1. ¿Maykʼajtaj tukuynin ajllasqa cristianos cielopiña kanqanku?

 UNAYQA yachayta munaj kanchej maykʼajchus último kaj ajllasqa cristianos cieloman apasqa kanankuta. Uj tiempoqa yuyaj kanchej ichapis wakin ajllasqa cristianosqa Armagedonta kausashaj pasanankuta, paraisopitaj uj tiempotawanraj kanankuta. Jinapis Torremanta Qhawaj 15 de julio de 2013 watamanta revistapi, yachakorqanchej kay jallpʼapiraj kaj tukuynin ajllasqa cristianosqa, niraj Armagedón qallarishajtin cieloman apasqa kanankuta (Mat. 24:31).

2. ¿Imatataj ichá tapukusunman, chanta imastataj kay yachaqanapi qhawarisun?

² Jinapis ichá kayta tapukushanchej: “¿Imataj kanqa Cristoj ‘waj ovejasninwan’ ‘manchay ñakʼariy’ tiempopi, pikunachus kay jallpʼapi Jehovata sirvishanqanku chaykunawan?”, nispa (Juan 10:16; Mat. 24:21). Ichapis wakin hermanosqa yuyankuman ni imata ruwayta atinankuta, saqerparisqastaj kanankuta ajllasqa cristianos manaña kay jallpʼapichu kajtinku. ¿Imajtintaj ajinata yuyankuman? Iskay imasraykusina ajinata yuyasqankuta qhawarisun, imasraykuchus mana chaymanta llakikunachu kasqantapis.

¿IMATAJ MANA PASANQACHU?

3, 4. ¿Imatataj wakin ichapis yuyankuman, chanta imaraykutaj?

³ Wakenqa ichapis yuyankuman, Diospa Llajtanta Kamachejkuna manaña kay jallpʼapichu kajtinku, waj ovejasmanta kajkunaqa Jehovamanta karunchakunankuta. ¿Imaraykú chayta yuyankuman? Ichapis iskay imasrayku: Ñaupajtaqa kuraj kaj sacerdote Jehoiadamanta parlarina. Payqa Diospa sumaj kamachin karqa, warmin Jehosabeatwantaj Jehoás sutiyoj wawitata uywakorqanku, yanaparqankutaj Diosta kasukoj sumaj reyman tukunanpaj. Jehoiadá kausakushajtin Jehoasqa mana Jehovamanta  karunchakorqachu. Jehoiadá wañupojtintaj Jehoasqa sajra imasta ruwayta qallarerqa. Payqa sajra kuraj kamachejkunaj yuyaychasqankuta uyarerqa, Jehovamantataj karunchakaporqa (2 Cró. 24:2, 15-19).

⁴ Wakenqa ichapis ajinata yuyallankumantaj, apóstoles wañupusqankumanta qhepaman imachus cristianoswan kasqanrayku. Tukuynin apostolesmanta aswan qhepataqa Juan wañuporqa. Paytaj ashkha cristianosta mayta yanapasqa Jehovamanta mana karunchakunankupaj (3 Juan 4). Jesuspa tukuynin apostolesnin jinallataj, apóstol Juanpis tukuy atisqanta kallpachakorqa congregacionesta pantasqata yuyajkunamanta, llulla yachachiykunamantawan jarkʼananpaj (1 Juan 2:18; 2 Tes. 2:7). Jinapis Juan wañupusqantawan, ashkhasqa Diospa contranta oqharikorqanku, pisi tiemponmantaj tukuy congregacionesman llulla yachachiykunasninkuwan juntʼaykucherqanku.

5. ¿Imatataj mana yuyananchejchu kanman?

⁵ ¿Cristoj waj ovejasninwanpis kikillantajchu kanqa tukuynin ajllasqa cristianosña cieloman apasqa kajtinku? ¿Jehoás jinachu ruwanqanku, Jehovamantataj karunchakonqanku? Apóstoles wañupusqankumanta qhepaman may chhika cristianos Diospa contranpi oqharikorqanku, ¿ajinallatatajchu oqharikonqanku? Mana ajinachu kanqa. Kaymanta mana iskayrayanchejchu: Ajllasqa cristianos manaña kay jallpʼapichu kajtinkupis, waj ovejasmanta kajkunaqa Jehovata sirvillanqankupuni, Jehovataj paykunata cuidallanqapuni. ¿Imajtintaj chayta ninchej?

