1. Ndi ndzidzi upi wakuti Akristu akudzodzwa onsene anagumanika kudzulu?

 MU PYAKA pya nduli, atumiki a Yahova akhabvundzika: ‘Ndi ndzidzi upi wakuti Akristu akudzodzwa akumalisa anaenda kudzulu?’ Kale tikhanyerezera kuti Akristu akudzodzwa mbadapitiriza pa dziko yapantsi mbakhala m’Paraizu pang’ono pakumala kwa nkhondo ya Armajedhoni. Mbwenye mu Sentinela ya 15 de Julho de 2013, tapfundza kuti mbidzati kutoma nkhondo ya Armajedhoni, Akristu akudzodzwa onsene akukwana 144.000 anagumanika kudzulu.—Mat. 24:31.

2. Ndi mbvundzo upi wakuti panango anthu anaucita, pontho tinapfundzanji mu nsolo uno?

² Mbwenye panango anango a ife anabvundzika: Ninji pinafuna kucitika na “mabira anango” a Kristu anafuna kupitiriza kutumikira Yahova mwakukhulupirika pa dziko yapantsi mu ndzidzi wa “nyatwa ikulu”? (Juw. 10:16; Mat. 24:21) Anango mwa ale anacita khundu mu nsoka wa mabira anango panango anadzudzumika kuti nee anadziwa cakucita peno nee anakhala na anthu toera kuatsogolera, Akristu akudzodzwa onsene angamala kuenda kudzulu. Panango iwo asanyerezera pyenepi thangwi ya pinthu piwiri pinalongwa m’Bhibhlya. Tendeni tione pinthu pyenepi, pontho tinaona kuti thangwi yanji nee tisafunika kudzudzumika.

NDI PINTHU PIPI PYAKUTI NEE PINACITIKA?

3-4. Ndi pinthu pipi pyakuti anango panango anapinyerezera, pontho thangwi yanji?

³ Anango panango ananyerezera kuti Akristu akudzodzwa anacita khundu ya Mathubo Akutonga angakhonda kukhala pa dziko yapantsi toera kutitsogolera, mabira anango anasiya kutumikira Yahova. Panango ananyerezera pyenepi thangwi ya pinthu pingasi pinalonga Bhibhlya. Tendeni tione pitsandzo piwiri. Cakutoma ndi thangwi ya nyantsembe wankulu Yeoyadha. Iye akhali ntumiki wakukhulupirika wa Mulungu. Iye na nkazace Yeozabheati atsidzikiza m’phale akhacemerwa Yeowasi, pontho amphedza toera akhale mambo wadidi na wakukhulupirika. Mu ndzidzi ukhali Yeoyadha  m’maso, Yeowasi atumikira Yahova mwakukhulupirika, pontho acita pinthu pyadidi. Mbwenye pidafa Yeoyadha, Yeowasi atoma kucita pinthu pyakuipa. Iye abvera uphungu wa atsogoleri akuipa, pontho asiya kutumikira Yahova.—2 Kro. 24:2, 15-19.

⁴ Citsandzo cinango ndi ca Akristu adakhala mu ndzidzi wakuti apostolo akhadamala kufa. Mpostolo Juwau akhali wakumalisa. Mbwenye pikhali iye m’maso aphedza Akristu azinji toera kupitiriza kukhala akukhulupirika kuna Yahova. (3 Juw. 4) Ninga pidacita apostolo anango a Yezu, Juwau acita pyonsene toera kutsidzikiza mipingo ku pipfundziso pya anthu akupanduka pyakuti pikhamwazika. (1 Juw. 2:18; onani nota de estudo pa 2 Ates. 2:7.) Mbwenye pidafa Juwau, pipfundziso pyenepi pyatoma kumwazika kakamwe. Mu pyaka pidatowera, anthu anewa akupanduka akhapfundzisa pinthu pizinji pyauthambi mbatawirisa pinthu pyakuipa m’mipingo yonsene.

