1. ¿Imëraq akrashqakunaqa ciëluta llapanna ëwakuyanqa?

 JEHOVÄPA sirweqninkunaqa puntataqa kënömi tapukoq kantsik: “Ciëlupaq akrashqakunaqa, ¿imëraq ciëluta ëwar ushayanqa?”. Juk tiempupam creirqantsik wakinqa Armagedonta kawëkar pasayänampaq kaqta y Shumaq Patsachöpis juk tiempupa kayänampaq kaqta, peru 2013 wata 15 de juliuchö yarqamoq Täpakoq revistachömi yachakurqantsik, kë Patsallachöraq këkaq akrashqakunaqa Armagedon manaraq qallaptin llapanna ëwakuyänampaq kaqta (Mat. 24:31).

2. ¿Imataraq tapukushwan? ¿Y imatataq këchö yachakushun?

² Peru capazchi kënö tapukushwan: “¿Imaraq pasanqa ‘alläpa sufrimientu’ witsanchö kë corralchö këkaq Cristupa ‘üshankunata’ o kë Patsachö kawaqpaq kaq Jehoväpa sirweqninkunata?” (Mat. 24:21; Juan 10:16). Ciëlupaq akrashqakuna kë Patsapita llapanna ëwaskiyaptinqa, capazchi japallantsikta dejaramanqantsikta pensar yarpachakushwan o oqrakashqa üshanö sientikushwan. Tsënö imanir pensatsimaqnintsik ishkë willakuykunata rikärishun. Tsëpitanam yachakurishun, japallantsikta dejaramanqantsikta pensar mana mantsapakunapaq.

¿IMATAN PASANQATSU?

3, 4. ¿Imataraq wakin cristiänukunaqa pensayanman, y imanir?

³ Capaz kë Patsachö quedaqpaq kaq cristiänukunaqa pensayanman Jehoväpa Testïgunkunata Pushaqkuna ciëluta ëwaskiyaptinqa, Patsachö kawaqpaq kaqkunaqa dirigiyänampaq pipis mana kaptin Jehovä sirwita dejariyänampaq kaqta. Tsënöqa pensayanman Jehoasta y cien wata witsanchö cristiänukunata pasanqanman pensarmi. Puntata parlarishun Jehoasta pasanqampaq. Pëtaqa, llullullaraq këkaptinmi sacerdötikunapa mandaqnin Jehoiadäwan warmin Jehosabeat wanutsiyänampaq kaqta salvayarqan y Jehoväta alli sirwinampaq y alli gobernanti  kanampaqmi yanapayarqan. Jehoiadä kawanqan witsanqa, Jehoasqa Jehovä Diostam mana dejëpa sirwirqan. Peru wanuriptinqa, mana alli dirigentikuna niyanqanta cäsurmi mana allikunata rurar qallëkurqan y Jehovä sirwita dejarirqan (2 Crön. 24:2, 15-19).

⁴ Kananqa cien wata witsanchö cristiänukunata pasanqampaq parlarishun. Tsë witsanchöqa apostol Juanmi llapan cristiänukunata yanaparqan Jehovä Diosnintsikta llapan shonqunkunawan sirwiyänampaq (3 Juan 4). Jesuspa wakin apostolninkuna ruranqannömi, Juanqa cristiänukunata yanaparqan Diospa contran churakashqa nunakuna yachatsikuyanqanta mana creiyänampaq (1 Juan 2:18). Peru apostol Juan wanuriptinqa, Diospa contran churakashqa nunakuna yachatsikuyanqantam cäsur qallëkuyarqan, y wallka tiempullachömi llapan congregacionchö cristiänukuna tsë nunakuna niyanqanta creiriyarqan.

5. ¿Imamantan pensashwantsu Jehoastawan cien wata witsanchö cristiänukunata pasanqanman pensar?

⁵ Akrashqakuna ciëluta llapan ëwar ushariyaptinqa, ¿kë Patsachö quedaq cristiänukunaqa Jehoasnötsuraq Jehoväta sirwita dejariyanqa? ¿Cien wata witsanchö cristiänukunanötsuraq Diospa contran churakashqakuna niyanqanta creir pëkunapis Diospa contran churakäriyanqa? ¡Tsëqa manam pasakunqatsu! Ciëlupaq akrashqakuna kë Patsachö manana kayaptimpis, cristiänukunaqa Jehovä Diosta llapan shonqunkunawanmi sirwir sïguiyanqa y alli atiendishqam kayanqa. ¿Imanötan tsënö kanampaq kaqta musyantsik?

