1. Кеда ка овен ко небо са о помазаникија?

 Е ЈЕХОВАСКЕРЕ слуге англедер пучена пе сине: „Кеда ка овел лендо ко небо о последно помазанико?“ Англедер мислинаја сине кај откеда ка завршинел и војна Армагедон, акате ки пхув ко рај шај ка ачховен несаве помазаникија панда несаво време аменцар. Ама ки Стражарско кула таро 15 јули 2013 берш, дознајнѓем кај са о помазаникија со ка овен панда ки пхув, ка овен ленде ко небо англедер те почминел о Армагедон (Мат. 24:31).

2. Со шај пучена пе несаве амендар хем со ка дикха ки акаја статија?

² Ама, несаве амендар шај пучена пе: „Со ка случинел пе е Христосескере јавере бакхренцар кола со верно ка служинен леске акате ки пхув џикоте трајнела и бари неволја?“ (Јован 10:16; Мат. 24:21). Несаве шај тане секириме кај нане те овел кој те поможинел ленге хем те водинел лен откеда ленгере мангле помазиме пхраља хем пхења ка овен ленде ко небо. Те дикха дуј библиска извештаија соске шај несаве лендар мислинена аѓаар. Пало адава, ка дикха несаве причине соске на ваљани те ова секириме.

СО НАНЕ ТЕ СЛУЧИНЕЛ ПЕ?

3-4. Со шај пучена пе несаве хем соске?

³ Несаве шај пучена пе дали о јавера бакхре ка чхинавен те служинен е Јеховаске, откеда о помазаникија таро Водечко тело нане више те овен ленцар те шај те водинен лен. Ола шај дарана кај ка случинел пе адава адалеске со џанена несаве библиска извештаија коте со случинѓа пе нешто слично. Те дикха дуј примерија. О прво тано башо првосвештенико о Јодај. Ов сине верно слуга е Девлеске. Ов хем лескири ромни и Јосавета заштитинѓе е Јоасе кеда сине тикно хем поможинѓе леске те овел шукар хем верно цари. Са џикоте о Јодај сине џивдо, о Јоас служинела сине е Јеховаске хем керела сине  адава сој исправно. Ама кратко откеда о Јодај муло, о Јоас почминѓа те керел лошна буќа. Ов шунѓа е лошна кнезон хем чхинавѓа те служинел е Јеховаске (2. Лет. 24:2, 15-19).

⁴ О следно пример тано башо христијања таро дујто веко. О последно апостоли со муло сине о Јован. Са џикоте сине џивдо, ов поможинѓа буте христијаненге те ачховен верна е Јеховаске (3. Јов. 4). Исто сар са о јавера верна апостолија е Исусескере, о Јован да дела пестар сине са, те шај те заштитинел е собраниен таро отпадништво кова со бут ширинела пе сине (1. Јов. 2:18; 2. Сол. 2:7). Ама пало лескоро мерибе, бут џене таро собранија уле отпадникија. Башо само некобор децение, о христијанско собрание целосно руминдило ко духовно поглед.

5. Кеда читинаја о дуј библиска извештаија, саво заклучок на ваљани те ана?

⁵ Дали акала дуј библиска извештаија сикавена кај нешто слично ка случинел пе е Христосескере јавере бакхренцар кеда о помазаникија ка овен ленде ко небо? Дали ко адава време, о верна христијања сој ки пхув ка почминен те керен лошна буќа сар о Јоас, или ка овен отпадникија сар со сине бут христијања ко дујто веко тари а.е.? Адава никогаш нане те случинел пе! Шај те ова сигурна кај кеда о помазаникија ка овен ленде ко небо, о јавера бакхре понадари да ка служинен е Јеховаске ко исправно начин хем кај ов ка продолжинел те грижинел пе ленге. Соске шај те ова сигурна ко акава?

О ЧИСТО ОБОЖАВИБЕ НАНЕ ТЕ МЕЉАРЃОВЕЛ

6. Башо кола трин времија ка кера лафи?

⁶ Соске шај те ова сигурна кај о чисто обожавибе нане те мељарѓовел чак ко пхаре времија со ка авен? Адалеске со тари Библија дознајнаја кај амаро време бут разликујнела пе таро време кеда живинена сине о пуране Израелција хем кеда живинена сине о христијања ко дујто веко. Адалеске, ајде подетално те дикха о следна трин времија: 1) о време кеда живинена сине о пуране Израелција, 2) о време откеда муле о апостолија хем 3) амаро време кеда ка обновинен пе са о буќа (Апо. 3:21).

