1. ¿Ima horataj tucui ungidocunaca jahua pachapi cangacuna?

 HUAQUIN huatacuna huashamanca “¿tucui ungidocunaca ima horataj jahua pachaman ringacuna?” nishpami tapurij carcanchij. Chai punllacunapica huaquin ungidocuna Armagedonpi mana huañushpa Paraíso Allpapi asha tiempota causanatami yuyaj carcanchij. Shinapish La Atalaya del 15 de julio de 2013 revistapica ungidocuna Armagedón manaraj callarijpi jahua pachaman rinatami intindircanchij (Mateo 24:31).

2. a) ¿Maijancunaca imamantataj manchaita charincuna? b) ¿Cai yachaipica imatataj yachashun?

² Jatun llaqui punllacuna o Gran tribulación punllacunapica Jesuspaj ‘shujtaj ovejacunaca’ cai Allpapimi Jehová Diostaca tucui shunguhuan sirvishpa catingacuna. ¿Chai punllacunapica paicunahuanca imataj tucunga? (Juan 10:16; Mateo 24:21). Maijancunaca tucui ungidocuna jahua pachaman rishcamanta pushajcuna illaj saquirinata yuyashpami achcata mancharincuna. ¿Jehová Dios ñucanchijta cuidashpa catinataca imamantataj seguros cana canchij? Cunanmi chaita yachashun.

¿GRAN TRIBULACIÓN SHAMUJPICA IMATAJ MANA TUCUNGA?

3, 4. a) ¿Maijancunaca imatataj yuyancuna? b) ¿Imamantataj chashna yuyancuna?

³ Maijancunaca “Cuerpo Gobernantepi caj huauquicuna ña mana cai Allpapi cajpica shujtaj ovejacunaca Diosmantami caruyangacuna” nishpami yuyancuna. ¿Imamantataj chashna yuyancuna? Bibliapi huaquin gentecunahuan ima tucushcata liyishcamantachari chashna yuyancuna. Por ejemplo, sumo sacerdote Jehoiadá runaca Jehová Diostaca allimi sirvirca. Jehoás yaya mama illaj saquirijpimi Jehoiadaca paipaj huarmihuan paitaca huiñachircacuna. Jehoás huiñajpica rey cachunpishmi ayudarcacuna. Jehoiadá causacujpica Jehoasca Diosmantaca mana caruyarcachu. Pero Jehoiadá huañujpica  Jehoasca mana allicunatami rurai callarirca. Qꞌuipacarin millai mandajcunapaj nishcacunata uyashcamantami Diosmanta caruyarca (2 Crónicas 24:​2, 15-19).

⁴ Jesusta catijcuna segundo siglopi ima tucushcata ricushun. Apóstol Juanca caishuj apostolcuna huañushca qꞌuipami huañurca. Pai manaraj huañushpaca caishuj apostolcuna shinami huauqui panicuna Diosmanta ama caruyachun, panda yachachishcacuna paicunata ama pandachichunpish achcata ayudarca (2 Tesalonicenses 2:7; 1 Juan 2:18; 3 Juan 4). Pero Juan huañujpica panda yachachishcacunaca millai ungüi shinami mirari callarirca. Chaimantami asha huatacunapica achca huauqui panicunaca millai ungüihuan contagiarishca shina chai panda yuyaicunata cri callarircacuna.

5. ¿Jehoaspish, segundo siglopi causaj huauqui panicunapish Diosmanta caruyashca cajpipish imatataj mana yuyana canchij?

⁵ ¿Tucui ungidocuna jahua pachaman rijpica “shujtaj ovejacunaca” Jehoás shinachu Diosmanta caruyangacuna? Mana cashpaca, ¿segundo siglopi causaj huauqui panicuna shinachu panda yuyaicunata cri callaringacuna? Chaica manataj pasangachu. Cai Allpapi ungidocuna mana tiyajpipish “shujtaj ovejacunaca” Jehová Diosta tucui shunguhuan sirvishpa catinatami seguros canchij. ¿Imamantataj seguros canchij?

