1. Ankfutami w’avuta ankfumɔ yongoyala l’olongo winá wɔkɔnge?

 AMBOHETÁ ɛnɔnyi efula, enkambi wɛ Yehova wayawopolaki ambɔ: ‘Winá wɔkɔnge w’ankfutami w’avuta w’ekomo yɔngɔsama t’olongo?’ Takanelaki ntondo ente ankfumi w’avuta amɔtshi wakoka ntshikala lá Paradiso kelá looko, ndambo k’etsho m’ɔkɔngɔ wɔ mbandji k’Armagɛdɔ. Koko tekaka l’Etange k’Olami kɛ Ngɔndɔ k’esambele 15, 2013, ente ankfutami w’avuta ankfumɔ walekɔ́ winá wɔsɔ lá looko, wangotshɔ t’olongo lá ntondo kɛ mbandji k’Armagɛdɔ mbanga.​—Mat. 24:31.

2. Okokaso ndjopola woopó wɔkɔnge, ko kɛkɔnge k’oshishimaso lɔ lá djamba djɛnɛ?

² Koko, tokoka ndáwopola ente: Kɛkɔnge kengokomela ‘ɛnkɔkɔ enkina’ wɛ Kristo wengokambela Yehova la nkɔmano lanɛ lá looko lá winá wɔ ‘ndjolo k’ekekete’? (Dj. 10:16; Mat. 24:21) Amɔtshi wakoka nkiyana lɔɔko kɛnɛ ambɔ wangoyala l’olengedji kana wangokadjema winá wɔ wananyɔ l’ankaana yɛwɔ yɛ ngandji y’ankfutami w’avuta yɔngɔsama t’olongo. Nyontshɔ tokoshishima ɛkɔndɔ epe w’Afunelo waatshinda djɛ nkanela nghɔsɔ. Manyi tɔnghɛna lamo yopalekɔ ntshina nkiyana.

KƐKƆNGE KEPANGONANGHEMA?

3-4. Anto amɔtshi okokawɔ ndáwopola ambɔ nge, ko lamo?

³ Amɔtshi wakoka ndáwopola ntsha ɛnkɔkɔ enkina wangowangɔ má nsɔsɔlɔ winá wɔ yopangoyala lonkina la wananyɔ w’ankfutami w’avuta w’Iloyi yɛ lɔndjɛ djɛ ndaalɔndjɛ. Wakoka nkanela nghɔsɔ m’ɔtɛ w’ɛkɔndɔ ɛmɔtshi wɛ Bible. Nyontshɔ tokolenda ndjɔmbɔmba ipe. Kɛ ntondo kelendaná la Nkfundji k’Ekekete Jɛhɔyada. Nde ayalaka onkambi wɔ Ndjambe wɔ  nkɔmano efula. Nde nya wadjɛnde Jɛhɔshabɛtɛ, wawombaka wɔna mpame w’ilɛngɛ w’etawɔ ambɔ Jɛhɔyashɛ la w’okotshɛ́ka djɛ ndjala nkfumi kɛ wɔlɔ la kɛ nkɔmano. L’ilá k’enkfumɔ kɛ Jɛhɔyada, mpame k’ekokolo kɛsɔ ndayalaka la lowiko, Jɛhɔyashɛ ananghaki ngo akambo wa wɔlɔ. Koko ndambo daambi m’ɔkɔngɔ wɔ nyɔyi kɛ Jɛhɔyada, Jɛhɔyashɛ apɛyɛka Yehova ɔkɔngɔ. Nde ekameyɛka wana w’ankfumi w’antɔmbɔki ko atshikaka nkambela Yehova.​—2 Ɛk. 24:2, 15-19.

⁴ Ndjɔmbɔmba kenkina nde k’Akristo w’ɛtɛndɔ k’ape. Ɔpɔstɔlɔ Djɔanɛ ayalaka ɔpɔstɔlɔ w’ekomo w’oyalisá la ndjimbo kɛ wɔlɔ te Akristo efula, la wakótshisá djɛ ntshikala l’olemo wɔ Yehova. (3 Dj. 4) Esanga l’apɔstɔlɔ ankina wa nkɔmano wa Yeso, Djɔanɛ ayalaka ladjɛ nangha la wolo djɛ nama otshumano má elakanyelo w’apɔsta iyatshanghanyɛka. (1 Dj. 2:18; lenda nɔtɛ kɛ wekelo kɛ 2 Te. 2:7.) Koko m’ɔkɔngɔ wɔ nyɔyi kɛ Djɔanɛ, Akristo efula wawangaka nkilika elakanyelo w’apɔsta. Lako mpeta ilá, ntshumano dj’Akristo nkfumbolamaka m’elakanyelo w’apɔsta.

