1. Κάνα κα τζαν κο ουρανός σαρέ ο χρισμέ Χριστιανοί;

 ΠΡΙΝ από μπουτ μπρεσά, ο λαός ι Ιεχωβάσκο σκεφτίνελας: “Κάνα κα τζαν κο ουρανός ο χρισμέ Χριστιανοί σο ισί ατζέ κι πφουβ;” Πο τζανγκλέ, αμντίναας ότι μερικοί χρισμέ μάλλον κα ατσσόν κι πφουβ ντα κα τζουβντιόν κο Παράδεισος για κάποιο βακίτι σοράν κατά Αρμαγεδδώνας. Αλλά κι Σκοπιά 15 Ιουλίου 2013, σικλιλάμ ότι σαρέ ο χρισμέ σο ισί ατζέ κι πφουβ κα αναστίντιβεν κο ουρανός πριν τι αβέλ ο Αρμαγεδδώνας.​—Ματθ. 24:31.

2. Σο μπορεί τι πουτσάς μερικοί αμένταρ, ντα σο κα ντικχάς ανταλέ μαθημάστε;

² Μερικοί αμένταρ όμως μπορεί τι πουτσάς: Σο κα αβέλ-πες κο “γιαβερά μπρακέ” κι Χριστόσκε σο κα υπηρετίνεν πιστά ι Ιεχωβάς κι πφουβ κι «μπαρί στεναχώρια»; (Ιωάν. 10:16· Ματθ. 24:21) Κάποιοι αντιβές μπέκιμ νταρένα ότι να κα τζανέν σο τι κερέν ή ότι να κα τθερέν καεκχέσταρ βοήθεια κάνα ο χρισμέ πφραλά ντα πφενιά κα τζαν κο ουρανός. Για τι ντικχάς ντούι ιστορίες κατά Γραφή σο μπέκιμ κερένα-λεν τι σκεφτίνεν-λες ανταβά. Σοράν, κα ντικχάς καλά λόγους τθεράσα για μα τι ανησυχίνας.

ΣΟ ΝΑ ΚΑ ΑΒΕΛ-ΠΕΣ;

3, 4. Σο μπορεί τι σκεφτίνεν μερικοί, ντα σόσκε;

³ Μερικοί μπέκιμ σκεφτίνενα άμα ο γιαβερά μπρακέ κα τσσιναβέν τι υπηρετίνεν ι Ιεχωβάς αζομάν σο να κα οδηγίνεν-λεν ο χρισμέ πφραλά κατά Κυβερνών Σώμας. Μπέκιμ μερικές ιστορίες κατά Γραφή κερένα-λεν τι νιωθίνεν ασακί νταρ. Για τι ντικχάς ντούι παραδείγματα. Ο πρώτος ισί ο παράδειγμας του αρχιερέα Ιωδαέ, σο υπηρετίνελας ι Ιεχωβάς ντα ισινέ μπουτ λατσσό τζενό. Βοβ ντα λέσκι ρομνί, η Ιωσαβέθ, αρακχαντέ εκχέ χουρντέ τσσαβές, τον Ιωάς, ντα βοηθιντέ-λες τι αβέλ εκ λατσσό ντα πιστός βασιλιάς. Καζόμ τζουβντιόλας ο πφουρό Ιωδαέ, ο Ιωάς τζάλας-λεν  λατσσές. Αλλά κάνα ο Ιωδαέ μουλό, ο Ιωάς αρχισάλο τι κερέλ μπέτι πράγματα. Αρχισάλο τι κερέλ σο-ντα βακερένας λέσκε μερικοί πφιρνέ άρχοντες ντα τσσιναντάς τι υπηρετίνελ ι Ιεχωβάς.​—2 Χρον. 24:2, 15-19.

