1. ¿Imayraj cielucho carcaycanga lapan acrashga cristianucuna?

 ACHCA watacunapa Jehovapa sirvejnincunaga cayno tapucoj canchi: “¿Imayraj cielupaj acrashga cajcunaga lapancuna cielucho carcaycanga?” nir. Unaycho yarparganchi Armagedón ushaptin juc ishcay cielupaj acrashga cristianucuna Paraisucho cawacunanpaj cajtaraj. Ichanga La Atalaya del 15 de julio de 2013 revistacho yachacushcanchi, canan wichan Pachachoraj caycaj cielupaj acrashga cristianucuna lapancunami cielucho carcaycanga Armagedón manaraj galaycuptin (Mat. 24:31).

2. ¿Öraga imataj tapucushwan? ¿Imataj canan yachacushun?

² Pero öraga capaz cayno tapucushwan: ¿Imataj pasanga Pachacho caycaj Diospa sirvejnincunata fiyupa jatun nacay wichancho? (Mat. 24:21; Juan 10:16). Capazchi waquincunaga manchacashga o gongacashgano sienticäringa cielupaj acrashga cristianucuna Pachacho manana caycaptin. Canan yachacushun imanirtaj öraga waquincuna chayno yarpapäcunman, y imanirtaj chaynoga yarpashwanchu.

IMATAJ MANA PASANGACHU

3, 4. ¿Imataj öraga waquincuna yarpapäcunman? ¿Imanirtaj chayno yarpapäcunman?

³ Waquincunaga capaz yarpapäcun Jehovapa testiguncunata Pushajcuna Pachacho manana caycaptin waquin hermanucuna Jehovata jaguirinanpaj. Ricärishun imanirtaj chayno yarpapäcunman. Sumo sacerdote Jehoiadá y warmin Jehosabeatga Diosta cuyaj runacunami cargan. Paycunaga  Jehoás jutiyoj wamrata ashmargan y shumaj yachachergan Diosta cuyananpaj y ali rey cananpäpis. Jehoiadá cawashgancama Jehoasga alicunata rurargan. Pero Jehoiadá wanucuptin, mana alicunatana rurar galaycurgan. Payga mana ali mandäshejnincunapa consejuncunata chasquiycur Jehovata jaguirergan (2 Crón. 24:2, 15-19).

⁴ Canan yarpäshun Jesuspa último caj discipulun Juan wanushganpita ima pasashganta. Juan cawashgancama yäracoj masincunata yanapargan Jehovalata mana jaguiypa sirvir carcaycänanpaj (3 Juan 4). Jesuspa discipuluncuna y Juanpis chay wichan cristianucunata consejargan luta yachachicojcuna nishgancunata mana chasquicärinanpaj (1 Juan 2:18). Pero Juan wanucuptin, congregaciuncho walca tiempulacho achca luta yachachicojcuna yurimur galaycurgan.

5. ¿Nishwanchuraj Jehoastano y waquin punta caj cristianucunatano lapancunata pasananpaj?

⁵ ¿Chauraga nishwanchuraj canan wichan cristianucunatapis chayta pasananpaj? ¿Paycuna Jehoasno Jehovata jaguiringachuraj? O ¿punta caj waquin cristianucunano luta yachachicojcunaman ticrapäcungachuraj? ¡Manami! Cielupaj acrashga cristianucuna cay Pachacho manana caycaptinpis, Diospa sirvejnincunaga jinalami Jehovata sirvir carcaycanga. ¿Imanirtaj chayno ninchi?

RASUNPA CAJ ADURACIUNGA TALUCASHGACHU CANGA

6. ¿Imacunapitataj canan yachacushun?

⁶ Shamoj tiempucho imayca mana alicuna captinpis, ¿imanirtaj ninchi rasunpa caj aduraciunga talucashgachu canga? Canan cawaycashganchi tiempuga manami tincunchu israelitacuna y Juan cawashgan tiempuwan. Chaymi, canan maslata caycunapita yachacushun: 1) Israelitacuna cawashgan wichanpita, 2) apostulcuna wanushgana captin, nircur ima pasashganta y 3) canan wichan rasunpa caj adoración imano camacächishga cashganpita (Hech. 3:21).