5. Lá nkilika ɛkɔndɔ epe wɛnɛ, nkambo djɛkɔnge djɛ sopakoke ntepela ente ngonanghema?

⁵ Ndjɔmbɔmba ipe y’Afunelo yɛsɔ yɛnyɛ ente nkambo mɔtshi djɛfɛna djengokomela ɛnkɔkɔ enkina wɛ Kristo winá w’ankfutami w’avuta yɔngɔsama t’olongo? Lá winá wɔk’ɔmɔ, Akristo wa nkɔmano wangoyalá lá looko, wangokadjɛ elakanyelo wɛwɔ ngo ngete Jɛhɔyashɛ kana wangodjimbɔ tá apɔstazi ngo ngete Akristo w’ɛtɛndɔ k’ape D.D.? Ndjɔndɔ lá weepó wɛsɔ nde lako! Tokoka ndjala l’eshikikelo ente winá w’ankfutami w’avuta yongima má looko, ɛnkɔkɔ enkina wengokindjɛ ntɛmɔla Yehova lá wopo wɔ wɔlɔ la wangokindjɛ mbakelama. Lamo okokaso ndjala l’eshikikelo kɛsɔ?

ƆTƐMWƐLƆ WƆ PIYƆƆ W’OPANGOKFUMBOLAMA

6. Deko ntshato djɛkɔnge dj’ɔkɔpaso nshishima?

⁶ Lamo okokaso ndjala l’eshikikelo ente ɔtɛmwɛlɔ wɔ piyɔɔ w’opangokfumbolama, kaanga lá deko djɛ wolo ntokonga lá ntondo? Ladjikɛnde tombeka kɛnɛ kɛ Bible otepelande lá nkambo djɛ eleko kɛso kɛnɛ. Eleko kɛso kɛnɛ ketshikitana otale l’eleko k’Isariyɛlɛ yɛ ntondo la k’Akristo w’ɛtɛndɔ k’ape. Nyontshɔ tɔkɔkɔmɛ wɔlɔwɔlɔ deko ntshato djɛsɔ: 1) Eleko k’Isariyɛlɛ yɛ ntondo, 2) eleko k’imá ɔkɔngɔ wɔ nyɔyi k’apɔstɔlɔ, la 3) eleko kɛso, ‘eleko k’okalo wɔ nkete nkfumɔ.’​—Ele. 3:21.

7. Lá Isariyɛlɛ yɛ ntondo, lamo anto wa nkɔmano yotalɛmba winá wɔ owila la ankfumi yasɔnaka djɛ nangha akambo wa nyɛtshi?

⁷ Eleko k’Isariyɛlɛ yɛ ntondo. Ndambo daambi lá ntondo kɛ nde mvɔ, Mɔsɛ ashimelaka ase Isariyɛlɛ ante: ‘Ladjikɛnde ndjewa wɔlɔ efula ente m’ɔkɔngɔ wɔ nyɔyi kɛmi, ape l’ehamo nyongonangha akambo wa pɔlɔ la nyongovunga mboka kɛ manyɛnyɛ.’ (Mvu. 31:29) Mɔsɛ ewoyɛka lonkina ante ntsha owila w’Isariyɛlɛ w’ɔmbɔtɔmbɔkɔ, waangatɔla tá lomfumbe. (Mvu. 28:35, 36) Etepela wɛsɔ wekotshamaka? Ee. L’ilá kɛ nkama y’ɛnɔnyi, ankfumi efula wananghaka wayi wa nyɛtshi lá wiso wa Ndjambe la wavungɛka enkambi wɛnde mboka. Kɛsɔ ketshindaka Yehova djɛ nkadjɛ owila wɔ lopango wɔsɔ la djɛ ndjopa ɔnɔnghɔ wɔ ankfumi y’Isariyɛlɛ. (Ezk. 21:25-27) Koko winá w’ase Isariyɛlɛ wa nkɔmano yɛnaká otepela wɔ Ndjambe wokotshama, wawaka oloko wolo wɔ nkindjɛ ndokambela.​—Iza. 55:10, 11.

