1. Baalunku buuramino Kiristaani iimira haꞌrannohu mamooteeti?

 LOWO diri albaanni Yihowa manni ‘Gatinohu buuramino Kiristaani iimira haꞌrannohu mamooteeti?’ yee hedino. Bashsho, mitu buuramino Kiristaani Armagedooni oli gedensaanni uullate aana Gannatete mite yanna geeshsha heeꞌrara dandaanno yine hendeemmo. Kayinni Maaja 15, 2013 Agarooshshu Shaera kulloonni garinni uullate aana noohu buuramino Kiristaani baalu Armagedooni oli hanafara albaanni iimira haꞌrannota huwantoommo.—Mat. 24:31.

2. Hiittenne xaꞌmo xaꞌmineemmoha ikkara dandaanno? Konni birxichira maa ronseemmo?

² Ikkirono mitu manni, uullate aana “quuxxote qarri” yannara Yihowara ammaname soqqamannohu Kiristoosihu “wolu geꞌreewi” hiikkannoyya? yee xaꞌmannoha ikkara dandaanno. (Yoh. 10:16; Mat. 24:21) Xaa yannara heedhannori mitootu, buurantinori ammanate roduuwinsa iimira hadhuhu gedensaanni kaaꞌlannonkehu diheeꞌranno woy callootinke ganteemmo yite yaaddannoha ikkara dandaanno. Hanni insa hatto yite heddanno gede assitansara dandiitannota lame Qullaawu Maxaafi xagge laꞌno. Hakkiinni yaandeemmo gede assannonkeri dino yineemmohu mayiraatiro laꞌneemmo.

IKKANNOKKI COYI MAATI?

3-4. Mitootu mayite heddannoha ikkara dandaanno? Mayira?

³ Mitootu, massagannonsahu Aliidi Bisi ledonsa heeꞌrannokki daafira wolu geꞌreewi Yihowara soqqama aguranno yite yaaddannoha ikkara dandaanno. Qullaawu Maxaafi giddo kulloonniti mite xagge insa hatto yite waajjitanno gede assitinonsaha ikkara dandaanno. Hanni lame lawishsha laꞌno. Umiti Kakkalaanote Biili Yoodahe daafira kultanno xaggeeti. Isi kaajja  ammana noosi manchooti. Yoodahenna minaamasi Yihosheeba shiima qaaqqo Iyoaasi agartino; hattono isi danchanna ammanamino moote ikkanno gede kaaꞌlitino. Geerchu Yoodahe lubbotenni noo geeshsha Iyoaasi danchare assino. Yoodahe reyihu gedensaanni kayinni Iyoaasi bushare assa hanafino. Isi bushuullu roorrooti yitannore macciishshino hattono Yihowa agurino.—2 Dud. 24:2, 15-19.

⁴ Wolu kayinni, layinki xibbi diro heeꞌrino Kiristaani lawishshaati. Jeefote gatinohu soqqamaasinchu Yohaannisi batinyu Kiristaani Yihowara ammaname soqqamanno gede kaaꞌlino. (3 Yoh. 4) Soqqamaasinchu Yohaannisi wolootu ammanantinori Yesuusi soqqamaasine ledo kaadaasinete rosi halaꞌlannokki gede mite yanna geeshsha lowo geya sharramanni keeshshino. (1 Yoh. 2:18; 2 Tes. 2:7) Yohaannisi reyihu gedensaanni kayinni kaadaasinete rosi dolu giira gede halaꞌlino. Boodu diri giddo calla Kiristaanu songo woꞌmunni woꞌma battaabbino.