7. Reycuna y marca masincunapis mana alicunata ruraptin, ¿imanirtaj israelitacunaga guelanacärinmanchu cargan?

⁷ Israelitacuna cawashgan wichan. Moisés wanunanpäna caycaptin, israelitacunata nergan: “Musyänami wanukuptï TAYTA DIOSTA mana cäsukushpayki tantiyatsishqäkunata qonqaykärinaykipaq kashqanta” (Deut. 31:29). Jina nerganpis Diosta mana cäsucuptenga, marcanpita gargushga cananpaj (Deut. 28:35, 36). Moisés nishganga cumplicurganmi. Achca reycuna Jehovata manami cäsucarirganchu, y chayta ricar israelitacunapis Diosta cäsucärejchu. Chaymi, Jehová mana cäsucojcunata castigargan y Israelcho rey manana cargannachu (Ezeq. 21:25-27). Pero cäsucoj israelitacunaga alapami cushicärergan Jehová lapan nishganta cumpliptin (Is. 55:10, 11).

8. ¿Imataj pasananpäna caycargan lapan apostulcuna wanushgana caycaptin?

⁸ Apostulcuna wanushganpita nircur ima pasashgan. Jesuspa apostulnincuna manana caycaptin congregaciuncho luta yachachicojcuna yurimur galaycurgan. Y Jesusga mayna wilashga cargan chaycuna pasananpaj (Mat. 7:21-23; 13:24-30, 36-43). Pablo, Pedro y Juan apostulcunapis musyarganmi congregaciuncho luta yachachicojcuna mayna yurimur galaycushganta (2 Tes. 2:3, 7; 2 Ped. 2:1; 1 Juan 2:18). Pero apóstol Juan wanuycuptinna, luta yachachicojcuna o apóstata cristianucuna masraj mirar galaycurgan y jatuncaray  Babiloniapa munaynincho churacargan. Biblia wilacushganno lapan cumplicurgan.

9. ¿Ima nishwantaj canan cawaycashganchi tiempupita?

⁹ Rasunpa caj adoración camacächishgan wichan. Canan cawaycashganchi tiempuga manami tincunchu israelitacunapa tiempunwan, y punta caj cristianucunata pasashgan tiempuwanpis. Bibliaga wilacun canan “ultimu tiempucho” cawaycashganchita (2 Tim. 3:1). Jina Bibliaga wilacunmi canan cawaycanchi rasunpa caj adoración “Tayta Dios munashqannöna kananpaq” caj tiempucho. Chayga galaycushga 1914 watacho y ushanga Paraisucho lapan runacuna juchaynaj captinraj (Hech. 3:21). ¿Imatataj Jehová rurargan 1914 watacho? Jesustami acrargan Gobiernuncho Rey cananpaj, paymi Davidpa miraynin cargan. Chaypitana ichic ichiclapa Jehová munashganno yapay adurar galaycushganchi (Is. 2:2-4; Ezeq. 11:17-20). Pero, ¿rasunpa caj aduraciunga yapay talucashgachuraj canga?

10. 1) ¿Imataj Isaías 54:17 texto wilacun rasunpa caj aduraciunpita? 2) ¿Imanirtaj cayta musyarga shacyächimanchi?

¹⁰ Jehová Palabrancho nimanchi chiquimajninchicuna imaycata ruraptinpis manami ushacächimäshunchu (leiriy Isaías 54:17). Jehová nishganga canan wichan cumplicuycan. Payga caytapis nimanchi: “Kikïmi wamraykikunatapis yachatsishaq. Yanapaptïmi pïmaywanpis ali kawanqa. Reypis munashqänömi mandanqa. Manami pipis nakatsishunkipaqnatsu. Jawka kawarmi pitapis mana mantsakunkipaqnatsu” (Is. 54:13, 14). “Kay patsacho kaykaq dios” Satanás contranchicho imaycata ruraptinpis, manami michämäshunchu runacunata jinala Jehovapita yachachir siguinapaj (2 Cor. 4:4). Rasunpa caj aduraciunga manami imaypis talucashga canganachu. Chiquimajninchicuna contranchicho imaycata ruraptinpis yangalapaj canga.