5. Mwakubverana na pitsandzo pyenepi piwiri, ndi pinthu pipi pyakuti nee tisafunika kupinyerezera?

⁵ Kodi pitsandzo pyenepi piwiri pisapangiza pinafuna kucitika na mabira anango Akristu akudzodzwa angamala kuenda kudzulu? Kodi Akristu akukhulupirika pa dziko yapantsi anatoma kucita pinthu pyakuipa ninga Yeowasi? Peno kukhala akupanduka ninga pidacita anthu azinji pidamala kufa apostolo? Nkhabe! Ife tinakwanisa kukhala na cinyindiro cakuti Akristu akudzodzwa onsene angaenda kudzulu, mabira anango anapitiriza kulambira Yahova munjira yakutawirika, pontho Yahova anaatsalakana. Thangwi yanji tiri na cinyindiro ceneci?

ULAMBIRI WANDIMOMWENE UNAPITIRIZA KWENDA NA KWENDA

6. Ndi midzidzi ipi mitatu inafuna ife kuona?

⁶ Thangwi yanji tinakwanisa kukhala na cinyindiro cakuti ulambiri wandimomwene nee unamala, ngakhale m’midzidzi yakunentsa inafuna kuoneka ntsogolo? Thangwi Bhibhlya isafokotoza kuti ife tiri kukhala mu ndzidzi wakusiyana kakamwe na ndzidzi wa Aizraeli kuphatanizambo ndzidzi wa apostolo. Natenepa tendeni tibvesese mwadidi pidacitika m’midzidzi ineyi mitatu: (1) Ndzidzi wa Aizraeli, (2) ndzidzi udamala kufa apostolo na (3) “ndzidzi wakusasanyira papswa pinthu pyonsene.”—Mabasa 3:21.

7. Thangwi yanji Aizraeli akhala na cifuno cakutumikira Yahova?

⁷ Ndzidzi wa Aizraeli. Ndzidzi ungasi mbadzati kufa, Mose apanga Aizraeli: “Ine ndisadziwa mwadidi kuti ndingafa, mwakukhonda penula imwe munadzacita pinthu pyakuipa mbamusiya njira idakupangani ine.” (Dheu. 31:29) Mose apangambo Aizraeli kuti angasiya kubvera Yahova, iwo mbadaendeswa ku ubitcu. (Dheu. 28:35, 36) Kodi mafala anewa akwanirisika? Inde. Mu pyaka pizinji, amambo azinji nee abvera Yahova, pontho acitisa kuti mbumba ilambire alungu authambi. Na thangwi ineyi, Yahova asiya mbumba ineyi yakukhonda bvera, pontho nee atawirisa kuti mambo wa Izraeli atonge mbumba. (Ezek. 21:25-27) Mbwenye pidaona Aizraeli anango kukwanirisika kwa mafala a Yahova, iwo akhala na cifuno cakuntumikira mwakukhulupirika.—Iza. 55:10, 11.

8. Kodi ife tisafunika kudzumatirwa na kupanduka kudacita Akristu pakumala kufa kwa apostolo?

⁸ Ndzidzi udamala kufa apostolo. Kodi ife tisafunika kudzumatirwa thangwi Akristu a mu ndzidzi wa apostolo akhala akupanduka? Nkhabe. Thangwi Yezu akhadalonga kale kuti pyenepi mbapidacitika. (Mat. 7:21-23; 13:24-30, 36-43) Mpostolo Paulu, Pedhru na Juwau alonga kuti profesiya ya Yezu ikhadatoma kukwanirisika mu ndzidzi ukhali iwo m’maso. (2 Ates. 2:3, 7; 2 Ped. 2:1; 1 Juw. 2:18) Pidafa mpostolo Juwau, Akristu akupanduka atoma cita khundu ya Bhabhilonya Wankulu, wakuti ndi mauphemberi onsene authambi. Natenepa pinthu pikhadalonga Yezu pyakwanirisika pontho.

