) Tambi i tenba manga di utrus omis ku tene kapasidadi di toma lideransa, e seduba ŝefis di mil, di sen, di sinkuenta te mesmu di des. (Lei 1:15) Povu di Deus kuidaduba ben del. No oja mesmu kusa ku isemplu di Elias. I tarbaja risu pa manga di anus pa juda israelitas adora Jeova. Ma mas tardi, Jeova transferil pa i sirbi na sul di Judá. (2 Re 2:1; 2 Kron 21:12) Sera ki povu fiel ku sta na renu di des jorson di Israel bandonadu? Nau. Elias trenaba Eliseu pa manga di anus. Tambi i tenba un “grupu di anunsiaduris” ku risibiba trenamentu. (2 Re 2:7) Asin, manga di omis fiel staba dispunivel, pa juda na gia povu di Deus. Jeova kontinua na kumpri ke ki misti i kuida di si adoraduris fiel.

13. Kal garantia ku no pudi oja na Ebreus 13:5b? (Jubi tambi fotos.)

¹³ Ku es isemplus, ke ku bu pensa i na bin kontisi ora ku ultimu unjidu lebadu  pa seu? No ka pirsisa di sta preokupadu. Biblia kontanu un bardadi simplis i nkoraẑanti: Jeova ka na bandona nunka si povu na Tera. (Lei Ebreus 13:5b.) Suma Moisés ku Elias, un grupusiñu di kristons unjidus ku sta na toma lideransa aos, ntindi importansia di trena utrus. Pa manga di anus, ermons di Korpu Guvernanti sta na trena omis ku fasi parti di utrus karnel pa toma lideransa. Pur isemplu e kria manga di skolas pa trena ansions, superintendentis viaẑanti, membrus di Kumison di Filial, superintendentis na Betel, misionarius ku utrus. Korpu Guvernanti ta trena diretamenti ajudantis di diferentis kumison di Korpu Guvernanti. Es ajudantis sta na kuida ku fidelidadi di manga di responsabilidadis dentru di organizason. E sta ben purparadu pa kontinua kuida di karnelis di Kristu.

14. Kal ki pontu prinsipal di ke ku no fala del?

¹⁴ Pontu prinsipal di ke ku no fala del i es: Ora ku ultimu unjidu lebadu pa seu, pertu di fin di garandi tribulason, adorason puru na kontinua li na Tera. Ku liderensa di Jesus Kristu, povu di Jeova na kontinua adora Jeova ku fidelidadi. No sibi di kuma na ki tempu, un grupu di nasons ku Biblia coma di Gogi di Magogi na ataka povu di Deus. (Eze 38:​18-20) Ma es ataki rapidu ka na tene bon rusultadu, i ka na pui pa povu di Deus para adora Jeova. Sin duvida, Jeova na salba si povu! Na un vison, Apostolu Jon oja “garandi multidon” di utrus karnelis di Kristu. Jon faladu di kuma es “garandi multidon” sai di “garandi pirsigison.” (Apok 7:​9, 14) Pa kila, no tene sertesa di kuma Jeova na salba elis!

15-16. Di akordu ku Apokalipsi 17:​14, ke ku kristons unjidu na fasi na gera di Armajedon, i pabia ki nkoraẑanti?

¹⁵ Ma alguns pudi punta: ‘Ke ku na kontisi ku unjidus? Ke ke na fasi dipus ke bai pa seu?’ Biblia ruspundi  es purguntas di manera klaru. I mostra di kuma guvernus des mundu na “geria kontra Karnel.” Sin duvida, e na pirdi gera. Biblia fala sin: “Karnel na ngaña elis”. Ba kin ku na judal? Versikulu ruspundi. Kilis ki “coma,” ki “kuji,” i ku “sedu fiel”. (Lei Apokalipsi 17:14.) I ba kin? I unjidus ku lantandadu! Pa kila, ora ku ultimu unjidu ku sta na Tera bai pa seu, pertu di fin di garandi tribulason, un di se purmeru disignason na sedu gera. Es i un disignason garandi! Alguns kristons unjidu ta geriaba ku utrus antis de sedu Tustumuñas di Jeova. Te mesmu alguns seduba tropas. Ma dipus e bin torna kristons di bardadi, e aprindi vivi na pas. (Gal 5:22; 2 Tes 3:16) E para apoia geras. Ma dipus ke bai pa seu, e na geria juntu ku Kristu ku si anjus santu na ultimu gera kontra inimigus di Deus.

¹⁶ Pensa nes! Na Tera, alguns kristons unjidu beju, te mesmu e tene saudi fraku. Ma ora ke lantandadu pa vivi na seu, e na sedu kriaturas spiritual ku ka ta muri ku tene puder, e na geria juntu ku se Rei gereru ku sedu Jesus Kristu. Dipus di gera di Armajedon e na tarbaja juntu ku Jesus pa juda pekaduris sedu perfeitu. Sin duvida, ora ke sta na seu e na mas pudi juda se ermons ku irmas ke ama ku sta na Tera, di ki oca ke seduba simplis jintis imperfeitu!

17. Kuma ku no sibi di kuma tudu servus di Deus na bin sta suguru na gera di Armajedon?

¹⁷ Sera ki bu fasi parti di utrus karnelis? Si sedu asin, ke ku bu pirsisa di fasi ora ku gera garandi di Armajedon kumsa? I so es: Konfia na Jeova i sigi si orientason. Ke ku es pudi nklui? Biblia nkoraẑanu ku es palabras: “Bo yentra na bo kuartus, bo fica porta, bo sukundi un bokadu tok raiba di Deus pasa.” (Isa 26:20) Tudu servus fiel di Deus na seu i na Tera na sta suguru na ki tempu. Suma apostolu Paulu no tene sertesa di kuma nin “otridadi, nin puder di dimoniu, nin e tempu li, nin tempu futuru, . . . ka na pudi rapatinu di amor di Deus.” (Anos ku pui letras karegadu ku italiku, Rom 8:​38, 39) Lembra sempri des: Jeova amau i nunka i ka na bandonau!