1. Bena Nkidishitu boso bedibue muimu abakende muiyilu nsaa kinyi?

 TAKUDI bipua bibungi muilo w’Efile Mukulu ubaadi awiyipusha’shi: ‘Bena Nkidishitu ba nfudiilo bedibue muimu abakende muiyilu nsaa kinyi?’ Tubaadi atunangushena pangi’shi bangi bedibue muimu abakashaala pa nsenga mu Mpaladiiso bua kapindi kapeela kunyima kua ngoshi ya Armagedone. Anka mu Kitenta kia Mulami kia mu 15/7/2013, tubalongiele’shi bedibue muimu boso abakende muiyilu kumpala kua ngoshi ya Armagedone kubanga.—Mat. 24:31.

2. Ndukonko kinyi lulombene kuibuaa, na nkinyi ki’atukesambila mu uno muisambo?

² Biabia kui lukonko lulombene kuibua lua’shi: Nkinyi akikafikila bena Nkidishitu ba mu “ingi mikooko” abakafubila Yehowa na lulamato pa nsenga mu “kipungo kia mpombo ikata”? (Yo. 10:16; Mat. 24:21) Bangi ba mu kisaka kia ingi mikooko, be kuinyongola’shi t’abakekala na muntu su ngumune a kuibakuasha na kuibapa buludiki nsaa ayikende bakuabo balume na bakashi bedibue muimu muiyilu. Tutaluuleyi mianda ibidi ya mu Bible ilombene kuibatakula mu kunangushena mu uno mushindo. Akupu, atukesambila dingi tubingilo tua buakinyi t’abitungu bekalakashe.

NKINYI KISH’AKIKAFIKILA INGI MIKOOKO?

3-4. Bangi balombene kuiyipusha kinyi, na buakinyi?

³ Bangi mbalombene kuiyipusha su ingi mikooko ayikalekie kufubila Yehowa, nsaa ayikekala bakuetu bedibue muimu ba mu Kasaka ka Bakunkushi-Bakulu tabaki’abebakunkusha’nyi. Pangi bangi be kuipusha bino pa muanda wa ingi mianda ya kala ya mu Bible ayibafikila mu binangu. Tutaluuleyi bileshesho bibidi. Kia kumpala nkitale Tshite-muakuidi Mukata Yekoyada. Baadi mufubi a Efile Mukulu sha lulamato. Aye na mukashi aye Yekoshabate, babaadi bakaluile kano ka nsongualume kabetanyina bu Yoase, na abo nkuikakuasha buakadia kufika bu nfumu e buwa na sha lulamato. Pabaadi Yekoyada na muwa, Yoase baadi alanguila Yehowa na kukita mianda ibuwa. Anka kunyima kua Yekoyada kufua, Yoase babangile kukita mianda i bubi. Baadi muteemeshe banfumu bebubi  ba ingi miilo, na aye nkusumbushena Yehowa.—2 Mya. 24:​2, 15-19.

⁴ Kileshesho kia kabidi nkitale bena Nkidishitu ba mu siekele a kabidi. Yowano mutumibua ngi baadi mutumibua a nfudiilo baadi mushaale na muwa, baadi na bukitshishi bui buwa kui bena Nkidishitu be bungi, baadi muibakuashe buabadia kunyingiila mu mudimo wa Yehowa. (3 Yo. 4) Yowano na bangi batumibua ba Yesu ba mu aa mafuku, babaadi bekitshishe ngofu buabadia kukambila malongiesha a madimi a bantu basumbule lukumiino abaadi apalakane mu aa mafuku. (1 Yo. 2:18; 2 Te. 2:7) Kunyima kua lufu lua Yowano, bena Nkidishitu bebungi babaadi mu tukongie babaadi bafikie bantu basumbule lukumiino. Bipua bibalondele bantu basumbule lukumiino, babalongieshe mianda ya madimi na abo nkutakula bena Nkidishitu buabadia kuikala na muikielo wibubi mu tukongie tooso.

5. Mmueneno kinyi atushi balombene kuikala naye pabitale ino mianda yoso ibidi?

⁵ Ino mianda yoso ibidi ya mu Bible, ayilesha’shi wawa muanda umune aukafikila bena Nkidishitu ba mu ingi mikooko nsaa ayikende bedibue muimu muiyilu su? Mu kiakia kipungo bena Nkidishitu basha lulamato be pa nsenga, be kubanga kukita mianda i bubi bu bibakitshine Yoase, na kutuelekana mu malongiesha a bantu basumbule lukumiino bu bibakitshine bena Nkidishitu be bungi ba mu siekele a kabidi bino bipungo bietu su? Lualuulo lui’shi t’abikekala biabia su nkapela nya! Tui balombene kushinkamisha’shi apakende bedibue muimu muiyilu, ingi mikooko ayikatungunuka nka na kulanguila Yehowa mu mushindo wi buwa, dingi Yehowa akatungunuka na kuiyipasukila. Buakinyi tui kuikala na kiakia kishinkamisho?