9. Thangwi yanji ndzidzi wathu ndi wakusiyana na ndzidzi wa Aizraeli na ndzidzi wa apostolo?

 ⁹ “Ndzidzi wakusasanyira papswa pinthu pyonsene.” Ndzidzi wathu ndi wakusiyana na ndzidzi wa Aizraeli na ndzidzi wa apostolo. Mphapo ndzidzi wathu usacemerwa tani? Ife tisalonga kuti zino ndi “ntsiku zakumalisa” za dziko ino yakuipa. (2 Tim. 3:1) Mbwenye Bhibhlya isapangiza kuti ndzidzi ubodzi ene udatoma ntsiku zakumalisa, watomambo ndzidzi unango wakuti unapitiriza mu ndzidzi uzinji. Ndzidzi unoyu unapitiriza mpaka Umambo Waumesiya kusasanyira pinthu, kucitisa anthu kukhala aungwiro na kucitisa dziko yapantsi kukhala Paraizu. Iwo usacemerwa “ndzidzi wakusasanyira papswa pinthu pyonsene.” (Mabasa 3:21) Ndzidzi unoyu watoma mu caka ca 1914. Mphapo ndi pinthu pipi pidasasanyirwa papswa? Yezu atoma kutonga kudzulu. Natenepa Yahova akhazikisa pontho mambo toera kuimirira Iye, wakuti ndi nyakutambira unthaka wa Mambo Dhavidhi. Mbwenye nee ndi Umambo basi udasasanyirwa papswa. Pakupita ndzidzi ungasi, ulambiri wandimomwene watomambo kusasanyirwa papswa! (Iza. 2:2-4; Ezek. 11:17-20) Kodi Akristu andimomwene anadzapeuswa pontho?

10. (a) Bhibhlya ikhadalonganji thangwi ya ulambiri wandimomwene ntsiku zino? (Izaiya 54:17) (b) Thangwi yanji maprofesiya anewa asatitsandzayisa?

¹⁰ Lerini Izaiya 54:17. Nyerezerani profesiya iyi: “Cida consene cinasasanywa toera kukuphekesa nee cinadzapembera.” Mafala anewa ali kukwanirisika cincino. Kusiyapo pyenepi, mafala anagumanika pa lemba ya Izaiya 54:13, 14 ali kukwanirisikambo lero, pontho asatibalangaza kakamwe. Lemba ineyi isalonga: “Anako onsene anadzapfundziswa na Yahova, pontho ntendere wa anako unadzakhala uzinji kakamwe. . . . Iwe unadzakhazikiswa mwakuwanga mu ulungami. Kupondererwa kunadzakhala kutali kakamwe na iwe, nee unadzathuswa, pontho nee unadzagopa cinthu, thangwi pyakugopswa nee pinakufendedzera dhuzi.” Ngakhale Sathani, “mulungu wa dziko ino,” nee asakwanisa kulimirisa basa inacitwa toera kupfundzisa anthu thangwi ya Yahova. (2 Akor. 4:4) Ulambiri wandimomwene wasasanyirwa papswa, pontho nee unadzathapuliswabve na uphemberi wauthambi. Iwo unadzapitiriza kwenda na kwenda. Nkhabepo cida cinafuna kwanisa kufudza atumiki a Yahova.

NDI PINTHU PIPI PINAFUNA KUCITIKA?

11. Ninji pinapangiza kuti mwinji ukulu nee unasiyiwa okhene Akristu akudzodzwa angaenda kudzulu?

¹¹ Ninji pinafuna kucitika Akristu akudzodzwa onsene angamala kuenda kudzulu? Kumbukani kuti Yezu ndi nkumbizi wathu. Iye ndi nsolo wa mpingo Wacikristu. Yezu apangiza pyenepi mu ndzidzi udalonga iye kuti: “Ntsogoleri wanu  ndi mʼbodzi basi, Kristu.” (Mat. 23:10) Mambo wathu atoma kutonga, pontho anacita mwadidi basa yace. Nakuti Kristu ali kutsogolera, ife nee tisafunika kugopa cinthu. Mwandimomwene, ife nee tisadziwa kuti Yezu anatsogolera tani mbumba yace ndzidzi unoyu ungafika. Natenepa tendeni tione pitsandzo pingasi pya m’Bhibhlya pyakuti pinatiphedza toera kukhala akukhurudzika.

12. (a) Yahova atsalakana tani Aizraeli pidafa Mose? (b) Yahova atsalakana tani Aizraeli pidapaswa Eliya basa inango? (Onanimbo foto.)

