1. Aea te aronga akatainuia e apainaia ai ki runga i te rangi?

 I TE au mataiti i aereia, kua tamanako to Iehova iti tangata, ‘Aea te toenga o te aronga akatainuia e apainaia ai ki runga i te rangi?’ Kua irinaki tatou e ka noo ua tetai pae o te aronga akatainuia ki runga i te enua Parataito i muri ake i te tamaki o Aramakito. Inara i roto i Te Punanga Tiaki o Tiurai 15, 2013, kua kite mai tatou e pouroa te aronga akatainuia, ka akatuia ratou ki te rangi i mua ake ka tupu ei te tamaki o Aramakito.—Mata. 24:31.

2. Eaa te uianga ka uriuri tatou i roto i teia atikara?

² Inara, penei ka ui tatou: Eaa te ka tupu ki te au “mamoe ke atu” a Karaiti te ka tavini tiratiratu ia Iehova i te enua nei i te tuatau o te “mate maata”? (Ioa. 10:16; Mata. 24:21) Tetai pae, ka taitaia ratou me apainaia to ratou au taeake e te au tuaine akatainuia ki runga i te rangi. Ka uriuri tatou e rua akaraanga i roto i te Pipiria. E oti ka akara tatou i te au tumu kare tatou e manata.

EAA TE KA KORE E TUPU?

3-4. Eaa ta tetai pae ka manako, e eaa te tumu?

³ Penei ka manako tetai pae e ka akaruke te mamoe ke atu i te tuatua mou me kare te au taeake akatainuia o te Pupu Akaaere e arataki ia ratou. Penei ka manako akapera ratou no tetai au akaraanga i roto i te Pipiria. Ka uriuri tatou e rua akaraanga. Te mea mua, ko te Taunga Maata ko Iehoiada. E tavini tiratiratu aia no te Atua. Kua paruru raua ko tana vaine ko Iehoseba i te manga tamaiti ko Ioasa e kua tauturu iaia kia riro mai ei ariki meitaki e te tiratiratu. I te tuatau e ora ra a Iehoiada, kua rave a Ioasa i te mea tika. Inara te mate anga a Iehoiada, kua  rave a Ioasa i te kino. Kua akarongo aia ki te ui ariki kino e kua akaruke ia Iehova.—2 Para. 24:​2, 15-19.

⁴ Ko te rua o te akaraanga, ko te au Kerititiano tei noo ana i muri ake i te tuatau o te au apotetoro. Ko Ioane te apotetoro openga tei mate atu. Iaia e ora ra, kua tauturu aia i te au Kerititiano kia vai tiratiratu. (3 Ioa. 4) Kapiti mai ki te au apotetoro ke atu a Iesu, kua angaanga pakari a Ioane i te paruru i te au putuputuanga mei te aronga e apii ra i te au apiianga pikikaa. (1 Ioa. 2:18; 2 Tesa. 2:7) Inara te mate anga a Ioane, e maata te au putuputuanga tei āriki i te au apiianga pikikaa. I te au mataiti i aereia, kua totoa te apiianga pikikaa ki te au putuputuanga katoatoa.

5. Eaa ta tatou ka kite mai mei teia nga akaraanga Pipiria?

⁵ Te akaari maira ainei teia nga akaraanga Pipiria e me apainaia te aronga akatainuia ki te rangi, penei ka rave te au mamoe ke atu i te kino mei ia Ioasa rai? Me kore ka aru ainei ratou i te au apiianga pikikaa mei tei tupu ki te putuputuanga i te mate anga te au apotetoro? Pauanga, kare rava! E mea papu, me akaruke te aronga akatainuia i te enua, ka akonoia te mamoe ke atu e ka maroiroi ua ratou i te tavini i te Atua. Eaa i papu ei ia tatou?

KARE TE AKAMORIANGA MOU E AKAKINOIA

6. Eaa te au tuatau e toru ta tatou ka akamanako?

⁶ Eaa i papu ei ia tatou e kare te akamorianga mou e akakinoia noatu ka tupu te au turanga ngatā? No te mea kua akamārama mai te Pipiria e e tuke te tuatau e noo nei tatou i te taime o te ngati Iseraela, e i muri ake te mate anga te au apotetoro. No reira ka akara meitaki tatou i teia au tuatau e toru: (1) Te tuatau o te ngati Iseraela, (2) te tuatau i muri ake te mate anga te au apotetoro, e te (3) to tatou tuatau, “te tuatau e tupu ei te au mea katoa nei.”—Anga. 3:21.