MUILO WA YEHOWA AUKATUNGUNUKA EFUKU DIOSO NA KUMULANGUILA MU MUSHINDO WADI MUKUMIINE

6. Mbipungo kinyi bisatu bi’atukataluula mu kikoso?

⁶ Buakinyi tui balombene kushinkamisha’shi muilo wa Yehowa aukatungunuka nka na kumulanguila mu mushindo wadi mukumiine mu bipungo bi bukopo abikafiki mu mafuku e kumpala? Mpa muanda wabiatudi balongie mu Bible pabitale kino kipungo kia ano mafuku eetu. Kino kipungo nkilekene ngofu na kipungo kia bena Isalele a kala, na kipungo kia bena Nkidishitu ba mu siekele a kabidi. Biabia tutaluuleyi kalolo pabitale bino bipungo bisatu: (1) Kipungo kia bena Isalele ba kala, (2) kipungo kia kunyima kua lufu lua batumibua, na (3) bino bipungo bietu, kuamba’shi “bipungo bia kualushuula mianda yoso.”—Bik. 3:21.

7. Buakinyi mu Isalele a kala bantu ta babaadi batshobolokie nsaa ibaadi muilo na banfumu basangule bua kukita mianda ibubi?

⁷ Kipungo kia bena Isalele ba kala. Mafuku apeela kumpala kua lufu luaye, Moyise balunguile bena Isalele’shi: “Neûku’shi, su nápu kufwa, anwe bena Isalêle anukakishakisha kupona mu milwisho, nukatupilwe mwitabula di nenukamikile kulonda.” (Mya. 31:​29, EEM) Moyise badimuishe dingi bena Isalele’shi su batomboka, ingi miilo ayikebatuala mbupika. (Mya. 28:​35, 36) Ano mayi ooso abalombene su? Oolo. Munda a bipua nkama, banfumu be bungi babaadi bakite mianda ibubi kumpala kua Yehowa, na muilo ubaadi wibalonde bua kukita lulanguilo lua madimi. Pa muanda wa biabia Yehowa baadi munyokie muilo wa bena Isalele untomboshi, na tabaadi mutadiile bua’shi banfumu ba bena Isalele be bakunkushe dingi nya. (Es. 21:​25-27) Anka, bena Isalele basha lulamato babapetele eshimba dinyingie nsaa ibabamuene kulombana ku’Eyi dia Yehowa.—Yesh. 55:​10, 11.

8. Tui balombene kukaanya bua bibadi tukongie tua bena Nkidishitu ba mu siekele a kabidi tulekie kufubila Yehowa mu mushindo wadi mukumiine su? Patuula.

⁸ Kipungo kia kunyima kua lufu lua batumibua. Bi kuitukaanyisha bua mushindo ubaadi tukongie tua mu siekele a kabidi tulekie kulanguila Yehowa mu mushindo wadi mukumiine su? Nya, ta mbilombene kuitukanyisha. Yesu bapuile kutemuka’shi bantu be bungi abakasumbula lukumiino. (Mat. 7:​21-23; 13:​24-30, 36-43) Batumibua bu  bano, Mpoolo, Mpiele na Yowano babaadi bashinkamishe’shi butemuki bua Yesu bubaadi bupue kubanga kulombana mu siekele a kumpala bino bipungo bietu (B.B.). (2 Te. 2:​3, 7; 2 Mp. 2:1; 1 Yo. 2:18) Mu siekele a kabidi (B.B.) tukongie tua bena Nkidishitu tubalekiele kulanguila Yehowa mu mushindo wadi mukumiine. Bena Nkidishitu kuishina basumbule lukumiino bababangile, na abo nkufika kipindi kikata kia Babilone Mukata, nsangilo a bipuilo bioso bia madimi. Na dingi butemuki bua Yesu buyokielue bubalombene.

9. Kino kipungo kietu nkilekeene na kipungo kia bena Iselele ba kala na kipungo kia bena Nkidishitu ba mu siekele a kabidi naminyi?