DIOSPAJTA RURASHPA CATINATACA MANATAJ SAQUISHUNCHU

6. ¿Cunanca imatataj yachashun?

⁶ ¿Jatun llaqui punllacuna shamujpipish Jehová Diosta sirvishpa catinataca imamantataj seguros canchij? Bibliapi nishca shinaca israelitacuna shina, segundo siglopi causaj huauqui panicuna shinaca mana causacunchijchu. Caita alli intindingapajca Jehová Dios israelitacunata, segundo siglopi causaj huauqui panicunata ima shina ayudashcatami ricugrinchij. Shinallataj ‘tucuita mushujyachina tiempocunapi’ Jehová Dios paita sirvijcunata ima shina ayudacushcatami yachashun (Hechos 3:21).

7. ¿Israelta mandajcuna, shujtaj israelitacunapish Jehová Diosta mana cazujpipish Diosta alli sirvij israelitacunaca imamantataj mana desanimarircacuna?

⁷ Israelitacunapaj punllacunapi. Moisesca ñalla huañugrishpaca israelitacunamanca: “Ñuca huañushca qꞌuipaca Diospajca ismucuj shina tucushpa, ñuca mandashca ñancunamanta anchurina cashcataca yachanimi” nircami (Deuteronomio 31:29). Shinallataj Moisesca: ‘Diosmanta caruyajpica shujtaj llajtacunamanmi cancunataca apangacuna’ nircami (Deuteronomio 28:​35, 36). ¿Moisés nishcacunaca pajtarircachu? Ari, pajtarircami. Israelta mandajcunaca achca huatacunatami Jehová Diosta mana cazushpa causarcacuna. Chaita ricushpami israelitacunapish Jehová Diospaj contra tucurcacuna. Chaimantami Jehová Diosca paicunataca llaquichirca. Shinallataj Israelmanta caj mandajcuna Israelpi mandachunca ña mana saquircachu (Ezequiel 21:​25-27). Shinapish Jehová Diosta cazuj israelitacunaca Moisés imalla nishcacuna pajtarijta ricushpaca achcatami animarircacuna (Isaías 55:​10, 11).

8. ¿Jesús nishcacunaca ima shinataj pajtarirca?

⁸ Tucui apostolcuna huañushca qꞌuipa. Jesusca panda yachachishcacuna, apostatacuna achcata mirarina cashcatami huillarca (Mateo 7:​21-23; 13:​24-30, 36-43). Primer siglopica apóstol Pablo, Pedro, Juanpish Jesús nishca shina apostatacuna tiyai callarishcata nircacuna (2 Tesalonicenses 2:​3, 7; 2 Pedro 2:1; 1 Juan 2:18). Segundo siglopica Jesusta catijcunaca achcacunami Jehová Diosmanta caruyashpa apostatacuna tucurcacuna. Chashnami paicunaca Babilonia jatun pueblopaj parte tucurcacuna. Babilonia jatun puebloca tucui panda religioncunatami ricuchin. Shinashpaca Jesús nishcacunaca tucuimi pajtarirca.

9. ¿Ñucanchij causashca punllacunaca israelitacuna causashca punllacunahuan, segundo siglopi causashca huauqui panicunahuanca imapitaj chꞌican can?

 ⁹ “Tucuita mushujyachina tiempocuna”. Ñucanchijca israelitacuna shina, segundo siglopi causashca huauqui panicuna shinaca mana causacunchijchu. Shinaca ¿ima tiempopitaj causacunchij? Tucuri punllacunapimi causacunchij (2 Timoteo 3:1). Shinapish Bibliapica shujtaj tiempopipish causacushcatami nin. Bibliapi nishca shinaca ‘tucuita mushujyachina tiempocunapimi’ causacunchij (Hechos 3:21). Cai tiempocunaca 1914 huatapimi callarirca. Tucui gentecuna jucha illajcuna tucujpi, cai Allpa shuj Paraíso tucujpimi cai tiempocunaca tucuringa. ¿1914 huatapica imataj tucurca? Jehová Diosca jahua pachamanta mandachunmi Jesusta churarca. Chashnami Jehová Dios churashca mandajca cutin tiyarca. Jesusca Davidmanta shamuj alli mandajmi can. ¿Chai qꞌuipallaca imataj tucurca? Jehová Diosta sirvijcunaca cutinmi pai munashca shina paita adorai callarircacuna (Isaías 2:​2-4; Ezequiel 11:​17-20). Pero ¿Diospaj puebloca cutinchu paimanta caruyanga?

