1. ¿Jayk’aqmi ajllasqa iñiqkuna janaq pachaman apasqa kanqaku?

 ÑAUPAQKUNAQA Jehová Diospa llaqtanpiqa “¿jayk’aqtaq ajllasqa hermanokunari janaq pachaman apasqa kanqaku?” nispan tapukuqku. Chay tiempopiqa “wakin ajllasqa hermanokunaqa Armagedón guerratapas pasanqakun, paraisopipas tiyanqakuraqmi, chaymantañan apasqa kanqaku” nispan nikuq. Ichaqa 2013 watapi 15 julio killapi lloqsimuq Qhawaq revistapin chay yachachikuyqa cambiapurqan. Chay revistapi nisqan jina, kay pachapi qhepaq ajllasqa iñiqkunaqa manaraq Armagedón guerra qallarishaqtinmi janaq pachaman apasqa kanqaku (Mat. 24:31).

2. ¿Imanispan wakin nishankuman?

² Ichaqa yaqapaschá tapukusunman: “¿Imataq kay pachapi qhepakuq “waj ovejakunamantari” kanqa? ¿Imataq paykunawanri pasanqa “manchay ñak’ariy tiempo” chayamuqtin?”, nispa (Juan 10:16; Mat. 24:21). Chaymantapas wakinqa yaqapaschá nishanku: “Ajllasqa hermanokunaqa janaq pachamantaq ripunqaku chayqa, ¿saqerparisqachu kasunchis? ¿Qonqarparisqachu kasunchis imaynataqri?”, nispa. ¿Imaraykun wakin chhaynata piensashankuman? Chaypaq yachasun Bibliapi iskay willakuymanta. Chaymantapas yachasunmi imaraykus chaykunamantaqa manapuni llakikunanchischu chayta.

MANAN CHAYQA PASANQACHU

3, 4. ¿Imanispan wakin hermanokuna piensashankuman, imarayku?

³ Wakinqa yaqapaschá nishanku: “Umalliq T’aqamanta hermanokuna manaña kay pachapi kaqtinqa, wakin hermanokunaqa yaqapaschá Diospa llaqtanmanta t’aqakapunqaku”, nispa. ¿Imaraykun wakin chhaynata piensashankuman? Chaypaq yachasun Bibliapi iskay willakuymanta. Chayta leespapaschá chhaynata piensashankuman. Juj kaq, chayqa pasarqan uma sacerdote Jehoiadapa tiemponpin. Chay Dios sonqo runan esposan Jehosabeajpiwan  juj wawata uywarqanku. Paypa sutinmi karqan Jehoás. Paykunaq yanapayninwanmi Jehoasqa allin rey karqan, allin runan karqan. Jehoiadá kausashaqtinqa tukuy sonqon Jehoasqa Jehová Diosta serviq. Jehoiadá wañupuqtinmi ichaqa Jehoasqa mana allinkunata ruwayta qallarirqan. Mana allin umalliqkunaq siminta uyarispan Jehová Diosmanta t’aqakapurqan (2 Crón. 24:​2, 15-19).

⁴ Iskay kaq, chayqa pasarqan apostolkunaq wañupusqan qhepamanmi. Apóstol Juan kausashaqtinqa, paypa yanapayninwanmi iñiqkunaqa allinta Jehová Diosta servisharqanku, tukuy sonqon paypi confiaqku (3 Juan 4). Apóstol Juanqa, Jesuspa wakin apostolninkuna jinan falso cristianokuna contra qaqata sayasharqan (1 Juan 2:18). Apóstol Juanpa wañupusqan qhepamanmi ichaqa millay onqoy jinaraq pantasqa yachachikuykunaqa mast’arikurqan. Pisi tiempollapin llapa iñiq t’aqakuna chay millay onqoywan contagiasqa kapurqanku.

5. ¿Ñaupa tiempopi Diosta serviqkunata jinachu pasanqa kay tiempopi llaqtanta, imaraykun chayta ninki?