5. Tenne lamenta xagge nabbambeemmo woyite mayine heda dihasiissannonke?

⁵ Tini Qullaawu Maxaafi xagge, buurantinori iimira hadhuhu gedensaanni Kiristoosiri wolootu geꞌreewi Iyoaasi gede bushare assa hanaffannota woy soqqamaasine reyite gooffuhu gedensaanni batinyu Kiristaani kaadaasine ikkinonte gede insano kaadaasine ikkitannota leellishshannoni? Dileellishshanno! Buuramino Kiristaani iimira haꞌrihu gedensaanni wolu geꞌreewi Yihowara ammaname soqqama agurannokkitanna isino insa towaatannonsata addaxxa dandiineemmo. Tenne huluullammeemmokkihu mayiraati?

XALALA MAGANSIꞌRA DIBATTAABBANNO

6. Haransine hiittenne sase yanna daafira xiinxallineemmo?

⁶ Albillitte qarrissanno yanna daggannoha ikkirono, xalala magansiꞌra battaabbannokkita addaxxineemmohu mayiraati? Korkaatuno heeꞌnoommo yanna daafira Qullaawu Maxaafi giddonni ronsoommo daafiraati. Tini ninke heeꞌnoommo yanna hunda Israeele heedhino yannanninna layinki xibbi diri Kiristaani heeꞌrino yannanni lowo geeshsha baxxitinote. Hanni tenne sase yanna daafira seekkine xiinxallino. Insano: (1) Hundi Israeele heedhino yannaati, (2) soqqamaasine reyite gooffuhu gedensaanni noo yannaati, hattono (3) ninke heeꞌnoommote ‘baalunku coyi haaro ikkanno’ yannaati.—Soq. 3:21.

7. Hunda Israeelete yannara Israeelete manninna mootoollansa bushare assitinoha ikkirono ammanantinori hexxo mudhitinokkihu mayiraati?

⁷ Hundi Israeele heedhino yanna. Muse reyara shiima yannara albaanni Israeelete manna togo yiino: “Ani reemmo waro horonta battaabbinannita, hajajoommoꞌne doogonnino wirri yitinannita afoommo.” (Mar. 31:29) Qoleno Muse Israeele finqilturo qafadantannota kule qorowisiisinonsa. (Mar. 28:35, 36) Kuni qaali woꞌminoyya? Ee woꞌmino. Lowo diro batinye mootoolla busha coye assitino; mannuno insa faale haꞌrino. Hakko daafira Yihowa konne busha manna qorichishino; hattono Israeelete mootoolla gashshitannonsata hoolino. (Hiz. 21:25-27) Ikkollana ammanaminohu Israeelete manni Maganu coyiꞌrinori woꞌminota huwatiti worbuulle ikkansa leellishino.—Isa. 55:10, 11.

8. Layinki xibbi diro heedhinoti Kiristaanu songo battaabbino daafira dhagge assiꞌra hasiissannonke? Xawisi.

⁸ Soqqamaasine reyite gooffuhu gedensaanni noo yanna. Layinki xibbi diro heedhinoti Kiristaanu songo battaabbino daafira dhagge assiꞌra hasiissannonke? Dihasiissannonke. Yesuusi kaadaasine batidhannota balaxe masaalino. (Mat. 7:21-23; 13:24-30, 36-43) Soqqamaasinchu Phaawuloosi, Pheexiroosinna  Yohaannisi Yesuusi coyiꞌrino masaalo umi xibbi diro woꞌma hanaffinota coyidhino. (2 Tes. 2:3, 7; 2 Phe. 2:1; 1 Yoh. 2:18) Layinki xibbi diro Kiristaanu songo battaabbino. Shiima yanna gedensaanni kaadaasine Kiristaani Bayira Baabiloone yaano alamete doyichote kaphu ammaꞌno wido ikkino. Yesuusi masaalotenni coyiꞌrinori xaano woꞌmino.

9. Ninke heeꞌnoommo yanna hundi Israeele heedhino yannanninna layinki xibbi diri Kiristaani heeꞌrino yannanni baxxitannohu hiittoonniiti?