8. Iso ladjɛ nkamɔ má wopo wɔ otshumano w’Akristo w’ɛtɛndɔ k’ape yakfumbolama? Pakisola.

⁸ Eleko kɛ m’ɔkɔngɔ wɔ nyɔyi k’apɔstɔlɔ. Iso ladjɛ nkamɔ má nyɛna ente otshumano w’Akristo w’ɛtɛndɔ kɛ ntondo  w’okfumbolamaka? Lako. Yeso ewoyɛka ante elakanyelo efula w’apɔsta wengingela. (Mat. 7:21-23; 13:24-30, 36-43) Ɔpɔstɔlɔ Poolo, Pɛtɛlɔ la Djɔanɛ, washikikɛka iyankfumɔ kɛkɔ ambɔ profɛsi kɛ Yeso kewangaka nkotshama l’ɛtɛndɔ kɛ ntondo D.D. (2 Te. 2:3, 7; 2 Pɛ. 2:1; 1 Dj. 2:18) L’ɛtɛndɔ k’ape D.D., ntshumano dj’Akristo nkfumbolamaka. Apɔsta wa lokristokristo wafulanelaka la wakomaka etenyi kɛ Babilɔnɛ dj’Ekekete, osanga wɔ ntolo dj’engolo djel’andja w’otondo. Prɔfɛsi ifunamisá má wolo wɔ nyuma kɛ Ndjambe ikotshamaka lonkina.

9. Lá wopo wɔkɔnge eleko kɛso kɛnɛ otshikitanawɔ la kɛ Isariyɛlɛ y’etsho wɛ ntondo la k’otshumano w’Akristo w’ɛtɛndɔ k’ape?

⁹ ‘Eleko k’okalo wɔ nkete nkfumɔ.’ Eleko kɛso ketshikitana l’eleko k’Isariyɛlɛ yɛ ntondo la kɛ apɔsta keyalisá l’ɛtɛndɔ k’ape D.D. Eleko kɛso kɛnɛ etamawɔ nge? Tongetake eleko kɛso kɛnɛ ente ‘etsho w’ekomo’ wɛ nkfumbo dj’akambo djɛ nyɛtshi djɛnɛ. (2 Ti. 3:1) Koko Bible ɛnyɛ ante eleko kɛmɔtshi k’ekekete la k’otale kewangaka m’etsho wɛkɔ wɛsɔ. Kengotshɔ tii lá winá wɔ Onkfumi wɔ Mesiya yongokawoyɛ wana w’anto lá djɔ la yongokadjimola looko paradiso. Etawɔ eleko kɛsɔ nde ‘eleko k’okalo wɔ nkete nkfumɔ.’ (Ele. 3:21) Eleko kɛsɔ kewangaka lá 1914. Iya nkete djɛkɔnge djekalisá? Wawekadjɛka Yeso Nkfumi l’olongo. Ko Yehova awaka lonkina onto w’ɔlɔndjɛ lá nkosa kɛnde, mpɛna kɛ Nkfumi kɛ nkɔmano Davidɛ. Koko, ape ngo onkfumi wɔsɔ toko ndeke Yehova ndakawoyɛ. Ndambo daambi m’ɔkɔngɔ, ɔtɛmwɛlɔ wɔ piyɔɔ wokalɔka! (Iza. 2:2-4; Ezk. 11:17-20) Wongokfumbolama lonkina?

10. a) Kɛkɔnge kɛ Bible ndewoyɛ lá kɛnɛ kelendana l’ɔtɛmwɛlɔ wɔ piyɔɔ wɔ l’eleko kɛso? (Izaya 54:17) b) Lamo prɔfɛsi yɛ nghɔsɔ otoshikikɛwɔ?

¹⁰ Wala Izaya 54:17. Tokokanela ndambo lá prɔfɛsi kɛnɛ: ‘Lako epeko kɛ yongotshula djɛ nkonanyɛ kengolonga’! Etepela wefunamisá má mbamba kɛ nyuma k’ekina wɛsɔ w’ekotshama lɔɔko kɛnɛ. Etepela enkina wekembɛ wɛlɔnda wɛnɛ welendana lonkina l’eleko kɛso: ‘Wana wako ankfumɔ wangolakanyema me Yehova, la vu djɛ wana wako ngoyala efula. Ongopikama ndii lá sii. . . Wɛ opangoka kaanga ekete wɔma. edjinge lako ekete kengokodjidjimɛ lokomba la wɔma.’ (Iza. 54:13, 14) Kaanga ‘ndjambe kɛ nkfumbo dj’akambo djɛnɛ,’ Satana otondo wɔnde, apalekɔ la nkfulu kɛ nshimba olemo w’olakanyelo w’enkambi wɛ Yehova okambawɔ. (2 Kɔ. 4:4) Ɔtɛmwɛlɔ wɔ nsɔsɔlɔ wombokalɔ la wopakfumbolamaki  lonkina. Wongotshikala lotshinda lotshinda. Lako epeko ketshulamisá djɛ ntonanyɛ kengolonga!