⁵ ¿Paykuna jinachu tarikunqaku Cristoq waj ovejankunapas ajllasqa hermanokuna janaq pachaman apasqa kaqtinku? ¿Jehoás jinachu paykunapas Jehová Diosta saqerparinqaku? ¿Ñaupa tiempopi yaqa llapa iñiqkuna jinachu Diosmanta t’aqakuspa pantasqa yachachikuykunaman ripunqaku? ¡Manapunin chayqa pasanqachu! Manaña kay pachapi ajllasqa cristianokuna kanqachu chaypas, waj ovejamanta kaq hermanokunaqa tukuy sonqon servishallanqaku Jehová Diosta, chaymantapas allin cuidasqan paykunaqa kanqaku. ¿Imaraykun chayta nishanchis? Qatiqpi chaymanta yachasunchis.

DIOS SERVIYNINCHISQA MANAN QHELLICHASQACHU KANQA

6. ¿Ima kinsa tiempokunamantan yachasunchis?

⁶ ¿Imaraykun nisunman “Diosta servisqanchisqa manapunin qhellichasqachu kanqa, may jatun sasa tiempopiña tarikusun chaypas” nispa? Bibliaq willasqan jina, noqanchisqa Israel runakunaq tiemponmantapas, ñaupa tiempo iñiqkunaq tiemponmantapas jujniray tiempopin kausashanchis. ¿Imaraykun chayta nishanchis? Chaypaq yachasun kinsa jujniray tiempokunamanta. Ñaupaqtan yachasun ñaupa Israel runakunaq tiemponmanta, chaymantataq apostolkunaq wañupusqan qhepaman jamuq tiempomanta, ultimotataq “tukuy imapas mosoqyachisqa kanan tiempomanta” (Hech. 3:21).

7. ¿Imaraykun Dios sonqo Israel runakuna mana pisipanankuchu karqan yaqa llapa runakunata reykunatapas mana allinkunata ruwaqta rikuspanku?

⁷ Ñaupa Israel runakunaq tiempon. Manaraq wañupushaspan Moisesqa Israel runakunata nirqan: “Noqaqa allintan yachani noqa wañuqtiyqa imaymana mana allinkuna ruwanaykichista; pantankichismi reqsichisqay ñanmantapas”, nispa (Deut. 31:29). Chaymantapas willarqanmi imaynas Dios contra jatariqtinku lliu llaqtakunaman ch’eqerichisqa kananku karqan chayta (Deut. 28:​35, 36). ¿Junt’akurqanchu Moisespa rimasqan? Arí junt’akurqanmi. Askha watakunan paykunaqa Diosta mana kasukuspa kausarqanku, kamachiqninku reykunapas manan kasukuqkuchu, paykunatan yaqa llapa runakunapas qatikuqku. Chhayna kasqankuraykun Jehová Diosqa chay runakunata castigarqan, prohibirqanmi chay llaqtapi reykuna kanantapas (Ezeq. 21:​25-27). Ichaqa, Dios sonqo runakunaqa maytachá kallpachakurqanku Diospa simin junt’akusqanta rikuspankuqa (Isa. 55:​10, 11).

8. ¿Imaraykun mana admirakunanchischu apostolkunaq wañupusqan qhepaman iñiqkunawan imachus pasasqanmanta?

⁸ Apostolkunaq wañupusqan qhepaman jamuq tiempo. Apostolkunaq wañupusqan qhepamanqa llapa iñiq t’aqakunan mana allin ñanman jaykupurqanku. Chaywanqa manan admirakunanchischu, ¿imarayku? Ñaupaqmantapachan Jesusqa willarqanña chaykuna pasananta (Mat.  7:​21-23; 13:​24-30, 36-43). Watakunaq pasasqan qhepamantaq apóstol Pablo, Pedro, Juan ima willarqanku imaynas Jesuspa willasqanqa junt’akusharqanña chayta (2 Tes. 2:​3, 7; 2 Ped. 2:1; 1 Juan 2:18). Último apostolpaq wañupusqan qhepamanqa aswan mana allinmanmi tukupurqanku, chhaynapin chay pantasqa religionta sutichakurqan “Jatun Babilonia” nispa, chaykunaqa Bibliapi willasqanman jinapunin pasasharqan.

9. ¿Imapin jujniray tiemponchis kanman ñaupaqpi rimamusqanchis tiempokunamanta?