JEHOVALLATA YUPAYCHAYQA MANA CHʼICHICHASQACHU KANQA

6. ¿Ima kinsa tiempostataj qhawarisun?

⁶ Tumpamantawan llakiy tiempos kanqa, chay tiempopitaj Jehovallata yupaychayqa mana chʼichichasqachu kanqa, chaymantataj mana iskayrayanchejchu. Bibliaqa yachachiwanchej kay tiempoqa, mana israelitaspa tiemponku jinachu, nitaj apóstoles wañupusqankumanta qhepaman karqa chay tiempo jinachu kasqanta. Chayrayku parlarina chay kinsa tiemposmanta: 1) ñaupa Israel tiempomanta, 2) apóstoles wañupusqankutawan karqa chay tiempomanta, 3) ‘tukuy imata Dios allinchanan tiempomantawan’, nisunman kay tiemponchejmanta (Hech. 3:21).

7. ¿Imataj kasukoj israelitasta mayta kallpacharqa?

⁷ Ñaupa Israel tiempo. Moisesqa niraj wañupushaspa israelitasman nerqa: “Noqaqa allinta yachani wañupojteyqa millay imasta ruwanaykichejta, may ñantachus purinaykichejta kamacherqaykichej chaymantapis karunchakunaykichejta”, nispa (Deu. 31:29). Chantapis nerqa Jehovaj contranpi oqharikojtinkoqa waj nacionman apasqa kanankuta (Deu. 28:35, 36). Moisespa nisqan, ¿juntʼakorqachu? Arí. May chhika watasta ashkha reyesqa Jehovata mana kasukorqankuchu, israelitaspis chay reyes jinallataj ruwarqanku. Chayrayku Jehovaqa chay mana kasukoj israelitasta castigarqa, niñataj saqerqachu paykuna ukhumanta reyes kananta (Eze. 21:25-27). Jinapis Jehovata kasukoj israelitastaqa, chay nisqasnin juntʼakusqanta rikuy mayta kallpacharqa (Isa. 55:10, 11).

8. ¿Imaraykutaj mana tʼukunchejchu ñaupa cristianos mana allin imasta ruwasqankumanta?

⁸ Apóstoles wañupusqankutawan karqa chay tiempo. Apóstoles wañupusqankumanta qhepaman, cristiasnosqa mana allin imasta ruwayta qallarerqanku. Chaymantataj mana tʼukunchejchu, imaraykuchus Jesusqa nerqaña ashkhas Diospa contranpi oqharikunankuta (Mat. 7:21-23; 13:24-30, 36-43). Ñaupa cristianospa tiemponkupi, apóstol Pablopis, Pedropis, Juanpis nerqanku Jesús nisqanman jina Diospa contranpi oqharikojkuna rikhurisqankutaña (2 Tes. 2:3, 7; 2 Ped. 2:1; 1 Juan 2:18).  Qhepa kaj apóstol wañupusqanmanta pisi tiemponmantaj, Diospa contranpi oqharikoj cristianosqa Jatun Babiloniaman satʼikorqanku, nisunman llulla religionesman. Ajinamanta watejmanta juntʼakorqa Jesuspa nisqan.

9. ¿Imaraykutaj kay tiemponchej mana ñaupa Israel tiempo jinachu, nitaj apóstoles wañupusqankumanta qhepaman karqa chay tiempo jinachu?