KƐKƆNGE KENGONANGHEMÁ?

11. Kɛkɔnge ketoshikikɛ ente oloyi w’ekekete w’opongokadjema winá w’ankfutami w’avuta yongotshɔ t’olongo?

¹¹ Kɛkɔnge kengonanghemá winá w’ankfutami w’avuta yɔngɔsama t’olongo? Tovungɔ ente Yeso ndeke lolekɔ́ Olami wɔso. Alekɔ owandji w’otshumano w’Akristo. Yeso atepelaka papoo ante: ‘Nyolekɔ ngo la ndɔndji kɛmɔ, Kristo.’ (Mat. 23:10) Nkfumi kɛso k’ɛlɔndjɛ apapekɔki olemo wɔnde wɔsɔ kawo. Ladjikɛnde Kristo ndeke lɔngɔlɔndjɛ ambeki wande welá looko wapangoka kaanga ekete kɛmɔ wɔma. Lá nsɔsɔlɔ, topewe ikakambo inkfumɔ ilendana lá wopo wɔ Kristo ndɔngɔlɔndjɛ ambeki wande lá winá wɔsɔ. Koko, nyontshɔ tokoshishima ndjɔmbɔmba imɔtshi yɛ Bible ikoka ntoshikikɛ.

12. Wopo wɔkɔnge Yehova ndawakela enkambi wɛnde a) m’ɔkɔngɔ wɔ nyɔyi kɛ Mɔsɛ? b) m’ɔkɔngɔ wɔ Elidja mba odjito onkina? (Lenda edjinge ntshango.)

¹² Mɔsɛ avɔka lá ntondo k’ase Isariyɛlɛ ndjingela lá Looko lɔ Daka. Kɛkɔnge kekomelisá enkambi wɛ Ndjambe? Yehova akadjɛka enkambi wɛnde m’ɔkɔngɔ wɔ nyɔyi kɛ mpame kɛ nkɔmano kɛsɔ? Lako. L’ilá kenkfumɔ kɛ yayalaka la nkɔmano, Yehova awakelaki. Lá ntondo kɛ Mɔsɛ mvɔ, Yehova oshimelaka djɛ mpɛyɛ Yosua odjito wɔ ndɔndjɛ owila w’Isariyɛlɛ. Mɔsɛ ɔsaka ɛnɔnyi efula djɛ nkfumba Yosua. (Epo. 33:11; Mvu. 34:9) Lá djiko djɛ lasɔ, ampame inkina iyalaki l’akoka wa nkotshɛ́ djɛ ndɔndjɛ owila wayalaki, ndjɔmbɔmba ewandji wɛ nunu, wɛ nkama, wɛ akumi atano la wɛ djomi. (Mvu. 1:15) Enkambi wɛ Ndjambe walamemaki wɔlɔ efula. Tɛna ndjɔmbɔmba kɛ wopo wɔkɔ ɔmɔ le Elidja. Nde akambaka la wolo efula l’ilá k’ɛnɔnyi djɛ nkotshɛ́ ase Isariyɛlɛ dj’iwɔ ntɛmɔla Yehova. Koko winá w’okokaka wɔ Yehova ndotome djɛ ntokamba olemo onkina lá sidɛ kɛ Juda. (2 Nk. 2:1; 2 Ɛk. 21:12) Enkambi wɛ Ndjambe wɛ nkɔmano weyalaki l’onkfumi w’Isariyɛlɛ wɔ tɔkɔlɛ djomi wakadjemaka? Lako. Elidja ɔsaka ɛnɔnyi efula djɛ nkfumba Elisha. La lonkina ‘wana w’aprɔfɛtɛ’ wawisá okfumbelo wayalaki. (2 Nk. 2:7) Djɛkondeke, ampame efula yɛ nkɔmano ikokaki nkotshɛ́ djɛ ndɔndjɛ enkambi wɛ Ndjambe iyalaki. Yehova akindjɛki nkotshɛ ikanyi yɛnde, ole nkotshɛ ehomba w’enkambi wɛnde wɛ nkɔmano.