⁹ ‘Baalunku coyi haaro ikkanno yanna.’ Ninke heeꞌnoommo yanna hundi Israeele heedhino yannanninna layinki xibbi diro lowo kaadaasine kaꞌino yannanni baxxitanno. Ninke heeꞌnoommo yanna hiittoote? Ninke heeꞌnoommo yanna duucha woyite tini busha alame baꞌannoho ‘goofimarchu barraati’ yinanni. (2 Xim. 3:1) Kayinni Qullaawu Maxaafi tini yanna lowo tiro afiꞌrinohunna seedu diri hanafinota ikkitinota kulanno. Tini yanna Kiristoosi gashshooti mannu ooso guuta assa geeshshanna uulla gannate assa geeshsha keeshshitanno. Tenne yanna ‘baalunku coyi haaro ikkanno yanna’ yinoonni. (Soq. 3:21) Tini yanna hanaffinohu 1914nniti. Hatte yannara haarooꞌminori maatiyya? Yesuusi Moote ikke iima zuufaanete ofollino. Hakko daafira Yihowa iso riqiwe gashshannoha ammanamino Moote Daawiti sircho galagale shoomino. Ikkirono Yihowa haaroonsino coyi konne calla diꞌꞌikkino. Hakkunni gedensaanni mulenni xalala magansiꞌra wirro xintantino. (Isa. 2:2-4; Hiz. 11:17-20) Tini xalala magansiꞌra galagalte battaabbanno ikka?

10. (a) Yannankera noote xalala magansiꞌra daafira Qullaawu Maxaafi mayyee masaalino? (Isayaasi 54:17) (b) Tini masaalo jawaachishshannote yineemmohu mayiraati?

¹⁰ Isayaasi 54:17 nabbawi. Hanni “Ate shinara seekkinanni bagadi shuffanno”! yitanno masaalo daafira hedi. Qullaawu ayyaaninni borreessinoonniti tini masaalo xaa yannara woꞌmitanni no. Aante nooti jawaachishshanno masaalono yannankera woꞌmitanni no. “Oosokki baala ani Kaaliiqi rosiiseemmo; oosokki keerino batiꞌrinoha ikkanno. Halaalunna taashshate aana xinteemmohe; . . . waajjishannoherinna masisannoheri diheeꞌranno.” (Isa. 54:13, 14) “Tenne gobba [alame] magani” Sheexaanu nafa Yihowa manni loosannoha wolootaho Yihowa daafira rosiisate looso hoola didandaanno. (2 Qor. 4:4) Xalala magansiꞌra xintantino; galagalte horonta dibattaabbanno. Hegerera heedhanno. Ninke shaate seekkinanni bagadi shuffanno!

 IKKANNO COYI MAATI?

11. Buurantinori iimira hadhanno woyite lowo daga tunge agurranninsakkita addaxxineemmo gede assannonkeri maati?

¹¹ Buurantinori iimira hadhuhu gedensaanni mayi ikkanno? Yesuusi Allaalaanchonke ikkinota qaagge. Isi Kiristaanu songora umoho. Yesuusi ‘Massagaanchinke mitto, isino Kiristoosa’ ikkinota xawise kulino. (Mat. 23:10) Gashshe noo Mootenke loososi horontanni dideanno. Kiristoosi massagannonsa daafira uullate aana noori isi harunsaano waajjitanno gede assannonsari dino. Hige hatte yannara Kiristoosi mannasi massagannohu hiittoonniitiro mitto mittonka coye dianfoommo. Hakko daafira hanni jawaachishannonkeha mito Qullaawu Maxaafi lawishsha laꞌno.

12. (a) Muse reyihu gedensaanni Yihowa mannasi towaatinohu hiittoonniiti? (b) Eeliyaasira wole looso uyinisihu gedensaanni Yihowa mannasi towaatinohu hiittoonniiti? (Misileno lai.)