7. Eaa te tumu kare te au tavini tiratiratu o Iseraela i taitaia te rave anga te iti tangata e te au ariki i te kino?

⁷ Te tuatau o te ngati Iseraela. I mua ake ka mate ei aia, kua akakite a Mose ki te ngati Iseraela: “Kua kite oki au e, kia mate au ra, ka kino rava kotou, e ka akaruke kotou i te arataa taku i akaue ia kotou na.” (Deu. 31:29) Kua akamatakite katoa a Mose i te ngati Iseraela e me rave ratou i te kino, ka akatuikaaia ratou. (Deu. 28:​35, 36) Kua tupu ainei teia kia ratou? Ae. I te au anere mataiti i aru mai, e maata te au ariki tei rave i te kino e kua aru te iti tangata i to ratou akaraanga. No teia tumu, kua akautunga a Iehova i te ngati Iseraela e kua takore i te tutaraanga a to ratou au ariki. (Eze. 21:​25-27) Inara, kua ngakau toa te au tavini tiratiratu i Iseraela te kite anga e kua tupu te au tuatua a te Atua.—Isa. 55:​10, 11.

8. Ka poitirere ainei tatou e kua kino takiri te putuputuanga Kerititiano i muri ake i te anere mataiti? Akamārama mai.

⁸ Te tuatau i muri ake te mate anga te au apotetoro. Ka poitirere ainei tatou e kua kino takiri te putuputuanga Kerititiano i muri ake i te 100 mataiti T.N.? Kare. Kua totou a Iesu e ka totoa te au apiianga pikikaa. (Mata. 7:​21-23; 13:​24-30, 36-43) Kua akapapu te au apotetoro ko Paulo, Petero e Ioane e kua akamata ta Iesu totou i te akatupuia i te anere mataiti mua T.N. (2 Tesa. 2:​3, 7;  2 Pete. 2:1; 1 Ioa. 2:18) I muri ake i te anere mataiti T.N., kua akakinoia te au putuputuanga pouroa. Kua riro te au Kerititiano pikikaa ei tuanga no Babulonia Maata, koia oki te au akonoanga pikikaa o te ao katoa. Ko ta Iesu i totou, kua akatupuia te reira.

9. Akapeea i tuke ei te tuatau e noo nei tatou ki te tuatau o te ngati Iseraela e i te tuatau i muri ake i te mate anga te au apotetoro?

⁹ “Te tuatau e tupu ei te au mea katoa nei.” E tuke te tuatau e noo nei tatou ki te tuatau o te ngati Iseraela e i te tuatau i muri ake i te mate anga te au apotetoro i muri ake i te anere mataiti T.N. Kua kapikiia to tatou tuatau e ko te “tuatau openga” o teia akatereanga kino. (2 Timo. 3:1) Inara akakite mai te Pipiria e tuatau ke tetai tei akamata i taua taime ra. Ka vai rai tera tuatau e tae ua atu ki te akatupu anga te Patireia o te Mesia i to te Atua anoano kia apa kore te tangata e kia riro te enua ei Parataito. Kua kapikiia te reira ko “te tuatau e tupu ei te au mea katoa nei.” (Anga. 3:21) Kua akamata teia i te 1914. Eaa tei tupu i tera mataiti? Kua tutara a Iesu ei Ariki i te rangi. No reira, kua iki a Iehova i tetai tutara no roto mai i te uanga a te Ariki ko Davida ei mata iaia. Inara, kare ko tera ua ta Iehova i akatupu. Kare i roa i muri mai, kua akatinamouia te akamorianga mou! (Isa. 2:​2-4; Eze. 11:​17-20) Ka akakinoia akaou ainei te reira?

10. (a) Eaa ta te Pipiria e totou ra no te akamorianga mou i to tatou tuatau? (Isaia 54:17) (e) Eaa i riro ei teia au totou ei akapumaana anga?

¹⁰ E tatau ia Isaia 54:17. Akamanako ana i teia totou: “Te taoonga ra noou i angaia’i ra, kare ïa e manuia”! Te akatupuia nei teia totou i teia tuatau. Ka akapumaana katoa teia au tuatua ia tatou i teia tuatau: “E te au tamariki katoa naau ra e apiiia e Iehova; e ei au nuingangare to te au tamariki naau ra. E akatinamouia koe i te tuatua-tika: . . . kare oki koe e mataku; e i te rikarika, kare oki te reira e akavaitata mai ia koe ra.” (Isa. 54:​13, 14) Kare “te atua o teianei ao” ko Satani e rauka i te tāpu i te angaanga a te iti tangata o Iehova i te apii i tetai ke no runga iaia. (2 Kori. 4:4) Ka akatinamouia te akamorianga mou e kare e akakinoia. Ka vai rai te reira e tuatau ua atu. Ko te taoonga no tatou i angaia ra, kare ïa e manuia!