⁴ Ο γιαβέρ παράδειγμας τθερέλα τι κερέλ ι Χριστιανόντζαρ κο δεύτερος αιώνας. Ο τελευταίος απόστολος σο μουλό ισινέ ο Ιωάννης. Καζόμ τζουβντιόλας, βοηθιντάς μπουτέ Χριστιανόν τι ατσσόν πιστοί κο Ιεχωβά. (3 Ιωάν. 4) Σαρ κερντέ ο γιαβερά πιστοί απόστολοι ι Ιησούσκε, ο Ιωάννης μαρντάς-πες για τι αρακχαβέλ ι κχανγκιρί κατά αποστάτες. (1 Ιωάν. 2:18· 2 Θεσ. 2:7) Αλλά κάνα ο Ιωάννης μουλό, μπουτ τζενέ κι κχανγκιρί αρχισάλε τι ακολουθίνεν ο ψεύτικα λάφια σο σικλιαρένας ο αποστάτες. Σοράν από χάνικ μπρεσά, η αποστασία επηρεαντάς σαρί ι Χριστιανική κχανγκιρί.

5. Καλά συμπεράσματα δεν πρέπει τι νικαβάς ανταλέ ντουέ ιστοριένταρ;

⁵ Μήπως ανταλά ντούι ιστορίες κατά Γραφή σικαβένα ότι κάτι ασακό κα αβέλ-πες κο γιαβερά μπρακέ κι Χριστόσκε κάνα ο χρισμέ κα τζαν κο ουρανός; Οντουβά βακίτι, μήπως ο πιστοί Χριστιανοί κι πφουβ κα αρχίνεν τι κερέν μπέτι πράγματα, σαρ κερντάς ο Ιωάς; Ή μήπως κα αβέν αποστάτες, σαρ κερντέ μπουτ Χριστιανοί κάνα μουλέ ο απόστολοι; Η απάντηση ισί σίγουρα όχι! Μπορίνασα τι αβάς σίγουροι ότι κάνα ο χρισμέ κα τζαν κο ουρανός, ο γιαβερά μπρακέ κα συνεχίνεν τι υπηρετίνεν ι Ιεχωβάς με το σωστός τρόπος ντα βοβ κα συνεχίνελ τι φροντίνελ-λεν. Σόσκε ισινάμ αζόμ σίγουροι ανταλέσκε;

Η ΠΑΚΙ ΛΑΤΡΕΙΑ ΝΑ ΚΑ ΣΤΑΜΑΤΙΝΕΛ

6. Καλέ τρινέ βακιτίνγκε κα κεράς λάφι χάνικ λαφίντζαρ;

⁶ Σόσκε μπορίνασα τι αβάς σίγουροι ότι η πάκι λατρεία να κα σταματίνελ, ατζέ-ντα κο δύσκολα ντιβεσά σο ισί ανγκλ’ αμέντε; Επειδή η Αγία Γραφή εξηγίνελα ότι ο ντιβεσά σο τζουβντιάσα ισί μπουτ διαφορετικά κατά βακίτι ι Ισραηλιτένγκο ντα κατά βακίτι σοράν κατά μεριπέ ι αποστολόνγκο. Οτθάρ, για τι κεράς πο μπουτ λάφι ανταλέ τρινέ βακιτίνγκε: (1) Ο βακίτι κο πουρανό Ισραήλ, (2) ο βακίτι σοράν κατά μεριπέ ι αποστολόνγκο ντα (3) αμαρό βακίτι, δηλαδή «ο βακίτι τι αβέν σαρέ ο πράγματα σο βακερντάς ο Ντεβέλ».​—Πράξ. 3:21.

7. Κο πουρανό Ισραήλ, σόσκε να χασαρντέ ο πιστά τζενέ πουμαρί ελπίδα κάνα ο λαός ντα ο βασιλιάδες κερένας μπέτι πράγματα;