⁹ “Tukuy imapas mosoqyachisqa kanan tiempo”. Noqanchisqa manan ñaupa Israel runakunaq tiemponpichu, nitaq Diosmanta t’aqakuq ñaupa iñiqkunaq tiemponpichu kausashanchis. Noqanchisqa juj tiempopin kausashanchis. ¿Ima tiempotaq chay tiempori? Chay tiempotan reqsikun “tukukuy p’unchaykuna” nispa (2 Tim. 3:1). Ichaqa Bibliaq willasqan jina, juj tiempon chay p’unchaykunapi qallarillarqantaq. Chaytan nikun: “Tukuy imapas mosoqyachisqa kanan tiempo”, nispa (Hech. 3:21). Chay tiempoqa 1914 watapin qallarirqan, tukupunqataq Jesuspa gobiernonpi runakuna ch’uyaman tukupuqtinku, kay pachapas munay paraíso kapuqtin. Ichaqa, ¿imatataq Jehová Diosri mosoqyachirqan 1914 watapi? Janaq pachapin Jesusta rey kananpaq churarqan. Chhaynapin jujmanta Jehová Diospa sutinpi kamachikuq rijurimurqan, payqa Davidpa mirayninmantan jamurqan. Ichaqa manan chayllachu pasarqan chay tiempopiqa. Chay qhepallamanmi Diosta serviyqa ch’uyanchasqa kapurqan (Isa. 2:​2-4; Ezeq. 11:​17-20). Ichaqa, ¿qhellichakunmanchu jujmanta Diosta adorasqanchis?

10. a) ¿Imaninmi Biblia kay tiemponchispi Diosta adoraymanta? (Isaías 54:17). b) ¿Imaraykun nisunman “Isaiaspa willasqan profeciaqa kallpachawanchismi” nispa?

¹⁰ (Leey Isaías 54:17). Chaypin nishan: “Manan ima ruwasqanku armapas imanasunkichispaschu”, nispa. Chay profeciaq nisqanqa kay tiemponchispin junt’akushan. Bibliapi juj profeciakunapas junt’akushanmi. Juj kaqmi Isaías 54:​13, 14 textoq nisqan, chaypin nin: “Llapa wawaykikunan Jehová Diospa yachachisqan kanqa, wawaykikunaq thaj kayninqa mana tukurikuqmi kanqa. Chanin kay patapin allin tajyachisqa kanki. […] Manan imatapas manchakunkichu, manan imamantapas khatatatankichu, manchakuyqa manan atipasunkichu”, nispa. Chaypi nisqan jina, Diospa llaqtanpiqa juj jatun educacionmi aparikushan; manan “kay pachata kamachiq” Saqrapas chay educacionpa aparikusqantaqa sayachinqachu (2 Cor. 4:4). Diosta adorayqa ch’uyañan kapun. ¡Manan pipas chaytaqa jayk’aqpas qhellichanqañachu! Manataqmi ima ruwasqa armapas imanawasunpaschu.

 KAYQA PASANQAPUNIN

11. ¿Imaraykun nisunman “waj t’aqa ovejakunaqa, manan qonqasqachu kanqa ajllasqa hermanokuna janaq pachaman ripuqtinkuqa” nispa?

¹¹ ¿Iman pasanqapuni ajllasqa cristianokuna janaq pachaman apasqa kaqtinku? Yachasqanchis jina, Jesusmi michiqninchisqa. Paymi kay pachapi Diospa llaqtanta umallishan. Pay kikinmi nirqan: “Jujllan umalliykichisqa, payqa Criston”, nispa (Mat. 23:10). Paytaq umallinchis gobiernaqninchispas chayqa manapunin payqa saqerpariwasunchu. Chhaynaqa kay pachapi qhepakuq cristianokunaqa manan imatapas manchakunankuchu kanqa. Manapaschá yachanchischu imatapunis Cristo ruwanqa Diospa llaqtanrayku chayta. Ichaqa kanmi imaynatas ñaupa tiempopi Diosninchis llaqtanta qhawarirqan chaymanta willaq ejemplokuna. Wakinta kunan qhawarisunchis.

12. a) ¿Imaynatan Jehová Dios llaqtanta cuidarqan Moisespa wañupusqan qhepaman? b) ¿Imaynatan cuidarqan Eliaspa juj ladoman ripusqan qhepamanpas? (Qhaway kay parrafopaq dibujota).