7. Соске о верна Израелција на обесхрабринѓе пе кеда о царија хем о јавера постапинена сине лошно?

⁷ О време таро пурано Израел. Кратко англедер те мерел, о Мојсеј вакерѓа е Израелцонге: „Џанава кај пало мло мерибе ка руминѓовен, хем кај ка циден тумен таро друмо пало кова со вакерѓум туменге те џан“ (5. Мој. 31:29). Исто аѓаар, о Мојсеј предупрединѓа е Израелцон кај ако бунинена пе против о Јехова, ка овен ингарде сар робија ки јавер пхув (5. Мој. 28:35, 36). Дали акала лафија исполнинѓе пе? Оја! Веконцар бут царија керена сине адава сој погрешно англо е Јеховаскере јакхја. Адалеа керѓе о народо те цидел пе таро чачутно обожавибе. Адалеске, о Јехова казнинѓа пле лошно народо хем чхинавѓа те чхивел израелско царен те владинен упри ленде (Езек. 21:25-27). Ама кеда о верна Израелција дикхле кај исполнинѓа пе адава со вакерѓа о Јехова, адава керѓа лен храбра хем продолжинѓе те служинен леске (Иса. 55:10, 11).

8. Ваљани ли те изненадинел амен адава со о христијања таро дујто веко руминдиле ко духовно поглед? Објаснин.

⁸ О време откеда о апостолија муле. Ваљани ли те изненадинел амен адава со о христијања таро дујто веко руминдиле ко духовно поглед? Ни хари. О Исус пророкујнѓа кај ка појавинел пе баро отпадништво (Мат. 7:21-23; 13:24-30, 36-43). О апостолија о Павле, о Петар хем о Јован потврдинѓе кај е Исусескоро пророштво почминѓа више те исполнинел пе таро прво веко тари а.е. (2. Сол. 2:3, 7; 2. Пет. 2:1-3, 17-19; 1. Јов.  2:18). Ко дујто веко, кратко откеда муло о последно апостоли, о христијања со уле отпадникија уле дело таро Баро Вавилон — и ховавни религија. Адава со вакерѓа о Исус исполнинѓа пе.

9. Ко со разликујнела пе амаро време таро пурано Израел хем таро време кеда живинена сине о христијања ко дујто веко?

⁹ О време кеда ка обновинен пе са о буќа. Амаро време разликујнела пе таро време е пуране израелцонгоро хем таро време кеда појавинѓа пе о баро отпадништво ко дујто веко тари а.е. Сар викинела пе о време ко кова со амен живинаја? Обично вакераја леске „о последна диве“ таро акава лошно свето (2. Тим. 3:1). Ама, и Библија сикавела кај ко исто време почминѓа јекх поважно периоди кова со ка трајнел повише време. Акава периоди ка трајнел са џикоте о Месијанско Царство на анела е манушен џи ко совршенство хем на керела и пхув рај. Акава време викинела пе време кеда ка обновинен пе са о буќа (Апо. 3:21). Ов почминѓа ко 1914 берш. Со сине тегани обновимо? О Исус сине чхивдо те овел Цари ко небо. Значи, о Јехова палем чхивѓа владетеле кова со ка претставинел ле хем кова со ка овел наследнико е Давидескоро. Ама, на сине само адава обновимо. Кратко пало адава, о чачутно обожавибе да сине обновимо (Иса. 2:2-4; Езек. 11:17-20). Ама дали некогаш палем ка мељарѓовел?

10. а) Сој тано пророкујмо ки Библија башо чачутно обожавибе ко амаро време? (Исаија 54:17). б) Соске асавке пророштвија охрабринена амен?

¹⁰ Читин Исаија 54:17. Размислин башо акава пророштво: „Нисаво оружје сој кердо против туте нане те успејнел!“ Акала пророчка лафија исполнинена пе авдиве. О следна утешна лафија исто аѓаар исполнинена пе ко амаро време: „Са тле чхаве ка овен сикавде таро Јехова, хем баро мир ка овел тле чхавен. Цврсто ка ове темелими ки праведност... Нане те дара никастар, хем ка ове дур таро буќа со даравена, соске нане те авен паше узи туте“ (Иса. 54:13, 14). Чак ни о девел акале светоскоро, о Сатана, нашти те чхинавел и бути со керела е Јеховаскоро народо те шај те сикавел е јаверен баши лесте (2. Кор. 4:4). О чачутно обожавибе тано обновимо хем никогаш више нане те овел мељардо. Ов ка постојнел ки цели вечност. Нисаво оружје сој кердо против аменде нане те успејнел!