 EAA TE KA TUPU?

11. Eaa tatou ka irinaki ei kare te aronga maata rava e akarukeia me apainaia te aronga akatainuia ki te rangi?

¹¹ Eaa te ka tupu me apainaia te aronga akatainuia ki te rangi? E akamaara, ko Iesu to tatou Tiaki. Koia te upoko o te putuputuanga. Akakite a Iesu: “Okotai o kotou Arataki, ko te Mesia.” (Mata. 23:10) Ka akono ua rai to tatou Ariki i te rangi ia tatou. No te mea ko Iesu to tatou Arataki, kare tana au pipi e mataku. E tika, kare tatou i kite ka akapeea a Iesu me arataki i tona iti tangata i te reira tuatau. No reira ka uriuri tatou i tetai au akaraanga Pipiria te ka akapumaana ia tatou.

12. Akapeea a Iehova te tauturu anga i tona iti tangata (a) i muri ake i te mate anga a Mose? (e) i muri ake i te orongaia anga tetai angaanga ke na Elia? (Akara katoa i te tutu.)

¹² I mua ake ka tomo ei te ngati Iseraela ki roto i te Enua Taputouia, kua mate a Mose. Eaa tei tupu ki te iti tangata o te Atua? Kua akamutu ainei a Iehova i te tauturu ia ratou? Kare. Kia vai tiratiratu ua ratou, ka tauturu a Iehova ia ratou. I mua ake ka mate ei a Mose, kua akakite a Iehova kiaia kia iki ia Iosua ei arataki i te iti tangata. I te au mataiti i aereia, kua tereni meitaki a Mose ia Iosua. (Exo. 33:11; Deu. 34:9) E pera, e maata te au tane tukatau ei arataki i te iti tangata—te au rangatira no te tauatini, au anere, rima ngauru e te tai ngauru. (Deu. 1:15) Kua akono meitakiia te iti tangata o te Atua. Aite katoa ki te akaraanga o Elia. Kua angaanga pakari aia no tetai au mataiti i te tauturu i te ngati Iseraela kia akamori ia Iehova. Inara i muri mai, kua ikiia aia kia tavini i tetai ngai ke i Iuda. (2 Ari. 2:1; 2 Para. 21:12) Kua akarukeia ainei te aronga tiratiratu o te kopu ngauru o Iseraela? Kare. Kua tereni a Elia ia Elisaia no tetai au mataiti. Kapiti mai ko “te au tamariki peroveta,” kua tereni katoaia i roto i te au apii. (2 Ari. 2:7) No reira, e maata te au tane tiratiratu ei arataki i to te Atua iti tangata. Kua akatupu ua rai a Iehova i tona akakoroanga, e kua tauturu i tona au tavini tiratiratu.

13. Eaa ta Iehova i taputou no tatou i roto ia Ebera 13:5e? (Akara katoa i te tutu.)

¹³ Mei teia nga akaraanga, eaa i toou manako ka tupu me apainaia te toenga o te au taeake akatainuia ki te rangi? Eiaa  tatou e manamanata. Te akataka maira te Pipiria e: Kare rava a Iehova e akaruke i tona iti tangata i te enua. (E tatau ia Ebera 13:5e.) Mei ia Mose raua ko Elia, kua mārama te pupu akatainuia i te puapinga no te tereni i tetai ke. No tetai tuatau roa, kua tereni te au taeake o te Pupu Akaaere i te au taeake mei te mamoe ke atu ei arataki i te iti tangata o te Atua. Ei akaraanga, kua akanooia te au apii na te aronga pakari, te au akaaere tutaka, te au taeake o te Kumiti Betela, te au akaaere i Betela e i tetai ke. Kua tereni katoa te Pupu Akaaere i te au taeake tauturu ki te au Kumiti tukeke o te Pupu Akaaere. Te rave maroiroi nei ratou i te au apainga i roto i te akaaerenga e kua papa meitaki ratou i te akono ua atu i te au mamoe a Karaiti.