⁹ “Kipungo kia kualushuula mianda yoso.” Kino kipungo kietu nkilekeene ngofu na kipungo kia bena Isalele a kala, na kipungo kibabangile kupalakana malongiesha a bena Nkidishitu basumbule lukumiino mu siekele a kabidi (B.B.). Kino kipungo kietu abekitanyina naminyi? Tui kuitanyina kino kipungo kietu’shi “mafuku a ku nfudiilo” a uno ndumbuluilo a mianda. (2 Ti. 3:1) Anka, Bible alesha’shi kipungo kikata na kibula nkibangie mu ano mafuku amune. Akikatungunuka mpa na ku Bufumu bua Mesiya abukekasha bantu bapuidikie, na kualuula nsenga ifikie Mpaladiiso. Kino kipungo abekitanyina’shi “bipungo bia kualushuula mianda yoso.” (Bik. 3:21) Kino kipungo kibabangile mu 1914. Nkinyi kibaadi kialushuulue? Yesu baadi mutudibue bu Nfumu muiyilu. Kubanga nka paapa, Yehowa bapetele dingi muntu a kukunkusha alesha mpala Yaaye, kekulu ka mufubi aaye sha lulamato Davide. Biabia, ta nka penda buabua bufumu ngi kintu kioso kiabadi balushuule kui Yehowa nya. Kunyima kua biabia, lulanguilo luiselele lubabangile kualushuulua mu ano mafuku a ku nfudiilo! (Yesh. 2:​2-4; Es. 11:​17-20) Alukakitshika dingi mu mushindo ushi ukumiine Yehowa su?

10. (a) Bible bapuile kutemuka kinyi pabitale lulanguilo luiselele mu kino kipungo kietu? (Yeeshaya 54:17) (b) Buakinyi ano matemuki ooso nga kukulupila?

¹⁰ Badika Yeeshaya 54:17. Banda kunangushena pabitale buno butemuki abuamba’shi: “Kilonda kyooso kifushiibwe bwa kulwa noobe ngoshi, t’aakikitshi kintu’kyo.” Ano mayi ayokelue akuete kulombana lelo uno. Ano mayi aalondo aakankamika akuete kulombana dingi mu kino kipungo kietu, aamba’shi: ‘Bana bobe boso balume abakeekala balongi ba Yehowa, dingi abakekala mu butaale, okekala pa mbalo ya bululame dingi tokekala na moo wa kintu sunga nkimune, kutshina akwende kula noobe, t’akuisesela dimo peepi noobe.’ (Yesh. 54:​13, 14) Sunga “efile a uno ndumbuluilo,” Satana ta mulombene kuimika mudimo wa muilo wa Yehowa wa bakuete kukita bua kulongiesha bangi pabitale Yehowa. (2 Ko. 4:4) Mbapue kualusha lulanguilo luiselele na dingi ta luana kitshikie bu bishabikumiina Yehowa. Ndupue kuikala kuanka bua losoo. Kilonda kioso kifushibue bua kulua netu ngoshi t’akikitshi kintu’kio!

 NKINYI AKIKAKITSHIKA?

11. Nkinyi akitushinkamiisha’shi t’abakasumbushena kibumbu kikata nsaa ayikende bedibue muimu muiyilu?

¹¹ Nkinyi akikakitshika nsaa y’abakaata bedibue muimu bua badia kuenda muiyilu? Tentekiesha’shi, Yesu Mmulami eetu. Aye ngi muikale mutue wa kakongie ka bena Nkidishitu. Yesu bakuile pa butooka’shi: “Mukunkushi enu ngumune, Nkidishitu.” (Mat. 23:10) Yesu muikale mukunkushi muiyilu ekala apasukila balongi baaye ba binyibinyi efuku dioso. Bu bikale’shi Nkidishitu nyi e na buabua bushito, balongi baye be pano pa nsenga t’abakatshinyi kintu su nkimune. Mu binyibinyi, t’atuwuku mianda yoso kantu pa kantu pabitale Nkidishitu bi’akakunkusha bantu baaye mu kiakia kipungo nya. Biabia tubandeyi kutala bingi bileshesho bia mu Bible bilombene kuitushinkamiisha.

12. Mu mushindo kinyi ubaadi Yehowa mupasukile muilo waye (a) kunyima kua lufu lua Moyise? (b) kunyima kua Eliya kupeta ungi mudimo? (Tala dingi kifuatulo.)