¹² Moisespa tiemponmanta rimasun. Moisesqa Israel runakuna manaraq prometesqa jallp’aman jaykushaqtinmi wañukapurqan. Wañupurqantaq chayqa, ¿iman pasanman karqan Diospa llaqtanwan? ¿Manañachu pipas paykunata pusarinman karqan? Manan chhaynachu karqan, Jehová Diosqa paykunawanmi kasharqan. Chaymantapas manaraq Moisés wañupushaqtinmi Jehová Dios willarqan imaynas chay Israel runakunataqa Josué pusanan karqan chayta; paytaqa unayñan Moisesqa capacitasharqan (Éx. 33:11; Deut. 34:9). Chaymantapas Israel llaqtapiqa karqanmi experienciayoq runakuna. Waranqanpi, pachajninpi, pisqa chunkanpi, chunkanpi umalliq runakuna (Deut. 1:15). Chhaynaqa chay tiempopi Diospa llaqtanqa allin cuidasqan kasharqan. Eliaspa tiemponmantañataq rimasun. Eliasqa askha watakunan Israel runakunata yanaparqan Jehová Diosta yupaychanankupaq. Ichaqa juj kutinmi Jehová Diosqa payta Judá llaqtaman kacharqan (2 Rey. 2:1; 2 Crón. 21:12). Chhaynaqa, ¿wijch’urparisqachu karqanku Israelpi chunka ayllukuna? Manan. Eliseon chaypi kasharqan, paytaqa askha watakunan Elías capacitarqan. “Profetakunaq churinkunapas” chaypin kasharqanku, paykunaqa yaqachus jina escuelakunapi allin capacitasqa kankuman karqan (2 Rey. 2:7). Rikusqanchis jina, kay pachapiqa karqanpunin Diospa llaqtanta pusariq Dios sonqo runakuna. Jehová Diosqa munayninman jinan imatapas ruwaq, cuidaqpunin kamachin runakunatapas.

13. Hebreos 13:5b nisqanman jina, ¿imatan mana jayk’aqpas Jehová Dios ruwanqachu? (Qhaway kay parrafopaq fotokunata).

¹³ Bibliapi chay willakuykunata qhawarisqanchisman jina, ¿iman pasanqa ajllasqa hermanokuna janaq pachaman ripuqtin? ¿Ima niwaqtaq?  Manapaschá chaypiqa nishutaraqchu piensananchis kanqa. Ichaqa Bibliaq willasqanman jinaqa, Jehová Diosqa manan jayk’aqpas kay pachapi qhepaqkunataqa wijch’urparinqachu (leey Hebreos 13:5b). Moisés jina, Elías jinan kay tiempopi Diospa llaqtanta pusariq iñiqkunapas juj iñiqmasikunata capacitashanku. Unayñan Umalliq T’aqamanta hermanokunaqa waj ovejamanta kaq hermanokunata capacitashanku Diospa llaqtanta pusarinankupaq. Chay capacitacionkuna aparikunanpaqmi escuelakuna kichakurqan. Kanmi escuelakuna umalliqkunapaq, watukuq umalliqkunapaq, sucursalkunapi encargakuq umalliqkunapaq, Betelpi llank’aq umalliqkunapaq, jinallataq juj ruwaykunapi umalliqkunapaqpas. Chaymantapas Umalliq T’aqamanta hermanokunaqa sapankankun yanapaqnin hermanokunata allinta capacitashanku. Chay capacitasqa hermanokunaqa allintañan llank’ashanku imaymana ruwaykunapi. Paykunaqa allin preparasqañan kashanku Cristoq ovejankunata qhawarinankupaq.

14. ¿Imatan yachanchis llapa kaypi rimasqanchismanta?

¹⁴ ¿Imatan yachasunman llapa chaykunamanta? Ajllasqa hermanokuna janaq pachaman apasqa kaqtinkuqa, kay pachapi qhepakuq Dios sonqo runakunaqa servishallanqakun Diostaqa. Jesusmi paykunataqa umallinqa, manan juj chhikantapas qhepamanqa kutirinqakuchu. Arí, paykunamanqa llapa nacionkunan phawaykamunqa, chay nacionkunatan Biblia sutichan Magog llaqtamanta Gog nispa (Ezeq. 38:​18-20). Ichaqa manan chay nacionkunaqa imananqakupaschu, manataqmi Dios servisqankutapas sayachiyta atinqakuchu, aswanmi Jehová Dios paykunataqa libranqa. Juj rijuriypin apóstol Juan rikurqan “mana piqpa yupay atinan ancha askha runakunata”, paykunaqa Cristoq waj ovejankunan kanku. Apóstol Juanpa nisqanman jina, chay “ancha askha runakunaqa” “manchay ñak’ariymantan” lloqsimusharqanku. ¿Imatan chaymanta yachasunman? Diosta serviqkunaqa librasqapunin kanqaku (Apo. 7:​9, 14).