⁷ Ο βακίτι κο πουρανό Ισραήλ. Χάνικ πριν τι μερέλ, ο Μωυσής βακερντάς κο Ισραηλίτες: «Τζανάβα λατσσές ότι σοράν μι μεριμάσταρ κα κερέν πφιρνικανέ πράγματα ντα κα νασέν κατά ντρομ σο σικλιαρντόμ-τουμέν τι πφιρέν». (Δευτ. 31:29) Ο Μωυσής προειδοποιηντάς επίσης ι Ισραηλιτέν ότι, άμα κα τζάνας κόντρα ι Ιεχωβάσαρ, κα τζάνας σαρ δούλοι εκχέ γιαβερέ τθεμέστε. (Δευτ. 28:35, 36) Νικίστιλε μπαγιά ανταλά λάφια; Βα. Για εκατοντάδες μπρεσά, μπουτ βασιλιάδες κερένας μπέτι πράγματα ντα ο λαός ι Ντεβλέσκο ακολουθίνελας-λεν. Οτθάρ, ο Ιεχωβά τιμωριντάς πι λαός σο ισινέ πφιρνό, ντα βακερντάς ότι να κα μουκχέλας τι υπαρχίντιβεν βασιλιάδες κατά Ισραήλ. (Ιεζ. 21:25-27) Αλλά ο πιστοί Ισραηλίτες λιντέ θάρρος κάνα ντικχλέ ότι ο λάφι ι Ντεβλέσκο νικίστιλοας μπαγιά.​—Ησ. 55:10, 11.

8. Μήπως πρέπει τι σαστίνας επειδή μπουτ τζενέ κι Χριστιανική κχανγκιρί κο δεύτερος αιώνας αβιλέ αποστάτες; Εξηγίνεν.

⁸ Ο βακίτι σοράν κατά μεριπέ ι αποστολόνγκο. Μήπως πρέπει τι σαστίνας επειδή μπουτ τζενέ κι Χριστιανική κχανγκιρί κο δεύτερος αιώνας αβιλέ αποστάτες; Όχι. Ο Ιησούς βακερντάας ότι κα αβέλας-πες ανταβά. (Ματθ. 7:21-23· 13:24-30, 36-43) Ο απόστολοι Παύλος, Πέτρος ντα Ιωάννης βακερντέ ότι η προφητεία ι Ιησούσκι αρχισάλιας κατά πρώτος αιώνας Κ.Χ. τι νικιόλ μπαγιά. (2 Θεσ. 2:3, 7· 2 Πέτρ. 2:1· 1 Ιωάν. 2:18) Κο δεύτερος αιώνας Κ.Χ., δηλαδή κάνα μουλό ο τελευταίος απόστολος, ο αποστάτες Χριστιανοί αβιλέ κομμάτι ι Μπαρέ Βαβυλωνάκο, σο ισί  σαρέ ο ψεύτικες θρησκείες ι ντουνιάσκε. Ανταλέ περιπτωσιάτε-ντα, οντουβά σο βακερντάας ο Ιησούς νικιόλας μπαγιά.

9. Καλέ βακιτίστε τζουβντιάσα αντιβές, ντα σο αβέλα-πες ανταλέ βακιτίστε;

⁹ «Ο βακίτι τι αβέν σαρέ ο πράγματα σο βακερντάς ο Ντεβέλ». Αμαρό βακίτι νανέ σαρ ο βακίτι κο πουρανό Ισραήλ ντα σαρ ο βακίτι σο αρχισάλο κο δεύτερος αιώνας Κ.Χ., σο μπουτ τζενέ αβιλέ αποστάτες. Σαρ βακέρντιβελα αμαρό βακίτι; Ο πο μπουτ φαρ, βακέρντιβελα ο «τελευταία ντιβεσά» ανταλέ πφιρνέ ντουνιάσκε. (2 Τιμ. 3:1) Αλλά η Γραφή σικαβέλα ότι γιεκ ι τελευταίε ντιβεσέντζαρ αρχισάλο εκ βακίτι σο ισινέ πο σημαντικός ντα κα ατσσόλας πο μπουτ. Ανταβά βακίτι κα συνεχίντιβελ μέχρι η Μεσσιανική Βασιλεία τι κερέλ ι τζενέν τέλειοι ντα τι κερέλ ι πφουβ παράδεισος. Ανταβά βακίτι βακέρντιβελα «ο βακίτι τι αβέν σαρέ ο πράγματα σο βακερντάς ο Ντεβέλ». (Πράξ. 3:21) Αρχισάλο κο 1914. Σο αβιλό αζομάν; Ο Ιησούς αβιλό Βασιλιάς κο ουρανός. Οτθάρ, υπαρχίντιβελας πάλι κάποιος άρχοντας σο ο Ιεχωβά ντινάας-λες εξουσία, εκ βασιλιάς σο αστάρντιβελας κατά πιστός βασιλιάς Δαβίδ. Όμως, να αβιλό-πες σάντε ανταβά. Χάνικ σοράν ανταλέσταρ, ο Ιεχωβά βοηθιντάς πι υπηρετόν κι πφουβ τι ντεν-λες λατρεία ι τροπόσαρ σο βοβ μανγκέλας! (Ησ. 2:2-4· Ιεζ. 11:17-20) Μήπως κα σταματίνελ πάλι η πάκι λατρεία;