¹² Aizraeli mbadzati kupita mu Dziko Yakupikirwa, Mose afa. Mphapo ninji pidaacitikira? Kodi iwo nee akwanisa kucita cinthu thangwi yakusowa ciphedzo ca Mose? Nkhabe. Pikhapitiriza iwo kukhala akukhulupirika kuna Yahova, iye akhaatsalakana. Mose mbadzati kufa, Yahova ampanga kuti iye akhafunika kukhazikisa Yoswa toera akhale ntsogoleri wa mbumba. Mose apfundzisa Yoswa mu pyaka pizinji. (Eks. 33:11; Dheu. 34:9) Kusiyapo pyenepi, amuna anango azinji akhalimbo akukhunganyika toera kutsogolera mbumba: Atsogoleri a misoka ya anthu 1.000, atsogoleri a anthu 100, atsogoleri a anthu 50 na atsogoleri a anthu khumi. (Dheu. 1:15) Mbumba ya Mulungu ikhatsalakanwa mwadidi. Munthu unango adapangiza citsandzo cadidi ndi Eliya. Mu pyaka pizinji, iye aphedza Aizraeli toera apitirize mu ulambiri wandimomwene. Mbwenye mukupita kwa ndzidzi, Yahova apasa Eliya basa ipswa ku Yuda. (2 Ama. 2:1; 2 Kro. 21:12) Kodi Aizraeli a mu umambo wa madzindza 10 akhadasiyiwa okhene? Nkhabe. Eliya apfundzisa Elizeu mu pyaka pizinji. Kusiyapo pyenepi, akhalipo ‘ana a aprofeta’ akuti panango akhadapakwa m’misoka, pontho akhadapfundziswa. (2 Ama. 2:7) Natenepa, akhalipo amuna azinji akukhulupirika, pontho akhali dzololo toera kutsogolera mbumba ya Yahova. Yahova apitiriza kukwanirisa cifuniro cace mu ndzidzi ukhatsalakana iye atumiki ace.

13. Yahova apikiranji pa lemba ya Ahebheri 13:5? (Onanimbo foto.)

¹³ Pakumala kuona pitsandzo pyenepi, musaona kuti ninji pinafuna kucitika Akristu akudzodzwa onsene angamala kuenda kudzulu? Nee tisafunika kudzudzumika. M’Bhibhlya tisagumana undimomwene wakukhonda nentsa kubvesesa, pontho wakuti unatiphedza toera kukhala akukhurudzika: Yahova cipo anadzasiya atumiki ace pa dziko yapantsi. (Lerini Ahebheri 13:5.) Lero pali na nsoka ung’ono wa Akristu akudzodzwa anatsogolera mbumba ya Mulungu. Akristu anewa ndi Mathubo Akutonga. Ninga Mose na Eliya, iwo ali kupfundzisa amuna anacita khundu ya mabira anango toera aphedzere kutsalakana mbumba ya Mulungu. Mwacitsandzo, Mathubo Akutonga asakhunganya maxikola mazinji toera kupfundzisa akulu a  mpingo, ayang’aniri a cisa, abale anacita khundu ya Makomiti a Filiali, ayang’aniri pa Bheteli na abale anango. Iwo asapfundzisambo anyakuphedza a makomiti akusiyana-siyana a Mathubo Akutonga. Anyakuphedza anewa ali na mabasa mazinji, pontho iwo ali akukhunganyika toera kuphata mwadidi mabasa awo kuti apitirize kuphedza mabira a Kristu.

14. Tapfundzanji mu nsolo uno mpaka pano?

¹⁴ Mpaka pano tapfundza kuti Akristu akudzodzwa onsene anaenda kudzulu dhuzi na pakumala kwa nyatwa ikulu. Pa ndzidzi unoyu atumiki a Yahova anapitiriza kumulambira mwakukhulupirika. Thangwi ya kutsogolerwa na Yezu Kristu, ife nee tinasiya kulambira Yahova. Ndimomwene kuti mu ndzidzi unoyu tinapomokerwa na nsoka wa madzindza Goge wa Magoge. (Ezek. 38:18-20) Mbwenye kupomokerwa kweneku nee kunakhala mu ndzidzi uzinji, pontho nsoka unoyu nee unapembera. Iwo nee unakwanisa kucitisa mbumba ya Yahova kusiya kumulambira. Mwakukhonda penula, Yahova anapulumusa mbumba yace. Mpostolo Juwau, aona m’masomphenya “mwinji ukulu” wa mabira anango a Kristu. Pontho Juwau adzindikira kuti “mwinji ukulu” unoyu ndi ale adabuluka mu “nyatwa ikulu.” (Apok. 7:9, 14) Mwakukhonda penula, Yahova anadzatipulumusa.