¹² Kumpala kua bena Isalele kutuela mu Nsenga ya Mulayilo, Moyise bafuile. Nkinyi kibaadi kifikile muilo w’Efile Mukulu? Biabia Yehowa baadi mulekie kukuasha muilo waye kunyima kua uno muana mulume sha lulamato kufua su? Nya. Mafuku ooso abaabadi bashaale na lulamato, Yehowa baadi ebapa bintu bibaabadi nabio lukalo. Kumpala kua’shi Moyise afue, Yehowa bamulunguile bua’shi ape Yooshwa bushito bua kukunkusha muilo. Na Moyise namu babangile kulongiesha Yooshwa munda a bipua bi bungi. (Efi. 33:11; Miy. 34:9) Kukatusha biabia, kubaadi bana balume be bungi bena ngobesha ya kukunkusha, bu banfumu ba binunu, ba nkama, ba makumi atano, mpaa na ba bantu ekumi. (Miy. 1:15) Babaadi abapasukila muilo w’Efile Mukulu kalolo. Kingi kileshesho ki’atupete nkia Eliya. Baadi mukunkushe lulanguilo luiselele munkatshi mua bena Isalele munda a bipua bi bungi. Anka kipungo kibalombene, nsaa ibaabadi bamukatushe kui Yehowa amutuma mu ungi mudimo kuushi ku’eumbo dia bena Yuda. (2 Bf. 2:1; 2 Mya. 21:12) Babaadi basumbushene uno muilo w’Efile Mukulu wa bantu basha lulamato wa mu bisaka ekumi bia mu bufumu bua Isalele su? Nya. Eliya baadi mulongieshe Elisha munda mua bipua bi bungi. Kubaadi dingi bana ba batemuki babaadi abatungu’shi balongieshibue kalolo mianda ilekeenelekeene. (2 Bf. 2:7) Biabia, kubaadi bana balume basha lulamato bepaane bua kukuasha na kukunkusha muilo w’Efile Mukulu. Yehowa ki’atungunuka na kulombasha mpango yaye na kupasukila balanguidi baye basha lulamato.

13. Nkishinkamiisho kinyi ki’atupete mu Bena Ebelu 13:5b? (Tala dingi kifuatulo.)

¹³ Na bino bileshesho mu binangu, onangushena’shi akukakitshika kinyi apakende bedibue muimu ba nfudiilo muiyilu? Ta tui na lukalo lua kuiyipusha bino bioso nya. Bible akula mianda ipeele ayitushinkamisha bia binyibinyi, amba’shi:  Yehowa t’akasumbushena muilo waye wi pa nsenga. (Badika Bena Ebelu 13:5b.) Nka bu Moyise na Eliya, kasaka kapeela ka bakuetu bena Nkidishitu bedibue muimu bakuete kukunkusha lelo uno, abapushaa buakinyi bina muulo wa kulongiesha bangi. Munda mua bipua bibungi, bakuetu balume ba mu Kasaka ka Bakunkushi-Bakulu, bakuete kulongiesha bana balume be bungi ba munkatshi mua ingi mikooko buabadia kukunkusha. Bu kileshesho, mbalumbuule tulaasa tuibungi bua kulongiesha bakulu, bakunkushi ba bifunda, bena Komite a ma Filiale, bakunkushi ba midimo ku Betele, na tungi tulaasa. Kasaka ka Bakunkushi-Bakulu ako ka nabene kakuete kulongiesha bakuashi ba ma komite elekeenelekeene a Kasaka ka Bakunkushi-Bakulu. Bano bakuashi basha lulamato binobino, mbakumiine kuata mashito e bungi mu ndumbuluilo a Yehowa. Bakuete kuilumbuula kalolo buabadia kutungunuka na mudimo wa kupasukila mikooko ya Nkidishitu.

14. Muanda kinyi ukata watuisambila mu uno muisambo?

¹⁴ Pano ngi pe muanda ukata wa mu muisambo wetu: Apakende bedibue muimu ba nfudiilo muiyilu, peepi na nfudiilo a mpombo ikata, muilo wa Yehowa wi pano pa nsenga aukatungunuka na kumufubila na lulamato losoo. Ku bukuashi bua bukunkushi bua Yesu Nkidishitu, balanguidi b’Efile Mukulu, t’abakakutua kintu su nkimune. Mu binyibinyi mu aa mafuku, kisaka kia maumbo esangie ki’abayitanyina kui Bible bu Goge a kuiwumbo dia Magoge, akikatuuku muilo w’Efile Mukulu ngoshi. (Es. 38:​18-20) Anka ino ngoshi ya kapindi kapeela t’ayikoobesha, t’ayikemika muilo y’Efile Mukulu buawudia kuleka kulanguila Yehowa. Yehowa akebakaluila mu binyibinyi! Mu kimonua Yowano mutumibua bamuene kibumbu kikata kia ingi mikooko ya Nkidishitu. Yowano bakuile’shi kino “kibumbu kikata” akituukila mu “mpombo ikata.” (Kbf. 7:​9, 14) Oolo, biabia atuuku’shi Yehowa akebapaasha!