10. (α) Σο βακερέλα η Αγία Γραφή για την πάκι λατρεία αμαρέ ντιβεσέντε; (Ησαΐας 54:17) (β) Σόσκε λένα αμαρί ανησυχία ασακέ προφητείες;

¹⁰ Διαβάνεν Ησαΐας 54:17. Σκεφτίνεν ακαγιά προφητεία: «Καέκ όπλος σο κα κερντιόλ για τι κερέλ τούκε κακός να κα τθερέλ επιτυχία»! Ανταλά λάφια, σο αβένα κατά Ιεχωβά, νικιόνα μπαγιά αντιβές. Αμαρέ ντιβεσέντε, νικιόνα μπαγιά ακαλά λάφια-ντα σο λοκχιαρένα αμαρό γκι: «Σαρέ τι τσσαβέν κα σικλιαρέλ-λεν ο Ιεχωβά, ντα τι τσσαβένγκι ειρήνη κα αβέλ μπαρί. Η δικαιοσύνη κα αβέλ το θεμέλιος. . . . Να κα νταρές καεκχέ πραγμάσταρ ντα τίποτα να κα κερέλ-τουτ τι ιζράς, σόσκε τίποτα σο ανέλα τούκε νταρ να κα αβέλ πασέ τούτε». (Ησ. 54:13, 14) Ούτε «ο ντεβέλ ανταλέ ντουνιάσκο», ο Μπενγκ, να τθερέλα ι ζορ τι τσσιναβέλ ο έργος σο κερέλα ο λαός ι Ντεβλέσκο καζόμ σικλιαρέλα γιαβερέν ι Ιεχωβάσκε. (2 Κορ. 4:4) Η πάκι λατρεία αβέλα-πες ι τροπόσαρ σο μανγκέλα ο Ιεχωβά, ντα να κα σταματίνελ ποτές. Κα ατσσόλ για πάντα. Καέκ όπλος σο κα κερντιόλ για τι κερέλ αμένγκε κακός να κα τθερέλ επιτυχία!

ΣΟ ΚΑ ΑΒΕΛ-ΠΕΣ;

11. Σο κερέλα-αμέν σίγουρους ότι ο Ιησούς να κα παρατίνελ ο μπαρό πλήθος κάνα ο χρισμέ κα τζαν κο ουρανός;

¹¹ Σο κα αβέλ-πες κάνα ο χρισμέ κα τζαν κο ουρανός; Ντεν-τουμέν γκοντί ότι ο Ιησούς ισί αμαρό Τσομπάνης. Ισί ο σορό ι Χριστιανικέ  κχανγκιριάκο. Ο Ιησούς βακερντάς ξεκάθαρα: «Τουμαρό Αρχηγός ισί εκ τανό, ο Χριστός». (Ματθ. 23:10) Αμαρό Βασιλιάς, σο κυβερνίνελα κο ουρανός, πάντα κα αρακχαβέλ πι πιστέ υπηρετόν. Επειδή ο Χριστός κα κερέλ κουμάντος, οντουλά σο τζάνα παλά-λέστε ατθέ κι πφουβ να κα χρειαζίντιβελ τι νταρέν τίποτα. Σίγουρα, να τζανάσα ακριβώς καλέ τροπόσαρ ο Χριστός κα οδηγίνελ πι λαός οντουβά βακίτι. Οτθάρ, για τι ντικχάς μερικά παραδείγματα κατά Γραφή σο μπορίνενα τι λεν αμαρί ανησυχία.