15, 16. Apocalipsis 17:14 nisqanman jina, ¿imatan ruwanqaku janaq pachapaq ajllasqa hermanokuna Armagedón guerra kaqtin, imaraykun nisunman “chayqa allinpunin” nispa?

¹⁵ Wakinqa yaqapaschá tapukusunman: “¿Imatataq ajllasqa hermanokunari ruwanqaku janaq pachaman apasqa kaspanku?”, nispa. Bibliapiqa willanmi chaymantapas. Bibliaq willasqanman  jinaqa, kay pacha gobiernokunas “Cordero contra maqanakunqaku”. Ichaqa manas atipanqakuchu, aswansi “Cordero paykunata atipanqa”. Ichaqa, ¿sapallanchu Cordero maqanakunqa? Manan, Bibliapi nisqan jina paywanmi kashanqaku “Diospa wajasqankuna, ajllasqankuna” (leey Apocalipsis 17:14). ¿Pikunan paykuna kankuman? Kausarimpuq janaq pachapaq ajllasqa hermanokunan. Chhaynaqa, janaq pachaman últimota chayaq hermanokunaqa maqanakunankupaqmi ñaupaqtaqa kamachisqa kanqaku. ¡Admirakunapaqmi chayqa ¿riki?! Wakin ajllasqa hermanokunamanqa manaraq Testigo kashaqtinkuqa gustaqmi maqanakuy. Paykunamanta wakinqa ejercitopi iman karqanku. Ichaqa Diosta reqsisqankuraykun llapa chaykunata saqepurqanku, jinaspa yacharqanku thaj kausayta (Gál. 5:22; 2 Tes. 3:16). Janaq pachaman ripuspankun ichaqa Cristowan kuska juj angelkunawan kuska maqanakunqaku, Diosta cheqnikuq runakuna contran último guerrata ruwanqaku.

¹⁶ Kaypi piensarisun, kay pachapiraq kashaq wakin ajllasqa hermanokunaqa sinchi kuraqñan kanku, manataqmi kallpankupas kanñachu. Janaq pachaman ripuspankun ichaqa mana jayk’aq wañuqman kallpasapaman ima tukupunqaku. Cristowan kuskan paykunaqa maqanakunqaku, Armagedón guerra pasaytan ichaqa kay pachapi kashaq runakunata yanapanqaku ch’uya runakuna kapunankupaq. Chhaynaqa, ¿ima nisunmantaq? Chay hermanokunaqa janaq pachaman ripuspan astawanraq iñiqmasinkunataqa yanapanqaku. Kay pachallapi kaspaqa manapaschá chhaynataqa yanapayta atinkumanchu.

17. ¿Imaraykun nisunman “Diospa kamachinkunaqa librasqapunin kanqaku Armagedón guerrapiqa” nispa?

¹⁷ ¿Waj ovejakunamanta kaqkuna ukhupichu kashanki? Chhayna kaqtinqa, ¿imatan ruwanayki kanqa Armagedón guerra qallariqtin, chay jatun p’unchay chayamuqtin? Jehová Diospin tukuy sonqo confianayki kanqa, kamachikuyninkunaman jinan imatapas ruwanayki kanqa; Isaías 26:20 textopi nisqantapas kasukunaykin kanqa. Chaypin nin: “Phaway ukhu wasiykikunaman jaykuy, jaykuspataq punkuykita wisq’akamuy, chaypi juj ratu pakakamuy, phiñakuy thasnunankama pakakamuy”, nispa. Chay tiempopiqa kay pachapi qhepakuq iñiqkunapas janaq pachaman ripuqkunapas manan imanasqapaschu kanqaku. ¡May kusikunapaqmi chayta yachayqa ¿riki?! Apóstol Pabloq nisqan jina, “manan ni autoridadkunapas, ni kay tiempopi ima kaqpas, ni jamuq tiempopi ima kaqpas” “Diospa munakuyninmantaqa t’aqawasunchu” (Rom. 8:​38, 39). Amapunin kaytaqa qonqankichu: Jehová Diosqa manapunin jayk’aqpas saqerparisunkichu.