RASUMPA KAQ DIOSTA PË MUNANQANNÖ ADORËTAQA MANAM DEJAYANQATSU

6. ¿Ima tiempukunapaqtan yachakushun?

⁶ ¿Imanirtan següru këkantsik mana alli tiempukunapa pasëkarpis rasumpa kaq Diosta adorëta mana dejayänampaq kaqta? Bibliachömi cläru nimantsik kanan witsan kawëkanqantsik tiempuqa israelïtakuna kawayanqan tiempupita y cien watakunachö cristiänukuna kawayanqan tiempupita jukläya kanqanta. Tsëmi këchöqa kima tiempukunapita yachakurishun. 1) Israelïtakuna kawayanqan tiempu imanö kanqanta, 2) apostolkuna wanur ushakäriyaptin tiempu imanö kanqanta y 3) ‘imëkapis unë kanqanman kutinqan tiempu’ imanö kanqanta, o kanan tiempu imanö kanqanta (Hëch. 3:21).

7. ¿Imanirtan wakin israelïtakunaqa israelïta mayinkuna y gobernantikuna mana allita rurëkäyaptimpis qelanäkuriyarqantsu?

⁷ Israelïtakuna kawayanqan tiempu. Manaraq wanukurmi Moisesqa israelïtakunata kënö nirqan: “Noqa wanukuptïqa o wañukuptïqa, mana allikunatam rurayanki, y manam qamkunata willayanqaqkunata cumpliyankitsu” (Deut. 31:29). Tsënöllam willarqan mana cäsukuyaptinqa, mana reqiyanqan nacionkunaman chikeqninkuna apakuyänampaq kaqta (Deut. 28:35, 36). Moises ninqanqa cumplikarqanmi. Mëtsika watakunapam Israelchö gobernantikunaqa Jehoväta cäsukuyarqantsu, tsëta rikarmi israelïtakunapis Jehoväta cäsuyarqannatsu. Tsëmi Jehoväqa castigarqan y mananam permitirqannatsu Israelchö gobernantikuna kananta (Ezeq. 21:25-27). Peru Jehoväta rasumpa kuyaq israelïtakunaqa, Moises ninqankuna cumplikaqta rikarmi Jehoväman mas confiakuyarqan (Is. 55:10, 11).

8. ¿Imanirtan cien wata witsanchö cristiänukuna mana alli religionman tikrayanqampita espantakushwantsu?

⁸ Apostolkuna wanur ushakäriyaptin tiempu imanö kanqan. Jesusqa clärum willakushqa karqan Dios yachatsikunqampa contran nunakuna yachatsikuyänampaq kaqta (Mat. 7:21-23; 13:24-30, 36-43). Tsëmi cien watakuna witsanchö cristiänukuna mana alli  yachatsikuykunata creiyanqampitaqa espantakushwantsu. Apostolkuna kawayanqan witsanllanam Pablu, Pëdru y Juan willakuyarqan, Jesus willakunqannö Diospa contran churakashqa nunakuna yachatsikur qallëkuyashqana kanqanta (2 Tes. 2:3, 7; 2 Pëd. 2:1; 1 Juan 2:18). Ultimu kaq apostol wanuriptinqa, Diospa contran churakaq cristiänukunaqa Alläpa Puëdeq Babiloniachönam o mana alli religionnam tikrariyarqan. Yapëmi Diosnintsik ninqanqa cumplikarqan.

9. ¿Imachötan kawëkanqantsik tiempu jukläya israelïtakuna y cien watakuna witsanchö cristiänukuna kawayanqan tiempupita?