14. Eaa te manako puapinga o teia uriurianga?

¹⁴ Ko teia te manako puapinga no ta tatou uriurianga: Me apainaia te toenga o te aronga akatainuia ki te rangi vaitata i te openga o te mate maata, ka akamori ua rai te iti tangata o Iehova Iaia i runga i te enua. Na roto i te aratakianga a Iesu, ka vai tinamou ua te akamorianga mou a te Atua. E tika, i te reira tuatau ka tamaki mai tetai pupu enua tei kapikiia e ko Goga o Magoga i te iti tangata o te Atua. (Eze. 38:​18-20) Kare ra te reira e tāpu i te iti tangata o te Atua mei te akamori anga iaia. Ka akaora aia ia ratou! I roto i tetai orama, kua kite te apotetoro ko Ioane i te “aronga maata rava” o te au mamoe ke atu a Karaiti. Kua akakiteia kia Ioane e “ko te aronga teia i aere mai mei roto i te mate maata.” (Apo. 7:​9, 14) Ae, e mea papu e ka akaora a Iehova ia ratou!

15-16. Ia Apokalupo 17:​14, eaa ta te aronga akatainuia o Karaiti ka rave i te tuatau o Aramakito, e eaa te akamaroiroianga?

¹⁵ Penei ka ui tetai pae: ‘Akapeea te au taeake akatainuia? Eaa ta ratou ka rave me apainaia ratou ki runga i te rangi?’ Ka pau tika mai te Pipiria i te reira. Te akakite maira e ka tamaki atu te  au kavamani o teianei ao ki “te Punua-mamoe.” Kare ra ratou e autu. Karanga te irava “e pou ratou i te Punua-mamoe.” E koai ma te ka tauturu iaia? Pau mai te irava. “E aronga kapikiia ïa, e te ikiia, e te tuatua-mou.” (E tatau ia Apokalupo 17:14.) Koai ma ratou? Ko te au taeake akatainuia! No reira me apainaia te toenga o te aronga akatainuia ki te rangi vaitata ki te openga o te mate maata, ta ratou angaanga mua, ko te tamaki. E angaanga umere tikai te reira! I mua ake ka riro mai ratou ei Au Kite no Iehova, kua piri ana tetai au taeake akatainuia ki roto i te tamaki. Kua rave ana tetai pae i te angaanga vaeau. Inara i muri mai kua riro mai ratou ei au Kerititiano mou e kua akatupu i te ’au ki tetai ke. (Gala. 5:22; 2 Tesa. 3:16) Kua akamutu ratou i te tamaki. No reira me apainaia ratou ki runga i te rangi, ka angaanga kapiti ratou kia Karaiti e tana au angera tapu e ka tamaki atu ratou i te au enemi o te Atua.

¹⁶ Akamanako ana! Ia ratou i runga i te enua, e aronga pakarikari e te paruparu tetai pae o te aronga akatainuia. Inara me apainaia ratou ki runga i te rangi, ka riro mai ratou ei au vaerua matutu e te mate kore te ka tamaki atu i te pae i to ratou Ariki Tumutoa ko Iesu Mesia. I muri ake i te tamaki o Aramakito, ka angaanga ratou ma Iesu i te tauturu i te tangata kia riro mai ei aronga apa kore. Kare e ekoko, e maata atu te meitaki ta ratou ka rave mei te rangi no te tauturu i to ratou au taeake e te au tuaine akaperepereia tei kore i rauka ana ia ratou ei aronga apa ua i te enua!

17. Akapeea tatou i kite ei e ka paruruia te au tavini o te Atua i te tuatau o Aramakito?

¹⁷ Ko koe ainei tetai o te mamoe ke atu? Me koia ïa, eaa i reira taau ka rave me akamata te tamaki o Aramakito? E irinaki kia Iehova e e aru i tana aratakianga. Eaa te ō maira? Karanga ra te Pipiria: “E tomo ki roto i to au pia ra, e topiri marie i toou au pa ia koe: e pipini ei koe i tetai manga tuatau iti kia okotai ake kamoanga mata, kia ngaro ke atu taua riri otooto nei.” (Isa. 26:20) A te reira tuatau, ka paruruia te au tavini tiratiratu o te Atua i te rangi e i te enua. Mei te apotetoro ko Paulo, kua papu ia tatou “kare oki te au mea mana, kare oki te au mea e vai nei, kare oki te au mea e ka tupu a muri atu, . . . e tika kia akataka ke ia tatou i te aroa o te Atua.” (Roma 8:​38, 39) E akamaara: Te akaperepere ra a Iehova ia koe, e kare rava aia e akaruke ia koe!