⁹ ‘Tukuy imata Dios allinchanan tiempo’. Kay tiemponchejqa mana ñaupa Israel tiempo jinachu, nitaj apóstoles wañupusqankumanta qhepaman karqa chay tiempo jinachu, maypachachus ashkha cristianos Jehovaj contranpi oqharikorqanku. ¿Ima tiempopitaj noqanchej kausakushanchej? Kay sajra mundoj ‘qhepa pʼunchaykunasninpi’ (2 Tim. 3:1). Jinapis Bibliaqa yachachiwanchej qhepa pʼunchaykuna qallarishajtin, waj tiempopis qallarillasqantataj. Chay tiempotaj aswan unay kanqa, aswan importantetaj. Chay tiempotaqa sutichakun “tukuy imata Dios allinchanan” tiempo (Hech. 3:21). Chayqa qallarerqa 1914 watapi, tukukonqataj tukuy runas manaña pantaj runaschu kajtinku, kay jallpʼataj Mesías kamachishajtin uj paraisoman tukojtin. ¿Imastataj Jehová allincharqa 1914 watapi? Jesús cielopi kamachiyta qallarerqa. Ajinamanta Jehovaqa uj Reyta watejmanta churarqa paypa sutinpi kamachinanpaj. Chaytaj karqa Davidpa mirayninmanta jamoj Rey. Pero mana chayllachu, pisi tiemponman Jehovaqa kamachisninta yanaparqa watejmanta payllata munasqanman jina yupaychanankupaj (Isa. 2:2-4; Eze. 11:17-20). Pero Jehovata yupaychasqanku, ¿watejmanta chʼichichasqachu kanqa?

10. 1) ¿Imatá Biblia nin Jehovallata kay tiempopi yupaychaymanta? (Isaías 54:17). 2) ¿Imajtintaj Isaías imatachus ñaupajmantaña nisqan mayta kallpachawanchej?

¹⁰ (Isaías 54:17 leey). Qhawarina imatachus kay profecía nisqanta: “Contraykipi ima armata ruwasqankupis qhasilla kanqa”. Kay versiculoj nisqanqa kay tiempopi juntʼakushan, kay palabraspis juntʼakushallantaj: “Tukuynin wawasniykita Jehová Dios yachachipusonqa, wawasniykeqa allintapuni kausakonqanku. Justiciapi sumaj sayachisqa kanki […], ni imapis manchachisonqachu, ni imamanta manchachikunayki kanqachu, manchachikoyqa mana qayllamusonqachu” (Isa. 54:13, 14). Jehovaj llajtan runasman yachachisqantaqa, ni ‘kay mundoj diosnin’ Satanaspis sayachiyta atenqachu (2 Cor. 4:4). Jehovallata yupaychayqa watejmanta sayarichisqaña, niñataj ujtawan chʼichichasqachu kanqa, contranchejpi ima armata ruwasqankupis qhasilla kanqa.

 ¿IMATAJ PASANQAPUNI?

11. Ajllasqa cristianos manaña kay jallpʼapichu kajtinku, ¿imaraykutaj nisunman may chhika runasmanta kajkuna mana saqerparisqachu kanankuta?

¹¹ Ajllasqa cristianos cieloman apasqa kajtinku, ¿imataj pasanqapuni? Yachanchej jina, Jesusqa Michejninchej, congregacionpa umantaj. Uj kutipi payllataj nerqa: “Kamachejniykichejqa ujlla, Cristolla”, nispa (Mat. 23:10). Reyninchej Jesucristoqa ni jaykʼaj saqerpariwasunchu, cuidawasunpuni. Jesús Kamachejninchej kasqanrayku, kay jallpʼapi kaj cristianosqa ni imata manchachikunanchejchu kanqa. Mana sutʼita yachanchejchu imatapunichus Cristo chay kutipi Jehovaj llajtanrayku ruwananta. Chaywanpis Biblia rikuchiwanchej imaraykuchus mana manchachikunanchejchu kasqanta. Chayta qhawarina.

12. 1) ¿Imaynatá Jehová llajtanta cuidarqa Moisés wañupusqantawan? 2) ¿Imaynatá Jehová llajtanta cuidarqa Elías waj ladoman sirvej ripusqantawan? (Dibujotawan qhawariy).

