1. He dzrini lani vatotiwa hinkwavu va taka va na va li matilweni?

 MALEMBE ntsrhaku, a vhanu va Yehovha a va tivutisa leswi: ‘Ku ta va dzrini lani vatotiwa va wugamu va taka tlhantukela matilweni?’ Khale a hi pimisa leswaku a vatotiwa a va ta tsrhama lani misaveni a paradeyisini hi nkamanyana wutsrongo ntsrhaku ka Armagedoni. Kambe, ka Xihondzro Xa Ku Zrindzra xa 15 ka Julhu wa 2013, hi dondzre leswaku na yimpi ya Armagedoni yi nga si na sungula hinkwavu lava totiwiki va ta va va le matilweni.—Mat. 24:31.

2. He xini xivutiso lexi xi nga ha tlakukaka nakone hi ta kambisisa yini ka xidondzro lexi?

² Kambe, van’we vezru hi nga ha tivutisa leswi: Ku ta yentxeka yini “hi tihamba tin’wana” ta Kriste leti tizrelaka Yehovha hi ku dumbeka lani misaveni hi nkama wa “nhlomulo lowukulo”? (Yoh. 10:16; Mat. 24:21) Van’we ka lava tihamba tin’wana, swi nga ha yentxeka va vilelisiwa hi leswaku va ta wu kuma kwini mpfunu ni nkongomiso ntsrhaku ka loko vamakwezru va xinuna ni va xisati lava totiwiki va tlhantukela matilweni. A hi kambisiseni wudzrunguli byibidzri lebyi va yentxaka va yanakanya hi ndlela leyo, nakone hi ta tlhela hi vona leswaku ha yini hi nga fanelanga ku kazrateka.

I YINI LESWI TAKA KALA SWI NGA YENTXEKI?

3-4. I yini leswi vhanu va nga ha tivutisaka swone nakone ha yini?

³ Swi nga ha yentxeka na van’we va kazrateka hi leswaku lava tihamba letin’wana va nga yima ku tizrela Yehovha loko vamakwezru lava totiwiki va Huvo Leyi Zrangelaka va nga ha li kone. Swi nga yentxeka va pimisa leswo hi mhaka ya wudzrunguli byibidzri bya Bibele. Hi ta vona swikombiso swibidzri, xa ku sungula i xa Muprista lwenkulu Yehoyada. A a li nandzra wa ku dumbeka wa Xikwembu Nkulukumba. Yene ni nkatake Yehoxabati va sizrelele mumpshwa lweyi a vitaniwaka Yehowaxi nakone va mu  pfune kuva a va hosi leyinene leyi dumbekaka. Nkama lowu Yehoyada na a ha hanya, Yehowaxi a tizrele Yehovha hi ku dumbeka nakone a yentxe mintxhumu leyinene. Kambe ntsrhaku ka loko Yehoyada a file, Yehowaxi a sungule ku yentxa mintxhumu ya ku biha. A yingisete switsratsriyu swa tihosana ta ku biha a va a tsrhika ni ku tizrela Yehovha.—2 Makr. 24:2, 15-19.

⁴ Xikombiso xin’wana, i xa vakriste lava hanyiki ntsrhaku ka loko vapostola va nga ha li kone. Mupostola Yohane hi yene wa wugamu ku fa ka vapostola hinkwavu. A nkama lowu na a ha hanya a pfune vhanu vanyingi ku tama va dumbeka ka Yehovha. (3 Yoh. 4) Hi lani vapostola va Yesu va yentxiki ha kone, Yohane a yentxe hinkwaswu akuva a sizrelela mabandla ka madukwa lawa a ma ya ma yengeseleka. (1 Yoh. 2:18; vona nota de estudo ka 2 Tes. 2:7.) Kambe ntsrhaku ka loko mupostola Yohane a file, a madukwa ma ye ma yengeseleka ku fana ni ndzrilo lowu hisaka nhova. Ka malembe lama landzreliki a madukwa a ma hangalasa tidondzro ta madzrimi, ma pfumelela mintxhumu ya ku biha yi yentxeka a mabandleni hinkwawu.