IMATAJ PASANANPAJ CAJCUNA

11. ¿Imanirtaj ninchi Pachacho caycaj cristianucuna mana gongacashga caycänanpaj?

¹¹ Ricärishun imataj pasanga acrashga cristianucuna cieluchona lapancuna carcaycaptin. Ama gongashunchu Jesús michimajninchi y congregaciunpa umanpis cashganta. Quiquinmi nergan: ‘Juclaylami pushacojniquiga. Payga Cristumi’ (Mat. 23:10). Reyninchi  Jesusga imaypis cuidamäshunmi. Pachacho caycaj cristianucunaga manami gongacashgachu caycanga. Diospa sirvejnincunaraycur imacunata rurananpaj cajta mana musyarpis, yäracushwanmi Jesús ali pushamänanchipaj y imapitapis chapämänanchipaj. Ricärishun imanotaj Jehová unaycho sirvejnincunata cuidargan.

12. 1) ¿Imanotaj Jehová israelitacunata cuidargan Moisés wanucuptinna? 2) ¿Imanotaj israelitacunata cuidargan Elías juc lädupana aywacuptin? (Dibujutapis ricay).

¹² Moisesga wanucurgan israelitacuna Dios aunishgan Pachaman manaraj yaycuptin. Chaura, ¿nishwanchuraj israelitacuna chunyajcho gongacashga caycashganta? ¿Pipis manana carganchuraj pushananpaj? Manami. Jehovaga sirvejnincunata manami cachaycurganchu cäsucoj capäcuptin. Moisés manaraj wanuycuptin, Jehovaga nergan paypa trucancho Josué israelitacunata pushananpaj (Éx. 33:11; Deut. 34:9). Jina yachaj, tantiacoj y yarpayniyoj runacunapis caycargan israelitacunata pushananpaj (Deut. 1:15). Diospa sirvejnincunaga japalancuna manami caycarganchu. Profeta Eliaspis achca watacunapami israelitacunata yanapargan Jehovalata sirvinanpaj. Pero nircur, Jehovaga Eliasta mandargan Judá sur caj laduman (2 Rey. 2:1; 2 Crón. 21:12). Chauraga, ¿manacu pipis cargannachuraj chunca tribucho caycaj Diosta cuyaj israelitacunata pushananpaj? Au, carganmi. Eliasga achca watacunapa Eliseuta yachaycächergan israelitacunata pushananpaj. Jina profetacunapa wamrancunapis caycarganmi yanapänanpaj (2 Rey. 2:7). Chauraga imaypis Diosta cuyaj runacuna carganmi israelitacunata pushananpaj. Jehovaga jinala munayninta ruraycargan y cäsucoj sirvejnincunatapis cuidaycargan.

13. ¿Imataj Jehová aunimanchi Hebreos 13:5b textupa ushanancho? (Fotucunatapis ricay).

¹³ Chauraga, ¿imataj pasanga cielupaj acrashga cristianucuna cay Pachacho manana caycaptin? Jehovaga Palabrancho aunimanchi sirvejnincunata imaypis mana gongananpaj ni cachaycunanpaj (leiriy Hebreos 13:5b). Moisés y Elías rurashganno canan wichanpis Jehovapa testiguncunata Pushaj hermanucunaga chaytami rurapäcun. Achca watacunapami waquin hermanucunata yachaycächin imano predicaciunta pushananpaj y hermanunchicunatapis ali ricananpaj. Chaypäga escuelacuna  camacächergan ancianucunapaj, congregaciunta watucamojcunapaj, sucursalcho pushajcunapaj, Betelcho encargaducunapaj y mascunapäpis. Jina Jehovapa testiguncunata Pushaj hermanucunaga quiquincunami waquincunata shumaj yachaycächin paycunata yanapänanpaj. Chay yanapajnincunaga alimi arurcaycan. Paycunaga ali yachachishga carcaycan Jehovapa sirvejnincunata shumaj pushananpaj.