¹² Moisesqa wañuporqa niraj israelitas Sumaj Jallpʼaman yaykushajtinku. Chanta, ¿imataj karqa Diospa llajtanwan? Moisés wañupusqanrayku, ¿sapallankuchu, saqerqarisqastajchu qhepakorqanku? Mana. Jehovaqa paymanta mana karunchakushajtinku paykunawanpuni kasharqa. Moisés niraj wañupushajtin, Jehovaqa nerqa israelitastaqa Josueñataj kamachinanta. Chay kutikamataj Moisesqa ashkha watastaña Josueta wakichishasqa (Éxo. 33:11; Deu. 34:9). Pero waj sumaj kamachejkunapis kallarqankutaj: 1.000 runasta kamachejkuna, 100 runasta kamachejkuna, 50 runasta kamachejkuna, chunka runasta kamachejkunapis (Deu. 1:15). Ajinamanta Jehovaj llajtanqa sumaj cuidasqa karqa. Kunanqa Eliasmantañataj parlarina. Payqa ashkha watasta israelitasta yanaparqa Jehovata yupaychanankupaj. Jinapis uj pacha Jehovaqa payta kacharqa Judaman, sur ladoman (2 Rey. 2:1; 2 Cró. 21:12). Israelmanta chunka ayllusrí, ¿saqerparisqachu karqanku? Mana. Eliasqa ashkha watastaña Eliseota wakichishasqa. ‘Profetaspa wawasninkupis’ yanapanankupaj chayllapitaj karqanku, paykunataqa sumajta yachachisqanku, wakichisqankutaj (2 Rey. 2:7). Reparanchej jina, Diospa llajtanta ñaupajman apanankupajqa sumaj wakichisqa runas karqankupuni. Ajinamanta Jehovaqa munayninta juntʼallarqapuni, kamachisnintapis cuidallarqapuni.

13. ¿Imatataj sutʼita niwanchej Hebreos 13:5 versiculoj tukukuynin? (Fotostawan qhawariy).

¹³ Moisespi, Eliaspi piensarispa, tukuynin ajllasqa cristianosña cieloman apasqa kajtinku, ¿ima kanantataj yuyanki kay jallpʼapi  qhepakoj Jehovaj kamachisninwan? Mana umanchejta muyuchikunanchejchu tiyan, Bibliaqa niwanchejña Jehovaqa ni jaykʼaj paykunata saqerparinanta (Hebreos 13:5 tukukuynin leey). Jehovaj llajtanta ñaupajman apaj ajllasqa cristianosqa, Moisés jina, Elías jina, yachallankutaj wajkunata wakichinankupuni kasqanta. Ashkha watastaña Jehovaj Llajtanta Kamachejkunaqa, waj ovejasmanta kaj hermanosta wakichishanku Jehovaj llajtanta ñaupajman apanankupaj. Kunanqa ashkha escuelas tiyan, chaykunapitaj wakichikun ancianosta, congregacionesta waturejkunata, Sucursalta Kamachejkunata, Betelpi superintendentesta, wajkunatapis. Chantapis Diospa Llajtanta Kamachejkunaqa, paykunata yanapakoj hermanosta wakichishanku. Chay yanapakojkunaqa ashkha ruwaykunasniyoj kanku, sumajtataj yanapakushanku. Chayrayku paykunaqa sumaj wakichisqa kashanku Cristoj ovejitasninta sumajta cuidanankupaj.

14. ¿Imatataj sutʼita nisunman?

¹⁴ Tukuy chay imasrayku kayta sutʼita nisunman: Manchay ñakʼariy tiempo tukukunanpajña kashajtin ajllasqa cristianos cieloman apasqa kajtinku, kay jallpʼapi Diospa llajtanqa payta yupaychashallanqapuni. Jesucristo Kamachejninchej kasqanrayku, Diospa kamachisnenqa ñaupajllamanpuni risunchej. Chay tiempopi uj qotu ujchasqa nacionesqa contranchejta oqharikonqanku. Paykunatataj Bibliaqa sutichan Magogmanta Gog nispa (Eze. 38:18-20). Jinapis chayqa pisi tiempollata kanqa, nitaj munayninkuwanchu llojsenqanku. Mana Diosta yupaychajta saqechiyta atiwasunchu, astawanpis Jehová salvawasun. Mosqoypi jina Juanqa waj ovejasmanta kaj “may chhika runasta” rikorqa, Señortaj payman nerqa chay “may chhika” runasqa “manchay ñakʼariymanta” llojsimushasqankuta. Chaypi sutʼita reparanchej Jehovaqa salvanawanchejtapuni (Apo. 7:9, 14).