⁹ ‘Imëkapis unë kanqanman kutinqan tiempu’ imanö kanqan. Kanan kawëkanqantsik tiempuqa, israelïtakuna kawayanqan tiempupita y cien watakuna witsanchö Diospa contran churakaq cristiänukuna kawayanqan tiempupita alläpa jukläyam. ¿Imanötan reqintsik kawëkanqantsik tiemputa? Bibliachöqa, kë mana alli tiempupa ‘ushanan tiempun’ ninmi (2 Tim. 3:1). Peru Bibliachöqa nin ushanan tiempukuna qallëkuptinlla, juk tiempu mas qallanqantam y tsë tiempuqa wakin kaq tiempukunapita jukläyam. Tsë tiemputaqa qayan, ‘imëkapis unë kanqanman kutinqan tiempu’ nirmi, y tsë tiempuqa masmi duran (Hëch. 3:21). Tsë tiempuqa 1914 watachömi qallarqan y Diosnintsik churanqan Gobiernu gobernamuptin nunakuna jutsannaqna tikrariyaptin, y kë Patsapis Shumaq Patsaman tikrariptinmi ushanqa. ¿Imatataq Jehoväqa 1914 watachö rurarqan? Yapëmi Pëpa jutinchö mandakunampaq Davidpa kastampita juk gobernantita churarqan, y tsë gobernantiqa Jesusmi karqan y ciëluchömi mandakur qallëkurqan. Peru manam tsëllatatsu rurarqan. Gobernantita churanqampita ichik tiempullachönam pë munanqannö rasumpa adorayänampaq patsäratsirqan (Is. 2:2-4; Ezeq. 11:17-20). Kanampis Diospa sirweqninkunaqa, ¿puntatanötsuraq mana alli yachatsikuyanqanta creir Jehovä adorëta dejariyanqa?

10. (1) ¿Imatataq Bibliachö nin Jehoväta munanqannöna adorëpaq? (Isaïas 54:17). (2) ¿Imanötan Isaïas ninqanqa animamantsik?

¹⁰ (Leyi Isaïas 54:17). Jehovä Diosnintsikmi kënö nirqan: “Qamta ushakätsiyäshunëkipaq imëkata rurarpis manam imatapis lograyanqatsu”. Kënö ninqanqa kananmi cumplikëkan. Y kënö ninqampis cumplikëkanmi: “Llapan wamrëkikunatapis noqa Jehovämi yachatsishaq, y wamrëkikunaqa imëpis yamëmi kawakuyanqa. Alli kaqta rurarmi imëpis alli patsakashqa kanki. [...] Manam imatapis  mantsankinatsu ni imapis mantsakätsishunkinatsu, tsëkunaqa manam kanqanatsu” (Is. 54:13, 14). Diosnintsikpita yachatsikunantsiktaqa manam kë mundupa diosnin Satanaspis michämënintsikta puëdinqatsu (2 Cor. 4:4). Jehovätaqa yapëmi pë munanqannöna adorëkantsik. ¡Y mananam mana alli yachatsikoqkunaqa kanqanatsu! Ushakätsimënintsikta munar imëkata rurarpis manam puëdiyanqatsu.

PASAKUNAMPAQ KAQKUNA

11. ¿Imanirtan següru këkantsik akrashqakuna ciëluta llapan ëwariyaptin Diosnintsik imëpis yanapamänapaq kaqta?

¹¹ Kë Patsallachöraq këkaq akrashqakuna ciëluta llapan ëwaskiyaptinqa, ¿imaraq pasakunqa? Yarpänantsikmi congregacionpa y noqantsikpa dirigimaqnintsikpis Jesus kanqanta. Kikinmi kënö nirqan: “Jukllëllam Dirigiyäshoqnikikunaqa, Cristulla” (Mat. 23:10). Gobernamaqnintsik Jesusqa manam imëpis dejamäshuntsu. Pë dirigimashqam, Patsachö quedaq kaqkunaqa imapitapis mantsapakushuntsu. Awmi, Jehoväpa sirweqninkunata tsë witsanchö Jesus imanö yanapanampaq kaqtaqa manam musyantsiktsu. Peru Biblia willakunqankunata leyirmi musyantsik yanapamänapaq kaqta. Rikärishun.

12. (1) ¿Imanötan Jehoväqa sirweqninkunata cuidarqan Moises wanuriptin? (2) ¿Imanötan Jehoväqa sirweqninkunata cuidarqan Elïas juk lädutana yanapakoq ëwakuskiptin? (Rikäri dibüjuta).