12. Σαρ αρακχαβέλας ο Ιεχωβά πι λαός (α) κάνα μουλό ο Μωυσής; (β) κάνα ο Ηλίας λιντάς γιαβέρ διορισμός; (Ντικχέν ι φωτογραφία-ντα)

¹² Πριν τι τσσουβέλ-πες ο Ισραήλ κο Υποσχεμέ Τθεμ, ο Μωυσής μουλό. Σο αβιλό-πες κι Ντεβλέσκο λαός; Κάνα να υπαρχίντιβελας ανταβά πιστός μουρς, μήπως ατσσιλέ κορκορέ ντα χωρίς καέκ βοήθεια; Όχι. Καζόμ ατσσόνας πιστοί, ο Ιεχωβά ντέλας-λεν σο-ντα τθερένας ανάγκη. Πριν τι μερέλ ο Μωυσής, ο Ιεχωβά βακερντάς λέσκε τι τσσουβέλ τον Ιησού του Ναυή υπεύθυνος για τι οδηγίνελ ι λαός. Ο Μωυσής σικλιαρέλας τον Ιησού του Ναυή για μπουτ μπρεσά. (Έξοδ. 33:11· Δευτ. 34:9) Επίσης, υπαρχίντιβενας μπουτ γιαβερά-ντα ικανά μουρσά σο οδηγίνενας ι λαός​—χιλίαρχοι, εκατόνταρχοι, πεντηκόνταρχοι, ατζέ-ντα δέκαρχοι. (Δευτ. 1:15) Ο Ντεβέλ φροντίνελας πι λαός. Κι περίπτωση του Ηλία, αβιλό-πες κάτι ασακό. Βοβ οδηγίνελας ι λαός για τι ντελ πάκι λατρεία για μπουτ μπρεσά. Αλλά αβιλό ο βακίτι σο ο Ιεχωβά διοριντάς-λες κάπου γιαβερτθέ, νότια, κο Ιούδας. (2 Βασ. 2:1· 2 Χρον. 21:12) Μήπως ο Ιεχωβά παρατιντάς ι πιστέ τζενέν κο ντες φάρες κο Ισραήλ; Όχι. Ο Ηλίας σικλιαρέλας τον Ελισαιέ για μπουτ μπρεσά. Υπαρχίντιβενας επίσης “ο τσσαβέ ι προφητένγκε”, σο μάλλον λιντέ εκπαίδευση κο σχολές. (2 Βασ. 2:7) Οτθάρ, υπαρχίντιβενας μπουτ πιστά τζενέ σο μπορίνενας τι οδηγίνεν ι Ντεβλέσκε λαός. Ο Ιεχωβά συνεχιντάς τι κερέλ πο σκοπός ντα τι αρακχαβέλ πι πιστέ υπηρετόν.

13. Καγιά σιγουριά ντέλα-αμέν ο εδάφιος Εβραίους 13:5β; (Ντικχέν ι φωτογραφία-ντα)

¹³ Καζόμ σκεφτίνασα ανταλά παραδείγματα, σο πακιάνα ότι κα αβέλ-πες κάνα ο τελευταία χρισμέ τζενέ κα τζαν κο ουρανός; Να χρειαζίντιβελα τι ανησυχίνας. Η Γραφή σικαβέλα εκ απλή αλήθεια σο λέλα αμαρί ανησυχία: Ο Ιεχωβά ποτές να κα παρατίνελ πι λαός σο ισί κι πφουβ. (Διαβάνεν Εβραίους 13:5β) Σαρ αβιλό-πες με τον Μωυσή ντα τον Ηλία, αντικάς αντιβές-ντα η χουρντί ομάδα ι χρισμέ Χριστιανόνγκι σο οδηγίνελα-αμέν αγαβέλα καζόμ σημαντικός ισί τι σικλιαρέλ γιαβερέν. Για μπουτ μπρεσά, ο πφραλά κατά Κυβερνών Σώμας σικλιαρένα μουρσέν κατά γιαβερά μπρακέ για τι οδηγίνεν-αμέν. Για παράδειγμας, κερντέ μπουτ  σχολές για τι λεν σικλιαριπέ ο πρεσβύτεροι, ο επίσκοποι περιοχής, ο πφραλά κο Επιτροπές Τμήματος, ο υπεύθυνα πφραλά κο κάθε τμήμας κο Μπέθελ ντα γιαβερά. Ο Κυβερνών Σώμας σικλιαρντάς προσωπικά τους βοηθούς κο επιτροπές σο τθερέλα ο Κυβερνών Σώμας. Οντουλά βοηθοί τθερένα ακανά μπερεκέτι ευθύνες κι οργάνωση, ντα κερένα-λεν πιστά. Ο βοηθοί ισί λατσσές προετοιμασμέ για τι συνεχίνεν τι φροντίνεν ι Χριστόσκε μπρακέν.