10. a) ¿Bibliapi nishca shinaca cunan punllacunapica Jehová Diostaca ima shinataj adoracunchij? (Isaías 54:17). b) ¿Isaías libropi nishcacunata liyishpaca ima shinataj sintirinchij?

¹⁰ (Isaías 54:​17-ta liyipai). Bibliapica: “Canta tucuchingapaj ashtahuan ima macanacunacunata rurajpipish, cantaca chaicunaca imata mana rurai tucungachu” ninmi. Cai versoca cunan punllacunapimi pajtaricun. Shinallataj Bibliapica: “Cambaj huahuacunaca tucuicuna Mandaj Dios yachachishcami canga. Cambaj huahuacunapaj sumaj causaica ashtahuanmi miraringa. Cashcata ruranahuan sumajyachishcami cangui. Manchaihuan canaca cambajmanca mana cꞌuchuyana cashcamanta manchaihuan canamantaca carupimi cangui” ninmi. Cai nishcacunapishmi cunan punllacunapica pajtaricun (Isaías 54:​13, 14). Diabloca cai pachata mandacushpapish Jehová Diosta sirvijcuna muyundij Allpapi huillashpa catichunca mana jarcai tucunchu (2 Corintios 4:4). Shinaca Diosta sirvijcunaca cutinmi pai munashca shina ima mapa illajlla paitaca adorai tucunchij. Jehová Diosta chashna adorachunca imapish mana jarcai tucungachu.

¿IMATAJ TUCUNGA?

11. ¿Tucui ungidocuna jahua pachaman rijpipish Jesuspaj shujtaj ovejacuna mana paicunalla saquirinataca imamantataj seguros canchij?

¹¹ ¿Tucui ungidocuna jahua pachaman rijpica imataj tucunga? Jesusca ñucanchijta michij, tucui congregacioncunata pushajmi can. Paillatajmi: “Cancunata Pushajca shujllami,  paica Cristomi” nirca (Mateo 23:10). Jesusca ñucanchijta cuidanata, ayudanataca manataj saquingachu. Chaita yachashcamantami cai Allpapi caj Diosta alli sirvijcunaca imata mana manchangacuna. Jatun llaqui punllacunapi Jesús ñucanchijta ima shina ayudanataca mana tucuita yachanchijchu. Pero Bibliapi huaquin ejemplocunata ricushpami tranquilo sintirishun.

12. a) ¿Moisés huañushca qꞌuipaca Jehová Diosca ima shinataj paipaj pueblota cuidashpa catirca? b) ¿Elías shujtaj ladoman rijpica Jehová Diosca ima shinataj paipaj pueblota cuidashpa catirca? (Fotomantapish parlapai).