13. Eshikikelo kɛkɔnge k’okokaso mba má Hebero 13:5b? (Lenda edjinge ntshango.)

¹³ La ndjɔmbɔmba inkfumɔ yɛsɔ lá wɔɔngɔ,  kɛkɔnge k’okanelɛ ente kengonanghema winá wɔ ankfutami w’avuta w’ekomo yɔngɔsama t’olongo? Lako ntshina ndáwopola nghɔsɔ. Bible ɛnyɛ nsɔsɔlɔ kɛmɔtshi kɛ wɔdju nsipisoyɛ, koko ketoshikikɛ: Yehova apakadjɛki enkambi wɛnde welá looko kawo. (Wala Hebero 13:5b.) Etengo Mɔsɛ nya Elidja, iloyi yɛ daambi y’Akristo w’ankutami w’avuta wa lɔndjɛ́ lɔɔko kɛnɛ, washipisoyɛ djonyi djɛ nkfumba anto ankina. Wananyɔ w’Iloyi yɛ lɔndjɛ wambɔsa ɛnɔnyi efula djɛ nkfumba ampame imɔtshi yemá ɛnkɔkɔ enkina djɛ ndɔlɔndjɛ́. Ndjɔmbɔmba, iwɔ wambolonghanyɛ ankalasa efula djɛ nkfumba tokokolo, elami wɛ djingadjinga, wananyɔ wakamba lá Kɔmite yɛ Filiyalɛ, wananyɔ walenda elemo lá Betɛlɛ la ankina. Wananyɔ w’Iloyi yɛ lɔndjɛ yɔmɛlɛ kɛwɔ wakfumba wananyɔ wakotshɛ́ wakamba lá Kɔmite itshikitanyi yɛ Iloyi yɛ lɔndjɛ. Wananyɔ wakotshɛ́ wasɔ wawɛmba la nkɔmano nkfumɔ má lɔɔko kɛnɛ edjito wɛ nkekete efula. Wambɔlɔngɔsɔlama wɔlɔ efula djɛ ndokindjɛ ndokamba olemo wɔ ndɔndjɛ ɛnkɔkɔ wɛ Kristo.

14. Ikanyi mɛlɛmɛlɛ yɛ djamba djɛnɛ nge?

¹⁴ Ikanyi mɛlɛmɛlɛ yɛ djamba djɛnɛ oyɛwɔ nde lanɛ: Winá wɔ ankfutami w’avuta w’ekomo yɔngɔsama t’olongo ndambo daambi lá ntondo kɛ nkoma l’ekomo kɛ ndjolo k’ekekete, ɔtɛmwɛlɔ wɔ nsɔsɔlɔ w’ongokindjɛ ntshɔ tá ntondo lanɛ lá looko. Mpeyi má ɛlɔndjɛlɔ kɛ Yeso Kristo, enkambi wɛ Ndjambe wangokindjɛ ndɔɔtɛmɔla la nkɔmano nkfumɔ. Lá nsɔsɔlɔ, lá winá wɔsɔ, tongonanyema me Ngɔngɔ kɛ Mangɔngɔ, osanga wɔ lopango w’ewila. (Ezk. 38:18-20) Koko onanyelo w’itetenyi wɔsɔ wopangotonoyɛ; w’opashimbaki enkambi wɛ Yehova djɛ ndɔtɛmɔla. Nde angawikɛ nsɔsɔlɔ! Lá ɛnɛlɔ kɛmɔtshi, ɔpɔstɔlɔ Djɔanɛ ɛnaka ‘oloyi w’ekekete’ w’ɛnkɔkɔ enkina wɛ Kristo. Djɔanɛ atepelaka ante ‘oloyi w’ekekete’ wɔsɔ yaye nde ‘má ndjolo k’ekekete.’ (Ndj. 7:9, 14) Djɛkondeke oyalaso l’eshikikelo ente Yehova angalama!

15-16. Lá nkilika Ndjiso 17:14, kɛkɔnge k’ankfutami w’avuta wa Kristo yongonangha lá winá wɔ mbandji k’Armagɛdɔ, ko lamo nkambo djɛsɔ otokembɛwɔ?