5. Hi ku ya hi wudzrunguli lebyi, i yini leswi hi kalaka hi nga fanelanga ku swi pimisa leswaku swi ta yentxeka?

⁵ Xana wudzrunguli lebyi byi kombisa leswaku ku ta yentxeka leswi fanaka hi tihamba letin’wana ta Kriste loko vatotiwa va ta tlhantukela matilweni? Xana vakriste va ku dumbeka va lani misaveni va ta sungula ku yentxa swa ku biha ku fana na Yehowaxi, kumbe va va madukwa hi lani vhanu vanyingi va yentxiki ha kone ntsrhaku ka loko vapostola va file? Leswo a swi nge yentxeki! Hi nga tiyiseka leswaku loko vatotiwa va ya matilweni, tihamba letin’wana ti ta tama ti tizrela Yehovha hi ndlela leyinene nakone Yehovha a ta tama a ti hlayisa. Ha yini hi nga tiyisekaka hi leswo?

WUGANDZRELI BYA KU XWENGA BYI TA TAMA BYI VA KONE HI LANI KU NGA HELIKIKI

6. Xana he yini minkama yizrazru leyi hi taka yi vona?

⁶ Ha yini hi nga tiyisekaka leswaku wugandzreli bya ku xwenga byi ta tama byi va kone nambiloko hi kumana ni swikazrato leswi hi taka langutana na swone? Hikusa Bibele dzri tlhamuxela leswaku a nkama lowu hi hanyaka ka wone wu hambanile ni nkama wa Vaisrayele ni ntsrhaku ka loko vapostola va file. Kutani a hi swi twisiseni ha hombe leswi yentxekiki ndzreni ka minkama leyi yizrazru: 1) Hi nkama wa Israyele wa khale, 2) ntsrhaku ka loko vapostola va file 3) ni le nkameni wezru, ku nga nkama wa “ku pfuxetiwa [ka] mintxhumu hinkwayu”.—Mint. 3:21.

7. Ha yini Vaisrayele va ku dumbeka a va ta tizrela Yehovha na va nyoxile?

⁷ Hi nkama wa Israyele wa khale. Na Moxe a nga si na fa, a byele Vaisrayele a ku: ‘Hikusa ndzra swi tiva leswaku loko ndzri file kunene n’wi ta ti hona; nakone n’wi ta hambuka ndleleni leyi ndzri n’wi leletiki yone.’ (Deut. 31:29) Moxe a tlhele a byela Vaisrayele leswaku loko va nga yingiseti a va ta yisiwa a wukazraweni. (Deut. 28:35, 36) Xana mazritu lawa ma hetisekile? Ina. Ka malembe manyingi, tihosi tinyingi ti hlawule ku tsrhika ku yingiseta Yehovha kutani ti yentxa vhanu va nghena ka wukhongoti bya madzrimi. Hi kola ka leswo, Yehovha a va tsrhikile vhanu lava kalaka va nga mu yingisetanga nakone a nga pfumelelanga hosi ni yin’we ya Muisrayele yi fuma vhanu vake. (Ezek. 21:25-27) Kambe, ntsrhaku ka loko Vaisrayele va xiye leswaku mazritu ya Yehovha ma hetisekile, va tlhele va sungula ku djula ku tizrela Yehovha hi ku dumbeka.—Eza. 55:10, 11.

8. Xana swi fanela ku hi hlamalisa ku tiva leswaku a bandla dzra wukriste dzra le dzaneni dzra wubidzri dzri ve ni madukwa? Tlhamuxela.

⁸ Ntsrhaku ka loko vapostola va file. Xana swi fanela ku hi hlamalisa ku tiva leswaku a bandla  dzra wukriste dzra le dzaneni dzra wubidzri dzri ve ni madukwa? Im-him. Hikusa Yesu a a profete leswaku leswo a swi ta yentxeka. (Mat. 7:21-23; 13:24-30, 36-43) Mupostola Pawulo, Petro kun’we na Yohane, va hlaye leswaku wuprofeta bya Yesu a byi sungula ku hetiseka nkameni wavu, a dzaneni dzra ku sungula. (2 Tes. 2:3, 7; 2 Pet. 2:1; 1 Yoh. 2:18) Ntsrhakunyana ka loko ku fi mupostola wa wugamu, vakriste lava viki madukwa va hambe xiyenge xa Babilona lwenkulu, ku nga wukhongoti hinkwabyu bya madzrimi. Ni ka khambi ledzri, leswi Yesu a swi profetiki swi hetisekile.

9. Ha yini nkama wezru wu hambanile ni nkama wa Israyele wa khale ni nkama wa bandla dzra Wukriste dzra le dzaneni dzra wubidzri?