¹² Jehovä Diosnintsikqa manam imëpis sirweqninkunata dejashqatsu. Këllaman pensarishun: Dios Änikunqan Patsaman israelïtakuna manaraq chäyaptinmi Moises wanukurqan. Peru pë wanuriptinqa, Josuënam israelïtakunata dirigirqan. Moises manaraq wanukuptinmi, Jehoväqa nirqan Moisespa rantin Josuëna diriginampaq, y Moisesmi mëtsika watapa yachatsishqa karqan (Ex. 33:11; Deut. 34:9). Tsënöllam mil nunakunata, cien nunakunata, cincuenta nunakunata y diez nunakunata dirigeq yachaq nunakunapis kayarqan israelïtakunata dirigiyänampaq (Deut. 1:15). Diosnintsikqa sirweqninkunata allim cuidarqan. Tsënöllam pasakurqan Elïas kawanqan tiempuchöpis. Elïasqa mëtsika watakunapam israelïtakunata yanapashqa karqan Jehoväta adorayänampaq. Peru tsëpitam Jehoväqa sur kaq läduta o Judäta ëwakunampaq Elïasta mandarirqan (2 Rëy. 2:1; 2 Crön. 21:12). Y Elïas ëwakuskiptinqa, pëpa rantinqa Eliseunam chunka kasta israelïtakunata dirigir qallëkurqan, y pëtaqa Elïasmi atska watakunapa yachatsishqa karqan. Tsënöllam ‘Diospa willakoqninkunapa tsurinkunapis’ israelïtakunata dirigiyänampaq kayarqan,  pëkunaqa capazchi tsënö yanapakuyänampaq escuëlakunachö yachakushqa kayarqan (2 Rëy. 2:3, nöta). Yachakurinqantsiknömi Jehovä Diosnintsikqa sirweqninkunata imëpis alli cuidan. Tsëwanmi rikantsik änikunqankunata cumplinqanta y sirweqninkunata alli cuidanqanta.

13. Hebrëus 13:5b ninqannö, ¿imapitataq següru këkantsik? (Rikäri fötukunata).

¹³ Tsëqa, akrashqakuna ciëluta llapan ëwaskiyaptinqa, ¿mananatsuraq kë patsachö quedaqpaq kaqkunata diriginampaq ni pipis kanqa? Tsëtaqa manam yarpachakunantsiktsu. Yachakurinqantsiknömi, Jehovä Diosnintsikqa manam sirweqninkunata imëpis dejanqatsu (leyi Hebrëus 13:5b). Tsëmi Jehoväpa Testïgunkunata Pushaqkunaqa Moisesnö y Elïasnöpis, kë Patsachö quedaqpaq kaq ollqukunata imëka rurëta yachëkätsiyashqa. Tsëmi anciänukunapaq, congregacionta watukaqkunapaq, sucursalta rikaqkunapaq, Betelchö yanapakoqkunata dirigeqkunapaq y misionërukunapaq escuëlakunata patsätsiyashqa, y mas escuëlakunatapis patsätsiyashqam. Tsënöllam Jehoväpa Testïgunkunata Pushaqkunaqa imëkachö yanapakuyänampaq wawqikunata yachëkätsiyan. Pëkunaqa imëka carguyoqmi kayan y imëka trabäjutam rurayan. Y ciëlupaq akrashqakuna llapan ëwaskiyaptin, Jehoväpa sirweqninkunata kë Patsachö dirigiyänampaqqa listunam këkäyan.

14. ¿Imatataq cläru entiendirintsik?

¹⁴ Tsëwanmi cläru entiendintsik, alläpa sufrimientu ushananna këkaptin y akrashqakuna ciëluta llapan ëwaskiyaptin Diosnintsikpa sirweqninkunaqa, kë Patsachö Jehovä Diosnintsikta adorar sïguiyänampaq kaqta. Jesucristu Dirigeqninkuna kaptinmi ni ichikllapis adorëtaqa dejayanqatsu. Awmi, tsë witsanchöqa Magog markachö këkaq Gogmi, o juk grüpu nacionkunam, Jehovä Diospa sirweqninkunata atacayanqa (Ezeq. 38:18-20). Peru ichik tiempullapam atacayanqa y manam ushakätsita puëdiyanqatsu. Ni manam Diosnintsikta adorayänanta michëta puëdiyanqatsu, Jehovä Diosnintsikmi salvanqa. Apostol Juantam Diosnintsik rikätsirqan Cristupa üshankunata o kë Patsachö quedaqpaq kaq ‘mëtsikaq nunakunata’.  Tsëta rikärirmi apostol Juanqa kënö neqta wiyarqan: “Pëkunaqa alläpa sufrimientupita yarqamoqkunam kayan”. Awmi, Jehovä Diosnintsikqa kë Patsachö këkaq sirweqninkunataqa imëpis cuidëkanqam (Apoc. 7:9, 14).