14. Καβά ισί ο πο σημαντικός πράγμας σο σικλιάσα ανταλέ μαθημάστε;

¹⁴ Ο πο σημαντικός πράγμας σο σικλιάσα ανταλέ μαθημάστε ισί ακαβά: Κάνα ο τελευταία χρισμέ τζενέ κα τζαν κο ουρανός καζόμ κα τελειώνελ η μπαρί στεναχώρια, η πάκι λατρεία κα συνεχίντιβελ κανονικά ατθέ κι πφουβ. Επειδή ο Ιησούς Χριστός κα οδηγίνελ ι Ντεβλέσκε υπηρετόν, βον κα συνεχίνεν τι ντεν-λες λατρεία πιστά. Ισί μπαγιά ότι, οντουβά βακίτι, ο Γωγ του Μαγώγ, δηλαδή ο τθεμά σο κα γκιντίντιβεν σαρέ γιεκ, κα κερέν αμένγκε επίθεση. (Ιεζ. 38:18-20) Αλλά ανταγιά επίθεση να κα ατσσικιαρέλ μπουτ βακίτι, ντα να κα τθερέλ επιτυχία. Να κα κερέλ ι Ιεχωβάσκε λαός τι τσσιναβέλ τι υπηρετίνελ-λες. Σίγουρα ο Ιεχωβά κα σώνελ-λεν! Ο απόστολος Ιωάννης ντικχλάς εκχέ φαντασιάτε ο «μπαρό πλήθος» κατά γιαβερά μπρακέ ι Χριστόσκε. Βακέρντιλο κο Ιωάννης ότι ανταβά «μπαρό πλήθος» αβέλα «κατά μπαρί στεναχώρια». (Αποκ. 7:9, 14) Ισινάμ σίγουροι ότι ο Ιεχωβά κα σώνελ-λεν!

15, 16. Σαρ βακερέλα ο εδάφιος Αποκάλυψη 17:14, σο κα κερέν ο χρισμέ κο Αρμαγεδδώνας, ντα σόσκε ντέλα-αμέν ζορ ανταβά;