⁹ Nkama wa “ku pfuxetiwa [ka] mintxhumu hinkwayu”. Nkama wezru wu hambanile ni nkama wa Israyele wa khale ni nkama lowu vakriste va le dzaneni dzra wubidzri va viki madukwa. Xana hi wu vitanisa kuyini nkama wezru? Hi tolovela ku wu vitana leswaku i ‘masiku ya wugamu’ ya misava leyi ya ku biha. (2 Tim. 3:1) Kambe Bibele dzri kombisa leswaku nkama lowu ku sunguliki masiku ya wugamu, ku sungule nkama wa lisima lowu a wu ta teka nkama wunyingi. Nkama lowo wu ta ya mahlweni ku ya tlhasa loko Mfumu wa Mesiya wu yentxa leswaku vhanu va va lava hetisekiki ni ku tlhela wu ndzruluta misava yi va paradeyisi. Nkama lowu wu vitaniwa leswaku i nkama wa ku “pfuxetiwa [ka] mintxhumu hinkwayu”. (Mint. 3:21) Nkama lowu wu sungule hi 1914. Kambe, i yini leswi pfuxetiwiki? Hi lembe ledzro, Yesu a sungule ku fuma a matilweni. Hi ndlela leyo, Yehovha a beke Hosi leyi a yi ta mu yimela, ku nga madapfindla wa Hosi! (Eza. 2:2-4; Ezek. 11:17-20) Xana wugandzreli lebyi xwengiki byi ta tlhela byi siveliwa?

10. a) Xana Bibele dzri profete yini mayelanu ni wugandzreli bya ku xwenga a nkameni wezru? (Ezaya 54:17) b) Ha yini wuprofeta lebyi byi hi nyoxisa?

¹⁰ Dondzra Ezaya 54:17. Yanakanya hi wuprofeta lebyi: ‘A tlhazri dzrin’wana ni dzrin’wana ledzri fuliwaka ku ta hona wene, dzri nga ka dzri nga koti ntxhumu!’ Mazritu lama huhuteliwiki, ma hetiseka namunhla. Mazritu lama landzrelaka lama kutxanaka ma tizra ni kwezru namunhla, wone ma li: ‘A vana vaku hinkwavu va ta va vadondzrisiwa va Yehovha; a ku zrula ka vana vaku ku ta va lokukulu ngopfu. U ta tiyisiwa vululameni: . . . hikuva u nga ka u nga txhavi ntxhumu; u ta va kule ni ntxhavu, hikuva wu ngaka wu nga ti kusuhi na wene’. (Eza. 54:13, 14) Nambi ku li Sathana, “xikwembu xa misava leyi” a nga swi koti ku helisa ntizro lowu yentxiwaka wa ku dondzrisa vhanu mayelanu na Yehovha. (2 Kor. 4:4) Wugandzreli lebyi xwengiki byi pfuxetiwile nakone byi nge he txhuki byi ntxhimisiwa hi wukhongoti bya madzrimi. Byi ta va kone hi la ku nga helikiki. A ku  na tlhazri ni dzrin’we ledzri taka kota ku helisa vhanu va Yehovha!

KU TA YENTXEKA YINI?

11. I yini lexi xi hi tiyisekisaka leswaku xitsrhungu lexikulu a xi nge ti tsrhikiwa loko vatotiwa va ya matilweni?

¹¹ Xana ku ta yentxeka yini loko vatotiwa va ya matilweni? Dzrimuka leswaku Yesu i mubyisi wezru. Yesu a swi beke livaleni leswaku i nhloko ya bandla dzra wukriste loko a ku: “Muzrangeli wenu i mun’we ntsena, ku nga Kriste”. (Mat. 23:10) Hosi yezru yi le ku fumeni nakone a yi nge txhuki yi hluleka ku hetisisa xiyavelo xa yone. Leswi lweyi a zrangelaka ku nga Kriste, vakriste hinkwavu lani misaveni a va fanelanga ku txhava ntxhumu. I ntiyiso leswaku a hi yi tivi ndlela leyi Yesu a taka kongomisa vhanu vake ha yone loko nkama lowo wu tlhasa. Kutani, a hi voneni swikombiso swa kukazri swa le Bibeleni leswi nga hi yentxaka hi zrula.

12. Xana Yehovha a va hlayise hi ndlela yini vhanu vake a) ntsrhaku ka loko Moxe a file? b) ntsrhaku ka loko Eliya a yamukele xiyavelo leximpshwa? (Tlhela u vona mufoto.)