¹² Muse reyinohu Israeele Hexxote Gobba eꞌara albaanniiti. Maganu manni ma ikkiyya? Kuni ammanamino manchi reyita Maganu mannasi kaaꞌla agurinoni? Diagurino. Insa ammanantinore ikkite heedhu geeshsha Yihowa insa towaatinonsa. Muse reyara albaanni Yihowa Iyyaasu manna massaganno gede qajeelsasira kulinosi. Muse lowo diro Iyyaasu qajeelsanni keeshshino. (Ful. 33:11; Mar. 34:9) Qoleno massagate dandoo noonsari kumu roorrooti, xibbu roorrooti ontawu roorrootinna tonnu roorrooti batinyu labballi no. (Mar. 1:15) Insa Maganu manna dancha gede towaattino. Eeliyaasi yannarano hattooti. Isi Israeele Yihowa magansidhanno gede lowo diro diinaggaawe kaaꞌlino. Kayinni gedensoonni Yihowa Yihudu gashshooti giddo wodiidoonni Eeliyaasira wole looso uyinosi. (2 Mot. 2:1; 2 Dud. 21:12) Tonne gaꞌre afiꞌrinohu Israeelete gashshooti giddo noohu ammanamino manni massagannonsaha hooginoyya? Dihoogino. Eeliyaasi lowo diro Elsai qajeelsanni keeshshino. Qoleno hakkiicho mito geeshsha qajeeltinori ‘himanaanote’ ooso no. (2 Mot. 2:7) Hakko daafira Maganu manna massaga dandiitannori ammanantinori batinyu labballi no. Yihowa hedinore wonshanna ammanante magansidhannosire towaata diagurino.

13. Ibiraawoota 13:5b Yihowa mayyee qaale einonke? (Misileno lai.)

¹³ Kuri lawishshuwa leellishshannonte gede, uullate aana gattinori buurantinori iimira hadhe gooffanno woyite mayi ikkannoha lawannoꞌne? Yaada dihasiissannonke. Qullaawu Maxaafi xawise Yihowa uullate aana  noo mannasi horo tuge agurannokkita kulanno. (Ibiraawoota 13:5b nabbawi.) Musenna Eeliyaasinte gede xaa yannara albisa ikke massaganni noohu shiima gaamo wido ikkinohu buuramino Kiristaani woloota qajeelsa lowo geeshsha hasiissannota ikkitinota afino. Aliidi Bisi miilla ikkite soqqantanno roduuwi, wolu geꞌreewi wido ikkitino labballi albisa ikkite soqqantanno gede lowo diro qajeelsitanni keeshshitino. Lawishshaho insa, songote cimeeyye, woradu aliidi laꞌꞌaano, sinu biiro komite miilla, Beeteelete giddo aliidi laꞌꞌaano ikkite soqqantannorenna woloota qajeelsate batinye rosu minna qixxeessitino. Aliidi bisi umisi Aliidi Bisi Komite giddo kaaꞌlaano ikkite addi addi looso loossanno roduuwa qajeelsanni keeshshino. Kuri kaaꞌlaano ikkite soqqantanno roduuwi uyinoonninsaha shota ikkinokki looso ammanante loossanni no. Insa woꞌmanka woyite Kiristoosi geꞌreewo towaatate dancha gede qixxaabbino.

14. Konni hasaawiti qara hedo maati?

¹⁴ Konni hasaawiti qara hedo aante noote: Uullate aana gattinori buurantinori quuxxote qarri jeefora iimira hadhe gooffanno woyite Yihowa halaalunni magansiꞌranno manni uullate aana heeꞌranno. Hatte yannarano massagannonkehu Yesuusi Kiristoosa ikkino daafira uullate aana noohu Yihowa manni ammaname iso magansiꞌra diaguranno. Hige hatte yannara Maagoogi Googi yaano buusantino daga Maganu manna siꞌannota anfoommo. (Hiz. 38:18-20) Ikkollana kuni siꞌꞌi mulenni uurranno; hattono Yihowa manni iso magansiꞌrannokki gede diassanno. Yihowa mannasi gatisannoti egennantinote! Soqqamaasinchu Yohaannisi Kiristoosiha wolu geꞌreewi wido ikkinoha “lowo manna” ajuujatenni laino. Yohaannisira kuni lowo manni ‘lowo qarra qeele fule dayinoha’ ikkinota kulloonnisi. (Aju. 7:9, 14) Addanko Yihowa insa gatisannonsa!