¹² Moisesca israelitacuna Jehová Dios cusha nishca Allpaman manaraj yaicujpimi huañurca. ¿Pai huañujpica israelitacunahuanca imataj tucurca? ¿Pushaj illaj, paicunallachu saquirirca? Mana. Paicuna Jehová Diosta tucuipi cazujpica Jehová Diosca paicunahuanmi carca. Por ejemplo, Moisés manaraj huañujllapitajmi Jehová Diosca Josueta israelitacunata pushachun churarca. Moisesca achca huatacunatami alli pushaj cachun Josueman yachachishca carca (Éxodo 33:11; Deuteronomio 34:9). Shinallataj Diosta alli sirvij shujtaj cꞌaricunapishmi Diospaj pueblota ñaupajman pushajcuna carca. Paicunaca mil, cien, cincuenta, diez gentecunatami mandajcuna carca (Deuteronomio 1:15). Shinaca Moisés huañujpipish shujtaj pushajcunami israelitacunataca cuidashpa catircacuna. Shinallataj Eliasca achca huatacunatami Jehová Diosta alli adorachun israelitacunataca ayudarca. Pero Jehová Dios Judá llajtaman richun Eliasta mandajpica ¿imataj tucurca? (2 Reyes 2:1; 2 Crónicas 21:12). ¿Israelpi tiyaj chunga jatun familiacunaca pushaj illajchu saquirircacuna? Mana. Eliasca achca huatacunatami Eliseoman alli pushaj cachun yachachishca carca. Shinallataj israelitacunataca ‘profetacunapaj churicunami’ ayudarcacuna. Paicunapish alli pushajcuna cangapaj capacitaciontami chasquishcacuna carca (2 Reyes 2:7). Caipi ricushca shinaca israelitacunaca siempremi alli pushajcunata charircacuna. Jehová Diosca chai pushajcunahuanmi israelitacuna paita sirvishpa catichun ayudarca.

13. ¿Hebreos 13:​5-pi tucuri partepica imatataj yachachin? (Fotomantapish parlapai).

¹³ Shinashpaca Jehová Diosca israelitacunataca cuidashpami catirca. ¿Tucui ungidocuna jahua pachaman rijpipish Jehová Diosca paipaj pueblota cuidashpa catingachu? Ari. Chaitaca tucui shunguhuanmi crinchij. Bibliapi nishca shinaca Jehová Diosca cai Allpapi paita sirvijcunataca manataj saquingachu (Hebreos 13:​5-paj tucuri parteta liyipai). Ima shinami Moisespish, Eliaspish alli pushajcuna  cachun shujtajcunata yachachircacuna, Cuerpo Gobernantepi caj huauquicunapishmi alli pushajcuna cachun shujtaj huauquicunata yachachicuncuna. Paicunaca achca huatacunatami mana ungidocuna caj huauquicunaman Diospaj pueblota ñaupajman pushachun yachachicushcacuna. Chaipajca ancianocunapaj, superintendente de circuitocunapaj, Comité de Sucursalcunapi sirvij huauquicunapaj, Betelpi sirvijcunata pushajcunapaj escuelacunatami callarichishcacuna. Shinallataj Cuerpo Gobernantepi caj huauquicunaca paicunapaj comitecunapi ayudaj huauquicunamanmi alli pushajcuna cachun ayudacushcacuna. Cai ayudaj huauquicunaca chꞌican chꞌican ruraicunata pajtachishpami achcata ayudacuncuna. Paicunaca Jesuspaj ovejitacunata ñaupajman pushangapajmi allichirishca can.

14. ¿Jesuspaj shujtaj ovejacunahuanca imataj tucunga?

¹⁴ ¿Caicamaca imatataj yachashcanchij? Jatun llaqui punllacuna tucuricujpi tucui ungidocuna jahua pachaman apashca cajpipish cai Allpapi saquirij Diosta alli sirvijcunaca paitami tucui shunguhuan sirvishpa catingacuna. Cai yuyaita intindinaca achca valishcami can. Jesús paipaj ovejacunata ñaupajman pushacushcamantami paicunaca Jehová Diosta sirvishpa catingacuna. Chai punllacunapica achca llajtacunami shuj yuyailla tucushpa paicunataca llaquichisha ningacuna. Bibliapica cai llajtacunataca Magog llajtamanta Gog ninmi (Ezequiel 38:​18-20). Pero chai llajtacuna Diospaj pueblota achcata llaquichisha nijpipish mana pudingacunachu. Jehovami paicunataca quishpichinga. Diosta sirvijcunaca paitami sirvishpa catingacuna. Apóstol Juanca muscuipi shinami Jesuspaj shujtaj ovejacunata ricurca. Paicunaca ‘mana yupaipaj yallitaj achcacunami’ carca. Juanca paicuna “jatun llaquimanta” quishpiricujtami ricurca. Shinashpaca Jesuspaj shujtaj ovejacunaca quishpiringacunami (Apocalipsis 7:​9, 14).