¹² Moxe a fe na Vaisrayele va nga si nghena tikweni dzra xidumbiso. Kutani ke, ku humelele yini hi vone? Leswi Moxe a a nga ha li kone, xana va sale na va nga swi tivi swa ku swi yentxa? Im-him. Yehovha a tame a va bekisa loko va tama va dumbeka kwake. Na Moxe a nga si na fa, Yehovha a mu byele leswaku a hlawula Yoxuwa akuva a zrangela vhanu vake. Moxe a wupfise Yoxuwa ku dzringana malembe manyingi. (Eks. 33:11; Deut. 34:9) Handle ka leswo, a ku ni vavanuna vanyingi lava na vone a va tiyimiselile ku zrangela vhanu va Yehovha, vazrangeli va 1000, va 100, va 50 ku ya tlhasa ni ka vazrangeli va 10. (Deut. 1:15) Vhanu va Xikwembu Nkulukumba a va hlayisekile. Xikombiso xin’wana lexinene hi nga na xone i xa Eliya. Ku dzringana malembe manyingi, Eliya a pfune Vaisrayele akuva va tama va va ka wugandzreli bya ku xwenga. Kambe, ku ve ni nkama lowu Yehovha a nyikiki xiyavelo leximpshwa Eliya, a nyingitimu wa Yuda. (2 Tih. 2:1; 2 Makr. 21:12) Xana ku nga va leswaku Vaisrayele va ku dumbeka, lava a va li mfun’wini wa tinxaka ta 10 va tsrhikiwile? Im-him. Hi malembe manyingi Eliya a wupfise Elixa. Nakone hi nkama wolowo, a ka ha ni ‘vana va vaprofeta’ lava swi nga yentxekaka a va hleliwe hi mintlawa nakone a va wupfisiwile. (2 Tih. 2:7) Leswi liki a ku ni vavanuna vanyingi va ku dumbeka lava a va lulamele ku zrangela ntizro wa Xikwembu Nkulukumba. Yehovha a tame a hetisisa nkongometo wake nakone a ma hlayise ha hombe malandzra yake.

13. I yini leswi Yehovha a hi dumbisaka swone ka Vaheberu 13:5b? (Tlhela u vona mufoto.)

¹³ Ntsrhaku ka loko u vone swikombiso leswi,  u yanakanya swaku ku ta yentxeka yini loko mutotiwa wa wugamu a tekiwa a ya matilweni? A swi sindzrisi hi za hi tlhanyeka nhloko. A Bibeleni hi kuma ntiyiso lowu nabyaliki ni lowu tiyisanaka, lowu liki: Yehovha a nge ti txhuka a tsrhike vhanu vake lani misaveni. (Dondzra Vaheberu 13:5b.) Namunhla ku ni ntlawa wutsrongo wa vakriste lava totiwiki lava zrangelaka a vhanu va Xikwembu Nkulukumba, ku nga Huvo Leyi Zrangelaka. Ku fana na Moxe na Eliya, vone va wupfisa vavanuna va tihamba letin’wana akuva va pfuna ni ku hlayisa vhanu va Xikwembu Nkulukumba. Hi xikombiso, Huvo Leyi Zrangelaka, yi hlela swikole swinyingi leswi wupfisaka vakulu, valaviseli va miganga, swizro swa Swihubyana Swa Mabetele, valaviseli va Mabetele ni vamakwezru van’wana. Va tlhela va patsreka hi ku kongoma ka ku wupfisa vapfunisi va swihubyana swa ku hambanahambana swa Huvo Leyi Zrangelaka. Vapfunisi lava va ni wutiyanguleli swoswi nakone va lulamele ku tama va tizra akuva va hlayisa tihamba ta Kriste.

14. I yini leswi xidondzro lexi xi swi bekiki a livaleni?

¹⁴ Ku ta tlhasela swoswi, ka xidondzro lexi hi vone ntxhumu wa kukazri lowu wu nga livaleni. Loko mutotiwa wa wugamu a ta tekiwa a ya matilweni na nhlomulu lowukulu wu li kusuhi ni ku hela, malandzra ya Yehovha ma ta tama ma mu gandzrela hi ku dumbeka. A hi nge ti tsrhika ku gandzrela Yehovha hikusa hi ta va na hi zrangeliwa hi Yesu Kriste. I ntiyiso leswaku hi nkama wolowo hi ta va na hi hlaseliwa hi Goge wa Magoge, ku nga ntlhanganu wa matiko. (Ezek. 38:18-20) Kambe, nhlaselo wolowo wu nga ti tlhaveliwa hi dambu; nakone a wu nge ti swi kota ku sivela vhanu va Yehovha akuva va tama va mu gandzrela. Nakunene, ha tiyiseka leswaku Yehovha a ta hi huluxa! Mupostola Yohane ka xivoniso xake, a vone “xitsrhungu lexikulu” xa tihamba tin’wana ta Kriste. Yohane a byeliwe leswaku “xitsrhungu lexikulu” a ku li “lava va humaka a nhlomulweni lowukulu”. (Mpful. 7:9, 14) Handle ka ku ganaganeka, Yehovha a ta hi huluxa!