15-16. Mwakubverana na Apokalipse 17:14, Akristu akudzodzwa anacitanji mu ndzidzi wa nkhondo ya Armajedhoni, pontho thangwi yanji pyenepi pisatibalangaza?

¹⁵ Ngakhale tenepo, anango panango anabvundzika: ‘Ninji pinafuna kucitika na Akristu akudzodzwa? Kodi iwo anaenda kacitanji kudzulu?’ Bhibhlya isatawira mwadidi mbvundzo unoyu. Iyo isalonga kuti atongi a dziko ino “anadzamenya nkhondo na mwanabira.” Mwakukhonda penula, iwo anadzaluza. Bhibhlya isalonga kuti “mwanabira anadzaakunda.” Mphapo mbani anafuna kuphedza Yezu? Bhibhlya isatawira: ‘Ale adacemerwa, adasankhulwa na akukhulupirika.’ (Lerini Apokalipse 17:14.) Mbani anthu anewa? Ndi Akristu akudzodzwa analamuswa muli akufa. Natenepa, Akristu onsene akudzodzwa angamala kuenda kudzulu, dhuzi na kunkhomo kwa nyatwa ikulu, ibodzi mwa mabasa akutoma anafuna iwo kucita ndi kumenya nkhondo. Ineyi inakhala basa ikulu kakamwe. Anango mwa Akristu akudzodzwa akhamenyana kale na anango mbadzati kukhala Mboni za  Yahova. Kusiyapo pyenepi, anango akhacita khundu mu nsoka wa anyankhondo. Mbwenye pidakhala iwo Akristu, adziwa njira ya ntendere. (Agal. 5:22; 2 Ates. 3:16) Iwo asiya kuphedzera nkhondo. Mbwenye angamala kuenda kudzulu, iwo anakhala pabodzi na Yezu na aanju, pontho anamenya nkhondo yakumalisa na anyamalwa a Mulungu.

¹⁶ Nyerezerani basi! Lero, Akristu anango akudzodzwa akalamba, pontho nee ali na mphambvu. Mbwenye angalamuswa muli akufa mbaenda kudzulu, iwo anakhala na manungo auzimu, akukhonda kufa na amphambvu. Kusiyapo pyenepi, anadzamenya nkhondo pabodzi na Mambo wakuti ndi Nyankhondo, Yezu Kristu. Nkhondo ya Armajedhoni ingamala, iwo anaphata basa pabodzi na Yezu toera kuphedza anthu kukhala aungwiro. Mwakukhonda penula, angadzakhala kudzulu, iwo anadzacita pinthu pizinji toera kuphedza abale na alongo awo pa dziko yapantsi, kupiringana pikhacita iwo mu ndzidzi ukhali iwo pa dziko yapantsi ninga anthu akusowa ungwiro.

17. Tisadziwa tani kuti atumiki onsene a Mulungu anakhala akutsidzikizika mu ndzidzi wa nkhondo ya Armajedhoni?

¹⁷ Kodi imwe musacita khundu ya mabira anango? Mphapo musafunika kucitanji nkhondo ya Armajedhoni, yakuti ndi nkhondo ikulu kakamwe ingatoma? Basi ene musafunika kunyindira Yahova na kubvera pitsogolero pyace. Munacita tani pyenepi? Bukhu ya Izaiya 26:20 isalonga: “Pitani mʼmakwartu mwanu, pontho fungani misuwo. Bisalani mu ndzidzi wakucepa, mpaka kuipirwa kwa Mulungu kumale.” Pyenepi pisabveka kuti atumiki onsene akukhulupirika a Yahova, kudzulu na pa dziko yapantsi anadzakhala akutsidzikizika mu ndzidzi wa Armajedhoni. Mwakubverana na mafala adalemba mpostolo Paulu, ife tiri na cinyindiro cakuti nkhabepo ‘mautongi, nee pinthu pya cincino, nee pinthu pya ntsogolo, pinakwanisa kuticimwanisa kutambira ufuni wa Mulungu.’ (Aroma 8:38, 39) Ndzidzi onsene kumbukani kuti Yahova asakufunani kakamwe, pontho iye cipo anadzakusiyani.