¹⁵ Koko, anto amɔtshi wakoka ndáwopola ambɔ: ‘Iya otepelaso mo dj’ankfutami w’avuta?  Kɛkɔnge kɛ yongonangha m’ɔkɔngɔ wɔ wimelo wɔwɔ má looko?’ Bible nkadjimola papoo lá weepó wɛsɔ. Djɛnyɛ ente ewandji wɛ politikɛ w’andja wanɛ ‘wangonana la Wɔna ɔnkɔkɔ.’ Lá nsɔsɔlɔ, wapangolonga. Towala nghɔnɛ: ‘Wɔna ɔnkɔkɔ angalonga.’ Iya ongokotshɛ́ na? Vɛrse djɛnɛ djekadjimola. Anto w’etawɔ ambɔ ‘weetamisá,’ ‘waasɔnamisá,’ la ‘waalekɔ́ la nkɔmano.’ (Wala Ndjiso 17:14.) Anto wasɔ oyɛwɔ na? Oyɛwɔ nde ankfutami w’avuta wambokfundɔ! Djɛkondeke, winá wɔ ankfutami w’avuta w’ekomo yɔngɔsama t’olongo ndambo daambi lá ntondo k’ekomo kɛ ndjolo k’ekekete, odjito wɔwɔ wɔ ntondo yongoyala nde nana mbandji. Ngo odjito ndeke lonangha wɔlɔ! Akristo w’ankfutami w’avuta amɔtshi wananaki ambandji lá ntondo kɛ nkoma Ewakɛ wɛ Yehova. Amɔtshi wayalaka ole angala l’andja wanɛ. Koko m’ɔkɔngɔ, wambokomá Akristo wa nsɔsɔlɔ la wambeká djɛ ndjala vu. (Nga. 5:22; 2 Te. 3:16) Iwɔ wapasukaka lonkina ambandji y’andja wanɛ. Koko m’ɔkɔngɔ w’iwɔ mpanda t’olongo, wangotokamba l’ompandju wɔ Kristo la wɔ andjelo wande w’ekina djɛ nana mbandji k’ekomo l’antonyi wa Ndjambe.

¹⁶ Tokokanela ndambo daambi. Lanɛ lá looko, Akristo amɔtshi w’ankfutami w’avuta wambokomaka nkokolo efula la wapalekɔ la wolo wɔ demba lonkina. Koko winá wɔ yongokfundɔ djɛ ntowika l’olongo, iwɔ wangotoyala ntongami djɛ nyuma djepavu la djɛ nkfulu efula, ngoyala entshupa djɛ nana esanga la Nkfumi kɛwɔ, Okowo w’alanga, Yeso Kristo. M’ɔkɔngɔ wɔ mbandji k’Armagɛdɔ, iwɔ wangɔsa opiko djɛ ndɔndjɛ wana w’anto dj’iwɔ nkoma djɔ. Ape l’ehamo, iwɔ wangonanghela wananyɔ l’ankaana yɛwɔ ye lanɛ lá looko akambo wa wɔlɔ efula m’olongo ndeka wa yotakoka ndananghela etengo ase ntshamba djɛ djɔ!

17. Wopo wɔkɔnge w’ewaso ente enkambi enkfumɔ wɛ Ndjambe wengolamema lá winá wɔ mbandji k’Armagɛdɔ?

¹⁷ Wɛ olekɔ ɔmɔtshi l’anteyi k’ɛnkɔkɔ enkina? Ntsha ee, iya kɛkɔnge kɛ nghongoyala ladjɛ nangha winá wɔ mbandji kɛ djonyi k’Armagɛdɔ yongowanga? Ngo nkambo dj’anyanya djɛnɛ: Yawɛkɛ le Yehova la lɔnda ɛlɔndjɛlɔ kɛnde. Kɛsɔ okokawɔ nsakisola nge? Bible ntepela etepela w’ɛpɛyɛ lokembo wɛnɛ: ‘Nyingele lá mvulu y’eteyi la nyodjipe nkfuke yɛnyo. Nyisame l’ilá kɛ winá ɛmɔtshi tii nkɛlɛ ohetawɔ.’ (Iza. 26:20) Enkambi wɛ Ndjambe enkfumɔ wɛ nkɔmano welá olongo la looko, wengolamema lá winá wɔsɔ. Etengo ɔpɔstɔlɔ Poolo, tongoyala l’eshikikelo ente ayale ‘enkfumi kana akambo wa winá wɔsɔ kana akambo wayaye . . . wapangokoka ntomamola má ngandji kɛ Ndjambe.’ (Ɔrɔ. 8:38, 39) Vungɔ winá enkfumɔ ente: Yehova nkɔkɔpaka lombombe, la apakokadjɛki lotshinda!