15-16. Hi ku ya hi Mpfuletelo 17:14, i yini leswi vatotiwa va taka va na va swi yentxa hi nkama wa yimpi ya Armagedoni, nakone ha yini leswo swi hi txhavelela?

¹⁵ Nambitasu, hi nga ha tivutisa leswi: ‘Kambe ku ta yentxeka yini hi vatotiwa? Xana va ta yentxa yini loko va tlhasa matilweni?’ Bibele dzri hlamula swivutiso leswi hi ndlela leyi khanyaka.  Dzri tlhamuxela leswaku tihosi ta misava leyi “ti ta lwa ni Xihambana”, kambe swi le livaleni leswaku ti ta hluliwa. A Bibele dzri li Xihambana “xi ta ti hlula”. Kambe i vamani lava va taka pfuna Yesu? A Bibele dzri tlhela dzri hlamula dzri ku hi “lava vitaniwiki, va hlawuliwiki nakone va dumbekaka”. (Dondzra Mpfuletelo 17:14.) Xana ku hlayiwa vamani? Ku hlayiwa vatotiwa lava pfuxiwiki! Kutani loko mutotiwa wa wugamu a ya matilweni na nhlomulu lowukulu wu li kusuhi ni ku hela, xin’we xa swiyavelo swa ku sungula lexi vatotiwa va taka xi kuma i ku va va ya lwa yimpi. Nakunene xiyavelo lexi a xi nabyalanga! Vatotiwa van’wana, na va nge si va Timboni ta Yehovha a va li va lwi va swibakela. Van’we vavu a va li masotxha kambe ntsrhaku ka loko va ve vakriste, va tive ndlela ya ku zrula. (Gal. 5:22; 2 Tes. 3:16) Va tsrhike ku seketela tiyimpi kambe tsrhaku ka loko va ta tekiwa va ya matilweni va ta va kun’we na Kriste ni tintsrumi take ta ku xwenga nakone va talwa ni valala.

¹⁶ Yanakanya hi leswi, van’we ka vatotiwa lava va ha liki kone lani misaveni namunhla va duhwalile nakone a ve he na ntamu. Kambe, loko va ta pfuxiwa va ya hanya matilweni va ta va swivumbiwa swa moya, leswi nga fiki, leswi nga ni ntamu lowukulu nakone va talwa ni hosi ya yimpi, ku nga Yesu. Ntsrhaku ka loko yimpi ya Armagedoni yi helile, va ta tizra kun’we na Yesu akuva va pfuna vhanu leswaku va va lava hetisekaka. Handle ka ku ganaganeka, loko va ta va na va li matilweni va ta kota ku yentxela vamakwezru lava zrandzrekaka lava taka va lani misaveni, mintxhumu yinyingi ku tlula leyi va kotiki ku va yentxela yone loko va ha li vhanu va ku kala ku hetiseka!

17. Hi swi tivisa kuyini leswaku malandzra hinkwawu ya Yehovha ma ta va ma sizrelelekile hi nkama wa Armagedoni?

¹⁷ Xana u hamba xiyenge xa tihamba letin’wana? Kutani, i yini leswi u fanelaka ku swi yentxa loko Armagedoni, ku nga yimpi leyikulu leyi vhanu va kalaka va ngi ngi yi vona, dzri sungula? Swi nabyalile, swo djula u dumba Yehovha u tlhela u landzrelelisisa minkongomiso yake. Xana leswo swi patsra yini? A Bibele ka buku dzra Ezaya 26:20 dzri tlhamuxela leswi: ‘Ninghena a tindlwini taku, u pfala tinyangwa ntsrhaku kwaku, tumbela nkamanyana, a mahlundzru ma ko ma hela.’ Leswi liki malandzra hinkwawu ya ku dumbeka ya Yehovha lama nga matilweni ni lama nga lani misaveni, ma ta va ma sizrelelekile hi nkama wa Armagedoni. Hi lani mupostola Pawulo a tsraliki ha kone, ha tiyiseka leswaku a “mimfumu, kumbe mintxhumu leyi nga kone swoswi, kumbe mintxhumu leyi ya ha taka . . . a swi nge koti ku hi hambanisa ni lizrandzru dzra Xikwembu Nkulukumba”. (Rom. 8:38, 39) Minkama hinkwayu dzrimuka leswi: Yehovha a ku zrandzra ngopfu nakone a nge ti txhuka a ku tsrhikile!