15, 16. Apocalipsis 17:14 ninqannö akrashqakuna ciëluta ëwarirqa, ¿imataraq rurayanqa Armagedon guërrachö, y imata rurayämunqantam kushikuypaq kanqa?

¹⁵ Peru capazchi kënö tapukuntsik: Y ciëlupaq akrashqakuna ciëluta llapan ëwarirqa, ¿imataraq rurayanqa? Tsëtapis Bibliachöqa clärum willakun. Willakunmi kë munduchö polïticukuna ‘Orqu Üshawan’ o Jesuswan pelyayänampaq kaqta, peru ‘Orqu Üsha vencinampaq kaqtam’ nin. ¿Pikunatan yanapayanqa? Bibliachömi nin ‘qayashqa, akrashqa y confiakuypaq kaqkuna’ venciyänampaq kaqta. Pëkunaqa kayan, ciëluchö kawarishqa cristiänukunam (leyi Apocalipsis 17:14). Tsëmi kë Patsapita ultimuta ëwakoq kaqkunaqa, pelyaqllana ciëluman chäyanqa. ¡Tsëqa alläpa shumaqchi kanqa! Ciëlupaq akrashqakunataqa, manaraq Testïgu karqa wakintaqa pelyëmi gustaq, y wakinkunaqa hasta ejercituchömi kayashqa. Peru cristiänu tikrarirqa, tsë pelyakunatam dejariyarqan y wakinkunawan alli kawakuytam yachakuyarqan (Gäl. 5:22; 2 Tes. 3:16). Peru ciëluta ëwarirqa, Cristuwan y angelkunawan juntum Diosnintsikpa llapan chikeqninkunata Armagedonchö ushakätsiyanqa.

¹⁶ Këllaman pensarishun: kë Patsallachöraq këkaq ciëlupaq akrashqakunaqa wakinkunaqa edänam kayan y kallpankunapis manam kannatsu. Peru ciëluta ëwarirqa, espïritu cuerpuyoq y poderösum kayanqa y Gobernanti Jesucristutam Armagedonchö pelyar yanapayanqa. Y Armagedon pasariptinqa, llapan nunakunatam yanapayanqa jutsannaq këman chäyänampaq. Tsëmi kë Patsachö jutsasapallaraq këkarnin imëkata rurayanqampitapis ciëluchö karqa, kë Patsachö këkaq wawqi paninkunata mas alli yanapëta puëdiyanqa.

17. ¿Imanötan musyantsik Armagedon guërra witsanchö Diosnintsikpa sirweqninkuna salvakuyänampaq kaqta?

¹⁷ ¿Y qamqa Patsachö quedaqpaq kaqku kanki? Tsënö kaptinqa, ¿imataraq ruranki Armagedon guërra kaptin? Jehovämanmi confiakunëki y dirigimoqkuna niyämunqankunatam cäsukunëki. Capazchi Isaïas 26:20 ninqanta cäsukunëkipaq niyäshunki, tsë textum kënö nin: “Cuartuykikunaman yëkuskir punkuta wichqarkayämuy. Cölerä pasanqanyaq juk rätulla tsëchö quedakuyë”. Alläpam kushikuntsik Diosnintsikpa sirweqninkunaqa ciëluchö kaqpis y kë Patsachö kaqpis, Armagedon guërra kanqan witsan salvakuyänampaq kaqta musyarnin. Apostol Pablunömi següru këkantsik ‘kanan pasëkanqankuna ni shamoq tiempuchö pasakunampaq kaqkunapis [...] Diosnintsik kuyamanqantsikpita’ rakimënintsikta mana puëdinampaq kaqta (Rom. 8:38, 39). Wawqi panilläkuna, Diosnintsik alläpa kuyayäshunqëkitaqa ama imëpis qonqayëtsu, pëqa manam imëpis dejayäshunkitsu.