СО КА СЛУЧИНЕЛ ПЕ?

11. Со уверинела амен кај о баро мноштво нане те овел мукхло коркори кеда о помазаникија ка џан ко небо?

¹¹ Со ка случинел пе кеда о помазаникија  ка овен ленде ко небо? Ма бистре кај о Исус тано амаро Пастири. Ов тано о поглавари ко христијанско собрание. О Исус јасно вакерѓа: „Јекх тано тумаро Водачи, о Христос“ (Мат. 23:10). О Исус амаро Цари ко небо, секогаш ка грижинел пе башо пле чачутне следбеникија. Адалеске со водинела пле следбеникон сој ки пхув нане лен причина те даран. Џанѓола пе, на џанаја секова детали башо адава сар о Христос ка водинел е Јеховаскере народо ко адава време. Адалеске, ајде те дикха несаве библиска примерија кола со шај те охрабринен амен.

12. а) Сар о Јехова грижинѓа пе пле народоске откеда муло о Мојсеј? б) Сар о Јехова грижинѓа пе пле народоске откеда о Илија добинѓа неви задача? (Дикх хем и слика.)

¹² О Мојсеј муло кратко англедер о Израелција те кхувен ки Ветими пхув. Со случинѓа пе е Девлескере народоја? Дали о Јехова чхинавѓа те поможинел пле народоске откеда акава верно слуга муло? На! Са џикоте сине леске верна, о Јехова грижинела пе сине ленге. Англедер те мерел о Мојсеј, о Јехова вакерѓа леске те чхивел е Исус Навине сар водачи лескере народоске. О Мојсеј бут берша обучинела сине е Исус Навине (2. Мој. 33:11; 5. Мој. 34:9). Освен адава, сине бут јавера способна мурша кола со предводинена сине. Сине поглаварија кола со ваљани сине те грижинен пе милја манушенге, шеле манушенге, пинда манушенге, па чак деше манушенге (5. Мој. 1:15). О Девел бут шукар грижинѓа пе пле народоске. Нешто слично сине хем ко време е Илијаске. Ов бершенцар бут трудинела пе сине те поможинел е Израелцонге те обожавинен е Јехова ко исправно начин. Ама покасно, о Јехова денѓа ле јавер задача — те служинел ко јужно дело тари Јуда (2. Цар. 2:1; 2. Лет. 21:12). Дали о верна слуге со живинена сине ко Израелско царство таро деш племија сине мукхле коркори? На! О Илија бершенцар обучинела сине е Елисее. Исто аѓаар, атхе сине „о пророчка чхаве“ кола со веројатно сине организириме ко несаве врсте школе (2. Цар. 2:7). Значи, сине бут верна мурша кола со поможинена сине е Девлескере народоске те добинел водство. О Јехова на чхинавѓа те исполнинел пли намера хем те грижинел пе пле верна слугенге.

13. Ко со уверинена амен о лафија таро Евреија 13:5б? (Дикх хем и слика.)

¹³ Кеда размислинеа башо акала примерија, со мислинеа, со ка случинел пе кеда о последно да помазанико ка овел лендо ко небо? Нане више потреба те пуча амен башо адава. И Библија откринела аменге јекх  едноставно охрабрувачко чачипе: О Јехова никогаш нане те иранел думо пле народоске ки пхув. (Читин Евреија 13:5б.) Исто сар о Мојсеј хем о Илија, и тикни група таро помазаникија со предводинела авдиве хаљовела кобор тано важно те обучинел е јаверен. Бершенцар више о пхраља таро Водечко тело обучинена муршен таро „јавера бакхре“ те шај те предводинен. На пример, организиринена бут школе, те шај те обучинен старешинен, покраинска надгледникон, членија таро одборија е подружниценгоро, надгледникон ко Бетел хем јаверен. Секова члени таро Водечко тело лично обучинела е помошникон таро различна одборија сој ко Водечко тело. Ко моменти акала помошникија верно грижинена пе башо бут одговорностија ки организација. Ола тане шукар спремиме те шај те продолжинен те грижинен пе е Христосескере бакхренге.