14. Canancama ricashganchega, ¿imamantaj yarpächimanchi?

¹⁴ Caycama lapan ricashganchicunaga yarpächimanchi cielupaj acrashga cristianucuna cay Pachacho manana caycaptinpis, Diospa sirvejnincunaga jinala Jehovata sirviycäshun. Reyninchi Jesús Pushamajninchi captinmi guepaman manami cutishunchu. Chiquicoj runacuna o Magogpita Gog contranchicho imaycata ruraptinpis Jehovataga jinala sirviycäshun (Ezeq. 38:18-20). Paycuna lapan rurashgancunaga yangalapämi canga, manami ushacächimäshunchu. Apóstol Juanga juc visiuncho ricargan fiyupa jatun nacaypita “yupaytapis mana atipaypaq tsaytsika runakuna” yarguycajta. Jehovaga cuyashgan sirvejnincunataga salvangami (Apoc. 7:9, 14).

15, 16. Apocalipsis 17:14 nishganno, ¿imataj rurapäcunga cielupaj acrashga cristianucuna Armagedón wichancho, y cayga imanotaj shacyächimanchi?

¹⁵ Cielupaj acrashga cristianucuna lapancuna cieluchona carcaycaptin, ¿imataj ruranga? Bibliaga wilacun cay munducho munayniyoj runacuna “Carnishpa contran sharkur pelyapäkunqa”. Pero paycunataga “Carnish” o Jesusmi vencinga. Aumi, Carnishtaga yanapanga “qayashqan, akrashqan y imaypis cäsukuq runakuna”, paycunaga cielupaj acrashga cristianucuna cawarimushgana carcaycan (leiriy Apocalipsis 17:14). Chauraga paycuna cielucho caycaptin chiquimajninchicunawan peliapäcunga. Waquin cielupaj acrashga cajcuna Testigo manaraj captin peliayta gustaj y waquincunaga soldadupis carganmi. Pero Testiguman ticraycur chay lapanta jaguirirgan y jauca  cawacur galaycurgan (Gál. 5:22; 2 Tes. 3:16). Pero cieluchona carcaycaptin, Jesuswan y waquin angelcunawanpis Armagedoncho peliapäcunga Diospa chiquejnincunawan.

¹⁶ Cayman yarpäshun: Pachacho caycaj waquin cielupaj acrashga cristianucuna edayashgana caycar calpaynaj carcaycan. Pero cawarircamur cieluchoga angelcunano poderyoj capäcunga y Reyninchi Jesusta yanapanga. Armagedón usharcuptinna Pachacho caycaj runacunata yanapanga juchaynajman ticrananpaj. Paycunaga canan wichan mayna imaycacunata ruraycan Diospa sirvejnincunaraycur, pero cieluchona caycaptin cay Pachacho caycajcunata masrämi yanapacunga.

17. ¿Imanirtaj ninchi Armagedón wichancho Jehovapa sirvejnincunata manami imapis pasangachu?

¹⁷ Cay Pachacho cawacunayquipaj shuyaraycaptiquega, ¿imataraj ruranayqui Armagedón wichancho salvacunayquipaj? Jehovalaman yäracunayqui y pay nishganta cäsucunayqui. Chayga ninan Isaías 26:20 texto nishganta cäsucunapaj, chaycho nimanchi: “Wayikikunaman o ruri cuartuyquicunaman yaykur punkuykikunata wichqakamuy. Tayta Diospa rabyaynin pasashqanyaq pakarpäkuy”. Armagedonchoga cielucho y Pachacho Diospa sirvejnincunata manami imapis pasangachu. Apóstol Pabluno noganchipis seguro caycanchi ni ima gobiernupis, ‘ni jana patsacho kaqkunapis, ni patsa rurincho kaqkunapis Diospa kuyakuyninpita mana rakimäshuntsu’ (Rom. 8:38, 39). Ama gongaychu Jehová cuyashushgayquita y manami imaypis cachaycushunquichu.