¹⁵ Όμως μερικοί μπέκιμ τι σκεφτίνενα: “Σο κα αβέλ-πες ι χρισμέ τζενέντζαρ; Σο κα κερέν κάνα κα νασέν κατά πφουβ;” Η Γραφή απαντίνελα ξεκάθαρα ανταλέ ερωτησιέντε. Βακερέλα ότι ο κυβερνήσεις ανταλέ ντουνιάσκε «κα κερέν τζένγκι ι Μπρακέσαρ». Σίγουρα κα χασαρέν. Διαβάνασα: «Ο Μπρακό κα νικίνελ-λεν». Ντα κον κα βοηθίνεν-λες; Ο εδάφιος ντέλα ι απάντηση: Οντουλά σο ο Ντεβέλ «καλιντάς-λεν», «τραμπιντάς-λεν» ντα ισί «πιστοί». (Διαβάνεν Αποκάλυψη 17:14) Κον ισί οντουλά τζενέ; Ο αναστημέ χρισμέ! Οτθάρ, κάνα ο τελευταία χρισμέ τζενέ σο ισί κι πφουβ κα τζαν κο ουρανός καζόμ κα τελειώνελ η μπαρί στεναχώρια, εκ κατά πρώτοι διορισμοί σο κα λεν κα αβέλ τι κερέν τζένγκι.  Σο εντυπωσιακός διορισμός! Μερικά χρισμέ τζενέ ισινέ πολεμιστές πριν τι αβέν Μάρτυρες ι Ιεχωβάσκε. Ντα μερικοί γκιλέ κο στρατός. Αλλά πο σοράν αβιλέ αληθινοί Χριστιανοί ντα σικλιλέ σαρ τι τζουβντιόν ειρηνικά ι γιαβερέντζαρ. (Γαλ. 5:22· 2 Θεσ. 3:16) Τσσιναντέ τι κερέν πόλεμος. Όμως, κάνα κα αναστίντιβεν κο ουρανός, κα πολεμίνεν γιεκ ι Χριστόσαρ ντα λέσκε άγιε αγγελόντζαρ κο τελευταίος τζένγκι σο κα αβέλ-πες ι Ντεβλέσκε ντουσμανίντζαρ.

¹⁶ Σκεφτίνεν! Κι πφουβ, μερικοί χρισμέ Χριστιανοί ισί πφουρέ, ντα μερικοί να τθερένα ιτς ζορ. Αλλά κάνα κα αναστίντιβεν κο ουρανός, κα αβέν ζουρανέ πνευματικά πλάσματα σο ναστί μερένα. Κα τθερέν ο διορισμός τι κερέν τζένγκι πασέ κο Πολεμιστής-Βασιλιάς λένγκο, κο Ιησούς Χριστός. Σοράν κατά τζένγκι κο Αρμαγεδδώνας, κα κερέν μπουτί γιεκ ι Ιησούσαρ για τι βοηθίνεν ι τζενέν τι αβέν τέλειοι. Ισί σίγουρος ότι, κάνα κα αβέν κο ουρανός, κα βοηθίνεν πουμαρέ αγαπημέ πφραλέν ντα πφενίν κι πφουβ πο μπουτ από ό,τι κα μπορίνενας σαρ ατελή τζενέ!

17. Σαρ τζανάσα ότι σαρέ ο υπηρέτες ι Ντεβλέσκε κα αβέν αρακχαντέ κο τζένγκι κο Αρμαγεδδώνας;

¹⁷ Ισινέν τουμέν κατά γιαβερά μπρακέ; Άμα βα, σο κα χρειαζίντιβελ τι κερέν τουμέν κάνα κα αρχίνελ ο μπουτ σημαντικός τζένγκι κο Αρμαγεδδώνας; Σάντε ακαβά: Τι ντεν μπέσα κο Ιεχωβά ντα τι ακολουθίνεν ο οδηγίες σο κα ντελ. Σο μπέκιμ μανγκέλα τι βακερέλ ανταβά; Η Γραφή λοκχιαρέλα αμαρό γκι ακαλέ λαφίντζαρ: «Τσσουβ-τουτ τι αντραϊνέ δωματιόντε ντα πφάντε το πόρτες παλά-τούταρ. Γκέραβ-τουτ σάντε για χάνικ, μέχρι τι νασέλ η χολί». (Ησ. 26:20) Σαρέ ο πιστοί υπηρέτες ι Ντεβλέσκε, κο ουρανός ντα κι πφουβ, κα αβέν αρακχαντέ οντουβά βακίτι. Σαρ ο απόστολος Παύλος, αντικάς αμέν-ντα ισινάμ σίγουροι ότι “ούτε ο κυβερνήσεις ούτε ο πράγματα σο τθεράσα ακανά ούτε ο πράγματα σο κα τθεράς κο μέλλον . . . ναστί τσσιναβένα-αμέν κατά αγάπη ι Ντεβλέσκι”. (Ρωμ. 8:38, 39) Πάντα τι τθερέν τουμαρέ γκοντιάτε: Ο Ιεχωβά μανγκέλα-τουμέν ντα ποτές να κα παρατίνελ-τουμέν!