15, 16. Apocalipsis 17:14 nisqanman jina, ¿imatataj ajllasqa cristianos ruwanqanku Armagedón guerrapi, chanta imaynatá chayta yachay kallpachawanchej?

¹⁵ Jinapis ichá tapukusunmanraj: “¿Imataj kanqa ajllasqa cristianoswanri?”, nispa. ¿Imatá ruwanqanku tukuyninkuña cielopi kajtinku? Bibliaqa sutʼita chayta nin. Chaypeqa nin  kay mundomanta gobiernos ‘Corderowan maqanakunankuta’, Corderotaj ‘paykunata atipananta’. ¿Pikunataj Corderota yanapanqanku? Biblia nin: ‘Pikunachus wajyasqa, ajllasqa kanku, tukuy sonqotaj kasukunku chaykuna’, nispa, nisunman kausarichisqa ajllasqa cristianos (Apocalipsis 17:14 leey). Chayrayku tukuy ajllasqa cristianosña cielopi kajtinku, paykunaqa maqanakunanku kanqa, chay kanqa ñaupaj kaj ruwananku. Chay ruwayninkoqa tʼukunapaj jinapuni kanqa. Ajllasqa cristianosmanta wakenqa, niraj testigo kashaspa maqanakunapaj churasqa karqanku. Wakenqa ejercitopi ima kasharqanku. Cristianosman tukuspataj maqanakuyta saqeporqanku, tukuywan allinpi kausakuytataj yachakorqanku (Gál. 5:22; 2 Tes. 3:16). Cielopiña kashaspataj, Cristowan khuska angelesninwan khuska qhepa kaj guerrapi Diospa enemigosninpa contranta maqanakonqanku.

¹⁶ Kaypi piensarina: Kay jallpʼapiraj kaj ajllasqa cristianosmanta wakenqa, machitusña kanku, niñataj kallpankupichu kanku. Jinapis cielopiña kashaspaqa ni jaykʼaj wañoj cuerpoyojman tukonqanku, may atiyniyojmantaj, ajinamanta Rey Jesucristowan khuska maqanakunankupaj. Armagedón pasaytataj runasta yanapanqanku mana pantaj runasman tukunankupaj. Kay jallpʼapi pantaj runas jina kashaspaqa, mana tukuy chayta ruwayta atinkumanchu. Chayrayku cielopiña kashaspa astawan yanapayta atiwasunchej.

17. ¿Imaynapí yachanchej Armagedón Guerrapi Diospa tukuynin kamachisnin jarkʼasqa kanankuta?

¹⁷ ¿Waj ovejasmantachu kanki? Jina kajtin, ¿imatá ruwanayki kanqa Armagedón guerrapi? Kayllata ruwanayki kanqa: Jehovapi atienekunayki kanqa, kamachiwasqanchejtataj kasukunayki kanqa. Chaykunamanta ujnintaj Isaías 26:20 versiculopi kamachisqan kanman. Chaypi nin: “Ukhu cuartosniykiman yaykuy, punkutataj wisqʼaykakamuy. Uj rato pakakuy Diospa phiñakuynin thasnukunankama”, nispa. Chay tiempopeqa Diospa tukuy kamachisnin cielopipis kay jallpʼapipis, jarkʼasqa kanqanku. Chayta yachaytaj mayta sonqochawanchej. Pablo jina sutʼita yachanchej ‘ni gobiernospis, ni kaypi kaj imaspis, ni jamoj imaspis tʼaqayta atiwasunmanchu Diospa munakuyninmantaqa’ (Rom. 8:38, 39). Kayta amapuni qonqakunachu: Jehovaqa munakuwanchej, ni jaykʼajtaj saqerpariwasunchu.