14. Која тани и главно мисла тари акаја статија?

¹⁴ И главно мисла тари акаја статија тани кај ко крајо тари бари неволја кеда о последно да помазанико ка овел лендо ко небо, о Исус понадари да ка водинел е Јеховаскере народо ки пхув хем ов ка продолжинел верно те служинел е Јеховаске. Џанаја кај ко адава време ка ова нападиме таро Гог таро Магог, јекх коалиција таро са о народија која со мрзинела амен (Езек. 38:18-20). Ама адава напад кратко ка трајнел хем нане те овел успешно. Нане те чхинавел е Девлескере народо те служинел е Јеховаске. О Девел сигурно ка спасинел пле народо! Ки јекх визија о апостол Јован дикхља јекх „баро мноштво“ таро е Христосескере јавера бакхре. Леске сине вакердо кај адава „баро мноштво“ авела „тари бари неволја“ (Отк. 7:9, 14). Значи, сигурна сием кај о Јехова ка спасинел пле верна слуген!

15-16. Спрема Откровение 17:14, со ка керен е Христосескере помазиме следбеникија џикоте трајнела и војна Армагедон хем соске адава охрабринела амен?

¹⁵ Ама, со ка керен о помазаникија откеда ка џан ко небо? И Библија директно дела одговор ко акава пучибе. Ој откринела аменге кај о владе акале светоскере ка боринен пе против о „Бакхро“. Ама, џанѓола пе, ола ка нашавен. Понадари читинаја: „О Бакхро ка  побединел лен“. А кој ка поможинел леске? Ки Библија пишинела кај адала ка овен окола сој „викиме“, „бириме“ хем „верна“. (Читин Откровение 17:14.) Кој тане адала? О помазаникија. Значи кеда о последно да помазанико ка овел лендо ко небо, ко крајо тари бари неволја, јекх таро ленгере прва задаче ка овел те боринен пе. Кобор необично задача! Несаве помазиме христијања марена пе сине јавере манушенцар англедер те овен е Јеховаскере сведокија, несаве лендар чак сине хем војникија. Ама пало адава, уле чачутне христијања хем сиклиле те овен ко мир е јаверенцар (Гал. 5:22; 2. Сол. 3:16). Ола чхинавѓе те поддржинен о војне. Ама откеда ка воскреснинен те живинен ко небо, ола ка боринен пе заедно е Христосеа хем лескере света ангеленцар ки последно војна против е Девлескере душмања.

¹⁶ Размислин со значинела адава. Џикоте тане ки пхув, несаве помазаникија тане бут пхуре хем нане лен више силе. Ама откеда ка воскреснинен те живинен ко небо, ола ка овен моќна хем бесмртна духовна личностија хем ка овел лен задача те боринен пе заедно пумаре Цареа хем Водачеа, е Исус Христосеа. Откеда ка завршинел и војна Армагедон, ола ка соработинен е Исусеа те шај те поможинен е манушенге те овен совршена. Сигурно, тегани таро небо ола ка шај те поможинен пумаре мангле пхраленге хем пхењенге ки пхув бут повише, него џикоте сине ки пхув сар несовршена мануша.

17. Котар џанаја кај са е Девлескере слуге ка овен безбедна ки војна Армагедон?

¹⁷ Ако сиан дело таро „јавера бакхре“, со ваљани ту те кере кеда ка почминел и војна Армагедон? Едноставно бути, нека овел тут доверба ко Јехова хем следин лескоро водство. Со шај те овел вклучимо ко адава? Ки Библија читинаја акала утешна лафија: „Кхувен ко тумаре собе коте со ка овен ко сигурно хем пханден о удара пали туменде, гаравен тумен хари џикоте накхела и холи!“ (Иса. 26:20). Са е Девлескере верна слуге хем ко небо хем ки пхув, ка овен безбедна ко адава време. Исто сар о апостол Павле увериме сием кај „ни о властија, ни адава сој акана, ни адава со ка авел... нашти те одвојнел амен таро е Девлескоро мангипе“ (Рим. 8:38, 39). Ма бистре кај о Јехова мангела тут хем никогаш нане те иранел туке пло думо!