15, 16. a) Apocalipsis 17:​14-pi nishca shinaca, ¿ungidocunaca Armagedón macanacuipica imatataj rurangacuna? b) ¿Ungidocuna Armagedonpi macanacugrishcata yachashpaca ima shinataj sintirinchij?

¹⁵ “¿Ungidocunahuanca imataj tucunga? ¿Jahua pachaman rishpaca chaipica imatataj rurangacuna?” nishpachari tapurinchij. Chaitaca  Bibliapimi yachai tucunchij. Bibliapi nishca shinaca cai Allpata mandajcunaca “Malta Ovejahuanmi macanacungacuna”. Shinapish ‘Malta Ovejaca paicunatami mishanga’. Pero, ¿Malta Ovejataca pitaj ayudanga? Bibliapica: ‘Dios cayashcacuna, Dios agllashcacuna, Diosta tucui shunguhuan sirvijcunami paitaca ayudangacuna’ ninmi (Apocalipsis 17:​14-ta liyipai). ¿Paicunaca picunataj can? Jahua pachapi causarishca tucui ungidocunami can. Shinashpaca, ¿tucui ungidocuna jahua pachapi cashpaca puntapica imatataj rurangacuna? Paicunaca Diospaj enemigocunahuanmi macanacungacuna. Maijan ungidocunaca Jehová Diosta manaraj rijsishpaca macanacunatami munajcuna carca. Maijancunacarin soldadocunami carca. Pero Jehová Diosta rijsishpaca macanacunata saquishpami sumajta causanata yacharcacuna (Gálatas 5:22; 2 Tesalonicenses 3:16). Shinapish paicunaca jahua pachapi cashpaca Jesushuan, angelcunahuanmi shuj shinalla Diospaj enemigocunahuan macanacungacuna.

¹⁶ Caipi yuyashun. Cai Allpapi caj maijan ungidocunaca yuyajllacuna cashcamantami ña mana achca fuerzata charincuna. Pero paicunaca jahua pachapi cashpaca mana tucurij causaita charishcamantami achca poderta charingacuna. Chashnami Armagedón macanacuipica Mandaj Jesusta apoyai tucungacuna. Chai qꞌuipaca ungidocunaca Diosta sirvijcuna jucha illajcuna tucuchunmi ayudangacuna. Ungidocunaca cai Allpapi cashpaca Diosta sirvijcunataca achcatami ayudashcacuna. Pero jahua pachaman rishpaca Diospaj pueblotaca ashtahuanmi ayudai tucungacuna.

17. ¿Armagedón jatun macanacuipi Jehová Dios paita sirvijcunata quishpichinataca imamantataj seguros canchij?

¹⁷ ¿Canca Paraisopi causana esperanzatachu charingui? Shinashpaca, ¿Armagedón jatun macanacui callarijpica imatataj rurana cangui? Jehová Diospi shunguta churashpa pai mandashcacunatami cazuna cangui. Por ejemplo, Isaías 26:​20-pica: “Richij, cancunapaj huasiman yaicurichij. Pai alli tucungacama punguta huichcarishpa pungu huashapi ashacama miticuichij” ninmi. Jahua pachapi cajcunata, cai Allpapi paita sirvijcunata Jehová Dios ayudanata yachashpaca tranquilomi sintirinchij. Ñucanchijpish Apóstol Pablo shinami Jehová Diospica tucui shunguhuan crina canchij. Paica: ‘Gobiernocunapish, cai punlla tiyashcacunapish, shamuj punlla tiyashcacunapish Diospaj cꞌuyaimantaca manataj caruyachi tucungachu’ nircami (Romanos 8:​38, 39). Shinashpaca Jehová Dios ñucanchijta cꞌuyashcamanta manataj saquinata tucui shunguhuan crishunchij.