15-16. Muyile mukanda wa Kibafumbuilue 17:​14, bena Nkidishitu bedibue muimu abakakitshi kinyi mu kipungo kia ngoshi ya Armagedone, na buakinyi bino abitunyingisha?

¹⁵ Biabia bangi mbalombene kuiyipusha’shi: ‘Abikala naminyi bua bedibue muimu? Bedibue muimu abakakitshi kinyi kunyima kuabo kuenda muiyilu?’ Bible aluula kalolo ku luno lukonko. Amba’shi bakata ba mianda ya politike “abakalu na muana a Mukooko.” Na abakakambilua. Ngi buakinyi atubadika’shi: “Muana a Mukooko  akebatshimuna.” Kadi nanyi akamukuasha? Verse aluula’shi mbaaba booso “betaminyibue” na “basangudibue” na “be na lulamato.” (Badika Kibafumbuilue 17:14.) Benyi bano boso mbanyi? Nyi mbaaba bedibue muimu abakasanguka! Biabia nsaa y’abakaata bedibue muimu ba nfudiilo bua kuenda muiyilu, peepi na nfudiilo a mpombo ikata, mudimo wa kumpala wabakebapa ngua kulua ngoshi. Mmudimo wi buwa bui moo! Bangi bena Nkidishitu bedibue muimu babaadi abalu ngoshi kumpala kuabadia kuikala bu Tumonyi tua Yehowa. Bangi namu babaadi batuele busalayi bua mu uno ndumbuluilo. Anka kunyima, mbafikie bena Nkidishitu ba binyibinyi, balonga bia kuikala mu butaale na bangi. (Nga. 5:22; 2 Te. 3:16) Mbalekie kulua ngoshi ya pano pa nsenga. Biabia, kunyima kuabo kuenda muiyilu abakafubu pamune na Nkidishitu na ba mikeyilu beselele, buabadia kulua ngoshi ya nfudiilo na beshikuanyi b’Efile Mukulu.

¹⁶ Banda kunangushena abikekala ino ngoshi. Bangi bena Nkidishitu bedibue muimu baki pa nsenga tabadi banunu. Bangi tabaki bukome’nyi, anka p’abakasanguka bua kuenda muiyilu abakekala bipangua bia mu kikudi bish’abifu na bina bukome bui bungi, abikakuatshishena Nfumu muikale kilobo kia ngoshi Yesu Nkidishitu. Kunyima kua kulua ngoshi ya Armagedone, abakafubu pamune na Yesu bua kukuasha bantu bua’shi bekale bapuidikie. Kushi mpaka, abakakitshina bakuabo ba kifulo balume na bakashi be pa nsenga mianda ibungi ibuwa yabashi balombene kukita pabaki bakutue kupuidika pano pa nsenga!

17. Atuuku naminyi’shi bafubi booso b’Efile Mukulu abakapashiibua mu kipungo kia ngoshi ya Armagedone?

¹⁷ We a mu kisaka kia ingi mikooko su? Na dingi nkintu kinyi kina muulo ukata akitungu’shi okite apakabanga Armagedone? Nkukita nka penda bino abilondo: Kukulupila mui Yehowa na kulonda buludiki buaye. Ingi mianda kinyi i mu kukulupila kua Yehowa na kulonda buludiki buaye? Bible etukankamika p’akula’shi: ‘Twelai mu mashibo enu, nwishitshile. Nubande kufwama mpâ n’apakakidila nsungu ikata ya Yehowa.’ (Yesh. 26:​20, EEM) Bafubi b’Efile Mukulu be muiyilu mpaa na be nsenga, abakapashibua mu kiakia kipungo. Nka bu Mpoolo mutumibua, tui bashinkamishe’shi, “sunga mbulamatadi, sunga mianda ya binobino, sunga mianda ayifiki . . . tangilombene kuituabuula ku kifulo ki’Efile Mukulu.” (Lom. 8:​38, 39) Ikala otentekiesha misuusa yoso’shi: Yehowa mmukufule, na t’anakusumbushene nya!