15-16. Yohaannisi Ajuuja 17:14 kultanno garinni Kiristoosiri buurantino harunsaano Armagedooni oli yannara maa assitanno? Tini jawaachishshannote yineemmohu mayiraati?

¹⁵ Ikkirono, mitu manni ‘Buurantinori iimira hadhuhu gedensaanni maa assitanno?’ yee hedannoha ikkara dandaanno. Qullaawu Maxaafi tenne xaꞌmora dawaro xawise  qolanno. Tenne alameti poletiku gashshaano ‘Geꞌrechu ledo olantannota’ kulanno. Hige insa qeelamansa digattanno. Qullaawu Maxaafi “Geꞌrechu . . . insa qeelanno” yaanno. Iso kaaꞌlitannori ayeootiyya? Qummeeshshu “woshshantinori, doorantinorinna ammanantinori” iso kaaꞌlitannosita kulanno. (Yohaannisi Ajuuja 17:14 nabbawi.) Insa ayeooti? Reyotenni kainoho buuramino Kiristaanaati! Hakko daafira uullate aana gattinori buurantinori quuxxote qarri jeefora iimira hadhanno woyite umo uyinanninsa loosi giddo mittu olamate. Kuni dhagge ikkanno loosooti! Buurantinori giddo mitu Yihowa Farciꞌraasine ikkitara albaanni wolootu ledo olantannoreeti. Mitu isinni olantote. Kayinni insa gedensoonni Kiristaana ikkitino; hattono wolootu ledo keerunni heeꞌnanni gara rossino. (Gal. 5:22; 2 Tes. 3:16) Qoleno insa olama agurtino. Kayinni insa reyotenni kaꞌe iimira hadhu gedensaanni, Kiristoosinna keeraano sokkaanosi wido ikkite Maganu diinna ledo jeefote ola olantanno.

¹⁶ Hanni tenne hedi! Mitu buuramino Kiristaani uullate aana noo yannara geedhitinoreetinna dhuku anje noonsareeti. Kayinni insa reyotenni kaꞌe iimira hadhuhu gedensaanni, wolqaataammanna reyannokkiha ayyaanu kalaqo ikkite olamaanchu Mootensa Yesuusi Kiristoosi ledo halante olantanno. Armagedooni oli gedensaanni insa Yesuusi ledo kaaꞌlante mannu ooso guuta ikkitanno gede assitanno. Insa uullate aana guuntete xeꞌne noonsare ikkite heedhino yannanni roore iimira hadhuhu gedensaanni ammanate roduuwansa lowo geeshsha kaaꞌlitannoti dihuluullissannote!

17. Maganu soqqamaano baala Armagedooni oli yannara gatte saꞌannota anfeemmohu hiittoonniiti?

¹⁷ Ati wolu geꞌreewi widooti? Hatto ikkiro Armagedooni oli hanafanno woyite maa assa hasiissannohe? Yihowa addaxxi; hattono biddishshasi harunsi. Hatto assate maa assa hasiissannohe? Qullaawu Maxaafi togo yee sheshifachishshanno hedo kulannonke: “Miniꞌnera eꞌine cufana cufidhe; hanqu saꞌꞌa geeshsha shiima yanna maaxamme.” (Isa. 26:20) Iimanna uullate aana nooti baalanti Maganu soqqamaano hatte yannara mittoreno diꞌꞌikkitanno. Soqqamaasinchu Phaawuloosi yiinonte gede ‘gashshaano, woy xa noohuno ikko gedensaanni daanno coyi Maganu baxilliwiinni badankera’ dandaannokkita anfoommo. (Rom. 8:38, 39) Yihowa baxannohetanna horo tuge agurannohekkita woꞌmanka woyite qaagi!